Azərbaycan xalqı dünyada özünü sülhsevər xalq kimi təsdiq edib

Yeni Azərbaycan Partiyası Qadınlar Şurasının sədri Nurlana Əliyeva www.yap.org.az saytına müsahibə verib:

- Nurlana xanım, bugünlərdə Türkiyənin Ədalət və İnkişaf Partiyasının Qadın Qolunun qurultayında iştirak etmək üçün Ankarada səfərdə olmusunuz. Səfər təəssüratlarınız necədir?

- Öncə qeyd edim ki, Azərbaycanla Türkiyə arasında münasibətlər strateji müttəfiqlik səviyyəsindədir. Bizim əlaqələrimiz dostluq və qardaşlıq prinsiplərinə əsaslanır. Bu münasibətlər Yeni Azərbaycan Partiyası ilə Türkiyənin Ədalət və İnkişaf Partiyasının (AKP) əlaqələrində də özünü göstərir. Biz bunun AKP-nin Qadın Qolunun 3-cü Qurultayında iştirak etmək üçün Türkiyəyə etdiyimiz səfər zamanı bir daha şahidi olduq. Xatırladım ki, qurultayda mən, YAP Siyasi Şurasının üzvü, millət vəkili Məlahət İbrahimqızı və millət vəkili Sədaqət Vəliyeva iştirak etmişik. AKP-nin Qadın Qolunun möhtəşəm qurultayında başqa ölkələrdən qonaq qismində 100-dən artıq qadın iştirak edirdi. Çox maraqlı bir qurultay keçdi. Bu qurultay əsasən ona görə mənim yaddaşımda qaldı ki, türk qadınının qurultayı idi, orada türk ruhu daha çox duyulurdu. Qurultay insana çox möhtəşəm bir təsir bağışlayırdı. Mən əvvəlcə bu möhtəşəmliyin sadəcə, insanların çoxluğundan irəli gəldiyini düşünürdüm, sonra gördüm ki, bunun səbəbi oraya qatılan hər bir qadının daxilindən gələn hisslərin, duyğuların məcmusundan irəli gəlir.

Tədbirdə çıxışlara verilən reaksiya, göstərilən sayğı, diqqət, hörmət ortada idi. İştirakçılar bu münasibəti hətta ayağa duraraq hər hansı bir şüarı səsləndirməklə, mahnı oxumaqla və s. kimi biruzə verirdilər. Qonaq qismində, ilk olaraq, Azərbaycandan YAP Qadınlar Şurasının sədri kimi, mənə söz verildi. Çıxışımda ölkələrimiz və partiyalarımız arasındakı münasbətlərdən ətraflı bəhs etdim, xalqlarımız arasındakı qardaşlıq münasibətlərinə dair öz fikirlərimi bölüşdüm. YAP-ın, Azərbaycanın təmsilçisi olaraq onlarla əməkdaşlığı daha da gücləndirməyə hər zaman hazır olduğumuzu bəyan etdim. Bir daha vurğuladım ki, hər bir qadın istəyir ki, dünyada güllələr açılmasın, güllər açılsın. Bildirdim ki, bu güllələrin açılmaması üçün hər bir xalqın sinəsini sipər edən oğulları var və bu oğulları da dünyaya gətirən analar olub. Mustafa Kamal Atatürk deyib ki, dünyanın uğurları qiymətli anaların böyütdüyü oğulların işidir. Və bu mənada ananın, qadının nə qədər şərəfli bir varlıq olduğu məlum olur. Mən öz çıxışımda Hüseyn Cavidin ana, qadın haqqında misralarını da xatırladım.

Mənə verilmiş imkandan istifadə edərək öz fikirlərimi qurultay iştirakçılarının nəzərinə çatdırdım. Azərbaycanın mövqeyi orada çox hörmətlə qəbul olundu. Ümumiyyətlə, orada cəmisi bir neçə dövlətin nümayəndəsi qonaq qismində çıxış etdi ki, bunlardan biri də Azərbaycan dövləti idi. Çox qürur hissi keçirdim ki, Azərbaycanın uğurları qardaş Türkiyədə də böyük sevinclə qarşılanır.

Qurultayda Türkiyənin Baş naziri, partiyanın sədri Rəcəb Tayyib Ərdoğan da çıxış etdi. R.T.Ərdoğan çıxışında son dövrlərdə Türkiyə qadınlarına verilmiş imtiyazlardan söhbət açdı. Həqiqətən də, bu ölkədə qadınlar üçün çox gözəl imkanlar yaradılıb. Bu məsələlər qadınlara hörmətdən, dövlətin qadınlara münasibətindən xəbər verir. Çünki qadın xoşbəxtdirsə, onda ölkədə ailə xoşbəxtdir, övlad xoşbəxtdir və deməli, bütövlükdə cəmiyyət xoşbəxtdir. Bu mənada Baş nazirin çıxışı çox mənalı, gözəl bir çıxış idi və hər bir qadını mübariz olmağa, qədirbilənliyə səsləyirdi. Türkiyə cəmiyyətinin formalaşmasında, inkişafında, tərəqqisində qadınların rolunun çox böyük olması faktlarla, rəqəmlərlə açıqlandı. AKP liderinin çıxışı hərarətli alqışlarla qarşılandı. Hətta əksər qadının gözü dolmuşdu, çünki onun çıxışı hər bir qadının ürəyindən xəbər verirdi.

- Səfər çərçivəsində daha hansı görüşləriniz oldu? Qardaş ölkədə inkişaf baxımından nə kimi yeniliklər müşahidə edilir?

- Qurultay zamanı da, ondan sonra da, yəni bütün səfərimiz dövründə biz çox sevgi və diqqətlə əhatə olunmuşduq. Qonaqların şərəfinə ailə və sosial siyasət naziri Fatma Şahin, Ankara şəhər bələdiyyəsinin başqanı Melih Gökçek ziyafətlər verdilər. Eyni zamanda, Ankaranın ən gözəl yerlərində olduq, qədim tarixi abidələri ziyarət etdik. Orada küçələr bizim İçərişəhəri xatırladırdı, müasirliklə qədimliyin sintezi idi. Mənim diqqətimi cəlb edən məsələlərdən biri də budur ki, Ankarada böyük şəhər bələdiyyəsinin təşəbbüsü ilə təşkil olunan ailə mərkəzləri fəaliyyət göstərir. Şəhərin özündə 8 belə bina tikilib, ətrafda da daha 22 bina var. Həmin mərkəzlərdə əlil adamlar, yaşlı adamlar, cavanlar üçün, qadınlar üçün, uşaqlar üçün otaqlar var, müxtəlif növ əyləncə mərkəzləri xidmət göstərir. Məsələn, uşaqlara idman növlərini öyrədirlər, musiqi dərsi verirlər, qadınlara tikiş dərsləri keçirilir və s. İnsanların asudə vaxtlarını bu cür təşkil etmək cəmiyyət üçün vacib bir məsələdir. Onu da deyim ki, bütün bu xidmətlərin hamısı insanlar üçün pulsuzdur.

Son illər Ankarada insanların asudə vaxtlarını təşkil etmək üçün müxtəlif istirahət mərkəzləri fəaliyyətə başlayıb. Bütün bunlar insanlar üçün gözəl istirahət məkanına çevrilib. Bu cür qayğı, yüksək mədəni səviyyədə xidmət mənim diqqətimi çəkdi. Ankarada şəhər meri ziyafət verdi. Həmin ziyafətdə mənə söz verdilər. Mən qeyd etdim ki, üç il bundan öncə də AKP Qadın Qolunun qurultayında iştirak etmək üçün Ankarada olmuşam. Ötən üç il ərzində Ankarada böyük işlər görülüb. Azərbaycanda da böyük abadlıq, quruculuq işlərinin həyata keçirildiyini diqqətə çatdırdım. Hətta şəhərimiz, paytaxtımız o qədər gözəlləşib ki, özümüz də onu tanıya bilmirik. Bu, bizim möhtərəm Prezidentimiz İlham Əliyev tərəfindən hər birimizin qəlbində abidəsi ucalmış Heydər Əliyevin arzularının həyata keçirilməsi istiqamətində apardığı siyasətin nəticəsidir. Bütün bunlar hər bir azərbaycanlını sevindirir.

- Ümumiyyətlə, qadınların cəmiyyətdəki rolu haqqında nə deyə bilərsiniz? Onların qarşısında duran məqsəd və vəzifələr nədən ibarətdir?

- Həqiqətən də, bu gün cəmiyyəti qadınsız təsəvvür etmək mümkün deyil. Çünki qadının cəmiyyətdəki rolu danılmazdır, ilk növbədə qadın tərbiyəçidir. Çünki baş verən bütün hadisələr insanın ibtidai tərbiyəsindən irəli gəlir. Bir tərəfdən, insan nəcib, qədirbilən, əqidəsinə sədaqətli olur, gözəl insani keyfiyyətlərlə zənginləşir. Bir də əksinə, bəzi insanlar yalançı olur, hər zaman özünü düşünür, yalnız pislik etmək, zərbə vurmaq, əziyyət vermək kimi xislətlərdə olurlar. Dünyada gərginliklərin, müharibələrin də yaranması həmin insanların əməllərindən irəli gəlir. Bu mənada, tərbiyə çox böyük və önəmli, dünya üçün vacib olan bir məsələdir. Biz çalışmalıyıq ki, övladlarımızı əsl insani keyfiyyətlərlə zəngin bir varlıq şəklində tərbiyə edək.

Qadın məsələləri həmişə dövlətimizin diqqət mərkəzində olub. Ümummilli liderimiz Heydər Əliyev ölkə rəhbərliyinə gəldiyi dövrdən daim qadınların problemləri ilə maraqlanmış, onların irəli çəkilməsi üçün şərait yaratmışdır. Ulu öndərimizin verdiyi bir çox qərar və sərəncamlar Onun cəmiyyətdə gender balansının formalaşdırılması sahəsində uzaqgörən siyasətinin əməli ifadəsidir.

- Azərbaycanın sürətli inkişaf yolunda olduğunu qeyd etdiniz. Bu baxımdan, “Eurovision” mahnı müsabiqəsinin də ölkəmizdə keçirilməsi ölkəmizin nüfuzunun göstəricisidir...

- Azərbaycanda “Eurovision” musiqi yarışmasının keçirilməsi çox böyük hadisədir. Ölkəmiz bu nüfuzlu beynəlxalq tədbirə yüksək səviyyədə ev sahibliyi etdi. Duzdür, “Eurovision” yarışmasının məqsədi gözəldir, musiqinin, mahnının sərhədi yoxdur. Eyni zamanda, bu cür beynəlxalq tədbirlər millətləri biri-birinə yaxınlaşdırır. Hər millət digərinin istedadına, amalına daha yaxından bələd olur. Bu gün Azərbaycanımız haqqında dünyadakı müsbət fikirlər bizi çox fərəhləndirir. Dünya ictimaiyyəti Azərbaycana qarşı diqqətlidir, insanlar Azərbaycana səfərlər edirlər, münasibətlər yaranır, Azərbaycan haqqında prinsipial, düzgün mövqelər ortaya qoyulur. Heydər Əliyev Fondunun prezidenti, millət vəkili Mehriban xanım Əliyevanın rəhbərliyi ilə Təşkilat Komitəsi “Eurovision” mahnı müsabiqəsini çox yüksək səviyyədə hazırlayaraq həyata keçirdi. Ümumiyyətlə, Mehriban xanım Əliyeva Azərbaycan mədəniyyətinin dünyada təbliğ olunması istiqamətində misilsiz xidmətlər göstərir. Onun təşəbbüsü və iştirakı ilə Avropa ölkələrində bizim görkəmli, tanınmış sənətkarlarımızın, gənc istedadlarımızın konsertləri təşkil edilir. Səhnədə bizim gənc istedadlarımızın ifası həmin ölkənin nümayəndələrini riqqətə gətirirdi, ürəklərində böyük hisslər yaradırdı. Mən əminəm ki, həmin ölkələrdə Azərbaycan analarının tərbiyə etdiyi o cür istedadlı övladları görən hər bir ağıllı insan başa düşür ki, Azərbaycan necə gözəl ölkədir. Mən belə tədbirləri dəstəkləyirəm və inanıram ki, bundan sonra da bu tədbirlər davamlı olacaq, Azərbaycanı təbliğ edəcək. İnanıram ki, Azərbaycan cəmiyyətində, gəncliyində daha irəliyə doğru təşəbbüslər var. Gənclik bizim gələcəyimizdir. Gənclik yaxşı inkişaf edəndə, doğru yolda olanda ağıllı, zəkalı formalaşanda gələcəyə ümidlə baxılır. Hər br atanın, ananın borcu odur ki, ilk növbədə övladını cəmiyyətə layiq bir insan kimi yetişdirsin.

- Sizcə, bu tədbirlər Azərbaycan həqiqətlərinin dünyaya çatdırılmasında nə dərəcədə rol oynayır?

- Əlbəttə ki, ölkəmizin nüfuzlu beynəlxalq tədbirlərə ev sahibliyi etməsi, eləcə də, xarici ölkələrdə təşkil olunmuş müxtəlif tədbirlərdə təmsil olunmağımız bu baxımdan çox əhəmiyyətlidir. Hər bir tədbirdə, ölkəmizin nailiyyətləri təbliğ edilir, həmçinin üzləşdiyimiz problemlər də diqqətə çatdırılır. Bu gün Azərbaycan zorla münaqişəyə cəlb olunub, ölkəmizə qarşı təcavüz edilib. Azərbaycan dövləti torpaqları azad etməklə yanaşı, millətinin, xalqının gələcəyini düşünür. Təbii ki, Azərbaycanın ən əsas problemi ərazi bütövlüyünün təmin olunmasıdır. Ölkəmiz qan tökülməsini istəmir, problemin sülh yolu ilə həll edilməsinin tərəfdarıdır. Azərbaycanın indiyə qədər heç bir xalqın torpağında gözü olmayıb. Bu gün Azərbaycanın yeraltı sərvətləri var, yüksək intellektual səviyyəyə malik insan kapitalı mövcuddur. Biz bu kapitaldan istifadə edib başqa millətlərə qarşı addımlar atmırıq. Məqsədimiz yalnız sülhdür, sabitlikdir, cəmiyyətimizin inkişafıdır.

Təbii ki, bütün bunlar beynəlxalq müstəvidə təbliğ edilir. Dünya ictimaiyyəti Azərbaycan xalqının necə sülsevər, tərəqqipərvər olduğunun, bəşəri dəyərlərə sadiqliyinin şahidi olur. Ona görə də, Azərbaycanın uğurları, inkişafı dünya miqyasında böyük rəğbətlə qarşılanır.

Yeni Azərbaycan.- 2012.- 5 iyun.- S.4.