Prezident İlham Əliyevin rəhbərliyi altında sahibkarlığın inkişafı istiqamətində atılan addımlar ölkənin davamlı inkişafına yönəlmiş sistemli və ardıcıl fəaliyyət konsepsiyasıdır

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının Prezidenti Məmməd Musayev www.yap.org.az saytına müsahibə verib:

- Məmməd müəllim, məlum olduğu kimi, Azərbaycanda sahibkarlığın inkişafına xüsusi dövlət qayğısı mövcuddur. Bu amil bütövlükdə ölkə sahibkarlarının fəaliyyətinə nə dərəcədə təsir göstərir?

- Azərbaycanda müasir milli sahibkarlığın inkişafı bilavasitə 1993-cü ilin ortalarından başlamışdır. Həmin dövrdə Ümummilli lider Heydər Əliyev demokratik həyat tərzinin diktə etdiyi gerçəklik kimi bazar iqtisadiyyatı prinsiplərinə sadiq qalaraq Azərbaycanın yeni dövr üçün prioritetlərini müəyyənləşdirmiş və ölkənin iqtisadi siyasətinin təməlini qoymuşdur. Ölkə iqtisadiyyatının sürətli inkişafında özünəməxsus rolu olan, sahibkarlıq fəaliyyətinin genişlənməsinə dəstək verən Azərbaycan Sahibkarlar (İşəgötürənlər) Təşkilatları Milli Konfederasiyası ölkə Prezidenti cənab İlham Əliyevin sahibkarlığın inkişafı sahəsində müəyyənləşdirdiyi strategiyanın uğurla həyata keçirilməsinə öz töhfəsini verir. Ümumiyyətlə Azərbaycanın bazar iqtisadiyyatına keçidlə bağlı ilkin təcrübəsi göstərdi ki, sahibkarlığın, özəl sektorun inkişafına normal şərait yaratmadan iqtisadi yüksəlişi təmin etmək, əhalinin məsğulluğunu təmin etmək, infrastrukturu yeniləşdirmək, sosial məsələlərin həllinə nail olmaq mümkün deyildir. Sahibkarlar Konfederasiyası olaraq bunları dərk edir, ölkənin davamlı inkişafını təmin edəcək yeni iqtisadi siyasətin həyata keçirilməsində və bununla bağlı qanunvericilik bazasının təkmilləşdirilməsində yaxından iştirak etməyə çalışırıq.

Dövlət rəhbərinin həyata keçirdiyi məqsədyönlü iqtisadi siyasət hesabına Azərbaycanda özəl sektor yeni inkişaf mərhələsinə qədəm qoymuş, sahibkarlığın inkişafına diqqət daha da artırılmışdır. Kiçik və orta sahibkarlığın güzəştli kreditlərlə maliyyələşdirilməsi mexanizmləri daha da təkmilləşdirilmiş, iş adamlarının fəaliyyətinə yersiz müdaxilələrin qarşısının alınması, bu sahədə inkişafa mane olan problemlərin aradan qaldırılması istiqamətində mühüm addımlar atılmışdır. Regionlarda mühüm infrastruktur layihələrinin həyata keçirilməsi, göstərilən xidmətlərin keyfiyyətinin yaxşılaşdırılması, antiinhisar fəaliyyətinin gücləndirilməsi, inflyasiyanın qarşısının alınması üçün əsaslı tədbirlərin görülməsi, “Korrupsiyaya qarşı mübarizə üzrə Dövlət Proqramı”nın təsdiqlənməsi, bir pəncərə prinsipinin tətbiqi ilə biznes subyektlərinin qeydiyyat və lisenziya sisteminin sadələşdirilməsi, yerlərdə regional iqtisad məhkəmələrinin yaradılması və digər tədbirlər bu istiqamətdə atılmış ciddi addımlardır.

Dövlət başçısının ölkədə sahibkarlığın inkişafı istiqamətində atdığı addımlar da ölkənin davamlı inkişafına yönəlmiş sistemli və ardıcıl fəaliyyət konsepsiyasına əsaslanır. Bazar mexanizminin hərəkətverici qüvvəsi hesab edilən sahibkarlığın inkişafı keçid iqtisadiyyatlı ölkələrin siyasi, sosial-iqtisadi sisteminin yenidən qurulmasında, sosialyönümlü problemlərin kompleks həllində mühüm rol oynayan sahibkarlığın inkişafı, orta təbəqənin formalaşması, aparılan inkişaf prosesində bir harmoniya yaradır.

Azərbaycanda sahibkarlığı inkişaf etdirən amillərdən biri də regionlarda rəqabət qabiliyyətli və ixracyönümlü məhsullar istehsal edən, müasir texnologiyalara əsaslanan müəssisələrin yaradılmasıdır. Regionlarda istehsal olunan bir cox məhsullarımız artıq Avropa və Amerika bazarlarına da ixrac olunur ki, bu da bütövlükdə ixrac payında qeyri-neft məhsullarının payını artırır. İxracyönümlü məhsul istehsal edən müəssisələrə dövlət dəstəyinin genişləndirilməsi və ixrac imkanlarının artırılması istiqamətində işlər davam etdirilir.

- Bildiyiniz kimi, ölkəmizdə investisiya qoyuluşu ilbəil artmaqdadir. Bu prosesdə sahibkarların da öz payı var. Diqqətçəkən məqamlardan biri odur ki, Azərbaycan sahibkarları tərəfindən xarici ölkələrin iqtisadiyyatına da sərmayə qoyuluşu artır. Bu uğuru hansı amillərlə izah edərdiniz?

- Prezident İlham Əliyev Nazirlər Kabinetinin 2011-ci ilin sosial-iqtisadi inkşafının yekunlarına və 2012-ci ildə qarşıda duran vəzifələrə həsr olunmuş iclasdakı çıxışında qeyd etmişdir ki, “Azərbaycanda sahibkarlar sinfi yaradılıbdır. Onlar əldə edilən gəlirlərin bir hissəsini yeni müəssisələrə yönəldirlər. 2011-ci ildə qoyulmuş 20 milyard dollar investisiyadan 13 milyard dolları Azərbaycan dövlətinin, 7 milyard dolları isə xarici investorların vəsaiti olduğunu nəzərə alsaq 4-5 ildən sonra bizə əlavə xarici bazarlar lazım olacaqdır”.

Əsasən neft və qaz ehtiyatına görə əcnəbi investorları özünə cəlb edən Azərbaycan tədricən özü analoji funksiyanı yerinə yetirməyə başlamaqdadır. Bildiyiniz kimi, “Azərbaycan Respublikası Regionlarının 2009-2013 illərdə sosial-iqtisadi inkişafı Dövlət Proqramı”nın birinci mərhələsi biznes imkanlarının genişlənməsinə, sənaye potensialının formalaşmasına yönəlmişdir.

Azərbaycanın inkişaf etmiş dünya ölkələrinə siyasi inteqrasiyası, bilavasitə iqtisadi inteqrasiyadan asılıdır.

Azərbaycanda istehsal olunan mal və materialların, xüsusən də qeyri-neft sektoruna aid olan sənaye və kənd təsərrüfatı mallarının dünya bazarına çıxarılması üçün mövcud beynəlxalq əlaqələrin inkişaf etdirilməsinə, yeni əlaqələrin qurulmasına Konfederasiya çox böyük önəm verir.

Dünyada ən nüfuzlu beynəlxalq reytinq agentliyi “Standart and Poors” Azərbaycan iqtisadiyyatının mövcud durumunun “Pozitivə” doğru yüksəldiyini, ölkənin kredit reytinqinin artdığını bildirir. Bu fakt onu göstərir ki, Azərbaycan təkcə ölkə daxilində deyil, həm də xarici ölkələrdə investisiya qoyuluşlarını davam etdirir.

Azərbaycanın neft gəlirlərindən əldə etdiyi valyuta ehtiyatlarının həcminin 40 milyard dolları ötməsi indi ölkənin, daxili investisiya layihələrinə sərmayə yatırmaq imkanları ilə bərabər, xarici dövlətlərə də iri miqdarda vəsait yatırmasına, həmçinin, əcnəbi şirkətlərin səhm bazarında iştirak etməsinə şərait yaradıb. Bunun real mənzərəsini isə Türkiyə, Rumıniya, Gürcüstan, Moldova və digər dövlətlərin maliyyə bazarında müşahidə etmək olar.

- Sahibkarlığın inkişafında hüquqi bazanın təkmilləşdirilməsi, müasir tələblərə cavab verən sənəd və təlimatların hazırlanması, sahibkarların maarifləndirilməsi istiqamətində görülən işlərin əhəmiyyəti barədə nə deyərdiniz?

- Sahibkarlığın fəaliyyətinin tənzimlənməsi ilə bağlı yeni dövrün tələblərinə cavab verən qanunvericilik bazasının yaradılması təbii ki, zəruri məsələlərdən biridir. Bu sənədlərdə bazar münasibətləri əsasında iqtisadiyyatın inkişafına şərait yaradılması, sahibkarlığa hüquqi təminatın verilməsi, rəqabət mexanizminin formalaşması, həmçinin, rəqabətin qorunması ilə bağlı müddəalar əksini tapmalıdır. Bu sənədlər bir qayda olaraq ölkə iqtisadiyyatının strukturunun təkmilləşdirilməsi, rəqabət mühitinin və özəl mülkiyyətçilər təbəqəsinin formalaşdırılması məqsədi ilə qəbul edilmişdir.

Sahibkarlığın inkişafının ən vacib komponentlərindən biri də sahibkarların maarifləndirilməsi, beynəlxalq təcrübənin öyrənilməsi, konsaltinq və innovasiya xidmətlərinin göstərilməsidir. Bu məqsədlə ötən il ərzində İqtisadi İnkişaf Nazirliyinin dəstəyi ilə Respublikada 144 tədbir keçirilmişdir ki, onlardan 80-i regionlarda yerli iş adamlarının iştirakı ilə təşkil edilmiş, sahibkarların və gənc menecerlərin bir qrupu bilik və bacarıqlarını artırmaq, inkişaf etmiş ölkələrdə mövcud texnologiya və işin qurulması mexanizmlərini mənimsəmək məqsədilə Almaniyada müvafiq müəssisələrdə təcrübə keçmək üçün göndərilmişlər.

Qeyd etmək lazımdır ki, hazırda ölkəmizdə 60-a yaxın dövlət proqramı, strategiya və konsepsiya fəaliyyətdədir. Bütün bu mühüm hüquqi-normativ və proqram sənədlərinin yeni konsepsiya ilə əsaslı şəkildə əlaqələndirilməsi əldə olunan nailiyyətlərin təminatçısına çevriləcəkdir.

Ölkə sahibkarlarının maarifləndirilməsi sahəsində bir çox seminar, konfrans və “dəyirmi masa”lar keçirilmiş, kitabçalar dərc olunaraq sahibkarlara çatdırılması təmin edilmiş, onların ölkə daxilində və xaricdə keçirilən biznes forumlarda iştirak etmələrini imkan daxilində təmin etməyə çalışmışıq.

Bu sahədə 2011-ci ildə əldə etdiyimiz nailiyyətlərdən biri də Azərbaycan Sahibkarlar (İşəgötürənlər) Təşkilatları Milli Konfederasiyanın orqanı olan “Biznes Həyatı” jurnalının təsis edilməsidir. Jurnalın artıq iki nömrəsi çapdan çıxmışdır.

Regionlarda mövcud potensialdan səmərəli istifadə etməklə iqtisadiyyatın ayrı-ayrı sahələrinin inkişafına, istehsal müəssisələrinin fəaliyyətinin bərpası və daha da genişləndirilməsinə, ixracyönümlü məhsul istehsalının stimullaşdırılması və sahibkalıq fəaliyyətinin artırılmasına xüsusi diqqət verilmişdir.

Biznes mühitinin yaxşılaşdırılması məqsədilə Vergi Məcəlləsinə dəyişiklik və əlavələr edilməsi üçün sahibkarlardan daxil olmuş təkliflər ümumiləşdirilərək Vergilər Nazirliyinə təqdim olunmuşdur. Vergilər Nazirliyi ilə bağlanmış əməkdaşlıq müqaviləsinə uyğun olaraq vergi terminallarında sahibkarlara xidmət işi yaxşılaşdırılmışdır. Hazırda fəaliyyət göstərən 32 terminalda bizim əməkdaşlar çalışırlar.

Yeni Azərbaycan.- 2012.- 16 mart.- S.6.