Müasir Azərbaycanın ən mühüm gerçəkliyi iqtisadi yüksəliş üzərində formalaşan möhkəm ictimai-siyasi sabitlikdir

- Əli müəllim, istərdik ki, söhbətimizə ölkəmizdə mövcud ictimai və siyasi durumun ümumi təhlili ilə başlayaq...

- Hər bir ölkənin ictimai-siyasi vəziyyətini müəyyənləşdirən əsas amil onun iqtisadi durumudur. Azərbaycan son illərdə iqtisadi cəhətdən sürətlə inkişaf edir və 2011-ci ildə də ölkəmizin iqtisadi inkişafı yüksək tempini saxlayıbdır. Azərbaycan iqtisadiyyatının yüksəlişi, iqtisadiyyatın inkişafı ilə əlaqədar cəmiyyətin digər sahələrində baş verən müsbət dəyişikliklər ölkənin bütövlükdə ictimai-siyasi və mənəvi-psixoloji durumunu müəyyənləşdirir. Əgər ümumi xarakteristika verməli olsaq, bütövlükdə ölkəmizdəki ictimai-siyasi sabitliyi ayrıca vurğulamaq lazım gələcəkdir. Bu da ondan ibarətdir ki, Azərbaycanın iqtisadi durumu, iqtisadi durumunun formalaşdırdığı sosial vəziyyət ölkə vətəndaşlarının mütləq əksəriyyətini öz hökumətindən, dövlətindən məmnun salacaq gerçəkliyi formalaşdırıbdır. İnsanlar hökumətdən, hakimiyyətdən razıdırlar, bu da ictimai-siyasi sabitliyin əsasını təşkil edir.

Digər tərəfdən, mən ölkəmizin bütövlükdə ictimai-siyasi durumunu Azərbaycan dövlətinin siyasi qüdrətinin artması, nüfuzunun yüksəlməsi ilə izah etmək istərdim. Bu da ondan ibarətdir ki, müstəqilliyinin 20-ci ildönümünü bir neçə ay bundan öncə qeyd etmiş Azərbaycan artıq qüdrətli dövlətə çevrilibdir. Bu, həm də beynəlxalq aləmdə öz təsdiqini tapır. Azərbaycan ötən il Birləşmiş Millətlər Təşkilatının Təhlükəsizlik Şurasının qeyri-daimi üzvü seçilibdir və hesab edirəm ki, bu, 20 illik müstəqillik tarixinə malik olan Azərbaycan dövləti üçün kifayət qədər əhəmiyyətli beynəlxalq nailiyyət olmaqla, ölkəmizin beynəlxalq aləmdə güclü, qüdrətli, eyni zamanda, beynəlxalq münasibətlər sistemində fəal iştirak edən bir dövlətə çevrildiyini təsdiq edir. Eyni zamanda hesab edirəm ki, Azərbaycan, xüsusilə də Bakı şəhəri artıq dünyanın mədəni mərkəzlərindən birinə çevrilib ki, bu da bütövlükdə ölkə vətəndaşlarının milli iftixar hissini formalaşdıran gerçəklik kimi ictimai-siyasi və mənəvi-psixoloji duruma müsbət təsir edən reallıqdır. Beləliklə, müasir Azərbaycanın ən mühüm gerçəkliyi iqtisadi yüksəliş üzərində formalaşan möhkəm ictimai-siyasi sabitlikdir.

- Bir neçə gün öncə Azərbaycan hökumətinin Milli Məclisdə hesabatı dinlənildi. Müzakirələr zamanı Siz regionların inkişafı ilə bağlı çox maraqlı təkliflə çıxış edərək regionların inzibati idarəetmə mexanizmlərinin dəyişdirilməsi ilə əlaqədar müvafiq işlərin görülməsi təklifini səsləndirdiniz. İstərdik, bu məsələyə aydınlıq gətirəsiniz. Bu təklifin mahiyyəti nədir və Sizcə, hansı dəyişikliklər həyata keçirilməlidir?

- Bu təklifin mahiyyəti ondan ibarətdir ki, Azərbaycanda Prezident İlham Əliyevin təşəbbüsü ilə 2004-cü ildən etibarən “Regionların sosial-iqtisadi inkişafına dair Dövlət Proqramı” uğurla həyata keçirilir. Bu proqramın həyata keçirilməsinin nəticəsi olaraq regionların həm iqtisadi, həm də infrastruktur göstəriciləri müsbət mənada əhəmiyyətli dərəcədə dəyişir. Sözün müsbət mənasında, regionlarımız tanınmaz olubdur. Bu, bir gerçəklikdir. Eyni zamanda, regionlarda iqtisadi fəallıq, sahibkarlıq fəallığı artıbdır. Təbii ki, yaradılan infrastruktur, sahibkarlığın inkişafı üçün formalaşdırılan şərait regionlarda iqtisadi göstəricilərin artmasına səbəb olub. Beləliklə, Azərbaycanda “Regionların sosial-iqtisadi inkişafına dair Dövlət Proqramı”nın uğurla həyata keçirilməsi sayəsində əhəmiyyətli mərhələlər keçilib. Və hazırda inkişaf elə bir yüksək pilləyə çatıb ki, islahatların yeni mərhələsinə başlamağa ehtiyac yaranıb. Bununla əlaqədar olaraq, Azərbaycanın regionlarının idarə edilməsində bəzi təkmilləşdirmələrin həyata keçirilməsinə də zərurət yaranıbdır. Yeri gəlmişkən, “rayon” məfhumundan imtina etməyin vaxtının çatdığını da vurğulamışam. Birincisi, “rayon” məfhumu sovet dönəmi ilə bilavasitə əlaqədardır və bu, nə Azərbaycan dilinə uyğundur, nə də bugünkü Azərbaycanın idarəçilik mexanizmində özünə lazımi yer tapa bilib. Hesab edirəm ki, “rayon” məfhumu sövet dönəmindən qalmış yükə çevrilib ki, Azərbaycan bu yükdən xilas olmalıdır. Onu da qeyd edim ki, postsovet məkanında yer alan ölkələrin çox az bir hissəsində “rayon” məfhumunun saxlanmasına rast gəlmək olar. Eyni zamanda, Azərbaycanın dövlət idarəçiliyinin tarixinə nəzər salsaq, görərik ki, bu, tamamilə yad bir elementdir. Ona görə də mən təklif edirəm ki, inzibati ərazi vahidlərinin “rayonlar” məfhumu ilə adlandırılmasına son qoyulsun. Hazırki gerçkliyə və idarəçilik məfkurəsinə, strukturuna daha çox uyğun gələn, Azərbaycanın dövlətçilik tarixini əks etdirən bir məfhum seçmək olar.

O ki qaldı regional idarəetmənin təkmilləşdirilməsi ilə bağlı təklifimə, bunun əsasında regional idarəetmənin sadələşdirilməsi, regional idarəetmə xərclərinin azaldılması dayanır. Sövet dövründə bu cür kiçik rayonların yaradılması özünü doğruldurdu, çünki həmin dövrdə mərkəzləşdirilmiş idarəetmə sisteminə istinad olunurdu. Amma Azərbaycanda hazırki dövlət idarəçiliyi cəmiyyət həyatının bütün sahələrinə nəzarət etmir, başqa sözlə, cəmiyyətin bütün sahələri dövlət idarəçiliyinə şamil edilmir. Beləliklə də, qeyri-mərkəzləşdirilmiş idarəçilik sisteminin mövcud olduğu Azərbaycanda bu cür xırdalanmış inzibati ərazi vahidlərinin saxlanılmasına ehtiyac yoxdur. İndi inzibati ərazi vahidlərinin rəhbərləri çox az sahələrə müdaxilə edirlər, çox az sahələri idarə edirlər. Ona görə də, hazırda əvvəlki dövrlərə şamil oluna biləcək, əvvəlki dövlərdə yaradılmış, -əlbəttə ki, sovet dövrünü nəzərdə tuturam, - idarəçilik məfkurəsinin və formasının saxlanılması artıq əlavə idarəçilik xərclərini tələb edir və regional idarəçiliyin xeyli dərəcədə mürəkkəbləşməsinə gətirib çıxarır. Düşünürəm ki, bu, Prezidentimiz tərəfindən dəfələrlə qeyd edilmiş islahatlar konsepsiyasının tərkib hissəsi kimi də nəzərdən keçirilə bilər. Bu gün Azərbaycanda həyata keçirilən işlər, bütövlükdə, Azərbaycan dövlətinin xeyli dərəcədə qüdrətlənməsinə imkan yaradır ki, tədricən və düşünülmüş şəkildə regional idarəetmə sisteminin təkmilləşdirilməsi istiqamətində mütərəqqi islahatlar həyata keçirilsin və bunun konsepsiyası hazırlansın.

- Əli müəllim, məlum olduğu kimi, Azərbaycan dinamik inkişaf yolunda sürətlə irəliləyir. Bu isə ölkəmizdə beynəlxalq əhəmiyyətli mühüm tədbirlərin keçirilməsinə də imkan verir. Eyni zamanda, cari ilin may ayında paytaxtımız “Eurovision-2012” mahnı müsabiqəsinə ev sahibliyi edəcək. Görülən bütün işlər deməyə əsas verir ki, Azərbaycan bu tədbirin yüksək səviyyədə həyata keçirilməsinə öz töhfələrini verəcək. Amma bütün bunlara baxmayaraq, bir çox qərəzli daxili və xarici dairələr “Eurovision” mahnı müsabiqəsini siyasiləşdirməyə çalışır və bu mahnı müsabiqəsindən bir alət kimi istifadə edərək ölkəmizə qarşı qara piar kampaniyası həyata keçirirlər, bəzən boykot çağırışlarını da müşahidə edirik. Sizcə, ölkəmizə qarşı bu qədər qərəzli fəaliyyətin, obyektivlikdən uzaq olan təxribat xarakterli çağırışların əsasında nələr dayanır?

- Azərbaycan özünün sürətli inkişafı, sahib olduğu zəngin təbii resursları və əlverişli geopolitik mövqeyi ilə regional miqyasda və beynəlxalq müstəvidə diqqəti cəlb edən dövlətə çevrilibdir. Bütün bunlar Azərbaycana olan marağı artırıbdır. Beləliklə, ayrı-ayrı dövlətlər Azərbaycan vasitəsilə ölkəmizin yerləşdiyi bölgədə öz maraqlarını həyata keçirmək üçün müəyyən cəhdlər edirlər. Bu, əvvəllər də olub, bu gün də müşahidə olunur, şübhəsiz, gələcəkdə də baş verəcəkdir. Bu, ümumiyyətlə, dünya praktikasında rast gəlinən bir gerçəklikdir. Amma son dövrlər ayrı-ayrı dövlətlərin Azərbaycana qarşı bu kimi hərəkətləri bir az daha intensivləşib. Bu intensivləşmənin kökündə dayanan əsas reallıq ondan ibarətdir ki, Azərbaycan regionun lider dövlətinə, ən qüdrəli ölkəsinə çevrilibdir. Bu gün Cənubi Qafqaz iqtisadiyyatının əhəmiyyətli bir hissəsi Azərbaycana mənsubdur. Və Azərbaycan iqtisadiyyatının sürətli inkişafı belə bir fikir söyləməyə imkan verir ki, yaxın zamanlarda bütövlükdə Cənubi Qafqazın iqtisadiyyatı dedikdə əsas etibarilə Azərbaycan iqtisadiyyatı başa düşüləcək.

Digər tərəfdən, Azərbaycanın demoqrafik inkişafı, əhalisinin sürətlə artması da ölkəmizin regionda rolunu və əhəmiyyətini ciddi şəkildə artırıbdır. Hazırda Azərbaycanın 9 milyondan çox əhalisi var və hesab edirəm ki, bir neçə ildən sonra ölkə əhalisinin sayı 10 milyona çatacaq. Bu isə Cənubi Qafqazın ümumi əhalisinin böyük əksəriyyəti demək olacaqdır. Elə bu gün də Azərbaycanın əhalisi region əhalisinin yarıdan çoxunu təşkil edir. Düşünürəm ki, bir neçə ildən sonra ölkəməzin bu mənada xüsusi çəkisi daha da artacaqdır. Beləliklə, Azərbaycanın regionda mövqeyi bu baxımdan da artmış olacaqdır. Əhali təkcə çoxsaylı insan demək deyil, eyni zamanda, böyük insani və iqtisadi potensialdır. Bütün bunların hamısı Azərbaycanın gücünü və gücünün mütəmadi surətdə artmasını göstərir. Bundan başqa, ölkəmizin beynəlxalq münasibətlər sistemində mövqelərinin möhkəmlənməsi Azərbaycanın həm regional, həm də regiondankənar proseslərdə rolunu artırıb və mövqeyini möhkəmləndiribdir. Bu isə öz növbəsində Azərbaycana olan marağı daha da artırıbdır. Beləliklə, qeyd etdiyim kimi, müxtəlif üsul və metodlardan istifadə edərək Azərbaycan vasitəsilə bölgəmizlə bağlı maraqların reallaşdırılması istəkləri güclənir.

Təəssüf hissi ilə qeyd etmək istəyirəm ki, mədəni hadisə olan “Eurovision” mahnı müsabiqəsindən də məhz elə bu məqsədlə istifadə etmək cəhdləri açıq şəkildə özünü göstərir. Hesab edirəm ki, bu gün Azərbaycanda həyata keçirilən abadlıq-quruculuq, modernləşmə, yeniləşmə proseslərinə başqa don geyindirərək bundan Azərbaycana qarşı təzyiq vasitəsi kimi istifadə etmək cəhdlərinin çoxalması və bundan da “Eurovision” məsələsində sui-istifadə edilməsi sadaladığımız məqamlara əyani misal ola bilər. Təbii ki, bütün bunların hamısı Azərbaycanın həyata keçirdiyi siyasətə hər hansı bir ciddi təsir göstərmək gücündə deyil. Çünki hazırda Azərbaycana təzyiq etmək istəyən qüvvələr açıq şəkildə görürlər ki, onların ölkəmizə qarşı istifadə etdikləri təsir rıçaqları getdikcə öz gücünü itirməkdədir. Və yaxud onların Azərbaycanın siyasətinin dəyişdirilməsi istiqamətində istifadə etdikləri təsir və təzyiq rıçaqları istədikləri effekti vermir. Onlar bundan sonra da bu istiqamətdə hər hansı bir perspektivlərinin olmadığını açıq şəkildə görürlər. Belə olan halda, ənənəvi üsullara istinad etməyə çalışırlar. Bu üsul isə ölkədaxili bəzi qüvvələri özlərinə cəlb etməklə onlardan dövlətə qarşı təzyiq vasitəsi kimi istifadə etməkdir. Bu da, hesab edirəm ki, yeni metod deyil. Qıcıqlandırıcı məqam ondan ibarətdir ki, bir sıra hallarda Azərbaycanın daxilində olan müəyyən qüvvələr ölkəmizə təzyiq göstərmək istəyən, ölkəmizin maraqlarının reallaşmasına əngəllər yaratmaq istəyən qüvvələrlə sinxron fəaliyyət göstərmiş olurlar. Yəni, qərəzli xarici dairələrin istəklərinin həyata keçirilməsində ucuz vasitəyə çevrilmiş olurlar. Bu yaxınlarda Almaniyanın xarici işlər nazirinin Bakıda olarkən bir neçə müxalifət nümayəndəsi ilə təfərrüatı açıqlanmayan bir görüş keçirməsini buna əyani misal kimi göstərə bilərəm. Biz demokratik bir cəmiyyət olaraq bu tipli görüşlərin, birincisi, əleyhinə deyilik, ikincisi isə, Azərbaycan bu cür görüşlərin keçirilməsindən hər hansı bir əndişə duymur. Açıq şəkildə qeyd etmək istəyirəm ki, bu cür primitiv üsullar vasitəsilə Azərbaycana təsir və ya təzyiq etmək mümkün deyil. Amma Azərbaycan daxilində ayrı-ayrı siyasi partiyalarda təmsil olunan insanların ölkəmizə qarşı təzyiq etmək istəyən, Azərbaycanın maraqlarına qarşı fəaliyyət göstərən qərəzli qüvvələrə dəstək vermələri bu mənada bizi narahat edir. Çünki bu prosesdə onlar azərbaycanlı kimi iştirak edirlər. Narahatçılıq ondan ibarət deyil ki, bu, Azərbaycanın dövlətçiliyi üçün hansısa təhlükə yaradır. Narahatçılıq ondan ibarətdir ki, bu, azərbaycançılıq və dövlətçilik məfkurəsinə qarşı çevrilmiş bir mövqe və yaxud hərəkətdir. Təbii ki, bu, yolverilməzdir və biz bunu qəti şəkildə pisləyirik. Bir daha demək istəyirəm ki, Azərbaycan demokratik dövlətdir, demokratik dəyərlər ölkəmizdə mənimsənilibdir, demokratik təsisatlar təşəkkül tapıbdır, ölkəmizdə siyasi plüralizm mövcuddur, müxtəlif siyasi partiyalar fəaliyyət göstərirlər, bir sıra hallarda onların fəaliyyəti adi demokratik dəyərlər çərçivəsindən kənara çıxır. Amma biz istəmərik ki, ölkəmizdə fəaliyyət göstərən hansısa qüvvələr anti-Azərbaycançı fəaliyyət həyata keçirən xarici qüvvələrin maraqlarının təmin olunmasında ucuz vasitəyə çevrilsinlər.

Ümumiyyətlə, siyasətçi üçün yeganə istinad nöqtəsi ölkə daxilindəki seçicilərdir. Bilirsiniz, Azərbaycanda bəzi siyasətçilər var ki, hansısa ölkələrin mətbuatında onlara meydan verilməsini çox qürurla qeyd edirlər. Bunu bir halda normal qəbul etmək olar ki, onlar bu imkanlardan Azərbaycanın dünyaya müsbət mənada təqdim olunması, ölkəmizin həmin dövlətlərlə münasibətlərinə xidmət etməsi üçün istifadə etsinlər. Təəssüf hissi ilə qeyd etmək istəyirəm ki, onlar bu imkanlardan Azərbaycandakı daxili siyasi proseslərin reallıqdan uzaq şəkildə müzakirəsi məqsədilə istifadə edirlər. Buna görə də ortaya məhz bu cür sual çıxır: əgər ölkə daxilindəki siyasi proseslərdə iştirak etmək istəyən hər hansı bir partiyanın təmsilçisi və yaxud rəhbəri başqa bir ölkənin mətbuatında öz siyasi platformasını ortaya qoyursa, o, bundan nə qazanacaqdır?! Həmin ölkəninmi vətəndaşları seçkilərdə həmin şəxslərə səs verəcəklər?! Xeyr. Bəs belə olan halda, ölkədaxili ictimai-siyasi proseslərin başqa bir ölkənin mətbuatında müzakirəyə çıxarılmasında məqsəd nədir?

Təbii ki, həmin siyasətçilərə, partiya nümayəndələrinə yer verən mətbuatın Azərbaycanla bağlı konkret qərəzli məqsədləri var ki, biz bunlar haqqında yuxarıda danışdıq. Əlbəttə ki, bu məqsədlər Azərbaycanın milli maraqlarına uyğun deyil. Həmin mətbuat orqanları Azərbaycanın milli və dövlətçilik maraqlarına qarşı qərəzli fəaliyyət göstərən qüvvələrin nəzarətindədir. Bəs azərbaycanlı bir siyasətçinin, Azərbaycanda fəaliyyət göstərən siyasi partiya təmsilçisinin ölkə daxili ictimai-siyasi prosesləri başqa bir ölkənin mətbuatında müzakirəyə çıxarmasında məqsəd nədir? Bu suala cavab olaraq qeyd edə bilərəm ki, yeganə məqsəd ondan ibarətdir ki, Azərbaycanın reallıqları təhrif olunsun, ölkəmizə qarşı qarayaxma kampaniyası aparılsın və beləliklə, ayrı-ayrı anti-Azərbaycançı qüvvələrin ölkəmizə qarşı yönəlmiş təbliğatında ucuz bir vasitəyə çevrilmiş olsunlar.

- Əli müəllim, Sizin qeyd etdiyiniz bəzi qərəzli, anti-Azərbaycan xarici dairələrin əlində ucuz vasitəyə çevrilmiş həmin daxili qüvvələr, çox təəssüf olsun ki, ölkəmizdə müxtəlif siyasi partiyalara rəhbərlik edirlər və onlar Azərbaycanda hakimiyyətə gəlmək iddiasındadırlar. Ölkəmiz üçün taleyüklü mərhələlərdə, müxtəlif siyasi kampaniyalar ərəfəsində gündəmə gəlmək üçün bəzi hallarda qanunsuz yollardan istifadə etməkdən belə çəkinməyən həmin radikal siyasi partiya nümayəndələri bu günlərdə mitinq çağırışları ilə çıxış edirlər. Və belə görünür ki, həmin qüvvələr ölkədaxili ictimai-siyasi sabitliyin pozulmasında olduqca maraqlıdırlar. Bəs bu cür mitinq çağırışlarına, radikal mövqeyə bu gün hansı ehtiyac var və bütün bunlar nəyə xidmət edir?

- Bilirsiniz, siyasi partiyaların çağırışları o zaman normal qəbul oluna bilər ki, həmin çağırışlar qəbul olunmuş ümumi demokratik dəyərlərə və normalara müvafiq olsun. Amma həqiqət ondan ibarətdir ki, ölkə vətəndaşları birmənalı şəkildə hazırki hakimiyyəti dəstəkləyirlər. Buna paralel olaraq, ölkə vətəndaşlarının və seçicilərinin bugünkü müxalifətə etimadı olduqca aşağı düşübdür, hətta demək olar ki, sıfır həddinə gəlib çatıbdır. Belə olan halda, müxalifət nümayəndələrinin və təmsilçilərinin çağırışları Azərbaycan vətəndaşları tərəfindən böyük etinasızlıqla qarşılanır. Onların çağırışları cəmiyyətimizdə hər hansı bir reaksiya doğurmur və ictimai müzakirə predmetinə belə çevrilmir. Bütövlükdə, cəmiyyətdə bu cür radikal mövqedə duran müxalifətə inamsızlıq və etimadsızlıq var. Təəssüf hissi ilə qeyd etmək istəyirəm ki, bəhs olunan qüvvələr bu vəziyyətdən düzgün nəticə çıxara bilmirlər. Prinsip etibarilə müxalifətin əleyhinə deyiləm. Ancaq müxalifət cəmiyyətə hər hansı alternativ ideyanı, düşüncəni təklif etməli və buna müvafiq olaraq özünə tərəfdarlar formalaşdırmalıdır. Amma müxalifət cəmiyyətə bu gün hakimiyyətin həyata keçirdiyi siyasətdən və konsepsiyadan az da olsa, fərqlənən ideya və ya konsepsiya təklif edə bilmir. Onların bacardıqları və məmnuniyyətlə etdikləri yeganə iş Azərbaycana qara yaxmaq, böhtan atmaq və ölkə reallıqlarını təhrif etməkdir. Bu böhtan təkcə Azərbaycan iqtidarına atılmır, bütövlükdə Azərbaycana qarşı yönəlir. Əgər Azərbaycanın reallığı təhrif edilirsə, bu, təkcə hökumətin qüruruna toxunan bir hadisəyə çevrilmir. Bu, eyni zamanda, öz dövləti, ölkəsi və hökuməti ilə qürur duyan hər bir azərbaycanlının qüruruna, milli hissiyyatına toxunmuş olur. Məhz bütün bunlara görə də bir tərəfdən, müxalifətin səmərəli təklifi olmadığına görə, digər tərəfdən isə, bu cür qeyri-demokratik, antimilli hərəkətlərinə görə vətəndaşların onlara inamı azalır.

Müxalifət bütün bunlardan düzgün nəticə çıxarmalı, öz hərəkətlərinə və davranışlarına tənqidi yanaşmalıdır. Niyə Azərbaycan cəmiyyəti və ölkə vətəndaşları onlara bu qədər etinasızlıqla yanaşır? Amma həmin qüvvələr özlərinə tənqidi münasibət bəsləmək və düzgün nəticələr çıxarmaq əvəzinə daha radikal addımlar atırlar. Və radikal addımlar üçün onlara təklif olunan əsas və yeganə məkan bir sıra xarici ölkələrin mətbuat səhifələri olur. Bununla da radikal müxalifət anti-Azərbaycançı qərəzli xarici dairələrin ölkəmizə qarşı həyata keçirdiyi qarayaxma kampaniyasında ucuz vasitəyə çevrilmiş olurlar. Beləliklə, onlar Azərbaycanda ictimai-siyasi situasiyaya az da olsa, təsir etmək gücündə olmadıqlarını özləri də dərk edirlər, amma düzgün addım atmaq, doğru yol seçmək əvəzinə tamamilə daha böyük günahlara gətirib çıxaran addımlar atmış olurlar.

- Əli müəllim, dünyada da olduqca maraqlı və önəmli proseslər cərəyan edir. Məsələn, müasir beynəlxalq münasibətlər sisteminin mühüm güc mərkəzlərindən biri olan Rusiya Federasiyasında bu günlərdə prezdent seçkiləri keçirildi və Vladimir Putin yenidən ölkə prezidenti seçildi. Rusiya xalqının bu seçimini həm regionun gələcək perspektivləri, həm də Azərbaycan-Rusiya münasibətlərinin dinamikası baxımından necə dəyərləndirirsiniz?

- Bu məsələni şərh edərkən bir neçə prinsipial məqam qeyd olunmalıdır. Birincisi, təbii ki, Rusiya Azərbaycanın qonşusudur. Əlbəttə ki, Rusiya böyük bir dövlətdir, iqtisadi potensialı olduqca güclüdür, dünya siyasətində əhəmiyyətli bir rola malikdir. Amma Rusiya-Azərbaycan münasibətlərini səciyyələndirən təkcə bu sadaladıqlarımız deyil. Azərbayan ən müxtəlif səviyyə və formalarda Rusiya ilə uzunmüddətli münasibət və əlaqələr qurubdur. 200 ildən artıq bir müddətdə Azərbaycan əvvəlcə Rusiya imperiyasının-Çar Rusiyasının, sonra isə SSRİ-nin tərkibində olubdur. Təbii ki, bu da ümumi mənəvi-mədəni mühitin formalaşmasını şərtləndirib, insani-humanitar münasibətlər formalaşıbdır. Bütün bunlar Rusiya-Azərbaycan münasibətlərini səciyyələndirən çoxşaxəli əlaqələr və gerçəkliklərdir.

Bu mənada, Rusiyada baş tutmuş prezident seçkiləri Azərbaycanda da olduqca diqqətlə izlənilirdi. Amma bizim ikinci prinsipi də qeyd etməyimizə ehtiyac var ki, bu da ondan ibarətdir ki, Azərbaycanın dövlətçilik məfkurəsi, xarici siyasəti “hər hansı bir dövlətin daxili işinə qarışmaq, həmin ölkəyə məxsus daxili ictimai-siyasi proseslərə müdaxilə etmək yolverilməzdir” prinsipinə əsaslanır. Bu baxımdan, biz istənilən xalqın, o cümlədən Rusiya xalqının seçiminə hörmətlə yanaşırıq.

Vladimir Putinin prezident seçilməsinin Rusiya-Azərbaycan münasibətlərinin təsiri məsələsinə gəldikdə isə qeyd edə bilərəm ki, Azərbaycan iqtidarı ilə Rusiyanın fəaliyyətə başlayacaq rəhbərliyi arasında kifayət qədər səmimi münasibətlər mövcuddur. Bu münasibətlərin əsası Ulu öndər Heydər Əliyevin zamanında qoyulub və Prezident İlham Əliyevin ölkəmizə rəhbərlik etdiyi dövrdə uğurla inkişaf edərək daha da möhkəmlənibdir. Güman edirəm ki, bundan sonra da ölkələr arasındakı münasibətlər yeni inkişaf mərhələsinə qədəm qoyacaqdır. Onu da qeyd etmək lazımdır ki, bu gün Azərbaycanla Rusiya arasında gərginlik yarada biləcək hər hansı bir ciddi problem yoxdur.

Digər bir xüsusi məqam ondan ibarətdir ki, Azərbaycanın ən ciddi problemi olan Ermənistan-Azərbaycan, Dağlıq Qarabağ münaqişəsinin nizamlanmasında da Rusiya əhəmiyyətli rol oynaya biləcək dövlətlərdən biridir. Belə ki, Rusiya həm münaqişənin nizama salınması məqsədilə yaradılmış ATƏT-in Minsk qrupunun həmsədr dövlətlərindən biridir, həm də bu format çərçivəsində son illər olduqca fəal mövqe nümayiş etdirməkdədir. Rusiya eyni zamanda Ermənistana ciddi təsir imkanlarına malik olan böyük dövlət kimi münaqişənin nizamlanmasında həlledici rol oynaya bilər.

- Dağlıq Qarabağ münaqişəsindən söz düşmüşkən, bu günlərdə Ermənistan prezidenti Serj Sarkisyan Brüsselə səfəri çərçivəsində Avropa İttifaqı rəsmiləri ilə görüşlərində Azərbaycandan şikayət edib. Ermənistanın dövlət başçısı ölkəmizin iqtisadi imkanlarının genişlənməsini və dövlət büdcəsindən hərbi sahəyə yönəldilən vəsaitlərin artmasını ölkəsi üçün ciddi təhdid kimi dəyərləndirib. Sarkisyanı bu qədər narahat edən səbəblər nədən ibarətdir və yaxın perspektiv üçün Dağlıq Qarabağ münaqişəsinin həlli ilə bağlı hansı proqnozları vermək olar?

- Bu narahatçılığı doğuran səbəblər ondan ibarətdir ki, Azərbaycan həqiqətən güclənir və beləliklə də Azərbaycan və Ermənistan arasında fərqlər işğalçı ölkənin ziyanına sürətlə artmaqdadır. Azərbaycanın əhalisi 9 milyonu örtüb və bir neçə ildən sonra bu rəqəm 10 milyona çatacaq. Ermənistanın əhalisi isə sürətlə azalmaqdadır. Bu gün Ermənistanın əhalisinin real sayının 2 milyon civarında olduğu etiraf olunur və bu ölkənin rəhbərliyi də bir neçə il bundan əvvəl bu gerçəkliyi gizlətməsinə baxmayaraq, artıq onun gizlədilməsinin mümkün olmadığını dərk etməkdədir. Bu, təbiidir ki, Ermənistanda böyük narahatçılıq yaradır. Ermənistan yaxın vaxtlarda əhalisi olmayan və yaxud da əhalisi çox az olan bir dövlətə çevrilmək təhlükəsi ilə üzləşməkdədir. Bu, təkcə demoqrafik məsələ, əhalinin sayının azalması deyil. Bu, həm də iqtisadi potensial resurslarının tükənməsi deməkdir. Ən güclü iqtisadi potensial insandır və insan olmayan yerdə təbii ki, iqtisadi potensial inkişaf etdirilə bilməz. Və Ermənistan çox ciddi şəkildə bu təhlükə ilə üzləşib.

Digər məsələlər də Ermənistanı heç də bundan az narahat etmir. Azərbaycanın iqtisadiyyatının güclənməsi, bunun əsasında insanlarındakı yüksək əhval - ruhiyyə də Ermənistanı narahat edən gerçəklikdir. İşğalçı ölkədəki çox acınacaqlı iqtisadi durum Ermənistan vətəndaşlarının öz hakimiyyətindən razılıq indeksini minimuma endirib. Ermənistanda ictimai-siyasi sabitliyin qorunması müşkül bir məsələyə çevrilibdir. Əgər insanlar kütləvi şəkildə öz yaşayışlarından narazıdırlarsa, onlar heç zaman hakimiyyətdən razı ola bilməzlər. Azərbaycanda isə əks proseslər baş verir. Ölkənin iqtisadi durumu və bunun üzərində formalaşan sosial durum insanların öz həyatından məmnun və razı olmalarını təmin edibdir. Əgər insan öz həyatından razıdırsa, bu, bütövlükdə əhalinin, xalqın ictimai ovqatını müəyyənləşdirir. Bu ovqatın da kökündə dayanan o məmnunluq, razılıqdır. İnsan həyatından razıdırsa, hökumətindən, dövlətindən, ölkədəki idarəçilikdən, siyasi proseslərdən razıdır. Bu, ölkənin ictimai - siyasi durumunun möhkəmliyini, davamlılığını təmin edir. Ermənistanda isə başqa bir ictimai - siyasi durum və mənəvi - psixoloji vəziyyət mövcuddur. Narahatçılığı yaradan səbəblər və Azəəbaycandan Ermənistanın narahatçılığı həm də bununla əlaqədardır.

Digər bir məsələ, Azərbaycanın hərbi qüdrətinin artmasıdır. Bu gün Azərbaycanın hərbi xərcləri Ermənistanın dövlət büdcəsindən əhəmiyyətli dərəcədə çoxdur. İllər keçdikcə, bu fərq də Ermənistanın ziyanına böyüməkdədir. Bu da Ermənistan tərəfini vahiməyə sayan gerçəklik və reallıqdır.

Və nəhayət, Azərbaycanın bütün bu sadaladığım səbəblərlə əlaqədar olaraq, dünyada, dünya birliyində mövqeyinin, rolunun artmasını da ayrıca qeyd etmək istərdim. İstər, Avropa istiqamətində, istər daha geniş beynəlxalq aləmdə olsun, Azərbaycanın əlaqələri möhkəmlənibdir. İndi Azərbaycanı daha güclü, daha perspektivli bir dövlət kimi tanıyırlar. Azərbaycanla işbirliyi qurmaq istəyən dövlətlərin sayı çoxalır. Beləliklə də, Ermənistan bu göstəriciyə görə Azərbaycana uduzduğunu, bu sahədə də fərqlərin getdikcə artdığını görür. Təbii ki, bütün bu faktorlar onları vahiməyə salır.

Mən hesab edirəm ki, Ermənistan tərəfi Azərbaycandan şikayət etmək əvəzinə, yaranmış bütün bu təhlükələrin qarşısını almağın yeganə bir yolu haqqında düşünsə, daha yaxşı olardı. Bu da işğal etdikləri, bu günə qədər işğal altında saxladıqları Azərbaycan torpaqlarını geri qaytarmaq, beləliklə, Azərbaycan tərəfindən yaradılmış bütün bu təhlükələrin qarşısını almaqdır. Əgər, münaqişəni yaradan səbəb aradan götürülərsə, Azərbaycanın işğal altındakı torpaqları azad edilərsə, Azərbaycanın sürətli inkişafı Ermənistan üçün hər hansı bir hədə deyil, əksinə cəlbedici bir faktora çevrilər. Azərbaycanın investisiyaları, digər geniş imkanları Ermənistan üçün xilasedici bir faktora çevrilə bilər. Digər bir tərəfdən, bu reallıq aradan qalxarsa, Türkiyə ilə də sərhədlər açıla, bununla da Ermənistan öz çıxılmaz vəziyyətindən xilas olmaq yolları ələ edə bilər. Çox təəssüf ki, Ermənistan rəhbərliyi daha səmərəli yollardan faydalanmaq əvəzinə, heç bir mənası olmayan yol seçibdir ki, bu da Azərbaycandan şikayət etməkdir.

Onu da qeyd etmək vacibdir ki, Ermənistanın Azərbaycandan şikayət etməsi bu ölkə ilə Azərbaycanın müqayisəsində ortaya çıxan gerçəklikləri dəyişdirmək üçün yetərli bir vasitə deyil. Nə qədər şikayət etsələr də, bu reallıq dəyişməyəcək. Onlar bu şikayətləri ona görə ifadə etmirlər ki, Azərbaycan bundan sonra hərbi qüdrətini artırmasın. Təbii ki, erməni siyasətçilər özləri də başa düşürlər ki, Azərbaycan bu şikayətlər əsasında öz hərbi qüdrətini artırmaqdan vaz keçməyəcək. Bu şikayətlər Avropadan və dünyanın digər maliyyə mərkəzlərindən Ermənistanın ehtiyaclarını ödəmək üçün daha çox vəsait əldə etmək, yardımlar almaq niyyətinə xidmət edir. Ola bilər ki, bu yolla müəyyən yardımlar alırlar. Amma bu da tamamilə müvəqqəti olacaq. Çünki Ermənistanın indiki durumunda hər hansı xarici yardımlarla mövcud kritik vəziyyətdən çıxmaq mümkün deyil. Yeganə düzgün, alternativsiz yol işğal altında saxladıqları Azərbaycan torpaqlarını geriyə qaytarmaq və düşdükləri çox çətin vəziyyətdən daha ağrısız çıxmağa nail olmaqdan ibarətdir.

- Əli müəllim, sizin də qeyd etdiyiniz kimi, Azərbaycanın xarici siyasətdə üstünlük verdiyi əsas prinsiplərdən biri bərabər hüquqlu əməkdaşlıq, qarşılıqlı səmimi münasibətlərə söykənərək və heç kəsin daxili işinə qarışmadan xoşniyyətlə əlaqələrin inkişafına nail olmaqdır. Bunu İran İslam Respublikasına münasibətdə də müşahidə etməkdəyik. Azərbaycan dəfələrlə İranın təhlükəsizliyinə təhlükə törədəcək hər hansı bir prosesdə iştirak etməyəcəyini və öz ərazisindən bu ölkəyə qarşı istifadə olunmasına əsla razılıq verməyəcəyini bəyan edib. Buna baxmayaraq, İrandakı bəzi dairələr müxtəlif təxribatlarla Azərbaycanda vəziyyəti qarışdırmağa, lüzumsuz bəyanatlar verərək ölkəmizin daxili siyasətinə müdaxilə etməyə cəhdlər göstərirlər. İranın rəsmi dairələri isə bu kimi təxribatların dövlətin rəsmi siyasəti olmadığını və İrandakı demokratik mühitin bu təxribatların qarşısını almağa imkan vermədiyini söyləyirlər. İranın inzibati idarəetmə sistemini nəzərə alsaq, bu ölkənin rəsmilərinin bəyanatları nə dərəcədə səmimidir və ümumiyyətlə, bu iki dövlət arasında əlaqələrdə yaşanan xoşagəlməz halların aradan qaldırılması üçün hansı addımlar atılmalıdır?

- Azərbaycan qonşularla münasbətlərində, bütövlükdə xarici siyasətində bir-birinin daxili işlərinə qarışmamaq və bir-birinin siyasətinə hörmətlə yanaşmaq prinsipindən çıxış edir. Bu prinsip eyni zamanda, Azərbaycanın böyük qonşularından biri olan İranla münasibətlərə də aiddir. İran - Azərbaycan münasibətlərində mən bir məqamı da ayrıca vurğulamaq istəyirəm. Bu iki dövlət arasında münasibətləri formalaşdıran gerçəkliklərdən biri də ondan ibarətdir ki, İranda çoxlu sayda etnik azərbaycanlılar yaşayırlar. İran əhalisinin 40 faizini etnik azərbaycanlılar təşkil edir. İranın bütövlükdə dövlətçilik tarixində azərbaycanlılar əhəmiyyətli rol oynayıblar. Və təbiidir ki, orada yaşayan azərbaycanlılar həm də İranı özlərinin vətəni hesab edirlər. Bütün bunların hamısı bizim münasibətlərimizə xüsusi çalarlıq gətirən məqamdır, böyük tarixdir, bugünkü gerçəklikdir. İranla Azərbaycanın normal mehriban qonşuluq münasibətləri heç bir vəchlə, heç bir amilin təsiri altında pozulmamalıdır. Azərbaycan olaraq, bizim yanaşmamız bundan ibarətdir.

O da sirr deyil ki, İran bu gün ciddi problemlərlə üzləşibdir. Açıq şəkildə qeyd etmək lazımdır ki, bu problemlərin nə yaranmasında, nə bu həddə çatmasında Azərbaycanın heç bir rolu olmayıb, bunun Azərbaycanla heç bir əlaqəsi yoxdur. Digər bir tərəfdən də, İran probleminin həll olunmasında da Azərbaycan bir faktor kimi, bir vasitə kimi heç zaman istifadə olunmayacaqdır. Azərbaycan dəfələrlə açıq şəkildə rəsmi şəxslərin dili ilə öz mövqeyini ortaya qoyubdur. Belə olan halda, İranın Azərbaycandan şübhələnməsi hesab edirəm ki, tamamilə yersizdir. Ən azacıq olsa belə, əsas yoxdur ki, İran üzləşdiyi problemlərin Azərbaycanla bağlı olduğuna inanmış olsun, yaxud da İran rəsmi dairələrində belə bir düşüncə formalaşmış olsun. Mən hesab edirəm ki, İran özünün üzləşdiyi problemi həll etmək üçün başqa yol seçməlidir. Bu yol bütövlüklə İran-Azərbaycan münasibətlərinin üzərinə kölgə salmaqdan tamamilə kənar olmalıdır. Əksinə, Azərbaycanla münasibətlərin pozulmaması, münasibətlərimizə kölgə salacaq addımların atılmaması İranın üzləşdiyi problemlərin həllini əhəmiyyətli dərəcədə yüngülləşdirə bilər.

Biz bütövlükdə İranla yaranmış münaqişəli vəziyyətin danışıqlar vasitəsilə, xüsusi gərginlik ortaya qoymadan həllinin tərəfdarıyıq. Bu, ilk növbədə, Azərbaycanın xarici siyasətinin sülhsevər mahiyyətindən irəli gəlir. İkinci bir tərəfdən, təbiidir ki, Azərbaycanla İran qonşu dövlətlərdir, İranda çoxlu sayda etnik azərbaycanlı yaşayır. İranda ciddi gərginliyin olması Azərbaycanı, həm də, narahat edir. Ən azından İranda hər hansı bir gərginlik olarsa, bundan etnik azərbaycanlılar əziyyət çəkəcəklər. Azərbaycan dövləti olaraq, biz bunu istəmirik. Dünyanın istənilən yerində yaşayan insanların, o cümlədən etnik azərbaycanlıların rahat yaşaması bizim dövlətimizin məfkurə əsaslarından birini təşkil edir. Biz bütün İran vətəndaşlarının, həmçinin, etnik azərbaycanlıların dinc, rahat, təhlükəsiz yaşamalarını arzu edirik. Bu mənada İranla bağlı olan problemlərin tez bir zamanda və dinc yollarla aradan qalxmasının tərəfdarıyıq.

Təbii ki, biz bütövlükdə dünya siyasəti nöqteyi-nəzərdən yanaşdıqda, İranın dinc məqsədlər üçün nüvə enerjisindən istifadə etmək haqqını qəbul edirik. Amma, eyni zamanda, biz nüvə silahının yayılmaması konsepsiyasını açıq şəkildə dəstəkləyirik. Mən hesab edirəm ki, bütün dünyada sülhün, təhlükəsizliyin, əmin-amanlığın təmin olunmasında nüvə silahının yayılmaması çox vacib şərtlərdən biridir. Ona görə də biz bu prinsiplər kontekstindən yanaşaraq İranla bağlı problemin həll edilməsinin tərəfdarıyıq. İran tərəfinin heç bir əsas olmadan Azərbaycanla bağlı bu cür addımlar atması bir yandan tamamilə yersizdir, ikinci bir tərəfdən Azərbaycanla İran arasında bu günki əlaqələrə ciddi problemlər yaradır, nəhayət, İranın özünün üzləşdiyi problemlərin aradan qalxmasına xidmət etmir. Bu mənada İran dairələrinin rəsmi şəkildə inkar etmələrinə baxmayaraq, təbii ki, onların qeyri - rəsmi razılığı ilə aparılan antiazərbaycan təbliğatını qətiyyətlə pisləyirik. Mən hesab edirəm ki, bizim münasibətlərimizdə kifayət qədər səmimilik olmalıdır. Azərbaycan bu səmimiliyini dəfələrlə açıq şəkildə nümayiş etdirib. Bu gün də bizim siyasətimizdə və münasibətlərimizdə həmin səmimiyyət mövcuddur. Biz istərdik ki, İran tərəfindən də bu səmimilik ortada olsun. Əgər biz səmimi olaraq əməkdaşlıq niyyətimizi ortaya qoyuruqsa, onda gərək praktik addımlarımız da bu səmimiliyə uyğun olsun və bəyanatlarımız atdığımız addımlarla ziddiyyətlər təşkil etməsin. Təəssüf hissi ilə qeyd etmək istəyirəm ki, İranın hərəkətlərində bəzi hallarda verilən bəyanatlarla praktik addımlar arasında bizi narahat edən, incidən ziddiyyətlər var. Bu ziddiyyətləri aradan qaldırmaq lazımdır. Azərbaycan buna hazırdır, bunun tərəfdarıdır, istərdik ki, İranda da bu cür yanaşmalar olsun.

- Yeni Azərbaycan Partiyasının fəaliyyətində xarici əlaqələrinin genişlənməsi və bir sıra dövlətlərin siyasi partiyaları ilə münasibətlərin inkişafı mühüm əhəmiyyət kəsb edir. Bu günlərdə isə partiyanın nümayəndə heyəti İtaliyaya səfər edib və bu səfər çərçivəsində çox mühüm görüşlər keçirilib. Bu səfər və ümumiyyətlə, partiyanın xarici əlaqələri haqqında məlumat verməyinizi xahiş edərdik.

- Bütövlükdə Yeni Azərbaycan Partiyasının beynəlxalq əlaqələrinə biz Azərbaycanı dünyaya demokratik, sürətlə inkişaf etməkdə olan dövlət kimi tanıtmaq konsepsiyasının tərkib hissəsi kimi baxırıq. Məmnunluq hissi ilə qeyd etmək istəyirəm ki, Yeni Azərbaycan Partiyası bu istiqamətdə kifayət qədər geniş fəaliyyət göstərir. Avropa istiqamətində Yeni Azərbaycan Partiyası Avropa Xalqları Partiyası ilə yüksək səviyyəli əlaqələrə malikdir. Bildiyniz kimi, Avropa Xalqları Partiyası Avropa Parlamentində həlledici rola malikdir və aparıcı Avropa dövlətlərində hakimiyyətdə olan partiyalar bu qrupda birləşiblər. Avropa Xalqları Partiyası ilə çox yaxşı münasibətlərimizin qurulması bizim tərəfimizdən Azərbaycanın Avropaya inteqrasiyasının tərkib hissəsi kimi qiymətləndirilir. Hesab edirəm ki, biz bu fəaliyyətimizi genişləndirməklə ölkəmizin Avropa strukturlarına inteqrasiyasına öz töhfəmizi verə bilirik.

İkinci istiqamət Asiya Siyasi Partiyalarının Beynəlxalq Konqresidir ki, Yeni Azərbaycan Partiyası artıq bu qurumla da əməkdaşlığı qura bilibdir. YAP bu Konqresin İdarə Heyətinə daxil olan 20 partiyadan biridir. Məxsusi olaraq, onu qeyd etmək istəyirəm ki, Asiyanın bütün partiyalarını birləşdirən Asiya Siyasi Partiyalarının Beynəlxalq Konqresinin VII Baş Assambleyası bu ilin sonlarında Bakıda keçiriləcəkdir.

Bundan savayı, YAP-ın ayrı-ayrı ölkələrdə fəaliyyətdə olan böyük nüfuzlu partiyalarla ikitərəfli əlaqələri var. Bu ölkələrin sırası kifayət qədər genişdir. Bu sıraya Rusiyanı, Türkiyəni, Ukraynanı, Çini və digər başqa dövlətləri daxil edə bilərəm. Yeni Azərbaycan Partiyasının nümayəndələri ayrı-ayrı partiyaların dəvəti ilə çox tez-tez müxtəlif ölkələrdə səfərdə olurlar.

Qeyd etdiyiniz kimi, bir neçə gün bundan əvvəl YAP-ın nümayəndə heyəti İtaliyada səfərdə olub. Səfər çərçivəsində bu ölkənin keçmiş Baş naziri və İtaliyanın ən güclü partiyalarından birinin rəhbəri Silvio Berluskoni ilə görüşdük. Onun partiyası bu gün İtaliya parlamentində çoxluq təşkil edir və bütövlükdə ölkənin siyasi sistemində çox əhəmiyyətli rol oynayır.

Həmçinin, iki gün öncə Ukraynanın Regionlar Partiyasının qurultayı keçirildi və YAP-ın nümayəndələri partiyanın dəvəti ilə bu tədbirdə iştirak etdilər. Bundan başqa, bizə müxtəlif ölkələrin siyasi partiyalarından - o cümlədən, Vyetnam və Kanadadan səfərlərlə bağlı dəvətlər daxil olub. Biz o səfərlərin reallaşdırılması imkanlarını və vaxtını təhlil edirik. Açığını deyim ki, bu əlaqələr son dövrlərdə xeyli genişlənib və səfərləri biz ciddi şəkildə planlaşdırmaq zorunda qalırıq.

YAP-ın Gənclər Birliyi də çox geniş beynəlxalq əlaqələr qurubdur. Bizim gənclərimiz Avropa Demokratik Gənclər İtitifaqı ilə yaxından əməkdaşlıq edir. Ayrı-ayrı ölkələrin YAP-la həm əməkdaşlığı olan, bəzi hallarda isə hələ əməkdaşlıq qurmadığımız siyasi partiyalarının gənclər təşkilatları ilə YAP Gənclər Birliyi əməkdaşlıq edir. Bu əməkdaşlıq bir qədər də emosional və dostluq formasında həyata keçirilir. Bu çərçivədə müxtəlif qarşılıqlı səfərlər reallaşdırılır. Məsələn, ötən il Rumıniyanın Liberal Demokratlar Partiyasının dəvəti ilə YAP-ın 10 nəfər gənci bu ölkədə səfərdə oldu. Eynilə, YAP-ın dəvəti ilə Rumıniyanın Liberal Demokratlar Partiyasının gəncləri ölkəmizə səfər etdilər.

Beləliklə, geniş beynəlxalq əlaqələrimiz var və biz bu münasibətlərin inkişafına kifayət qədər ciddi yanaşırıq. Bir yandan Yeni Azərbaycan Partiyası bu əməkdaşlığı həyata keçirməklə Azərbaycanın dünyaya təqdim olunmasına özünün imkanları daxilində töhfələrini verir. İkinci bir tərəfdən bu əlaqələr vasitəsilə özü dünyada tanınmış olur.

- Əli müəllim, Yeni Azərbaycan Partiyasının gənclər siyasətinin də kifayət qədər effektiv nəticələr verdiyini söyləyə bilərik. Xüsusən, gənc liderlərin, mili maraqlarımızın müdafiəsində fəallıq göstərən gənclərin hazırlanmasında partiyanın xidmətləri danılmazdır və bir örnək təşkil edə bilər. O baxımdan istərdik belə bir sualla sizə müraciət edək. YAP-ın gənclər siyasətinin mühüm elementləri və üstünlükləri nədən ibarətdir?

- Azərbaycanın əhalisi çox sürətlə artır. 20 ildə Azərbaycanın əhalisinin 2 milyon artması o deməkdir ki, Azərbaycanda əhalinin tərkibində gənclər daha yüksək çəkiyə malikdir. Və statistikaya görə, Azərbaycan əhalisinin 60 faizini 35 yaşa qədər vətəndaşlar təşkil edirlər. Bu, çox byöük nemətdir və bundan lazımi nəticə çıxarıb səmərəli şəkildə faydalanmaq gərəkdir. Biz bunu elə bu cür də qəbul edərək, YAP-ın gənclərlə bağlı siyasətinin həyata keçirilməsində istifadə edirik. Bir halda ki, əhalinin tərkibində gənclər çox yüksək çəkiyə malikdirlər, demək, YAP-ın həyata keçirdiyi siyasətdə gənclərlə bağlı konsepsiya həlledici rol tutmalıdır. O cümlədən, gənclər bizim partiyamızın tərkibində də daha yüksək çəkiyə malik olmalıdır. Bu gün Yeni Azərbaycan Partiyasının sıralarında gənclər 40 faiz təşkil edirlər. Nəzərə alsaq ki, Yeni Azərbaycan Partiyasına insanlar ölkə qanunvericiliyinə uyğun olaraq, 18 yaşından sonra daxil ola bilərlər, onda bunun nə qədər yüksək bir göstərici olduğunu daha yaxşı dərk etmiş ola bilərik. Hesab edirəm ki, belə bir yüksək göstəricinin əldə olunmasında həlledici səbəblərdən biri təbii ki, Azərbaycan iqtidarının gənclərə yönəlmiş siyasəti, Prezidentimizin gənclərə münasibətidirsə, eyni zamanda YAP-ın sıralarında gənclərin fəaliyyəti üçün əlverişli şəraitin yaradılmasıdır. Onlar başa düşürlər ki, Yeni Azərbaycan Partiyası gənclərimizin ölkənin ictimai-siyasi həyatına qoşulması üçün çox gözəl platformadır və gənclərimiz də bundan faydalanmaq üçün çox məmnuniyyətlə Yeni Azərbaycan Partiyasının sıralarına qoşulurlar. Dərk edirlər ki, YAP-ın sıralarında onlar özlərinin potensialını aşkar etmək və ondan istifadə etmək imkanları qazanırlar. Digər tərəfdən, biz gənclərimizin YAP sıralarında fəaliyyətini stimullaşdırmaqla istedadlı gəncləri üzə çıxarırıq, onları cəmiyyətə təqdim edirik, gənc liderləri formalaşdırırıq. Təbii ki, Yeni Azərbaycan Partiyasının gəncləri, bütövlükdə Azərbaycan gəncləri bir neçə ildən sonra ictimai - siyasi həyatda həlledici mövqelər tutacaqlar. Azərbaycanın gələcək nazirləri, parlament üzvləri, tanınmış biznesmenləri məhz həmin gənclərin içərisindən çıxacaqlar. Demək, YAP, həm də, bu paramertlərə və bu potensiala malik gəncləri aşkar etmək funksiyasını öz üzərinə götürüb. Guman edirəm ki, bu funksiyanı layiqincə yerinə yetirir. Bununla bağlı misallar da gətirə biləçrəm. Məsələn, Yeni Azərbaycan Partiyası Gənclər Birliyinin əvvəlki sədri TürkPA yarandıqdan sonra bu qurumun baş katibi seçilib və həm cəmiyyətdə, həm də TürkPA çərçivəsində özünü kifayət qədər tanıtmış gənc siyasətçidir. Güman edirəm ki, onun yaxşı gələcək perspektivləri də var. Eyni zamanda, Yeni Azərbaycan Partiyasının Gənclər Birliyinin sədr müavini Dünya Azərbaycanlı Gənclərinin Konqresinin sədri seçilib və güman edirəm ki, onun da gələcəkdə çox böyük inkişaf etmək potensialı var. Mən açıq demək istəyirəm ki, YAP GB-yə daxil olan bir çox istedadlı gənclər var ki, gələcəkdə onlar Azərbaycanın ictimai və siyasi həyatında tanınmış simalara çevriləcəklər. Bu gündən artıq onlar özlərini tanıda biliblər. Birincisi, kifayət qədər bacarıqlı və qabiliyyətlidirlər, böyük potensiala malikdirlər, ikincisi, Yeni Azərbaycan Partiyası kimi qüdrətli bir partiyanın içərisində onun yaratdığı imkanlardan faydalanaraq özlərini cəmiyyətə təqdim edirlər. YAP zamin olaraq, onları cəmiyyətə təqdim edir ki, bu da onlara etimadı daha da artırmış olur.

Beləliklə, biz gənclərimizə böyük ümidlərlə baxırıq. İnanırıq ki, gənclərimiz bu ümidləri doğrultmağa layiqdirlər. Hesab edirəm ki, gənclərimiz gələcəyin çox ciddi ümid verən liderləri olacaqlar.

Yeni Azərbaycan.- 2012.- 20 mart.- S.4-5.