Dövlətin gənclər siyasəti müasir dövrün tələblərinə və reallıqlarına uyğun olaraq mahiyyət və keyfiyyətcə yeni bir mərhələyə qədəm qoyub

Yeni Azərbaycan Partiyası Gənclər Birliyinin sədri Seymur Orucov “www.yap.org.az” saytına müsahibə verib:

- Seymur müəllim, məlum olduğu kimi bu gün Azərbaycanda uğurlu gənclər siyasəti həyata keçirilir. Ölkəmizin dinamik inkişaf etdiyi bir şəraitdə bu siyasətin əhəmiyyətini necə səciyyələndirərdiniz?

- Azərbaycanda gənclər siyasəti həqiqətən də, çox böyük əhəmiyyətə malikdir. Əsası Ümummilli liderimiz Heydər Əliyev tərəfindən qoyulan bu siyasət nəticəsində Azərbaycan gəncliyi yüksək inkişaf mərhələsini yaşayır. Ulu öndərimizin müəyyənləşdirdiyi gənclər siyasəti Prezident İlham Əliyev tərəfindən uğurla davam etdirilir. Bu siyasət eyni zamanda, müasir dövrün tələblərinə və reallıqlarına uyğun olaraq mahiyyət və keyfiyyətcə yeni bir mərhələyə qədəm qoyub. Bu siyasətin başlıca istiqamətlərindən biri gənclərə dövlət dəstəyinin gücləndirilməsindən, onlara hərtərəfli diqqət göstərilməsindən ibarətdir. Son illər respublikamızda həyata keçirilən tədbirlər gənclərin hərtərəfli inkişafının təmin olunması üçün siyasi, sosial-iqtisadi, təşkilati - hüquqi şərait və təminatların yaradılmasını sürətləndirib, onların ictimai-siyasi fəallığının artmasına kömək edib. Bu gün ölkəmizdə gənclər siyasəti dövlət siyasətinin mühüm tərkib hissəsinə çevrilib. Azərbaycan gəncliyi ictimai həyatın bütün bölmələrində aktiv fəaliyyəti ilə seçilir, siyasi, iqtisadi, humantiar, sosial tədbirlərin həyata keçirilməsində mühüm rol oynayırlar. Eyni zamanda, son bir neçə il ərzində bilavasitə gənclərlə bağlı xeyli sayda normativ sənədin qəbul olunması ölkəmizdə gənclərlə iş sahəsində, gənclərin sosial-iqtisadi inkişafına yönəldilmiş mükəmməl qanunvericilik bazasının formalaşdırılmasından xəbər verir. Cənab Prezident tərəfindən ölkədə həyata keçirilən gənclər siyasətinin məqsədi gənclərin bütün təbəqələrinin hərtərəfli inkişafını, ölkənin ictimai-siyasi həyatında onların yaxından iştirakını təmin etməkdədir. Yeni mərhələdə dövlət başçısı tərəfindən gerçəkləşdirilən siyasət ən müxtəlif sahələri əhatə etməklə geniş spektrlidir. Belə ki, bu siyasət gənclərin tərbiyəsi, sağlamlığı, təhsili, intellektual və mənəvi inkişafı, asudə vaxtının səmərəli təşkili, həmçinin, gənclərin cəmiyyət həyatının bütün sahələrində fəal iştirakı ilə bağlı məsələləri əhatə edir. Gənclərlə düzgün iş strategiyasının müəyyənləşdirilməsi və bu strategiyadan irəli gələn vəzifələrin dəqiqliklə yerinə yetirilməsi nəticəsində bu gün Azərbaycan gənci idman, elm, mədəniyyət, incəsənət və s. sahələrdə böyük nailiyyətlər əldə edir, dövlətçilik ənənələrini daim uca tutur, çoxşaxəli dövlət islahatlarının həyata keçirilməsində yaxından iştirak edir. Məhz Prezident İlham Əliyevin böyük əməyi və səyi nəticəsində Azərbaycan gəncliyi artıq cəmiyyətin inkişafında ciddi rolu olan fəal sosial təbəqəyə çevrilib. Bu, ondan irəli gəlir ki, cənab Prezident gənclərə, malik olduqları bilik və bacarıq potensialları müqabilində bütün sahələrdə geniş meydan verməyin tərəfdarıdır və bunun təmin edilməsi üçün diqqət və qayğısını əsirgəmir. Bu baxımdan hazırkı mərhələdə gənclər siyasətinin əsasını məhz ölkəmizin davamlı inkişafı prosesində gənclərin imkanlarından səmərəli istifadə edilməsi üçün hər cür şəraitin yaradılması təşkil edir.

- Yeni Azərbaycan Partiyasının gənclərlə qurduğu işi necə qiymətləndirirsiniz? Partiyanın bu yöndəki siyasətinin əsasında hansı amillər dayanır?

- Yeni Azərbaycan Partiyası öz fəaliyyətində daim gənclərlə bağlı məsələlərə xüsusi diqqət yetirir. Bilirsiniz ki, YAP ümumxalq partiyası olaraq məhz insanların maraqlarını ifadə edir. Partiyamızın ideya və prinsipləri müstəqil, demokratik və güclü dövlət, eyni zamanda insanların yüksək rifahının təmin edilməsindən ibarətdir. Partiyamızın Sədri, ölkə Prezidenti İlham Əliyev bu istiqamətdə uğurlu siyasət həyata keçirir. Bu siyasəti nəinki YAP üzvləri, ölkə vətəndaşlarının mütləq əksəriyyəti dəstəkləyir. Cəmiyyətimizin aparıcı qüvvəsi olaraq gənclərimiz Azərbaycanın inkişaf siyasətinin fəal dəstəkçisi olmaqla bərabər, bu siyasətin təbliğatında da aktiv rol oynayırlar.

Bu gün dövlətimiz, o cümlədən Yeni Azərbaycan Partiyası gənclərimizin öz bilik və bacarıqlarını ifadə etmək üçün bütün imkanları yaradıb. Hazırda 580 min nəfərlik partiyamızın üzvlərinin 40 faizi gənclərdən ibarətdir. Bu kifayət qədər böyük bir qüvvədir. YAP-ın gənclər üçün böyük imkanlar yaratması partiyamıza onların axınını şərtləndirən amillərdən biridir. Məhz bunun nəticəsidir ki, partiyamızın sıralarında yüksək intellektli gənclər birləşib.

- YAP Gənclər Birliyinin fəaliyyəti daha çox nə ilə fərqlənir? Təşkilatın həyata keçirdiyi layihələr özünü doğruldurmu?

- Bildiyiniz kimi YAP nəinki ölkəmizdə, ümumilikdə bölgəmizdə ən böyük siyasi qüvvədir. Belə bir siyasi qüvvənin sıralarında olmaq və fəaliyyət göstərmək həm şərəfli, həm də çox məsuliyyətlidir. Biz fəaliyyətimizlə YAP rəhbərliyinin etimadını doğrultmağa çalışırıq, həmçinin çalışırıq ki, yenilikçi qüvvə olaraq bütövlükdə partiyamızın cəmiyyətdəki nüfuzunu daha da gücləndirək. Sevindirici haldır ki, bu məqsədə doğru inamla gedirik və öz ətrafımızda yüksək intellektli gəncləri toplayırıq. Təbii ki, məhz bu və digər amillər bizim partiyanın gənclər qurumunu digər təşkilatlardan fərqləndirir.

Bilirsiniz ki, YAP Gənclər Birliyi bir sıra layihələrin müəllifidir. Mən onların sırasında “yay” və “qış məktəbləri” layihəsini xüsusi vurğulamaq istərdim. Bu layihələr gənclər arasında çox rəğbətlə qarşılanır. Və bunun da ciddi əsasları var. Xatırladım ki, builki “Yay məktəbi”ndə partiyanın üzvü olan yüzlərlə fəal gənc iştirak edib. Bu layihə 2007-ci ildən həyata keçirilir və ötən illər ərzində bu tədbirin keçirilmə qaydaları daha da təkmilləşdirilib.

Layihədə iştirak edən gənclər həm Bakı şəhərini, həm də bölgələri təmsil edirlər. Hər il olduğu kimi bu il də “Yay məktəbi” ölkəmizin gözəl guşələrində təşkil olunub. Gənclərin qaldıqları otellərdə yüksək şərait var, onlar bu otellərin bütün xidmətlərindən istifadə edə bilirlər. Bildiyiniz kimi layihənin məqsədi odur ki, gənclər həm asudə vaxtlarını yaxşı keçirsinlər, həm bir-birilə təmas, münasibət qursunlar, eləcə də onlar üçün intellektual və əyləncəli yarışlar təşkil olunur. Eyni zamanda, “Yay məktəbi”ndə partiyamızı təmsil edən deputatlar, Milli Məclisin komitə sədrləri, eləcə də hökumət nümayəndələri gənclərin qonağı olurlar. Onlar müxtəlif mövzular ətrafında fikirlərini bölüşür, gəncləri maraqlarından suallara cavab verirlər. Hesab edirəm ki, “Yay məktəbləri” gənclərimizin intellektual səviyyəsinin daha yüksəlməsi və asudə vaxtlarının səmərəli keçirilməsi baxımından əhəmiyyətli layihədir. Biz bu layihələri davamlı edirik və qarşıda “Qış məktəbi” layihəsi olacaq. Ümumiyyətlə, bunlardan əlavə, bir sıra layihələr həyata keçirilir ki, onların bəziləri xeyriyyə məqsədi daşıyır və s. Eyni zamanda, YAP-ın gənc üzvlərinin sosial şəbəkələrdə fəallığının artırılması yönündə işlər aparılır.

- Sosial şəbəkələrdə fəaliyyətdən söz düşmüşkən, son zamanlar gənclərin bu prosesdə fəallığı artıb. Sizcə, bu fəallıq istənilən nəticəni verirmi?

- Müasir dünyanı İKT-siz təsəvvür etmək mümkün deyil. Məhz İKT-nin imkanlarından istifadə etməklə bu gün sosial şəbəkələr yaranıb və onun vasitəsilə insanlar bir-birilər ilə təmas qururlar. Əlbəttə ki, YAP Gəncləri Birliyi olaraq daim sosial şəbəkələrdə fəal olmağa çalışırıq. Bilirsiniz ki, radikal müxalifət partiyaları, ölkəmizin inkişafını istəməyən qüvvələr sosial şəbəkələr vasitəsilə Azərbaycan haqqında mənfi rəy formalaşdırmağa çalışırlar. Onlar müəyyən qruplar yaradaraq özlərinin həqiqətdən kənar fikirlərini yaymağa çalışırlar. Təbii ki, biz bu prosesdə seyrçi ola bilmərik. Ona görə də, elə onların yaratdığı qruplarda qarşı tərəfə tutarlı cavab veririk. Onu da qeyd edim ki, partiyamızın gəncləri də sosial şəbəkələrdə xüsusilə “facebook”da qruplar yaradıblar. Onların sırasında “Azərbaycan 2013: QƏLƏBƏ” qrupu artıq böyük rəğbətlə qarşılanır. Bu qrupda ən müxtəlif məsələlər haqda fikirlər bildirilir, Azərbaycan Prezidenti İlham Əliyevin həyata keçirdiyi siyasət təbliğ olunur. Eyni zamanda, ölkəmizin inkişafını əks etdirən bütün məsələlər haqda münasibət açıqlanır. Bir sözlə, bu qrupda birləşən minlərlə insan çox fəallıq göstərir ki, bu da qarşı tərəfin əsassız iddialarına tutarlı cavab verilməsində vacib rol oynayır.

Biz gənclərlə daim ünsiyyətdə olan və onlarla işləyən təşkilat olduğumuza görə, Azərbaycan gəncliyinin nə düşündüyünü çox yaxşı bilirik. Apardığımız söhbətlərdən, sosial şəbəkələr üzərindən keçirdiyimiz sorğulardan da bəlli olur ki, bu gün Azərbaycan gəncləri Prezident İlham Əliyevin siyasətini birmənalı şəkildə dəstəkləyir.

- Son zamanlar YAP Gənclər Birliyi beynəlxalq əlaqələrinin genişləndirilməsi istiqamətində də ciddi addımlar atır. Bu sahədə əldə olunan nəticələri necə xarakterizə etmək olar?

- Bəli, beynəlxalq əlaqələr baxımından xeyli uğurlar var. Ötən müddətdə beynəlxalq əlaqələr istiqamətində Rusiyanın, Ukraynanın, Belorusun, Qazaxstanın, Rumıniyanın, Bolqarıstanın, Yunanıstanın, Makedoniyanın, İtaliyanın və başqa ölkələrin partiyaları ilə yaxından əlaqələr qurulub. Həmçinin, Avropa gənclər təşkilatlarının bir sıra layihələrində YAP Gənclər Birliyi olaraq fəal iştirak edirik. Bundan əlavə, YAP-ın Gənclər Birliyinin təşəbbüsü ilə Avropanın enerji təhlükəsizliyi, sülh və təhlükəsizliklə bağlı Bakıda beynəlxalq konfranslar keçirilib və s. Bir sözlə, ötən müddət ərzində beynəlxalq əməkdaşlıq sahəsində də ciddi nəticələr əldə olunub. Biz beynəlxalq əlaqələrin inkişafı məsələsində fəaliyyətimizi müxtəlif istiqamətlərdə qurmuşuq. Birinci istiqamət gənclər sahəsində fəaliyyət göstərən beynəlxalq təşkilatlar, həmçinin, dünyadakı gənclər təşkilatları və siyasi partiyaların gənclər birlikləri ilə əlaqələrin qurulması, birgə layihələrin həyata keçirilməsi, Azərbaycanın dostlarının sayının artırılması yönündə işlərin aparılmasıdır. İkinci istiqamət isə bu təşkilatlarda fəaliyyət göstərən və ya həmin qurumların fəaliyyətində iştirak etməyən müxtəlif ölkələri təmsil edən gənclər təşkilatlarının və siyasi partiyaların gənclər birlikləri ilə əlaqələrin qurulmasıdır. Sevindirici haldır ki, hər iki istiqamət üzrə müəyyən addımlar atılıb, uğurlar qazanılıb.

İkitərəfli əlaqələrin inkişafı, müxtəlif ölkələrdə fəaliyyət göstərən gənclər və siyasi partiyaların gənclər təşkilatları ilə münasibətlərin qurulması istiqamətində də müəyyən uğurlar əldə etmişik. Bilirsiniz ki, müxtəlif təşkilatları, ölkələri təmsil edən gənclərlə ikitərəfli müqavilələrin imzalanması, o ölkələrin gəncləri ilə qarşılıqlı səfərlərin edilməsi ilə bağlı işlər aparılıb. YAP Gənclər Birliyi olaraq beynəlxalq əlaqələrimizin daha da genişləndirilməsi yönündə işlərimizi davam etdiririk.

Yeni Azərbaycan.- 2012.- 20 sentyabr.- S.5.