Müstəqil Azərbaycanın gömrük xidməti dinamik inkişaf yolu ilə uğurla addımlayır

Azərbaycan Respublikası Dövlət Gömrük Komitəsinin sədri, gömrük xidməti general-leytenantı Aydın Əliyev www.yap.org.az saytına müsahibə verib:

- Aydın müəllim, əvvəla Sizi və komitənin bütün kollektivini qarşıdan gələn 30 yanvar- gömrük işçilərinin peşə bayramı günü münasibətilə təbrik edir, işlərinizdə uğurlar arzulayırıq. Müstəqil Azərbaycanın Dövlət Gömrük Komitəsinin yaradılmasının 20-ci ildönümündə peşə bayramınızı necə qarşılayırsınız?

- 2012-ci il yanvarın 30-u – Dövlət Gömrük Komitəsinin yaradılmasının 20-ci ildönümü ölkəmiz üçün “həqiqətən də” əlamətdar bir hadisədir. Məlum olduğu kimi, 20 il bundan öncə, Azərbaycan öz dövlət müstəqilliyini bərpa etdikdən sonra 1992-ci il yanvarın 30-da Dövlət Gömrük Komitəsi yaradılmışdır. Dövlət Gömrük Komitəsi ötən müddət ərzində sürətli inkişaf yolu keçmiş, ölkəmizdə dünya standartlarına uyğun gömrük xidməti formalaşmışdır.

Azərbaycan Respublikası dövlət müstəqilliyini bərpa etdikdən sonra ötən dövr ərzində xalqımızın Ümummilli lideri Heydər Əliyevin uzaqgörən siyasəti və gərgin fəaliyyəti nəticəsində, ağır ilkin şərtlərə baxmayaraq, ölkənin sosial-iqtisadi inkişafı və dünya təsərrüfat sisteminə inteqrasiyası sahəsində çox böyük nailiyyətlər əldə olunmuşdur. Bu gün Ulu öndər Heydər Əliyevin müəyyənləşdirdiyi və xalqımızı daha parlaq gələcəyə aparan hərtərəfli inkişaf yolunun Azərbaycan Prezidenti İlham Əliyev tərəfindən uğurla və inamla davam etdirilməsi, yaradılmış əlverişli iqtisadi şərait davamlı və sürətli inkişafı təmin etmişdir.

- Məlum olduğu kimi, məhz 1997-ci ildə Azərbaycan xalqının Ümummilli lideri Heydər Əliyevin imzaladığı Sərəncam ilə gömrük işçilərinin peşə bayramı qeyd olunur. Ümumiyyətlə, Ulu öndərimizin ölkəmizdə gömrük xidməti işinin gücləndirlməsi istiqamətindəki fəaliyyətini necə səciyyələndirərdiniz?

- Müstəqilliyimizin ilk illərində, 1991-1993-cü illərdə xaos və tənəzzül içərisində yaşayan Azərbaycan dövlətini və ölkə iqtisadiyyatını bu fəlakətdən, hərc-mərclikdən xilas edən Ulu öndər Heydər Əliyev ölkənin iqtisadi yüksəlişi üçün təcili tədbirlər görməyə başlamışdır. Milli iqtisadiyyatın dirçəldilməsi üçün ölkənin malik olduğu təbii resurslardan istifadə edilməsi və milli məhsulların xarici bazarlara çıxışının təmin edilməsi mühüm əhəmiyyət kəsb edirdi. Bu dövrdə xarici ticarət əlaqələrinin inkişaf istiqamətlərinin müəyyənləşdirilməsi əsas məsələlərdən biri idi. Dövlətin daxili və xarici siyasətinin tərkib hissəsi olan vahid gömrük siyasətinin həyata keçirilməsi əsas məsələlərdən biri kimi gömrük xidmətinin qarşısında vəzifə olaraq qoyulmuşdu.

Gömrük xidmətinin ölkə iqtisadiyyatının inkişafındakı rolunu yüksək qiymətləndirən Ulu öndər Heydər Əliyev bu orqanın fəaliyyətini daim diqqətdə saxlayırdı. Məhz Ümummilli lider Heydər Əliyevin tələbkarlığı gömrük orqanlarında uğurların təminatçısı olmuş, beləliklə də, gömrük sistemi dövlətin milli maraqlarına xidmət edən, iqtisadi təhlükəsizliyin keşiyində dayanan, sosial-iqtisadi inkişafı stimullaşdıran nüfuzlu bir orqana çevrilmişdir. Yanvarın 30-nun gömrük işçilərinin peşə bayramı günü kimi qeyd edilməsi də məhz Ulu öndərin adı ilə bağlıdır. Belə ki, Azərbaycan Respublikası Prezidentinin 10 yanvar 1997-ci il tarixli Sərəncamı ilə yanvarın 30-u gömrük əməkdaşlarının peşə bayramı günü elan edilmişdir.

1997-ci ildə Azərbaycan Respublikası Dövlət Gömrük Komitəsinin yaradılmasının 5-ci ildönümünə həsr olunmuş geniş iclasda Ulu öndər Heydər Əliyev proqram xarakterli geniş nitq söyləyərək sözügedən dövr və sonrakı illər üçün gömrük xidmətinin inkişafının prioritetlərini müəyyənləşdirdi. Ulu öndər Gömrük nəzarətinin təşkili, qaçaqmalçılığa qarşı mübarizə və eyni zamanda, maliyyə intizamının möhkəmləndirilməsi istiqamətində tövsiyə və tapşırıqlarını verdi.

1995-ci ildə Dövlət Gömrük Komitəsinin rəhbərliyində aparılan kadr dəyişikliyinin müsbət nəticələri elə ilk günlərdən özünü büruzə verməyə başladı. İlk növbədə, gömrük xidmətinə bilikli, bacarıqlı və ixtisaslı kadrların qəbul edilməsinə başlandı. Digər tərəfdən, Dövlət Gömrük Komitəsinin yeni strukturunun yaradılması, yeni gömrük idarələri və postlarının açılması, eyni zamanda, inzibati binaların əsaslı tikinti və təmirinin həyata keçirilməsi, maddi-texniki bazanın inkişafı, yeni nəzarət cihaz və avadanlıqların alınması, gömrük qanunvericiliyinin müasir normalara uyğunlaşdırılması və büdcənin formalaşmasında gömrük xidmətinin rolu və əhəmiyyəti nəzərə alınaraq hər il üçün müəyyənləşdirilən büdcə proqnozu öhdəliyinin yerinə yetirilməsi bir vəzifə olaraq qarşıya qoyuldu. Bunun üçün ilk növbədə maliyyə intizamının möhkəmləndirilməsi, ölkəyə idxal olunan mal və nəqliyyat vasitələri üzrə gömrük ödənişlərinin alınması və vergilərdən yayınma hallarının qarşısının alınmasına nəzarətin artırılması ən vacib məsələlər hesab edilirdi. Tədricən qarşıya qoyulan vəzifələrin həlli istiqamətində təxirəsalınmaz tədbirlər həyata keçirilməyə başlandı və qısa zaman kəsiyində müsbət nəticələr əldə olundu.

- Ötən illər ərzində gömrük xidmətinin inkişafı və modernləşdirilməsi istiqamətində görülən işlər haqqında da ətraflı məlumat verməyinizi xahiş edirik...

- 20 illik zaman məsafəsində, xüsusilə 1995-ci ildən başlayaraq gömrük xidmətinin inkişafı və modernləşdirilməsi istiqamətində böyük işlər görülmüşdür. Bu illər ərzində gömrük qanunvericiliyi bazası möhkəmləndirilmiş, Avropa standartlarına cavab verən normativ-hüquqi aktlar qəbul edilmiş, nüfuzlu beynəlxalq təşkilatlarla sıx əməkdaşlıq qurulmuşdur. Son 15 ildə gömrük infrastrukturunun inkişaf etdirilməsi sahəsində bir sıra tədbirlər həyata keçirilmişdir. Belə ki, bütün sərhəd-keçid məntəqələri, gömrük idarələri və postlarında əsaslı təmir və tikinti işləri başa çatdırılmış, onlar müasir avadanlıq və qurğularla təmin edilmişdir.

Azərbaycan Prezidenti İlham Əliyevin müvafiq fərman və sərəncamlarıyla təsdiq edilən dövlət proqramları, eləcə də, “Azərbaycan Respublikası gömrük sisteminin 2007-2011-ci illərdə inkişafına dair Dövlət Proqramı”na əsasən, ölkə iqtisadiyyatının bütün sahələrində, o cümlədən, gömrük xidmətində yenidənqurma işləri həyata keçirilmişdir. Bu illər ərzində gömrük sisteminin infrastrukturu tamamilə yenilənmişdir. Təkcə ötən 2010-2011-ci illərdə Astara Gömrük İdarəsinin, Biləsuvar Gömrük İdarəsinin “Biləsuvar” sərhəd-keçid məntəqəsinin və Tovuz Gömrük İdarəsinin “Sınıq körpü”, Balakən Gömrük İdarəsinin “Mazımçay”, Xaçmaz Gömrük İdarəsinin “Samur” gömrük postlarının beynəlxalq standartlara uyğun yeni inzibati binaları Azərbaycan Prezidenti İlham Əliyevin iştirakı ilə gömrük əməkdaşlarının xidməti istifadəsinə verilmişdir. Hazırda isə Azərbaycan Prezidentinin “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın təsdiq edilməsi haqqında” 14 aprel 2009-cu il tarixli Fərmanına uyğun olaraq Xudat sərhəd-keçid məntəqəsinin əsaslı tikintisi, eyni zamanda, Biləsuvar, Tovuz və Balakən rayonlarında gömrük terminalı və anbarların inşası həyata keçirilir.

Bundan başqa, Azərbaycan Prezidentinin “Azərbaycan Respublikası dövlət sərhədinin buraxılış məntəqələrindən keçirilən malların və nəqliyyat vasitələrinin yoxlanılmasında “bir pəncərə” prinsipinin tətbiqi haqqında” 11 noyabr 2008-ci il tarixli Fərmanına əsasən, 2009-cu il yanvarın 1-dən dövlət sərhədinin buraxılış məntəqələrində “bir pəncərə” prinsipi tətbiq edilərək, sərhəd-keçid məntəqələrində nəzarət növlərini inteqrəedilmiş qaydada həyata keçirməklə sərhəd-keçid prosedurlarının daha da sadələşdirilməsi, nəqliyyat və mal axınına əlverişli şərait yaradılması, qabaqcıl dövlətlərdə olduğu kimi vaxt itkisinin minimuma endirilməsinə nail olunmuşdur. Fərmana uyğun olaraq, Azərbaycan Respublikası dövlət sərhədinin buraxılış məntəqələrindən keçirilən malların və nəqliyyat vasitələrinin yoxlanılmasında “bir pəncərə” prinsipi üzrə vahid dövlət orqanının səlahiyyətləri Dövlət Gömrük Komitəsinə həvalə olunmuşdur.

- Aydın müəllim, Sizi bir daha təbrik edirik və dəyərli müsahibəyə görə təşəkkürümüzü bildiririk...

- Çox sağ olun. Bu gün Heydər Əliyev yolunun layiqli davamçısı Azərbaycan Prezidenti İlham Əliyev Azərbaycan gömrüyünün öz ənənələrini qoruyub saxlaması və daha da təkmilləşdirilməsi işini daim diqqət mərkəzində saxlayır, gömrük orqanlarının fəaliyyəti ölkə rəhbərliyi tərəfindən qiymətləndirilir və gömrükçülər daim diqqət və qayğı ilə əhatə olunurlar. İnanıram ki, gələcəkdə də gömrük xidməti respublikamızın iqtisadi inkişafına təkan verməklə ölkənin iqtisadi qüdrətinin artırılmasında, əhalinin sosial vəziyyətinin yaxşılaşdırılmasında, möhtərəm Prezidentimiz İlham Əliyevin həyata keçirdiyi siyasi kursun reallaşmasında mühüm rol oynayacaq, gömrük əməkdaşları bu vəzifələrin reallığa çevrilməsinin təminatçısı olacaqlar. Dövlət başçımızı, eləcə də, hökumətimizi əmin edirəm ki, müstəqil Azərbaycanın beynəlxalq nüfuzunun daha da artırılması və xalqımızın firavan gələcəyinin təmin edilməsi uğrunda apardığı mübarizədə yaxından iştirak edəcək, qarşımızda qoyulan təxirəsalınmaz vəzifələrin müvəffəqiyyətlə yerinə yetirilməsi üçün bütün qüvvə və bacarığımızı sərf edəcəyik.

Yeni Azərbaycan.- 2012.- 28 yanvar.- S.7.