Bakının yeni beşulduzlu hotelləri silsiləsindən...

“JW Marriott Absheron Baku” mehmanxanası paytaxta xüsusi yaraşıq verəcək

Hər hansı bir ölkədə turizm sənayesinin inkişafında beynəlxalq standartlara uyğun mehmanxana komplekslərinin mövcudluğu vacib şərtdir. Çünki ölkə öz daxili potensialı, görməli yerləri ilə turistlər üçün nə qədər cəlbedici olsa da, əgər müasir tipli mehmanxana komplekslərinə malik deyilsə, burada turizm sektoru uğurla inkişaf etməyəcək. Bu baxımdan, Azərbaycanın şansları daha yüksəkdir. Belə ki, Prezident İlham Əliyevin qeyd etdiyi kimi, son iki ildə təkcə Bakı şəhərində altı müasir tipli, dünya standartlarına uyğun beşulduzlu mehmanxananın istifadəyə verilməsi planlaşdırılıb. Bunlar “Kempinski-Badamdar”, “Hilton-Bakı”, “Jumeirah Bilgah Beach Hotel” “Four Seasons”, “JW Marriott Absheron Baku” və “Fairmont” mehmanxanalarıdır. Ötən il dövlət başçısı İlham Əliyevin iştirakı ilə bunlardan ilk üçünün – “Kempinski-Badamdar”, “Hilton-Bakı” və “Jumeirah Bilgah Beach Hotel” mehmanxanalarının rəsmi açılış mərasimləri keçirilib. Digər mehmanxanalarda tikinti işləri, demək olar ki, başa çatdırılıb, son tamamlanma və tərtibatların işlənməsi həyata keçirilməkdədir. Yaxın vaxtlarda, daha dəqiq desək, yazın əvvəllərində isə paytaxtın mərkəzi meydanı olan “Azadlıq” meydanına xüsusi yaraşıq verəcək “JW Marriott Absheron Baku” mehmanxanası istifadəyə veriləcək. Bəs görəsən, xüsusi arxitekturası və dizaynı ilə uzaqdan diqqət çəkən bu mehmanxana şəhərimizin qonaqlarına hansı üstün xidmətlər təqdim edəcək? Bununla bağlı “JW Marriott Absheron Baku”nun baş direktoru cənab Guy Godet əməkdaşımızın suallarını cavablandırıb:

- Cənab Guy Godet, öncə oxucularımıza dünyada məşhur olan “Marriott” hotellər şəbəkəsi haqda məlumat verməyinizi istərdik.

- Bildiyiniz kimi, “Marriott İnternational” şəbəkəsi dünyada ən böyük mehmanxana şəbəkəsindən biridir. Bizim şəbəkəyə dünya üzrə 3700-dən artıq mehmanxana daxildir. Dünyanın istənilən qitəsində bu mehmanxana brendinə rast gəlmək mümkündür. “Marriott İnternational” şirkəti dünyada 19 brendi ilə təqdim olunur. Həmin brendlərdən biri olan “JW Marriott” şirkəti isə öz müştərilərinə münasib qiymətlərlə dəbdəbəli istirahət və rahatlıq təklif edir. Və biz bu brendi Bakıda təmsil etməkdən qürur duyuruq. Bizim brendlərdən olan “Marriott İnternational Rewards” dünyada ən yaxşı mehmanxana xidməti sahəsi kimi tanınır və dünya üzrə 30 milyondan artıq üzvü var.

- Azərbaycan turizm ölkəsi kimi dünyada kifayət qədər tanınmaqdadır. Hər il 1 milyondan artıq turist öz istirahəti üçün məhz ölkəmizi seçir. Bir çox məşhur hotel brendləri uzun illərdir ki, Bakıda fəaliyyət göstərirlər. Maraqlıdır, bəs “Marriott”un Azərbaycana belə gec “gəlməsinin” səbəbi nə idi?

- Öncə qeyd etmək istərdim ki, “Marriott İnternational” həm də bir idarəetmə şirkətidir. Onun hər hansı bir ölkədə tikdirdiyi mehmanxana “Marriott”un və əlbəttə ki, sahibkarın uğurlu iş birliyinin nəticəsində ərsəyə gəlir. Təbii ki, “Marriot” bu və ya digər ölkədə öz şəbəkəsini yaradarkən həmin ölkələrdə, eləcə də, ümumiyyətlə regionda tədqiqatlar aparır. Bəzən də elə olur ki, investorlardan gələn təkliflər bizi regionun başqa bazarlarına aparıb çıxarır. Azərbaycana gəlincə deyərdim ki, seçimimizi düzgün etmişik. Çünki burada “Paşa Holdinq” şirkəti ilə yaxşı əlaqələr qura bilmişik və Bakıya gəlişimizdən məmnunluq hissi keçiririk. Biz çox şadıq ki, sahibkarın, dizaynerlərin və “Marriott”un birgə əməkdaşlığı çox uğurlu alındı və biz Bakıda əsl “JW Marriott” mehmanxanasının yaradılmasına nail olduq. Düşünmürəm ki, Bakıya belə gec gəlişimizə görə çox şey itirmişik. Əsas odur ki, biz artıq buradayıq və “JW Marriott Absheron Baku” öz qonaqpərvərliyi və təqdim edəcəyi üstün xidmətlərlə Azərbaycanın genişlənən mehmanxana sektoruna yeni beynəlxalq xidmət standartı gətirəcək.

- Əgər sirr deyilsə, bəs “JW Marriott Absheron Baku”nun rəsmi açılışı nə zamana planlaşdırılır?

- Burada elə bir sirr yoxdur. Gördüyünüz kimi, mehmanxanada tikinti işləri tam başa çatıb. Hazırda mərtəbələrdə dizayn işləri aparılır, texniki avadanlıqlar, eləcə də, otaqlara yataq dəstlərinin döşənməsi prosesi davam etdirilir. Düşünürəm ki, tezliklə biz bu işləri də başa çatdıra biləcəyik. Və yazın ilk ayında “JW Marriott Absheron Baku” artıq ilk qonaqlarını qəbul edə biləcək. Belə hesab edirik ki, bu, Bakıda keçiriləcək möhtəşəm tədbirdən – “Eurovision” musiqi yarışmasından əvvəl baş verəcək.

- Yeri gəlmişkən, “JW Marriott Absheron Baku” paytaxtdakı digər hotellərdən hansı üstün cəhətləri ilə fərqlənəcək?

- “JW Marriott Absheron Baku” müştərilərinə münasib qiymətlərlə, eyni zamanda, yüksək keyfiyyətli, hətta dəbdəbəli mehmanxana xidmətləri təqdim edəcək. Bura rahatlığı sevən, komfort və gözəlliyin vəhdətini dəyərləndirə bilən, bir sözlə, hətta deyərdim ki, mehmanxanalar üzrə həqiqi ekspertlər üçün bir istirahət məkanı olacaq. Bizim vəzifəmiz isə müştərilərə-dünya ölkələrinə səfərə çıxan səyyahlara orijinallıq bəxş etməkdir, onlara özlərini lap evlərindəki kimi hiss etmələri üçün şərait yaratmaqdır. Bu mənada, biz hər kəsin arzu edə biləcəyi bir xidmət təqdim edəcəyik, bizim göstərəcəyimiz bu xidmət “sanki” incəsənət nümunələri olacaq. Əminəm ki, qonaqlarımız da uzun illərin təcrübəsinə əsaslanan bu xidmətlərdən çox məmnun qalacaqlar.

Bundan əlavə, mehmanxana kompleksinə böyük ziyafətlərin toyların keçirilməsi üçün çox münasib olan, sahəsi 1200 m2-dən artıq olan “Şərq Zalı”, eləcə də, bir neçə konfrans zalı daxildir. Bütün otaqlar, eləcə də, mehmanxananın istənilən ərazisində Wi-Fi sistemli internet olacaq. Biz, həmçinin, 4 ədəd yüksək zövqlə tərtib olunmuş qidalanma məkanını təqdim etməkdən qürur hissi keçiririk. Bunlardan birincisi “Fireworks” restoranıdır. Biz bu adı təsadüfən seçməmişik. Azərbaycan-odlar yurdudur, onun simvolu isə alov olduğundan bu ideya üzərində dayanmışıq. Burada müştərilərimiz Azərbaycan, Türkiyə, İran və Hindistan mətbəxlərinin ləziz təamlarından zövq ala biləcəklər.

Digər istirahət məkanı isə “OroNero” restoranıdır. İtalyan dilindən tərcümədə “Qara Qızıl” deməkdir. Axı Azərbaycan öz nefti ilə dünyada məşhurdur. Burada dincələn qonaqlar Bakının gözəl mənzərəsindən zövq ala-ala, həm də italyan mətbəxinin təamlarından dadacaqlar. “RazzMatazz” barı isə mehmanxanamızın ən dəbdəbəli məkanıdır. Buradan qonaqlar paytaxtın mənzərəsini seyr edəcək, Bakı gecələrinin füsunkar gözəlliklərinə tamaşa edə-edə gözəl istirahət edəcəklər. Və nəhayət, “Zest Kafe”yə gələn müştərilərimiz burada hər zövqə uyğun kulinariya nümunələrindən dadmaq imkanı qazanacaqlar. Düşünürəm ki, bizim xidmətlərimizi müştərilərimiz uzun zaman xatırlayacaqlar.

- Bəs mehmanxanada çalışan kadr potensialı haqda nə deyə bilərsiniz? Yerlilər buradakı işləyənlərin neçə faizini təşkil edəcək?

- Mehmanxanın idarəetməsinə cəlb olunmuş əcnəbi vətəndaşları saymasaq, demək olar ki, işçilərin böyük əksəriyyəti Azərbaycan vətəndaşları olacaq. Deyərdim ki, işçilərimizin 90 faizdən çoxunu, məhz yerli vətəndaşlar təşkil edəcək. Biz burada həm də onların təlimini təşkil edəcək, peşə hazırlığına yüksək diqqət yetirəcəyik. Həmçinin, qeyd etmək istərdim ki, aşbazların böyük əksəriyyəti də, məhz yerli mütəxəssislər olacaq.

- Cənab Guy Godet, ümumiyyətlə, Azərbaycanı bir turizm ölkəsi kimi necə xarakterizə edərdiniz? Sizcə, “JW Marriott Absheron Baku” Azərbaycanda turizm sektorunun inkişafına nə kimi töhfələr verəcək?

- Düşünürəm ki, Azərbaycan gizli bir mirvariyə bənzəyir, bu yer hələ tədqiq olunmalı və dünya ictimaiyyətinə təqdim edilməlidir. Bu region, ümumiyyətlə, dünyanın digər bölgələrindən qat-qat fərqlənir. Azərbaycan zəngin tarixə və mədəniyyətə malik, gəzməli-görməli yerlərlə zəngin olan müasir bir ölkədir. Dünya ölkələrinə səyahətə çıxan hər bir turistə bu füsunkar təbiətli ölkəyə gəlməyi, buradakı gözəlliklərin canlı şahidi olmasını tövsiyə edərdim. O ki qaldı sualın ikinci hissəsinə, “Marriott İnternational”, yuxarıda qeyd etdiyim kimi, dünyada ən böyük mehmanxana şəbəkəsindən biridir, şirkətimiz dünya ölkələri üzrə 3700-dən artıq mehmanxanaya malikdir. Bundan əlavə, “Marriott” böyük bir yayım zənciridir. Belə ki, müxtəlif regionlarda, şəhərlərdə yerləşən “Marriott” hotellərinin təbliği üçün www.marriott.com səhifəsi mövcuddur. Bu səhifəyə daxil olan turistlər sözsüz ki, Bakı haqqında, Azərbaycanın turizm potensialı haqqında da informasiya əldə edirlər. Bu isə, öz növbəsində Azərbaycanın dünyada təbliği deməkdir. Bundan əlavə, şirkətimizin “Qlobal Satış Ofisləri” vasitəsi ilə dünya üzrə çoxsaylı və müxtəlif mənbələr mövcuddur, qonaqlarımızı marketinq alətləri vasitəsi ilə həvəsləndirir və mükafatlandırırıq. Düşünürəm ki, bütün bu vasitələr nəticə etibarı ilə Azərbaycana turist axınının çoxalmasına gətirib çıxaracaq. Bizim işimizin uğuru, sözsüz ki, Azərbaycanda turizm sektorunun inkişafına müəyyən töhfələr vermiş olacaq.

- Turizm sahəsində çalışan bir peşəkar olaraq, sizcə, ölkədə turizmin inkişafı üçün dövlət tərəfindən daha hansı addımlar atılmalıdır?

- Azərbaycanda turizmin inkişafı üçün dövlət tərəfindən kifayət qədər işlər görülüb, gözəl investisiya mühiti yaradılıb. Amma bununla belə, əlavə, ölkəyə daha çox sayda hava yolları şirkətlərini cəlb etmək lazımdır. Sözsüz ki, bunlara daha bir mühüm məsələni əlavə etmək istərdim - bu, marketinqdir. Düşünürəm ki, marketinq kampaniyaları yaratmaqla Azərbaycanın turizm potensialını xaricdə təbliğ etmək çox zəruridir.

- Sonda bir əcnəbi vətəndaş olaraq Azərbaycandakı iqtisadı inkişafı necə dəyərləndirərdiniz? Bildiyiniz kimi, bu il Azərbaycan paytaxtı, həm də “Eurovision” musiqi yarışmasına ev sahibliyi edəcək. Sizcə müsabiqəni izləmək üçün paytaxtımıza gələn qonaqlar Bakıdan hansı təəssüratlarla ayrılacaqlar?

- Bu suala bir qədər geniş cavab vermək istərdim. Düzü, indiyədək heç Azərbaycanda olmamışdım. İlk dəfə 3 ay əvvəl Bakıya gəldim. Asiyanın müxtəlif ölkələrində işgüzar səfərlərdə olmuşdum, bir sıra ölkələrdə işləmişdim. Dostlarımın söhbətlərindən isə Azərbaycanın tipik bir Asiya ölkəsi kimi təsəvvür edirdim. Heydər Əliyev Beynəlxalq Hava Limanında yerə enəndən sonra ölkəniz haqda təsəvvürlərim tamam dəyişdi. Şəhərə gələrkən yol boyu inşa olunan müasir körpülər, yol ötürücüləri, geniş şosselər Bakının necə müasir, inkişaf etmiş bir şəhər olduğundan xəbər verirdi. Şəhərə çatarkən artıq axşam düşürdü. Mənim üçün şəhərin mərkəzindəki hündür mehmanxanaların birində, lap yuxarı mərtəbədə otaq tutulmuşdu. Otağımın pəncərəsindən ətrafa baxdım, şəhər başdan-başa nura qərq olunmuşdu. Düzü Bakının axşamları məni daha çox valeh etdi. Gündüz şəhərdə gəzintiyə çıxdıq. Bakıda Avropa memarlıq üslubunda tikilmiş, bir-birindən yarışıqlı çoxlu binalar gördüm. Buradakı park və xiyabanlar, hündür, müasir dizaynda inşa edilən binaları gördükdən sonra anladım ki, Azərbaycan, dostlarımın dediyi kimi, tipik bir Asiya ölkəsi deyil-bura heç də Avropa ölkələrindən geri qalmayan, onlarla ayaqlaşan bir məmləkətdir. İnsanlarınızın səmimiyyəti, qonaqpərvərliyi daha çox marağıma səbəb olmuşdu. Bir də vazkeçilməz Azərbaycan mətbəxi. Mən özüm, belə deyək, (gülür), yarı vegetarianam. Tərvəz yeməklərini çox sevirəm. Burada, Azərbaycan milli mətbəx nümunələrini görəndən sonra, – nəzərə alsaq ki, bunların böyük əksəriyyəti ət yeməkləridir, çox tutumludur, – deyəsən, mən də artıq kökəlməyə başlamışam. Bir sözlə, Azərbaycan, onun xalqı və mədəniyyəti çox qədim və zəngin tarixə malikdir. Onun paytaxtı – şəhərlər gözəli Bakı – fantastik dərəcədə füsunkar və valehedicidir. Buradakı iqtisadi inkişafı dünyanın heç bir yerində müşahidə etmək olmaz. Sizə sadaladıqları dostlarıma da deyirəm, onlara məktubda yazıram ki, gəlib buradakı gözəlliklərin canlı şahidi olsunlar.

O ki qaldı “Eurovision”a, düşünürəm ki, Avropanın builki mötəbər musiqi yarışmasında hər şey çox gözəl və fərqli olacaq. Çünki bu yarışmaya Bakı ev sahibliyi edəcək. Bunun üçün, əminəm ki, Azərbaycanın kifayət qədər potensial imkanları var. Düşünürəm ki, müsabiqəni izləmək üçün Bakıya gələcək qonaqlarda mənim kimi, buradakı gözəlliklərdən çox heyrətlənəcəklər. Bu şəhər qonaqlarda unudulmaz anlar, xoş xatirələrlə yadda qalacaq. Əminəm ki, Bakı, müsabiqənin təşkili və keçirilməsi ilə “Eurovision”un tarixində önəmli iz buraxmış olacaq.

- Səmimi söhbət üçün təşəkkür edirik.

- Mən də fürsətdən istifadə edərək bütün Azərbaycan xalqına minnətdarlığımı bildirir, müstəqil Azərbaycan dövlətinə isə daim iqtisadi inkişaf və yeni-yeni nailiyyətlər arzulayıram.

Səlim Loğmanoğlu

Yeni Azərbaycan.- 2012.- 28 yanvar.- S.7.