Türkiyə atdığı hər bir addımda mütləq Azərbaycanın mənafelərini düşünür

Səfir Alper Coşkun: Bakı və Azərbaycan dedikdə, təsəvvürlərdə mötəbər tədbirlərin uğurla baş tutduğu meqapolis şəhər və sürətlə inkişaf edən bir ölkə canlanır

Türkiyənin Azərbaycandakı səfiri cənab Alper Coşkunun “Yeni Azərbaycan” qəzetinə müsahibəsi:

- Cənab səfir, Azərbaycanın dövlət müstəqilliyini tanıyan ilk ölkə məhz qardaş Türkiyə olmuşdur. Ötən müddət ərzində ölkələrimiz arasındakı siyasi, iqtisadi və digər sahələrdəki mövcud əlaqələrin səviyyəsini necə qiymətləndirirsiniz?

- 1991-ci ildə də təkrar müstəqilliyinə qovuşduqdan sonra, Azərbaycanın dövlət müstəqilliyini tanıyan ilk ölkənin Türkiyənin olmasından qürur duyuruq. Azərbaycana dost və qardaş ölkənin səfiri olmaq mənim üçün bir şərəfdir. Digər tərəfdən isə, müstəqilliyini bərpa etdikdən sonra, Azərbaycanla Türkiyə arasında əlaqələr o qədər inkişaf edib ki, bu əlaqələrin təməli elə möhkəm dayaqlar üzərində qurulub ki, burada özümü çox rahat, bir şanslı səfir kimi hiss edirəm. Bəzən ikitərəfli əməkdaşlıqda mövcud əlaqələrin səviyyəsi əskiklik yaradır, bunun üçün dövlət başçıları səviyyəsində siyasi iradənin olması da lazım gəlir. Şükürlər olsun ki, Azərbaycan-Türkiyə əlaqələrində bu siyasi iradə də ortadadır. Azərbaycan Prezidenti cənab İlham Əliyev və Azərbaycan hökuməti, qarşı tərəfdə isə Türkiyənin Prezidenti cənab Abdullah Gül, Baş nazir Rəcəb Tayyip Ərdoğan və Hökumətimiz ölkələrimiz arasında əlaqələrin inkişafına öz töhfələrini verməkdədirlər. İki qardaş ölkə arasında əməkdaşlıq çox sağlam bir bünövrə üzərində daim inkişaf etməkdədir. Yeri düşmüşkən qeyd edim ki, səfir kimi fəaliyyətə başlayarkən, ilk görüşümüzdə cənab Prezident İlham Əliyev mənə zarafatla dedi ki, ölkələrimiz arasında əlaqələr o qədər inkişaf edib ki, bunu daha da irəli aparmaq bir səfir kimi mənim üçün çox çətin olacaq. Bu zarafatda, əslində bir həqiqət var.

Buraya səfir təyin olunarkən dövlət rəhbərlərimiz mənə Azərbaycanla Türkiyə arasında mövcud əlaqələri daha da irəli aparmağı tapşırdılar. Odur ki, Azərbaycanın özü üçün müəyyən etdiyi inkişaf yolunda Türkiyə Cümhuriyyəti olaraq öz dəstəyimizi verməyə çalışırıq. Bu dəstək həm səfirlik səviyyəsində, həm hökumət, həm də ayrı-ayrı nazirliklər səviyyəsində müxtəlif səpkidə davam edir. Sevindirici haldır ki, ötən il ölkələrimiz arasında ticarət dövriyyəsinin həcmi artıq 4 milyard ABŞ dollarını keçdi. Bu gün Türkiyə Azərbaycanın ən böyük ticarət tərəfdaşıdır. Lakin biz bununla kifayətlənmirik. Əgər əvvəlki illərdə Azərbaycanda Türkiyə sərmayəsinin həcmi üstünlük təşkil edirdisə, indi artıq Azərbaycan özü Türkiyə iqtisadiyyatına sərmayə yatırmaqdadır və bu sərmayələrin həcmi ildən-ilə artır. Bundan əlavə, artıq bizim regionlarımız arasında iqtisadi əməkdaşlıq güclənməkdədir ki, bu da bizi çox sevindirir.

- Cənab səfir, ötən il Qəbələ şəhərində Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğanın iştirakı ilə Yüksək Səviyyəli Strateji Əməkdaşlıq Şurasının ikinci iclası keçirildi. İclasda qəbul edilən qərarların həyata keçirilməsi istiqamətində hər iki ölkədə nə kimi işlər görülməkdədir?

- İkitərəfli əlaqələrin Yüksək Səviyyəli Strateji Əməkdaşlıq Şurası formatında davam etdirilməsi çox önəmlidır. Çünki bu, çox işlək bir formatdır. Bu, həm tərəflərin ortaya qoyduğu siyasi iradəni möhkəmləndirməklə yanaşı, eyni zamanda, nazirliklər və onlardan daha aşağı səviyyədə olan qurumlar arasında əməkdaşlığın daha da gücləndirilməsinə şərait yaradır, onların fəaliyyətini istiqamətləndirir. İndiyədək tərəflər arasında artıq iki dəfə belə görüş keçirilib. İnşallah, bu il üçüncü görüş Türkiyədə keçiriləcəkdir. Qeyd edim ki, ötən il Prezident İlham Əliyev və Baş nazir Rəcəb Tayyib Ərdoğanın iştirakı ilə Qəbələdə keçirilən görüşdə ölkələrimiz arasında iqtisadi əməkdaşlığın əsas hədəfləri müəyyənləşdirildi. Bunların arasında, sözsüz ki, enerji sahəsində əməkdaşlıq ön planda idi. Müzakirə olunan məsələlərdən biri Trans Anadolu Qaz boru kəməri (TANAP) layihəsi ilə bağlı oldu. Hazırda tərəflər arasında bu layihənin maliyyələşdirilməsi ilə bağlı danışıqlar aparılır. Bundan əlavə, Qəbələdə Bakı-Tbilisi-Qars dəmiryolu layihəsinin reallaşdırılması məsələsi də əsas müzakirə mövzularından biri idi. Ötən müddət ərzində layihənin icrasına nəzarəti həyata keçirən işçi qrupun bir neçə dəfə iclası keçirilib. Demək olar ki, Qəbələ görüşündə qəbul edilmiş bütün qərarların həyata keçirilməsi istiqamətində mühüm irəliləyişlər əldə olunub. Düşünürəm ki, Türkiyədə baş tutacaq üçüncü görüşdə tərəflər Qəbələ görüşünün nəticələrini müzakirə etməklə yanaşı, əməkdaşlıqda yeni hədəflərə doğru irəliləmiş olacaqlar.

- Bu gün Avropa, eləcə də, dünyanı narahat edən əsas məsələlərdən biri enerji təhlükəsizliyi məsələsidir. Sizcə, iki qardaş ölkə olan Azərbaycan və Türkiyə bu işdə nə kimi töhfələr verməkdədirlər?

- Azərbaycanın enerji mənbələrinin beynəlxalq bazarlara çıxarılması ölkəniz üçün nə qədər önəmlidirsə, Türkiyə üçün də bir o qədər əhəmiyyətlidir. Türkiyə enerji sahəsində Azərbaycanla əməkdaşlıq etməkdən son dərəcə məmnundur. Düşünürəm ki, Bakı-Tbilisi-Ceyhan əsas ixrac neft boru kəməri zamanında boş yerə “Əsrin müqaviləsi” adlandırılmayıb. Ötən il isə Azərbaycan Hökuməti təbii qazın dünya bazarlarına Türkiyə ərazisindən Trans Anadolu Qaz Boru kəməri (TANAP) vasitəsilə çıxarılmasına dair qərar verdi. Fikrimcə, bu marşrut Azərbaycanın təbii ehtiyatlarının Avropa bazarlarına çıxarılması üçün ən təhlükəsiz marşrutdur. Digər tərəfdən isə, ilk mərhələdə TANAP kəməri ilə nəql olunacaq 16 milyard m3 təbii qazın 6 milyard m3-ni Türkiyə alacaqdır. Azərbaycan üçün təbii qazın istehlakçıya çatdırılması üçün, bu, böyük bir imkandır. Ümumiyyətlə, Türkiyə, TANAP layihəsinə digər beynəlxalq boru kəmərlərinin rəqibi kimi deyil, cənub enerji dəhlizlərinin tamamlayıcısı kimi baxır. Çünki Avropanın enerji təhlükəsizliyi baxımından mütləq çoxşaxəli enerji mənbələrinə malik olmaq çox böyük önəm daşıyır. Cənub dəhlizinin bu baxımdan çox təhlükəsiz olduğu qənaətindəyik. TANAP layihəsinin sonradan hansı beynəlxalq boru kəmərlərinin tərkib hissəsi olacağını indidən demək çətindir, bu haqda qərar önümüzdəki aylarda bəlli olacaq. Amma bu gün böyük əminliklə söyləmək olar ki, Azərbaycanda hasil olunan təbii qazın Türkiyə ərazisi ilə Avropanın cənub qapısınadək gətirilməsi iki qardaş ölkənin Avropanın enerji təhlükəsizliyinə vermiş olduğu töhfədir. Təbii, burada Gürcüstanın da dəstəyini qeyd etməmək olmur.

- Qəbələ görüşündə əsas müzakirə olunan məsələlərdən biri də Bakı-Tbilisi-Qars (BTQ) dəmiryolu layihəsinin reallaşması ilə bağlı idi. Bu layihə çərçivəsində Qars-Naxçıvan dəmiryolu, ayrıca Ərzurum-Qars-İğdır-Naxçıvan qaz kəmərinin tikintisi də planlaşdırılır. Sizcə, bu layihələrin reallaşdırılması nəzərdə tutulduğu müddətdə başa çatdırılacaqmı?

- Öncə onu qeyd edim ki, hazırda dünyada enerji ehtiyatlarına tələbat böyük olduğundan ən yüksək səviyyədə keçirilən görüşlərdə enerji təhlükəsizliyi məsələlərinə daha çox diqqət ayrılır. Düşünürəm ki, Bakı-Tbilisi-Qars dəmiryolu layihəsinin reallaşması Avropanın enerji təhlükəsizliyi məsələsini belə kölgədə qoymuş olacaqdır. Belə ki, BTQ daha böyük bir layihənin ortasında yer alan bir layihədir. Burada söhbət Tarixi İpək Yolu xəttinin yenidən işlək hala gətirilməsindən gedir. Bir anlığa düşünün ki, bu dəmiryolu ilə Uzaq Şərqdən-Çindən gələn qatarlar Azərbaycan-Türkiyə ərazisini keçməklə Avropaya-oradan isə İngiltərəyədək maneəsiz hərəkət edə biləcəklər. Hazırda bu layihənin həlledici hissələrindən olan Mərmərə dənizinin dibi ilə çəkilən tunelin tamamlanması üzə işlər davam etdirilir. Düşünürəm ki, ilin sonunadək bu tunel istismara hazır olacaqdır. BTQ layihəsi beynəlxalq ticarət baxımından son dərəcə əhəmiyyətli bir layihədir. Bu dəmiryolu vasitəsi ilə təkcə yüklər daşınmayacaq. Eyni zamanda, layihənin əhatə etdiyi ölkələrin insanları da rahat şəkildə bu dəmiryolundan istifadə edə biləcəklər. Düşünürəm ki, BTQ-nin reallaşması, özəlliklə bizim ölkələrin yerləşdiyi bölgənin inkişafına mühüm töhfələr verəcəkdir. Məndə olan məlumata görə, bu ilin sonundan BTQ marşrutu üzrə sınaq səfərlərə başlanılacaq. Gələn ilin əvvəlindən isə BTQ-nin tədricən fəaliyyətə başlayacağı nəzərdə tutulur. Əfqanıstanda xidmət edən beynəlxalq koalisiya qüvvələrinin geri çəkilməsində də bu dəmiryolu xəttindən istifadə olunacağı planlaşdırılır. BTQ fəaliyyətə başladıqdan sonra, bu xətdən, əlavə bir qol Naxçıvana da çəkiləcəkdir. Beləliklə də, Naxçıvanın dəmiryol blokadasına son qoyulacaq. Hazırda həm Türkiyədə, həm də Naxçıvanda bu layihənin iqtisadi əsaslandırılması üzərində işlər davam etdirilir. Qarşıdakı illərdə isə bu layihənin gerçəkləşdirilməsinə başlanılacaq. Eyni fikirləri də Ərzurum-Qars-İğdır-Naxçıvan qaz kəmərinin tikintisi üçün də söyləmək olar. Düşünürəm ki, bu iki layihə qarşıdakı çox yaxın illərdə artıq reallığa çevriləcəkdir.

- İki qardaş ölkə arasında əlaqələr nə qədər yüksək səviyyədə qurulsa, inkişaf etsə də, bəzən elə məsələlər ortaya çıxır ki, hər iki tərəfdə böyük narazılıqlara səbəb olur. Məsələn, elə götürək son hadisələri. Qondarma seçkilər keçirməklə özünü yenidən Ermənistanın prezidenti elan edən Serj Sarkisyanı ilk təbrik edən ölkə başçılarından birinin məhz Prezident Abdullah Gülün olması Azərbaycanda heç də xoş qarşılanmadı. Yaxud, Van-Yerevan aviareysinin açılması məsələsi Azərbaycan ictimaiyyətində haqlı narazılıq doğurdu...

- Öndərlərimiz əbəs yerə deyil ki, bizi tək millət-iki dövlət adlandırıblar. Tam səsimi olaraq söyləyirəm ki, elə bu səbəbdəndir ki, digər xalqlarla müqayisədə bizim bir-birimizə qarşı həssasiyyatimiz çox yüksəkdir. Bunu çox təbii qarşılamaq lazımdır. Türk milləti bir qədər duyğusaldır. Məhz bu səbəbdəndir ki, zaman-zaman bir-birimizə qarşı ani, duyğusal hadisələr ortaya çıxa bilir. Məsələn, o təbrik mesajı məsələsi kimi. Amma bəzən, bu duyğusal hissləri cilovlamaq lazım gəlir. Bəzən, hər şeyə ani baxmaq lazım deyil, hər zaman qarşıdakı böyük tablonu görməmiz lazım gəlir. Türkiyənin Azərbaycandakı səfiri olaraq, hər zaman vurğulamaq istədiyim bir şey var. Türkiyənin Azərbaycana olan sevgisi və bağlılığı tamdır, təmənnasızdır, əvəzində qarşılıqlı təmənna gözlənilmir. Bilirəm ki, Azərbaycanda da Türkiyəyə qarşı eyni sevgi və sayğı vardır. İkinci vurğulamaq istədiyim məsələ budur ki, Türkiyədə Azərbaycanın mənafelərinin əleyhinə hər hansı bir hərəkət və fikir olmayıb və ola da bilməz. Biz atdığımız hər bir addımda hər zaman, mütləq Azərbaycanı da düşünürük. Hər zaman belə bir məsuliyyətimizin olduğunu düşünürük və bunu unutmuruq. Odur ki, bu ilin fevralında Prezident Abdullah Gülün Serj Sarkisyana göndərdiyi təbrik mesajı son dərəcə protokol qaydasından başqa bir şey deyildir. Amma bir şeyi xatırlamamız lazımdır ki, belə xırda məsələlərə lazımından artıq diqqət yetirdikdə bunun arxasında nələrin dayandığı həddindən artıq soruşulanda, hətta bu müzakirələrin Türkiyəni incidə biləcəyi yerlərə gətirildiyi halda, əslində, mənasız bir şey üstündə başlanan bu müzakirələr, nəticə etibarı ilə bəzi maraqlı tərəfləri sevindirə biləcək bir hala gəlib çıxır, lazımından daha artıq bir əhəmiyyət kəsb etmiş olur. Odur ki, belə kiçik məsələlər ortaya çıxan zaman, mən də bunun ümumi işimizə nə kimi xeyir verə biləcəyinə baxıram. Yenə təkrar edirəm, Türkiyə heç zaman Azərbaycanın menafelərini nəzərə almadan heç bir hərəkət etməyəcəkdir.

- Bu arada Ermənistan tərəfinin tez-tez səsləndirdiyi fikrə- Azərbaycanın işğal olunmuş ərazisində, Xocalı şəhərində hava limanını açması məsələsinə münasibətinizi bilmək oxucularımız üçün maraqlı olardı...

- Bu məsələdə Türkiyənin Xarici İşlər Nazirliyi artıq öz mövqeyini səsləndirib. Bu mövqe ondan ibarətdir ki, bu cür hərəkətlər, ortadakı əsas məsələdən diqqətləri başqa istiqamətə çəkməyə yönəlib. Çünki ortada olan məsələ hamıya bəllidir. Bu, Azərbaycan torpaqlarının Ermənistanın işğalından azad edilməsidir. Bunu nə mən, nə Azərbaycan tərəfi söyləyir-bunu BMT-nin Təhlükəsizlik Şurasında qəbul edilən qərarlar tələb edir. Bu işğal nəticəsində Azərbaycanda çox ciddi rəqəmlərlə sayılan qaçqın və məcburi köçkün ordusu yaranıb. Başqa sözlə, Azərbaycanın ərazi bütövlüyünün Ermənistan tərəfindən işğalı faktı ortadadır. İlk növbədə, bu məsələlərin öz həllini tapması lazımdır, işğal faktı aradan qaldılmalıdır. Bu istiqamətində Ermənistan tərəfindən indiyədək hər hansı bir addım atılmadığı halda, nə iqtisadi, nə beynəlxalq ehtiyac duyulmadığı halda, birdən-birə Xocalıya təyyarə reyslərinin açılması barədə məsələnin ortaya atılması, sözsüz ki, təxribat xarakteri daşıyır və aparılan sülh danışıqlarının istiqamətinin başqa səmtə yönəldilməsinə xidmət edir. Türkiyə olaraq, biz bunu tərəflər arasında aparılan danışıqların mahiyyətindən uzaq və yalnış bir hərəkət kimi dəyərləndiririk. Bu məsələdə Azərbaycanın haqlı mövqeyini dəstəklədiyimizi bəyan etməklə, sözügedən məsələnin bütün beynəlxalq təşkilatların və dünya ictimaiyyətinin diqqətinə çatdırmağa çalışırıq.

- Yeri gəlmişkən, Ermənistan-Azərbaycan, Dağlıq Qarabağ münaqişəsinin həllində vasitəçilik missiyasını öz üzərinə götürən ATƏT-in Minsk qrupunun nümayiş etdirdiyi passiv mövqeni necə qiymətləndirirsiz? Sizcə ötən 20 il ərzində münaqişənin həllində passiv mövqe tutan belə bir qurumun münaqişənin həllinə nail ola biləcəyinə ümid etmək olarmı?

- Ermənistan-Azərbaycan, Dağlıq Qarabağ münaqişəsinin həllində vasitəçilik missiyasını öz üzərinə götürmüş ATƏT-in Minsk qrupunda anlamalıdırlar ki, Azərbaycan torpaqlarının işğaldan azad olunmayanadək sülhə nail olmaq mümkün deyil. Və həmsədr ölkələrin missiyası münaqişəni dondurmaq deyil, münaqişə tərəfləri arasında sülhə nail olmaqdır. Kimsə bunu yanlış anlamasın və hər kəs də bunu yaxşı xatırlasın ki, ATƏT-in Minsk qrupunun vəzifəsi Azərbaycanın ərazi bütövlüyünün təmin edilməsidir. 20 il bir münaqişənin həlli üçün lazım olduğundan da artıq bir müddətdir. Münaqişə həllini tapmadığı üçün, cəbhə bölgələrində yaşayan Azərbaycan vətəndaşları-dinc sakinlər, eləcə də, əsgərlər ermənilər tərəfindən hələ də qətlə yetirilməkdədir. Hələ də Azərbaycanda böyük sayda qaçqın ordusu qalmaqdadır. Münaqişənin həllində maraqlı olan böyük dövlətlər bunları düşünməlidirlər. Ermənistanın işğalı davam etdikcə, Qafqaz kimi mühüm əhəmiyyətli bir bölgə hər an müharibə ocağına çevrilə bilər. Digər tərəfdən isə, bu işğal davam etdikcə, işğalçılıq siyasətini davam etdirən Ermənistan, əslində, özünü cəzalandırmış olur. Ermənistandakı demoqrafik durum, iqtisadi vəziyyət gündən-günə daha da pisləşir, qonşulardan izolyasiya olur. Dolayısı ilə, işğalçılıq siyasətinə son verilməsi bölgədə vəziyyətin normallaşdırılmasına, rifahının yüksəldilməsinə səbəb ola bilər. ATƏT-in Minsk qrupunun da bu anlayışla hərəkət etməsi lazımdır və bunu işğalı davam etdirən Ermənistan rəhbərliyinə anlatmalıdır. Minsk qrupunun həmsədrlik etməsinə önəm versək də, ATƏT-in Minsk qrupunun üzv dövləti olaraq, Türkiyə qurumun fəaliyyətini daha da canlandırmasına çalışır. Ümid edirik ki, önümüzdəki illərdə beynəlxalq ictimaiyyət məsələyə daha ciddi yanaşaraq, münaqişənin həlli istiqamətində səylərini daha da artıracaqdır.

- Ötən il, belə demək mümkünsə, dünya bir ay müddətinə Azərbaycana əmanət edildi. Ölkəmiz BMT Təhlükəsizlik Şurasına sədrlik etdi. Eləcə də, bu ilin mayında bu proses yenidən təkrarlanacaq. Sizcə, Azərbaycan ona tapşırılan bu şərəfli vəzifənin öhdəsindən gələ bilirmi?

- Düşünürəm ki, Azərbaycanın ona həvalə edilən bu şərəfli missiyanın öhdəsindən gələ bilməməsi üçün heç bir səbəb yoxdur. Bildiyim qədər Azərbaycan diplomatiyasının çox böyük və professional bir kadr heyəti var. Digər tərəfdən, bunun bizim üçün mənəvi bir tərəfi də vardır. Azərbaycanın BMT TŞ-da təmsil olunması türk diplomatlarını da bir növ rahatlaşdırır içimizdəki hüzuru artırır. Çünki hər şeydən öncə Türk dünyasını təmsil edən Azərbaycanın BMT-də təmsil olunması çox önəmlidir. İkincisi, Azərbaycanın haqq və ədalət tərəfdarı olduğunu bildiyimiz üçün, sadəcə Türkiyə üçün deyil, beynəlxalq ictimaiyyət üçün də etibarlı olduğunu düşünürük. Odur ki, indiyədək əldə etdiyi bu uğurlara görə Azərbaycanı təbrik edirik.

- Cənab səfir, mübaliğəsiz demək olar ki, bu gün dünyanın diqqəti Azərbaycana yönəlib. Dünyanın aparıcı telekanalları, informasiya agentlikləri, mətbu orqanları ölkəmiz, onun iqtisadi inkişafı, mədəniyyəti, turizm potensialı haqda silsilə reportajlar hazırlayırlar. Bakı hazırda nəinki Şərqin ən inkişaf etmiş bir paytaxt şəhəridir, eyni zamanda, dünya meqapolisləri ilə rəqabət aparmaq qabiliyyətindədir. Ötən il paytaxtımız “Eurovision”a ev sahibliyi etdi, həmçinin, bir sıra beynəlxalq forum və konfranslar, bu günlərdə isə Davos Forumunun növbəti iclası Bakıda keçirildi. Bundan əlavə, paytaxtımız 2015-ci ildə Avropada ilk dəfə keçiriləcək Olimpiya Oyunlarını qəbul etməyə hazırlaşır. Bir diplomat, eləcə də, xarici ölkə vətəndaşı kimi ölkəmizdəki bu inkişafı necə dəyərləndirirsiniz?

- Türkiyənin Azərbaycandakı səfirliyi olaraq, bütün bu sadaladıqlarınızla qürur duyuruq. Sevindirici haldır ki, bu inkişaf təkcə Bakı şəhəri ilə məhdudlaşmır və Azərbaycanın hər bir bölgəsində bu inkişafı hiss etmək mümkündür. Prezident İlham Əliyev başda olmaqla, Azərbaycan Hökumətinin gördüyü məqsədyönlü fəaliyyət nəticəsində ölkəniz sadəcə bu bölgədə deyil, eləcə də, dünyanın ağırlıq mərkəzinə çevrilməkdədir. Bu, Türkiyə üçün də çox önəmlidir, çünki bizim gücümüzə də güc qatırsınız. Elə ay olmur ki, Bakıda hər hansı bir beynəlxalq tədbir keçirilməsin və orada Türkiyədən gəlmiş böyük nümayəndə heyəti iştiak etməsin. Doğrudur, səfirlik olaraq, bu, bizim işimizi çətinləşdirsə də, amma Azərbaycandakı bu inkişafı dünya ölkələrinin də gəlib görməsindən qürur duyuruq. Bu gün beynəlxalq aləmdə Bakı və Azərbaycan dedikdə, o saat təsəvvürlərdə mötəbər tədbirlərin uğurla baş tutduğu meqapolis şəhər və sürətlə inkişaf edən bir ölkə canlanır. Əminəm ki, paytaxtınıza gələn hər bir xarici ölkə vətəndaşının cəmi bircə dəfə dənizkənarı bulvarı gəzməsi kifayətdir ki, Bakı haqqındakı xoş və əvəzolunmaz xatirələr onu ömürboyu təqib etsin. Diplomat olaraq, belə hesab edirəm ki, üzləşdiyi çətinliklərə baxmayaraq, Azərbaycan çox sürətlə və uğurla gələcəyə doğru irəliləməkdədir.

- Cənab səfir, bu günlərdə Bakıda ənənəvi turizm sərgisi keçirildi. Sərgidə qardaş Türkiyə də geniş pavilyonla təmsil olunurdu. Digər tərəfdən isə, bilirik ki, tez-tez Azərbaycanın bölgələrində səfərlərdə olursunuz, ölkəmizin turizm potensialı ilə az-çox tanışsınız. Azərbaycanın turizm potensialını necə dəyərləndirirsiniz?

- Azərbaycanın turizm potensialı çox zəngindir. Bildiyim qədər, dünyadakı 11 iqlim qurşağının 9-na sahib olan Azərbaycan, bu sarıdan nadir ölkələrdən biridir. Məsələn, Naxçıvandakı “Duzdağ” sanatoriyasını çoxdan dünyaya tanıtmaq lazımdır. Mən buraya gəlməzdən əvvəl bu haqda heç bir məlumatım yox idi. Yaxud Naftalandakı müalicəvi neft haqqında dünya ölkələrində elə də çox informasiya yoxdur. “Şahdağ” Qış-Yay Turizm Kompleksi, eləcə də, Qəbələ şəhəri və onun ətrafı ayrıca söhbətin mövzusudur. Gəncə, Quba, Şəki, Lənkəran- daha hansı bölgəni sayım? Xəzərin qumsal sahillərini necə unutmaq olar? Ölkənin bir ucunda yaz-yay olanda, o biri ucunda hələ qışı və qarı görmək mümkündür. Qısa olaraq, onu vurğulamaq istərdim ki, Azərbaycanın çox böyük və zəngin turizm potensialı vardır. Və əminəm ki, çox yaxın illərdə Azərbaycan dünyanın turizm mərkəzlərindən birinə çevriləcəkdir.

Səlim Loğmanoğlu

Yeni Azərbaycan.- 2013.- 16 aprel.- S.13.