Heydər Əliyev Mərkəzində Əməkdar rəssam

Sakit Məmmədovun fərdi sərgisi açılıb

Dekabrın 2-də Heydər Əliyev Mərkəzində Əməkdar Rəssam Sakit Məmmədovun “Rənglər aləmində” adlı fərdi sərgisi açılıb.

AzərTAc xəbər verir ki, Heydər Əliyev Fondu və Heydər Əliyev Mərkəzinin birgə təşkil etdikləri sərgi Azərbaycan rəssamlıq sənətinin görkəmli nümayəndələrindən olan Sakit Məmmədovun 55 illik yubileyinə həsr edilib. Ekspozisiyada rəssamın 55 rəngkarlıq əsəri nümayiş olunur.

Sərginin açılış mərasimində Milli Məclisin regional məsələlər komitəsinin sədri Arif Rəhimzadə çıxış edərək rəssamın zəngin yaradıcılığından, Azərbaycan incəsənətinə verdiyi töhfələrdən danışıb.

Bildirilmişdir ki, rəssam Sakit Məmmədov yüksək istedadı sayəsində yaratdığı əsərləri ilə Azərbaycanı bir çox ölkələrdə tanıdıb. İndiyədək onun bir sıra gözəl sərgiləri keçirilib.

A.Rəhimzadə rəssam Sakit Məmmədova yeni yaradıcılıq uğurları arzulayıb.

Azərbaycan Memarlıq və İnşaat Universitetinin rektoru, Milli Məclisin deputatı, professor, memarlıq doktoru, Əməkdar Memar Gülçöhrə Məmmədova, Türkiyənin Yeddi Təpə Universitetinin müəllimi, rəssam Rəfiq Əziz, Xalq rəssamı Səlhab Məmmədov və başqaları Sakit Məmmədovun yaradıcılıq xüsusiyyətlərindən söz açıblar.

Diqqətə çatdırıb ki, Sakit Məmmədovun hər sərgisi sənətsevərlər üçün böyük bayramdır. Fırça ustasının əsərlərindəki gözəlliyə sitayiş, romantika, insanlara məhəbbət heç kimi laqeyd qoya bilməz. Rəssamın çoxsaylı təltifləri olsa da, onun üçün ən böyük mükafat sənətsevərlərin, sadə insanların onun işlərinə olan məhəbbətidir.

Açılış mərasimində Əməkdar Rəssam Sakit Məmmədova UNESCO-nun və Türkiyənin Yeddi Təpə Universitetinin mükafatları təqdim edilib.

Sonra Sakit Məmmədov belə bir gözəl məkanda fərdi sərgisinin keçirilməsinin onun üçün böyük şərəf olduğunu deyib, Heydər Əliyev Mərkəzinin rəhbərliyinə və tədbir iştirakçılarına dərin təşəkkürünü bildirib.

Sakit Məmmədov 1978-ci ildə Ə.Əzimzadə adına Azərbaycan Dövlət Rəssamlıq Məktəbini, 1987-ci ildə İ.E.Repin adına Sankt-Peterburq Rəssamlıq Akademiyasını bitirib. Rəssamın əsərləri indiyədək 37 sərgidə nümayiş olunub, 6 fərdi sərgisi (İstanbul, Stokholm, Bakı, Moskva, Brüssel) keçirilib.

Əməkdar rəssam Sakit Məmmədov Azərbaycan Respublikası Prezidentinin müvafiq Sərəncamı ilə “Şərəf” ordeni ilə təltif olunub. O, UNESCO Rəssamlar Assosiasiyasının, Rusiya İmperator Rəssamlıq Akademiyasının üzvüdür.

Dekabrın 13-dək davam edəcək sərgidə rəssamın “Balaca klounlar”, “May”, “Bağban”, “Çiçəklənən Azərbaycan”, “Mən yorulmuşam”, “Səhnəyə hazırlıq”, “Nişana gedənlər”, “Aktrisa”, “Rəfiqələr” və digər əsərləri nümayiş olunur.

Yeni Azərbaycan. - 2013.- 3 dekabr.- S.7.