Azərbaycan xalqının Heydər Əliyev kimi lider

yetişdirməsi fenomenal hadisədir

Yeni Azərbaycan Partiyası Ümummilli liderimiz Heydər Əliyevin vəfatının 10-cu ildönümü ilə əlaqədar anım mərasimi keçirib

Dekabrın 11-də Yeni Azərbaycan Partiyası (YAP) Ümummilli liderimiz Heydər Əliyevin vəfatının 10-cu ildönümü ilə əlaqədar anım mərasimi keçirib. Mərasimdə YAP İdarə Heyətinin və Siyasi Şurasının üzvləri, Milli Məclisin deputatları, partiyanın fəalları iştirak ediblər. Mərasim iştirakçıları əvvəlcə Fəxri xiyabana gələrək, Ulu öndərin əziz xatirəsini ehtiramla yad edib, məzarı önünə gül qoyublar. Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üzərinə tər güllər düzülüb.

Daha sonra tədbir “Hilton” hotelində davam edib. Mərasimdə çıxış edən YAP Sədrinin müavini-İcra katibi, Baş nazirin müavini Əli Əhmədov müasir Azərbaycanın inkişafının Ulu öndər Heydər Əliyevin adı ilə bağlı olduğunu bildirib. Əli Əhmədov qeyd edib ki, vəfatından 10 il ötməsinə baxmayaraq, Ümummilli lider Heydər Əliyev unudulmur və heç vaxt unudulmayacaq: “Azərbaycan xalqının Heydər Əliyev kimi lider yetişdirməsi fenomenal hadisədir. Heç bir xalq milli qürur mənbəyinə çevrilmiş övladını unuda bilməz. Kiçik xalqlar və dövlətlərin böyük lider yetişdirməsi özü tarixi hadisədir. Azərbaycan xalqı əhalinin sayına görə kiçik olsa da, mən onu heç də kiçik xalq hesab etmirəm. Bu baxımdan, Azərbaycan xalqının XX əsrdə yetişdirdiyi böyük oğlu Heydər Əliyev onun milli qüruru və iftixar mənbəyidir”.

YAP Sədrinin müavini deyib ki, Ulu öndər Heydər Əliyev hər zaman ədalətli lider, ədalətli rəhbər nümunəsi olub. “Heydər Əliyev özünə rəva görmədiyini başqalarına da rəva görməzdi, Özünə rəva gördüyünü isə başqalarına qadağan etməzdi. O, həmişə ədalətli qərarlar verib. “Qoy həmişə ədalət zəfər çalsın” deyimi də Onun təkcə siyasi platforması deyildi, qəlbinin səsi, milli dəyərlərə sadiqliyinin ifadəsi idi. Buna görə də, O, hər zaman hər bir vətəndaşın qəlbində ədalətli rəhbər obrazı yarada bilib. Heydər Əliyev həm də sədaqətli dost və ailə başçısı nümunəsi göstərib. Bu mənada Ümummilli lider Heydər Əliyev unudulan insan ola bilməz. Onu unutmaq mümkün deyil, çünki Azərbaycan xalqının milli ideyasının, milli dərkinin tərkib hissəsidir, Heydər Əliyev Azərbaycanın inkişaf yoluna işıq saçan əbədi bir mayakdır”.

Ümummilli lider Heydər Əliyevin böyük tarixi şəxsiyyət olduğunu deyən YAP Sədrinin müavini Ulu öndərin həm sovetlər dönəmində, həm də müstəqillik dövründə Azərbaycanın inkişafı naminə gördüyü işlərin əhəmiyyətini vurğulayıb. O, qeyd edib ki, Azərbaycan xalqının çətin anlarında məhz Heydər Əliyev xilaskarlıq missiyasını yerinə yetirib. Əli Əhmədovun sözlərinə görə, bütün varlığı ilə Azərbaycana, xalqına bağlı olan Heydər Əliyev müdrik siyasi və dövlət xadimi kimi uzun illər boyu xalqımıza yol göstərəcək, fayda verəcək qiymətli irs yaradıb. Müstəqil Azərbaycan dövləti bu zəngin irsdən faydalanır, sürətlə inkişaf edir, dünya dövlətləri cərgəsində öz mövqelərini qətiyyətlə möhkəmləndirir. YAP Sədrinin müavini qeyd edib ki, bu gün biz təkcə Ulu öndər Heydər Əliyevin xatirəsini anmaqla kifayətlənmir, həm də Onun siyasi irsini daha dərindən dərk etməyə, öyrənməyə çalışırıq. İcra katibi vurğulayıb ki, Ümummilli lider Heydər Əliyevin məxsus olduğu xalqın qəlbində əbədi qalmasının səbəbi məhz bizim arzu və istəklərimizin Onun şəxsiyyətində öz ifadəsini tapmasındadır. Son 10 ildə qazanılan uğurlar Ulu öndərin bu gün də bizimlə olduğunu təsdiq edir. “Digər tərəfdən, Azərbaycan vətəndaşları hazırda məhz Heydər Əliyevin ideyalarının müəyyən etdiyi yolla irəliləyir. Heydər Əliyev siyasəti bu gün Prezident İlham Əliyev tərəfindən uğurla həyata keçirilir. Bu siyasət xalqımıza və dövlətimizə böyük uğurlar qazandırır” - deyə, Əli Əhmədov vurğulayıb.

Mərasimdə çıxış edən Azərbaycan Yazıçılar Birliyinin sədri, Xalq yazıçısı Anar Ulu öndər Heydər Əliyev ilə görüşlərinin öz həyatında dərin izlər buraxdığını bildirib. Heydər Əliyevin dahi şəxsiyyət olduğunu vurğulayan Xalq yazıçısı dərin zəka sahibinin Azərbaycan ziyalılarına, o cümlədən yaradıcı insanlara olan qayğısından söz açıb. O deyib ki, Ulu öndər haqqında xatirələrini “Unudulmaz görüşlər” adlı kitabında qələmə alıb: “Hər birimiz Heydər Əliyevin Azərbaycan üçün nələr etdiyini yaxşı bilirik. O, Sovet dövründə rəhbərliyi zamanı respublikamızı inkişaf etdirdi. Müstəqillik zamanında isə Azərbaycanı bir çox təhlükələrdən xilas etdi. Beləliklə də, Heydər Əliyev yeni Azərbaycanı qurdu”.

Anar Ulu öndərimizin hər zaman yaradıcı insanlara diqqət və qayğı göstərdiyini vurğulayıb: “Ulu öndərlə bu görüşlər və söhbətlər mənim həyatımda dərin izlər buraxıb. Onu da deyim ki, Ulu öndərin 1969-cu ildə Azərbaycanda rəhbərliyə gəlməsi ilə respublikada elə ab-hava yarandı ki, sənətə sənət meyarlarıyla qiymət verilməyə başlandı. Beləliklə, bizdən yaşlı nəsil artıq müəyyən dərəcədə özünü təsdiq edib qoruya bilirdisə, bizim nəslin, 60-cılar nəslinin də - ədəbiyyata, kinoya, teatra, sənətimizin başqa sahələrinə gəlib öz sözünü demək imkanı yaranmışdı. Bu imkanı isə bizə məhz Heydər Əliyev yaratmışdı və Onun dəstəyini, yardımını başqa nəsildaşlarım kimi mən də daima hiss etmişəm. Mən Ulu öndər haqqında xatirələrimin qələmə alındığı “Unudulmaz görüşlər” kitabımda da qeyd etmişəm ki, Heydər Əliyev haqqında çox yazılıb, qalın-qalın kitablar çıxıb. İllər keçdikcə daha da çox yazılacaq, tarixin süzgəcindən keçmiş qiymətlər daha da dəqiqləşdiriləcək, dünyada və ölkəmizdə baş verəcək olayların, gələcək hadisələrin kontekstində Onun xidmətləri daha dərindən dərk ediləcək. Amma bu gələcək nəsillərin işidir. Bugünkü nəsillərin, Onun çağdaşlarının, özəlliklə Ulu öndərlə bu və ya digər dərəcədə təmasda olanların borcu isə Heydər Əliyevlə bağlı xatirələrini yubanmadan qələmə almaq, Onun zəngin obrazının müxtəlif çalarlarını, ayrıntılarını sənəd kimi tarixin malı etməkdir. Heydər Əliyev haqqında danışarkən bir məqamı qeyd etməmək mümkün deyil. Şəxsiyyətlərin miqyası, bir tərəfdən onların öz zamanlarında gördükləri işlərin, yaratdıqlarının, etdiklərinin, dediklərinin, həyata keçirdiklərinin əhəmiyyəti ilə, əhatəsi ilə, təsir dairəsi ilə ölçülürsə, digər tərəfdən bu fəaliyyətin tarixdə əks-sədasıyla, uzun illər, dövrlər müddətində hadisələrin gedişatını yönəltməsi ilə müəyyənləşir. Hər iki meyarla Heydər Əliyev - tarixi şəxsiyyətdir. Bu danılmaz həqiqəti kimsə inkar edə bilməz. Bir sözlə, Heydər Əliyev Azərbaycanın əbədi sərvətidir”.

Tədbirdə çıxış edən Azərbaycan Mərkəzi Bankı İdarə Heyətinin sədri Elman Rüstəmov bildirib ki, Ümummilli lider Heydər Əliyev müstəqil Azərbaycan dövlətinin memarı olmaqla yanaşı, həm də bu gün dünyanın ən sabit və sürətlə inkişaf edən güclü iqtisadiyyatının qurucusudur: “Məhz Ulu öndərin 1990-cı illərin ortalarında təməlini qoyduğu güclü sosial-iqtisadi baza bu gün Azərbaycan xalqının yüksək rifahına, onun parlaq gələcəyinə xidmət edir. Heydər Əliyev müasir tariximizin çətin və keşməkeşli bir dönəmində xalqın tələbi ilə dərin keçid böhranı yaşamış, iqtisadi potensialının yarıdan çoxunu itirmiş, kütləvi yoxsulluq və səfalətin tüğyan etdiyi, boş xəzinəsi olan bir ölkəyə rəhbər gəlmişdi. Qısa müddətdə ölkədə dövlətçiliyin əsası olan ictimai-siyasi sabitlik bərpa olunub. Bu əsas amil bütün istiqamətlərdə, o cümlədən iqtisadiyyatda zəruri islahatların həyata keçirilməsinə zəmin yaradıb. Aparılan ardıcıl iqtisadi islahatlarla qısa zamanda ölkədə makroiqtisadi sabitliyin əsası qoyulub, qiymətlərin sabitliyinə nail olunub, ölkənin zəruri valyuta ehtiyatı yaradılıb”.

Mərkəzi Bankın sədri deyib ki, xalqın təkidli tələbi ilə ikinci dəfə hakimiyyətə qayıdan Ulu öndər Heydər Əliyev uğurlu neft strategiyası həyata keçirərək bu amildən Azərbaycanın inkişafı naminə səmərəli istifadə etdi: “Halbuki, müəyyən xarici və daxili qüvvələr neft amilinə görə Azərbaycana təzyiqlər edirdilər. Bu gün Sudan neft amilinə görə iki yerə parçalanıb. İraq faktiki iki yerə bölünüb, Liviyada da baş verən “ərəb inqilabı” yəqin ki, neftlə bağlıdır. Azərbaycan da 1990-cı illərin əvvəllərində belə təhlükələrlə üzləşmişdi, amma Heydər Əliyevin dəmir iradəsi sayəsində bu problemlərin qarşısı alındı”.

Onun sözlərinə görə, Ümummilli lider Heydər Əliyev tərəfindən 1993-2003-cü illər ərzində görülmüş genişmiqyaslı işlər Azərbaycanda sıçrayışlı inkişafın başlaması üçün zəruri potensial formalaşdırdı. Belə ki, Heydər Əliyev siyasi kursunu uğurla davam etdirən, bu kursun ideoloji bazası əsasında yeni inkişaf modelini həyata keçirən Prezident İlham Əliyev tərəfindən müasir dövlət, güclü iqtisadiyyat, yüksək sosial rifah, mədəni cəmiyyətin qurulması istiqamətində 2003-cü ildə bəyan edilmiş hədəflər artıq günümüzün reallığına çevrilib. Bu gün dövlət başçısı tərəfindən təsdiq olunmuş müasir inkişaf konsepsiyası keyfiyyətcə yeni prioritetlər müəyyən edir. İnnovasiya əsaslı inkişaf modelinə keçid, yüksək rəqabət qabiliyyətli və şaxələnmiş iqtisadiyyatın qurulması qarşıda duran ən mühüm prioritetdir. “Prezident İlham Əliyevin rəhbərliyi ilə sürətlə inkişaf edən Azərbaycan Heydər Əliyevin ən böyük abidəsidir. Dövlət başçımız dəfələrlə vurğulayıb ki, qazandığımız uğurların əsasında Heydər Əliyev siyasi kursu dayanır. Heydər Əliyev elə bir şəxsiyyətdir ki, sağlığında əbədiyaşarlıq qazanıb” - deyə, E.Rüstəmov vurğulayıb.

Azərbaycan Tibb Universitetinin rektoru, Milli Məclisin deputatı, akademik Əhliman Əmiraslanov da çıxışında Ulu öndərimizlə görüşlərindən, Onunla bağlı xatirələrindən danışıb. O, Ulu öndər Heydər Əliyevin gördüyü işlərin miqyasının çox böyük olduğunu deyib. Ə.Əmiraslanov Ümummilli liderimizin Azərbaycan elminin və təhsilinin himayədarı olduğunu, bu sahədə çalışanlara, xüsusilə, səhiyyə işçilərinə həmişə diqqət və qayğı göstərdiyini deyib. Akademik bildirib ki, adı tarixdə əbədiləşən dünyaşöhrətli siyasətçi Heydər Əliyevin ölkəmizin dövlət müstəqilliyi bərpa edildikdən sonra iki dəfə ATU-da olması, müəllim və tələbələr qarşısında proqram xarakterli çıxışı və gələcək həkimlərə dəyərli məsləhətlər verməsi universitetin tarixində silinməz izlər qoyub. Ə.Əmiraslanov diqqətə çatdırıb ki, Ulu öndərin səyi nəticəsində 1998-ci ildə ATU-nun 11 mərtəbəli yeni tədris binası tikilib istifadəyə verilib. Azərbaycanda səhiyyənin inkişafı, universitetin maddi-texniki bazasının möhkəmləndirilməsi və ölkəmizdə tibb kadrlarının hazırlanması məhz Ulu öndərin adı ilə bağlıdır. ATU-nun stomatoloji və onkoloji klinikalarının, Ümummilli lider Heydər Əliyevin böyük qayğısı sayəsində yaradıldığını diqqətə çatdıran akademik vurğulayıb ki, Onun layiqli davamçısı Prezident İlham Əliyevin dəstəyi ilə inşa olunmuş universitetin çoxprofilli terapevtik klinikası ən müasir avadanlıqla təchiz olunaraq əhaliyə dünya standartlarına uyğun səviyyədə tibbi xidmət göstərir. Ulu öndərin müəyyənləşdirdiyi siyasətin Prezident İlham Əliyev tərəfindən uğurla davam etdirildiyini vurğulayan Ə.Əmiraslanov bildirib ki, bu siyasət dövlətimizi gələcək nailiyyətlərə doğru aparır.

Azərbaycan Ağsaqqallar Şurasının sədri, millət vəkili Fəttah Heydərov çıxışında deyib ki, zamanın ötməsinə, vaxtın keçməsinə baxmayaraq, Ümummilli liderimiz heç bir vaxt unudulmur, hər birimizin xatirəsində ucalır, O yenə də bizimlədir. Bu isə bizim qəlbimizi fərəhlə doldurur: “Ümummilli liderimiz Heydər Əliyev bütün həyatını, varlığını öz mənsub olduğu doğma xalqına həsr edib. Dünya siyasətində böyük şəxsiyyətlər çoxdur. Amma xalqının tarixinə çevrilən, millətinin, dövlətinin adı çəkilən kimi yada düşən siyasi xadimlər nadirdir. Heydər Əliyev də, məhz belə şəxsiyyətdir. Bu gün Ümummilli liderimizi xatırlayanda gözümüzün önündə canlanan ilk tablo da müstəqil Azərbaycandır”.

F.Heydərov daha sonra vurğulayıb ki, Ulu öndər Heydər Əliyev əsl liderdir, o lider ki, xalqını, dövlətini böyük bir qaranlıqdan parlaq, işıqlı günlərə çıxarıb: “Heydər Əliyevdə liderlik üçün bütün xüsusiyyətlər vardı. Ulu öndərimizin mərdliyi, qorxmazlığı, cəsarəti, qətiyyəti, yüksək tələbkarlığı, dövlətçilik, Azərbaycan xalqının rifahı uğrunda apardığı davamlı mübarizə buna misal göstərilə bilər. Bütün bunlarla yanaşı, Heydər Əliyevdə yaşından asılı olmayaraq körpəsindən ağsaqqalına qədər hər bir kəsə olan isti münasibəti böyük əhəmiyyət kəsb edirdi. Heydər Əliyev insanları, xalqını çox sevirdi. Bu mehribanlıq, sevgi ilə yanaşı xalqının düşmənlərinə qarşı aparılan sərt mübarizəsi əsl sərkərdəlik qabiliyyətindən irəli gəlirdi. Bir sözlə, yüz illər ötsə də, Heydər Əliyev nuru daim Azərbaycana işıq saçacaq”.

Ulu öndərimizin təsəvvür edilə bilməyəcək qədər dahi şəxsiyyət olduğunu vurğulayan millət vəkilinin sözlərinə görə, Ümummilli liderin fiziki yoxluğu dövründə ölkəsini, millətini düşünüb, müstəqilliyimizin əbədi olması uğrunda qətiyyətlə mübarizə apara biləcək lider Prezident İlham Əliyevdir: “Ulu öndər həm də bir Ata kimi öz övladını bu böyük vəzifənin icrasına layiq gördü. Bəli, bu, çox ağır bir vəzifə idi. Amma Prezident İlham Əliyev bu ağır və məsuliyyətli vəzifənin öhdəsindən uğurla gəldi. Heydər Əliyev Azərbaycanda dövlətçilik məktəbi yaratdı. Bu məktəbi bütün varlığı ilə mənimsəyən cənab İlham Əliyev, özündə böyük fəlsəfi məna daşıyan azərbaycançılıq ideyası əsasında ölkəmizdə vətəndaş birliyini daha da möhkəmləndirib”.

Heydər Əliyevin İlahinin xalqımıza bəxş etdiyi işıq olduğunu deyən F.Heydərovun fikrincə, bu işıq daim Azərbaycanın inkişaf yolunu parlaq edəcək.

Nardar BAYRAMLI

Yeni Azərbaycan. - 2013.- 12 dekabr.- S.2.