Milli Məclisin payız sessiyası başa çatıb

31 dekabr - Dünya Azərbaycanlılarının Həmrəyliyi Günü münasibətilə Milli Məclisin müraciəti qəbul olunub

Dünən Milli Məclisin payız sessiyasının son iclası keçirilib. Milli Məclisin sədri Oqtay Əsədov millət vəkillərini qarşıdan gələn Yeni İl bayramı və 31 dekabr - Dünya Azərbaycanlılarının Həmrəyliyi Günü münasibətilə təbrik edib. Daha sonra millət vəkilləri cari məsələlərlə bağlı çıxış ediblər.

Millət vəkili Zahid Oruc ATƏT-in Varşavada yerləşən Demokratik Təsisatlar və İnsan Haqları Bürosunun (DTİHB) Azərbaycandakı prezident seçkiləri ilə bağlı yekun hesabatına münasibət bildirib. Z.Oruc deyib ki, ATƏT/DTİHB casus şəbəkəsidir: “Bu qurum özünün QHT-lərdən ibarət casus şəbəkəsini yaradıb. Azərbaycandan onlara informatorluq edənlər var, bu barədə ciddi faktlar ortadadır. Bu gün ATƏT-in Minsk qrupu nədirsə, Varşava bürosu da Azərbaycan üçün odur. Bu, yaxşı heç nə vəd eləmir. Ona görə də, ən yaxşı variant bizim Varşava bürosu ilə əməkdaşlıqdan imtina etməyimizdir. Bunun Azərbaycan üçün heç bir siyasi zərəri olmayacaq, əksinə, xeyri olacaq”.

Milli Məclisin Hüquq siyasəti və dövlət quruculuğu komitəsinin sədr müavini, “Azərbaycan Respublikası Dağlıq Qarabağ bögəsinin azərbaycanlı icması” İctimai Birliyinin idarə heyətinin üzvü Rövşən Rzayev çıxışında bildirib ki, Azərbaycanın ərazi bütövlüyünün təmin olunması, qaçqın və məcburi köçkünlərin doğma torpaqlarına qayıtması dövlətimizin qarşısında duran əsas vəzifədir. Onun sözlərinə görə, vaxtilə Ümummilli lider Heydər Əliyev bu istiqamətdə ciddi səylər göstərib, hazırda bu siyasət Prezident İlham Əliyev tərəfindən davam etdirilir. R.Rzayev qeyd edib ki, Azərbaycan BMT Təhlükəsizlik Şurasının üzvü kimi iki illik fəaliyyətində dünyada sülhün və təhlükəsizliyin təmin olunmasına öz töhfələrini verib. Onun sözlərinə görə, bu təşkilatın Dağlıq Qarabağ münaqişəsi ilə bağlı qəbul etdiyi qətnamlərin yerinə yetirilməməsi təəssüf doğurur: “Dünya dövlətləri ölkəmizin sülh səylərini dəstəkləyir, amma vacibdir ki, işğalçı Ermənistana qarşı tədbirlər görülsün. Dağlıq Qarabağın azərbaycanlı icması olaraq erməni icması ilə görüşlərin keçirilməsini, dialoqun qurulmasını istəyirik. Bu təşəbbüs reallaşarsa, icmalar böyük sülh müqaviləsinə öz töhfəsini verə bilər”.

Millət vəkili Musa Qasımlı başa çatmaqda olan 2013-cü ilin ölkəmiz üçün uğurlu olduğunu deyib. Onun sözlərinə görə, həm daxili, həm də xarici siyasətdə nailiyyətlər qazanılıb: “Bütün bunların fonunda 2014-cü ilə yeni imkanlar və böyük ümidlərlə gedirik”.

Millət vəkili İlham Əliyev bildirib ki, aqrar sahənin inkişafı üçün ölkəmizə xaricdən gətirilən gübrələrin keyfiyyəti məsələsinə diqqət yetirilməlidir: “Bu, bütövlükdə, ölkəmizdə aqrar sahənin inkişafı üçün lazımlıdır. Ona görə də, ölkəyə gətirilən gübrələrin keyfiyyətinə ciddi nəzarət edilməlidir”.

“2013-cü il ərzində Azərbaycan bütün sahələr üzrə böyük uğurlar qazanıb. Bu uğurların qazanılmasında milli həmrəyliyimiz mühüm rol oynayır”. Bu fikirləri isə Azərbaycan Ağsaqqallar Şurasının sədri, Milli Məclisin deputatı Fəttah Heydərov deyib. F.Heydərov bildirib ki, 31 dekabr - Dünya Azərbaycanlılarının Həmrəyliyi Günü xalqımızın ən böyük bayramlarından biridir. Onun sözlərinə görə, milli həmrəyliyimizin güclənməsində əsas amillərdən biri ölkəmizə Ulu öndər Heydər Əliyev siyasətini davam etdirən Prezident İlham Əliyevin rəhbərlik etməsidir: “Həmrəylik həqiqətən də böyük töhfələr verir. Bu həmrəyliyin uğurlu nəticələrini 2013-cü ildə də gördük. Bu nəticələr həm siyasi arenada, həm iqtisadiyyatda, beynəlxalq arenada özünü göstərdi. Beynəlxalq aləm, dünyanın ölkələrinin liderləri də Azərbaycanın həyata keçirdiyi siyasəti təqdir edirlər. Hesab edirəm ki, həmrəylik həmişə xalqımıza, cəmiyyətə lazımdır. Kiçik hadisələrlə, düşmən qüvvələrlə əlbir olub Azərbaycanın uğurlarına ləkə salmaq istəyənlərə deyirik ki, belə hərəkətlər gərək deyil. Bizə həmrəyliyimizi bundan sonra daha da gücləndirmək lazımdır”.

Ombudsmanın və hakimlərin maaşları artırılıb

Daha sonra millət vəkilləri gündəlikdəki məsələləri müzakirə ediblər. Əvvəlcə, “Azərbaycan Respublikasının insan hüquqları üzrə müvəkkili (Ombudsman) haqqında” və “Konstitusiya Məhkəməsi haqqında” qanunlara dəyişikliklər məsələsi müzakirə olunub. Layihələr barədə parlamentin Hüquq siyasəti və dövlət quruculuğu komitəsinin sədri Əli Hüseynli məlumat verib. Ə.Hüseynli bildirib ki, “Azərbaycan Respublikasının insan hüquqları üzrə müvəkkili (Ombudsman) haqqında” Konstitusiya qanununun 16.1-ci maddəsinə təklif olunan dəyişikliyə əsasən Ombudsmanın maaşı 1800 manatdan 2025 manata qaldırılır. Ombudsmanın maaşına edilən artım qanuna müvafiq olaraq Ombudsman Aparatı işçilərinin də maaşına təsir edəcək. “Konstitusiya Məhkəməsi haqqında” qanunun 71.2-ci maddəsinə təklif olunan dəyişikliyə əsasən isə Konstitusiya Məhkəməsi sədrinin aylıq vəzifə maaşı 1785 manatdan 2120 manata qaldırılır. Artım Konstitusiya Məhkəməsinin hakimlərinin də aylıq maaşlarına təsir edir. Hər iki layihə səsə qoyularaq qəbul olunub. Bildirilib ki, bu məsələlər Konstitusiya qanununa edilən dəyişikliklər olduğu üçün 6 ay sonra yenidən təkrar təsdiqlənmək üçün Milli Məclisdə səsə qoyulacaq.

“Məhkəmələr və hakimlər haqqında” Qanuna edilən dəyişikliklərə görə isə bütün hakimlərin və məhkəmə sədrlərinin maaşı artırılıb.

İclasda həmçinin, “Azərbaycan Respublikasının Müdafiə Nazirliyi və Amerika Birləşmiş Ştatlarının Müdafiə Nazirliyi arasında avadanlığın alınması və qarşılıqlı xidmət haqqında Sazişin (USA-AZE-02) təsdiq edilməsi barədə” sənəd müzakirə olunub. Milli Məclis sədrinin birinci müavini Ziyafət Əsgərov bildirib ki, sənəd faktiki olaraq 10 il əvvəl imzalanmış sazişin müddətinin daha 5 il uzadılmasını nəzərdə tutur. Sazişin Azərbaycan üçün mühüm əhəmiyyətə malik olduğunu vurğulayan deputatlar sənədin ratifikasiya olunmasını vacib sayıblar. Sənəd səsə qoyularaq təsdiq edilib.

“Polis haqqında” Qanuna əlavə və dəyişikliklər edilib

Daha sonra “Polis haqqında” Qanuna əlavə və dəyişikliklər məsələsi müzakirəyə çıxarılıb. Layihə barədə Hüquq siyasəti və dövlət quruculuğu komitəsinin sədri Əli Hüseynli məlumat verib. Layihəyə görə, tutulmuş və ya həbs edilmiş şəxs həbs yerinə gətirildikdən dərhal sonra ona tutulduğu və ya həbsə alındığı, harada saxlanıldığı barədə yaxın qohumlarına, yaxud əlaqə saxlaması onun üçün qanuni maraq doğuran digər şəxslərə telefon və digər vasitələrlə məlumat vermək imkanı yaradılmalıdır. Tutulmuş və ya həbs edilmiş şəxsin qocalığı, yetkinlik yaşına çatmaması, sağlamlıq və psixi vəziyyəti ilə bağlı hallar istisna olmaqla, belə məlumatları tutulan öz təşəbbüsü ilə verməlidir. Əgər tutulmuş və ya həbs edilmiş şəxs əcnəbi, yaxud vətəndaşlığı olmayan şəxsdirsə, onun vətəndaşı olduğu və ya daimi yaşadığı dövlətin Azərbaycanda olan diplomatik nümayəndəliyinə, konsulluğuna, yaxud ona himayədarlığı öz üzərinə götürmüş milli, yaxud beynəlxalq təşkilata bu barədə dərhal məlumat verməli və bu cür məlumatın verildiyi qeydə alınmalıdır. Maddənin qeyd olunan bəndinin hazırda qüvvədə olan variantı isə belədir: “Tutulmuş və ya həbsə alınmış şəxsin yaxın qohumlarına, onun tələbi ilə iş və ya təhsil yerinə tutulması və ya həbsə alınması barədə təxirə salınmadan məlumat verilməlidir (qocaların, yetkinlik yaşına çatmayanların və psixi vəziyyətinə görə imkanı olmayan tutulmuş şəxslərin ailə üzvlərinə müvəqqəti saxlama yerlərinin müdiriyyəti öz təşəbbüsü ilə xəbər verir)”.

Bundan başqa, polisin səlahiyyətləri ilə bağlı daha bir neçə qayda dəyişdirilib.

Əmək müqavilələri elektron qaydada sənədləşdiriləcək

İclasda Əmək Məcəlləsinə də bir sıra dəyişikliklər edilib. Dəyişikliklərdən biri budur ki, əmək müqaviləsinin qüvvəyə minməsi ilə bağlı şərtlər dəyişdirilir və yenilənir: əmək müqaviləsinin bağlanması, ona dəyişiklik edilməsi və ya xitam verilməsi yalnız bununla bağlı elektron informasiya sisteminə daxil edilmiş əmək müqaviləsi bildirişinin həmin elektron informasiya sistemində qeydiyyata alınmasından, bu barədə işəgötürənə elektron qaydada məlumat göndərilməsindən sonra hüquqi qüvvəyə minir. Elektron informasiya sisteminə daxil edilmiş əmək müqaviləsi bildirişinin qeydiyyata alınması barədə 1 iş günündən gec olmayaraq sistem vasitəsilə işəgötürənə elektron qaydada məlumat göndərilməlidir.

Hüquq siyasəti və dövlət quruculuğu komitəsinin sədri Ə.Hüseynlinin sözlərinə görə, layihənin əsas mahiyyəti əmək müqavilə sisteminin elektron xidmətə keçməsidir. Bu isə daha çox işçilərin maraqlarına xidmət edir. Müzakirələrdə çıxış edən Milli Məclisin Sosial siyasət komitəsinin sədr müavini Musa Quliyev bildirib ki, bu sənəd işçi-işəgötürən münasibətlərini daha sivil və hüquqi müstəviyə keçirəcək. Onun sözlərinə görə, bu sahədə elektron xidmətə keçid çox yaxşı haldır.

Məsələ ilə bağlı çıxış edən YAP İcra katibinin müavini, millət vəkili Siyavuş Novruzov bildirib ki, bu, insanların uzun illər gözlədiyi məsələdir: “Bu dəyişikliklərdə söhbət vətəndaşların hüquqlarının qorunmasından gedir. Ən çox maraqlı isə işə götürülən tərəf olmalıdır. O neqativ halların qarşısını almalıdır, öz hüquqlarını dərk edib müqaviləsini təmin etməlidir ki, sonra problem yaranmasın. Münasibətlərin düzgünlüyü əmək müqaviləsində əks olunmalıdır. Bir sözlə, bu ciddi yenilikdir və biz bu yeniliyi dəstəkləməliyik”.

Sonra Məcəllədə və məcəllədən irəli gələrək İnzibati Xətalar, Vergilər məcəllələrində də bir sıra dəyişikliklər layihəsi qəbul olunub.

Körpələr evləri və uşaq bağçaları vergilərdən azad olundu

İclasda “Körpələr evlərinə, körpələr evi - uşaq bağçalarına, xüsusi uşaq bağçalarına və uşaq evlərinə müddətli vergi güzəştlərinin verilməsi haqqında” qanun layihəsi müzakirəyə çıxarılıb. Layihə barədə İqtisadi siyasət komitəsinin sədri Ziyad Səmədzadə məlumat verib. O qeyd edib ki, layihə ölkə Prezidentinin imzası ilə Milli Məclisə daxil olub. Cəmi 2 maddədən ibarət olan yeni qanun layihəsinə əsasən körpələr evləri, körpələr evi - uşaq bağçaları, xüsusi uşaq bağçaları və uşaq evləri 2014-cü il yanvarın 1-dən başlayaraq, 10 il müddətinə Vergilər Məcəlləsi ilə müəyyən edilmiş hüquqi şəxslərin mənfəət vergisini və sadələşdirilmiş vergini ödəməkdən azaddırlar. Z.Səmədzadə bildirib ki, ölkədəki 1-5 yaşlı uşaqların cəmi 15 faizi bağçalara gedir: “Ölkədə ciddi bağça çatışmazlığı var. Bu dəyişiklik özəl şirkətləri bağça tikməyə həvəsləndirəcək. Hazırda ölkədə 40 özəl bağça var. Sahibkarları bu sahəyə sərmayə qoymağa çağırıram”.

YAP İcra katibinin müavini, millət vəkili Siyavuş Novruzov deyib ki, vergi güzəştlərindən sonra özəl seçktorda uşaq bağçaları, körpələr evinin tikilməsinə diqqət xeyli arta bilər. Özəl şirkətlərin daha çox gəlirli sahələrə üstünlük verdiyini deyən S.Novruzovun sözlərinə görə, əhali üçün ən zəruri olan uşaq bağçalarıdır. S.Novruzov deyib ki, “Təhsil haqqında” Qanuna əsasən uşaqlar orta məktəbə bağçadan gəlməlidirlər.

Millət vəkili özəl bağçaların çox baha olduğunu da nəzərə çatdırıb: “Bağçalara elə bir qiymət qoyublar ki, ailənin bütün üzvləri işləsə belə, uşağı bağçaya qoymaq üçün yetərli olmaz. Elə bağçalar var ki, qiymətlər 700 manatdan 1000 manatadək dəyişir. Amma bizim müzakirə etdiyimiz qanunda nəzərdə tutulan güzəştlər həmin özəl bağçalara da şamil olunur. Onlar vergilərdən azad edilsələr də, bağçaları qoyduqları qiymət reallığı əks etmir. Buna görə də, hesab edirəm ki, vergi güzəştlərinə fərdi qaydada yanaşmaq lazımdır. Uşaq bağçaların Təhsil Nazirliyinin nəzdindədirsə, dövlət balansındadırsa, bu güzəştlər tətbiq olunsun. Əgər bu güzəştlər kimlərinsə cibinin doldurulmasına, gəlir vasitəsinə çevrilə bilərsə, onlara yanaşmamız başqa formada olmalıdır”.

Müzakirələrdən sonra qanun layihəsi qəbul olunub.

İclasda həmçinin, “Yaşıllıqarın mühafiəzi haqqında” qanun layihəsi qəbul olunub. Layihə haqqında parlamentin Aqrar siyasət komitəsinin sədri Eldar İbrahimov məlumat verib.

Son olaraq isə, 31 dekabr - Dünya Azərbaycanlılarının Həmrəyliyi Günü münasibətilə Milli Məclisin müraciəti qəbul olunub. Milli Məclis 31 dekabr - Dünya Azərbaycanlılarının Həmrəyliyi Günü münasibətilə Azərbaycan Prezidenti İlham Əliyevə təbrik məktubu göndərib.

Parlamentin payız sessiyası dövlət himninin səsləndirilməsi ilə başa çatıb.

Nardar BAYRAMLI

Yeni Azərbaycan.-2013.- 28 dekabr.- S.3.