Azərbaycan Prezidenti İlham Əliyevin uğurlu siyasəti öz bəhrəsini verir

Mübariz Qurbanlı: Bosniya və Herseqovina parlamentində qəbul edilmiş qətnamə Prezident İlham Əliyevin həyata keçirdiyi uğurlu xarici siyasətin məntiqi nəticəsidir

Məlum olduğu kimi, fevralın 26-da Bosniya və Herseqovina Parlament Məclisinin Xalqlar Palatasında “Azərbaycan Respublikasının suverenliyinin və ərazi bütövlüyünün tanınması və hörmət olunması”na dair qətnamə qəbul edilib. YAP İcra katibinin müavini, Milli Məclisin üzvü, Azərbaycan - Bosniya və Herseqovina parlamentlərarası əlaqələr üzrə işçi qrupunun qəhbəri Mübariz Qurbanlı qəzetmizə müsahibəsində həm bu, həm də digər məsələlərə toxunub.

- Mübariz müəllim, məlum olduğu kimi, fevralın 26-da Bosniya və Herseqovina Parlament Məclisinin Xalqlar Palatasında “Azərbaycan Respublikasının suverenliyinin və ərazi bütövlüyünün tanınması və hörmət olunması”na dair qətnamə qəbul edilib. Azərbaycan - Bosniya və Herseqovina parlamentlərarası əlaqələr üzrə işçi qrupunun rəhbəri kimi sizin bu sənədin əhəmiyyəti haqqında fikirlərinizi bilmək istərdik...

- İlk növbədə, mən parlamentlərarası əlaqələr üzrə işçi qrupunun rəhbəri kimi belə bir sənədin qəbul olunmasına görə, bu dövlətin rəhbərliyinə və bütün parlamentarilərinə təşəkkür edirəm. Bosniya və Herseqovina Parlament Məclisinin Xalqlar Palatasında “Azərbaycan Respublikasının suverenliyinin və ərazi bütövlüyünün tanınması və hörmət olunması”na dair qətnamənin qəbul edilməsi Azərbaycan Prezidenti cənab İlham Əliyevin həyata keçirdiyi uğurlu xarici siyasətin məntiqi nəticəsidir. Ölkə Prezidenti İlham Əliyev hücum diplomatiyasını irəli sürüb və xarici siyasətimizdə hücum diplomatiyası həyata keçirilir. Biz çalışırıq ki, dünyanın əksər ölkələrində, beynəlxalq təşkilatlarda Ermənistanın Azərbaycana qarşı təcavüzü, o cümlədən, Xocalı soyqırımı ilə bağlı sənədlər qəbul edilsin. Onu da qeyd edim ki, bəzi ölkələrin 50-60 ildə görəcə biləcəyi işləri Prezident İlham Əliyevin rəhbərliyi ilə biz çox qısa zaman ərzində həyata keçirə bilmişik.

Bilirsiniz ki, ermənilər beynəlxalq miqyasda Türkiyəyə və Azərbaycana qarşı çox ciddi təxribatlarla məşğuldurlar, əleyhimizə kampaniya aparırlar. Belə bir şəraitdə gedən ideoloji-siyasi mübarizədə bu cür qətnamələrin qəbul edilməsi bizim xeyrimizədir. Bosniya və Herseqovina Parlament Məclisinin qəbul etdiyi sənəd əsasən bir neçə məsələyə diqqət yetirir. Birincisi, burada Dağlıq Qarabağ münaqişəsi ilə bağlı fikirlər öz əksini tapır və qeyd olunur ki, Bosniya və Herseqovina parlamenti BMT Təhlükəsizlik Şurasının qəbul etdiyi qətnamələrin yerinə yetirilməsinə tərəfdardır. Qətnamədə Ermənistan silahlı qüvvələrinin Azərbaycanın işğal olunmuş ərazilərindən çıxarılması tələb olunur. Eyni zamanda, Azərbaycanın ərazi bütövlüyü və suverenliyi sənəddə xüsusi vurğulanır. Digər bir müddəada Ermənistan-Azərbaycan münaqişəsi zamanı Xocalı şəhərinin dinc əhalisinə qarşı milli və etnik zəmində kütləvi qırğın törədilməsi pislənilir və Xocalı hadisələri soyqırımı kimi qeyd olunur. Qətnamədə regionda sülh və əməkdaşlığa çağırışlar var və Azərbaycanın bölgədə apardığı siyasət birmənalı şəkildə müdafiə edilir. Eləcə də, ölkəmizin sülh səylərinin müdafiə edildiyi qeyd olunur.

Ümumiyyətlə, Bosniya və Herseqovina soyqırımı aktının baş verdiyi tarixdən keçən 21 il ərzində dünyada Xocalı soyqırımı qurbanlarının xatirəsini özündə əks etdirən bütöv memorial kompleksin yaradıldığı ilk ölkədir. Avropanın mərkəzində yerləşən, 1992-1995-ci illərdə qanlı müharibəyə səhnə olmuş, BMT və Haaqa tribunalı tərəfindən soyqırımı kimi rəsmən tanınan Srebrenitsa faciəsinin yaşandığı bir dövlət olaraq Bosniya və Herseqovinanın Parlament Məclisinin Xalqlar Palatasında Xocalı soyqırımını tanıyan qətnamənin qəbul edilməsi, heç şübhəsiz ki, öz növbəsində dünyada və Avropada ümumi ictimai rəyin formalaşmasında və digər ölkələrin parlamentləri tərəfindən bu qəbildən olan addımların atılması istiqamətində mühüm rol oynayacaq.

- Ümumiyyətlə, iki ölkə arasındakı əlaqələrin hazırki səviyyəsini necə qiymətləndirirsiniz?

- Bilirsiniz ki, Azərbaycanın Bosniya və Herseqovinada diplomatik nümayəndəliyi fəaliyyət göstərir və ölkələrimiz arasında ikitərəfli əlaqələr də yüksələn xətlə inkişaf edir. Azərbaycan ilə Bosniya və Herseqovina arasındakı əlaqələr bütün istiqamətlər, o cümlədən, siyasi, iqtisadi, mədəni, humanitar sahələrdə ciddi inkişaf etməkdədir. Yəni, bizim bu ölkə ilə qarşılıqlı əlaqələrimiz bütün sahələri əhatə etməkdədir. Balkan yarımadasında diqqəti cəlb edən ölkə kimi Bosniya və Herseqovinaya Azərbaycan həmişə böyük maraqla yanaşıb.

İkitərəfli dostluq və qardaşlıq əlaqələrinin göstəricisi olaraq, 2011-ci ildə Azərbaycan Prezidentinin təşəbbüsü və tapşırığına əsasən, dövlətimizin dəstəyi ilə Sarayevo şəhərindəki Bakı küçəsində yenidənqurma və bərpa işləri həyata keçirilib. 2012-ci il fevral ayında Sarayevo şəhərində, Dobrinya çayı sahilində Heydər Əliyev Fondunun təşəbbüsü və təşkilatçılığı ilə yeni Azərbaycan-Bosniya və Herseqovina dostluq parkı salınıb. Bosniya və Herseqovinanın dövlət və hökumət qurumlarının rəsmi razılığını əldə etməklə həmin parkda Xocalı və Srebrenitsa soyqırımlarını özündə əks etdirən memorial kompleks yaradılıb. Sarayevonun ən müasir istirahət guşəsi adını qazanmış park və abidə hazırda paytaxt sakinləri və şəhərin qonaqlarının ziyarət məkanına çevrilib.

Azərbaycan ilə Bosniya və Herseqovina xalqları arasında tarixi baxımdan bənzər cəhətlərdən biri də hər iki xalqın amansız təcavüzə məruz qalması və bəşəriyyətə qarşı qəsd kimi dəyərləndirilən Xocalı və Srebrenitsa faciələrini yaşamalarıdır. Bu baxımdan, Heydər Əliyev Fondunun təşəbbüsü ilə Xocalı soyqırımına dair memorial kompleksin məhz Bosniya və Herseqovinanın paytaxtı Sarayevo şəhərində ucaldılması ciddi tarixi, siyasi və mənəvi əhəmiyyətə malikdir. Göründüyü kimi, xalqlarımızı bir-birinə bağlayan belə məqamlar var. Ümumiyyətlə, Azərbaycan xarici siyasətində Balkan ölkələri ilə əməkdaşlığa əhəmiyyət verir və bunun göstəricisi olaraq Bosniya və Herseqovina ilə əlaqələr genişlənir. Hesab edirəm ki, gələcəkdə ikitərəfli münasibətlərimiz daha da inkişaf edəcək. Çünki bunun üçün bütün imkanlar mövcuddur.

- Bəs Azərbaycan parlamenti ilə Bosniya və Herseqovina parlamenti arasında münasibətlər hansı səviyyədədir?

- Parlamentlərimiz arasında əlaqələr yüksək səviyyədədir. Bu əlaqələrimizin göstəricisi kimi fevralın 5-də Bosniya və Herseqovina Parlament Məclisi Nümayəndələr Palatasının sədri Bojo Lyubiçin başçılıq etdiyi nümayəndə heyətinin ölkəmizə səfərini qeyd etmək istərdim. Səfər zamanı nümayəndə heyəti, Milli Məclisin rəhbərliyi ilə, eləcə də, digər qurumlarda görüşlər keçirib. İşçi qrupun rəhbəri kimi mən də bu görüşlərdə iştirak etmişəm.

Bu görüşlərdə qeyd olunub ki, Avropaya inteqrasiya edən ölkəmiz qitənin sülhsevər ölkələri, o cümlədən, Bosniya və Herseqovina ilə də əlaqələrin inkişafına böyük əhəmiyyət verir. Ölkələrimiz arasındakı münasibətlərin dərinləşməsində dövlətlərimizin başçılarının rolunu yüksək qiymətləndirməklə bərabər hesab edirik ki, bu səfər qanunverici orqanlar arasında da əlaqələrin genişlənməsinə xidmət edəcək. Bu günə qədər ölkələrimiz arasında bir sıra sənədlər də imzalanıb. Düşünürük ki, bu sənədlər əməkdaşlığımızın daha da dərinləşməsi üçün möhkəm hüquqi baza yaradacaq.

Keçirilən görüşlərdə o da vurğulanıb ki, xalqlarımız arasındakı dostluq münasibətlərinin möhkəm təməli var. Belə ki, bu il Bakı ilə Sarayevo arasında qardaşlaşma haqqında memorandumun imzalanmasının 40 ili tamam olur. Bu günə qədər hər iki ölkədə bir sıra humanitar tədbirlər, mədəniyyət günləri keçirilib. Bu cür tədbirlər xalqlararası münasibətlərin möhkəmlənməsində mühüm rol oynayır. Eyni zamanda, hesab edirik ki, dövlətlərarası əlaqələrin inkişafında parlamentlərin xüsusi rolu var və hər iki ölkənin qanunverici orqanında dostluq qruplarının mövcudluğu çox təqdirəlayiq haldır. Biz bu qrupların fəaliyyətini gücləndirməklə əlaqələrimizin bütün sahələrdə inkişafına nail ola bilərik.

Bütövlükdə, Bosniya və Herseqovina parlamentinin nümayəndələri Azərbaycanı hər zaman, hər yerdə müdafiə edirlər.

- Mübariz müəllim, başqa bir hadisə ilə bağlı da fikirlərinizi bilmək istərdik. Dünyada erməni təcavüzünün hamı tərəfindən qəbul edildiyi bir vaxtda Fransa Milli Assambleyasında keçirilən tədbirdə bu faktları bəyan edən Azərbaycan nümayəndələrinə hücum olub. Bu hadisəyə münasibətiniz necədir?

- Əlbəttə, bu həm təəssüf doğuran, həm də hiddətə səbəb olan hadisədir. Hesab edirəm ki, Fransa hakimiyyəti məsələyə ciddi reaksiya verməlidir. Eyni zamanda, bu hadisənin Fransa Milli Assambleyasında baş verməsi daha çox diqqəti cəlb edir və təəssüf doğurur. Bu hadisənin özünü demokratik ölkə hesab edən Fransada baş verməsi acınacaqlı haldır. Bildiyiniz kimi, artıq Azərbaycan Fransaya nota verib. Ölkəmizin Xarici İşlər Nazirliyi törədilmiş bu zorakılığı pisləyərək, baş vermiş hadisəyə Fransa Respublikasının müvafiq qurumları tərəfindən münasibət bildiriləcəyinə və cinayətin bu ölkənin hüquq-mühafizə orqanları tərəfindən operativ şəkildə araşdırılaraq, cinayətkarların məsuliyyətə cəlb olunacağına inandığını bəyan edib.

Eyni zamanda, YAP-ın gəncləri də bu hadisə ilə əlaqədar Fransa parlamentinə etiraz məktubları göndəriblər. Əlbəttə, Fransada belə bir zorakılığın baş verməsi yolverilməz haldır və bu cür məsələlər təkrarlanmamalıdır. Bu hərəkəti edənlər öz qanuni cəzalarını almalıdırlar.

Nardar BAYRAMLI

Yeni Azərbaycan.- 2013.- 28 fevral.- S.3.