“Heydər Əliyev mənim həyatımda”

Yeni Azərbaycan Partiyasının təşkilatçılığı ilə “Azərbaycan” qəzetinin Ümummilli liderimiz Heydər Əliyevin 90 illik yubileyi münasibətilə hazırladığı ikicildlik kitabın təqdimatı keçirilib

Dünən Yeni Azərbaycan Partiyasının (YAP) təşkilatçılığı ilə “Azərbaycan” qəzetinin Ümummilli liderimiz Heydər Əliyevin 90 illik yubileyi münasibətilə hazırladığı “Heydər Əliyev mənim həyatımda” adlı ikicildlik kitabın təqdimatı keçirilib. İkicildliyin məsləhətçisi və “Ön söz”ün müəllifi Azərbaycan Prezidenti Administrasiyasının rəhbəri, akademik Ramiz Mehdiyevdir. Nəşrin redaktoru tarix elmləri doktoru, professor Əli Həsənov, buraxılışa məsul isə “Azərbaycan” qəzetinin baş redaktoru, Milli Məclisin deputatı Bəxtiyar Sadıqovdur.

Təqdimat mərasimində çıxış edən YAP Sədrinin müavini-İcra katibi Əli Əhmədov “Heydər Əliyev mənim həyatımda” kitabının Ümummilli lider Heydər Əliyevə həsr olunmuş nəşrlər arasında özünə xüsusi yer tutacağına inandığını bildirib. Bu günlər Ümummilli lider Heydər Əliyevin 90 illik yubileyinin xalqımız tərəfindən, o cümlədən dünya ölkələrində yaşayan azərbaycanlılar tərəfindən yüksək səviyyədə qeyd olunduğunu deyən Əli Əhmədovun fikrincə, 90 illik yubileyin belə yüksək, təntənə ilə qeyd olunması Ulu öndər Heydər Əliyevə olan dərin hörmət və ehtiramın ifadəsidir. YAP Sədrinin müavini vurğulayıb ki, Heydər Əliyev Azərbaycan xalqı qarşısında misilsiz xidmətlər göstərib və yeni nəşrdə bu amil özünün xüsusi olaraq əksini tapıb: “Azərbaycan xalqı Heydər Əliyevin doğum gününü qeyd etməklə həm də bu gün ölkəmizdə həyata keçirilən Prezidentimizin rəhbərliyi ilə reallaşdırılan, Azərbaycanın inkişafına xidmət edən və hər bir vətəndaş üçün faydalar gətirən Heydər Əliyev siyasəti dəstəklənmiş olur. Vətəndaşlar bu siyasətə müsbət münasibətlərini ifadə edirlər. Bu tədbirlər çox müxtəlif formalarda həyata keçirilməkdədir. Onlardan biri də Heydər Əliyevin geniş fəaliyyətinə həsr olunan müxtəlif kitabların hazırlanıb işiq üzü görməsindən ibarətdir. Heydər Əliyev haqqında yazılan hər bir kitab Onun fəaliyyətinin dəyərləndirilməsi ilə yanaşı gələcək nəsillər üçün Azərbaycanın inkişafına xidmət edən fəaliyyətin tarixə çevrilməsi və gələcək nəsillərə ötürülməsi üçün verilən töhfələrdən ibarətdir. Azərbaycanda Heydər Əliyev haqqında xeyli kitablar yazılıb və bundan sonra da yazılacaq. Beləliklə də, bugünkü nəslin bilavasitə iştirakı ilə gələcək nəsillərdə Heydər Əliyev haqqında daha kamil təsəvvürlər yaradan əsərlər yazılıb ortaya qoyulacaq”.

Əli Əhmədov bildirib ki, bu tədbir Ümummilli lider Heydər Əliyevin zəngin fəaliyyətinə həsr olunmuş və Heydər Əliyevlə əlaqədar xatirələri özündə ehtiva edən çox dəyərli kitabın təqdimatına həsr olunub. Belə ki, “Heydər Əliyev mənim həyatımda” adlanan ikicildlik topluda Ümummilli lider haqqında xatirələr, Onun xalqımızın qarşısında xidmətlərini əks etdirən fikirlər, düşüncələr öz əksini tapıb. “Təbii ki, Heydər Əliyevin hakimiyyəti dövründə yaşamış, Azərbaycanda inkişafdan bəhrələnən, sabitlik, əmin-amanlığın faydasını görən hər bir vətəndaşın həyatında bu dahi şəxsiyyətin izi var. İnsanların özünü layiqli vətəndaş hiss etməsi həm də ona görədir ki, o möhtəşəm bir dövlətin vətəndaşıdır. Sabaha inamla baxan ölkənin sakinidir. Beləliklə də, hər birimizin həyatındakı müsbət dəyişikliklərin kökündə Heydər Əliyevin müəyyənləşdirdiyi siyasət və bu siyasətin uğurla həyata keçirilməsi və müsbət nəticələridir. Bütün vətəndaşlar Heydər Əliyev siyasətini öz həyatında hiss edirlər. Eyni zamanda, hələ uzun illər Azərbaycan vətəndaşları Heydər Əliyevin müəyyənləşdirdiyi siyasətin bəhrələrini, faydalarını görəcəklər. Hər bir azərbaycanlı Azərbaycanın gələcək perspektivlərinə inanır və beləliklə də, həyatımız Heydər Əliyevin müəyyənləşdirdiyi siyasətin gətirdiyi faydalar əsasında daha da zənginləşib. Bu mənada hesab edirəm ki, Heydər Əliyev haqqında deyilən hər bir fikir ürəkdən gəlir. Təqdimatına toplaşdığımız kitabda da bu duyğuları görmək olar. Bu kitab Ümummilli lider Heydər Əliyevin əziz xatirəsinə layiq olan çox maraqlı kitabdır” - deyə, YAP Sədrinin müavini vurğulayıb.

Tədbirdə Baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri, YAP Siyasi Şurasının üzvü Əli Həsənov çıxış edərək bildirib ki, Ümummilli lider Heydər Əliyevin 90 illik yubileyi Azərbaycanın hər guşəsində böyük təntənə ilə qeyd olunmaqdadır. Ə.Həsənovun fikrincə, bu tədbirlər tarixi şəxsiyyət olan Heydər Əliyevin misilsiz xidmətlərinə qədirbilən xalqımız tərəfindən verilən qiymətin, sonsuz ehtiram və sevginin, inamın təzahürüdür. YAP Siyasi Şurasının üzvü vurğulayıb ki, Azərbaycan xalqının Ümummilli lideri Heydər Əliyev millətimizin və dövlətimizin gələcəyi naminə misilsiz xidmətlər göstərib. Bildirib ki, Ulu öndər Heydər Əliyev hələ Sovet İttifaqının tərkibində respublikamızda rəhbər vəzifələrdə çalışdığı dönəmlərdə belə Azərbaycanın və azərbaycanlıların gələcəyini düşünmüş və bu günümüz üçün böyük işlərin, layihələrin əsasını qoyub. Ölkəmizin ikinci dəfə öz müstəqilliyini əldə etdikdən sonra düşmüş olduğu çətin dönəmlərdən də, məhz Ulu öndər Heydər Əliyevin siyasi iradəsi və yüksək bacarığı sayəsində xilas olduğunu söyləyən Ə.Həsənov dövlətimizin sağlam, sarsılmaz təməllər üzərində bərqərar olmasının əsasının da o dövrlərdə qoyulduğunu vurğulayıb.

Ə.Həsənov Ümummilli lider Heydər Əliyevin respublikamıza rəhbərlik etdiyi ilk dövrdə (1969-1982-ci illər) Azərbaycanın sürətli inkişaf və tərəqqi mərhələsi yaşadığını deyib. O qeyd edib ki, məhz o illərdə xalqımızın milli ruhu formalaşıb, özünü ifadə etmək qüdrəti yüksəlib, iqtisadiyyatımız inkişaf edib, respublikamız keçmiş ittifaqında tanınıb. Baş nazirin müavini vurğulayıb ki, Ulu öndər Heydər Əliyev Özünün ardıcıl və məqsədyönlü dövlətçilik və siyasi fəaliyyəti ilə müstəqil Azərbaycan dövlətinin banisi, xilaskarı və qurucusu olmaqla bərabər, həm də XX əsrin dünya siyasətində silinməz izlər qoymuş tarixi şəxsiyyətdir. Ə.Həsənovun sözlərinə görə, Ulu öndərin SSRİ kimi nəhəng bir dövlətin rəhbərliyinə qədər yüksəlməsi bütün Türk dünyasında qürurla qarşılanıb.

Ulu öndərin Azərbaycanın müstəqilliyinin qorunub saxlanılmasında müstəsna xidmətlərindən danışan Ə.Həsənov deyib ki, 1993-cü ildə Heydər Əliyev hakimiyyətə qayıtmasaydı, bu gün Azərbaycan dövlətinin mövcudluğundan söhbət gedə bilməzdi. Onun sözlərinə görə, ölkəmizdə azərbaycançılıq ideologiyasının formalaşması, Azərbaycanın dinamik və sürətli iqtisadi inkişafını təmin edən neft strategiyasının müəyyənləşdirilməsi və həyata keçirilməsi Heydər Əliyevin müdrikliyi və sarsılmaz iradəsi sayəsində mümkün olub: “Azərbaycan bu gün Ulu öndərin qurduğu təməl üzərində sürətlə inkişaf edir. Hazırda Heydər Əliyev siyasəti Prezident İlham Əliyev tərəfindən uğurla davam etdirilir. Ölkəmizin başçısı indiyə kimi qazanılan uğurla yanaşı gələcək hədəflərimizin də nədən ibarət olduğunu bəyan edib. Bu hədəflər Azərbaycanı daha da inkişaf edirmək və gücləndirməkdir ki, bu istiqamətdə vacib addımlar atılır. Şübhə yoxdur ki, Azərbaycan Heydər Əliyev siyasəti nəticəsində bundan sonra da inkişaf edəcək və xalqımıza xidmət göstərəcək”.

Azərbaycan Ağsaqqallar Şurasının sədri, Milli Məclisin deputatı Fəttah Heydərov da çıxışında deyib ki, Ümummilli lider Heydər Əliyevə həsr olunmuş kitab zəngin mənbədir. Ulu öndərin xalqımız qarşısında xidmətlərindən danışan F.Heydərovun sözlərinə görə, Ümummilli lider Heydər Əliyevin nurlu zəkası daim Azərbaycana işıq saçırdı: “Məhz bu işıq Azərbaycanı və xalqımızı inkişaf etdirdi, onu zirvələrə qaldırdı. Bu ilk əvvəl keçmiş sovetlər ittifaqında baş verdi. Sonralar Heydər Əliyev özünün yeni-yeni uğurları xalqımızı zirvələrə ucaltdı. Ulu öndərimiz hər zaman xilaskarlıq missyası yerinə yetirib. O, həmişə Azərbaycan çətin məqamlarda olanda xalqımızın harayına çatıb. İkinci dəfə belə bir hadisə 1990-cı illərin əvvəlində baş verdi. O zaman Heydər Əliyev olmasaydı Naxçıvan da əlmizdən gedə bilərdi”.

F.Heydərov bildirib ki, Heydər Əliyevin rəhbər olaraq müəyyənləşdirdiyi xətt Azərbaycanı inkişaf yoluna çıxarıb. Onun sözlərinə görə, müstəqillik illərində qazanılan nailiyyətlər Ulu öndər Heydər Əliyevin qurduğu müstəqil Azərbaycanın keçdiyi tarixi bir yoldur. “Hamıya məlumdur ki, bugünkü müstəqil Azərbaycan dövlətinin qurucusu, yaradıcısı Heydər Əliyevdir və Onun bizlərə əmanət etdiyi dövlət Ulu öndərin şah əsəridir. Ulu öndər Heydər Əliyev bütün şüurlu həyatını, Azərbaycan üçün, torpağımızın barlı-bərəkətli olması üçün, insanlarımızın maddi rifah halının yaxşılaşması üçün, Azərbaycan xalqının tərəqqisi üçün sərf edib. Yəni həyatın bütün sahələrində yaxşı nə varsa, Heydər Əliyev həmişə onun mövcudluğuna çalışırdı. Heydər Əliyev, xüsusilə, Azərbaycana rəhbərliyinin ikinci dövründə fəlakətlərə, faciələrə, çətinliklərə düşmüş Azərbaycanımızın xilas edilməsi, onun yenidən qurulması, bu günə gəlib çatan yüksək nəticələrinin əldə olunması üçün misilsiz fəaliyyət göstərdi. Ulu öndər 1970-ci illərdə sovetlər hakimiyyəti zamanı respublikamızın böyük inkişafına nail olmuşdusa, Azərbaycan insanının nüfuzunu qaldıra bildirmişdisə, təəssüflər olsun ki, Ulu öndər Heydər Əliyev siyasi arenada olmadığı dövrdə Azərbaycan özünün faciəli həyatını, mərhumiyyətlər dövrünü yaşamışdı. O zamanlar Azərbaycan torpaqlarının beşdə birini itirdi, müharibədə 20 min nəfərdən çox şəhid verdik, Dağlıq Qarabağ problemi Heydər Əliyevin Azərbaycanda olmadığı dövrdə yarandı. Qısa olaraq belə deyə bilərik ki, bu problemlər Azərbaycanın başında dünyanı dərk edə bilən, bu xalqı doğru yolla apara biləcək, müstəqilliyimizi qoruya biləcək bir rəhbərin yoxluğundan əmələ gəlmişdi. Nə yaxşı ki, tale xalqı sınağa çəkdi, Ulu öndər Heydər Əliyev ikinci dəfə hakimiyyətə qayıtdı. Onun ikinci dəfə hakimiyyətə qayıtması, xalqa, insanlara, torpağa olan şəxsiyyət, ağsaqqal məhəbbəti bu xalqı yeni müstəqil dövlət qurub onun başında möhkəm dayanmağa gətirib çıxardı” - deyə, Azərbaycan Ağsaqqallar Şurasının sədri vurğulayıb.

F.Heydərov bildirib ki, indi Azərbaycanın uğurları göz qabağındadır, ölkəmiz inkişaf edir, qısa müddətdə xalqımız öz müstəqil dövlətinin bütün atributlarını Heydər Əliyevin rəhbərliyi ilə qura bildi. Heydər Əliyevin müəyyənləşdirdiyi siyasət nəticəsində hüquqi-demokratik dövlət quruldu. Bütövlükdə, dövlət müstəqilliyimizi təmin edə biləcək işlək mexanizm yaradıldı. Onun fikrincə, Azərbaycan xalqının bu gün qarşısında duran əsas vəzifə Ümummilli liderimizin bizə ərməğan etdiyi dövlətimizi qorumaq, yaşatmaq və gələcək nəsillərə ötürməkdən ibarətdir: “Nə yaxşı ki, Ulu öndərimizin Azərbaycan üçün gördüyü işlər Onun varisi olan cənab İlham Əliyev rəhbərliyi ilə 10 ildir ki, davam edir. Prezident İlham Əliyev təkcə Heydər Əliyevin siyasi məktəbinin deyil, bütövlükdə həyat məktəbinin yetirməsidir. Son 10 ilin nailiyyətləri sübut edir ki, Ulu öndərimizin müstəqil Azərbaycanın gələcəyi üçün bütün nəzərdə tutduğu işlər böyük uğurla həyata keçirilir. Bu gün hər bir vətəndaşımız ölkəmizin uğurlarından qürur duyur. Qazanılan nailiyyətlər xalqımızı daha böyük qələbələrə, zəfərlərə ruhlandırır”.

Çıxış edən Azərbaycan Tibb Universitetinin rektoru, akademik, millət vəkili Əhliman Əmiraslanov Ulu öndər Heydər Əliyevin gördüyü işlərin miqyasının çox böyük olduğunu deyib. Onun fikrincə, “Heydər Əliyev mənim həyatımda” ikicildlik kitabı bu tarixi şəxsiyyətin həyat və fəaliyyətinin geniş ictimaiyyətə çatdırılması baxımından zəngin mənbədir. Ə.Əmiraslanov Heydər Əliyev haqqında xatirələrini danışaraq Ümummilli liderimizin Azərbaycan elminin və təhsilinin himayədarı olduğunu, bu sahədə çalışanlara, xüsusilə, səhiyyə işçilərinə həmişə diqqət və qayğı göstərdiyini xatırladıb. Akademik bildirib ki, adı tarixdə əbədiləşən dünyaşöhrətli siyasətçi Heydər Əliyevin ölkəmizin dövlət müstəqilliyi bərpa edildikdən sonra iki dəfə ATU-da olması, müəllim və tələbələr qarşısında proqram xarakterli çıxışı və gələcək həkimlərə dəyərli məsləhətlər verməsi universitetin tarixində silinməz izlər qoyub. Ə.Əmiraslanov diqqətə çatdırıb ki, Ulu öndərin səyi nəticəsində 1998-ci ildə ATU-nun 11 mərtəbəli yeni tədris binası tikilib istifadəyə verilib. Azərbaycanda səhiyyənin inkişafı, universitetin maddi-texniki bazasının möhkəmləndirilməsi və ölkəmizdə tibb kadrlarının hazırlanması məhz Ulu öndərin adı ilə bağlıdır.

ATU-nun stomatoloji və onkoloji klinikalarının, Ümummilli lider Heydər Əliyevin böyük qayğısı sayəsində yaradıldığını diqqətə çatdıran akademik vurğulayıb ki, Onun layiqli davamçısı Prezident İlham Əliyevin dəstəyi ilə inşa olunmuş universitetin çoxprofilli terapevtik klinikası ən müasir avadanlıqla təchiz olunaraq əhaliyə dünya standartlarına uyğun səviyyədə tibbi xidmət göstərir. Ulu öndərin müəyyənləşdirdiyi siyasətin Prezident İlham Əliyev tərəfindən uğurla davam etdirildiyini vurğulayan Ə.Əmiraslanov bildirib ki, bu siyasət dövlətimizi gələcək nailiyyətlərə doğru aparır.

AMEA-nın vitse-prezidenti, akademik İsa Həbibbəyli isə Ümummilli lider Heydər Əliyevin Azərbaycan dövlətinin rəmzi olduğunu vurğulayıb. Müstəqil Azərbaycanın Heydər Əliyevin şah əsəri olduğunu deyən İ.Həbibbəylinin sözlərinə görə, müasir Azərbaycanın inkişafı Heydər Əliyev siyasətinin nəticəsidir. “Ümummilli lider Heydər Əliyev ölkəmizin inkişafına özünün müdrik, cəsarətli siyasəti, yorulmaz fəaliyyəti ilə nail olub. Təqdimatına toplaşdığımız bu kitabda Ulu öndər Heydər Əliyevin bütöv fəaliyyətini göstərməyə çalışır”. İ.Həbibbəyli bildirib ki, görkəmli dövlət xadimi Heydər Əliyev Azərbaycan tarixində ilk dəfə olaraq ölkəmizdə azərbaycançılıq ideyasını dövlətin siyasi ideologiyası səviyyəsinə qaldırıb: “Azərbaycan və azərbaycançılıq anlayışları qədim tarixə malik olsalar da, uzun əsrlər boyu yalnız coğrafi yer adı kimi işlədilib, son yüzillikdə həm də milli ideya olaraq formalaşıb. Azərbaycançılığın dövlət siyasətində milli ideologiyaya çevrilməsi Ümummilli liderimiz Heydər Əliyevin Azərbaycan xalqı qarşısındakı böyük tarixi xidmətlərindən biridir. Azərbaycanda milli birlik və həmrəylik ideyasının həyata keçirilməsi də azərbaycançılıq idealına xidmətin ifadəsidir. Azərbaycan dili kimi Azərbaycan xalqı anlayışının da ölkəmizdə bərqərar olması müstəqil dövlətin daxili sabitliyinin təmin edilməsinə, tolerantlıq mühitinin formalaşdırılmasına xidmət edir. Heydər Əliyevin Azərbaycan xalqı anlayışı azərbaycançılıq prinsiplərinin ölkəmizdəki bütün etnik qruplar tərəfindən vahid prinsip kimi qəbul edilməsinə imkan yaradan müdrik bir dövlətçilik təlimidir”.

AMEA-nın Tarix İnstitutunun direktoru, Milli Məclisin deputatı Yaqub Mahmudov çıxışında Ulu öndər Heydər Əliyevi Azərbaycan dövlətinin və xalqının xilaskarı kimi səciyyələndirib. Onun sözlərinə görə, Heydər Əliyev zəngin irsinin bundan sonra da dərindən öyrənilməsinə ehtiyac var. Bu məqsədlə, AMEA-nın Tarix İnstitutunda “Əliyevşünaslıq” şöbəsinin yaradıldığını deyən Y.Mahmudov Ulu öndər haqqında bir neçə kitab yazdığını da xatırladıb. “Azərbaycan tarix boyu bir çox sınaqlarla üz-üzə qalıb. Bu sınaqlardan uğurla çıxmaq üçün daim güclü liderə ehtiyac yaranıb. Heydər Əliyev elə bir şəxsiyyətdir ki, proseslərin önündə gedərək bütün sınaqlardan şərəflə çıxıb” - deyə, o qeyd edib. Y.Mahmudov dünyanın tarixi şəxsiyyətləri arasında Ulu öndər Heydər Əliyevin ön sırada olduğunu bildirib. “Dünyada bir sıra tarixi şəxsiyyətlər var. Amma Heydər Əliyev həmin tarixi şəxsiyyətlərin zirvəsində dayanır”, - deyən millət vəkili Heydər Əliyevin adının Azərbaycan tarixinə xalqımızın xilaskarı kimi düşdüyünü vurğulayıb. Y.Mahmudovun sözlərinə görə, tarixin bütün dönəmlərində Ulu öndər Azərbaycan xalqına şərəflə xidmət edib, dövlətimizin inkişafı üçün misilsiz fəaliyyət göstərib.

“Ümummilli lider Heydər Əliyevin gücünü və qüdrətini sübut edən amillərdən biri də iki bir-birinə zidd olan sistemdə uğurla fəal göstərməsidir. Həm sovetlər hakimiyyəti, həm də müstəqillik dövründə Heydər Əliyev yalnız Azərbaycan xalqının tərəqqisini, inkişafını düşünüb və bu yolda yorulmadan çalışıb. Sovetlər dönəmində Ulu öndərimizin Azərbaycan xalqının milli şüurunun formalaşmasında və oyanışında da rolu əvəzedilməzdir” - deyə o, vurğulayıb. Y.Mahmudovun fikrincə, təqdimatı keçirilən kitab Ulu öndər Heydər Əliyevin böyüklüyünü göstərən ciddi bir mənbədir.

“Azərbaycan” qəzetinin baş redaktoru, Milli Məclisin deputatı Bəxtiyar Sadıqov isə çıxışında bildirib ki, bu kitab Ulu öndər Heydər Əliyevə sonsuz hörmət və ehtiramın ifadəsidir. Heydər Əliyevin qeyri-adi, xarizmatik şəxsiyyət olduğunu deyən B.Sadıqovun sözlərinə görə, Heydər Əliyevin siyasi kursu daim Azərbaycanın inkişafını təmin edəcək. O bu layihənin meydana gəlməsinin tarixindən də danışaraq deyib ki, gələcək illərdə də Ulu öndər Heydər Əliyev həsr olunmuş kitablar nəşr olunacaq.

Nardar BAYRAMLI

Yeni Azərbaycan.- 2013.- 4 may.- S.5.