Azərbaycan-Avstriya əlaqələri bütün sahələr üzrə inkişaf edir

İki ölkə arasında çoxşaxəli və yüksək səviyyəli münasibətlər mövcuddur

Xəbər verildiyi kimi, aprelin 1-də Azərbaycan Respublikası Milli Məclisinin sədri Oqtay Əsədov ölkəmizdə səfərdə olan Avstriya Milli Şurasının nümayəndə heyəti ilə görüş keçirib. Görüşdə Oqtay Əsədov qədim tarixə malik olan Azərbaycan-Avstriya münasibətlərinin inkişafının məmnunluq doğurduğunu söyləyib. Əlaqələrimizin inkişafında hər iki ölkənin prezidentlərinin rolunu xüsusi vurğulayan Oqtay Əsədov deyib ki, yüksək səviyyəli qarşılıqlı səfərlər və görüşlər zamanı aparılan danışıqlar, imzalanmış sənədlər hərtərəfli əməkdaşlığın genişlənməsi üçün möhkəm hüquqi baza yaradıb.

Milli Məclisin sədri dövlətlərarası münasibətlərin inkişafında parlamentlərin rolunu xüsusi vurğulayıb. Son 10 ildə Azərbaycanda bütün sahələrdə müşahidə olunan sürətli inkişafdan söhbət açan O.Əsədov ölkəmizin Avropaya inteqrasiyası sahəsində çox mühüm işlərin görüldüyünü diqqətə çatdırıb.

Ermənistan-Azərbaycan, Dağlıq Qarabağ münaqişəsindən bəhs edən sədr beynəlxalq ictimaiyyətin bu problemin həlli istiqamətində daha ciddi səy göstərməsinin vacibliyini vurğulayıb. O, bildirib ki, BMT Təhlükəsizlik Şurasının münaqişənin həlli ilə bağlı qəbul etdiyi 4 qətnaməyə məhəl qoymayan Ermənistan torpaqlarımızın 20 faizini işğal altında saxlayır. Buna baxmayaraq, işğalçı dövlətə heç bir sanksiya tətbiq edilmir.

Avstriya Milli Şurasının ikinci prezidenti Karlheinz Kopf səfər zamanı nümayəndə heyətinə göstərilən yüksək qonaqpərvərliyə görə minnətdarlığını bildirib. O, qeyd edib ki, xalqlarımız arasında əlaqələrin qədim tarixi vardır və münasibətlərimizin bu gün də bütün sahələrdə inkişaf etməsi çox sevindiricidir.

Qonaq Azərbaycanın qısa müddətdə bu qədər nailiyyət qazanmasını yüksək qiymətləndirib və Avropaya inteqrasiya istiqamətində ölkəmizə daim dəstək göstərməyə hazır olduqlarını söyləyib. Görüşdə qarşılıqlı maraq doğuran məsələlər ətrafında fikir mübadiləsi aparılıb.

Qeyd etmək yerinə düşər ki, iki ölkə arasında sıx münasibətlər mövcuddur. Xatırladaq ki, Avstriya Azərbaycanın müstəqilliyini 1992-ci ildə tanıyıb. 1995-ci ilin sentyabrında Azərbaycanın Avstriyada səfirliyi açılıb. Avstriyanın Bakıdakı səfirliyi isə 23 iyun 2010-cu ildən etibarən fəaliyyət göstərir. Azərbaycanla Avstriyanın çoxşaxəli xarakterli qarşılıqlı faydalı əməkdaşlığını uğurlu edən başlıca strateji əsaslardan biri məhz hər iki ölkənin beynəlxalq müstəvidə bir-birinə dəstək olmasıdır.

Dövlət rəhbərlərinin qarşılıqlı səfərləri də münasibətlərin inkişafına xüsusi təkan verib. Belə ki, 2000-ci ilin iyul ayında Ümummilli lider Heydər Əliyev bu ölkədə səfərdə olub. 2011-ci ilin oktyabrında isə Avstriya Prezidenti Haynts Fişer Azərbaycanda rəsmi səfərdə olub.

2013-cü il mayın 12-14-də Azərbaycan Respublikasının Prezidenti İlham Əliyevin Avstriyaya səfəri iki dövlət arasında münasibətlərin inkişafı baxımından böyük əhəmiyyət kəsb edir. Səfər çərçivəsində dövlətimizin başçısı bir sıra görüşlər keçirib. Görüşlərdə ikitərəfli münasibətlərin inkişafından məmnunluq ifadə olunub, iqtisadi əməkdaşlığın genişləndirilməsi üçün yaxşı potensialın olduğu bildirilib.

Aparılan müzakirələrdə Ermənistan - Azərbaycan, Dağlıq Qarabağ münaqişəsi xüsusilə diqqət mərkəzində olub. Avstriya Prezidenti Haynts Fişer bildirib ki, ölkə başçıları tərəfindən imzalanmış Bəyannamədə Ermənistan-Azərbaycan, Dağlıq Qarabağ münaqişəsinin beynəlxalq hüququn prinsiplərinə uyğun olaraq sülh yolu ilə həllinin vacibliyi qeyd edilir. O, uzun illərdir həllini tapmayan Ermənistan-Azərbaycan, Dağlıq Qarabağ münaqişəsinin ölkəmiz üçün qəbul ediləcək həlli variantına nail olunacağına əminliyini bildirib.

Prezident İlham Əliyev isə vurğulayıb ki, münaqişə beynəlxalq hüququn normaları, beynəlxalq təşkilatların qərarları və qətnamələri əsasında həll olunmalıdır: “Onların arasında mən erməni qoşunlarının Azərbaycan ərazilərindən dərhal və qeyd-şərtsiz çıxarılmasını tələb edən BMT Təhlükəsizlik Şurasının 4 qətnaməsini xüsusilə qeyd etmək istəyirəm. Əfsuslar olsun ki, 20 ildir bu qətnamələr yerinə yetirilmir, işğal davam edir. Bir milyondan artıq azərbaycanlı qaçqın və məcburi köçkün vəziyyətinə düşmüş, etnik təmizləmə siyasətinə və soyqırımına məruz qalmışdır. Əfsuslar olsun ki, ATƏT-in Minsk qrupuna həmsədrlik edən ölkələrin prezidentlərinin status-kvonun qəbulolunmazlığı barədə verdikləri bəyanatlara Ermənistanda məhəl qoymurlar. Status-kvonun dəyişilməsi, Azərbaycan ərazilərinin işğaldan azad edilməsinin başlanğıcı deməkdir. Fikrimcə, bu, nə qədər tez baş verərsə, danışıqlar prosesi daha sürətlə gedər və danışıqlar prosesində müşahidə olunan mühit mənfidən müsbətə doğru dəyişə bilər. Azərbaycan ərazilərinin dərhal işğaldan azad edilməsinin başlanması bizim gözlədiyimiz məsələdir. Ümidvarıq ki, beynəlxalq ictimaiyyət bu istiqamətdə daha fəal rol oynayacaqdır”.

Səfər zamanı iki ölkə arasında iqtisadi əməkdaşlıq məsələləri də geniş müzakirə olunub. Avstriyanın iqtisadi sahədə tanınmış şirkətlərinin rəhbərləri dövlətimizin başçısı ilə görüşlərdə Azərbaycanda gedən iqtisadi inkişaf proseslərini yüksək qiymətləndirərək Azərbaycan ilə Avstriya arasında yüksək texnologiyalar, infrastruktur, kənd təsərrüfatı, əczaçılıq, turizm, informasiya-kommunikasiya texnologiyaları və digər sahələrdə əməkdaşlığın genişləndirilməsi və yeni sahələrin müəyyənləşdirilməsində maraqlı olduqlarını bildiriblər. Avstriyanın dövlət başçısı bildirib ki, əməkdaşlığımız üçün bir çox vasitələr mövcuddur. Onun sözlərinə görə, ticarət dövriyyəsinin göstəriciləri artır, ixrac-idxal əməliyyatları genişlənir: “Əlbəttə ki, müzakirələrimizin əsas mövzusu iqtisadi əməkdaşlığa da aid idi. Çox əlamətdar haldır ki, Bakıya səfərimdən, apardığımız danışıqlardan və Bakıdakı biznes forumdan 1 il sonra ölkələrimiz arasında ixrac, idxal əməliyyatları böyük həcmdə artmışdır. Bu, çox yaxşı göstəricidir. Biz bunun davam etdirilməsinə çalışırıq. Avstriya tərəfi şirkətlərinin tərtib etdiyi və müxtəlif sahələri və təklifləri əhatə edən siyahını Prezidentə və Onun əməkdaşlarına təqdim etdi. Burada neft, səhiyyə, texnologiyalar sahələrinə, yeni hava limanına, turizm sahəsindəki əməkdaşlığa dair təkliflər vardır. Dəmir yolları üçün avadanlıq, infrastruktur, mehmanxana işi, konsaltinq və digər məsələlər də öz əksini tapmışdır. Bizim bir çox ümumi layihələrimiz, bu cür layihələr üçün təkliflərimiz vardır. Bundan çox məmnunuq”.

Prezident İlham Əliyev ölkələrin iqtisadi sahədə əməkdaşlığının çox yaxşı nəticələrinin olduğunu vurğulayıb. Ticarət dövriyyəsinin artdığını deyən dövlət başçısı qeyd edib ki, hazırda bir çox Avstriya şirkətləri Azərbaycanda mühüm layihələri həyata keçirən podratçı qismində fəaliyyət göstərirlər: “Bu layihələr turizm infrastrukturuna, incəsənətə, memarlığa aiddir. Avstriya şirkətlərinin Azərbaycanda əla nüfuzu vardır. Onlar Azərbaycanın hazırda həyata keçirdiyi bir çox infrastruktur layihələrində bizə yardım edirlər”.

Dövlətimizin başçısı, həmçinin, deyib ki, Azərbaycan şirkətləri üçün sərmayə baxımından Avstriya çox cəlbedici ölkədir: “Dünyada ən şəffaf neft fondlarından olan Azərbaycan Dövlət Neft Fondu Avropada və ümidvarıq ki, Avstriyada sərmayə imkanlarını axtarır və sərmayə layihələrinə başlayır”.

Ötən il mayın 13-də Vyanada Avstriya-Azərbaycan biznes forumu da keçirilib. Azərbaycan Prezidenti İlham Əliyev və Avstriya Prezidenti Haynts Fişer biznes forumda iştirak ediblər. Forumda çıxış edən Avstriya İqtisadi Palatasının sədri Kristof Laytl deyib ki, qarşılıqlı əməkdaşlıq ruhlandırıcı tempdə inkişaf edir. O, Azərbaycanın inkişafını yüksək qiymətləndirib: “Əvvəlcə, cənab Prezident, Sizi ölkənizin son onillikdə əldə etdiyi uğurlar münasibətilə təbrik edirəm. Bu məqamda, atanızın ölkəmizə səfərini xatırlayırıq. 10 il öncə O, burada olmuşdur. O, buranı ziyarət etdi. Nümayəndə heyətinizin bəzi üzvləri Onunla gəlmişdilər. Ata Əliyevin səfərinin fotoları həmin anları bizə bir daha xatırladır.

Hesab edirəm ki, ölkənizdə bu siyasətin davam etdirilməsi biz avstriyalılar üçün də mühüm məsələdir. Çünki bu siyasət qarşılıqlı etimad və inam yaradır. İqtisadi qərarlar etimad və inama əsaslanır. Bu gün ölkənizdə müzakirə etdiyimiz və müzakirə edəcəyimiz bir çox layihələr mövcuddur. Ümid edirəm ki, çoxsaylı təmaslar qurulacaq və reallaşacaqdır”.

Xatırladaq ki, ötən ilin noyabr ayının 19-da da Azərbaycan Prezidenti İlham Əliyev Avstriyada səfərdə olub. Həmin gün Vyanada, “Hofburq” Prezident Sarayında Azərbaycan Respublikasının Prezidenti İlham Əliyev Avstriya Respublikasının Prezidenti Haynts Fişer ilə görüşüb. Görüşdə Azərbaycan ilə Avstriya arasında ikitərəfli münasibətlərin siyasi, iqtisadi və digər sahələrdə uğurlu inkişafından məmnunluq ifadə olunub. Əlaqələrimizin möhkəmləndirilməsi, iqtisadi əməkdaşlığın gücləndirilməsi üçün yaxşı potensialın olduğu vurğulanıb, münasibətlərin bundan sonra da genişləndirilməsinə əminlik bildirilib. Söhbət zamanı ikitərəfli münasibətlər, Ermənistan-Azərbaycan, Dağlıq Qarabağ münaqişəsi və qarşılıqlı maraq doğuran digər məsələlər ətrafında fikir mübadiləsi aparılıb.

Nəticə etibarilə, beynəlxalq əməkdaşlığa fundamental töhfələr verən Azərbaycan-Avstriya münasibətləri qarşılıqlı-faydalı səciyyə daşımaqda və perspektiv üçün optimist proqnozlar ifadə etməyə imkan verməkdədir.

Pərviz SADAYOĞLU

Yeni Azərbaycan.-2014.- 3 aprel.- S.8.