Qaradağ rayonunun sosial-iqtisadi inkişafı:

real vəziyyət və perspektivlər

“Müasir Bakı: Gələcəyin başlandığı şəhər”. Məşhur ukraynalı fotoqraf və səyyah Aleksandr Çebanın paytaxtımız haqqında təqdimatı bu ifadələrdə öz əksini tapıb. Koreya Respublikasında nəşr olunan nüfuzlu “İmazine” jurnalında isə paytaxtımız oxucularına orta əsrlərə aid gözəl qalaları, küçələri ilə tanınan, həmçinin çoxlu sayda hündür müasir binaları olan əsl Avropa şəhəri kimi təqdim olunub. “Moskovski komsomolets” qəzetinin müxbiri Janna Qolubitskayaya görə isə Bakı Şərq ilə Qərbin heyrətamiz və çox uğurlu sintezidir. Əlbəttə, paytaxtımız Bakı haqqında bu qəbildən olan gözəl ifadələrin sayını kifayət qədər artırmaq olar. Çünki Bakı paytaxtımıza qonaq gələn hər kəsi özünə valeh edir. Bakıda olub, bu qədim, eyni zamanda, müasir şəhəri sevməmək, ona heyran olmamaq mümkün deyil. Və Bakı dünyadakı bugünkü imicini və statusunu çox yox, cəmi bir neçə ildə qazanıb. Bakı həm də simvoldur: Azərbaycan dövlətinin inkişaf simvolu.

Qaradağ rayonu Azərbaycanın güclü sənaye mərkəzinə çevrilir

Şübhə yoxdur ki, Azərbaycanın, o cümlədən, paytaxt Bakının inkişafı həyata keçirilən məqsədyönlü siyasətin nəticəsidir. Prezident İlham Əliyevin rəhbərliyi ilə uğurla reallaşdırılan regionların sosial-iqtisadi inkişafı üzrə Dövlət proqramları, həmçinin, Bakı şəhərinin və onun qəsəbələrinin sosial-iqtisadi inkişafına dair Dövlət proqramlarının uğurla icrası paytaxtımızda və onun rayonlarında sıçrayışlı inkişafı şərtləndirib. Paytaxtın ən böyük rayonu olan Qaradağ rayonu da son illərdə böyük inkişaf yolu keçib. Kifayət qədər geniş sənaye potensialı olan rayonun iqtisadi göstəriciləri də qarşıya qoyulan hədəflərin uğurla reallaşdırıldığını və Qaradağın ölkəmizin dinamik inkişafında öz üzərinə düşən vəzifələrin öhdəsindən layiqincə gəldiyini göstərir. Məqsədyönlü tədbirlər nəticəsində Qaradağ artıq respublikanın mühüm sənaye mərkəzlərindən birinə çevrilib. Heç də təsadüfi deyil ki, Prezident İlham Əliyev də Qaradağ rayonundakı inkişafı yüksək qiymətləndirib, bu işlərin davamı üçün lazımi dəstəyin göstəriləcəyini bildirib. Dövlətimizin başçısı qeyd edib ki, Qaradağ rayonunun iqtisadi və sənaye inkişafı sürətli gedir: “Qaradağ rayonu Azərbaycanın güclü sənaye mərkəzinə çevrilir. Burada yaradılan müəssisələr və tikilməkdə olan zavodlar rayonun iqtisadi gücünü artıracaq, yeni iş yerlərinin açılmasına gətirib çıxaracaqdır”.

Qaradağ rayonunun statistik göstəriciləri kifayət qədər yüksəkdir

Dövlətimizin başçısının da vurğuladığı kimi, Qaradağ rayonunda görülən işlər rayonun iqtisadi gücünün artırılmasında öz ifadəsini tapıb. Elə bu səbəbdəndir ki, Qaradağ rayonunun statistik göstəriciləri kifayət qədər yüksəkdir. Qaradağ rayon İcra Hakimiyyəti başçısının müavini Elnur Qurbanov deyib ki, ötən doqquz ayın yekunlarına əsasən rayon üzrə sənaye məhsulunun ümumi həcmi 447,0 milyon manat, nəqliyyat sektorunda xidmətlərin həcmi 8,7 milyon manat olub. Onun sözlərinə görə, sosial-iqtisadi sahələrin inkişafı üçün bütün maliyyə mənbələri hesabına 403,7 milyon manat investisiyadan istifadə edilib. İstifadə olunmuş vəsaitin 312,3 milyon manatı tikinti-quraşdırma işlərinin yerinə yetirilməsinə sərf olunub: “İqtisadiyyatın aparıcı sahəsini təşkil edən neft və qaz sənayesi müəssisələrində 430,0 min ton xam neft və 653,3 milyon kubmetr təbii qaz hasil olunub. Rayon üzrə 1,4 milyon ton sement, 97,2 min ton mişar daşı istehsal edilib. Hesabat dövründə rabitə xidmətlərinin həcmi 1,7 milyon manat təşkil edib. Pərakəndə əmtəə dövriyyəsi 1,4 milyard manat, əhaliyə göstərilən pullu xidmətlər isə 84,7 milyon manat olub. Ötən dövr ərzində rayonumuzda orta aylıq əməkhaqqı 765,0 manat olub”.

Elnur Qurbanov vurğulayıb ki, rayonda əhalinin məşğulluq probleminin həlli üçün də əsaslı işlər görülüb. Əhalinin daimi iş yerləri ilə təmin olunması rayon rəhbərliyinin ən çox diqqət ayırdığı məsələlərdən biridir: “Ötən 9 ayda əhalinin məşğulluğunun artırılması və ehtiyacı olan işsiz vətəndaşların ixtisasına uyğun işlə təmin edilməsi istiqamətlərində rayon İcra Hakimiyyəti tərəfindən bir sıra məqsədyönlü işlər görülüb. Rayon Məşğulluq Mərkəzi ilə birgə əhalinin məşğulluğunu təmin etmək məqsədi ilə mütəmadi olaraq qəsəbələrdə səyyar əmək yarmarkaları keçirib. Bundan əlavə, bp-Azərbaycan Şirkətinin təşkilatçılığı ilə Səngəçal qəsəbəsində həyata keçiriləcək yeni layihələrlə bağlı “Azfen”, “Tekfen” şirkətləri ilə birlikdə Sahil qəsəbəsində işə qəbulla əlaqədar mütəmadi tədbir keçirilir”.

Rayonda yeni istifadəyə verilən, o cümlədən, hazırda tikintisi davam edən müəssisələr eyni zamanda, işsizlik probleminin həllində də mühüm rol oynayır. Belə ki, hazırda Ələt qəsəbəsində Beynəlxalq Dəniz Limanının inşası uğurla davam etdirilir. Puta qəsəbəsində Metanol zavodunun tikintisi başa çatıb və açılışa hazır vəziyyətdədir. Zavod nəinki respublikamızda, eləcə də Cənubi Qafqazda ən nəhəng özəl müəssisələrdən biri sayılır. Rayonun Səngəçal qəsəbəsi ərazisində Neft-Qaz Emalı və Neft-Kimya Kompleksinin salınması üçün 1875 hektar yer ayrılıb (ümumi sahəsi 3850 hektar). Bu kompleksdə təqribən 2000 nəfər işlə təmin olunacaq. Bu ərazidə yeni yaşayış massivləri salınacaq, parklar, otellər, idman meydançaları, mədəni istirahət yerləri və digər yeni sosial obyektlər inşa ediləcək, əhalinin yaşayışı üçün yüksək səviyyəli müasir standartlara uyğun şərait yaradılacaq.

Əhalinin və sosial obyektlərin enerji daşıyıcıları və kommunal xidmətlərlə təminatının yaxşılaşdırılması istiqamətlərində də xeyli işlər görülüb. Əhalinin elektrik enerjisi, qaz və içməli su ilə fasiləsiz təminatı məqsədilə əlaqədar qurumlar və rayon rəhbərliyi tərəfindən müxtəlif işlər görülüb, artıq köhnəlmiş xətlər yenilənib, xidmət səviyyəsinin yüksəldilməsi diqqət mərkəzində saxlanılıb.

Vətəndaşların rifahını xarakterizə edən keyfiyyət göstəriciləri əhəmiyyətli dərəcədə yaxşılaşıb

Qaradağ rayonunun inkişaf səviyyəsi mütəxəssislər tərəfindən də yüksək qiymətləndirilir. Yeni Azərbaycan Partiyası (YAP) Qaradağ rayon təşkilatının sədri, partiyanın İqtisadi məsələlər komissiyasının sədr müavini Aydın Hüseynov isə deyib ki, son illər Azərbaycanın paytaxtı Bakı şəhəri, o cümlədən, bütün regionları yüksək inkişaf yolu keçib. Onun sözlərinə görə, ötən 10 ilin təcrübəsi göstərir ki, ölkənin sosial-iqtisadi inkişafında prioritet kimi müəyyən edilmiş və neft-qaz gəlirlərindən səmərəli istifadə etməklə regional tarazlığın təmin edilməsində regional inkişaf üzrə Dövlət proqramları mühüm rol oynayıb. İcrası başa çatmış iki Dövlət Proqramı çərçivəsində Azərbaycanın iqtisadi qüdrəti daha da yüksəlib, ölkədə işgüzar fəallıq artıb, regionlarda sahibkarlıq fəaliyyəti daha da genişlənib, geniş və ölkənin bütün coğrafi hüdudlarını əhatə edən iri infrastruktur layihələri həyata keçirilib.

Aydın Hüseynovun sözlərinə görə, bu müsbət inkişaf dinamikası Qaradağ rayonunda da özünü göstərir. Belə ki, rayonda həyata keçirilən uğurlu tədbirlər nəticəsində istehsal sahələrinin dinamik və effektiv fəaliyyəti təmin olunub, sənaye potensialı əsaslı şəkildə gücləndirilib: “Rayonda ən müasir texnologiyaların tətbiq olunduğu və beynəlxalq tələblərə cavab verən rəqabətqabiliyyətli və ixracyönümlü məhsullar istehsal edən yeni müəssisə və obyektlər yaradılıb. İstehsal müəssisələrində işlə təmin olunan vətəndaşların rifahını xarakterizə edən keyfiyyət göstəriciləri əhəmiyyətli dərəcədə yaxşılaşıb. Rayonda çox geniş infrastruktur şəbəkəsi yaradılıb, yeni müasir tipli müəssisələr, xidmət obyektləri, istirahət və yaradıcılıq guşələri, parklar, səhiyyə, təhsil, idman qurğuları və s. həm rayonun inkişafına töhfələr verir, həm də vətəndaşların güzəranının daha da yaxşılaşmasında ifadə olunur”.

Məqsədyönlü siyasət, ardıcıllıq və prinsipiallıq nailiyyətlərin təminatıdır

Qeyd olunduğu kimi, rayonun sosial-iqtisadi sahədə əldə etdiyi nailiyyətlər digər sferalarda da işin səmərəli təşkilini təmin edir. O cümlədən, rayonun ictimai həyatında pozitiv hadisələr qeydə alınır. Qaradağ sakinləri ümumrayon və ümumrespublika tədbirlərində fəallıq göstərir, dövlət gənclər siyasətinin layiqincə həyata keçirilməsi, yeniyetmə və gənclərlə işin təkmilləşdirilməsi rayon İcra Hakimiyyətinin diqqət mərkəzindədir. Həmçinin, əlamətdar günlərlə bağlı keçirilən tədbirlərə sakinlərin marağı yüksəkdir. Musiqi məktəbləri və mədəniyyət işçilərinin, yaradıcı kollektivlərin iştirakı ilə Novruz bayramı, Gül bayramı və Milli Qurtuluş Günü ilə əlaqədar rayonda maraqlı tədbirlər təşkil olunub. Respublikamızın bütün bölgələrində olduğu kimi, Qaradağ rayonunda da 18 yaşından yuxarı əhalinin tibbi müayinədən keçirilməsi tədbirləri uğurla başa çatdırılıb, rayon məktəbliləri “Ölkəmizi tanıyaq” devizi altında keçirilən tur aksiyaya fəal qoşulublar.

Ölkəmizdə ekoloji siyasətin uğurla reallaşdırılması məqsədilə görülən işlərə Qaradağ sakinləri də dəstək verir, iməcilik və yaşıllaşdırma aksiyalarına qoşulurlar. 2014-cü ilin doqquz ayında rayon ərazisində ümumilikdə 42 min 621 kv.metr ot və yaşıllıq sahələri salınıb, 10 mindən artıq gül, 12 mindən artıq müxtəlif növ ağac və bəzək kolları əkilib.

Beləliklə, məqsədyönlü siyasət, ardıcıllıq və prinsipiallıq Qaradağ rayonunda əldə olunmuş yüksək nailiyyətlərin təminatçısıdır. Görülən işlər isə bir daha bu reallığı ortaya qoyur ki, ölkəmizin ən böyük sənaye mərkəzlərindən biri olan Qaradağı yaxın gələcəkdə daha parlaq gələcək gözləyir.

Aqşin ŞAHİNOĞLU,

“Qaradağ rayon İcra Hakimiyyəti və Azərbaycan Respublikasının

Prezidenti yanında Kütləvi İnformasiya Vasitələrinin İnkişafına Dövlət

Dəstəyi Fondunun birgə keçirdiyi

müsabiqəyə təqdim etmək üçün”

Yeni Azərbaycan.- 2014.- 4 dekabr.- S.15.