Azərbaycan inkişaf edən əməkdaşlıq məkanı kimi öz mövqeyini daha da gücləndirib

Azərbaycanın xarici işlər naziri Elmar Məmmədyarov 2014-cü ilin yekunları ilə bağlı AzərTAc-a və bir sıra digər yerli və xarici informasiya agentliklərinə müsahibə verib. Müsahibəni təqdim edirik.

- 2014-cü ildə Azərbaycanın xarici siyasətini, onun təməl prinsiplərini və prioritetlərini necə səciyyələndirərdiniz?

- Azərbaycanın diplomatik xidmət orqanları rəhbərlərinin 2014-cü il iyulun 7-də keçirilmiş beşinci müşavirəsində çıxış edən Prezident İlham Əliyev ölkəmizin xarici siyasətinin prinsipial və ardıcıl surətdə aparıldığını və Azərbaycan diplomatiyasının inkişaf dövrünü yaşadığını qeyd edərək, qarşıda yeni vəzifələr qoyub.

Ölkə rəhbərliyi tərəfindən müəyyən edilmiş strateji xəttə və milli maraqlarımıza uyğun olaraq, Xarici İşlər Nazirliyi 2014-cü il ərzində də beynəlxalq arenada müstəqil, fəal və çevik xarici siyasət kursumuzun yürüdülməsini təmin edib ki, onun da əsasını xüsusilə son onillik ərzində Azərbaycanın siyasi, iqtisadi və sosial sahələrdə əldə etdiyi nailiyyətlər təşkil edir.

Beynəlxalq hüququn norma və prinsipləri, BMT Nizamnaməsi əsasında xarici siyasətini həyata keçirən Azərbaycan dövlətlərarası davranışlarda da daim qanunun aliliyi və dövlətlər tərəfindən öz öhdəliklərinə riayət edilməsi kimi məsələləri təşviq edib. Bu siyasətin nəticəsidir ki, Azərbaycan dünyada etibarlı tərəfdaş kimi qəbul olunur və ölkəmizlə sıx əməkdaşlıq etmək niyyətində olan tərəfdaşların sayı artır.

Geridə qoymaqda olduğumuz ildə beynəlxalq münasibətlər sistemi ziddiyyətlər və hərbi-siyasi bloklara bölünmə kimi meyillərin dərinləşməsi, Ermənistanın Azərbaycana qarşı hərbi təcavüzündən irəli gələn təhlükələrlə bərabər, Azərbaycana yaxın regionlarda yeni münaqişə ocaqlarının yaranması, terrorun və transmilli təhdidlərin vüsət alması ilə xarakterizə olunub.

Belə bir təlatümlü şəraitdə ölkəmizin müstəqilliyi və suverenliyinin qorunması, Ermənistanın təcavüz və işğalının nəticələrinin aradan qaldırılması və ərazi bütövlüyümüzün təmin edilməsi, ölkəmizə qarşı xaricdən olan hədə və təhdidlərin siyasi-diplomatik vasitələrlə qarşısının alınması, iqtisadi maraqlarımız, enerji və nəqliyyat strategiyamızın təşviq edilməsi, ölkəmizin həqiqətlərinin dünyaya çatdırılması, mədəni və humanitar diplomatiya, Azərbaycan vətəndaşlarının hüquqlarının xaricdə qorunması və xaricdəki Azərbaycan diasporu ilə əlaqələr xarici siyasi fəaliyyətimizin əsas prioritetləri kimi davam etdirilib.

İkitərəfli diplomatiya dünya dövlətləri ilə əlaqələrimizdə əsas əməkdaşlıq mexanizmi kimi inkişaf etdirilib. Ümumiyyətlə, ikitərəfli əlaqələrin fəlsəfəsinə və təməl prinsiplərinə uyğun olaraq, Azərbaycanın təcrübəsində hər hansı bir dövlətlə olan ikitərəfli əlaqələr digər dövlətlə mövcud ikitərəfli əlaqələrə təsir edə biləcək xarakter daşımır və bunların biri digərini tamamlayır.

Ermənistan istisna olmaqla, ikitərəfli diplomatiyada qonşu dövlətlərlə əlaqələr əsas diqqət mərkəzində olub. Bu gün Azərbaycan ilə qonşu dövlətlər arasında mehriban qonşuluq, bir-birinin daxili işlərinə qarışmamaq, bərabər hüquqlu, qarşılıqlı hörmət və faydalı əməkdaşlıq prinsipləri əsasında strateji əməkdaşlıq münasibətləri formalaşıb. Uğurlu ikitərəfli əməkdaşlıq modeli əsasında regional əməkdaşlıq və sabitliyin daha da inkişafına töhfə verən Azərbaycan-Gürcüstan-Türkiyə, Azərbaycan-İran-Türkiyə və Azərbaycan-Türkmənistan-Türkiyə üçtərəfli əməkdaşlıq formatları inkişaf etdirilir.

Coğrafiya, tarix, ənənələr və geosiyasət baxımdan Azərbaycanın xarici siyasətinin bir regionla məhdudlaşmadığı və Cənubi Qafqaz, Xəzər dənizi hövzəsi və Mərkəzi Asiya, Cənub-Şərqi Avropa, İslam dünyası, postsovet və Avratlantik məkan kimi ölçülərə malik olduğuna görə çoxistiqamətli xarici siyasət kursumuz Xəzər, Qara, Aralıq və Adriatik dənizi hövzələri boyunca inkişaf etdirilib. Ümid edirik ki, qarşıdan gələn illərdə Cənub-Cənub və Şərq-Qərb əməkdaşlıq istiqamətlərinə əlavə olaraq, Şimal-Cənub vektoru üzrə Baltik dənizi və İran körfəzi ölçülərində də xarici siyasətimiz daha da inkişaf edəcək.

Xüsusilə 2012-2013-cü illərdə BMT Təhlükəsizlik Şurasına qeyri-daimi üzvlüyümüzdən sonra xarici siyasətimizin coğrafi ölçülərinin daha da genişləndiyi və qlobal proseslərə təsir imkanlarının artdığını nəzərə alaraq, ikitərəfli əlaqələrimizin Latın Amerikası ilə bərabər, Asiya və Afrika istiqamətləri üzrə inkişafı üçün əlverişli imkanlar əldə edilib. Bu regionlarda yeni diplomatik təmsilçiliklərimizin yaradılması və həyata keçirilən qarşılıqlı səfərlər əlaqələrimizin gələcək inkişafının və mövqeyimizin möhkəmlənməsinin ciddi əsasını təşkil edir.

İkitərəfli və çoxtərəfli əsasda həyata keçirdiyimiz uğurlu siyasətin nəticəsidir ki, Bakı bu gün regional və hətta daha geniş çərçivədə biznes, mədəniyyət, idman mərkəzi kimi statusları ilə bərabər, qlobal problemlərin müzakirə olunduğu “diplomatik paytaxt” statusunu qazanmaqdadır. İl ərzində beynəlxalq təşkilatların xətti ilə Bakıda təşkil olunan tədbirlər, ikitərəfli və çoxtərəfli əsasda həyata keçirilən səfərlər bunu bir daha təsdiq edir.

Beləliklə, uğurlu daxili siyasətimizin davamı kimi müstəqil, prinsipial, çevik və ardıcıl xarici siyasətimiz milli maraqlarımıza xidmət edib, ətrafımızda cərəyan edən təlatümlü proseslərə baxmayaraq, Azərbaycan inkişaf edən və çiçəklənən əməkdaşlıq məkanı kimi öz mövqeyini daha da gücləndirib.

- Ermənistan-Azərbaycan, Dağlıq Qarabağ münaqişəsinin həlli istiqamətində cari il ərzində görülən işlər barədə məlumat verməyinizi xahiş edirik.

- Ermənistanın Azərbaycana qarşı təcavüz və işğalının nəticələrinin aradan qaldırılması və münaqişənin həlli qarşımızda duran prioritet vəzifədir. Münaqişənin həlli üçün aparılan danışıqlar prosesində mövqeyimizin əsasını Ermənistan qoşunlarının işğal olunmuş Azərbaycan ərazilərindən çıxarılması, münaqişənin fundamental əsasını təşkil edən işğal və təcavüzün aradan qaldırılması, azərbaycanlı qaçqın və məcburi köçkünlərin öz doğma yurdlarına qayıtmaları və Azərbaycanın ərazi bütövlüyü, suverenliyi və beynəlxalq səviyyədə tanınmış sərhədlərinin bərpa olunması təşkil edir. Azərbaycan Respublikasının ərazi bütövlüyünün münaqişənin həlli üzrə aparılan danışıqların predmeti olmadığı birmənalı şəkildə bütün görüşlərdə tərəf müqabillərimizin diqqətinə çatdırılıb. Mövqeyimizin siyasi və hüquqi əsasını beynəlxalq hüququn norma və prinsipləri, BMT Nizamnaməsi, BMT Təhlükəsizlik Şurasının qətnamələri və digər beynəlxalq təşkilatların qəbul etdikləri sənədlər təşkil edir.

Beynəlxalq ictimaiyyət tərəfindən münaqişənin həlli məhz sadaladığımız prinsiplər, xüsusilə Azərbaycan Respublikasının ərazi bütövlüyü, suverenliyi və beynəlxalq səviyyədə tanınmış sərhədləri çərçivəsində görülür. İl ərzində bu mövqenin gücləndirilməsi istiqamətində beynəlxalq təşkilatlar çərçivəsində ardıcıl işlər görülüb. Belə ki, sentyabrın 4-5-də NATO-nun Uelsdə keçirilmiş sammitinin yekun bəyanatında Alyansın üzv dövlətləri Azərbaycanın ərazi bütövlüyü və suverenliyinə dəstəklərini ifadə edərək, Cənubi Qafqazdakı münaqişələrin məhz bu prinsiplər əsasında həllini dəstəklədiklərini vurğulayıblar. Dövlətlərin ərazi bütövlüyü və ya siyasi müstəqilliyinə qarşı güc tətbiq etmək, yaxud güc tətbiq edərək hədələməyin qəbuledilməzliyi vurğulanıb və dövlətlərin beynəlxalq səviyyədə tanınmış sərhədlərinə hörmət edilməsinin vacibliyi qeyd olunub. İyunun 18-19-da Səudiyyə Ərəbistanı Krallığının Ciddə şəhərində keçirilmiş İslam Əməkdaşlıq Təşkilatının (İƏT) Xarici İşlər Nazirləri Şurasının Ciddə Bəyannaməsində Ermənistan-Azərbaycan, Dağlıq Qarabağ münaqişəsi ilə əlaqədar Azərbaycanın ədalətli mövqeyi ilə həmrəylik ifadə olunub, Ermənistanın Azərbaycana qarşı təcavüzü və işğal olunmuş ərazilərimizdə tarixi və mədəni irsimizin dağıdılmasını qınayan qətnamələr qəbul edilib. Mayın 28-29-da Qoşulmama Hərəkatının Əlcəzairdə keçirilmiş XVII xarici işlər nazirləri iclasının yekununda qəbul olunmuş “Yekun Əlcəzair Sənədi”ndə münaqişənin BMT Təhlükəsizlik Şurasının məlum qətnamələri və Azərbaycanın ərazi bütövlüyü, suverenliyi və beynəlxalq səviyyədə tanınmış sərhədləri daxilində danışıqlar yolu ilə həlli dəstəklənib. 120 dövlətin üzv olduğu Qoşulmama Hərəkatı BMT-dən sonra dünya miqyasında ən çox dövlətin təmsil olunduğu nüfuzlu beynəlxalq təsisatdır. Mayın 13-də Ər-Riyadda keçirilmiş Ərəb Dövlətləri Liqası - Mərkəzi Asiya - Azərbaycan Respublikası Əməkdaşlıq və İqtisadi Forumunun yekun Bəyannaməsində Ermənistan-Azərbaycan münaqişəsinin BMT Təhlükəsizlik Şurasının qətnamələrinə uyğun olaraq suverenlik və ərazi bütövlüyü prinsipləri əsasında həllinin vacibliyi bir daha vurğulanıb.

Bundan əlavə, münaqişənin həllinə dair bu məlum mövqe Türkdilli Dövlətlərin Əməkdaşlıq Şurası, Azərbaycan-Gürcüstan-Türkiyə və Azərbaycan-İran-Türkiyə üçtərəfli görüşlərinin yekun sənədlərində və ikitərəfli əsasda Azərbaycan ilə digər dövlətlərin birgə bəyanatlarında da öz təsbitini tapıb.

Ermənistan hər vəchlə münaqişənin məhz Azərbaycanın ərazi bütövlüyü, suverenliyi və beynəlxalq səviyyədə tanınmış sərhədləri daxilində həllinə çağıran sənədlərin qəbuluna mane olmağa çalışsa da, uğursuzluğa düçar olub.

Bəşəriyyətin üzləşdiyi ən dəhşətli faciələrdən biri olan Xocalı soyqırımının tanıdılması və anılması, Qarabağ həqiqətlərinin beynəlxalq ictimaiyyətin diqqətinə çatdırılması istiqamətində də bir sıra işlər görülüb. Belə ki, bu günə qədər Kolumbiya, Çexiya, Rumıniya, Serbiya, Honduras, Peru, Panama, Pakistan, Meksika, İordaniya, Bosniya və Herseqovina və Sudan parlamentlərində, Amerika Birləşmiş Ştatlarının 15 ştatında Xocalı soyqırımı rəsmən tanınıb, Azərbaycanın ərazi bütövlüyünə və suverenliyinə dəstək ifadə edilib, o cümlədən ölkəmiz bu dövlətlər tərəfindən etibarlı strateji tərəfdaş kimi qiymətləndirilib.

İşğal edilmiş ərazilərimizdə qanunsuz fəaliyyətin qarşısının alınması, xarici ölkələrin fiziki və hüquqi şəxslərinin bu fəaliyyətə cəlb olunmasına yol verilməməsi Xarici İşlər Nazirliyi, o cümlədən diplomatik nümayəndəliklərimiz tərəfindən diqqətdə saxlanılır və bu istiqamətdə həm ikitərəfli, həm də çoxtərəfli formatlarda zəruri addımlar atılmaqdadır.

- Azərbaycan Böyük sülh sazişi üzərində işləməyə hazır olduğunu dəfələrlə bəyan edib. Həmsədrlər də son bəyanatlarında sülh sazişi üzərində işə başlamağın tərəfdarı olduqlarını bildiriblər. Ermənistan tərəfinin bu məsələdə mövqeyi nədən ibarətdir? Sülh sazişi üzərində işə başlanması nə dərəcədə realdır?

- Azərbaycan və Ermənistan prezidentlərinin ATƏT-in Minsk qrupunun həmsədr ölkələrinin iştirakı ilə Rusiya Prezidenti Vladimir Putinin təşəbbüsü ilə 2014-cü il avqustun 10-da Soçidə, ABŞ dövlət katibi Con Kerrinin təşəbbüsü ilə sentyabrın 4-də Uelsdə və Fransa Prezidenti Fransua Ollandın təşəbbüsü ilə oktyabrın 27-də Parisdə keçirilmiş görüşlərində münaqişənin həllinə dair müsbət meyillər müşahidə olunub. Paris görüşündən sonra Fransa Prezidenti Fransua Olland münaqişə tərəfləri olan Ermənistanı və Azərbaycanı Böyük sülh sazişi üzərində işləməyə çağırıb. Dekabrın 4-də ATƏT-in Minsk qrupunun həmsədr ölkələri xarici işlər nazirləri səviyyəsində verdikləri bəyanatda da tərəfləri tezliklə sülh sazişi üzərində işləməyə çağırıblar. Azərbaycan sülh sazişi üzərində işləməyə hazır olduğunu qəti şəkildə bəyan edib.

Amma münaqişənin həlli istiqamətində müsbət meyillərin olduğunu görən Ermənistan danışıqlara xələl gətirmək və məqsədyönlü şəkildə vəziyyəti gərginləşdirmək üçün təxribata üz tutub. İyul ayında təmas xəttində baş verən hadisə, prezidentlərin Paris görüşündən sonra böyük sayda canlı qüvvə və hərbi texnika ilə Azərbaycanın işğal olunmuş ərazilərində genişmiqyaslı hərbi təlimin keçirilməsi Ermənistan tərəfindən təxribata hesablanmış addımlar idi. Öz doğma torpaqlarında ata-analarının qəbirlərini ziyarət edən soydaşlarımız Dilqəm Əsgərov və Şahbaz Quliyev Azərbaycan cəmiyyətinin həssas hisslərinə toxunmaq üçün zorakı yolla girov götürülüb, onların üzərində qondarma məhkəmə təşkil edilib, digər soydaşımız Həsən Həsənov isə vəhşicəsinə öldürülüb. Atəşkəs rejiminin Ermənistan tərəfindən intensiv şəkildə pozulması, qoşunların təmas xətti və Ermənistan-Azərbaycan sərhədi boyunca mülki əhalinin hədəfə alınması, işğal olunmuş ərazilərin demoqrafik tərkibinin dəyişdirilməsi kimi təxribatçı addımlar da davam etdirilib.

Azərbaycana qarşı törədilmiş işğal və təcavüz, qanlı etnik təmizləmə əməllərinə görə Ermənistan beynəlxalq hüquq və BMT Nizamnaməsi əsasında təcavüzkar dövlət kimi bütün meyarlar üzrə sanksiyaların tətbiq edilməli olduğu ölkədir. Təəssüf ki, Ermənistana münasibətdə indiyə qədər bu kimi tədbirlər görülməyib. Ermənistana qarşı vaxtında sanksiyalar tətbiq edilsəydi, onun Azərbaycana qarşı işğal və təcavüzü bu həddə çatmazdı və bir milyondan artıq azərbaycanlı qaçqın və məcburi köçkün vəziyyətinə düşməzdi. Danışıqlar prosesində Ermənistanın bəhanə və təxribatlarına son qoyması və konstruktiv mövqe tutması və nəhayət, sülh sazişi üzərində işə başlaması üçün ATƏT-in Minsk qrupu tərəfindən lazımı praktiki tədbirlər görülməli, o cümlədən Ermənistana sanksiyaların tətbiq edilməsi ciddi surətdə nəzərdən keçirilməlidir.

Münaqişənin həll edilməməsi regional sülh və təhlükəsizlik üçün ən böyük təhdiddir və buna görə işğalçı dövlət kimi bütün məsuliyyət Ermənistanın üzərinə düşür. Münaqişənin sülh yolu ilə həllinə nail olmaq üçün ilk növbədə Ermənistan silahlı qüvvələri işğal olunmuş Azərbaycan ərazilərindən çıxarılmalıdır.

- 2014-cü ildə Azərbaycanın BMT ilə əməkdaşlığı və qlobal proseslərdə iştirakı ilə bağlı nə deyə bilərsiniz?

- Çoxtərəfli diplomatiyamızın əsasını təşkil edən beynəlxalq təşkilatlarla fəal iş aparılıb və bu sırada BMT-dəki fəaliyyətimiz xüsusi əhəmiyyət kəsb edib.

BMT Baş Məclisinin 2015-ci ildən sonrakı dövr üçün dünya qarşısında duran yeni inkişaf məqsədlərinin müəyyən edilməsi mövzusuna həsr edilən 69-cu sessiyasının ümumi müzakirələr hissəsində Azərbaycan çıxış edib və qlobal inkişaf baxımdan öz baxışlarını təqdim edib.

2000-ci ildə keçirilmiş minillik sammitində dövlətlər tərəfindən 2015-ci ilə qədər həyata keçirilməsi nəzərdə tutulan Minilliyin İnkişaf Məqsədləri müəyyən edilib.

2015-ci ildə BMT-nin yaranmasının 70-ci ildönümüdür. Bu, öz simvolik əhəmiyyəti ilə yanaşı, təşkilatın ötən 70 ildə əldə etdiyi uğurlara nəzər salmaq, həmçinin qarşıda duran vəzifələri müəyyənləşdirmək üçün də əlverişli imkan vəd edir. Beynəlxalq nizamın gələcəyi ilə bağlı BMT-nin məqsədlərinə bütöv şəkildə baxmaq lazımdır. Bu baxımdan, 70 illik yubiley prosesləri çərçivəsində sülh və təhlükəsizlik məsələləri ilə yanaşı, rifah və inkişaf məsələsinə də diqqət yetirilməsini vacib hesab edirik. Bu müfəssəl yanaşmadan çıxış edərək, hesab edirik ki, BMT çərçivəsində islahatlar məsələsi təkcə BMT Təhlükəsizlik Şurası ilə yekunlaşmamalı, bütövlükdə BMT sisteminin effektivliyi məsələsinə hərtərəfli şəkildə baxılmalıdır.

Sevindirici haldır ki, Azərbaycan Minilliyin İnkişaf Məqsədlərini çox qısa zamanda icra edib və ölkəmiz tamamilə yeni bir inkişaf mərhələsinə qədəm qoyub. Milli səviyyədə yüksək inkişafa nail olmuş Azərbaycan bu gün təşəbbüskarı və bilavasitə iştirakçısı olduğu irimiqyaslı layihələr vasitəsilə region və onun hüdudları boyunca əməkdaşlıq və inkişafa töhfə verir. Trans-Anadolu və Trans-Adriatik qaz kəmərləri, Trans-Avrasiya Super İnformasiya Magistralı (TASİM) və Bakı-Tbilisi-Qars kimi layihələr 2015-ci ildən sonra BMT tərəfindən dünya qarşısında müəyyən olunmuş inkişaf məqsədlərinə töhfə verə biləcək layihələrdir. Başqa sözlə desək, artıq Azərbaycan milli səviyyədə deyil, region və daha geniş çərçivədə BMT-nin inkişaf məqsədlərinə, qlobal inkişafa və sabitliyə töhfə verən dövlətdir.

Azərbaycanın multikulturalizm, dinlər və mədəniyyətlərarası dialoq nümunəsi olaraq əldə etdiyi nailiyyətlərin beynəlxalq səviyyədə təbliği istiqamətində BMT-nin Sivilizasiyalar Alyansı ilə qarşılıqlı faydalı əməkdaşlıq uğurla inkişaf etdirilməkdədir. Azərbaycanın bu istiqamətdə qlobal səviyyədə gördüyü işlərə verilən yüksək qiymətin təzahürü olaraq, 2014-cü il sentyabrın 26-da Alyansın Dostlar Qrupunun xarici işlər nazirləri səviyyəsində keçirilmiş iclasında BMT-nin Sivilizasiyalar Alyansının 7-ci Qlobal Forumunun 2016-cı ilin yazında Bakıda keçirilməsi haqqında qərar qəbul edilib. 2014-cü il oktyabrın 28-30-da Bakıda Gənclər Siyasəti üzrə I Qlobal Forum keçirilib. Bu Forum ölkəmizdə milli səviyyədə həyata keçirilən uğurlu gənclər siyasətinin bir nümunə kimi qlobal səviyyədə təşviqində mühüm rol oynayıb.

Qeyd olunanlarla yanaşı, Azərbaycan beynəlxalq sülh və təhlükəsizlik, terrorizmə qarşı mübarizə, tərksilah və yayılmama, ətraf mühit, davamlı inkişaf kimi qlobal məsələlərin müzakirəsində yaxından iştirak edib və öz töhfəsini verib.

- Müxtəlif ekspertlər tərəfindən Ermənistan-Azərbaycan, Dağlıq Qarabağ münaqişəsinin həllinin müqabilində Azərbaycanın Avrasiya İqtisadi Birliyinə üzvlüyü barədə fikirlər səsləndirilir. Bunu necə şərh edərdiniz?

- İlk növbədə, onu vurğulamaq istərdim ki, Azərbaycan Respublikasının ərazi bütövlüyü, suverenliyi və beynəlxalq səviyyədə tanınmış sərhədləri heç bir halda sövdələşmə obyekti ola bilməz.

Qeyd etdiyiniz inteqrasiya proseslərinə gəldikdə isə Azərbaycan hər bir dövlətin suveren qərarlarına hörmətlə yanaşır. Hazırda müstəqil siyasət yürüdən Azərbaycan Respublikası siyasi, iqtisadi və ticarət əlaqələrində ikitərəfli formata üstünlük verir və qarşılıqlı faydalı əməkdaşlıq baxımından bu da tam şəkildə özünü doğruldur. Ümumiyyətlə, hər hansı bir inteqrasiya prosesləri ilə əlaqədar bütün ölkə ictimaiyyətinin də qənaəti çox önəmlidir.

Azərbaycana haqqında bəhs olunan quruma üzvlük barədə rəsmi müraciət olmayıb və Azərbaycanın gündəliyində belə bir üzvlük məsələsi yoxdur.

- Azərbaycan-Rusiya əlaqələrinin davamlı surətdə inkişafı və intensiv qarşılıqlı səfərlər özünü göstərir. İki ölkə arasında əlaqələrin mövcud vəziyyətini necə qiymətləndirərdiniz?

- Azərbaycan ilə Rusiya arasında qarşılıqlı hörmət və faydalı əməkdaşlığa əsaslanan dost və mehriban münasibətlər var. Əlaqələrimizin əhatə dairəsinin genişliyi və buraya siyasi, iqtisadi, ticarət, hərbi və hərbi-texniki, qarşılıqlı investisiyalar, təhlükəsizlik və terrorizmə qarşı mübarizə, humanitar və digər sahələrin daxil olması olduqca məmnunedici haldır. Qonşu dövlət kimi Rusiya, eləcə də Azərbaycanın əsas ticarət tərəfdaşlarından biridir. Ticarət dövriyyəsinin hər il artım dinamikasını göstərməsi çox müsbət bir təzahürdür. Əlaqələrimizin inkişafında hökumətlərarası komissiya və xüsusilə Rusiya Federasiyasının regionları ilə əməkdaşlıq məsələsini xüsusilə qeyd etmək istəyərdim. 2011-ci ildən keçirilən Azərbaycan-Rusiya regionlararası forumunun beşincisi bu il iyunun 23-24-də Qəbələdə baş tutdu.

Azərbaycan-Rusiya əlaqələrinin xarakterik xüsusiyyətlərindən biri də humanitar əlaqələrdir. Bu sırada elm, təhsil, mədəniyyət əlaqələri, Rusiyanın mədəniyyət qruplarının Azərbaycana qastrol səfərləri, Azərbaycan mədəniyyətinin Rusiyada tanıdılması, tələbə mübadiləsi və xüsusilə insanlararası təmaslar qeyd edilməlidir. İkitərəfli əlaqələrimizin inkişaf dinamikasına uyğun olaraq, Azərbaycan və Rusiya arasında bütün səviyyələrdə qarşılıqlı səfərlərin intensivliyi bizi yalnız sevindirir.

- Azərbaycanın Avropa Şurası Nazirlər Komitəsinə sədrliyi, Avropa İttifaqı və digər təşkilatlarla əlaqələrini necə qiymətləndirirsiniz?

- Azərbaycan Respublikası 2001-ci ildə Avropa Şurasına üzv olduqdan sonra ilk dəfə 2014-cü il mayın 14-dən altı aylıq dövr üçün təşkilatın Nazirlər Komitəsində sədrlik edib. Sədrlik dövründə Azərbaycan Respublikası Avropa Şurasının fəaliyyətinin əsas sütunlarını təşkil edən insan hüquqları, qanunun aliliyi və demokratiyanın daha da inkişafı istiqamətində mühüm səylər göstərib, bu xüsusda qurumun üzv ölkələri və müxtəlif təsisatları ilə qarşılıqlı anlaşma şəraitində çalışıb.

Azərbaycan Respublikasının sədrliyinin prioritetləri Avropa Şurasının gündəliyində duran aktual məsələlər, üzv dövlətlərin üzləşdikləri təhdidlər, ölkəmizin müsbət təcrübəsi və fərqli üstünlükləri nəzərə alınmaqla, korrupsiyaya qarşı mübarizə, mədəniyyətlər və dinlərarası dialoq, sosial həmrəylik və sosial davamlılıq, gənclərin hüquqi maarifləndirilməsi kimi sahələr üzrə müəyyən edilmişdi. Həmin prioritetlərin dəstəklənməsi məqsədilə Azərbaycanda 18 mühüm beynəlxalq tədbir keçirilib.

Bərabərhüquqlu və qarşılıqlı maraqlara əsaslanan əməkdaşlıq prinsiplərinin təşviqi Azərbaycanın Avropa İttifaqı (Aİ) ilə münasibətlərinin özəyini təşkil edib. Şərq Tərəfdaşlığı və Aİ ölkələrinin Vilnüs Zirvə toplantısı, ondan sonrakı dövrdə imzalanmış ikitərəfli sənədlər, onların icrası istiqamətində aparılan iş Azərbaycanın Aİ ilə əməkdaşlığının əsas tərkib hissəsi olub. İşgüzar dairələr arasında əlaqələrin artırılması, turizmin genişləndirilməsi, xüsusən elm, təhsil və tədqiqatlar sahəsində çalışan Azərbaycan vətəndaşlarının Aİ ölkələrinə səfərini asanlaşdırılan viza rejiminin sadələşdirilməsi və readmissiya haqqında sazişlərin yaratdığı imkanlar təşviq edilib. Eyni zamanda, Avropa Komissiyasının sabiq sədri Joze Manuel Barrozunun cari il iyunun 14-də ölkəmizə rəsmi səfəri zamanı Azərbaycanın Aİ proqramlarında iştirakına dair imzalanmış Protokol müvafiq dövlət qurumlarında kadr potensialının gücləndirilməsinə, iqtisadi, mədəni və humanitar sahədə təcrübə mübadiləsinə şərait yaradan mühüm sənəd olub.

Azərbaycanla Avropa İttifaqı arasında enerji sahəsində strateji tərəfdaşlığın inkişafı üzrə xarici siyasət kursu uğurla davam etdirilib. Azərbaycanın Aİ-yə üzv ölkələrlə geniş əlaqələri rəsmi Bakının bu təşkilatla münasibətlərinin inkişaf etdirilməsi istiqamətində aparılan fəaliyyətə təkan verib. Belə ki, bu ölkələrlə fərdi qaydada siyasi, iqtisadi və mədəni-humanitar sahələrdə genişləndirilən dialoq Aİ ilə əməkdaşlıq gündəliyinin zənginləşdirilməsi və bərabərhüquqlu tərəfdaşlığın inkişafı istiqamətində aparılan işə müsbət töhfə verib. Avropanın enerji təhlükəsizliyinin təmin olunmasında Azərbaycanın özünü etibarlı tərəfdaş kimi təsdiq etməsi, eləcə də Aİ-də strateji tərəfdaşlarının sayının artması Azərbaycanın bu təşkilatla əməkdaşlığının strateji ruhda köklənməsini zəruri edib.

İslam Əməkdaşlıq Təşkilatı (İƏT) çərçivəsində İslam ölkələri ilə siyasi, iqtisadi-ticarət və humanitar sahələrdə əlaqələrin inkişafı diqqət mərkəzində olub.

ATƏT ilə əməkdaşlıq çərçivəsində bu təşkilatın fəaliyyətdə olan sədri, İsveçrə Konfederasiyasının Prezidenti və xarici işlər naziri Didye Burkhalterin ölkəmizə səfər etməsini, ilk dəfə olaraq ATƏT Parlament Assambleyasının illik sessiyasının Bakıda keçirilməsini qeyd etmək olar.

İyirmi ildir ki, ölkəmiz UNESCO ilə təşkilatın bütün vacib istiqamətləri, o cümlədən təhsil, elm, mədəniyyət, kommunikasiya və digər sahələr üzrə sıx əməkdaşlıq edir. Azərbaycan təşkilatın demək olar ki, bütün konvensiyalarına qoşulub, müxtəlif komitələrinin üzvü olub, bir çox beynəlxalq tədbirlərinə ev sahibliyi edib. Azərbaycan-UNESCO münasibətlərinin inkişaf etdirilməsi, mədəni irs nümunələrimizin dünyada təbliği, onların qorunması və gələcək nəsillərə ötürülməsində Mehriban xanım Əliyevanın rəhbərlik etdiyi Heydər Əliyev Fondunun gördüyü işlər xüsusi əhəmiyyət kəsb edir.

2014-cü il iyunun 4-də Türkiyənin Bodrum şəhərində Türkdilli Dövlətlərin Əməkdaşlıq Təşkilatının (TDƏŞ) Zirvə görüşü keçirilib və Azərbaycan Respublikasının Prezidenti İlham Əliyev görüşdə iştirak edib. TDƏŞ-ə üzv dövlətlərin prezidentlərinin qərarına uyğun olaraq təşkilatın yeni baş katibi vəzifəsinə 2014-cü ilin sentyabr ayından Azərbaycanın nümayəndəsi seçilib.

Ölkəmiz Ümumdünya Əqli Mülkiyyət Təşkilatı, BMT-nin Ticarət və İnkişaf üzrə Konfransı, Ümumdünya Gömrük Təşkilatı, Beynəlxalq Telekommunikasiya İttifaqı, BMT-nin Ərzaq və Kənd Təsərrüfatı Təşkilatı, Beynəlxalq Bərpa Olunan Enerji Agentliyi, BMT-nin Sənaye İnkişafı Təşkilatı və digər təsisatların işində də fəal iştirak edib.

- Məlumdur ki, Azərbaycan artıq yardım alan ölkədən donor ölkəyə çevrilib və beynəlxalq miqyasda bu istiqamətdə müxtəlif yardım layihələri həyata keçirir. Xarici İşlər Nazirliyinin nəzdində təsis edilmiş Azərbaycan Beynəlxalq İnkişafa Yardım Agentliyinin (AİDA) 2014-cü ildə bununla əlaqədar fəaliyyəti haqqında məlumat verməyinizi xahiş edirik.

- Azərbaycan Respublikasının son illər ərzində sürətli inkişafı ölkəmizin dünyanın donor dövlətləri ailəsinə daxil olmasına və Azərbaycanın xarici siyasətinin yeni xətti olan humanitar diplomatiyanın inkişafına şərait yaradıb.

Ümumiyyətlə, yardım etmək və ehtiyacı olana əl tutmaq Azərbaycan xalqının malik olduğu çoxsaylı yüksək əxlaqı dəyərlərdən biridir. Bu xüsusda, ölkə daxilində və onun hüdudlarından kənarda nəcib humanitar missiyalar həyata keçirən Heydər Əliyev Fondunun rolu xüsusilə qeyd edilməlidir.

2011-ci ildə Xarici İşlər Nazirliyinin nəzdində Azərbaycan Respublikasının Beynəlxalq İnkişafa Yardım Agentliyi (AIDA) təsis edilib.

AIDA və İslam İnkişaf Bankı tərəfindən bir sıra Afrika ölkələrində həyata keçirilmiş göz əməliyyatları nəticəsində kataraktadan əziyyət çəkən minlərlə insanın görmə qabiliyyəti bərpa olunub.

Azərbaycan, həmçinin təbii fəlakətlər nəticəsində zərər çəkmiş ölkələrə yardım göstərilməsini diqqət mərkəzində saxlayıb. Belə ki, Əfqanıstan, Serbiya, Bosniya və Herseqovina, Sent Vinsent və Qrenadin, Pakistan və Qəzzə bölgəsinə humanitar yardımlar göstərilib. Misal üçün qeyd etmək istərdim ki, Pakistanda sentyabr ayında yağan güclü leysanlar nəticəsində zərərçəkmiş əhaliyə AIDA və Pakistandakı səfirliyimiz tərəfindən ölkənin 8 şəhərində humanitar aksiyalar keçirilib və təqribən 25 min insana qida məhsullarından ibarət humanitar yardım paylanıb.

Xüsusilə qeyd etmək istərdim ki, Ümummilli lider Heydər Əliyevin anadan olmasının 91-ci ildönümü ərəfəsində Pakistanın Dera İsmayil Xan ərazisinin Tank bölgəsində Azərbaycanın birinci xanımı, Heydər Əliyev Fondunun Prezidenti, UNESCO-nun və ISESCO-nun xoşməramlı səfiri Mehriban Əliyevanın təşəbbüsü və himayəsi ilə AIDA və Pakistandakı səfirliyimiz tərəfindən “Heydər Əliyev Su Təchizatı layihəsi” həyata keçirilib. Bu layihə nəticəsində içməli sudan məhrum olmuş, əsrlər boyu yağış suyunu yığan kollektordan məişət məqsədləri üçün istifadə edən on minlərlə bölgə sakininin keyfiyyətli içməli su ilə bağlı problemi tamamilə həll olunub.

AIDA tərəfindən bu il beşinci dəfə təşkil olunmuş neft hasilatının artırılması texnologiyaları üzrə ixtisasartırma təlimləri qədim neft ölkəsi olan Azərbaycanın bu sahədə qazandığı bilik və təcrübənin inkişaf etməkdə olan ölkələrə ötürülməsinə imkan verir, eləcə də xarici dövlətlərin neft yataqlarında birgə tədqiqatların aparılması ilə Azərbaycanın neft elminin dünyada yenidən öz yüksək yerini tutmasına şərait yaradır.

Bununla yanaşı, Azərbaycan həqiqətlərinin və ölkəmizin əldə etdiyi nailiyyətlərin xarici dövlətlərin rəsmi, eləcə də elmi-ictimai dairələrinə çatdırılması məqsədilə AIDA tanınmış beynəlxalq tədqiqat mərkəzləri ilə əməkdaşlıq proqramlarını həyata keçirir, həmçinin inkişaf etməkdə olan dövlətlərin tələbələrinə Azərbaycanın aparıcı universitetlərində təhsil almaq və seçdikləri ixtisaslara yiyələnmək üçün təqaüdlər ayırmaqla onların insan kapitalının formalaşmasına dəstək verir.

Beləliklə, AIDA öz proqram və layihələri vasitəsilə qlobal səviyyədə davamlı inkişafa və humanitar missiyalara töhfə verir. Bundan sonra da bu nəcib missiya davam etdiriləcək.

- 2014-cü il ərzində Azərbaycanın xarici iqtisadi-ticarət əlaqələrinin inkişafını necə qiymətləndirirsiniz?

- Ötən illərdə olduğu kimi, 2014-cü ildə də Azərbaycan Respublikasının xarici ölkələrlə iqtisadi-ticarət əlaqələrinin genişləndirilməsi istiqamətində bir sıra mühüm işlər və tədbirlər görülüb.

İqtisadiyyat və Sənaye Nazirliyi və digər dövlət qurumları ilə əlaqəli şəkildə Azərbaycanın xarici iqtisadi əlaqələrinin inkişaf etdirilməsi, ölkə iqtisadiyyatının potensialının xaricdə təşviq olunması, Azərbaycanın və xarici ölkələrin dövlət və işgüzar dairələrinin nümayəndələrinin səfərlərinin təşkili, iqtisadi əməkdaşlıq üzrə Azərbaycanın xarici dövlətlərlə birgə hökumətlərarası komissiyalarının və işçi qruplarının keçirilməsi, ölkəmizin qeyri-neft sektorunun şaxələndirilməsi, ixracının təşviqi və genişləndirilməsi, xarici sərmayələrin ölkəmizə cəlb edilməsi, tərəfdaş ölkələrə Azərbaycan sərmayələrinin yatırılmasının təşviqi, respublikamızda istehsal olunan məhsulların və xidmətlərin yeni bazarlara çıxarılması, eyni zamanda, xarici ölkələrdə tətbiq olunan müasir texnologiyaların ölkəmizə cəlb edilməsi ikitərəfli əməkdaşlıqda əsas istiqamətlərdən olub.

Belə ki, 2014-cü il ərzində Azərbaycan Respublikasının xarici ölkələrlə ticarət-iqtisadi əlaqələrinin inkişaf etdirilməsi məqsədilə 18 birgə hökumətlərarası iqtisadi komissiyanın və 2 işçi qrupun iclası keçirilib. İclaslarda Azərbaycanın bu ölkələrlə ticarət-iqtisadi, sənaye, enerji, nəqliyyat, informasiya və telekommunikasiya texnologiyaları, kənd təsərrüfatı və aqrar sənayesi, turizm və elmi-texniki sahələrdə əməkdaşlığın genişləndirilməsi məqsədilə konkret razılaşmalar əldə olunub və gələcək əməkdaşlıq istiqamətləri müəyyən edilib. Bununla yanaşı, Azərbaycanın bir sıra mühüm ölkələrlə keçirdiyi hökumətlərarası iqtisadi komissiya və işçi qruplarının iclasları zamanı qəbul olunmuş sənədlərdə Azərbaycan Respublikasının Dağlıq Qarabağ bölgəsi və işğal altında olan digər ərazilərində Ermənistan tərəfindən həyata keçirilən qeyri-qanuni iqtisadi fəaliyyətin qarşısının alınması məqsədilə Azərbaycanın həmin ölkələrlə birgə səylərinin aparılması üzrə razılıqlar əldə edilib.

Azərbaycan iqtisadiyyatının potensialının xaricdə təşviq olunması, işgüzar dairələr arasında əməkdaşlığın inkişaf etdirilməsi, ölkəmizin iqtisadi imkanları, biznes və sərmayə mühitinin xarici sərmayədarlara tanıdılması, şirkətlərimizin istehsal etdiyi məhsul və xidmətlərinin xarici bazarlara çıxarılması, eyni zamanda, xarici ölkələrdə tətbiq olunan müasir texnologiyaların ölkəmizə cəlb edilməsi üçün 23 biznes forum keçirilib.

2014-cü il ərzində Azərbaycanda aparılan islahatlar və həyata keçirilən iqtisadi siyasət nəticəsində yaradılmış əlverişli biznes mühitinə maraq göstərən xarici şirkətlərin və ölkəmizlə əməkdaşlıq istiqamətində irəli sürülən təkliflərin sayı davamlı olaraq artıb. Bu təkliflərin ölkəmizin maraqlarına uyğun olaraq rəqabətlilik əsasında seçilməsi məqsədilə xarici şirkətlərin etdiyi işgüzar müraciətlərin təhlil olunması, onların iqtisadiyyatımıza verə biləcəyi töhfənin əsaslandırılması, əməkdaşlığın gələcək səmərəliliyi, ölkəmiz üçün faydalılığı, xüsusən yeni texnologiyaların respublikamıza gətirilməsi, istehsal sahəsində uzunmüddətli sərmayə yatırmaq niyyəti olan şirkətlərin cəlb edilməsinə səy göstərilib.

- 2015-ci ildə ermənilər “soyqırımı” iddialarının 100 illiyini qeyd edəcəklər. Daha öncə Azərbaycan və Türkiyənin bu iddialara qarşı birlikdə cavab verəcəyi açıqlanmışdı. Bu çərçivədə Azərbaycanın planları necədir?

- Tarixin saxtalaşdırılması, eləcə də tarixin siyasi möhtəkirlik obyektinə çevrilərək müəyyən məqsədlər üçün istifadə olunması qəbuledilməzdir. Qondarma “erməni soyqırımı” məsələsində aparılan kampaniya bunun bariz nümunəsidir.

Təəssüflər olsun ki, Ermənistan Azərbaycana qarşı işğal və təcavüzünə, digər qonşu dövlətlərə qarşı iddialarına son qoymaq, normal və sivil əlaqələr qurmaq əvəzinə bu kimi əməllərlə məşğuldur.

Türkiyə Prezidenti Rəcəb Tayyib Ərdoğanın bu ilin sentyabrında Bakıya səfəri zamanı keçirilən birgə mətbuat konfransında Azərbaycan Prezidenti İlham Əliyev Türkiyə və Azərbaycan Xarici İşlər nazirlikləri, diplomatik nümayəndəlikləri və diaspor təşkilatlarının qondarma “erməni soyqırımı”nın ifşası ilə bağlı əlaqələndirilmiş şəkildə birgə iş apardıqlarını qeyd edib. Prezident İlham Əliyev onu da əlavə edib ki, Ermənistan və dünya erməniliyi beynəlxalq ictimai rəyi çaşdırmaq, yalan üzərində tarix qurmaq istəyərək, Türkiyəyə qarşı əsassız ittihamlar irəli sürür, bunların heç bir tarixi əsası yoxdur və bu, yalandır, böhtandır, iftiradır.

Bundan çıxış edərək, hər iki ölkənin Xarici İşlər nazirlikləri və digər müvafiq qurumları tərəfindən əlaqələndirilmiş iş aparılır. Burada əsas diqqət erməni yalanlarının ifşası və faktlara əsasən tarixi həqiqətin təqdim olunmasına yetirilir.

Eyni zamanda, ermənilər tərəfindən 1918-ci ilin martında Bakı, Şamaxı, Quba və indi Ermənistanın ərazisi olan digər tarixi Azərbaycan torpaqlarında azərbaycanlılara qarşı kütləvi soyqırımı əməlləri, Ermənistanın Azərbaycana qarşı təcavüzü nəticəsində Xocalıda törədilmiş soyqırımı və işğal olunmuş Azərbaycan ərazilərində və Ermənistanın öz ərazisində bir milyondan artıq azərbaycanlının qanlı etnik təmizləməyə məruz qalması kimi faktlar daha geniş şəkildə beynəlxalq ictimaiyyətin diqqətinə çatdırılır. Bütün bunlara görə beynəlxalq humanitar hüquq əsasında Ermənistan məsuliyyət daşıyır. Tarixi təhrif etmək əvəzinə, Ermənistan törətdiyi bu soyqırımı əməllərinə cavab verməlidir. Bu istiqamətlərdə birgə fəaliyyətimiz davam etdiriləcək.

- Son dövrlərdə insan hüquqları adı altında Azərbaycana qarşı olan qərəzli bəyanatları və ümumiyyətlə, Azərbaycan-ABŞ əlaqələrini necə dəyərləndirirsiniz?

- Təəssüflər olsun ki, bir sıra dairələr insan hüquqlarını xarici siyasət alətinə çevirərək, məqsədyönlü şəkildə bəzi dövlətlərə qarşı əlaqələndirilmiş kampaniya aparırlar. Demokratiya və insan hüquqları ümumbəşəri dəyərdir və demokratiyanın vahid modeli də mövcud deyil. Heç bir dövlətin bu sahədə mükəmməllikdən danışmağa və digərlərinə dərs keçməyə haqqı yoxdur.

Bəzi dairələr ümumi vəziyyətə qiymət vermək əvəzinə, konkret və fərdi halları və bir çox hallarda arxasında cinayət tərkibi olan məsələləri əsas götürərək, bunu siyasi təzyiq göstərmək və qarayaxma kampaniyasına çevirməyə çalışırlar.

Azərbaycanda insan hüquqlarının qorunması və demokratikləşmə sahəsində davamlı addımlar atılır. Demokratik inkişaf Azərbaycan xalqının və dövlətinin şüurlu seçimidir və aparılan islahatlar kimisə məmnun etmək üçün deyil, ilk növbədə Azərbaycan xalqının mənafeyi üçün edilir.

Azərbaycanın əzmli siyasi iradəsi var və ölkəmiz öz uğurlu siyasi-iqtisadi və inkişaf yolu ilə addımlarını davam etdirəcək.

Azərbaycanın ABŞ ilə əlaqələri ölkəmizin qlobal enerji təhlükəsizliyinə, terrorizmə və transmilli hədə və təhdidlərə qarşı mübarizəyə töhfələri, Əfqanıstan əməliyyatına maddi-texniki, tranzit və maliyyə dəstəyi ilə xarakterizə olunur. Eyni zamanda, ABŞ ATƏT-in Minsk qrupunun həmsədri kimi Ermənistan-Azərbaycan, Dağlıq Qarabağ münaqişəsinin həlli üzrə danışıqlarda Rusiya və Fransa ilə birlikdə vasitəçi rolunda çıxış edir. ABŞ bu məsələnin Azərbaycan cəmiyyəti üçün nə dərəcədə həssas və ağrılı olduğunu bilir və Azərbaycanın digər həmsədrlər kimi Birləşmiş Ştatlardan da gözləntisi ondan ibarətdir ki, münaqişənin tezliklə beynəlxalq hüququn norma və prinsipləri, xüsusilə Azərbaycanın ərazi bütövlüyü, suverenliyi və beynəlxalq səviyyədə tanınmış sərhədlərinə hörmət və BMT Təhlükəsizlik Şurasının qətnamələri əsasında həlli istiqamətində səylərini daha da artırsın. ABŞ-ın Ermənistanın təcavüzü nəticəsində insan hüquqlarının qorunması üzrə beynəlxalq sənədlərdə təsbit olunmuş ən əsas hüquqlarından məhrum olunmuş azərbaycanlı qaçqın və məcburi köçkünlərin hüquqlarına da diqqət göstərməsi məqsədəuyğun olardı.

Azərbaycan əməkdaşlıq etdiyi bütün tərəfdaşları ilə açıq və səmimidir. Ölkəmiz bu prinsiplər əsasında dünya dövlətləri ilə xoşniyyətli əməkdaşlıq edir.

- Azərbaycan Respublikasının Prezidenti İlham Əliyev 2015-ci ildə Bakıda keçiriləcək birinci Avropa Oyunları ilə əlaqədar vizaların verilməsi prosedurlarının təkmilləşdirilməsi üzrə əlavə tədbirlər haqqında Sərəncam imzalayıb. Ümumiyyətlə, Azərbaycanda turizmin inkişafı kontekstində viza sistemində nə kimi işlər görülür?

- Azərbaycan Respublikası Prezidentinin “I Avropa Oyunlarının keçirilməsi ilə əlaqədar bəzi tədbirlər haqqında” 2014-cü il 8 avqust tarixli 675 saylı Sərəncamına əsasən, Xarici İşlər Nazirliyinin üzərinə düşən tədbirlərin icrası istiqamətində ardıcıl iş aparılır. Viza prosedurlarının sadələşdirilməsi barədə Avropa Olimpiya Komitəsi, Beynəlxalq Hava Nəqliyyatı Assosiasiyası (IATA), Beynəlxalq Mülki Aviasiya Təşkilatına (ICAO) dolğun məlumatların verilməsi və ölkəmizə səfər edəcək əcnəbilərə və xarici dövlətlərdə daimi yaşayan vətəndaşlığı olmayan şəxslərə viza rəsmiləşdirilməsi qaydalarının Xarici İşlər Nazirliyi və xaricdəki diplomatik nümayəndəliklərimizin resurslarında yerləşdirilməsi təmin olunur.

Azərbaycan Respublikasında turizmin inkişafı ilə əlaqədar ölkəmizə səfər edən əcnəbilər və vətəndaşlığı olmayan şəxslərə vizaların rəsmiləşdirilməsi işinin daha yüksək səviyyədə təşkili məqsədi ilə “Giriş-çıxış və qeydiyyat” idarələrarası avtomatlaşdırılmış məlumat-axtarış sistemində (IAMAS) mövcud proqram təminatının təkmilləşdirilməsi, bu sahədə müfəssəl statistik təhlillərin aparılması, Azərbaycanın xarici ölkələrdəki diplomatik nümayəndəlikləri və Xarici İşlər Nazirliyi arasında məlumat mübadiləsini təkmilləşdirmək üçün “Azerspace-1” telekommunikasiya peyki vasitəsilə səfirlik və konsulluqların peyk rabitəsi ilə təchiz edilməsi üzrə ardıcıl tədbirlər görülür. Eyni zamanda, ölkəmizə səfər edən əcnəbilər və vətəndaşlığı olmayan şəxslərə vizaların rəsmiləşdirilməsi işinin operativliyini təmin etmək məqsədi ilə Azərbaycan Respublikası Prezidentinin müvafiq Sərəncamına uyğun olaraq, Xarici İşlər Nazirliyi və diplomatik nümayəndəliklərin əməkdaşlarının ştat sayının artırılması sahəsində müvafiq işlər görülməkdədir.

Azərbaycan Respublikasına səfər edən turistlərə vizaların elektron qaydada verilməsi işi müvəffəqiyyətlə həyata keçirilir. Bunun sübutu kimi elektron vizaya müraciət edən turistlərin sayının getdikcə artmasını göstərmək olar.

Aparılmış uğurlu fəaliyyət nəticəsində 2014-cü il sentyabrın 1-dən etibarən “Azərbaycan Respublikası və Avropa İttifaqı arasında vizaların rəsmiləşdirilməsinin sadələşdirilməsi haqqında Saziş” qüvvəyə minib. Sazişin tətbiq edilmədiyi Danimarka, Birləşmiş Krallıq, İrlandiya, İslandiya, Norveç, İsveçrə və Lixtenşteyn ilə diplomatik və xidməti pasportlara malik şəxslərin vizasız gediş-gəlişi barədə ikitərəfli sazişlərin imzalanması istiqamətində müvafiq işlərin aparılmasına başlanılıb. Norveç ilə Azərbaycan arasında “diplomatik və xidməti pasportlara malik şəxslərin vizasız gediş-gəlişi barədə” ikitərəfli saziş artıq imzalanıb.

Xarici ölkələrlə konsulluq sahəsində əməkdaşlığın qurulması və genişləndirilməsi, xarici ölkələrdə yaşayan Azərbaycan vətəndaşlarının hüquqlarının müdafiəsinin qanuni əsaslarının təkmilləşdirilməsi, həmçinin, Azərbaycan vətəndaşlarının xarici ölkələrə səyahətinin asanlaşdırılması məqsədilə bir sıra dövlətlərlə ölkəmiz arasında “konsulluq sahəsində əməkdaşlıq haqqında”, “konsulluq sahəsində qarşılıqlı yardım göstərilməsi haqqında”, “diplomatik və xidməti pasportlara malik vətəndaşların vizasız gediş-gəlişi haqqında” ikitərəfli sazişlərin hazırlanması zərurəti araşdırılıb.

Yeni Azərbaycan.- 2014.- 26 dekabr.- S.4;6.