Xocalı qətliamını törədənlər gec-tez cəzalandırılacaqlar

Azərbaycanın Qırğızıstandakı səfirliyi bu ölkənin Milli Kitabxanasının akt zalında Xocalı soyqırımının 22-ci ildönümünə həsr olunmuş anım mərasimi keçirib.

Mərasimdə Qırğızıstanın dövlət və hökumət strukturlarının təmsilçiləri, parlament üzvləri, ölkədə akkreditə olunmuş diplomatik korpusun, hüquq müdafiə təşkilatlarının, beynəlxalq qurumların nümayəndələri, Azərbaycan diasporunun fəalları, ziyalılar və başqaları iştirak ediblər.

Mərasimdən əvvəl Xocalı soyqırımını əks etdirən fotoşəkillər və kitablardan ibarət sərgi nümayiş olunub, iştirakçılara Xocalı faciəsi ilə bağlı məlumatlar toplusu təqdim edilib.

Mərasimdə Xocalı soyqırımı haqqında sənədli film nümayiş etdirilib və faciə qurbanlarının xatirəsi bir dəqiqəlik sükutla yad olunub.

Azərbaycanın Qırğızıstandakı səfiri Hidayət Orucov Xocalı soyqırımı haqqında ətraflı məlumat verib. 1992-ci il fevral ayının 25-dən 26-na keçən gecə erməni işğalçı qüvvələrinin blokada şəraitində olan Xocalı şəhərinə ağır texnika, tank və iriçaplı silahlarla hücuma keçdikləri bildirilib. Qeyd edilib ki, Xocalı soyqırımı XX əsrin sonlarında ermənilər tərəfindən Azərbaycan xalqına qarşı törədilmiş ağır cinayət kimi tarixə düşüb.

Səfir Xocalı soyqırımı ilə bağlı həqiqətlərin dünya ictimaiyyətinə çatdırılmasının, erməni vandalizminin mahiyyətini, ermənilərin iç üzünü açmağın vacibliyini vurğulayıb. Diplomat bu vəhşiliklərin cavabsız qalmayacağını, Azərbaycanın bütün mövcud imkanlardan istifadə edərək, Prezident İlham Əliyevin uzaqgörən siyasəti sayəsində öz torpaqlarını işğaldan azad edəcəyini və işğalçıların layiqincə cavablarını alacaqlarını bildirib.

Hidayət Orucov deyib ki, Xocalı soyqırımı yalnız azərbaycanlılara qarşı deyil, bütün bəşəriyyətə qarşı törədilmiş cinayətdir. Qeyd olunub ki, Ulu öndər Heydər Əliyev xalqın təkidli tələbi ilə Azərbaycan rəhbərliyinə qayıtdıqdan sonra Xocalıda törədilən cinayətlərə siyasi və hüquqi qiymət verilib.

Sonra Qırğız Respublikasının Prezident Aparatının şöbə müdiri xanım Mira Karıbayeva çıxış edərək Xocalıda dinc əhalinin qəddarlıqla qətlə yetirilməsini pisləyib. M.Karıbayeva ölkələrimiz arasında olan sıx münasibətlərin bundan sonra da davam edəcəyini vurğulayıb və bu sahədə Azərbaycanın Qırğızıstandakı səfirliyinin fəaliyyətini yüksək qiymətləndirib.

Türkiyənin Qırğızıstandakı səfiri Metin Kılıç, Qırğız-Türk “Manas” Universitetinin rektoru Səbahattin Balcı, Böyük Vətən Müharibəsi veteranı Əsəd Həsənov, “Saabat” Tədris Mərkəzinin direktoru Orhan İnandı, “Azəri” İctimai Birliyinin sədri Əziz Əliyev, təhsil işçisi Alla Qurbanova və Qırğızıstan Diplomatik Akademiyasının tələbəsi Elvin Babayev Xocalı soyqırımı və erməni təcavüzü barədə fikirlərini bölüşüblər.

Bildirilib ki, ermənilərin işğalçılıq siyasəti təkcə Azərbaycan üçün deyil, bütün region üçün təhlükədir. Onlar Xocalı soyqırımının Qırğızıstan ictimaiyyətinə daha geniş çatdırılmasının və Qırğızıstan dövləti tərəfindən bu faciəyə hüquqi qiymət verilməsinin vacibliyini vurğulayıblar.

Yeni Azərbaycan.-2014.- 27 fevral.- S.7.