İsmayıllı rayonu inkişafın keyfiyyətcə yeni mərhələsində

Görülən uğurlu işlərin nəticəsidir ki, rayon gündən-günə inkişaf edir, abadlaşır, sakinlərin həyat şəraiti yaxşılaşır

Ümummilli lider Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən daxili və xarici siyasət kursu Azərbaycanı nəinki regionun liderinə, eyni zamanda, dünyanın ən yüksək sürətlə inkişaf edən dövlətinə çevirib. Bu uğurlu siyasətin nəticəsidir ki, hazırda Azərbaycanın bütün guşələrində böyük tərəqqi hiss edilməkdədir. Prezident İlham Əliyevin imzaladığı regionların sosial-iqtisadi inkişafı üzrə Dövlət proqramları Azərbaycanın inkişafına böyük təkan verib. Dünyada baş verən maliyyə və iqtisadi böhranlara baxmayaraq, Azərbaycan yüksək makroiqtisadi göstəricilərini qorumaqdadır. Bu inkişaf özünü rayonlarımızın həyatında baş verən müsbət dəyişikliklərdə də göstərir. Son dövrlərdə böyük inkişaf yolu keçən rayonlarımızdan biri də İsmayıllı rayonudur.

İsmayıllı rayonunda ümumi məhsul istehsalının həcmi ildən-ilə artır

İsmayıllı rayonunda 2014-cü ilin birinci rübü ərzində 25 milyon 560 min manat məbləğində ümumi məhsul istehsal olunub. Vurğulamaq lazımdır ki, ümumi məhsul istehsalı əvvəlki ilin eyni dövrü ilə müqayisədə 255 min manat artıb. Bütün sahələrdə, o cümlədən sənaye sahəsində 2,4, kənd təsərrüfatında 0,4, tikintidə 0,3, nəqliyyatda 1,4, rabitə sahəsində 7,6 və ticarətdə 1,7 faiz artım müşahidə olunub.

Qeyd edilən dövr ərzində rayon büdcəsinin gəlir hissəsi 4 milyon 439 min manata qarşı 4 milyon 691 min 840 manat icra olunub. Büdcə gəlirlərinin icrası 105,7 faiz təşkil edib. Yerli mənbələrdən daxil olmalar üzrə proqnoz artıqlaması ilə icra edilib, 1 milyon 112 min 580 manata qarşı 1 milyon 360 min 840 manat (122 faiz) vəsait daxil olub. Rüblük məxaric proqnozu 4 milyon 439 min manata qarşı 4 milyon 129 min 390 manat, 309,6 min manat kəsrlə icra edilib. Birinci rübdə əhaliyə 4 milyon 916 min manatlıq pullu xidmət göstərilib. Pərakəndə əmtəə dövriyyəsi 24 milyon 436 min manat olub ki, bu da əvvəlki ilin eyni dövrü ilə müqayisədə 0,6 faiz çoxdur. Bir işçiyə hesablanmış nominal orta aylıq əməkhaqqı 2013-cü illə müqayisədə 35,6 manat artaraq 257 manata çatıb.

Rayonda tikinti, abadlıq, quruculuq işləri uğurla davam etdirilir

İsmayıllı rayonunda tikinti, abadlıq və quruculuq işləri daim diqqət mərkəzində saxlanılır. “Milli Su təchizatı və Kanalizasiya Xidmətləri Üzrə İkinci Layihə” çərçivəsində İsmayıllı şəhərinin su və kanalizasiya sisteminin tikintisi, rayon Mərkəzi Xəstəxanasının yenidən qurulması, Yeni Azərbaycan Partiyası üçün inzibati binanın, Nizami Gəncəvi küçəsində iki beşmərtəbəli yaşayış binasının tikintisi davam etdirilir. Bundan başqa, şəhərin elektrik enerjisi təsərrüfatının, Zərifə Əliyeva adına parkın, Heydər Əliyev prospektinin, Nizami Səmədov, “Babadağ” küçələrinin, Heydər Əliyev Mədəniyyət Sarayının, İsmayıllı bələdiyyəsinin inzibati binasının dam örtüyünün və fasadının yenidən qurulması nəzərdə tutulur. Qalınçaq kənd orta məktəbi üçün 380 şagird yerlik, Şəbiyan ümumi orta və Külüllü kənd ibtidai məktəblərinin hər biri üçün 80 şagird yerlik, Sumağallı kənd uşaq bağçası üçün 40 uşaq yerlik yeni binaların, “İlkin-3” quşçuluq fabrikinin 4 sexinin, Keyvəndi kəndində 1400 başlıq südlük-ətlik istiqamətli iri heyvandarlıq kompleksinin və digər obyektlərin tikintisi də yüksək səviyyədə davam etdirilir.

Azərbaycan Respublikasının Prezidenti İlham Əliyevin müvafiq sərəncamları ilə İsmayıllı-Göytəpə-Qalınçaq-Ruşan avtomobil yolunun tikintisinə başlanılıb. 10 saylı Yol İstismar Sahəsi tərəfindən 2014-cü ilin I rübündə 362,6 min manatlıq təmir işləri görülüb. Təmir işləri əsasən Muğanlı-İsmayıllı, Qaraməryəm-İsmayıllı-Şəki avtomobil yolunda və yerli əhəmiyyətli yollarda aparılıb. Qış mövsümündə nəqliyyatın fasiləsiz və təhlükəsiz hərəkətini təmin etmək üçün lazım olan tədbirlər görülüb. Bu ilin birinci rübündə Qoşakənd və Cülyan avtomobil yoluna çınqıl döşənib. Rayonda əhaliyə göstərilən nəqliyyat xidmətinin keyfiyyəti getdikcə yaxşılaşır. Velosiped istehsalı zavodunun tikintisi üçün hazırlıq işləri görülüb.

İsmayıllı rayonunda kənd təsərrüfatının inkişafı daim diqqət mərkəzindədir

Ölkəmizin ərzaq təhlükəsizliyi məsələsində hər zaman ön sıralarda yer alan İsmayıllı rayonunda ötən dövr ərzində kənd təsərrüfatı sahəsində görülən işlər də olduqca qənaətbəxşdir. Belə ki, bu ilin birinci rübündə rayonda kənd təsərrüfatında ümumi məhsul istehsalı əvvəlki ilin eyni dövrü ilə müqayisədə dəyər ifadəsində 32 min manat artıb. Rayonda 2013-cü ilin payızında əkilmiş 28449 hektar payızlıq taxıl bitkisi sahələrində normal bitiş alınıb. Bundan başqa, rayonda 1428 ha sahədə yazlıq bitkilər, o cümlədən 515 ha sahədə dənli-paxlalılar, 394 ha sahədə kartof, 300 ha sahədə yonca, 219 ha sahədə isə tərəvəz bitkiləri əkilib.

İsmayıllı “Aqroservis” filialı tərəfindən 525 ton mineral gübrə gətirilib və kənd təsərrüfatı məhsulları istehsalçılarına satışı ilə əlaqədar müvafiq sənədləşdirmə aparılıb. Bu il rayona “Aqrolizinq” ASC-nin xətti ilə 12 taxılbiçən kombaynın verilməsi nəzərdə tutulub.

Hesabat dövründə iribuynuzlu mal-qaranın baş sayı 51 min 172 başa, xırda buynuzlu heyvanlar 178 min 254 başa çatdırılıb, 1302 ton ət, 8451 ton süd, 2 milyon 465 min ədəd yumurta istehsal olunub. Bütün göstəricilər əvvəlki ilin müvafiq dövrü ilə müqayisədə yüksəkdir.

Rayonda meşələrin mühafizəsi və yaşıllaşdırma işi prioritetlərdən biridir

2013-cü ilin birinci rübündə Meşə Mühafizəsi və Bərpası Müəssisəsində ümumilikdə 18 hektar sahədə meşə bərpa tədbirləri aparılıb, 12 min ədəd ağac tingi əkilib. Müəssisənin tinglik sahəsində yeni ağac tinglərinin yetişdirilməsi məqsədi ilə müxtəlif ağacların toxumları səpilib.

İsmayıllı Suvarma Sistemləri İdarəsi tərəfindən hesabat dövründə daşqın və selə qarşı çay məcralarının lil və çınqıldan təmizlənməsi məqsədilə 72,8 minkub metr həcmində ekskavator işi, 139,8 min kubmetr həcmində buldozer işi görülüb.

Birinci rübdə rayonun idarə və təşkilatları könüllü olaraq iməciliklər təşkil edib, ağac əkini və yeni yaşıllıqların salınmasında fəal iştirak ediblər. İsmayıllı-Muğanlı avtomobil yolunun ətrafında yaradılmış yaşıllıq zolaqlarında təmir-bərpa işləri aparılıb, qurumuş ağaclar yeniləri ilə əvəz olunub. İsmayıllı-Qaraməryəm yolu ətrafında İsmayıllı şəhərinin çıxış hissəsində yeni yaşıllıq zolağı salınıb, burada 210 ədəd ağac əkilib, ətrafı dəmir torla mühafizə edilib.

Elektrik, qaz və içməli su təchizatının yenilənməsi istiqamətində əhəmiyyətli addımlar atılıb

İsmayıllı rayonunda qazlaşdırma prosesi davam etdirilir. Qaz İstismar sahəsi 12741 abonentə xidmət göstərir ki, bunun da 12647-si əhali abonentləridir. Rayon ərazisində 56 ədəd məişət qaz sayğacı yenisi ilə əvəz olunub, 462 abonent üçün yeni məişət qaz sayğacı quraşdırılıb. Birinci rübdə abonentlərə 12 milyon 665 min kubmetr qaz satılıb. Abonentlərə satılan qazın dəyəri 83 faiz ödənilib.

Rüb ərzində Paylayıcı Elektrik Şəbəkəsi tərəfindən enerji təsərrüfatında cari təmir işləri aparılıb. Belə ki, şəhər ərazisində 10 kilo/voltluq hava xətlərində 74 ədəd, 0,4 kilo/voltluq hava xətlərində 307 ədəd yeni dəmir-beton dayaq quraşdırılıb, 10,5 km. SİP kabel xətti çəkilib, abonentlər üçün 646 ədəd Smart-kart tipli sayğac quraşdırılıb. Kəndlərdə 10 kilo/voltluq hava xətlərində 37 ədəd, 0,4 kilo/voltluq hava xətlərində 48 ədəd dayaq dəyişdirilib, xətlərdə 2 ədəd transformator yarımstansiyalarında 8 ədəd ayırıcı quraşdırılıb. Rüb ərzində istehlakçılara 13 milyon 59 min kilovat/saat elektrik enerjisi verilib, 737,2 min manat vəsait yığılıb ki, bu da satılan enerjinin dəyərinin 95,4 faizini təşkil edir. Bu da keçən ilin müvafiq dövrü ilə müqayisədə 10 faiz artıqdır.

İsmayıllı “Sukanal” idarəsi 3212 abonentə xidmət göstərir. Birinci rübdə təşkilat tərəfindən su xətlərində cari təmir işləri aparılıb. Şəhərdaxili xətlərdə baş vermiş qəzalar aradan qaldırılıb. Rüb ərzində abonentlərə 46,2 min manat dəyərində xidmət göstərilib, xidmətə görə 42,3 min manat və ya 91,6 faiz ödəniş olub.

“Milli Su Təchizatı və Kanalizasiya xidmətləri üzrə ikinci Layihə” çərçivəsində İsmayıllı şəhərinin içməli su təchizatı və kanalizasiya sisteminin infrastrukturunun tikintisi işləri davam etdirilir. Rüb ərzində tutumu 1500 ton olan su anbarında tikinti işləri görülür.

Aztəminatlı ailələr daim dövlətin himayəsindədir

Əmək və Əhalinin Sosial Müdafiəsi Mərkəzi tərəfindən əhalinin aztəminatlı təbəqələrinin sosial müdafiəsinin yaxşılaşdırılması ilə əlaqədar tədbirlər davam etdirilib. Bu ilin birinci rübü ərzində 230 ailənin 1044 nəfər üzvünə ünvanlı sosial yardım təyin olunub. Hazırda 725 ailənin 3378 nəfər üzvünə ünvanlı sosial yardım ödənilir. Adambaşına düşən orta aylıq məbləğ 24 manat 35 qəpik, bir ailəyə düşən orta aylıq məbləğ 113 manat 42 qəpik təşkil edir. Ünvanlı sosial yardım almaq hüququ olanlara yardım təyin edilməsi davam etdirilir.

Rayonda 3715 nəfər vətəndaş müxtəlif təyinatlı sosial müavinət alır. Rüb ərzində sosial müavinətlərin ödənilməsinə 714,9 min manat ödəniş aparılıb. Mərkəzin Sosial-məişət xidməti sektoru rayon ərazisində 224 nəfər ahıl və əlil vətəndaşa evlərində xidmət göstərir.

Rayon Məşğulluq Mərkəzi tərəfindən “Məşğulluq haqqında” Azərbaycan Respublikası Qanununa uyğun olaraq işsiz vətəndaşların işlə təmin olunması sahəsində müəyyən işlər görülüb. Birinci rübdə Mərkəzdə 78 nəfər işaxtaran vətəndaş rəsmi qeydiyyata alınıb. Hesabat dövründə onlardan 45 nəfəri işlə təmin edilib. İşlə təmin olunanların 9 nəfəri qadındır. Birinci rübdə rayonda 138 yeni iş yeri yaradılıb.

Kommunal xidmətlərin keyfiyyəti yüksəlib, əhaliyə xidmət müasirləşdirilib...

Əhaliyə göstərilən kommunal xidmətlərin keyfiyyətinin yaxşılaşdırılması, şəhərin təmiz saxlanması, yaşıllıqların qorunması, antisanitariyaya qarşı mübarizə aparılması üçün rayon Kommunal Müəssisələri Kombinatı və Mənzil İstismar Sahəsi tərəfindən mühüm işlər görülüb. Kommunal Müəssisələri Kombinatı şəhər ərazisində 315 min kvadratmetr sahəsi olan küçə və meydanlara, 24,3 ha yaşıllıq sahəsinə qulluq edir, küçələrin işıqlandırılmasına nəzarəti həyata keçirir. Ötən rüb ərzində Kombinat tərəfindən tutumu 1,1 kub metr olan 39 ədəd metal zibil qutusu alınaraq şəhərin müxtəlif ərazilərinə qoyulub. Şəhər daxilində olan bütün ağacların gövdələri əhənglə ağardılıb, şəhərin təmizliyi ilə əlaqədar vaxtaşırı iməciliklər təşkil olunub. 2014-cü ilin ilk üç ayında 117 min manat dəyərində kommunal xidmət göstərilib ki, bu göstərici keçən ilin müvafiq dövrü ilə müqayisədə 16,4 min manat çoxdur.

İsmayıllı rayonunun kəndlərində internet şəbəkəsi genişləndirilir

İsmayıllı Poçt filialının 2 şəhər və 25 kənd şöbəsi əhaliyə və təşkilatlara müxtəlif adda poçt və maliyyə xidməti göstərir. Bu ilin ilk rüblük tarif gəlirləri proqnozu 37,3 min manata qarşı 51,9 min manat və ya 139,2 faiz yerinə yetirilib. Hesabat dövründə əhaliyə 44,3 min manat poçt xidmətləri göstərilib ki, bu da nəzərdə tutulduğundan 12,4 min manat çoxdur. Hazırda İvanovka, Qalagah, Ruşan və Qalınçaq kəndlərində yeni poçt binalarının tikintisinə başlanılıb. İsmayıllı Telekommunikasiya Qovşağı I rübdə 197,7 min manat gəlir əldə edib, 59 mənzilə yeni telefon çəkilib, 32 abunəçinin telefon xəttini yenidən bərpa edilib. İndiki halda Qovşaq üzrə1969 ədəd boş tutum mövcuddur. Birinci rübdə 2 ədəd 96 portluq ADSL aparatı alınaraq Xanagah və Aşıqbayramlı kəndlərində quraşdırılıb. Quşencə, Təzəkənd, Lahıc, Ağbulaq, Cülyan və Qalagah kəndlərində internet istifadəçilərinin montaj tutumu 144 ədəd artırılıb. Mart ayında genişzolaqlı internetin ötürülməsi üçün Xanagah elektron ATS-də yeni RADVİN avadanlığı quraşdırılıb. Rüb ərzində Diyallı, Kürdmaşı, Qalınçaq, İvanovka və Qalagah kəndlərində daxili xətt şəbəkələri təmir olunub. Optik kabellər üçün 150 ədəd nəzarət nişanları basdırılıb, rayon ərazisində ümumiyyətlə, 17 ədəd paylayıcı şkaf təmir olunub. Telekommunikasiya qovşağının xidmət etdiyi ərazidə 2564 abunəçi genişzolaqlı internet xidmətindən istifadə edir ki, bu da keçən ilin eyni dövrü ilə müqayisədə 900 nəfər çoxdur.

Rayonun təhsil, səhiyyə və mədəniyyət sahələrində əsaslı yeniliklər müşahidə olunmaqdadır...

Bu ilin birinci rübündə məktəb tikintisi, təhsil müəssisələrinin əsaslı təmiri, maddi bazanın möhkəmləndirilməsi, yeni texnologiyaların tətbiqi, təhsilin müasir standartlara uyğunlaşdırılması istiqamətində tədbirlər davam etdirilib. Bu il rayonda innovativ təlim texnologiyalarının inkişafına təkan verilib. Hazırda ümumtəhsil məktəblərində 683 ədəd kompüter, 65 ədəd proyektor, 19 ədəd elektron lövhə vardır. 11 məktəbdə lokal şəbəkə, 25 məktəbdə sürətli internet fəaliyyət göstərir. Rayon Təhsil Şöbəsi müasir təlim texnologiyalarının tətbiqi ilə bağlı çoxsaylı tədbirlər, konfrans və seminarlar keçirib, qabaqcıl təcrübənin öyrənilib yayılmasını diqqətdə saxlayır. Rayon müəllimləri və şagirdləri çoxsaylı beynəlxalq və respublika səviyyəli layihələrdə iştirak edib, uğurlar qazanıblar.

Rayon Mərkəzi Xəstəxanası tərəfindən ilin 3 ayı ərzində əhaliyə göstərilən səhiyyə xidmətlərinin yaxşılaşdırılması istiqamətində tədbirlər davam etdirilib. Hesabat dövrü ərzində 244 nəfər uşaq doğulub, ana və uşaq ölümü qeydə alınmayıb.

Ölkə rəhbərinin tapşırığına uyğun olaraq 17 fevral 2014-cü il tarixdən rayonda əhalinin tibbi müayinədən keçirilməsi kampaniyası uğurla keçirilib. Ümumən, 50 minə qədər insan müayinədən keçirilib, onlardan bəziləri ambulator, digər qismi stasionar müalicəyə cəlb olunub. Lazım olduğu təqdirdə bir sıra xəstələr Bakı şəhərinə ixtisaslaşdırılmış tibbi müayinəyə göndərilib.

Rayon Mədəniyyət və Turizm şöbəsi tərəfindən mədəni-maarif müəssisələrinin fəaliyyətinin yaxşılaşdırılması məqsədilə müəyyən işlər görülüb. Mədəni-maarif müəssisələrdə 340 nəfər işçi çalışır. Onlardan 75 nəfəri ali, 167 nəfəri orta ixtisas, 98 nəfəri isə orta təhsillidir. Bu ilin 3 ayı ərzində 54 tədbir keçirilib, Bakı şəhərində keçirilən respublika və beynəlxalq əhəmiyyətli sərgi və müsabiqələrdə rayonun yüksək səviyyədə iştirakı təmin olunub. Dövlət tədbirlərinin, tarixi günlərin, əlamətdar hadisələrin, milli bayramların və digər tədbirlərin təşkili və keçirilməsində rayon Mədəniyyət və Turizm şöbəsi yaxından iştirak edir. Azsaylı xalqların, etnik qrupların milli-mədəni irsi daim diqqətdə saxlanılıb, folklor qruplarının çıxışları təşkil edilib.

Cari ilin üç ayı ərzində rayonda çoxsaylı ictimai-siyasi tədbirlər həyata keçirilib, dövlət və dini bayramlar yüksək səviyyədə qeyd olunub. İdeoloji işin gücləndirilməsini təmin etmək üçün Heydər Əliyev Mərkəzinin imkanlarından səmərəli şəkildə istifadə edilib, tədbirlərin çoxu əsasən bu Mərkəzdə keçirilib. Rayonda Dövlət-gənclər siyasəti sahəsində bir sıra işlər görülüb, idman sahəsində müəyyən uğurlar qazanılıb. Gənclərin dövlət idarəçiliyinə cəlb edilməsi sahəsində mühüm addımlar atılıb, xeyli gənc kadr rayonun dövlət müəssisələrində, digər sahələrdə işə cəlb olunublar. Rayonda yaranmış problemlərin həllində gənclərin iştirakı əsas götürülüb.

Əhalinin problemlərinin həlli rayon İcra Hakimiyyətinin gündəlik diqqətində olan əsas məsələdir

İqtisadi inkişafın əsasını təşkil edən ictimai-siyasi mühitin sabitliyi, siyasi fəaliyyətin qanuni əsasda təşkili, insanların sosial həyatının zənginləşdirilməsi rayon İcra Hakimiyyətinin gündəlik diqqətində olan məsələlərdəndir. Hesabat dövründə rayonun 15 yaşayış məntəqəsində görüş-qəbullar keçirilib. Rayonda görülən işlər haqqında internet saytlarında və sosial şəbəkələrdə daha çox məlumatlar yerləşdirilib. Rayon İcra Hakimiyyətində əhalinin qəbulu, onları narahat edən problemlərin həllinə diqqət daha da artırılıb. Problemlərin daha çevik öyrənilməsi və tədbir görülməsi məqsədilə rayon İcra Hakimiyyətinin “Qaynar xətti” fəaliyyət göstərir.

İsmayıllılılar Ulu öndər Heydər Əliyev ideyalarına sadiqdirlər

İsmayıllı rayonunun sakinləri hər zaman siyasi fəallığı ilə seçilib və Ümummilli liderimiz Heydər Əliyev ideyalarına bağlılıq nümayiş etdirib. Rayonun əsas aparıcı siyasi qüvvəsi Yeni Azərbaycan Partiyasının İsmayıllı rayon təşkilatıdır. YAP İsmayıllı rayon təşkilatı 1993-cü ilin mart ayında yaradılıb. Rayon təşkilatında hazırda 85 ərazi ilk partiya təşkilatı fəaliyyət göstərir. YAP İsmayıllı rayon təşkilatının 7779 nəfər üzvü var. Bu üzvlərin 2861 nəfərini qadınlar, 3076 nəfərini isə gənclər təşkil edir. Bu ilin ilk yarısında rayon təşkilatına 170 nəfər üzv qəbul olunub. Vurğulamaq lazımdır ki, bütün İsmayıllı ictimaiyyəti Ulu öndər Heydər Əliyev kursunun davamçısı Azərbaycan Prezidenti İlham Əliyevin rəhbərliyi ilə ölkəmizin daha da inkişaf edəcəyinə inanır və Prezidentin apardığı sosial-iqtisadi siyasəti dəstəkləyir.

Pərviz SADAYOĞLU

Yeni Azərbaycan.-2014.- 3 iyul.- S. 6.