Sabiq baş prokuror Əli Ömərov Yeni Azərbaycan Partiyasına üzv qəbul olunub

Əli Ömərov: Ömrümün axırına qədər Heydər Əliyevçiyəm, Heydər Əliyevçi olacağam, Ulu öndər Heydər Əliyevin siyasətini davam etdirən Prezident İlham Əliyevi dəstəkləyəcəyəm

Məlum olduğu kimi, Azərbaycanın sabiq baş prokuroru Əli Ömərov bir müddət öncə ölkə mediasına açıqlamasında Yeni Azərbaycan Partiyasına (YAP) üzv olmaq istədiyini bildirmişdi. Daha sonra o, bu məqsədlə partiyanın Nəsimi rayon təşkilatına müraciət edib. Sabiq baş prokurorun müraciəti müsbət cavablandırılıb və o, Yeni Azərbaycan Partiyası üzvlüyünə qəbul olunub. Əli Ömərovla müsahibəmiz həm bu seçiminin səbəbləri, həm də bu günlərdə yaranmasının 22-ci ildönümünü qeyd edən Yeni Azərbaycan Partiyasının uğurlu fəaliyyət yoluna həsr olunub.

- Əli müəllim, bildiyimiz kimi, bu gün Yeni Azərbaycan Partiyasının yaradılmasının 22-ci ildönümü tamam olur. Siz “91-lər”in üzvü kimi, bu proseslərin birbaşa içərisində olmusunuz. İstərdik ki, ilk olaraq, 22 il öncə, Yeni Azərbaycan Partiyasının yaradılmasını zəruri edən, bu prosesi şərtləndirən amillər barədə danışaq...

- Bilirsiniz ki, müstəqilliyin ilk illərində Azərbaycanda vəziyyət heç də ürəkaçan səviyyədə deyildi. Ölkədə bütün sferalarda çox ağır proseslər baş verirdi, yenicə müstəqilliyini elan etmiş dövlətimizin gələcəyi sual altında idi. Həmin vaxt Ulu öndər Heydər Əliyev Naxçıvanda idi. Azərbaycanın tanınmış ziyalıları ölkəmizi mövcud olan ağır vəziyyətdən xilas etmək yolunu Heydər Əliyevi Bakıya dəvət etməkdə və Onun yenidən hakimiyyət sükanı arxasına keçməsində görürdülər. Bu məqsədlə yeni bir partiyanın yaradılması üçün Ulu öndərə müraciət edildi. O vaxt mən Gəncə şəhər nəqliyyat prokuroru işləyirdim. Həmin dövrdə partiyanın təsis olunmasında iştirak edən, təşəbbüs göstərən insanlar mənə də müraciət etdilər. Bu təşəbbüsü göstərən insanlar arasında Azərbaycan cəmiyyətinin kifayət qədər tanınmış, nüfuzlu alimləri, ziyalılar var idi. Mən heç düşünmədən bu müraciətə qoşuldum. Gəncədən, Şəmkirdən, Daşkəsəndən və digər ətraf rayonlardan insanlara müraciət edirdik, xalqı məlumatlandırırdıq. Hamı bir nəfər kimi bu təşəbbüsü dəstəkləyirdi. Çünki Azərbaycan xalqı Heydər Əliyevi yaxşı tanıyırdı, Onun səriştəsinə, bacarığına bələd idi. Biz hamımız Heydər Əliyevin hakimiyyətə gəlməsini Azərbaycan xalqının nicatı kimi qəbul edirdik. Xalqımız dərk edirdi ki, Azərbaycan xalqını bu bəlalardan xilas etməyə qadir olan yeganə şəxs, məhz Ulu öndər Heydər Əliyevdir. Və doğrudan da belə oldu. Ona görə də, bu gün biz Yeni Azərbaycan Partiyasının dövrün təxirəsalınmaz tələbindən irəli gələrək Azərbaycanı düşdüyü ağır vəziyyətdən çıxarmaq və inkişaf etdirmək məqsədilə yaradıldığını deyirik.

Heydər Əliyevin adı ilə bağlı olan hər bir şey mənim üçün əzizdir

- Yeni Azərbaycan Partiyası yaranmasından çox qısa vaxt sonra xalqın böyük dəstəyini qazandı və hakimiyyətə gələrək iqtidar partiyasına çevrildi. Partiyanın bu uğurunu şərtləndirən amillər nədən ibarət idi?

- 1992-ci il noyabr ayının 21-də Naxçıvanda keçirilən təsis konfransı ilə Yeni Azərbaycan Partiyası yaradıldı. Qısa vaxt ərzində partiyanın yerli təşkilatları da fəaliyyətə başladı və xalqımız, cəmiyyətimizin qabaqcıl qüvvələri bu partiyanın ətrafında səfərbər oldular. Partiyanın üzvləri qısa vaxt ərzində artdı. Mən o vaxt partiyaya üzv olmadım. Çünki bilirsiniz ki, qanuna əsasən inzibati orqanlarda çalışan insanlar heç bir partiyanın üzvü ola bilməzdilər. Yoxsa, mən elə həmin vaxtdan partiyanın üzvü olardım. Çünki Heydər Əliyevin adı ilə bağlı olan hər bir şey mənim üçün əzizdir. Mən sadə bir kəndçi oğluyam və Cənubi Qafqazda demək olar ki, yeganə ordu generalı rütbəsini məhz Heydər Əliyevin sayəsində, Onun təqdimatı əsasında mənə Milli Məclis verib. Mən Onun yaxşılıqlarını, mənə münasibətini, Onun məni Azərbaycan tarixinə salmağını heç vaxt unutmaram. Bir neçə gün əvvəl mənə saytların birindən müraciət etmişdilər ki, “91-lər”in üzvü kimi sizi Yeni Azərbaycan Partiyasına dəvət etsələr, gedərsinizmi?”. Mən onlara da bu cavabı vermişdim ki, məmnuniyyətlə mən bu partiyaya üzv olaram. Çünki bu partiyanın yaradıcısı və qurucusu Ulu öndər Heydər Əliyevdir. Mən 20 ildir ki, işləmirəm, işsizəm. Amma bu 20 ildə bir dəfə də olsun, Ümummilli lider Heydər Əliyevin qurduğu, yaratdığı dövlətə, Onun siyasi kursuna qarşı bir cümlə belə söz deməmişəm. Bəzi jurnalistlər sual veriblər ki, rüşvətxorluq, korrupsiya ilə mübarizədə dövlətin gördüyü tədbirləri necə qiymətləndirirsiniz? Mən də cavab vermişəm ki, korrupsiya və rüşvətxorluq dünyanın hər bir ölkəsində var. Azərbaycanda da bununla bağlı ciddi mübarizə aparılır. Cənab Prezident də dəfələrlə vurğulayıb ki, hər bir vətəndaş bu sosial bəlaya qarşı mübarizədə yer almalıdır, hamı bu problemə qarşı münasibətini ortaya qoymalıdır. Mən vətəndaşlara müraciət edib onları bu mübarizəyə qoşulmağa çağırmışam.

YAP-ın qısa zamanda təşkilatlanmasını zəruri edən digər səbəblər isə xalqın bu partiyaya, onun lideri Ulu öndər Heydər Əliyevə böyük etimadının və rəğbətinin olması idi. Bayaq qeyd etdiyim kimi, hamı Heydər Əliyevin bu dövləti xilas edəcəyinə inanırdı. Və bu inam YAP-ın daha da güclənməsini təmin etdi. Başqa bir səbəb isə, YAP-ın o dövrün siyasi konyukturasında yeniliklərlə, yeni ideyalarla çıxış etməsi idi. YAP dövlətimizin inkişafı üçün kifayət qədər mütərəqqi, zamanın tələblərinə cavab verən, gerçəklikləri doğru təhlil edərək irəli sürülmüş təkliflərlə çıxış edirdi ki, bu da xalqımız tərəfindən dəstəklənirdi.

Bakını gəzəndə insanın qəlbi fərəh hissi ilə döyünür

- Əli müəllim, dövrün mürəkkəb reallıqları və siyasi, iqtisadi şərait fonunda Yeni Azərbaycan Partiyasının yaranması xalqımıza və dövlətimizə nə verdi?

- Yeni Azərbaycan Partiyasının yaranmasından sonra dövlətimizin və xalqımızın qazandıqları göz qabağındadır. Adicə Bakıda gəzməklə nə qazandığımızı görmək mümkündür. Bu gün Bakı Avropanın ən gözəl, inkişaf etmiş şəhərlərindən birinə çevrilib. Bakı dünyanın mühüm tədbirlərinə ev sahibliyi edir, görüşlər keçirilir. Bakını gəzəndə insanın qəlbi fərəh hissi ilə döyünür. Bakı Azərbaycan xalqının adına layiq şəhərə çevrilib. Bakının inkişafı, həm də ölkəmizin son illərdə necə inkişaf etdiyini göstərir. Eləcə də, regionlarımız sürətlə inkişaf edir. Kəndlərimiz, qəsəbələrimiz, rayonlarımız son illərdə müasirləşib, yüksək sürətlə inkişaf edib. Hər yanda quruculuq, yaradıcılıq hökm sürür. Mən bir misal çəkim. Vaxtilə ancaq varlıların, dövlət işçilərinin avtomobilləri var idi. İndi şəhərdə avtomobilin əlindən tərpənmək olmur. Əgər insanların dolanışığı yaxşı deyilsə, onda bu qədər avtomobil hardandır? Restoranlara girirsən, hər yan doludur. Bazara gedirsən, yenə eyni mənzərə. Deməli, xalqımızın da güzəranı yaxşıdır, insanlar normal işlə təmin olunublar, yoxsulluq aradan qaldırılır. Bax budur Yeni Azərbaycan Partiyasının Azərbaycan dövlətinə və xalqına qazandırdıqları. Budur ötən 22 ilin inkarolunmaz reallığı və nəticəsi.

YAP hər gün böyüyərək, inkişaf edərək bu gün regionun ən güclü siyasi təşkilatına çevrilib

- Məlum olduğu kimi, 2005-ci ildə keçirilən Yeni Azərbaycan Partiyasının üçüncü Qurultayında Prezident İlham Əliyev yekdilliklə partiyanın Sədri seçildi. Bir çox siyasi ekspertlər YAP-ın inkişaf yolunu təhlil edərkən Qurultayın bu qərarını partiyanın fəaliyyətində yeni bir mərhələnin başlanğıcı kimi qiymətləndirirlər. Sizcə, ötən 9 ildə partiyamızın əldə etdiyi nailiyyətləri necə təhlil etmək olar?

- Xatırlayırsınızsa, hələ 2003-cü ildə cənab İlham Əliyevin prezidentliyə namizədliyi irəli sürüləndə diskussiyalar təşkil olunmuşdu. O vaxt məndən də müsahibə götürmüşdülər. Mən demişdim ki, necə ola bilər ki, çayxanada oturub “çayxana siyasətçiliyi” edənlər dövlət başçısı olmaq iddiasında ola bilər, amma bir çox xarici dilləri öz ana dili kimi bilən, beynəlxalq münasibətlər üzrə elmi fəaliyyətlə məşğul olmuş, ən əsası Heydər Əliyev kimi bir dahinin ailəsində böyümüş, Onun tərbiyəsi altında yetişmiş bir siyasətçidən prezident ola bilməz? Cənab Prezident ötən illərdə Öz geniş, çoxşaxəli, dövlətimizin inkişafına xidmət edən fəaliyyəti ilə bir daha təsdiqlədi ki, O, bu ölkənin lideri olmağa bütün opponentlərindən daha çox layiqdir və bu işi hamıdan yaxşı bacarır. Amma çox təəssüf ki, həmin dövrdə bəzi qüvvələr mənim bu fikirlərimin ictimailəşməsinə, mətbuata çıxmasına mane oldular. Bu gün yenə də təkrar edirəm. Cənab İlham Əliyev bu gün dünyada ən nəhəng siyasətçilərdən biridir. Prezident İlham Əliyev xalqımızın daha yaxşı yaşaması, ölkəmizin inkişafı, Azərbaycanın dünyada tanınması naminə böyük işlər görməkdədir.

Qaldı ki, 2005-ci ildən sonra Yeni Azərbaycan Partiyasının keçdiyi inkişaf yoluna, hesab edirəm ki, bu mərhələ YAP üçün kifayət qədər zəngin və uğurlu olub. Partiyanın sıraları xeyli genişlənib, gənclərin bu partiyaya marağı daha da artıb. YAP hər gün böyüyərək, inkişaf edərək bu gün regionun ən güclü siyasi təşkilatına çevrilib. Bu da təsadüfi deyil. Çünki Yeni Azərbaycan Partiyası Azərbaycan cəmiyyətinin avanqard siyasi qüvvəsi olaraq, cəmiyyətimizin tanınmış, savadlı, intellektual ziyalı potensialını da öz ətrafında birləşdirib. Azərbaycanın inkişafında, Azərbaycanın çiçəklənməsində Yeni Azərbaycan Partiyasının üzvlərinin hər birinin böyük zəhməti, əməyi olmuşdur. Bu gün bu partiyaya xalqını, dövlətini sevən, vətənpərvər, səriştəli, savadlı insanlar rəhbərlik edirlər. Ona görə də, YAP ötən 22 ildə böyük uğurlar qazanıb. İnanıram ki, bundan sonra da partiyamızın uğurları daha da artacaq və YAP dövlətimizin, xalqımızın daha parlaq gələcəyi naminə uğurlu fəaliyyətini davam etdirəcək.

- Əli müəllim, sizi bir daha Yeni Azərbaycan Partiyasına üzv olmağınız münasibətilə təbrik edir, gələcək fəaliyyətinizdə uğurlar arzulayırıq...

- Çox sağ olun. Mən bir daha qeyd etmək istəyirəm ki, Ulu öndər Heydər Əliyevin yaratdığı partiyaya üzv olmaq mənim üçün böyük şərəfdir. Mənim həmişə bir siyasi yolum olub. Ömrümün axırına qədər Heydər Əliyevçiyəm, Heydər Əliyevçi olacağam, Ulu öndər Heydər Əliyevin siyasətini davam etdirən Prezident İlham Əliyevi dəstəkləyəcəyəm.

Mənim sizdən və hər kəsdən bir istəyim var. Qoy hamı hər bir məsələyə vicdanlı münasibət göstərsin. Əli Ömərov əgər pisdirsə, pis münasibət göstərsinlər, yaxşıdır, yaxşı münasibət göstərsinlər. Hər şey həqiqətdən asılıdır, əgər bir yerdə həqiqət varsa, orada tərəqqi də var, inkişaf da var. Hər bir uşağın, hər bir balanın, hər bir övladın ailəsi var. Hərə öz ailəsini xoşbəxt görmək istəyir. Günahsız kiməsə münasibət pis olanda, günahsız kimsə cəzalandırılanda, təbii ki, heç kimə xoş gəlmir. Mən hələ prokuror işlədiyim dövrlərdə öz tabeçiliyimdə olan işçilərimə deyirdim: bala, bir nəfəri çağırmısınız. Əgər siz ona qarşı haqsızlıq edəndə, onun özünə, ailəsinə necə təsir edəcəksə, özünüzü qoyun onun yerinə. Sizə o münasibət göstərilsə, sizin qohum-əqrəbalarınıza göstərilsə necə hərəkət edərsiniz, ondan sonra hərəkət edin. Mən bunu deyirəm ki, heç vaxt heç kimə qarşı pis olmamışam, olmayacağam.

Aqşin ŞAHİNOĞLU

Yeni Azərbaycan.-2014.- 21 noyabr S. 8.