Bizim məqsədimiz doğma torpaqlarımıza qayıtmaqdır

Müsahibimiz Milli Məclisin deputatı Elman Məmmədovdur

- Elman müəllim, başa vurduğumuz 2013-cü il ölkəmiz üçün bir çox uğurlarla yadda qaldı. Ötən il ərzində Ermənistan-Azərbaycan, Dağlıq Qarabağ münaqişəsinin həlli istiqamətində atılan addımları necə qiymətləndirirsiniz?

- Bilirsiniz ki, Ermənistan-Azərbaycan, Dağlıq Qarabağ münaqişəsi ölkəmizin yeganə ciddi problemidir. Bu gün ölkəmiz hərtərəfli şəkildə inkişaf edir, amma Ermənistanın Azərbaycana hərbi təcavüzü nəticəsində torpaqlarımızın 20 faizinin işğal olunması inkişafımızın daha da sürətlənməsinə başlıca maneədir. Dövlət rəhbərliyi ölkəmizin ərazi bütövlüyünün təmin olunması üçün bütün imkanlarını səfərbər edib və hazırda münaqişənin həlli üçün danışıqlar aparılır.

Prezident İlham Əliyevin rəhbərliyilə yürüdülən xarici siyasətdə Dağlıq Qarabağ münaqişəsinin Azərbaycanın ərazi bütövlüyü çərçivəsində həll edilməsi prioritet yer tutur. Məhz dövlət başçısının elan etdiyi hücum diplomatiyası sayəsində bu istiqamətdə ciddi nəticələr əldə olunub. Məlum olduğu kimi, iki il idi ki, prezidentlər səviyyəsində görüş keçirilmirdi. Ötən ilin noyabr ayında belə bir görüş keçirildi. Bu amil sülh prosesinin irəliyə aparılması üçün yeni imkanlar yarada bilər. Eyni zamanda, 2013-cü ildə il dünyanın bir sıra dövlətlərinin parlamentlərində, beynəlxalq təşkilatlarda Ermənistanın işğalçı siyasətini ifşa edən qətnamələr, qərarlar qəbul edilib.

Azərbaycanın hücum diplomatiyası nəticəsində Ermənistanın xarici siyasəti iflasa uğradılıb və işğalçı dövlət dalana dirənib. Azərbaycan regional siyasətini elə aparır ki, Ermənistan seyt-not vəziyyətində qalıb. Bunun nəticəsində isə işğalçı ölkədə sosial-iqtisadi problemlər daha da dərinləşib, mühacirətin sürəti dəfələrlə artıb. Yəni 2013-cü il ərzində də Azərbaycan bu məsələdə nəinki bir addım geri çəkilməyib, əksinə mövqeyini daha da gücləndirib. Prezident İlham Əliyevin həyata keçirdiyi hücum diplomatiyası nəticəsində işğalçı Ermənistan dalana dirənib.

Problem bundadır ki, ATƏT-in Minsk qrupunun həmsədri olan dövlətlər, eləcə də müvafiq beynəlxalq qurumlar işğalçı Ermənistana qarşı ciddi tədbirlər görmür, hətta bəzi hallarda onu himayə edirlər. Ona görə də, Ermənistan öz xarici havadarlarına güvənərək münaqişənin sülh yolu ilə həllini uzadır. Amma nəzərə almalıdır ki, Azərbaycan güclü dövlətdir, onuün güclü ordusu var və öz torpaqlarını işğaldan azad etməyə qadirdir.

- Həmsədrlər münaqişənin həlli ilə bağlı mütəmadi olaraq bəyanatlar verirlər. Bu bəyanatlara münasibətiniz necədir?

- Həmsədrlərin hərəsi bir dövləti təmsil edir. Bu dövlətlərin də strateji maraqları var. Həmin dövlətlərin nümayəndələri özbaşına deyil ki? Həmsədrlər elə bil ki, böyük bir teatrın mahir rejissorları tərəfindən idarə olunan aktyorlardır. Onların vaxtaşırı bəyanat verərək, “hər şey yaxşıdır, irəliləyiş var, bu il qızıl ildir” və s. demələri dünya ictimaiyyətini aldatmaqdır. Çünki onları 1 milyondan çox məcburi köçkünün hansı vəziyyətdə yaşaması, bu insanların öz doğma torpaqlarına qayıtmaq istəyi deyil, münaqişənin həllində vasitəçi kimi əldə etdikləri titulları, səfir vəzifəsi, yaxşı maaşları və xarici ölkələri gəzmələri maraqlandırır. Həmsədrlər bu imtiyazları əldən verməmək üçün yalan məlumatlar yaymaqla məşğuldurlar. Odur ki, onların münaqişənin həlli istiqamətində heç bir iş görmədikləri və dünya ictimaiyyətini aldatdıqlarına dair dövlət qurumları, qeyri-hökumət təşkilatları, bütövlükdə Azərbaycan ictimaiyyəti həmsədr dövlətlərin rəhbərliyinə müraciət etməlidir.

Onu da demək istəyirəm ki, həmsədr dövlətlərin maraqları bir-birilə toqquşur. Çox zaman onlar haqq-ədalət tərəfindən yox, öz maraqlarından çıxış edirlər. 1992-ci ildən Ermənistanın tərəfini tutublar. Onlar yalnız ermənilərin dediyini deyib Azərbaycanı güzəştə məcbur etmək istəyirlər. Amma vaxtı ilə Ulu öndər Heydər Əliyevin, hazırda isə Prezident İlham Əliyevin də birmənalı olaraq qeyd etdiyi kimi, Azərbaycanın ərazi bütövlüyü danışıqlar predmeti deyil və olmayacaq. Torpaqlarımızın bir qarışını da güzəştə getməyəcəyik. Azərbaycanın güzəşti odur ki, ermənilərə yüksək statuslu muxtariyyət versin. Əslində, ATƏT-in qərarlarının icra mexanizmi yoxdur. Ona görə də, işğalçılıqdan əl çəkməsi üçün erməniləri məcbur etmək çətindir. Amma münaqişə ilə bağlı BMT Təhlükəsizlik Şurasının qətnamələri icra olunarsa, Ermənistanı məcbur etmək olar ki, işğal etdiyi torpaqları tərk etsin.

- Ötən ilin noyabr ayında Azərbaycan və Ermənistan prezidentlərinin görüşü keçirildi. Həmsədrlər dövlət başçılarının növbəti görüşünün keçirilməsinə çalışırlar. Dağlıq Qarabağın azərbaycanlı icmasının danışıqlar prosesinə münasibəti necədir?

- Danışıqlar həmişə lazımdır. Amma danışıqları apara-apara gücümüzü daha da artırmalıyıq. Prezident İlham Əliyevin dediyi kimi, güclü iqtisadiyyat, güclü ölkə, güclü orduya sahib olmaq Azərbaycanın mövqeyini gücləndirir. Biz bu siyasəti daim yürütməliyik. Bu, vacib amildir. Kimin gücü varsa, danışıqlarda onun sözü kəsərli olur. Biz bu məntiqə əsaslanmalıyıq. Mənə elə gəlir ki, biz nəticədə təcavüzkarı danışa-danışa yerində oturdacağıq. Əks halda, torpaqlar hansı yolla olursa olsun, işğaldan azad ediləcək.

- Ermənilər xalqımıza qarşı qətliamlar, vəhşiliklər törədiblər. Gələcəkdə torpaqlar işğaldan azad olunandan sonra ermənilərlə birgə yaşayış çətin olmayacaq ki?

- Zaman hər şeyi həll edir. Müharibə nəticəsində 30 min şəhid vermişik. Amma nəzərə alsaq ki, dünyada, Avropada nə qədər müharibələr olub, qanlar tökülüb. Bu gün isə Avropa bir ailə kimi yaşayır. Şəxsən mən ermənilərlə bir yerdə yaşamaq istəmərəm, çünki ermənilər doğmalarımı öldürüblər. Amma bu, mənim istəyimdən asılı deyil. Beynəlxalq qayda-qanunlara əməl etməliyik. Birgə yaşamağa məhkumuq. Amma biz Azərbaycan qanunları, Konstitusiyası çərçivəsində bərabərhüquqlu yaşamalıyıq. Keçmiş SSRİ dövründə isə bərabərhüquqlu yaşamamışıq. 1923-cü ildən 1991-ci ilə qədər Dağlıq Qarabağda hüqüqu pozulanlar azərbaycanlılar olub. Məsələn, Vilayət Partiya Komitəsi kimi nəhəng strukturda cəmi 4 azərbaycanlı ştatı var idi. Eləcə də, Əsgəran, Mardakert, Hadrut rayonlarının partiya komitələrinin hərəsində cəmi 1 azərbaycanlı ştatı var idi. Digər qurumlarda da belə olub.

- Elman müəllim, Dağlıq Qarabağın azərbaycanlı icması Azərbaycan həqiqətlərinin dünya ictimaiyyətinə çatdırılması istiqamətində nə kimi işlər görür?

- Əsas məqsədimiz daha yüksək səviyyədə təşkilatlanmaq, daha yaxşı fəaliyyət göstərmək üçün səylərimizi artırmaqdır. Biz Dağlıq Qarabağın azərbaycanlı icması olaraq Prezident İlham Əliyevin Ermənistan-Azərbaycan münaqişəsinin həlli ilə bağlı apardığı işlərə kömək etmək istiqamətini götürməliyik, Ona dayaq olmalıyıq. Qarabağ həqiqətlərinin, ermənilər tərəfindən başımıza gətirilən müsibətlərin dünyaya çatdırılması, Xocalı soyqırımını, təcavüzkarı tanıtmaq, son nəticədə torpaqlarımızı işğaldan azad etmək üçün biz beynəlxalq aləmlə çox işləməliyik.

Xaricə ünvanladığımız müraciətlərdə Ermənistanın təcavüzü nəticəsində 1 milyondan artıq soydaşımızın qaçqın və məcburi köçkün vəziyyətinə düşdüyünə, onların hüquqlarının pozulduğuna dair faktlar öz əksini tapmalıdır. Bu, hamımızın üzərinə düşən vəzifədir və həmin vəzifəni də özümüzə borc bilib icra etməliyik. Qeyd etdiyim istiqamətdə bir çox işlər görülüb və hazırda da davam edir. Bizim məqsədimiz doğma torpaqlarımıza qayıtmaqdır və inanırıq ki, dövlətimizin həyata keçirdiyi uğurlu siyasət nəticəsində buna nail olacağıq.

Yeni Azərbaycan.-2014.- 9 yanvar.- S.4.