Bakıda III Regional İnternet İdarəçilik Forumu keçirilir

Hafiz Paşayev: İnformasiya texnologiyalarının inkişafı və onun iqtisadiyyatda tətbiqi çox əhəmiyyətlidir

“Bakutel 2015” XXI Azərbaycan Beynəlxalq Telekommunikasiya və İnformasiya Texnologiyaları sərgi-konfransı çərçivəsində dekabrın 3-də Bakıda “İKT innovasiyalarının regional inkişaf mühitinin yaradılması” mövzusunda III Regional İnternet İdarəçilik Forumu (RİİF) işə başlayıb. Azərbaycanın Rabitə və Yüksək Texnologiyalar Nazirliyinin, BMT-nin İnkişaf Proqramının (UNDP) və “ADA” Universitetinin təşkilatçılığı ilə keçirilən və iki gün davam edəcək forumun rəsmi tərəfdaşları isə BMT-nin İqtisadi və Sosial Məsələlər üzrə Departamenti (UNDESA) və İnternet İdarəçilik Forumudur (IGF).

AZƏRTAC xəbər verir ki, forumun rəsmi açılışında “ADA” Universitetinin İnformasiya Texnologiyaları və Mühəndislik İnstitutunun dekanı, elmlər doktoru Muhammadu Kah forumun informasiya kommunikasiya texnologiyaları (İKT) sektorunun inkişafı üçün əhəmiyyətindən danışıb. Bildirib ki, yeni texnologiyaların işlənib hazırlanması yüksək fəaliyyət tələb edir və davamlı inkişafın təmin olunmasında əsas rol oynayır: “Regionda yeni İKT iqtisadiyyatının yaradılmasına ehtiyac var. Keçirilən forum bu işin daha da təkmilləşdirilməsinə öz töhfəsini verən platforma olacaq. Bununla da İKT və innovasiyalı iqtisadiyyat qurulacaq, tələbələrin yeni startaplar və İKT innovasiyaları yaratmalarına stimul verəcək. Nəticədə isə yüksək ixtisaslı gənclərə və kadrlara olan tələbatın təmin edilməsi mümkün olacaq”.

“ADA” Universitetinin bu ekosistemə dəstək verdiyini deyən Muhammadu Kah bildirib ki, universitet bu sahədə fəaliyyət göstərən qurumlarla əməkdaşlıq edir. O deyib: “ADA” Universitetində informasiya texnologiyaları sahəsi üzrə 4 proqram icra olunur. III Regional İnternet İdarəçilik Forumu isə rəqəmsal iqtisadiyyatın inkişafına öz töhfəsini verəcək”.

“ADA” Universitetinin rektoru, səfir Hafiz Paşayev tədbirin universitet üçün əhəmiyyətini qeyd edərək deyib: “Çox şadıq ki, III Regional İnternet İdarəçilik Forumu “ADA” Universitetində keçirilir və bu, bizim üçün çox vacibdir. Əminik ki, bu forum universitetin İKT fakültəsinin tələbələri üçün əhəmiyyətli olacaq. Çünki informasiya texnologiyaları gənc nəslin həyatının bir hissəsidir. Əsas məsələ isə gənclərin bu imkanlardan necə faydalanmasıdır”.

BMT ilə “ADA” Universitetinin müxtəlif sahələrdə əməkdaşlıq etdiyini deyən Hafiz Paşayev bildirib ki, İKT sahəsi universitet üçün prioritetdir: “Enerji iqtisadiyyatının şaxələndirilməsi üçün bu forum mühüm rol oynayacaq. Çünki informasiya texnologiyalarının inkişafı və onun iqtisadiyyatda tətbiqi çox əhəmiyyətlidir”.

Azərbaycanın Rabitə və Yüksək Texnologiyalar Nazirliyinin internet, idarəçilik forumu katibliyi layihəsinin rəhbəri Nəriman Hacıyev qeyd edib ki, forumun keçirilməsində məqsəd daha səmərəli, effektiv regional iqtisadi inkişafa və mədəni irəliləyişə nail olmaq üçün internetin tətbiqinin müxtəlif yollarını nümayiş etdirməkdir. Həmçinin, forum regional İKT inkişafının mərkəzi olan Azərbaycanın yerli iştirakçılarının beynəlxalq mütəxəssislərlə təcrübə mübadiləsi və əməkdaşlıq qurması, bu sahədəki problemlərin birgə müzakirəsi və maraqlı innovativ layihələrin nümayişi üçün platformadır.

Azərbaycanda diplomatik fəaliyyəti başa çatan BMT-nin rezident əlaqələndiricisi, BMT-nin İnkişaf Proqramının rezident nümayəndəsi Antonius Broek deyib: “Azərbaycan İKT sahəsində BMT-nin siyahısında yüksək pillədə qərarlaşıb. Biz təklif edirik ki, digər ölkələr Azərbaycanın bu sahədəki qazandığı təcrübədən bəhrələnsin və istifadə etsin. BMT bu sahənin daha da inkişaf etdirilməsi üçün Azərbaycana daim dəstək olacaq”.

Son illər Azərbaycanda İKT sektorunun inkişafı üçün mühüm addımların atıldığını deyən A.Broek qeyd edib ki, bunun nəticəsində də Azərbaycan İKT sahəsində öz sözünü deyən ölkəyə çevrilib.

Forumun informasiya texnologiyalarının inkişafına mühüm töhfələr verəcəyini deyən BMT-nin İqtisadi və Sosial Məsələlər üzrə Departamentinin (UNDESA) idarəetmə və ictimai administrasiya üzrə baş mütəxəssisi Vyaçeslav Çerkasov qeyd edib: “İKT sahəsinin inkişafı bu günün ən aktual məsələlərindəndir. Müxtəlif qurumlar və şirkətlər isə bu sahənin daha da təkmilləşdirilməsi üçün mühüm layihələr reallaşdırırlar. Çünki müasir dövr və qloballaşan dünya bunu tələb edir”.

Forum çərçivəsində “Təhsilin texnologiyalar vasitəsilə transformasiyası”, “Məxfilik və innovasiya üçün kiber-təhlükəsizlik - regional kiber-təhlükəsizlik alyansları təşəbbüsləri”, “Texnologiyanın gələcəyi 2016-2020 - proqnozlar nələrdən xəbər verir”, “Ağıllı cəmiyyət strategiyası - hökumətlər İKT-dən yeni cəmiyyətin yaradılmasında istifadə edirlər”, “Sosial media və paylaşma iqtisadiyyatı” və “İqtisadi şəxələndirilmənin İKT innovasiyalar mühitinə təsiri” kimi mövzular müzakirə olunur. Tədbirdə 250 nəfərdən çox Azərbaycan və digər ölkələrin hökumət, biznes və diplomatik nümayəndələri, elm və vətəndaş cəmiyyəti sahələrinin mütəxəssisləri internetlə bağlı aktual problemləri müzakirə etmək üçün toplaşıblar. Ötən illərdə olduğu kimi, builki forumda da BMT-nin İqtisadi və Sosial Məsələlər üzrə Departamenti, BMT-nin Avropa üzrə İqtisadi Komissiyası, Ümumdünya İnternet Korporasiyası (ICANN) və digər beynəlxalq qurumların nümayəndələri iştirak edirlər. Tədbirin sponsoru “Nar” şirkətidir.

Qeyd edək ki, Regional İnternet İdarəçilik Forumu 2012-ci ildə Bakıda təşkil edilmiş 7-ci İnternet İdarəçilik Forumu ərəfəsində yaranıb və hər il keçirilir. Tədbirə BMT-nin İqtisadi və Sosial Məsələlər üzrə Departamenti, BMT-nin İnternet İdarəçilik Forumu üzrə Cenevrə Katibliyi dəstək verir.

Yeni Azərbaycan.- 2015.- 5 dekabr.- S.- 8