Azərbaycan idmançıları Rio-de-Janeyroda tarix yazdı

Ölkəmizin hər Olimpiadada qazandığı uğurlar daha da artır

Müstəqillik yolu ilə inamla irəliləyən Azərbaycanın qısa müddətdə böyük uğur qazandığı sahələrdən biri də idmandır. Tam qətiyyətlə demək mümkündür ki, artıq idman Azərbaycanda kütləvi hal alıb və cəmiyyətin ayrılmaz bir hissəsinə çevrilib. Ölkəmizdə getdikcə daha çox sayda gənc bu sahəyə üz tutaraq müxtəlif idman növləri ilə məşğul olmağı özlərinin həyat tərzinə çevirirlər. İdmançılarımızın mötəbər yarışlarda ölkəmizi uğurla təmsil edərək böyük nailiyyətlər qazanmaları və dünyanın möhtəşəm arenalarında himnimizi səsləndirmələri, Vətənə medallarla dönmələri Azərbaycanın beynəlxalq miqyasda müsbət imicinin formalaşmasına, nüfuzunun artmasına, daha geniş miqyasda tanınmasına müsbət təsir göstərir.

Azərbaycanın qısa müddətdə idman sahəsində böyük uğurlara imza atması, ilk növbədə, bu sahənin inkişafına göstərilən dövlət qayğısı ilə bağlıdır. Prezident İlham Əliyev həm dövlət başçısı, həm də Milli Olimpiya Komitəsinin rəhbəri kimi, Azərbaycanda idmanın kütləviliyinin təmin olunmasına böyük diqqət yetirir. Prezident İlham Əliyev XXXI Yay Olimpiya Oyunlarında iştirak edəcək Azərbaycan nümayəndə heyətinin yolasalma mərasimindəki nitqində ölkəmizdə idmanla, Olimpiya Hərəkatı ilə bağlı məqsədyönlü siyasət həyata keçirildiyinə xüsusi diqqət çəkərək deyib: “Azərbaycan idman dövlətidir. Bunu bütün dünya, idman ictimaiyyəti qəbul edir, bilir. Azərbaycanda idmanla, Olimpiya hərəkatı ilə bağlı məqsədyönlü siyasət aparılır. Məhz bu siyasət nəticəsində biz bu gün bu uğurlar haqqında danışa bilərik. Düşünülmüş siyasət, məqsədyönlü işlər idmanı Azərbaycanda, cəmiyyətdə önəmli bir ictimai amilə çevirmişdir”.

Azərbaycan Olimpiya oyunlarında öz rekordunu yenilədi

Azərbaycanın bütün dünyada yüksək səviyyəli idman ölkəsinə çevrildiyini idmançılarımızın beynəlxalq səviyyəli yarışlarda ildən-ilə daha uğurlu nəticələr qazanmaları bir daha təsdiqləyir. Bir neçə gün əvvəl Rio-de-Janeyroda başa çatan XXXI Yay Olimpiya Oyunlarında da atletlərimizin qazandığı nailiyyətlər bunun ən bariz sübutudur. Belə ki, Braziliyanın paytaxtında keçirilən son Olimpiya Oyunlarında 56 atletlə təmsil olunan Azərbaycan komandası 18 (1 qızıl, 7 gümüş və 10 bürünc) medal qazanıb. Komandamızın hesabına yeganə qızıl medalı taekvondoçu Radik İsayev yazdırıb. Sərbəst güləşçilər Toğrul Əsgərov, Xetaq Qazyumov, boksçu Lorenzo Sotomayor, cüdoçular Rütəm Orucov və Elmar Qasımov, qadın güləşçimiz Mariya Stadnik və kanoeçi Aleksandr Demyanenko yalnız final görüşlərində uduzaraq gümüş medala sahib olublar. Taekvondo yarışlarında Milad Beiqi Harçeqani və Patimat Abakarova, boksçu Kamran Şahsuvarlı, güləşçilər Rəsul Çunayev, Sabah Şəriəti, Nataliya Sinişin, Hacı Əliyev, Cəbrayıl Həsənov və Şərif Şərifov, avarçəkən İnna Osipenko-Radomskaya isə bürünc medalla kifayətləniblər. Bu göstərici ilə yarışları 39-cu sırada başa vurub.

Xatırlatmaq yerinə düşər ki, 2015-ci ildə respublikamızı təmsil edən idmançılar çoxsaylı beynəlxalq yarışlarda 823 medal qazanıblar ki, onların da 321-i qızıl medaldır. İdmançılarımızın son illərdə ayrı-ayrı mötəbər turnirlərdə qazandıqları nəticələr isə daha sevindirici olub. Çinin Nancinq şəhərində yeniyetmələr arasında ikinci Yay Olimpiya Oyunlarında iştirak etmiş milli komandamız 10-cu yeri tutub. Milli komandamızın təmsilçiləri yarışlarda 12 medal qazanıblar ki, onlardan 5-i qızıl medaldır. Bu nəticələrə görə Azərbaycan Avropa ölkələri arasında 6-cı, müsəlman ölkələri arasında isə 1-ci yerdə qərarlaşıb.

Ötən ilin yayında Bakıda keçirilən birinci Avropa Oyunları da bütövlükdə Azərbaycan idmanının təntənəsinə çevrildi desək, əsl həqiqəti ifadə etmiş olarıq. Dünyanın 50 ölkəsindən təxminən 6 min atletin qatıldığı birinci Avropa Oyunlarında Azərbaycan idmançıları 21 qızıl, 15 gümüş və 20 bürünc medal qazanmağa müvəffəq oldular. Yarışlarda respublikamız Almaniya, Fransa, Böyük Britaniya, İtaliya, Ukrayna, Türkiyə kimi yüksək idman nailiyyətləri olan ölkələri geridə qoyaraq Rusiyadan sonra qitə ikincisi oldu.

Müstəqillik illərində Azərbaycan idmançılarının Olimpiadalarda çıxışları da uğurlu olub. Əgər Azərbaycan müstəqil ölkə kimi Atlantada bir, Sidneydə üç, Afinada beş, Pekində yeddi, Londonda 10 medal qazanmışdısa, Rio-2016 Olimpiya Oyunlarında medalların sayını daha da artırıb - 18. Bu isə həm də o deməkdir ki, Azərbaycan Olimpiya oyunlarındakı rekordunu yeniləyib.

Azərbaycan komandası ən səmərəli nəticə əmsalı üzrə birinci yeri tutub

Yeri gəlmişkən, nüfuzlu “The Telegraph” qəzeti son Olimpiya oyunları ilə bağlı çox maraqlı təhlillər aparıb. Qəzetdə dərc olunan məqalədə Azərbaycan komandasının öz heyətinin sayına görə ən məhsuldar nəticə qazandığına diqqət çəkilib. Qəzet müqayisələr apararaq o nəticəyə gəlib ki, atlet sayına görə ən səmərəli nəticə əmsalı üzrə Azərbaycan komandası birinci yerə layiqdir. Qeyd etdiyimiz kimi, Oyunlarda 56 atletlə təmsil olunan Azərbaycan komandası 18 medal qazanıb. Bu, o deməkdir ki, atletlərimizin hər 3 nəfərindən biri medal qazanıb və beləliklə də, komandamızda səmərəli nəticə əmsalı 0,3-ə bərabər olub. Bu kriteriyaya görə Azərbaycan Rio-2016-da liderlik edən Çin və ABŞ kimi ölkələri belə qabaqlayır. Müqayisə üçün bildirək ki, bu ölkələrdə səmərəli nəticə əmsalı 0,2-yə bərabərdir.

Taekvondoçularımızın böyük qələbəsi

Azərbaycan olimpiya yığmasının Rio-2016-da ən diqqət çəkən uğurlarından birinə şübhəsiz ki, taekvondoçularımız imza atdılar. Belə ki, yığmamızın üzvləri Milad Beiqi Harçeqani və Patimat Abakarova bürünc medal qazandığı halda, komandamızın lideri, Dünya və Avropa çempionu Radik İsayev bütün rəqiblərini məğlub edərək fəxri kürsünün birinci pilləsinə çıxıb. Bununla da, idmançımızın şərəfinə Rio-de-Janeyroda Azərbaycan Dövlət Himni səslənib.

Azərbaycan yığması bu göstərici ilə “Rio-2016”nın taekvondo yarışlarında dördüncü pillədə qərarlaşıb. Millimiz yalınız Koreya Respublikası, Çin və Böyük Britaniyadan geri qalıb. Avropada ikinci olan komandamız keçmiş Sovet İttifaqında isə birincidir.

Azərbaycan Respublikasının Prezidenti İlham Əliyev avqustun 21-də Rio-de-Janeyroda keçirilən Olimpiya Oyunlarında qızıl medal qazanmış taekvondoçumuz Radik İsayevə telefonla zəng edib.

Prezident İlham Əliyev bildirib ki, Radik İsayevin bu inamlı qələbəsi bütün Azərbaycan xalqını sevindirib. Dövlətimizin başçısı qeyd edib ki, Radik İsayev əvvəllər də sübut edib ki, o, taekvondo üzrə öz çəki dərəcəsində dünyada ən güclü idmançıdır. Belə ki, o, həm dünya çempionatında qələbə qazanıb, indi də Olimpiya çempionu adına layiq görülüb. Prezident İlham Əliyev idmançımızı səmimi qəlbdən təbrik edib, ona yeni-yeni uğurlar və qələbələr arzulayıb. Dövlətimizin başçısı onun təbriklərini idmançının məşqçisinə də çatdırmağı xahiş edib.

Təbii ki, idmançılarımızın mötəbər beynəlxalq turnirlərdə, Olimpiya Oyunlarında uğurlarının sayını getdikcə daha da artırmaları hər bir azərbaycanlının qəlbində sonsuz qürur hissi oyadır. Şübhə yoxdur ki, idmançılarımız mötəbər turnirlərdə, o cümlədən də Olimpiadalarda uğurlu çıxışlarını gələcəkdə də davam etdirəcəklər. Prezident İlham Əliyev buna əminliyini ifadə edərək deyib: “İdman qələbələri hər bir vətənpərvər Azərbaycan vətəndaşını sevindirir. Hər dəfə biz beynəlxalq yarışlarda görəndə ki, bizim bayrağımız qaldırılır, ürəyimiz fərəhlə dolur. Bu sevinc anlarını bizə idmançılar yaşadır. Əminəm ki, gələcək yarışlarda idmançılar yenə də qələbə qazanacaqlar, Azərbaycan xalqını sevindirəcəklər”.

Zəngin infrastruktur bazası və dövlətin diqqət və qayğısı bu böyük nailiyyətləri şərtləndirir

Son illərdə respublikamızda idmanın inkişafından və kütləviləşməsindən söhbət açarkən yeni yaradılan müasir infrastrukturun rolunu xüsusi qeyd etmək lazımdır. Yeni tikilən və yaxud yenidən qurulan arenalar sayəsində Azərbaycan son dərəcə müasir idman infrastrukturuna malik ölkəyə çevrilib. Hazırda ölkəmiz idman infrastrukturu təminatı baxımından dünyanın inkişaf etmiş ölkələrindən geri qalmır. Prezident İlham Əliyev respublikamızı fərqləndirən bu cəhətə diqqət çəkərək bildirib: “Azərbaycanda idman infrastrukturu yaradılır. Son illər ərzində bölgələrdə 40-dan çox Olimpiya idman mərkəzi yaradılmışdır, tikilmişdir. Bakıda isə idman infrastrukturu ən yüksək səviyyədədir. Təkcə son bir-iki il ərzində bir neçə gözəl, möhtəşəm idman obyekti istifadəyə verilmişdir”.

Qeyd edək ki, ölkəmizdə müasir idman infrastrukturu yaradılması istiqamətində məqsədyönlü işə 1997-ci ildə Milli Olimpiya Komitəsinin rəhbərliyinin dəyişməsindən sonra başlanıb. Azərbaycanda idman və çoxminli idmançılar ordusu MOK-un yeni prezidenti İlham Əliyevin simasında öz böyük hamilərini tapdılar. MOK-un yeni rəhbərliyinin təşəbbüsü ilə respublikamızda idman təsərrüfatının yenilənməsinə, o cümlədən də bu sahədə müasir infrastruktur qurulmasına start verildi.

Ötən ilin iyununda ölkəmizin böyük uğurla ev sahibliyi etdiyi birinci Avropa Oyunlarına hazırlıq çərçivəsində həyata keçirilən layihələr ölkəmizin idman infrastrukturunu əhəmiyyətli dərəcədə zənginləşdirib. Birinci Avropa Oyunlarına hazırlıq məqsədilə 5 müasir idman qurğusu - Milli Gimnastika Arenası, BMX Veloparkı, Bakı Su İdmanı Mərkəzi, Bakı Atıcılıq Mərkəzi və möhtəşəm Olimpiya Stadionu inşa edilib. Bundan başqa, ən yüksək dünya standartları səviyyəsində yaradılan atletlər kəndi barədə də ən xoş sözlər söyləmək mümkündür. Atletlər kəndi 7300 çarpayısı olan 1000-dən artıq mənzildən ibarətdir. Birinci Avropa Oyunlarına hazırlıq çərçivəsində, həmçinin bir sıra mövcud idman qurğularında, o cümlədən də Bakı İdman Sarayında, Kristal Hollda, Heydər Əliyev adına İdman-Konsert Sarayında əsaslı yenidənqurma və zəruri uyğunlaşdırma işləri aparılıb. Əlamətdar haldır ki, ölkəmizdə yeni inşa olunan və yaxud yenidən qurulan idman obyektlərində ən yüksək standartlar tətbiq olunur.

Bakıda yelkən idmanı üçün nəzərdə tutulan Yaxt-klub, “Musado” Taekvando evi, Otüstü xokkey kompleksi, “ABU-Arena” həndbol mərkəzi də yeni tikilən idman obyektləri sırasındadır.

Yeni yaradılan qurğular, arenalar funksional baxımdan müasir idman obyektləri olmaqla yanaşı, eyni zamanda, gözəl memarlıq nümunələridir. Yeni idman obyektlərinin ətrafında bir qayda olaraq genişmiqyaslı abadlıq işləri həyata keçirilir ki, bu da həm ayrı-ayrı yaşayış məntəqələrinin gözəlləşməsi, həm də yerlərdə ekoloji problemlərin həlli baxımından çox önəmlidir. Bir vaxtlar Bakı Olimpiya Stadionunun ətrafının ekoloji fəlakət zonası olduğunu hamı yaxşı xatırlayır. Buradakı bataqlıq və çirkab sularının axıdıldığı Böyükşor gölü, sözün əsl mənasında, ekoloji təhlükə mənbəyi idi. Olimpiya Stadionunun inşası ilə paralel şəkildə həmin ərazidə böyük abadlıq işləri həyata keçirildi, Böyükşor gölü tullantılardan təmizləndi və orada ekoloji cəhətdən təmiz, təxminən 1 kilometr uzunluğunda yeni park-bulvar yaradıldı. Su İdmanı Sarayının ətrafı da əvvəllər neft tullantıları ilə çirklənmiş ərazilər idi. Qısa müddətdə bəhs olunan ərazi də abadlaşdırılaraq orada bakılıların və şəhərimizin qonaqlarının sevimli istirahət yerinə çevrilən gözəl park salınıb. Prezident İlham Əliyev Azərbaycanın regionlarında da müasir idman infrastrukturunun yaradılmasının önəmini isə xüsusi vurğulayıb: “İdman infrastrukturunun xüsusilə regionlarda yaradılması imkan verir ki, bölgələrdə yaşayan uşaqlar, gənclər idmanla məşğul olsunlar. Mən bütün regional Olimpiya mərkəzlərinin açılışlarında şəxsən iştirak etmişəm və demişəm, əsas vəzifə ondan ibarətdir ki, biz idmanın kütləviliyini təmin edək”.

Mötəbər beynəlxalq yarışların keçirilməsinin Azərbaycana həvalə edilməsi ölkəmizə olan inamın ifadəsidir

Ölkəmizin müsbət beynəlxalq imicinin möhkəmlənməsində idman sahəsində həyata keçirilən tədbirlər də mühüm rol oynayır. Respublikamızda idmanın inkişafının güclü şəkildə dəstəklənməsi və təşviq olunması beynəlxalq idman ictimaiyyətində Azərbaycana böyük inam yaradıb. Bu inamın nəticəsidir ki, Azərbaycan artıq dünya və Avropa miqyaslı yarışların keçirildiyi bir mərkəzə çevrilib. Prezident İlham Əliyev Azərbaycanda keçirilən müxtəlif idman yarışlarının səviyyəsinin ildən-ilə yüksəldiyindən məmnunluq ifadə edərək vurğulayıb: “Ölkəmizdə bir qayda olaraq beynəlxalq idman yarışları keçirilir. Biz bunu artıq neçə ildir müşahidə edirik. İldən-ilə bu yarışların sayı da artır və səviyyəsi də yüksəlir. Bu gün dünya, Avropa çempionatlarının Azərbaycanda keçirilməsi adi hala çevrilib. Əgər əvvəlki illərdə, xüsusilə 2000-ci illərin əvvəllərində hansısa gənclər və yaxud da yeniyetmələr arasında Avropa və ya dünya çempionatı keçirilirdisə və biz bundan fərəhlənirdiksə, bu gün dünya çempionatları, Avropa çempionatları, Olimpiya Oyunlarına təsnifat turnirləri, müxtəlif digər beynəlxalq yarışlar Azərbaycanda, demək olar ki, ildə bir neçə dəfə keçirilir. Bu, beynəlxalq idman aləmi tərəfindən bizə göstərilən böyük hörmətdir”.

Azərbaycan ev sahibliyi etdiyi turnirlərdə bir qayda olaraq öz xoş niyyətini nümayiş etdirərək yarışların ölkələr və xalqlar arasında dostluq, həmrəylik bayramına çevrilməsinə çalışır. Son illərdə Bakıda futbol üzrə qızlar arasında dünya çempionatı keçirilib, ölkəmiz bədii gimnastika və taekvando üzrə Avropa çempionatlarına, həmçinin yüksək səviyyəli bir sıra başqa turnirlərə ev sahibliyi edib. Yuxarıda qeyd etdiyimiz kimi, 2015-ci ilin yayında Bakıda tarixdə ilk dəfə birinci Avropa Oyunları keçirildi. Avropa Olimpiya Komitəsinə üzv olan bütün ölkələrin qatıldığı birinci Avropa Oyunları Yay Olimpiya Oyunları səviyyəsində keçirildi. Yarışların təşkilində Azərbaycan yeni dünya standartları müəyyənləşdirdi. Bir qədər bundan əvvəl isə Bakı böyük tamaşaçı auditoriyasına malik “Formula-1” yarışlarına uğurla ev sahibliyi etdi. Cari ildə ölkəmizdə həmçinin dünya şahmat olimpiadası keçiriləcək. 2017-ci ildə ölkəmiz daha bir mötəbər yarışmaya - İslam Həmrəylik Oyunlarına ev sahibliyi edəcək.

Azərbaycanın həm Avropa Oyunlarına, həm də İslam Həmrəylik Oyunlarına ev sahibliyi etməsi ölkəmizin dünya miqyasında oynadığı nadir rolu təsdiqləmək baxımından çox önəmlidir. Məlumdur ki, hazırda dünya miqyasında milli-dini-etnik zəmində münaqişələr baş verir, ksenefobiya halları artır. Belə bir şəraitdə Azərbaycan xalqımızın ənənələrinə və xoş niyyətinə sadiq qalaraq sivilizasiyalararası əməkdaşlığın möhkəmlənməsinə, xalqların, ölkələrin bir-birlərinə yaxınlaşmasına öz töhfəsini verməyə çalışır. Prezident İlham Əliyev Avropa Oyunları və İslam Həmrəylik Oyunlarının dünyada multikulturalizmi ən yaxşı formada təcəssüm etdirdiyinə diqqət çəkərək bildirib: “2015-ci ildə Avropa, 2017-ci ildə İslam Oyunlarının keçirilməsi ölkəmizin nadir şəraitini əks etdirir. Bildiyiniz kimi, bu il Azərbaycanda “Multikulturalizm ili”dir. Multikulturalizmi ən yaxşı formada təcəssüm etdirən bu iki oyundur - Avropa və İslam Oyunları”.

Yüksək idman nailiyyətləri ölkəmizin uğurlarının tərkib hissəsidir

Son 12 ildə Azərbaycan özünü dünyaya bütün sahələrdə dinamik inkişaf edən ölkə kimi təqdim edib. Bəhs olunan dövrdə ölkəmizdə uğurlu regional inkişaf strategiyası reallaşdırılıb və paytaxt, iri şəhərlərlə paralel şəkildə bölgələrin tarazlı inkişafı təmin edilib. İntensiv şəkildə həyata keçirilən layihələr sayəsində respublikamız müasir infrastruktur təminatına malik ölkəyə çevrilib. Yeni inşa olunan yollar, körpülər, logistik mərkəzlər Azərbaycanın tranzit imkanlarını əhəmiyyətli dərəcədə artırıb. Hazırda ölkəmizin təşəbbüsləri ilə yeni regional layihələr icra edilir. Bütün bunlar hər sahədə dinamik inkişaf edən Azərbaycanın müasir mənzərəsini səciyyələndirir. Respublikamız, eyni zamanda, regionda sabitliyin və təhlükəsizliyin təmin olunmasına, Avropanın enerji təchizatının möhkəmlənməsinə də öz sanballı töhfəsini verir. Bir sözlə, Azərbaycanın inkişafı hərtərəfli xarakter daşıyır və respublikamız bölgədə təhlükəsizlik, sabitlik və inkişaf məkanı kimi fərqlənir. Prezident İlham Əliyev diqqəti ölkəmizin hərtərəfli inkişaf etdiyinə yönəldib. Dövlət başçısı vurğulayıb ki, idman uğurları ölkəmizin uğurlarının tərkib hissəsidir: “Biz öz yolumuzla gedirik. İdman uğurları ölkəmizin uğurlarının tərkib hissəsidir. Ancaq güclü dövlətlərdə güclü idman var. Olimpiya Oyunlarının nəticələrinə baxın. Hansı komandalar birinci yerlərdədir. Onların böyük əksəriyyəti inkişaf etmiş ölkələrin komandalarıdır. Yəni idmanı ümumi inkişafdan ayırmaq olmaz. Ona görə Azərbaycan idmanının inkişafı ümumi inkişafımızın təzahürüdür. Əgər bizdə iqtisadi, maliyyə müstəqilliyi olmasaydı və biz iqtisadi cəhətdən inkişaf etməsəydik, idmanın inkişafına istədiyimiz səviyyədə vəsait qoya bilməzdik”.

Mübariz ABDULLAYE

Yeni azərbaycan.- 2016.- 23 avqust.- S.1