Dövlət proqramlarının uğurlu icrası kənd təsərrüfatının inkişafına təkan verib

Regionlarda məhsul istehsalının artırılması istiqamətində davamlı tədbirlər həyata keçirilir

Azərbaycanın regional inkişaf strategiyasının uğurla həyata keçirilməsindən söhbət açarkən aqrar sektorda əldə olunan uğurları xüsusi vurğulamaq lazımdır. Davamlı və hərtərəfli dövlət dəstəyi sayəsində respublikamızda kənd təsərrüfatında əhəmiyyətli artıma nail olunub. Dünya Bankının məlumat bazasına əsasən, son on il ərzində dünya miqyasında kənd təsərrüfatı sahəsi üzrə artım 31,8 faiz təşkil edib. Azərbaycanda isə bu göstərici 48,9 faiz, yəni dünya üzrə orta göstəricidən 17,1 faiz çox olub ki, bu da respublikamızda aqrar sahənin dinamik inkişafını təsdiqləyir.

Perspektivdə isə Azərbaycanda aqrar sahənin daha da sürətlə inkişaf edəcəyi gözlənilir. Dünya Bankının verdiyi proqnozlara görə, ölkəmizdə 2016-cı ildə kənd təsərrüfatında 4,2 faiz, 2017-ci və 2018-ci illərdə isə hər il 4 faiz olmaqla artım gözlənilir. Dünya Bankının məlumatında Azərbaycanın hesabatın əhatə etdiyi Şərqi və Mərkəzi Avropa ölkələri arasında ön yerlərdən birini tutacağı qeyd olunub. O da əlamətdar haldır ki, respublikamızda aqrar sektorun ayrı-ayrı istiqamətləri üzrə artım dinamikası ümumi inkişaf göstəricilərini daha da üstələyir.

Ümumiyyətlə, son illərdə ölkənin regionlarında aqrar sektorun davamlı inkişafına nail olmaq məqsədilə zəruri tədbirlər həyata keçirilir. Fermerlərə güzəştli subsidiyaların artırılması, dövriyyəyə yeni torpaqların cəlb olunması, kollektiv təsərrüfatların yaradılması, zəruri texnikanın alınması bu kimi tədbirlər sırasındadır. Bütün bunlarla yanaşı, yeni təsərrüfatçılıq metodlarının tətbiqi, müasir aqrar-sənaye müəssisələrinin yaradılması sayəsində regionlarda aqrar sektorun inkişafında yeni mərhələ başlayıb. Hazırda respublikamızda iri fermer təsərrüfatlarının yaradılması uğurla həyata keçirilir.

Regionlarda kənd təsərrüfatının inkişafının təminində həyata keçirilən Dövlət proqramlarının mühüm rolu var. Belə ki, 2004-cü il fevralın 11-də təsdiqlənmiş “Azərbaycan Respublikası regionlarının sosial-iqtisadi inkişafı Dövlət Proqramı”nı bölgələri dirçəldən mühüm ilkin konsepsiya adlandırmaq olar. Belə ki, məqsədyönlü və səmərəli fəaliyyət nəticəsində 2004-2008-ci illəri əhatə edən ilk Dövlət Proqramında qarşıya qoyulan hədəflərə vaxtından tez çatmaq mümkün olub. Bunun ardınca isə 2009-2013-cü illəri əhatə edən Dövlət Proqramında qarşıya qoyulan vəzifələr də uğurla yerinə yetirildi.

Hazırda isə 2014-2018-ci illəri əhatə edən Dövlət Proqramı icra olunmaqdadır. Sözsüz ki, bu Dövlət proqramları qarşıya qoyulan məqsədlərə nail olunması ilə yanaşı, Azərbaycanda bir sıra sahələrdə sıçrayışlı inkişafa da təkan verib. Digər tərəfdən, regionların sosial-iqtisadi inkişafı ilə bağlı qəbul edilmiş Dövlət proqramlarında nəzərdə tutulmuş tədbirlərin uğurla yerinə yetirilməsi ölkə iqtisadiyyatının dayanıqlı inkişafını təmin etməklə yanaşı, kənd təsərrüfatının inkişafına zəmin yaradıb.

Aqrar sektorun inkişafından söz düşmüşkən, regionlarımızda meyvə-tərəvəz yığımında mühüm göstəricilər əldə edilir. Xüsusi qeyd edilməlidir ki, ənənəvi meyvələrlə yanaşı, bu gün bölgələrimizdə yeni sort meyvələrin yetişdirilməsi yönümündə də işlər aparılır. Məsələn, Lənkəranın sitrus meyvə bağlarında kinkan meyvəsinin yığımına başlanılıb. Vurğulayaq ki, vətəni cənub-şərqi Çin və Hind-Çin olan bu meyvə sitrus meyvələri arasında ən xırda ölçüyə malikdir. Mərhələlərlə yetişən kinkanın məhsuldarlığı bu il yaxşıdır. Böyük ağaclar 60-70 kiloqram bar verib.

Qeyd edək ki, ötən il Koreyadan Azərbaycana gətirilərək Lənkəranda 15 hektar ərazidə əkilmiş yeni növ sitrus ağacları da nübar bar verib. Rayonun Sütəmurdov və Gərmətük kəndlərinin ərazisində əkilmiş ağacları qışın şaxtalı havalarından qorumaq üçün qabaqlayıcı tədbirlər görülür.

İmişli rayonunda isə şəkər çuğunduru sahələrində məhsul yığımı davam edir. Bu il rayonda 211 hektar sahədə şəkər çuğunduru əkilib. Yığım başlayandan bu günə kimi plantasiyalardan 5 min 683 ton məhsul toplanıb ki, bu da ötən ilin müvafiq dövrü ilə müqayisədə 1843 ton çoxdur.

Qəbələ rayonunun iqtisadiyyatında önəmli yerlərdən birini tutan bağçılıq kənd əhalisinin əsas məşğuliyyət sahəsi hesab olunur. Qəbələnin meyvə bağlarında bol məhsul yetişdirən kəndlilər qoz, fındıq və şabalıd yığımını başa çatdırıblar. Qəbələdə mövcud olan 3220 hektar fındıq bağından 6400 ton məhsul əldə edilib. Bu da ötən ildəkindən 100 ton çoxdur. Kəndlilər məhsulu yerli bazarlara çıxarmaqla yanaşı, sərfəli qiymətə fındıq qəbulu məntəqələrinə də satırlar. Rayonda bir fındıq emalı zavodu, eləcə də kiçik fındıq emalı müəssisələri fəaliyyət göstərir. Bu da kəndliləri ildən-ilə fındıq bağlarını genişləndirməyə və məhsuldarlığı daha da artırmağa həvəsləndirir. Cari ildə 40 hektar sahədə yeni fındıq bağı salınıb. Bu da ötənilkindən 12 hektar çoxdur. Həmçinin Qəbələnin qoz və şabalıd bağlarında yetişən bol məhsulun vaxtında və itkisiz toplanılması üçün bağlarda iməciliklər təşkil olunub. Kəndlilər cari ildə 390 hektar şabalıd bağından 430 ton, 160 hektar qoz bağından 375 ton məhsul əldə ediblər. Qeyd edək ki, qəbələli fermerlər son bir ildə 10 hektar sahədə yeni şabalıd, 12 hektar sahədə isə qoz bağı salıblar.

Kürdəmir rayonunda da bitkiçilik sahəsi üzrə cari ilin məhsul toplanışı başa çatmaq üzrədir. Bu il bölgədə 14090 ton kartof, 22514 ton tərəvəz, 69602 ton bostan məhsulları və sair yığılıb. Məhsul istehsalı ötən illə müqayisədə xeyli artıb. Belə ki, kartof istehsalı 555 ton, tərəvəz istehsalı 254 ton, bostan məhsullarının istehsalı isə 3681 ton çox olub.

Eləcə də, Göyçay rayonunun xurma bağlarında məhsul yığımı başa çatıb. Bu il Göyçayın 30-a yaxın kəndində xurma bağlarında bol məhsul yetişdirilib. Havanın yağmurlu və şaxtalı keçməsini nəzərə alan kəndlilər məhsulun vaxtında və itkisiz yığılması üçün bütün qüvvələri səfərbər ediblər. Rayonda mövcud olan 805 hektar bar verən xurma bağından 18 min 700 ton məhsul əldə edilib. Qeyd edək ki, məhsuldarlıq ötən ildəkindən 400 ton çox olub. Ötən il rayonda xurma bağlarından 18 min 300 ton məhsul toplanılıb. İş adamları rayon sakinlərindən aldıqları xurmanın bir hissəsini qış aylarına saxlamaq üçün Göyçayın Potu kəndindəki tutumu 700 ton və Ərəbcəbirli kəndindəki tutumu 1000 ton olan soyuducu anbarlara yerləşdiriblər.

Qeyd edək ki, göyçaylı fermerlər son illər rayonda xurma bağlarını xeyli genişləndiriblər. Cari ilin yazında rayonda 12 hektar sahədə yeni xurma bağları salınıb. Hazırda isə daha 10 hektar sahədə yeni bağın salınması üçün işlər görülür. Mütəxəssislər rayonda bu sahənin sürətlə inkişafının səbəbini məhsulun yerli və xarici bazarlara çıxarılması üçün lazımi şəraitin yaradılması və meyvənin saxlanılması üçün Göyçayda soyuducu anbar komplekslərinin fəaliyyət göstərməsi ilə əlaqələndirirlər.

Ağdaş rayonunda da heyva yığımı başa çatıb. Havanın əlverişli olması və ağaclara lazımi aqrotexniki qulluq göstərilməsi nəticəsində bu il rayonda bol məhsul əldə edilib. Kəndlilər iki ay öncə bağlarda məhsul tədarükünə başlayıblar və ümumilikdə 2500 tondan çox heyva yığıblar. Ötən il isə bağlardan 2300 ton heyva yığılmışdı. Bağbanlar hər hektardan orta hesabla 60-70 ton məhsul topladıqlarını deyirlər. Ağdaş heyvası yerli bazarlarda satılmaqla yanaşı, xarici bazarlara da çıxarılıb. Rayonda mövcud olan 1608 hektar bar verən meyvə bağlarının 340 hektarını heyva bağı təşkil edir. Bağbanlar ötən il 10, bu ilin yaz aylarında isə 14 hektar sahədə yeni heyva bağı salıblar. Hazırda yeni meyvə bağlarının salınması üçün kəndlərdə hazırlıq işləri görülür.

Qeyd edək ki, heyvaçılıq rayonun Orta Ləki, Aşağı Cardam, Güvəkənd, Yenikənd kəndlərində əhalinin əsas gəlir mənbəyi hesab edilir. Bu kəndlərdə heyvanın 15 sortu yetişdirilir.

Prezident İlham Əliyevin aqrar sahənin inkişafına göstərdiyi diqqət və qayğı, kənd təsərrüfatı məhsulları istehsalçılarına dövlət dəstəyi ilə əlaqədar imzaladığı sərəncamlar Zaqatala rayonunda da bu sektorun inkişafına güclü təkan verib. Belə ki, son 10 ildə Zaqatala rayonunda aqrar sahədə ümumi məhsul istehsalının həcmi 2,7 dəfə artıb. O cümlədən ötən müddətdə rayonda taxıl istehsalı 54 faiz, kartof istehsalı 50 faiz, meyvə və tərəvəz istehsalı 21 faiz, bostan məhsullarının istehsalı 14 faiz yüksəlib. Rayonda istehsal olunan tərəvəz və bostan məhsulları daxili tələbatdan 2,2 dəfə, meyvə və giləmeyvə isə 5,4 dəfə çoxdur.

Şamaxı rayonunda meyvə yığımı başa çatıb. Cari mövsümdə mövcud 442,9 hektar meyvə bağlarından 1101 ton məhsul yığılıb. İstehsal olunan meyvə ötən ildəki göstəricidən 222 ton çox olub. Qeyd edək ki, Şamaxıda son illər yeni meyvə bağları salınıb. Burada daha çox alma və qoz yetişdirilir. Yetişdirilən məhsul şirə zavodlarına satılır, habelə yerli bazarlara çıxarılır.

Cəbhə bölgəsində yerləşən Tərtər rayonunda payız-tarla işləri davam etdirilir. Bu il torpaq mülkiyyətçiləri 7932 hektarda buğda, 4282 hektarda arpa, 195 hektarda lobya, 2 hektarda darı, 1 hektarda sarqo, 153 hektarda qarğıdalı, 918 hektarda dən üçün günəbaxan, 534 hektarda kartof, 1187 hektarda şəkər çuğunduru, 918 hektarda tərəvəz, 1035 hektarda pambıq əkiblər. Sahələrdən 41 min 233 ton taxıl, 967 ton lobya, 3 ton darı, 0,2 ton sarqo, 742 ton qarğıdalı, 2148 ton günəbaxan, 5831 ton kartof, 11 min 745 ton tərəvəz, 29 min 407 ton şəkər çuğunduru, 77 ton bostan bitkiləri, 1529,5 ton pambıq, həmçinin 8622 ton meyvə və giləmeyvə, 648 ton üzüm yığılıb.

Göyçay rayonunda nar yığımını başa çatdıran kəndlilər ötən ildəkindən daha çox məhsul əldə ediblər. Bu il bağlara göstərilən aqrotexniki qulluğun yüksək səviyyədə olması və havanın əlverişli keçməsi bol məhsulun əldə edilməsinə səbəb olub. Ən önəmlisi isə, qabaqlayıcı tədbirlər görüldüyü üçün bu il ağaclarda zədəli nar azlıq təşkil edib. Havanın yağmurlu və şaxtalı olmasını nəzərə alan kəndlilər meyvənin ağacda qalaraq tələf olmaması üçün iməciliklər təşkil edib, məhsul yığımını vaxtından tez başa çatdırıblar.

Cari ildə Göyçayda fermerlər və fərdi təsərrüfat sahibləri 3960 hektar nar bağından 48 min 500 ton məhsul yığıblar. Kəndlilər toplanan nar məhsulunu öz həyətlərində kiloqramını ölçüsünə görə 1-3 manata Rusiya və digər MDB ölkələrinin bazarlarına, eləcə də Bakı şəhərinə aparan iş adamlarına satıblar. İş adamları Göyçay narının 50 faizini Rusiya, Ukrayna və Gürcüstan bazarlarına çıxarıblar. Verilən məlumata görə, ötən il 47 min 200 ton nar məhsulu tədarük olunub.

Qeyd edək ki, Göyçayda narçılığa olan maraq ildən-ilə artır, yeni və məhsuldar nar sortlarının yetişdirilməsi, təzə bağların salınması üçün tədbirlər görülür. Son iki ildə rayonda 350 hektar sahədə yeni nar bağı salınıb. Hazırda rayonda yeni nar bağlarının salınması üçün sahələrdə hazırlıq işləri görülür. Rayonun 40-a yaxın kəndində nar bağlarında əsasən ixrac qabiliyyətinə malik “Gülövşə”, “Vələs”, “Şəndi”, “Şirin”, “Bala Mürsəl” nar sortlarını yetişdirməyə üstünlük verirlər. Ötən əsrin 90-cı illərinin əvvəllərində Göyçayda cəmi 251 hektar məhsuldar nar bağı mövcud idisə, hazırda rayonda 4350 hektar sahədə nar bağı var ki, bunun da 3960 hektarı barverəndir.

Yeri gəlmişkən, bölgələrdə meyvə bağlarının artırılması yönümündə də mühüm addımlar atılır. Prezident İlham Əliyevin noyabrın 16-da imzaladığı “İpəkçiliyin və fındıqçılığın inkişafına dövlət dəstəyinin gücləndirilməsi ilə bağlı əlavə tədbirlər haqqında” Sərəncam ölkəmizdə meyvəçiliyin inkişafında xüsusi əhəmiyyət daşıyır. Ölkədə kənd təsərrüfatının ənənəvi sahələrindən olan ipəkçiliyin və fındıqçılığın inkişafının sürətləndirilməsi, bu sahələrin potensial imkanlarından səmərəli istifadə edilməsi və məhsul istehsalına əhalinin marağının artırılması üçün barama toxumlarının, tut (çəkil) tinglərinin və fındıq pöhrələrinin tədarük edilməsi və məhsul istehsalçılarına əvəzsiz verilməsi məqsədi ilə “Kənd təsərrüfatının inkişafına dövlət dəstəyinin gücləndirilməsi ilə bağlı əlavə tədbirlər haqqında” Azərbaycan Respublikası Prezidentinin 2015-ci il 2 mart tarixli Sərəncamı ilə Kənd Təsərrüfatı Nazirliyinə ayrılmış vəsait hesabına 1,463 milyon manat, o cümlədən barama toxumlarının alınmasına 163 min manat, tut (çəkil) tinglərinin alınmasına 600 min manat, fındıq pöhrələrinin alınmasına 700 min manat ödəniləcək.

Azərbaycan Prezidentinin kənd təsərrüfatının ixrac potensialı yüksək olan sahələrindən fındıqçılığın inkişaf etdirilməsi ilə bağlı verdiyi tapşırıq və göstərişlərin icrasını təmin etmək məqsədilə Qax rayonunda yeni fındıq bağlarının salınması istiqamətində zəruri işlər görülür. Qısa müddətdə rayon ərazisində bələdiyyə və xüsusi mülkiyyətə aid torpaq sahələrində 619 hektar sahədə yeni fındıq bağları salınıb və bu istiqamətdə iş sürətlə davam etdirilir. Ümumiyyətlə, yaxın illərdə rayon ərazisində 4 min hektar, o cümlədən cari ilin sonunadək min hektardan artıq sahədə yeni fındıq bağlarının salınması nəzərdə tutulur. Hazırda Qax rayonunda mövcud fındıq bağlarının ümumi sahəsi 5041 hektardır. Bu bağların 4600 hektarı barverəndir. Bu il fındıq bağlarından 3152 ton, yəni ötən ildəkindən 94 ton çox məhsul tədarük olunub.

İsmayıllı rayonunda da fındıqçılığın inkişafı ilə bağlı mühüm addımların atılması nəzərdə tutulur. Belə ki, qısa müddətdə 100 hektaradək sahədə fındıq tingi əkilib. Topçu, Çəmənli, Kürdmaşı, Sumağallı, Tircan, Talıstan və digər kəndlərin ərazilərində əkin daha mütəşəkkil həyata keçirilir. Bu işlərə yüzlərlə işçi qüvvəsi cəlb olunub. Fındıq tingləri əsasən Qax, Oğuz, Qəbələ rayonlarından gətirilir. Bununla yanaşı, daxili imkanlar hesabına da müəyyən qədər ting əldə olunub.

Zərdab rayonunda isə yeni tut bağları salınır, köhnə bağlar isə bərpa olunur. Ümumilikdə bu il bölgədə 280 min ədəd tut tinginin əkilməsi nəzərdə tutulub. Artıq əkin aparılacaq sahələrdə şumlama, hamarlama işləri başa çatdırılıb, quyuların qazılması davam etdirilir. Hələlik rayon üzrə 11 min 450 ədəd ting əkilib. Bundan 10 min 400 ədədi Zərdab Regional Meşəsalma Müəssisəsi tərəfindən, 1050-si isə Dəkkoba ərazi vahidlərində əkilib. Rayonda yeni tut bağlarının salınması, habelə köhnə bağların bərpası işləri davam etdirilir.

Şəki rayonunda isə baramaçılığın yem bazasının möhkəmləndirilməsi məqsədilə cari ilin payız mövsümündə 50 min ədəd tut tinginin əkilməsi nəzərdə tutulub. Artıq bu istiqamətdə işlərə başlanılıb və qısa müddətdə rayon ərazisində 10 min 800 ədəd tut tingi əkilib. Tinglərin 2300 ədədi kümdarların özlərinə məxsus pay torpaqlarında, 8500 ədədi isə Şəki Meşə Mühafizəsi və Bərpası Müəssisəsi tərəfindən dövlət meşə fonduna aid torpaqlarda əkilib. Hazırda tinglərin əkini sürətlə davam etdirilir.

Qeyd edək ki, “Şəki-İpək” ASC-nin tinglik sahəsində yetişdirilən tinglər fermerlərə pulsuz paylanılır. Bu tinglərdən yetişdirilən ağacların məhsuldarlığı 3 ildən sonra 50-60 faizə çatır. Hazırda Səhmdar Cəmiyyətin özünün Şəki rayonunun ərazisində icarəyə götürdüyü 117 hektar sahədə məhsuldar tut bağları var.

Balakən rayonunda da fındıq istehsalının arıtırılması yönümündə mühüm işlər görülür. Azərbaycan Prezidentinin fındıqçılığın inkişaf etdirilməsi ilə bağlı verdiyi tapşırıq və göstərişlərin icrasını təmin etmək məqsədilə hazırda Balakən rayonunda yeni fındıq bağlarının salınması istiqamətində zəruri işlər aparılır. Bu ilin payız əkini mövsümündə rayon ərazisində artıq 1413,2 hektar sahədə yeni fındıq bağları salınıb. Yeni fındıq bağlarının 726,5 hektarı xüsusi, 442,2 hektarı bələdiyyə, 244,5 hektarı isə dövlət mülkiyyətinə aid torpaq sahələrində salınıb. Payız mövsümünün sonunadək yeni salınan fındıq bağlarının ümumi sahəsinin 1500 hektara çatdırılması planlaşdırılır. Ümumiyyətlə, yaxın illər ərzində rayonda 5 min hektar sahədə yeni fındıq bağlarının salınması nəzərdə tutulur. Hazırda rayonda mövcud fındıq bağlarının ümumi sahəsi 4454 hektardır. Bu il bağlardan 3,5 min ton məhsul tədarük olunub.

Qeyd edək ki, tut, qoz, fındıq meyvələri ilə yanaşı, üzümçülüyün inkişafı istiqamətində mühüm addımlar atılmaqdadır. Bu il bölgələrdə yığılan üzüm ötən illərlə müqayisədə çoxdur. Məsələn, Naxçıvan Muxtar Respublikasında payızın ortasına qədər olan dövrdə 9625 ton üzüm toplanıb. Qeyd edək ki, muxtar respublikanın təbii-iqlim şəraiti üzümçülüyün inkişaf etdirilməsinə imkan verir. Üzümçülüyün inkişafına dair Dövlət proqramının icrası diqqət mərkəzində saxlanılır, yeni üzüm bağları salınır, bu sahədə istehsalın həcminin artırılması və bazarın tələbatının ödənilməsi məqsədilə ardıcıl tədbirlər görülür. Təkcə bunu qeyd etmək kifayətdir ki, ötən ay muxtar respublikada keçirilən iməciliklər zamanı Uzunoba su anbarının yaxınlığındakı ərazidə 2 hektar sahədə 2500-ə yaxın üzüm tingi əkilib. Bu sahədə elmi-tədqiqat işləri də davam etdirilir. AMEA Naxçıvan Bölməsi Bioresurslar İnstitutunda Naxçıvan Muxtar Respublikasında mövcud üzüm genofondunun toplanılaraq qorunması, həmçinin kompleks şəkildə botaniki, genetik və ampeloqrafik tədqiqi aparılmaqla, ərazidə yayılan 120-dən çox aborigen, 23 introduksiya olunmuş, 17 yeni klon variasiyalarından və 50-dən çox seleksiya üsulları ilə alınmış formalardan ibarət “Üzüm genofondu” kolleksiya bağı salınıb.

Tovuzlu sahibkarlar isə bu il üzüm bağlarında bol məhsul yetişdiriblər. Plantasiyalarda üzüm yığımı sona çatmaq üzrədir. Sahibkarlar bu ayın əvvəlinədək bağlardan 8280 ton məhsul toplayıblar. Yığılan məhsul ötən ilin müvafiq dövrü ilə müqayisədə 15 ton çoxdur.

Prezident İlham Əliyevin qeyri-neft sektorunun inkişafı ilə bağlı tapşırığına əsasən Tovuz rayonunda da yeni üzüm bağlarının salınmasına başlanılıb. Yeni üzüm bağları əsasən rayonun Bozalqanlı, Əlimərdanlı, Aşağı Quşçu, Dönük Qırıqlı və Düz Qırıqlı kəndlərinin ərazisində salınır. Mövsümün sonunadək 90 hektara yaxın yeni üzüm bağı salınacaq və bunun üçün də 156 mindən artıq üzüm tingi tədarük olunub. Qeyd edək ki, hazırda rayonda 636 hektar üzüm bağı var.

Sonda bir daha vurğulamaq yerinə düşər ki, etibarlı ərzaq təminatı hər bir ölkənin iqtisadi sabitliyinin və sosial dayanıqlılığının başlıca şərtidir. Məhz bu amil cəmiyyətin hər bir üzvünün əsas ərzaq məhsullarına olan tələbatının tam ödənilməsi üçün davamlı olaraq müvafiq tədbirlərin həyata keçirilməsini zəruri edir. Xüsusilə, son bir neçə ildə aparıcı ölkələrin maliyyə bazarında baş verən neqativ meyillər, habelə əhalinin sayının çoxalması nəticəsində ərzaq məhsullarına olan tələbatın yüksəlməsi, iqlim dəyişkənliyi, su ehtiyatlarının məhdudluğu, təbii fəlakətlər və digər səbəblərə görə əsas ərzaq məhsullarının dünya bazarlarında qiymətlərinin artmasına səbəb olduğu dövrdə bəzi ölkələrdə ərzaq qıtlığı real təhlükəyə çevrilib. Nəticədə, ərzaq məhsulları ilə etibarlı təminat beynəlxalq və milli səviyyədə iqtisadi təhlükəsizliyin əsas tərkib hissəsi olmaqla dünya ölkələrinin siyasətində aparıcı istiqamətə çevrilib. Bu baxımdan, Azərbaycanda əhalinin etibarlı ərzaq təminatı dövlətin iqtisadi siyasətinin başlıca istiqamətlərindən birini təşkil edir.

Pərviz SADAYOĞLU

Yeni Azərbaycan.- 2016.- 1 dekabr.- S.8