Torpaq əgər uğrunda ölən varsa, Vətəndir

Xalqımız Vətən uğrunda şəhid olan Mahir Mirzəyevin xatirəsini əbədi yaşadacaq

İşğalçı Ermənistan Dağlıq Qarabağ münaqişəsinin sülh yolu ilə həll edilməməsi, münaqişənin mümkün qədər uzanması üçün bütün təxribatlara əl atır. Elə bu il aprelin əvvəlində də düşmən cəbhə boyu təxribatlara əl atdı, mövqelərimizə hücum etdi. Amma Azərbaycan Ordusu düşmənə tutarlı cavab verdi, işğalçılar xeyli itkilərə məruz qaldılar. Həmin vaxt düşmən təxribatının qarşısını alarkən qəhrəmancasına şəhid olan oğullarımızdan biri də Mahir Sabir oğlu Mirzəyevdir. Qeyd edək ki, Mahir 1994-cü il fevralın 17-də Bakıda dünyaya gəlib. Anası Gülzar xanım Fatmayı orta məktəbində müəllimə işlədiyi üçün o, 2000-2005-ci illər ərzində, yəni 5-ci sinfə qədər orada oxuyub. Daha sonra isə ailə Nərimanov rayonuna köçdüyü üçün Mahir 36 saylı tam orta məktəbdə təhsilini başa vurub.

“Mahir deyirdi ki, əsgərlik kişilik məktəbidir”

Atası Sabir müəllim deyir ki, orta məktəbdə oxuduğu illərdə oğlu haqqında müəllimlərdən yalnız xoş sözlər eşidib: “Məktəbdə əlaçı idi. Mahir hər bir işdə fərqlənirdi. Çox yaxşı oxumaqla yanaşı, hər bir işdə mənə kömək edirdi. 2011-ci ildə ali məktəbə imtahan verdi və 600-dən çox bal toplayaraq Dövlət İqtisad Universitetinə ödənişsiz qəbul olundu. Bu ali məktəbi də uğurla başa vurandan sonra magistraturaya qəbul olundu. Dedi ki, hərbi xidmətə gedib qayıdandan sonra magistratura təhsilimi davam etdirəcəyəm. O deyirdi ki, əsgərlik kişilik məktəbidir və hər kəs vətən qarşısında borcunu verməlidir”.

Atası deyir ki, Mahir hər bir işdə mahir idi. Çünki o, bir çox işləri bacarırdı: “Təhsil ala-ala kompüter kurslarına gedərək bu sahədə yaxşı bilik qazanmışdı. Eləcə də 2015-ci ildə ölkəmizdə keçirilən ilk Avropa Oyunlarının könüllüsü oldu. Həmçinin “ASAN xidmət”də də könüllü kimi fəaliyyət göstərib. Buna görə də müvafiq təşkilatlar tərəfindən ona sertifikatlar, təşəkkürnamələr verilib”.

Beləliklə, Mahir ali təhsilini başa vurduqdan sonra 2015-ci ilin iyul ayında Nərimanov rayonundan hərbi xidmətə göndərilib və Tərtər istiqamətində cəbhə xəttində qulluq edib. Atasının dediyinə görə, sonuncu dəfə evə yanvarın 17-dən 27-dək məzuniyyətə gəlib. Onun bu gəlişi ailə üçün toy-bayrama çevrilib. Amma nə biləydilər ki, bu, onun son gəlişidir...

Sabir müəllim deyir ki, Mahir hərbi xidmətdə də nümunəvi olub: “Onun komandiri ilə görüşəndə Mahir haqqında çox xoş sözlər dedi. Mən övladımla qürur duyuram. Mahirin arzusu torpaqlarımızın işğaldan azad edilməsi idi. O, bu yolda da şəhid oldu. Həmişə deyirdi ki, mənimlə fəxr edəcəksiz”.

Sabir Mirzəyev övladının torpaqlarımızın işğalçılardan azad edilməsində iştirakından qürur duyduğunu bildirib: “Mən qürur duyuram ki, yeganə oğlumun torpaqlarımızın işğaldan azad olunmasında xidməti var, o, bu yolda şəhid oldu. Lazım gələrsə, mən də əlimə silah götürüb övladımın yolunu davam etdirməyə hazıram”.

“Gözləyirdik toyunu edək...”

“Valideynləri işlədiyi üçün çox zaman onu mən saxlayırdım, 7 yaşına qədər mən böyütdüm. Elə gözəl uşaq idi ki... Bir müddət bir yerdə yaşadıq, kiçik oğlumu evləndirdim, onlara da ev aldıq, köçüb ayrı yaşadılar. Amma Mahir mənə tez-tez baş çəkirdi. Məktəbdə əlaçı idi, öz biliyinə ali məktəbə daxil oldu”. Bunu isə şəhidin nənəsi Yaygül Mirzəyeva deyib.

Onun sözlərinə görə, Mahirin özü hərbi xidmətə can atırdı. Çünki torpaqlarımızın işğal altında olması ona rahatlıq vermirdi: “Danışanda deyirdim ki, özünü gözlə. O da cavabında deyirdi ki, ay nənə, vətənə canım qurban. Əsgərliyə getməsindən də çox razı idi. Mənim balam çox tərbiyəli, mərifətli idi. Bizdə qalanda özü üçün yeməkləri də hazırlayırdı, heç kimi incitməzdi. Bir dəfə deməzdi ki, nənə, mənə bir stəkan çay ver. Ötən ildə də bacısı Aygülün toyu oldu. Gözləyirdik ki, hərbi xidmətdən qayıtsın və onun toyunu edək. Mən həmin günü arzulayırdım. Bu ilin yanvarında da məzuniyyətə gəlmişdi. Təsəlli tapıram ki, məzuniyyətdə olduğu 10 günün 4 gününü öz yanımda saxladım. Əsgərlikdən də razı idi, deyirdi ki, orada hər şeylə təmin edirlər. O həm də mömin idi, oruc tutub, namaz qılırdı. Mahir mənim ilk nəvəmdir. Bəlkə də, buna görə onun ölümü məni çox yandırır... O, üç evin oğul nəvəsi idi... Balam elə ağıllı, kamallı idi... Dəfn olunandan bir gün sonra yuxuma girdi. Məni çağırdı ki, gəl həyətdə güllərə bax. Baxdım, o, ağ çiçəklərin arasında dayanıb mənə baxırdı... Mənim arzum budur ki, Mahirin qanı yerdə qalmasın, torpaqlarımız düşmənlərdən azad olunsun. Bundan sonra şəhidlərimizin ruhu rahatlıq tapacaq”.

“Qardaşım arzusuna çatdı...”

Mahir həm də qayğıkeş qardaş olub. Bacısı Aygülü dinləyərkən belə qənaətə gəlmək olur. Aygül Mirzəyeva qardaşının həmişə ona dayaq olduğunu bildirib: “Biz bir yerdə böyümüşük, oynamışıq, deyib-gülmüşük. O, həmişə yanımda olub, həmişə dəstək olub. Dərslərimdə də kömək edib, heç zaman məni tək qoymayıb. Həmişə mənə məsləhət verirdi, düz yola yönəldirdi, vaxtımı boş keçirməməyi məsləhət görürdü. Mənə deyirdi ki, həmişə gününü elə yaşa ki, sanki son günündü. Onun məsləhəti ilə oxudum, ali məktəbə qəbul oldum. Özü də çox fəal idi, bir yerdə dayanmırdı, ingilis və ərəb dillərini öyrəndi. Mahirin arzusu Qafqaz Universitetinə daxil olmaq idi. O, yüksək bal toplayaraq Dövlət İqtisad Universitetinə daxil olaraq bakalavr təhsilini uğurla bitirdi. Magistraturaya isə Qafqaz Universitetinə qəbul olundu, dedi ki, əsgərliyə gedib-gələndən sonra bu təhsilimi davam etdirəcəm”.

Aygül deyir ki, Mahir məzuniyyətə gələndə ona sürpriz edib: “Sürpriz də bu idi ki, evə mənim ad günümdə gəlmişdi. Mənə əsgərlik həyatından danışdı. O, məzuniyyətə gələndə tamam dəyişmişdi. Üzündə nur var idi, kökəlmişdi. Artıq məzuniyyəti başa vurub gedəndə evdə hamı ilə görüşdü, amma qayıdıb bir də sağollaşdı. Anama dedi ki, başını dik tut, mənə nəsə olsa, ağlamayın, həmişə mənimlə fəxr edin. Dedi və getdi... Qardaşımın yoxluğu ağır itkidir. Qısa olsa da, amma şərəfli ömür yaşadı. Təskinlik onda tapırıq ki, şəhidlik zirvəsinə yüksəldi. Torpaqlarımızın işğaldan azad olunması onun ən böyük arzusu id. Əsgərliyə gedəndə də sinif yoldaşlarına, müəllimlərinə deyibmiş ki, gedirəm şəhid olmağa və bu arzusuna da çatdı...”

“O, təkcə bizim ailənin deyil, bütün Azərbaycanın oğludur”

Ümumiyyətlə, Mahir həmişə özünün davranışları ilə də yaxınlarının hörmətini, rəğbətini qazanıb. Onun bibisi Zemfira xanım bu keyfiyyətləri ilə yanaşı, Mahiri mərd, qorxmaz oğul kimi də xatırlayır: “Mahir anadan olanda 3-4 yaşına qədər bizim yanımızda böyüyüb. Çox sadə, sözəbaxan, tərbiyəli oğlan idi. Nə iş tapşırsan, əməl edirdi və heç nəyə də etiraz etmirdi. İndi onun haqqında danışmaq asan deyil. İnanmıram ki, Mahir yoxdur. O, ailəmizin fəxri idi. Əsgərliyə gedən arıq oğlan idi. Amma 6 ay sonra məzuniyyətə gələndə əsl əsgər görünüşü almışdı. Belə bir deyim var ki, əsgərlik kişilik məktəbidir. Mən bunu Mahirin timsalında da gördüm. O, çox mərd, qorxmaz oğul idi. Onun şəhidlik zirvəsinə ucalması da bunu təsdiqləyir”.

Əmisi Samir Mirzəyev də deyir ki, Mahir əsl qəhrəman idi: “O, təkcə bizim ailənin deyil, bütün Azərbaycan xalqının oğludur”.

Amma Mahirin digər bir müsbət xüsusiyyəti özündən kiçiklərə də böyük hörmətlə yanaşması idi. Əmisi qızı Xədicənin dediklərindən belə aydın olur. Xədicə deyir ki, Mahirin yoxluğu ağır itki olsa da, Vətən uğrunda şəhid olub: “Mahir keçən il iyulun 6-da hərbi xidmətə getdi. Ayın 5-də isə mənim ad günüm idi. Mənim ad günüm həm də onun yolasalma mərasimi kimi də oldu. Mənə dedi ki, inşallah, bir il sonra sənin ad günündə qayıdacam və birbaşa sənin ad gününə gələcəm. O deyirdi ki, vətən bizim hər şeyimizdir və mənə həmişə vətənpərvər olmağı tövsiyə edirdi”.

Bir sözlə, Mahir həm ailədə, həm qohumları, həm də dost-tanışları arasında həmişə hörmət qazanıb, etibarlı dost kimi özünü doğruldub. Elə sinif yoldaşı Tural İbrahimov da Mahiri belə xatırlayır: “O, dərslərini əla oxuyardı, həmişə başqalarından fərqlənərdi. Müəllimlər də həmişə ondan razı idilər. Mən hərbi xidmətə ondan tez getmişdim. Məzuniyyətə gələndə gəlib məndən əsgərlik həyatı ilə maraqlanırdı və orduda xidmət etməyi çox arzuladığını deyirdi. Elə oldu ki, mən xidmətimi başa vurdum. Mahir mənə dedi ki, “sən gəldin, indi də mən gedirəm”. O, məzuniyyətə gələndə də görüşdük, söhbət etdik. Söhbətimizdə mənə bir daha aydın oldu ki, Mahir çox vətənpərvərdir, o, vətən yolunda da özünü qurban verdi...”

Qeyd edək ki, Mahirin dəfn mərasimi Biləcəri qəsəbəsində nənəsigilin evində olub. Şəhidin dəfn mərasimi izdihamlı bir mitinqə çevrilib. Vətən uğrunda canını fəda edən Mahir Mirzəyevi son mənzilə böyük izdihamla yola salıblar.

Dəfn mərasimində Nərimanov və Binəqədi rayonunun rəhbərliyi, millət vəkilləri, Müdafiə Nazirliyinin əməkdaşları iştirak ediblər. Eləcə də ictimaiyyət nümayəndələri bu ailəyə böyük mənəvi dəstək göstəriblər. Şəhid Mahir Mirzəyevin qırx mərasimi isə mayın 19-da keçirilib. Şəhidin təltif edildiyi “Hərbi xidmətdə fərqlənməyə görə” 3-cü dərəcəli medal onun atasına təqdim edilib. Həmçinin rayon rəhbərliyi, Milli Məclisin deputatları, Müdafiə Nazirliyinin əməkdaşları, şəhidin yaxınları, gənclər və ictimaiyyətin nümayəndələri şəhidin ərazi bütövlüyü uğrunda canını fəda etdiyi torpağa tapşırıldığı məkana gələrək onun məzarını ziyarət ediblər.

Eyni zamanda, Mahirin təhsil aldığı 36 saylı tam orta məktəbdə, Dövlət İqtisad Universitetində və “ASAN xidmət” mərkəzində də onun xatirəsinə həsr olunmuş guşə yaradılıb. Şəhidin ailəsi insanların bu mənəvi dəstəyinə görə təskinlik tapır. Onların yeganə arzuları budur ki, torpaqlarımız işğaldan azad edilsin, bütün şəhidlərin ruhu şad olsun. Azərbaycan dövlətinin siyasəti, ordumuzun gücü məhz bu məqsədə xidmət edir.

Nardar BAYRAMLI

Yeni Azərbaycan.- 2016.- 26 may.- S.6