Milli mətbuatımızın inkişafında xüsusi yeri olan “Səs” qəzetinin 25 yaşı tamam olur

Hər zaman öz xüsusi mövqeyi, işi və dəst-xəttilə fərqlənən “Səs” qəzeti bu gün də prinsiplərinə sadiq qalaraq qarşıya qoyduğu vəzifələrin uğurla yerinə yetirilməsinə nail olur

Müstəqil Azərbaycanın ilk mətbuat orqanlarından birinin - müasir, müstəqil qəzetçiliyin inkişafında özünəməxsus yeri və rolu olan “Səs” qəzetinin 25 yaşı tamam olur. 1990-1993-cü illərdə, ölkədə ictimai-siyasi vəziyyətin gərgin olduğu və güclü senzuranın mövcud olduğu dövrdə fəaliyyətə başlayan, həmin dövrün keşməkeşlərində Həsən bəy Zərdabi irsinin, müasir və milli qəzetçilik ruhunun qorunub saxlanılmasına öz töhfəsini vermiş “Səs” qəzeti ölkəmizdə baş verən mürəkkəb kataklizmlər dövründə ictimai rəyin düzgün əsaslarda formalaşmasına, Azərbaycan xalqının, dövlətçiliyinin maraqlarına və Ulu öndər Heydər Əliyevin ideyalarının pərvəriş tapmasına xidmət edən bir mövqe tutub. Ölkə ziyalıları Azərbaycanın dövlət müstəqilliyini məhv olmaqdan xilas etmək üçün 1992-ci ilin oktyabr ayında “Səs” qəzeti vasitəsilə Ümummilli liderimiz Heydər Əliyevə müraciət etdilər. Ulu öndərin bu müraciətə cavabı da “Səs” qəzetində dərc olundu.

Mətbuatımızın ən çətin vaxtlarında, demək olar ki, gündəlik mətbuatın olmadığı bir zamanda Azərbaycanın geniş oxucu kütləsinin çox maraqla, həvəslə növbəti nömrəsinin nəşrini gözlədiyi qəzetlərdən biri də məhz “Səs” qəzeti olub.

Qəzetə 1993-2005-ci illərdə Ağabəy Əsgərov rəhbərlik edib. 2005-ci il mayın 1-dən “Səs” qəzetinin baş redaktoru Bəhruz Quliyevdir. “Əlincə” Xeyriyyə Cəmiyyətinin rəsmi orqanı kimi fəaliyyətə başlamış qəzet sonrakı dövrlərdə də öz fəaliyyətini uğurla davam etdirib. 2008-ci ilin avqustunda bu qəzetin balansında “Səs” İnformasiya Agentliyi (SİA) yaradılıb. Qəzetin həmçinin “Səs” İnternet Televiziyası da fəaliyyət göstərir. “Səs” artıq bir Media Qrup kimi çoxminli Azərbaycan mediası arasında geniş populyarlığa malikdir.

Bu yubiley günlərində “Yeni Azərbaycan” qəzeti olaraq biz də öz həmkarlarımızı təbrik etmək və ötən 25 ilin xatirələrini bölüşmək üçün “Səs” qəzetinin redaksiyasına baş çəkdik.

İlk olaraq qəzetin baş redaktoru, fəlsəfə üzrə fəlsəfə doktoru Bəhruz Quliyevlə söhbətləşdik. “Səs” Media Qrupunun baş direktoru B.Quliyev bildirdi ki, hər bir cəmiyyətin güzgüsü məhz onun mətbuatıdır. Cəmiyyətin inkişafında, maariflənməsində, məlumatlandırılmasında, eyni zamanda, mənafeyinin təmin edilməsində mətbuatın üzərinə böyük vəzifə düşür. Azərbaycanın mətbuat tarixində bu böyük missiyanı əzmlə və şərəflə yerinə yetirən, milli dövlətçiliyimizin və müasir dövlətçilik ənənələrimizin qorunub saxlanmasında əvəzsiz xidmətləri olmuş və öz müqəddəs işini indi də yüksək həvəslə davam etdirən “Səs” qəzeti də fəaliyyət göstərdiyi ötən 25 il ərzində qarşısına qoyulmuş olduğu vəzifələrin öhdəsindən həmişə ləyaqətlə gəlmişdir: “İnsanların yaddaşlarından silinməyib ki, sovet imperiyasının dağılmasının real olduğu bir zamanda, Azərbaycanda bir sıra qüvvələr moskvayönlü siyasəti davam etdirir, Azərbaycanın yenə də hər hansı bir mərkəzdən idarə olunması ideyasının tərəfdarları kimi çıxış edirdilər. Məhz belə bir çətin dövrdə araya-ərsəyə gələn “Səs” qəzetinin əsas fərqləndirici xüsusiyyətlərindən biri o olub ki, 1990-cı illərin fərqli, alternativ fikirlərini öz səhifələrinə gətirməklə, milli azadlıq mübarizəsinin həqiqi mahiyyətinin ortaya çıxmasında və sağlam bünövrə üzərində müstəqillik ideyalarının insanlarımız arasında geniş yayılmasında müstəsna xidmətlər göstərmişdir. “Səs” qəzetinin Azərbaycanın mətbuat tarixində özünəməxsus yeri və əzəmətli xidmətlərindən biri məhz Ulu öndərimiz Heydər Əliyevin zəngin irsinin Azərbaycan vətəndaşları arasında geniş şəkildə təbliğ olunması ilə bilavasitə əlaqədardır. Bunun nəticəsi idi ki, ölkə ziyalıları, sağlam düşüncə sahibləri o illərdə Azərbaycanın dövlət müstəqilliyini məhvolmadan, fəlakət və tənəzzüldən xilas etmək üçün 1992-ci ilin oktyabr ayında “Səs” qəzeti vasitəsilə xalqımızın yeganə ümidgahı olan Ümummilli liderimiz Heydər Əliyevə müraciət etdilər. Fərəhləndirici haldır ki, Ümummilli liderimiz Heydər Əliyevin ziyalılara ünvanladığı cavab da məhz “Səs” qəzetində dərc olundu. Bu tarixi hadisədən sonra Azərbaycan yeni siyasi həyata qədəm qoydu.

Təbii ki, Yeni Azərbaycan Partiyasının yaradılmasından sonra “Səs” qəzeti fəaliyyət istiqamətini bu faktor üzərində quraraq, öz mübarizliyini, əqidəsini, məktəbini formalaşdırmağa başladı. Bu gün biz gördüyümüz işlərdən yorulmur, əksinə, daha da geniş işlər qurmaq üçün yeniliklərə imza atırıq.

Bu gün “Səs” qəzeti inkişaf yolunu davam etdirir və dövlətçiliyimizin daha da möhkəmləndirilməsi istiqamətində 25 ildə formalaşmış gücünü, qətiyyətini sərgiləyir. Qəzetimizin balansında fəaliyyət göstərən “Səs” Media Qrupu da bu tərəqqinin bir parçasıdır.

Bu gün Azərbaycan Respublikasının Prezidenti cənab İlham Əliyev Ulu öndər Heydər Əliyev tərəfindən təməli qoyulmuş mütərəqqi siyasəti qətiyyətlə davam etdirir. Biz məhz bu siyasətin təbliğ olunmasında, uğurlar qazanmasında xidmət göstəririk. Bu yolda qəzetdə çalışan kollektivimizin hər bir üzvünə uğurlar, zəfərlər arzu edirəm”.

“Səs” Media Holdinqin tərkibində fəaliyyət göstərən eyniadlı informasiya agentliyinin icraçı direktoru Vəli Vəliyev də “Səs” qəzetini Azərbaycanın informasiya məkanında özünəməxsus yeri olan, böyük tarixə malik mətbu orqan adlandırdı. Hələ 1991-92-ci illərdə, Azərbaycanın dövlət müstəqilliyinin təzə elan olunduğu dövrdə tirajı çox, səhifələri az olan bu qəzetin ən sadiq oxucularından biri olduğunu dilə gətirən V.Vəliyev qəzetin fəaliyyətinin hazırkı dövrünün də mühüm uğurlarla müşayiət olunduğunu söylədi: “1990-cı illərin əvvəllərində “Səs” qəzeti jurnalistika məktəbi olmaqla yanaşı, həm də böyük siyasi məktəb sayılırdı. Ulu öndər Heydər Əliyevin siyasi ideologiyasının daşıyıcılarından olan bu qəzet son 25 illik tariximizin canlı şahidinə çevrilib. Qəzetin məktəbində püxtələşmiş neçə-neçə ziyalımız bu gün ölkəmizin siyasi mühitində tanınmış şəxslərdir, dövlət xadimləridir. Mən də 25 yaşı olan qəzetimizin bütün kollektivini təbrik edirəm, onlara qarşıdakı illərdə daha böyük yaradıcılıq uğurları arzulayıram”.

“Səs”in “veteran”larından sayılan baş redaktorun müavini Valeh Məhərrəmov ötən illərdə qəzetin fəaliyyətində mübarizliyin bir an olsa da səngimədiyini dedi. V.Məhərrəmov bildirdi ki, “1991-ci ildə sərhəd bölgələrində yaşayan əhalinin, eləcə də soyuq səngərlərdə Vətənə xidmət edən əsgər və zabitlərə layiqli mənəvi dəstək verən, 1992-ci ilin mart ayından etibarən Ulu öndər Heydər Əliyevə qarşı tətbiq edilən “yaş senzi”nə qarşı piket və mitinqlərə mətbu dəstək verən “Səs” qəzeti o illərdə Naxçıvan Muxtar Respublikasında fəaliyyət göstərən Ümummilli lider Heydər Əliyevin gördüyü işlər haqda çoxsaylı yazılar və məqalələrlə çıxış edirdi. Qəzet, bir növ, xalqla Heydər Əliyevin arasında mənəvi körpü rolunu oynamışdır. Fəxr edirəm ki, qəzetin azsaylı “veteranlar şurası”nda təmsil olunuram”.

Baş redaktorun digər müavini Fətulla Həsənov da “qocaman” “Səs”çilərdəndir. Ömrünün 16 ilini bu qəzetlə bağlayan F.Həsənov bundan qürur duyduğunu dilə gətirdi: “Bu qəzet Ulu öndər Heydər Əliyevin dövlətçilik ideologiyasının daşıyıcısı kimi fəaliyyət göstərir. Qəzet həmişə dövlətçilik və milli maraqları müdafiə edib. “Səs” qəzetində fəaliyyət göstərdiyimə görə məmnunluq duyuram, bütün kollektivimizi təbrik edirəm”.

Şöbə müdiri Zümrüd Bayramova Azərbaycanın müstəqillik məfkurəsinin obyektiv, qərəzsiz işıqlandırılmasında müstəsna xidmətləri olan bir qəzetdə 25 il çalışması ilə qürur duyduğunu bildirdi: “25 il elə bir tarixdir ki, arxaya boylandıqda əldə etdiyimiz nailiyyətlər bizi fərəhləndirir, gələcək fəaliyyətimizdə də üzərimizə böyük məsuliyyət qoyur. Əsrin dörddə birini yaşayan qəzetimizin kollektivini təbrik edir, ona bu şərəfli yolda hər zaman olduğu kimi məfkurəsinə, əqidəsinə sadiq qalmağı arzulayıram”.

Qəzetin şöbə müdiri İlham Əliyev qeyd etdi ki, “Səs” qəzeti bütün fəaliyyəti dövründə xalqın sevimli və oxunaqlı mətbuat orqanına çevrilməyi bacarıb: “Səs” qəzeti adının Azərbaycanın müstəqillik tarixinə qızıl hərflərlə yazılmasına nail olub. Bu gün “Səs” qəzeti modernləşərək öz bazasında “Səs” İnformasiya Agentliyini (SİA) və “SƏS” TV internet televiziyasını yaradıb. Qısa zaman ərzində agentlik və televiziya internet resursları arasında öz layiqli yerini tutub. Təbii ki, “Səs” qəzeti fəaliyyətini bundan sonra da xalqa və dövlətə xidmət üzərində quracaq. Oxunaqlı və sevilən qəzet olaraq Azərbaycan Prezidenti İlham Əliyevin çoxşaxəli fəaliyyətini faktlarla cəmiyyətə, insanlara çatdıracaq”.

Qəzetin şöbə müdiri Rəfiqə Kamalqızı da öz fikirlərini bölüşərək bildirdi ki, “Səs” qəzeti nəşrə başlamasının 25-ci ildönümünü böyük şərəflə qeyd etməkdədir: “O çətin, ağır dövrdə yeni sözə, fikrə böyük ehtiyacın olduğu zaman “Səs” qəzeti bu missiyanı uğurla yerinə yetirdi. O dövrdə “Səs” qəzeti Azərbaycanın müstəqilliyi, söz azadlığı, mətbuat azadlığı, demokratiya uğrunda mübarizənin ön sırasında yer aldı. Qəzetin yaradıcı heyəti fədakar işlər görüb. Ümummilli liderimiz Heydər Əliyev çıxışlarında, o cümlədən YAP-ın qurultaylarında “Səs” qəzetinin fəaliyyətini yüksək qiymətləndirib. “91-lərin müraciəti”, Ulu öndər Heydər Əliyevi müdafiə edən ziyalıların məqalələri də məhz “Səs” qəzetində dərc olunub. “Səs” qəzetinin üzərinə düşən vəzifəni bundan sonra da şərəflə yerinə yetirməsi üçün bütün gücümüzü səfərbər edəcəyik”.

Qəzetin xüsusi müxbiri, eləcə də SİA-nın siyasət şöbəsinin müdiri Rövşən Rəsulov da “Səs” qəzetində çalışmağın böyük şərəf və sonsuz iftixar hissi olduğunu dilə gətirdi: “Bu məktəbdən keçərək ömrünün bir hissəsini qəzetə həsr etmək heç də hər kəsə nəsib olan xoşbəxtlik deyil. Dövlətçiliyimizin qorunmasında, onun tərəqqi və inkişafında, Ulu öndər Heydər Əliyev ideyalarının yaşadılmasında kiçik də olsa iştirakçı olmaq bizlər üçün böyük fəxarətdir. Mən başda veteranlarımız, rəhbərliyimiz olmaqla hər bir “Səs”çini yubiley münasibətilə təbrik edir, bundan sonrakı illərdə də yorulmadan yaratmağı, dayanmadan inkişaf etməyi arzu edirəm”.

2003-cü ildən yolunu “Səs”lə birləşdirmiş məsul katibi Mətləb Salahov da həmkarlarını təbrik etdi. Azərbaycanın ictimai-siyasi həyatında mühüm yer tutan bir mətbuat orqanında çalışmağın, dövlətçilik təcrübəsi qazanmağın, peşəkar jurnalist kimi formalaşmağın hər bir jurnalist üçün mühüm hədəf olduğunu söyləyən M.Salahov “Səs” qəzetində jurnalist olaraq fəaliyyət göstərməyin şərəfli və məsuliyyətli olduğunu dedi: “Səs” qəzeti, bu gün də tarixi prinsiplərinə və mövqeyinə sadiq olaraq modern şəkildə fəaliyyətini davam etdirir. Arzu edirəm ki, “Səs” qəzeti bundan sonrakı illərdə də Azərbaycanın ictimai-siyasi həyatında öz layiqli yerini qoruyub saxlasın”.

Qəzetin müxbiri Nəzakət Ələddinqızı tarix üçün böyük olmayan 25 ilin qəzet üçün böyük tarixi yol olduğunu önə çəkdi. Onun sözlərinə görə, müstəqil mətbuat tariximizdə özünəməxsus yeri, dəst-xətti, eləcə də şərəfli tarixçəsi olan “Səs” qəzeti hər zaman qərəzdən, böhtandan uzaq olması, milli-mənəvi dəyərlərə hörmətlə yanaşması, ümummilli məsələlərdə vətəndaşlıq mövqeyi nümayiş etdirməsi ilə bağlı məqalələrini çap etdirməklə ənənəsinə sadiqliyini nümayiş etdirib, bu gün də belədir: “Qəzet ölkədə və dünyada baş verən hadisələri, insanların fikirlərini, əldə olunan uğurları və problemləri səhifələrində mütəmadi olaraq işıqlandırır. Belə bir qəzetdə çalışmaq əlbəttə ki, böyük məsuliyyətdir. Mən də, öz növbəmdə, qəzetin əməkdaşı olaraq 25 yaşını qeyd edən “Səs” qəzetinə yeni-yeni uğurlu illər, nailiyyətlər arzulayıram”.

Artıq 3 ildir ki, “Səs” qəzetində çalışan İntizarə Məmmədova da fəaliyyətə başladığı ilk gündən dövlətçiliyimizə xidmət edən “Səs” qəzetinin ölkə mətbuatında bir ənənə, media məktəbi formalaşdırdığını dilə gətirdi: “Mən bu qəzetdə 3 ildir ki, çalışıram və ilk növbədə, bununla fəxr edirəm. Biz gənclər də hazırda Prezident İlham Əliyev cənablarının uğurlu siyasətini təbliğ etməklə, ölkəmizin tərəqqisinə və inkişafına, kiçik də olsa töhfə verdiyimizə görə fəxr edirik”.

Müxbir Gülyanə Ağakərimova isə 7-ci ildir ki, “Səs”çidir: “Səs” qəzeti yarandığı gündən bu günə kimi obyektiv məlumatların, təhlillərin dərci və cəmiyyətin maarifləndirilməsi istiqamətində fəaliyyət göstərib. O cümlədən dövlətçiliyimizin möhkəmləndirilməsində öz sözünü deyib. Mən 7 ildir “Səs” qəzetində işləyirəm. İşlədiyim dövrdə həyat məktəbim üçün bir çox örnəklər əldə etmiş, media sahəsində uğurlar qazanmışam. Hər bir həmkarımı yubiley münasibətilə təbrik edirəm”.

Müxbir Samir Feyruzov bildirdi ki, “Səs”in yaşı bugünkü müasir müstəqil Azərbaycanın yaşı qədərdir: “Mətbuat tariximizdə özünəməxsus yeri olan “Səs” qəzeti Azərbaycan xalqının ən çətin anlarında fəaliyyətə başlamışdır. XX əsrin 90-cı illərinin əvvəllərində Azərbaycanda baş verən arzuolunmaz hadisələrə ən çox etiraz edən qəzetlərdən biri məhz “Səs” qəzeti idi. Ona görə də həmin dövrdə böyük təzyiqlərə məruz qaldı. Amma tarix öz işini gördü. “Səs” qəzeti bu gün də böyük bir məktəbdir. Şadam ki, cənab Prezidentin daxili və xarici siyasətini dəstəkləyən, bu siyasəti təbliğ edən və böyük tarixə malik olan “Səs” qəzetinin əməkdaşıyam”.

Qəzetdə yığıcı-operator işləyən Mahirə Cəfərova da ömrünün bir çox illərini məhz “Səs” qəzeti ilə bağlayıb: “Mən də qəzetimizin 25 yaşını təbrik edirəm, həmkarlarıma qoşulur, burada qazanılan nailiyyətləri bölüşür və ardıcıl uğurlar qazanılmasını arzulayıram. 25 yaşın mübarək doğma “Səs”imiz”.

Yığıcı-operator Afət Rəsulova da bu qəzetin üzvü olmaqla fəxr etdiyini dilə gətirdi: “Qəzetimizin həm də bir həyat məktəbi olması danılmaz faktdır. 25 yaşını qeyd edən “Səs” qəzetinin bütün kollektivini ürəkdən təbrik edir, yeni və davamlı uğurlar arzulayıram”.

Sədaqət Bayramova da öz növbəsində həmkarlarının təbrikinə qoşularaq ürək sözlərini bizimlə bölüşdü: “Səs” qəzetinin 25 illiyi burada çalışan hər bir əməkdaş üçün sonsuz sevinc və şərəfdir. Çünki bu qəzetin digər media orqanlarından fərqi onda formalaşmış doğmalıq hissləridir. Burada çalışan hər bir əməkdaş ilk növbədə dövlətinə sadiq olan insanlardır. Qəzetin 25 illik yubileyi münasibətilə hər kəsi təbrik edirəm”.

Biz də “Yeni Azərbaycan” qəzeti olaraq öz həmkarlarımızı təbrik edir, gələcək fəaliyyətlərində daha böyük uğurlar arzulayırıq.

Pərviz SADAYOĞLU

Yeni Azərbaycan.- 2016.- 12 yanvar.- S.7