2015-ci il kənd təsərrüfatının inkişafında uğurlu il kimi yadda qaldı

Ötən il ərzində ölkənin regionlarında aqrar sahə üzrə əldə edilən nəticələr də bunu bir daha təsdiqləyir

Artıq daha bir ilə yekun vurulub. Və bundan əvvəlki illərdə olduğu kimi, 2015-ci ildə də Azərbaycan inkişaf edib, qarşıda duran vəzifələr uğurla icra olunub. Azərbaycan Prezidenti İlham Əliyevin Sədrliyi ilə keçirilən Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da bəyan edildiyi kimi, ötən il ölkəmizdə bütün sosial proqramlar, o cümlədən sosial infrastruktur layihələri icra olunub, yeni iş yerləri açılıb və regionların inkişafı ilə bağlı tədbirlər davam etdirilib. Heç şübhəsiz, 2015-ci il ölkəmizdə kənd təsərrüfatının inkişafı baxımından xüsusilə yaddaqalan olub.

Bunun da yetərli səbəbləri var. Əvvəla ona görə ki, güclü sənaye potensialı olan Azərbaycan həmçinin kənd təsərrüfatının geniş inkişaf perspektivlərinə malik ölkədir. Əlverişli coğrafi-iqlim xüsusiyyətləri ölkəmizdə aqrar sektorun geniş inkişaf imkanlarına malik olmasını şərtləndirir. Respublika əhalisinin təxminən yarısının bölgələrdə yaşadığını və məşğul əhalinin 40 faizinin kənd təsərrüfatında çalışdığını nəzərə alsaq, deyə bilərik ki, aqrar sektorun inkişafı sosial baxımdan da ciddi önəm kəsb edir.

Digər tərəfdən, Prezident İlham Əliyevin 2015-ci ilin “Kənd təsərrüfatı ili” elan edilməsi haqqında məlum Fərmanından sonra aqrar islahatların həyata keçirilməsi üçün kompleks tədbirlər görülüb. Sözügedən Fərmanın verilməsi ölkədə qeyri-neft sektorunun inkişaf etdirilməsinin Prezident tərəfindən daim diqqətdə saxlanıldığının daha bir göstəricisidir. Təsadüfi deyil ki, son illərdə Azərbaycanda Prezident İlham Əliyevin rəhbərliyi ilə uğurla həyata keçirilən iqtisadiyyatın şaxələndirilməsi siyasətində kənd təsərrüfatında yüksək inkişafa nail olunması mühüm yer tutur. Dövlət başçısı respublikamızda kənd təsərrüfatının inkişaf etdirilməsi və bu sahədə yüksək nəticələrə nail olunması üçün güclü siyasi iradə nümayiş etdirir.

Məhz bunun nəticəsidir ki, bu gün ölkəmizin iqtisadiyyatında böyük çəkiyə malik olan kənd təsərrüfatı sürətlə inkişaf edir. Dövlət tərəfindən aqrar sahədə müasir infrastrukturun yaradılması, kənd təsərrüfatına dövlət qayğısının artırılması, aqrolizinq xidmətinin genişləndirilməsi, eləcə də kreditlərin verilməsinin sürətləndirilməsi aqrar sahənin inkişafına müsbət təsir göstərir. Yeri gəlmişkən, ötən il ərzində ölkənin regionlarında aqrar sahə üzrə əldə edilən nəticələr də bunu bir daha təsdiqləyir.

“Kənd təsərrüfatı ili” meyvəçilik və tərəvəzçiliyin inkişafı üçün uğurlu olub

Belə ki, Göyçay rayonunda fermerlər və fərdi təsərrüfat sahibləri ötən il meyvəçilik sahəsini xeyli genişləndirməyə və bol məhsul əldə etməyə nail olublar. Rayon İcra Hakimiyyətindən AZƏRTAC-a bildiriblər ki, 2015-ci ildə Göyçayın kəndlərində, ümumilikdə, 320 hektar sahədə yeni meyvə bağı salınıb. Kəndlilər istifadəsiz qalan boş torpaq sahələrində yeni meyvə bağı salarkən əsasən nar, heyva, xurma, alça, gilas, qoz, gavalı, ərik ağaclarının əkilməsinə üstünlük veriblər. Hazırda rayonda 6019 hektar sahədə meyvə bağı mövcuddur ki, bunun da 4678 hektarı bar verəndir.

2015-ci ildə bağbanlar meyvə ağaclarına yüksək səviyyədə aqrotexniki qulluq göstərdikləri üçün bol məhsul əldə ediblər. Belə ki, il ərzində Göyçayda 75 min 513 ton meyvə istehsal olunub. Bu da 2014-cü illə müqayisədə 2626 ton çoxdur. Bol məhsul əsasən nar və xurma bağlarından əldə olunub. Ümumilikdə 3620 hektar nar bağından 47 min 800 ton, 795 hektar xurma bağından 18 min 300 ton məhsul toplanılıb. Hazırda kəndlərdə yeni meyvə bağlarının salınması üçün torpaq sahələri hazırlanır. Martda ağac tinglərinin əkininə başlanılacaq.

Eyni zamanda, Masallı rayonundakı istixana təsərrüfatlarında tərəvəz məhsullarının yığımı davam edir. Əsasən xiyar və pomidor əkininə üstünlük verən rayondakı fermerlər və məhsul istehsalçıları bazarda tələbatın və qiymətlərin qaneedici olduğunu bildiriblər. Cənub bölgəsi üçün qeyri-ənənəvi sayılan istixana şəraitində tərəvəz məhsullarının istehsalı çətin və daha çox vəsait tələb etdiyi üçün geniş yayılmayıb. Lakin məhsul istehsalçıları bu sahənin ənənəvi əkinə nisbətən gəlirli olduğunu bildirirlər. Qeyd edək ki, istixana şəraitində məhsul yığımı fasilələrlə may-iyun aylarına qədər davam edir.

Aqrar sahənin inkişafından danışarkən vurğulamaq yerinə düşər ki, Şamaxı rayonunda ötən il 48,5 ton bal istehsal olunub. Bu da 2014-cü ilin göstəricidən 12 ton çoxdur. Rayon İcra Hakimiyyətindən verilən məlumatda bildirilir ki, keçən il bölgədə arı ailələrinin sayı da artıb. Belə ki, ailələrin sayı 2014-cü ilə nisbətən 251 qutu artaraq 5111-ə çatıb.

Arıçılığın inkişafı, hər şeydən əvvəl, təsərrüfatın bu sahəsinə marağın artmasının nəticəsidir. Təsadüfi deyil ki, Şamaxı arıçıları Bakıda təşkil olunan ənənəvi bal satışı yarmarkasına keçən il 3,5 ton məhsul çıxarıblar. Bu da 2014-cü ildə təşkil olunan satış yarmarkasına çıxarılan məhsuldan 1,5 ton çoxdur.

Cəbhə bölgəsində yerləşən Tərtər rayonunda isə əhalinin əsas məşğuliyyət növlərindən biri bağçılıq və tingçilikdir. Son illərdə kənd təsərrüfatının digər sahələri kimi bu istiqamətdə də inkişafa nail olunub. Rayonda 1180,6 hektar meyvə bağları və 11,1 hektar üzümlük var. Son bir ildə rayon ərazisində 7 hektar yeni meyvə bağları və 2,8 hektar giləmeyvəlik salınıb, 1 milyon 505 min 872 ədəd meyvə və 141 min 344 ədəd dekorativ bitki tingləri yetişdirilib. Ötən il bağlardan 8671,1 ton meyvə və 889 ton üzüm yığılıb. Əvvəlki ilə nisbətən meyvə istehsalı 7,4 faiz, üzüm istehsalı 5,6 faiz artıb.

Öz növbəsində, Qəbələ rayonunda iqtisadiyyatın əsasını təşkil edən taxılçılıq, meyvəçilik və tərəvəzçilik məhsullarının satışından gəlir əldə edən kəndli fermerlər və fərdi təsərrüfat sahibləri bu sahələrin ildən-ilə daha da inkişaf etdirilməsini qarşıya məqsəd qoyublar. Mütəxəssislər “Kənd təsərrüfatı ili”ni Qəbələnin torpaq mülkiyyətçiləri üçün uğurlu olduğunu hesab edirlər. Belə ki, kəndlilər əvvəlki illərlə müqayisədə 2015-ci ildə əkin sahələrini xeyli artırmaqla yanaşı, bu sahələrdən bol məhsul da götürüblər.

Taxılçılığın inkişafı diqqət mərkəzində olub

Bu məqamda qeyd edək ki, ötən il ölkəmizin regionlarında taxılçılığın inkişafı da diqqət mərkəzində olub. Məsələn, Qəbələ rayon İcra Hakimiyyətindən bildiriblər ki, 2015-ci ildə Qəbələdə kənd təsərrüfatı məhsullarının yığımı vaxtında və itkisiz başa çatdırılıb. İl ərzində 21 min 300 hektar sahədən 64 min 645 ton taxıl, 1261 hektar sahədən 3 min 144 ton qarğıdalı, 130 hektar sahədən 1872 ton bostan məhsulları, 143 hektar sahədən 114 ton günəbaxan, 2 min 96 hektar sahədən 9 min 495 ton tərəvəz, 1157 hektar sahədən 7 min 497 ton kartof tədarük olunub. Ötən il bağbanlar 458 hektar üzüm sahəsindən 1414 ton, 10 min 429 hektar meyvə bağından 14 min 115 ton məhsul yığıblar.

Bütün bu nəticələr əvvəlki ilin göstəricilərindən xeyli yüksəkdir. Belə ki, 2015-ci ildə 26 min 512 hektar sahədə yazlıq və payızlıq məhsulların əkini aparılıb ki, bu da əvvəlki illə müqayisədə 1800 hektar çoxdur. Bundan əlavə, cari ilin məhsulu üçün 22 min 510 hektar sahədə taxıl səpilib (ötənilkindən 1210 hektar çox). Həmçinin son bir ildə Qəbələdə 220 hektar sahədə yeni meyvə bağı salınıb.

Eyni zamanda, Zaqatala rayonunun təsərrüfatlarında 2016-cı ilin məhsulu üçün taxıl səpini başa çatıb. Kampaniya dövründə fermerlər 12 min 221 hektar sahəyə toxum səpiblər. Taxıl əkini sahələri əvvəlki illə müqayisədə 73 hektar artıb. Bu barədə rayon statistika idarəsindən məlumat verilib. Məlumatda bildirilir ki, taxıl əkinlərinin 8 min 443 hektarını buğda, 3 min 778 hektarını arpa sahələri təşkil edir.

Xatırladaq ki, ötən il rayonun fermerləri 12 min 148 hektar taxıl sahəsindən 34 min 146 ton məhsul götürüblər. Taxıl istehsalı əvvəlki illə müqayisədə 28,1 faiz artıb.

Taxılçılığın inkişafı Göyçay rayonunda da diqqət mərkəzində olub. Belə ki, rayonun kənd əməkçiləri əvvəlki illərlə müqayisədə 2015-ci ildə əkin sahələrini xeyli artırmaqla yanaşı, bol məhsul da əldə etməyə nail olublar. İl ərzində 13 min 756 hektar sahədən 36 min 408 ton taxıl, 155 hektar sahədən 1807 ton kartof, 1158 hektar sahədən 19 min 842 ton tərəvəz, 70 hektar sahədən 1136 ton bostan məhsulları tədarük olunub.

Bütün bu nəticələr əvvəlki ilin göstəricilərindən xeyli yüksəkdir. Belə ki, əvvəlki illə müqayisədə 2015-ci ildə taxıl istehsalı 8 min 151 ton, kartof istehsalı 205 ton, tərəvəz istehsalı 175 ton, bostan məhsullarının istehsalı 45 ton artıb. Bundan əlavə, cari ilin məhsulu üçün Göyçayda 13 min 880 hektar sahədə taxıl səpini aparılıb ki, bu da ötənilkindən 124 hektar çoxdur.

Cəbhə bölgəsində yerləşən Tərtər rayonunun iqtisadiyyatında aparıcı yer tutan kənd təsərrüfatında 2015-ci ildə uğurlu nəticələr əldə edilib. Fermer və sahibkarların güzəştli şərtlərlə kredit, toxum, gübrə, texnika almaq imkanlarına malik olması, əkin sahəsinin becərilməsində istifadə edilən yanacaq üçün dövlət tərəfindən subsidiya verilməsi kənd təsərrüfatının əsas istehsal sahələrindən olan bitkiçiliyin inkişafına stimul verib. Verilən məlumata görə, 2015-ci ildə rayonda 26 min 461,7 hektarda kənd təsərrüfatı bitkiləri becərilib. Əkin sahəsinin 11 min 228,7 hektarını dənli və dənli-paxlalı bitkilər, 2202 hektarını texniki bitkilər, 1546 hektarını kartof, bostan və tərəvəz bitkiləri, 11 min 485 hektarını yem bitkiləri təşkil edib.

Ümumiyyətlə, ötən il rayonda 39 min 729,4 ton taxıl məhsulu istehsal edilib ki, bu da əvvəlki illə müqayisədə 385,8 ton çoxdur. 2014-cü illə müqayisədə taxıl sahələrinin hər hektarından məhsuldarlıq orta hesabla 1,6 sentner artıb.

Cari mövsümdə Oğuz rayonunun təsərrüfatlarında 2016-cı ilin məhsulu üçün 17 min 95 hektar sahədə payızlıq taxıl əkilib. Taxıl əkini sahələri əvvəlki illə müqayisədə 745 hektar artırılıb. Bu barədə rayon İcra Hakimiyyətindən məlumat verilib. Məlumatda bildirilir ki, taxıl əkinlərinin 12 min 165 hektarını buğda, 4 min 930 hektarını isə arpa sahələri təşkil edir. Taxıl səpini üçün ayrılan 3 min 360 ton yüksək reproduksiyalı toxumun 2 min 130 tonu rayonda fəaliyyət göstərən 7 özəl toxumçuluq təsərrüfatında istehsal olunub. Toxumun qalan hissəsini isə fermerlər digər toxumçuluq təsərrüfatlarından əldə ediblər.

Ötən il regionlarda ət, süd və yumurta istehsalı da artıb

“Kənd təsərrüfatı ili”ndə regionlarda ət, süd və yumurta istehsalı da artıb. Bunu Zaqatalanın timsalında bir daha aydın görmək olar. Belə ki, 2015-ci il ərzində rayonda diri çəkidə ət istehsalı əvvəlki ilə nisbətən 174 ton artaraq 8 min 894 ton olub. Həmin müddətdə 43 min 169 ton süd istehsal olunub ki, bu da 2014-cü illə müqayisədə 225 ton çoxdur. Yumurta istehsalı isə 249 min ədəd artaraq 21 milyon 237 min ədədə çatıb.

Rayonda heyvandarlıq məhsulları istehsalının dinamik artımında cins maldarlığın inkişafı istiqamətində həyata keçirilən tədbirlər mühüm rol oynayıb. 2015-ci ildə rayonun şəxsi və fermer təsərrüfatlarında 5 min 496 baş inək və düyə süni yolla mayalandırılıb və 4 min 400 baş cins buzov alınıb.

Öz növbəsində, Ağsuda heyvandarlıq məhsulları istehsalı üzrə bütün göstəricilər artıb, Kürdəmirdə də heyvandarlar məhsul istehsalında artıma nail olublar.

Bu istiqamətdə uğurlardan danışarkən onu da xüsusi olaraq vurğulamaq yerinə düşər ki, Şəki rayonunda fəaliyyət göstərən “Şəki Aqro İndastris” MMC-nin südçülük-maldarlıq üzrə özəl damazlıq təsərrüfatı rayonda cins maldarlığın inkişafına mühüm töhfələr verir. Rayonun Orta Zəyzid kəndinin ərazisində yerləşən müasirtipli bu heyvandarlıq kompleksində hazırda “Holştin-friz” (Hollandiya) cinsindən olan 1160 baş iribuynuzlu heyvan saxlanılır.

Müəssisədən verilən məlumata görə, 2015-ci ildə təsərrüfatda hər 100 baş maldan 84 bala olmaqla, ümumilikdə, 448 buzov alınıb. Ötən il müəssisədə 2 min 432 ton süd istehsal olunub. Hər inəkdən orta hesabla, 4 min 546 kiloqram süd sağılıb.

Aqrar sahədə əldə edilən uğurlardan muxtar respublikanın bütün rayonlarına pay düşüb

Yeri gəlmişkən, “Kənd təsərrüfatı ili”ndə əldə edilən uğurlardan Naxçıvan Muxtar Respublikasının bütün rayonlarına da pay düşüb. Məsələn muxtar respublikanın ən böyük bölgələrindən biri sayılan Şərur rayonunda ötən “Kənd təsərrüfatı ili” uğurlarla yadda qalıb. Bu dövrdə 483 torpaq mülkiyyətçisi 8 min 737 hektar əkin sahəsinin becərilməsi üçün 435 min 850 manat, 620 hektarda təkrar əkinlər aparan 81 kiçik sahibkar 31 min manat yardım alıb, muxtar respublikanın Sahibkarlığa Kömək Fondu tərəfindən 264 min 100 manat kredit verilib. Rayonda 1435 ton üzüm, 6 min 476 ton bostan məhsulları, 2 min 504 ton dən üçün qarğıdalı, 11 min 43 ton kartof, 4 min ton soğan istehsal olunub.

“2012-2015-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı”nın icrası istiqamətində işlər davam etdirilib, 15 hektar sahədə yeni bağlar salınıb, 23,2 hektar meyvə bağında bərpa işləri aparılıb, 52 min ədəd müxtəlif tinglər əkilib. İl ərzində sahələrdən 20 min 357 ton meyvə, 28 min 661 ton tərəvəz tədarük edilib.

Bu dövrdə Culfa rayonunda 28 milyon 80 min 200 manatı bitkiçilikdə, 16 milyon 105 min 400 manatı heyvandarlıqda olmaqla, ümumilikdə, 44 milyon 185 min 600 manatlıq kənd təsərrüfatı məhsulu istehsal edilib ki, bu da ötən ilin müvafiq dövrü ilə müqayisədə 9,2 faiz çoxdur.

Muxtar respublikanın davamlı sosial-iqtisadi inkişafından Kəngərli rayonuna da böyük pay düşüb. Ötən il kənd təsərrüfatında məhsuldarlığın artırılması və aqrar sahənin davamlı inkişafı diqqətdə saxlanılıb. Rayonda 2015-ci ilin məhsulu üçün 8152 hektar sahədə əkin aparılıb, 4735 hektar sahədə taxıl əkilib. Şəxsi təsərrüfatlarda 215 hektar sahədə kartof, 294 hektar sahədə tərəvəz, 180 hektar sahədə bostan, 113 hektar sahədə günəbaxan, 139 hektar sahədə qarğıdalı, 321 hektar sahədə paxlalı bitkilər yetişdirilib. 2016-cı ilin məhsulu üçün isə 3783 hektar sahədə taxıl əkini həyata keçirilib.

Regionların sosial-iqtisadi inkişafı Dövlət proqramları çərçivəsində həyata keçirilən tədbirlər Şahbuz rayonunu da əhatə edib. Rayon əhalisinin əsas məşğulluq sahəsi olan aqrar sektorun inkişafına göstərilən dövlət qayğısının nəticəsidir ki, torpaqlardan səmərəli istifadə olunmasına maraq xeyli artıb. 1344 hektar sahədə taxıl, 240 hektar sahədə paxlalı, 462 hektar sahədə kartof, 285 hektar sahədə tərəvəz, 10 hektar sahədə bostan bitkilərinin əkini həyata keçirilib. Ötən dövr ərzində rayonda 4 min 491 ton dənli-paxlalılar, 8 min 46 ton kartof, 4 min 973 ton tərəvəz, 124,6 ton bostan məhsulları, 7 min 945 ton meyvə, 168 ton üzüm istehsal edilib. İl ərzində digər bitkiçilik məhsulları istehsalı da çoxalıb. Təsərrüfatlarda 6229,7 ton kartof, 12 min 413,1 ton tərəvəz, 52,4 ton bostan məhsulları, 879,1 ton pambıq, 25 min 586,1 ton şəkər çuğunduru, 2162 ton dən üçün günəbaxan istehsal edilib.

İnkişafın davamlı olması üçün mühüm addımlar atılır

Heç şübhəsiz əldə edilən uğurlar arxayınçılığa əsas vermir. Və inkişafın davamlı olması üçün regionlarda mühüm addımlar atılır, genişspektrli tədbirlər görülür. Bu istiqamətdə qeyd etmək yerinə düşər ki, Bərdə şəhərində kənd təsərrüfatı idarəsi üçün inzibati laboratoriya binasında inşaat işləri başa çatıb. Kənd Təsərrüfatı Nazirliyinin sifarişi ilə inşa edilən üç mərtəbə və mansard hissədən ibarət binanın ümumi sahəsi 1522 kvadratmetrdir. Birinci mərtəbə 11 iş otağı, 2 laboratoriyadan, ikinci mərtəbə 8 iş otağı, 4 laboratoriyadan, üçüncü mərtəbə 8 iş otağı, 1 toplantı zalından, mansard hissə isə 4 iş otağı, təlim-tədris otağı, arxiv və mətbəxdən ibarətdir. Binada baytarlıq idarəsi, dövlət texniki nəzarət müfəttişliyi, dövlət toxum müfəttişliyi, bitki mühafizə mərkəzi, süni mayalama mərkəzi fəaliyyət göstərəcək.

Ağsu rayonunda isə payızlıq taxıl əkini sahələrinin zərərvericilərdən qorunması istiqamətində tədbirlər gücləndirilir. Rayon bitki mühafizə idarəsindən AZƏRTAC-a verilən məlumata görə, mütəxəssislər tərəfindən qısa vaxtda 9300 hektar taxıl sahəsində yoxlamalar aparılıb, 1220 hektarda siçanabənzər gəmiricilər aşkar olunub. Zərərvericilərlə sirayətlənən sahələrdə artıq mübarizə tədbirləri görülür. Bu məqsədlə Respublika Bitki Mühafizə Mərkəzindən kifayət qədər preparat gətirilib. İndiyədək 534 hektarda kimyəvi dərmanlama aparılıb. Hazırda bu iş davam etdirilir.

Qazax rayonunda mal-qara arasında yoluxucu xəstəliklərə qarşı profilaktik tədbirlər aparılır. Rayon baytarlıq idarəsindən bildirilib ki, təhlükəli xəstəliklərdən sayılan dabaq heyvanların çəkisinin, südünün azalmasına, ağız boşluğunda və dırnaqlarında yaraların yaranmasına səbəb olur. Belə problemlərdən qorunmaq üçün rayonda iribuynuzlu və xırdabuynuzlu heyvanlar arasında dabaq xəstəliyinə qarşı profilaktik tədbirlərə başlanılıb. Görüləcək tədbirlər çərçivəsində 31 minə yaxın iribuynuzlu, 141 minə yaxın xırdabuynuzlu heyvan peyvənd ediləcək.

Göyçay rayonunda isə əkin sahələrinin suvarılması və yaşayış məntəqələrinin sel sularından mühafizəsi məqsədilə arxların lil və çöküntülərdən təmizlənməsi işləri davam etdirilir. Rayon suvarma sistemləri idarəsindən bildiriblər ki, Göyçay şəhərinin daxili arxları lil və çöküntülərdən təmizlənib və bu istiqamətdə işlər davam etdirilir. Bu işlərə rayon suvarma sistemləri idarəsinin 5 ədəd müxtəlif təyinatlı texnikası cəlb olunub. Yaşayış məntəqələrinin və əkin sahələrinin sel sularından mühafizəsi məqsədilə Göyçay çayında sahilbərkitmə işləri də davam etdirilir. Rayonda mövcud olan 26 min 400 hektar əkin sahəsinin suvarma suyuna olan tələbatı əsasən Göyçay çayı, Yuxarı Şirvan kanalı və Yekəxana gölü vasitəsilə ödənilir. Rayon ərazisində su arxlarının uzunluğu 1700 kilometrdir ki, bunun 245 kilometri beton, 1455 kilometri isə torpaq kanallarıdır. Həmin su kanallarında isə 1800 ədəd hidrotexniki qurğu var. Hazırda həmin qurğular təmir olunaraq tam işlək vəziyyətə gətirilir.

Əkin sahələrinin suvarma suyu ilə təminatının yaxşılaşdırılması, torpaqların münbitliyinin qorunması, kollektor-drenaj şəbəkələrinin təmizlənməsi tədbirləri çərçivəsində kəndlərdəki kollektor-drenaj şəbəkələrinin 35,3 kilometrlik hissəsi və 162 kilometr uzunluğunda suvarma arxları lil və çöküntülərdən təmizlənib və arxların suötürmə qabiliyyəti yaxşılaşdırılıb. Hazırda suvarma kanallarında və təsərrüfatdaxili arxlarda su itkisinin qarşısının alınması üçün lildən təmizləmə işləri davam etdirilir. Bunun üçün kəndlərdə 10 ədəd müxtəlif təyinatlı texnika çalışır. İdarədən bildirilib ki, son aylarda kəndlərdə görülən bu işlər onu deməyə əsas verir ki, yay mövsümündə Göyçayda quraqlıq olsa da, əkin sahələrinin suvarma suyuna olan tələbatı lazımi səviyyədə ödəniləcək.

Ölkəmizdə aqrar sahənin inkişafına dövlətimiz tərəfindən hərtərəfli dəstəyin verildiyini təsdiqləyən daha bir məqam isə kənd təsərrüfatında məhsul istehsalçılarına müəyyən güzəştlərin tətbiq olunması, o cümlədən mineral gübrələrin 70 faiz güzəştlə satılması, texnikaların isə 40 faiz güzəştlə 10 il müddətinə lizinq yolu ilə verilməsidir.

Beləliklə, istər bütün bu sadalananlar, istərsə də respublikanın regionlarına kəndli fermer təsərrüfatlarının inkişafı üçün dövlət tərəfindən göstərilən hərtərəfli dəstək ölkəmizdə kənd təsərrüfatının inkişafının prioritet olduğunu təsdiqləməklə yanaşı, eyni zamanda, bu inkişafın davamlı olması üçün mütəmadi addımların atıldığını da təsdiqləyir.

Nadir AZƏRİ

Yeni Azərbaycan.- 2016.- 13 yanvar.- S.8