Regionlarda əhalinin içməli su təminatı yaxşılaşır

Təkcə son bir ildə respublikanın bölgələrində 825 kilometr su, 541 kilometr kanalizasiya xətti çəkilib, 32 artezian quyusu qazılıb, 27 su anbarı inşa olunub

Son illərdə ölkənin bütün bölgələrində müxtəlif təyinatlı infrastruktur obyektlərinin inşa edilməsi müasir Azərbaycanın mənzərəsini səciyyələndirən əsas cəhətlərdəndir. Respublikada generasiya güclərinin artırılması, şəhər və kəndlərin intensiv şəkildə qazlaşdırılması, əsaslı şəkildə yenidən qurulan yollar, istifadəyə verilən sosial təyinatlı obyektlər bütövlükdə Azərbaycanı güclü infrastruktur təminatına malik ölkəyə çevirib. Xarakterik haldır ki, respublikamızda infrastruktur quruculuğunun maliyyə təminatını bir qayda olaraq dövlət öz öhdəsinə götürür. Sonradan bu obyektlər regionlarda iqtisadi inkişafa təkan verən mühüm amil qismində çıxış edir. Beləliklə, müasir infrastruktur quruculuğu siyasəti sayəsində həm regionlarda iqtisadi aktivliyin artması üçün münbit şərait təmin edilir, həm də insanların sosial vəziyyəti yaxşılaşır.

Hədəflərdən biri də regionlarda əhalinin içməli su təminatını yüksək səviyyəyə qaldırmaqdır

Azərbaycanın həyata keçirdiyi genişməzmunlu sosial siyasətə uyğun olaraq regionlarda əhalinin içməli su təminatının yüksək səviyyəyə qaldırılması strateji hədəf kimi müəyyənləşdirilib. Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransdakı nitqində bu sahədə qarşıda duran vəzifələrdən bəhs edərək deyib: “Azərsu” ASC-nin qarşısına məqsəd qoyulmuşdur ki, bir neçə il ərzində bütün şəhərlərimizin içməli su və kanalizasiya layihələri tam icra edilsin. Əhaliyə 24 saat fasiləsiz, Dünya Səhiyyə Təşkilatının standartlarına uyğun içməli su verilsin. Biz bu hədəfə doğru irəliləyirik. Hər il bir çox şəhərlərimizdə içməli su layihələri istifadəyə verilir”.

Ölkəmizdə əhalinin su təminatının yaxşılaşdırılmasının starteji hədəf kimi müəyyənləşdirilməsi isə təsadüfi deyil. Bu, ilk növbədə hazırda dünya üzrə meydana çıxan çağırışlarla bağlıdır. Məlumdur ki, hazırda bütün dünya üzrə su təchizatı ilə bağlı statistika heç də ürəkaçan deyil. Mütəxəssislər yeni minillikdə su ehtiyatlarının geostrateji əhəmiyyətinə diqqət çəkərək bildirirlər ki, XXI əsrdə su neftin ötən əsrdəki yerini tuta bilər. Son dövrlərdə Yaxın Şərqdə, MDB-də və başqa məkanlarda baş verən geosiyasi kataklizmlərin həm də bu və ya digər su mənbələrinə nəzarəti ələ keçirmək iddialarından qaynaqlandığı deyilənləri bir daha təsdiqləyir. Getdikcə daha çox sayda dövlət malik olduğu su ehtiyatlarından başqa dövlətlərə qarşı təzyiq, iqtisadi-siyasi rıçaq vasitəsi kimi istifadə etməyə üstünlük verir.

Bir sözlə, müasir dövrdə su mənbələrinin çatışmazlığı dünyanı təhdid edən qlobal problemlərdən birinə çevrilib. Verilən məlumatlarda Yer üzündə təxminən 1,5 milyard nəfərin içməli su çatışmazlığından əziyyət çəkdiyi bildirilir. BMT qlobal miqyasda su çatışmazlığı ilə bağlı xüsusi hesabat yayıb. Həmin hesabatda vurğulanır ki, dünyada su çatışmazlığından əziyyət çəkən insanların sayı durmadan kəskin şəkildə artır. Mütəxəssislər BMT-nin hesabatına əsasən 2050-ci ildə 65 ölkədə 10 milyard nəfərə yaxın insanın su çatışmazlığı problemi ilə üz-üzə qalacağını proqnozlaşdırırlar.

Su çatışmazlığı problemi ilə bağlı Ümumdünya Səhiyyə Təşkilatının məlumatı da həyəcan təbili çalmağa ciddi əsaslar verir. Qurumun rəsmi məlumatına əsasən, hər gün dünyada diareya xəstəliyindən 5 min uşaq ölür, yəni hər 17 saniyəyə bir uşaq həyatla vidalaşır. İçməli suyun keyfiyyət göstəriciləri də ciddi aktuallıq daşıyır. ÜST bildirir ki, müxtəlif ölkələrdə xəstəliklərin təxminən 80 faizi keyfiyyətsiz su ilə qidalanma səbəbindən yaranır və nəticədə, hər il 3 milyon insan dünyasını dəyişir. Sadalanan bu və ya digər faktlar hazırda su təminatının milli dövlətlər üçün necə ciddi məsələyə çevrildiyi barədə konkret təsəvvür yaradır. Azərbaycan malik olduğu güclü potensialından bəhrələnərək dünya miqyasında su təminatı ilə bağlı meydana çıxan aktual çağırışları önləməyə çalışır.

Respublikamızda əhalinin su təminatının yaxşılaşdırılmasının davamlı olaraq diqqət mərkəzində saxlanılmasını şərtləndirən digər mühüm amil isə respublikanı qidalandıran əsas su mənbələrinin ölkə hüdudlarından kənarda formalaşması və su ehtiyatlarının qeyri-bərabər paylanmasıdır. “Azərsu” ASC-nin məlumatına əsasən, hazırda ölkənin yerüstü su ehtiyatları 27 kubkilometr təşkil edir, quraq illərdə isə bu ehtiyat 20-21 kubkilometrə qədər azalır. Yerüstü su ehtiyatlarının mənbələrini çaylar, göllər, su anbarları və buzlaqlar təşkil edir. Ölkəmizin şirin su ehtiyatlarının 70-72 faizi ölkə hüdudlarından kənarda formalaşır.

Azərbaycanın yerüstü su ehtiyatlarının 19-20,6 kubkilometri transsərhəd çayların, 9,5-10 kubkilometri isə yerli çay axımı hesabına formalaşır. Samur çayı istisna olmaqla birbaşa Xəzər dənizinə tökülən çayların illik su ehtiyatı 2,2-2,5 kubkilometr təşkil edir ki, bunun da 1-1,1 kubkilometri Böyük Qafqazın şimal-şərq yamacından, 1,2-1,4 kubkilometri Lənkəran təbii vilayətindən axan çayların payına düşür. Kür çayının hövzəsinə daxil olan sağ və sol qolların ümumi su ehtiyatı isə 7,5-7,8 kubkilometr təşkil edir. Azərbaycan irimiqyaslı investisiya layihələri həyata keçirərək bu və ya digər mənbələrdən səmərəli istifadə etməklə ölkənin uzunmüddətli dövrdə etibarlı su təminatına nail olmağa çalışır.

Abşeronun su təminatında dönüş yaranıb

Tarixən Azərbaycanın su qıtlığından əziyyət çəkən bölgələrindən biri də Bakıətrafı qəsəbələr və bütövlükdə Abşeron yarımadası olub. Ceyranbatan Ultrasüzgəcli Sutəmizləyici Qurğular Kompleksinin istifadəyə verilməsi ilə Abşeronun su təminatında dönüş yaranıb. Kompleks Ceyranbatan gölündən suyun götürülməsi məqsədilə tikilən hidrotexniki qurğular, sutəmizləyici qurğunun özü və onun köməkçi infrastrukturu, emal olunan suyun optimal paylanması məqsədilə relyef baxımından hündürlükdə yerləşən anbarlardan və qurğudan anbara qədər magistral kəmərdən ibarətdir.

Yeni kompleksin əsas obyekti ultrasüzgəcli sutəmizləyici qurğudur. 5,6 hektar ərazidə yerləşən bu qurğu mürəkkəb geoloji ərazidə inşa olunub. Xam su anbarından suyun süzgəclərə sabit təzyiqlə ötürülməsini 16 nasos təmin edir. Emal prosesinə verilən su əvvəlcə 200 mikronluq süzgəclərdən keçir, sonra qurğunun əsas təmizləyici modullarında süzülür. Süzgəclərə 4,5 atmosfer təzyiqlə ötürülən su modulların içərisində quraşdırılan 0,02 mikronluq xüsusi süzgəclərdən keçməklə, cəmi 20 saniyədə təmizlənir. Hazırda dünyada az bulanıqlı suların emalı üçün ən səmərəli texnologiya məhz ultrasüzgəcli qurğular sayılır. Membran texnologiyasına əsaslanan belə qurğularda su heç bir kimyəvi təmizlənmə aparılmadan mexaniki üsulla emal olunur. Belə qurğuların ən böyük üstünlüyü suyun təbii mineral tərkibini saxlamaqla, onu asılı hissəciklərdən - bakteriya, virus, bəzi həll olunmamış duzlar və ağır metallardan təmizləməsi, bulanıqlıq, xoşagəlməz iy və dadın aradan qaldırılmasıdır. Qurğuda quraşdırılan 5280 modulun məhsuldarlığı saniyədə 6,6 kubmetrdir. Gələcəkdə əlavə modulların quraşdırılması, eləcə də elektromexaniki sistemin köməyi ilə emal gücünün artırılaraq saniyədə 7,5 kubmetrə çatdırılması mümkündür.

Kompleksdə emal olunan su istehlakçılara Ceyranbatan-Zirə magistral kəməri ilə ötürülür. Kəmərin inşası mərhələlərlə davam etdirilib. Əsasən Abşeron yarımadasının qəsəbə və kəndlərinin su təchizatına hesablanan Ceyranbatan-Balaxanı-Ramana-Qala-Zirə kəməri ilə ötürülən suyun səmərəli paylanması, bu ərazilərdə əhalinin fasiləsiz su təminatına nail olunması üçün kəmərin marşrutu boyunca tutumu 90 min kubmetr olan Saray, Balaxanı, Ramana, Qala və Zirə anbarları tikilib. Gələcəkdə Masazır və Binəqədidə yeni anbarların tikilməsi, eləcə də mövcud anbarların genişləndirilməsi nəzərdə tutulur ki, bunun nəticəsində 200 min kubmetrdən artıq su ehtiyatı yaradılacaq.

Saatlı şəhərində 22 min nəfərin içməli su təchizatı yaxşılaşacaq

Əlamətdar haldır ki, Prezident İlham Əliyev çox tez-tez regionlarda yaradılan infrastruktur obyektlərinin, o cümlədən də yenidən qurulan su-kanalizasiya şəbəkələrinin istifadəyə verilməsi mərasimlərində şəxsən iştirak edir. Azərbaycanın dövlət başçısı bu yaxınlarda Saatlı rayonuna səfəri çərçivəsində Saatlı şəhərinin su təchizatı sistemlərinin istismara verilməsi mərasiminə qatılıb və Özünün dəyərli tövsiyələrini verib.

Tədbirdə “Azərsu” Açıq Səhmdar Cəmiyyətinin sədri Qorxmaz Hüseynov məlumat verib ki, regionların sosial-iqtisadi inkişafı Dövlət proqramları çərçivəsində Saatlı şəhərində içməli su təchizatı və kanalizasiya sistemlərinin yenidən qurulması layihəsi həyata keçirilir. Azərbaycan hökuməti və Dünya Bankının birgə maliyyələşdirdiyi “Milli su təchizatı və kanalizasiya xidmətləri layihəsi” çərçivəsində icra olunan bu layihə 2035-ci ilə qədər perspektiv inkişaf nəzərə alınmaqla Saatlı şəhərində 22 min nəfərin içməli su təchizatı və kanalizasiya xidmətlərindən istifadəsinin yaxşılaşdırılmasını nəzərdə tutur. Eyni zamanda, layihə çərçivəsində Saatlı rayonunun 7 kəndində 17 min nəfərin su təchizatı yaxşılaşdırılacaq. “Saatlı şəhərinin su təchizatı və kanalizasiya sistemlərinin yenidən qurulması” layihəsi çərçivəsində şəhərdə hər birinin tutumu 5 min kubmetr olan iki su anbarı, nasos stansiyası inşa edilib. Şəhərdə 137 kilometr uzunluğunda paylayıcı su şəbəkəsi yaradılıb, 5 mindən artıq ünvana birləşmə verilib və sayğaclaşma işləri aparılıb. Bununla da yeni mənbədən bütün şəhərə içməli suyun verilməsi təmin edilib.

Qeyd edək ki, Saatlı şəhərində ilk mərkəzləşdirilmiş içməli su təchizatı sistemi 1960-cı illərdə yaradılıb. Şəhərə içməli su Araz çayından və Sabir adına kanaldan götürülüb çökdürülərək verilirdi. Yeni layihəyə qədər “Azərsu” Açıq Səhmdar Cəmiyyəti şəhərin 19 min sakinindən 33 faizinə xidmət göstərirdi. Mərkəzləşdirilmiş qaydada su alan əhaliyə hər gün 2-3 saatlıq qrafik əsasında su verilirdi. Əhalinin qalan hissəsi isə tələbatını fərdi qaydada ödəyirdi.

Saatlı şəhəri və ətraf kəndlərin keyfiyyətli və dayanıqlı su təchizatının təmin edilməsi məqsədilə Hacıqabul rayonu ərazisində yerləşən və Abşeron yarımadasını içməli su ilə təmin edən Kür sutəmizləyici qurğularının imkanlarından istifadə edilib. Bu məqsədlə 2014-cü ildə 62 kilometr uzunluğunda Sabirabad-Saatlı qrup su kəməri tikilərək istismara verilib. Magistral su kəmərinin 12 kilometrlik hissəsi metal, qalan hissəsi isə polietilen borulardan tikilib. Kəmər 1 yerdə Kür çayı, 1 yerdə dəmir yolu, 6 yerdə magistral avtomobil yolu, 3 yerdə beton kanal və 15 yerdə drenaj kollektoru ilə kəsişir. Sabirabad, Saatlı və Hacıqabul rayonlarının 160 minə yaxın sakinini keyfiyyətli içməli su ilə təmin etmək üçün tikilmiş Sabirabad-Saatlı magistral su kəməri 2030-cu ilə perspektiv inkişaf nəzərə alınmaqla Sabirabad şəhəri və rayonun 28 kəndində 100 min, Saatlı şəhəri və rayonun 12 kəndində 47 min, Hacıqabul rayonunun 4 kəndində isə 10 min nəfərin içməli suya olan tələbatını ödəyəcək.

Prezident İlham Əliyevin “Əhalinin içməli su ilə təminatının yaxşılaşdırılmasına dair əlavə tədbirlər haqqında” 2017-ci il 17 mart tarixli Sərəncamına əsasən bu ilin sonuna qədər magistral kəmər boyunca yerləşən 30 kəndə içməli suyun verilməsi təmin ediləcək. Azərbaycan hökuməti və Dünya Bankının birgə maliyyələşdirdiyi bu layihə Saatlı şəhəri ilə yanaşı, Sabirabad, Şamaxı və Qəbələ şəhərlərinin içməli su təchizatı və kanalizasiya sistemlərinin yenidən qurulmasını əhatə edir. Artıq Sabirabad şəhərinə içməli suyun verilməsi təmin edilib. Şamaxı şəhərində içməli su təchizatı və kanalizasiya sistemlərinin, eləcə də tullantı sutəmizləyici qurğunun tikintisi yekunlaşmaq üzrədir. Qəbələ şəhərində icra olunan layihənin birinci mərhələsi çərçivəsində su mənbəyində işlər yekunlaşıb, magistral xətlərin və anbarların tikintisi başa çatdırılıb, şəhərdaxili su şəbəkəsinin bir hissəsinin inşası isə yekunlaşmaq üzrədir.

Ümumiyyətlə, Prezident İlham Əliyevin imzaladığı yuxarıda bəhs olunan Sərəncamın əhatə dairəsi kifayət qədər genişdir. Sərəncamla əhalinin içməli su ilə təmin edilməsi məqsədi ilə 22 rayonun 267 min nəfərdən çox əhalisi olan 170 yaşayış məntəqəsində içməli su təchizatı sisteminin qurulması üçün “Azərbaycan Respublikasının 2017-ci il dövlət büdcəsinin dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.53-cü bəndində nəzərdə tutulmuş 14,0 (on dörd) milyon manat “Azərsu” Açıq Səhmdar Cəmiyyətinə ayrılıb.

Gəncədə su-kanalizasiya xətləri yenilənir

Respublikamızda 2004-cü ildən bəri uğurla reallaşdırılan regionların sosial-iqtisadi inkişafına dair Dövlət proqramlarında bölgələrdə əhalinin su təminatının yaxşılaşdırılması, kanalizasiya şəbəkəsinin qurulması ilə bağlı konkret müddəalar öz əksini tapıb və indiyədək ayrı-ayrı şəhər və bölgələrdə onlarca layihə reallaşdırılb. Bununla bağlı statistika kifayət qədər zəngindir. Bəhs olunan Dövlət proqramları çərçivəsində əhalisinin sayı 579 min nəfərdən çox olan 28 şəhər və rayon mərkəzində içməli su təchizatı sistemi qurulub. Nəticədə, respublika miqyasında əhalinin su təchizatında dönüş yaranıb. Hazırda Bakının fasiləsiz su təminatı 80 faizə çatıb. Ölkə üzrə isə bu göstərici təxminən 65 faizdir. Müqayisə üçün bildirmək yerinə düşər ki, müvafiq Dövlət proqramlarının icrasına start verilməzdən öncə ölkə üzrə fasiləsiz su təminatı 25-30 faiz səviyyəsində idi.

Qeyd edək ki, ölkənin su təchizatının yaxşılaşdırılması istiqamətində işlər üşüncü Dövlət Proqramı çərçivəsində də intensiv şəkildə davam etdirilir. Təkcə son bir ildə respublikanın regionlarında 825 kilometr su, 541 kilometr kanalizasiya xətti çəkilib, 32 artezian quyusu qazılıb, 27 su anbarı inşa olunub. Əhalisi 120 min nəfərdən çox olan 5 şəhərdə su təchizatı layihəsi başa çatıb. Hazırda Gəncədə su-kanalizasiya xətlərinin yenilənməsi işləri sürətlə davam edir. Əhalinin içməli su ilə təminatının yaxşılaşdırılması məqsədilə şəhərin ayrı-ayrı yerlərində 4 su anbarı inşa olunub. Şəhərin Əziz Əliyev, Bəxtiyar Əliyev və digər küçələrində magistral su-kanalizasiya xətləri çəkilib, evlərə su sayğacları quraşdırılıb. Evlərdə sınaq testləri başa çatdıqdan sonra sakinlər fasiləsiz olaraq içməli sudan və kanalizasiya xəttindən istifadə edə biləcəklər.

Hazırda Gülüstan qəsəbəsi və ətraf ərazilərdə yeni xətlər çəkilərək magistrala birləşdirilir. İşlərin bir həftəyə yekunlaşdırılması və su xətlərinin evlərə birləşdirilməsi nəzərdə tutulub. Görülən işlərin ilkin mərhələsində şəhərdə 2 min abonentin fasiləsiz olaraq içməli su ilə təminatı və çirkab su xəttindən istifadə imkanı yaxşılaşacaq. May ayının sonuna kimi isə daha 400-ə yaxın abonent fasiləsiz içməli su ilə təmin ediləcək.

Kiçik yaşayış məntəqələrinin su təminatının yaxşılaşmasında modul tipli qurğuların böyük rolu var

Ölkədə su təminatının yaxşılaşdırılması ilə bağlı layihələr yalnız iri şəhərləri və rayon mərkəzlərini əhatə etmir. Belə layihələr həmçinin kiçik yaşayış məntəqələrində də həyata keçirilir. Regionların sosial-iqtisadi inkişafına dair Dövlət proqramlarında nəzərdə tutulan müvafiq tədbirlərin reallaşdırılması sayəsində düşmən mövqelərindən bir neçə yüz metr məsafədə yerləşən Tovuzun Əlibəyli, Goranboyun Tapqaraqoyunlu kəndlərinin içməli su problemi öz həllini tapıb. Eyni zamanda Ağdam, Tərtər, Füzuli, Xocavənd rayonlarının 8 sərhəd yaşayış məntəqəsinə, həmçinin Ağcabədidə Laçın rayonundan olan məcburi köçkünlərin yaşadığı ərazilərə su xətləri çəkilib. Sayca üçüncü Dövlət Proqramının icrasının arxada qalan dövrü ərzində həmçinin Balakən, Zaqatala, Qazax, Ağsu, İsmayıllı, Qobustan, Yardımlı, Biləsuvar, Salyan, Saatlı rayonlarının kənd və qəsəbələrində də su layihələri reallaşdırılıb, nəticədə 35 min nəfərin su təminatı yaxşılaşıb. Bəhs olunan Dövlət Proqramı çərçivəsində Şirvan şəhərinin Yeni Yaşayış massivində 49 kilometr su şəbəkəsi yaradılıb, Şirvan-Muğan kəmərindən əraziyə magistral xətt çəkilib.

Azərbaycanın regionlarında əhalinin su təminatının yaxşılaşdırılması məqsədilə müxtəlif variantlardan istifadə edilir. O cümlədən son illərdə respublikanın bölgələrində modul tipli qurğuların quraşdırılması geniş vüsət alıb. Təkcə son bir neçə il ərzində ölkə ərazisində 1500-ə yaxın subartezian quyusu qazılıb. İndiyədək 24 rayonun 384 yaşayış məntəqəsində modul tipli sutəmizləyici qurğular quraşdırılıb və nəticədə 620 min nəfərin su təminatı yaxşılaşıb. Son bir ildə isə 100 min nəfəri əhatə edən 56 yaşayış məntəqəsində modul tipli sutəmizləyicisi quraşdırılıb.

Bölgələrdə modul tipli qurğuların istifadəyə verilməsi perspektivdə də davam etdiriləcək. Xəbər verildiyi kimi, Prezident İlham Əliyev 24 fevral 2017-ci il tarixində “Əhalinin ekoloji cəhətdən təmiz su ilə təminatının yaxşılaşdırılmasına dair əlavə tədbirlər haqqında” müvafiq Sərəncam imzalayıb. Sərəncamda Kür və Araz çaylarının sularından, habelə digər su mənbələrindən istifadə edən ölkə əhalisinin keyfiyyətli içməli su ilə təmin edilməsi məqsədi ilə 18 rayonun 64 min nəfərdən çox əhalisi olan 100 yaşayış məntəqəsində modul tipli sutəmizləyici qurğuların quraşdırılması üçün Azərbaycan Respublikasının 2017-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Ekologiya və Təbii Sərvətlər Nazirliyinə 16,0 (on altı) milyon manat vəsait ayrılması nəzərdə tutulub.

Qarşıya qoyulan əsas məqsədlərdən biri də müştəri məmnunluğunu təmin etməkdir

Ölkədə əhalinin su təminatının yaxşılaşdırılması ilə bağlı qarşıya qoyulan əsas məqsədlərdən biri də xidmətin keyfiyyətini yüksəltmək və müştəri məmnunluğunu təmin etməkdən ibarətdir. Son vaxtlarda “Azərsu” ASC-nin müvafiq qurumlarında şəffaflığın təmin edilməsi, vətəndaşların müraciətlərinə cavab verilməsinin tezləşdirilməsi, məmur-abonent təmaslarının azaldılması istiqamətində məqsədyönlü tədbirlər həyata keçirilir. Bütün regionlarda sayğaclaşdırma uğurla aparılır. 1yanvar 2017-ci il tarixədək “Azərsu” ASC-nin ölkə üzrə su təchizatı xidməti göstərdiyi 1342248 əhali qrupu abunəçisinin 897350-si və ya 66,9 faizi sayğacla təmin olunub. Qeyri-əhali qrupuna aid 58775 abunəçinin isə 48223-ü və ya 82 faizində sayğaclaşma aparılıb.

“Azərsu” ASC-nin bütün regional idarələri üzrə elektron xidmətlərdən istifadə edilməsinin əhatə dairəsi genişləndirilir. Hazırda müvafiq xidmət vasitəsilə bütün abonentlər internet üzərindən su borclarını öyrənə bilərlər. Xidmətdən istifadə etmək üçün sistemə abonent kodu və abonent tipi daxil olunmaqla sorğu verilir. Bu zaman həmin abonentə aid su borcu, sayğac nomrəsi, sayğacın son göstəricisi və sayğacın son oxunma tarixini özundə ehtiva edən məlumat verilir. İnternet üzərindən borcları barədə ətraflı məlumat alan abonentlər onu elə elektron qaydada da ödəyə bilərlər. Xidmətdən istifadə etmək üçün yalnız abonent kodu tələb olunur. Xidmət Azərbaycan Respublikası Mərkəzi Bankının Kütləvi Ödənişlər üzrə Mərkəzləşmiş İnformasiya Sistemləri (HÖP) və “GoldenPay” MMC ilə birgə həyata keçirilir və tam avtomatlaşdırılmışdır. Elektron ödəmələri müxtəlif saytlar, həmçinin “MilliÖn” və “e-manat” ödəmə terminalları vasitəsilə aparmaq mümkündür.

Mübariz ABDULLAYEV

Yeni Azərbaycan.- 2017.- 15 aprel.- S.7