Xalq artisti Əfrasiyab Bədəlbəylinin “Qız qalası” baleti nümayiş etdirilib

Aprelin 15-də Azərbaycan Dövlət Akademik Opera və Balet Teatrında Azərbaycanın Xalq artisti, görkəmli bəstəkar, musiqişünas-alim və dirijor Əfrasiyab Bədəlbəylinin 110 illiyinə həsr olunmuş “Qız qalası” baletinin tamaşası keçirilib.

Məlumat üçün bildirək ki, “Qız qalası” Azərbaycan milli baletinin ilk nümunəsi olub və 1940-cı il aprelin 16-da Azərbaycan Dövlət Akademik Opera və Balet Teatrında tamaşaya qoyulub. Həmin vaxtdan tamaşa teatrın repertuarında geniş yer tutur, bir neçə dəfə Moskva və Rusiyanın başqa şəhərlərində, eləcə də Türkiyədə qədim Aspendos teatrında göstərilib. Qeyd edək ki,”Qız qalası” baleti yalnız Azərbaycanda deyil, bütün Yaxın və Orta Şərqdə ilk balet hesab olunur.

Qədim Bakının tarixi mərkəzində, alınmaz qala divarlarının əhatəsində şəhərin əsas rəmzlərindən biri olan Qız qalası haqqında yazılan baletdə “Şoloxo”, “Ay bəri bax”, “Kikican” kimi xalq havalarının əsasında yaradılan emosional rəqslər gecəyə xüsusi rəng qatıb. Ali hisslər yaradan rəqslərin musiqi ilə ahəngi, o cümlədən gözoxşayan dekorasiya və aktyorların bir-birindən parlaq və gözəl geyimləri gecəni unudulmaz edib. Görkəmli sənətkarın qardaşı oğlu, Bakı Musiqi Akademiyasının rektoru, SSRİ Xalq artisti, professor Fərhad Bədəlbəyli də tamaşanı izləməyə gələnlərin sırasında öz yerini almışdı.

Yeri gəlmişkən bildirək ki, dirijoru Xalq artisti, professor Cavanşir Cəfərov olan səhnə əsərində əsas rolları Azərbaycanın Xalq artisti Gülağası Mirzəyev (Polad) və Əməkdar artistlər Tamilla Məmmədzadə (Gülyanaq) və Makar Ferştandt (Cahangir xan) ifa ediblər. Sonda tamaşaçılarla dolu olan zal uzun müddət ayaq üstə aktyorları alqışlayıb.

Müşfiqə BAYRAMLI

Yeni Azərbaycan.- 2017.- 18 aprel.- S.7