Həyata keçirilən çoxşaxəli işlər nəticəsində bütün regionlarımız abadlaşıb, şəhərlərimiz gözəlləşib

2017-ci ilin birinci rübü Şəki-Zaqatala iqtisadi rayonu üçün də uğurlu olub

Məlum olduğu kimi, son illər dünya iqtisadiyyatında davam edən neqativ proseslərə, ölkəmizin ənənəvi əsas ixrac məhsulu olan neftin qiymətinin kəskin enməsinə baxmayaraq, Azərbaycan iqtisadiyyatı çox dinamik şəkildə inkişaf edir. Bunun da səbəbi Prezident İlham Əliyevin rəhbərliyi ilə həyata keçirilən hərtərəfli islahatlardır. Məhz bütün sahələri əhatə edən islahatların, həmçinin 2004-cü ildən etibarən Regional İnkişaf proqramlarının reallaşdırılmasının nəticəsidir ki, 2017-ci ilin birinci rübündə də ölkəmiz uğurla inkişaf edib.

Yeri gəlmişkən, aprelin 17-də Azərbaycan Respublikasının Prezidenti İlham Əliyevin Sədrliyi ilə Yevlaxda keçirilən qeyri-neft ixracatçılarının respublika müşavirəsində də bu məqama xüsusi olaraq toxunulub. Müşavirədəki giriş nitqində Regional İnkişaf proqramlarının icrası nəticəsində əldə edilən nəticələrdən danışan dövlət başçısı, demək olar ki, 2004-cü ildən bu günə qədər Azərbaycanda əsas infrastruktur layihələrinin icra edildiyini bildirib: “Biz elektrik enerjisini idxal edirdik, artıq ixrac etməyə başlamışıq, 30-a yaxın elektrik stansiyası tikilib istifadəyə verilmişdir. Bu, inkişaf üçün birinci şərtdir. Əgər enerji gücü olmasa, heç bir müəssisəni yaratmaq mümkün olmayacaq. Digər tərəfdən, infrastruktur layihələrimiz sosial xarakter daşıyır. Çünki dayanıqlı enerji ilə vətəndaşları təmin etmək hər bir dövlətin borcudur. Biz buna da nail olduq. Əvvəlki illəri yaxşı xatırlayırıq, işıqlar sönürdü, hətta Bakı şəhərində fasilələr yaranırdı. Bu gün isə biz dayanıqlı elektrik enerjisini demək olar ki, təmin etmişik. Hələ də işlər gedir, enerji infrastrukturu yeniləşir, yarımstansiyalar tikilir, yeni xətlər çəkilir, elektrik dirəkləri təzələnir. Ancaq demək olar ki, biz işlərin böyük hissəsini görə bilmişik”.

Sözügedən nitqində Azərbaycanda qazlaşdırmanın 92 faizə çatdığını və yeni yolların salındığını da deyən Prezident bildirib ki, eyni zamanda, sosial infrastruktur yaradılıb - 3 mindən çox məktəb, 600-dən çox xəstəxana tikilib, yaxud təmir edilib: “Böyük meliorasiya layihələri icra edilmişdir. Deyə bilərəm ki, onların içərisində iki layihə - Taxtakörpü və Şəmkirçay su anbarları tarixi əhəmiyyət daşıyır. Həmin layihələrə böyük dövlət vəsaiti qoyulmuşdur. Bu su anbarlarının fəaliyyəti bundan sonra da kənd təsərrüfatına daim böyük dəstək olacaq. Digər meliorasiya layihələri icra edilmişdir və bu proses davam edir. Hesab edirəm ki, bu il bu istiqamətdə ən ciddi addımlar atılacaq. Mən bunu artıq demişəm, fermerlərə bu il təxminən 150 min hektar yeni suvarılan torpaq təhvil veriləcək. Bir il ərzində bu qədər suvarılan torpağı əldə etməyimiz tarixi nailiyyətdir”.

Beləliklə, görünən odur ki, Regional İnkişaf proqramlarının icrası öz gözəl nəticələrini verib. Daha dəqiq desək, məhz yuxarıda bəhs olunan proqramlar çərçivəsində həyata keçirilən çoxşaxəli işlər nəticəsində bütün regionlarımız abadlaşıb, şəhərlərimiz gözəlləşib. Ölkəmizdə minlərlə yeni müəssisə açılıb, həmçinin bir milyon 700 min yeni iş yeri yaradılıb ki, onların bir milyon 300 mini daimi iş yeridir. Eyni zamanda, 2017-ci ilin birinci rübündə iqtisadiyyatın qeyri-neft sektoru 2,4 faiz, qeyri-neft sənayesi 2 faiz, kənd təsərrüfatı 3,5 faiz, valyuta ehtiyatlarımız 1 milyard dollar artıb. Bu gün valyuta ehtiyatlarımız 38,5 milyard dollardır. Hesabat dövründə Azərbaycanda sosial proqramların icrası davam edib, 85 min yeni iş yeri yaradılıb.

Onu da vurğulamaq yerinə düşər ki, əvvəlki illərdə olduğu kimi, bu ilin birinci rübündə də əldə edilən uğurlardan ölkəmizin bütün bölgələrinə pay düşüb. Və təbii ki, bu sırada Şəki-Zaqatala iqtisadi rayonu da var. Bəhs edilən dövrdə bu iqtisadi rayon ərazisində əldə edilən uğurlara keçməmişdən öncə qeyd edək ki, Şəki-Zaqatala iqtisadi rayonuna Balakən, Qax, Qəbələ, Zaqatala, Oğuz inzibati rayonları və respublika tabeli Şəki şəhəri daxildir. Məlumat üçün bildirək ki, Böyük Qafqaz dağlarının cənub yamaclarında, respublikanın şimalında yerləşən Şəki-Zaqatala iqtisadi rayonu ərazisinin ümumi sahəsi 8,96 min kv.km-dir. Şəki-Zaqatala iqtisadi rayonunun gözəl təbiəti onu Azərbaycanın mühüm istirahət-turizm regionuna çevirib. Qəbələdə, Şəkidə, Zaqatalada istirahət-turizm müəssisələri fəaliyyət göstərir. Ərazidən Gürcüstana beynəlxalq turizm marşrutu keçir. Şəki-Zaqatala iqtisadi rayonunda yerləşən sənaye müəssisələri əsasən kənd təsərrüfatı məhsullarını emal edir. Alazan-Əyriçay vadisi, Baş Qafqaz silsiləsinin dağətəyi zonaları, Acınohur ovalığı mühüm kənd təsərrüfatı sahələridir. Bu ərazilərdə becərilən tütün, qərzəkli meyvələr, taxıl, bəslənən barama iqtisadi rayonun kənd təsərrüfatının əsas sahələridir. Tütün yığımına görə Şəki və Zaqatala rayonları, meyvə yığımına görə Şəki, Oğuz, Balakən, Zaqatala, Qax rayonları irəlidə durur. Şəki, Zaqatala, Qəbələ rayonlarında daha çox taxıl yığılır.

Beləliklə, 2017-ci ilin birinci rübündə də sözügedən iqtisadi rayona daxil olan rayonlarda, o cümlədən Şəkidə uğurlar əldə edilib, əhalinin içməli su, təbii qaz və elektrik enerjisi ilə təminatı istiqamətində görülən işlər davam etdirilib. Məsələn, rayonun iki yaşayış məntəqəsi qazlaşdırılıb, daha 3 kəndin qazlaşdırılması istiqamətində zəruri işlər görülür.

İçməli su təminatına gəlincə Azərbaycan Respublikası hökuməti ilə Almaniyanın KfW Bankının birgə maliyyələşdirdiyi “Açıq Kommunal İnfrastruktur Proqramı II” layihəsi çərçivəsində həyata keçirilən Şəki şəhərinin içməli su təchizatı və kanalizasiya sistemlərinin yenidən qurulması işləri uğurla davam etdirilir. Qeyd edək ki, hazırda icra olunan layihənin üçüncü mərhələsində Şəki şəhərinin mərkəzi hissəsinin paylayıcı su və kanalizasiya şəbəkələrinin yenidən qurulması nəzərdə tutulur. Şəki şəhərində içməli su və kanalizasiya şəbəkələrinin yenidən qurulması işləri çərçivəsində şəhərdə 2 ədəd tutumu 1500m3 su anbarı, 126,7 km içməli su şəbəkəsi, 115,3 km kanalizasiya xətti, 21 km kanalizasiya kollektoru inşa ediləcək, 8026 abonentə ev birləşməsi veriləcək, 437 yanğın hidrantı quraşdırılacaq. Bu mərhələ çərçivəsində işlərin 2018-ci ilin noyabr ayında başa çatdırılması nəzərdə tutulub.

Bundan başqa, birinci rüb ərzində tikinti-quruculuq işləri sahəsində də mühüm addımlar atılıb, ümumi uzunluğu 17,1 kilometr olan Şəki-Aşağı Göynük-Baş Göynük-Baş Şabalıd avtomobil yolunun tikintisi işləri davam etdirilib.

Şəki şəhər İcra Hakimiyyətindən verilən məlumata görə, hesabat dövründə Şəki rayonunda faktiki qiymətlərlə 67 milyon 559 min manatlıq məhsul istehsal olunub və xidmətlər göstərilib. Ümumi məhsul buraxılışının həcmi ötən ilin müvafiq dövrü ilə müqayisədə 8 faiz artıb. Buraxılan məhsulun 7 faizi dövlət, 93 faizi isə özəl bölmənin payına düşür. Hesabat dövründə əmtəə dövriyyəsinin həcmi 2,2 faiz artaraq 112 milyon 567 min manat olub. Bu müddət ərzində rayonda 1446 yeni daimi iş yeri açılıb.

2017-ci ilin birinci rübündə rayonda məhsul istehsalının artırılması, kənd təsərrüfatında özəl bölmənin genişləndirilməsi diqqət mərkəzində saxlanılıb, rayonun iqtisadiyyatı üçün ənənəvi sahələrdən hesab olunan taxılçılıq, heyvandarlıq, tütünçülük və baramaçılığın inkişafı istiqamətində bir sıra tədbirlər həyata keçirilib.

2017-ci ilin məhsulu üçün payızlıq taxıl əkilmiş 68 min 514 hektar sahəyə aqrotexniki qulluq olunub. Eyni zamanda, 2017-ci ildə rayonda 787 hektar sahədə tütün əkini planlaşdırılır. Əkin zamanı əsasən “Virciniya”, “Berley”, “İmunni-580”, “Zaqatala-67” tütün sortlarından istifadə olunacaq. Tütün əkini üçün 33 min kvadratmetr sahədə şitil yetişdirilib və aprelin 20-dən sonra şitillər sahələrə köçürüləcək.

Bundan başqa, bu il rayonda 27 ton yaş barama istehsalı nəzərdə tutulub. Yeni fındıq bağlarının salınması üçün 301 hektar sahə əkinə hazır vəziyyətə gətirilib. Cari ildə rayonda 8 min hektar sahədə yazlıq bitkilərin əkini də nəzərdə tutulur.

Bu ilin birinci rübündə Zaqatala rayonu üçün də uğurlarla yadda qalıb. Rayon İcra Hakimiyyətindən verilən məlumata əsasən, hesabat dövründə rayonda ümumi məhsul buraxılışının həcmi ötən ilin eyni dövrü ilə müqayisədə 30,3 faiz artaraq 65,3 milyon manat təşkil edib. Məhsul istehsalı sənayedə 84,6 faiz, kənd təsərrüfatında 12,9 faiz, ticarətdə 11,3 faiz, rabitə sahəsində 10 faiz artıb. Bu müddət ərzində pərakəndə əmtəə dövriyyəsinin həcmi 15,2 faiz, pullu xidmətlərin həcmi isə 17,8 faiz çoxalıb. İlin birinci rübündə rayonda 1571-i daimi olmaqla, 1591 yeni iş yeri açılıb. 2017-ci ilin birinci rübündə əhalinin elektrik enerjisi, təbii qaz, içməli su və digər xidmətlərlə təminatının yaxşılaşdırılması, həmçinin tikinti-quruculuq işləri istiqamətində işlər davam etdirilib.

Verilən məlumatda o da qeyd olunub ki, Prezident İlham Əliyevin mövcud iqtisadi potensialdan daha səmərəli istifadə olunması, idxalı əvəz edən və ixracyönümlü istehsal, emal və infrastruktur müəssisələrinin yaradılması və inkişaf etdirilməsi istiqamətində verdiyi tapşırıqların icrasını təmin etmək məqsədi ilə bu ilin birinci rübündə Zaqatala rayonunda da zəruri tədbirlər davam etdirilib. Yeri gəlmişkən, cari ildə rayonda 700 hektardan çox sahədə tütün əkilməsi proqnozlaşdırılır. Bu məqsədlə “İnter-Tobacco” MMC tərəfindən fermerlərlə 637,2 hektar sahədə “Virciniya” və 23,4 hektar sahədə “Berley” tütün sortlarının əkilməsi ilə bağlı müqavilələr bağlanılıb. Artıq tütün şitillərinin sahələrə köçürülməsinə başlanılıb. Bundan əlavə, “Azəri” korporasiyası tərəfindən də rayonda 35 hektar sahədə tütün əkilməsi üçün hazırlıq işləri aparılıb.

Eyni zamanda, Prezident İlham Əliyevin ixracyönümlü məhsulların istehsalının artırılması ilə bağlı verdiyi tapşırıqlara uyğun olaraq, Zaqatala rayonunda mövcud fındıq bağlarının sahəsinin iki dəfə artırılması ilə əlaqədar zəruri tədbirlər həyata keçirilir. Bu məqsədlə ötən ilin payızında rayonda 2560 hektar sahədə yeni fındıq bağları salınaraq, bağların ümumi sahəsi 16 min 420 hektara çatdırılıb. Cari ilin yaz mövsümündə isə daha 598 hektar sahədə yeni fındıq bağları salınıb. Bundan əlavə, 5 hektar sahədə fındıq tingliyi təsərrüfatı yaradılıb və hazırda burada 300 min ədəd ting yetişdirilir. Bu tinglərin 600 hektar sahəyə köçürülməsi planlaşdırılır.

Həmçinin ənənəvi sahələrdən olan baramaçılığın inkişaf etdirilməsi istiqamətində tədbirlər cari ildə də davam etdiriləcək. Bu il rayonda 16 ton yaş barama istehsalı proqnozlaşdırılır. Bu məqsədlə iki yüzədək kümçü ailəsi ilə razılıq əldə olunub. Ötən il isə rayonda 6 ton yaş barama istehsal edilib. Baramaçılığın yem bazasının möhkəmləndirilməsi məqsədi ilə 2016-cı ilin payız mövsümündə rayon ərazisində 147 minə yaxın tut tingi əkilib. Hazırda bağlara qulluq işləri davam etdirilir.

Məlumat üçün bildirək ki, Zaqatala rayonunda ənənəvi və ixrac potensialı yüksək olan sahələrdən biri də gülçülükdür. Və bu sahənin inkişaf etdirilməsi, yeni gül plantasiyasının salınması məqsədi ilə ötən il rayonun Aşağı Tala kəndinin ərazisində 100 hektar torpaq sahəsi ayrılıb. Payızda ayrılmış sahənin 64 hektarında Bolqarıstandan gətirilmiş 250 min ədəd qızılgül tingi əkilib. Bu ilin yazında isə 25 hektar sahədə 500 min ədəd “lavanda” gülünün əkilməsi təmin olunub. Tezliklə bu ərazidə yeni gül emalı zavodunun tikintisinə başlanılacaq.

Şəki-Zaqatala iqtisadi rayonuna daxil olan Qax da birinci rübü nailiyyətlərlə başa vurub. Bu barədə birinci rübün yekunlarına dair rayon İcra Hakimiyyətində keçirilən iclasda məlumat verilib. Qeyd olunub ki, 2017-ci ilin birinci rübündə Qax rayonunda iqtisadiyyatın əsas sahələri üzrə məhsul buraxılışının ümumi həcmi 17 milyon 849 min manat təşkil edib. Hesabat dövründə rayonda 289 yeni iş yeri açılıb, həmçinin əhalinin elektrik enerjisi, təbii qaz, içməli su və digər xidmətlərlə təminatının yaxşılaşdırılması sahəsində davamlı işlər görülüb. Məsələn, hesabat dövründə rayon elektrik şəbəkəsi tərəfindən 11 transformator yarımstansiyası əsaslı təmir olunub, 5 ədəd yeni ayırıcı quraşdırılıb. Hazırda 110 kilovoltluq “Qax” və 35 kilovoltluq “İlisu” yarımstansiyalarının, həmçinin rayon elektrik şəbəkəsi üçün yeni inzibati binanın tikintisi davam etdirilir.

Bu müddət ərzində rayonda 3 milyon 968 min manatlıq kənd təsərrüfatı məhsulları istehsal olunub. Aqrar sahədə məhsul istehsalı ötən ilin eyni dövrü ilə müqayisədə 12 faiz artıb. Bildirilib ki, cari ilin birinci rübü ərzində rayonda 408 hektar yonca, 143 hektar tərəvəz, 152 hektar vələmir, 270 hektar kartof əkini aparılıb, 513 hektar yeni fındıq bağları salınıb. Baramaçılığın yem bazasının möhkəmləndirilməsi məqsədi ilə kənd yerlərində 60 min ədəd tut tingi əkilib.

O da qeyd olunub ki, hesabat dövründə rayonun Sarıca-Daşüz ərazisində dənli və paxlalı bitkilərin əkini üzrə ixtisaslaşmış aqroparkın yaradılmasına başlanılıb. Bu məqsədlə dövlət fonduna aid torpaqlardan 2044 hektar ərazi seçilib. Aqroparkın ərazisində pivot suvarma sisteminin quraşdırılmasına başlanılıb və hazırda 4 kilometr uzunluğunda əsas su xəttinin çəkilişi davam etdirilir.

Yeri gəlmişkən, cari ildə Qax rayonunda ənənəvi istehsal sahələrindən olan tütünçülük, baramaçılıq və fındıqçılığın inkişafı istiqamətində tədbirlər davam etdiriləcək. Belə ki, cari ildə rayonda tütün əkini sahələrinin ötən illə müqayisədə 169 hektar artırılaraq 500 hektara çatdırılması nəzərdə tutulur. Bu məqsədlə “İnter Tobacco” MMC tərəfindən birinci rübdə cəmiyyətə məxsus istixanalarda 2400 kvadratmetr, ayrı-ayrı fermerlər tərəfindən isə sadə istixanalarda 6560 kvadratmetr sahədə tütün şitili yetişdirilib. Artıq tütün şitillərinin sahələrə köçürülməsinə başlanılıb. Eyni zamanda, 2017-ci ildə rayonda yaş barama istehsalının əvvəlki illə müqayisədə 8,7 ton artırılaraq 12,5 tona çatdırılması nəzərdə tutulur.

2017-ci il üçün Azərbaycanın “Gənclər Paytaxtı” adına layiq görülən Balakən rayonunda da ilin birinci rübündə əhalinin elektrik enerjisi, təbii qaz, suvarma və içməli su ilə təminatının yaxşılaşdırılması, tikinti-quruculuq işləri istiqamətində müsbət nəticələr əldə edilib. Belə ki, Balakən şəhərində 29 çoxmənzilli yaşayış binasında və binaların həyətlərində təmir işlərinin aparılması nəzərdə tutulub və artıq 15 binada təmir işlərinə başlanılıb. Şərif kəndində 360 şagird yerlik məktəbin tikintisi davam etdirilib, Sarıbulaq və Mahamalar kəndlərində müvafiq olaraq 20 və 10 yerlik modul tipli məktəblərin, şəhərin Səttar Gözəlov küçəsində “Bayraq muzeyi”nin, Heydər Əliyev prospektində “ABAD-park” kompleksinin ikimərtəbəli binasının tikintisinə başlanılıb.

Kənd təsərrüfatı sahəsində görülən işlərə gəlincə, məlumat üçün bildirək ki, birinci rübdə rayonun təsərrüfatlarında 3200 hektardan çox sahədə yazlıq bitkilər əkilib, eyni zamanda, cari ilin məhsulu üçün payızlıq taxıl əkilmiş 1579 hektar sahəyə aqrotexniki qulluq göstərilib. Rayonda meyvəçiliyin inkişaf etdirilməsi də diqqət mərkəzində saxlanılıb, meyvə bağlarına aqrotexniki qulluq göstərilib. Meyvəçilik məhsullarının, əsasən də xurmanın qurudulması üçün Katex kəndində “Balxurma” MMC-nin fəaliyyətə başlaması xurma məhsullarının satışında uzun illər mövcud olan problemlərin həllinə müsbət təsir göstərəcək.

Rayonda gəlirli və ixrac potensialı yüksək sahələrdən olan fındıqçılığın inkişaf etdirilməsi istiqamətində də zəruri tədbirlər həyata keçirilir. Son bir ildə rayon ərazisində 2264 hektar, o cümlədən cari ilin birinci rübündə 662 hektar sahədə yeni fındıq bağları salınıb.

Cari ildə Balakən rayonunda barama istehsalının ötən illə müqayisədə 8,8 ton və ya 3,7 dəfə artırılaraq 12 tona çatdırılması nəzərdə tutulur. Qarşıya qoyulmuş hədəflərə çatmaq üçün ötən il rayonun 18 kəndində bələdiyyə və xüsusi mülkiyyətdə olan torpaq sahələrində 100 min ədəd tut tingi əkilib. Eyni zamanda, mövcud tut ağaclarının inventarizasiyası aparılıb və çəkil bağlarına aqrotexniki qulluq olunub.

Bununla yanaşı, 2017-ci ildə rayonun təsərrüfatlarında 520 hektar sahədə tütün əkilməsi nəzərdə tutulur. İndiyədək 71 hektar sahəyə tütün şitili köçürülüb və bu iş sürətlə davam etdirilir. Ötən il rayonda 501 hektar sahədə tütün əkilib və fermerlər 1150 ton yaşıl tütün kütləsi, 96,3 ton quru tütün istehsal ediblər.

Cari ilin birinci rübü Qəbələ rayonu üçün də uğurlu olub. Belə ki, hesabat dövründə iqtisadiyyatın ayrı-ayrı sahələri üzrə 33 milyon 152 min manatlıq məhsul istehsal edilib, ötən ilin müvafiq dövrünə nisbətən ümumi məhsul buraxılışı rayon üzrə 3 milyon 684 min manat, yaxud 12,5 faiz artıb. Əsas kapitala yönələn investisiyanın həcmi 5 milyon 219 min manat, tikinti-quraşdırma işlərinin həcmi isə 4 milyon 912 min manat təşkil edib.

2017-ci ilin birinci rübündə Qəbələ şəhərinin Muxtar Abduyev küçəsindəki 5 ədəd beşmərtəbəli yaşayış binasının dam örtüyünün dəyişdirilməsinə, xalça toxuculuğu müəssisəsinin tikintisinə və Heydər Əliyev prospektində əsaslı təmir işlərinə başlanılıb. Eyni zamanda, Qəbələ Rayon Məhkəməsi, Qəbələ Rayon Kənd Təsərrüfatı İdarəsi, Qəbələ Peşə Liseyi, Səfərbərlik və Hərbi Xidmətə Cağırış üzrə Dövlət Xidmətinin rayon şöbəsi, Qəbələ Rayon Prokurorluğu, Gömrük Akademiyası üçün inzibati binaların inşası, atçılıq mərkəzi, “Qafqaz Aqua Land Hotel” və “Qafqaz Diamond Akvapark” istirahət mərkəzinin tikintisi, şəhərin içməli su və kanalizasiya sisteminin yenidənqurulması işləri davam etdirilib.

2003-cü ilin oktyabr ayından bəri 14 min 132-si daimi olmaqla, 15 min 931 yeni iş yeri açılıb. Bu ilin birinci rübündə isə 866 daimi iş yeri yaradılıb. Ümumiyyətlə, ilin birinci rübündə Qəbələ rayon Məşğulluq Mərkəzinə 675 nəfər işaxtaran vətəndaş müraciət edib. Müraciət edənlərin 291 nəfəri peşəsinə uyğun işlə təmin olunub. Vətəndaşlar əsasən tikinti, təbii qaz və içməli su təchizatı, səhiyyə, turizm, sosial və kommunal xidmət sahələrində, hotel, mağaza və restoranlarda işə götürülüblər. Bundan əlavə, məşğulluq mərkəzi 19 nəfəri “Sahibkarlığın əsasları” adlı peşə hazırlığı kurslarına cəlb edib, 12 nəfərə işsizlik statusu verib, müavinət ödənilib.

Bundan başqa, rayonda turizmin inkişafı üçün görülən işlər müsbət nəticə verməkdədir. Hazırda Qəbələdə 20 müasir turizm-istirahət obyekti fəaliyyət göstərir. Bu hotellərdən 6-sı beşulduzludur. Qəbələdə yerləşən mehmanxana tipli obyektlər bir gündə 2700-dən çox turisti qəbul etmək imkanına malikdir. Son 3 ayda Qəbələyə 12 mindən çox turist gəlib.

Kənd təsərrüfatına gəlincə, rayonda 2017-ci ilin məhsulu üçün ötən ilin payızında 21 min 47 hektar sahədə payızlıq dənli bitkilər əkilib. Onun da 16 min 262 hektarını buğda, 4785 hektarını arpa sahələri təşkil edir. Hazırda Qəbələdə 6854 hektar meyvə bağı, 509 hektar üzüm plantasiyası mövcuddur. Bildirilib ki, rayonda ixracyönümlü kənd təsərrüfatı məhsulları istehsalının artırılması diqqət mərkəzində saxlanılmalıdır. Bu istiqamətdə fındıqçılığın inkişafı xüsusi əhəmiyyət kəsb edir. Rayonda 2000 hektar yeni fındıq bağının salınması nəzərdə tutulub. Keçən ilin payızından bu işlərə başlanılıb və ötən üç ayda da davam etdirilib. Ayrı-ayrı kənd ərazilərində indiyədək 900 hektar sahədə yeni fındıq bağları salınıb.

Nadir AZƏRİ

Yeni Azərbaycan.- 2017.- 27 aprel.- S.7