Azərbaycanın regionlarının turist cəlbediciliyi artır

Müəyyənləşdirilən hədəfə əsasən, 2020-ci ildə ölkəyə gələn turistlərin sayının 4,5 milyon nəfər olacağı proqnozlaşdırılır

Hazırda dünyada müşahidə edilən cəlbedici trendlərdən biri turizm sənayesinin sürətli inkişafı ilə bağlıdır. Ayrı-ayrı ölkələrin iqtisadiyyatında turizm sektorunun rolu getdikcə artmaqdadır. Beynəlxalq Turizm Təşkilatının proqnozlarına əsasən, 2020-ci ildə dünyada turistlərin sayı 1,6 milyard nəfərə, turizmdən əldə olunan gəlirlərin miqdarı isə 2000-ci illə müqayisədə 481 milyard ABŞ dollarından 2 trilyon dollara qədər artacaq.

Turizm sektorunun inkişafı başqa bir nöqteyi-nəzərdən də kifayət qədər önəmlidir. Bu da turizmin ölkələrin, milli mədəniyyətlərin, xalqların özünəməxsusluğunun qlobal miqyasda tanıdılmasında və təbliğində oynadığı mühüm rolla bağlıdır.

Azərbaycan böyük turizm potensialına malik olan ölkədir

Əlbəttə, turizmin inkişafını şərtləndirən amillər yalnız dövlətlərin siyasi iradəsi ilə bağlı deyildir. Burada ölkələrin coğrafi mövqeyi, təbiəti, nəqliyyat qovşaqlarına yaxınlığı və digər amillər də mühüm əhəmiyyət daşıyır. Deyilənlər baxımından Azərbaycan turizmin inkişafı üçün bir sıra üstünlüklərə malikdir. Respublikamızda dövlətin qeyri-neft sektorunun gəlirli istiqamətlərindən biri kimi turizmin inkişafına göstərdiyi siyasi iradə ölkənin quru və su sərhədlərinə malik olması, istər Şərq-Qərb, istərsə də Şimal-Cənub nəqliyyat dəhlizlərinin burada kəsişməsi, möhkəm daxili sabitlik, müasir infrastruktur, dinamik sosial-iqtisadi inkişaf, müxtəlif mədəniyyət növlərinin yüksək səviyyədə inkişaf tapması, flora və fauna müxtəlifliyi, cəmiyyətin tolerantlığı, milli mətbəxin zənginliyi, həmçinin digər müsbət amillərlə tamamlanır. Azərbaycan yeni iqtisadi şəraitdə özünün malik olduğu bu kimi üstünlüklərindən bəhrələnərək turizmin inkişafına daha münbit və daha cəlbedici şərait yaratmağa çalışır. Respublikamızda “Turizm haqqında” ayrıca qanun qəbul edilib. İndiyədək ölkəmizdə turizm sektorunun inkişafı ilə bağlı bir neçə Dövlət Proqramı uğurla yerinə yetirilib. Dövlət başçısının imzaladığı müvafiq sənədlərə əsasən, respublikamızda elektron viza sisteminin tətbiqinə başlanılıb. Eyni zamanda, Prezident İlham Əliyevin 2016-cı il 6 dekabr tarixli Fərmanına əsasən ölkəmizdə turizm sektorunun inkişaf ilə bağlı yaxın, orta və uzunmüddətli dövrü əhatə edən Strateji Yol Xəritəsi təsdiqlənib. Sənəddə milli iqtisadiyyatın və ölkənin tanıdılması baxımından böyük əhəmiyyət daşıyan turizm sektorunun imkanlarının genişləndirilməsi üçün konkret prioritetlər müəyyənləşdirilib.

Təbii ki, zəruri infrastruktur yaradılmadan turizmin inkişafından da söhbərt açmaq mümkün deyil. Respublikamızda müxtəlif turist marşrutları üzrə geniş infrastruktur qurulmasından söhbət açarkən dünya miqyasında məşhur brend otellərin tikintisini ayrıca vurğulamaq gərəkdir. Ölkəmizdə mehmanxana və mehmanxana tipli obyektlərin sayı 2003-cü illə müqayisədə 5,4 dəfə artıb. Dünyanın “Four Seasons”, “Fairmont”, “Marriott”, “Hilton”, “Kempinski” “Jumeirah”, “Sheraton”, “Hyatt” kimi aparıcı otel brendlərinin respublikamızda cəmləşməsi qürurverici haldır.

Bütün bu və digər amillər respublikamızda turizmin inkişafında yeni mərhələ açıb. Təsadüfi deyil ki, Prezident İlham Əliyev Nazirlər Kabinetinin 2017-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunan iclasındakı nitqində ölkəmizdə turizm sektorunda yaranan müsbət reallıqlara xüsusi diqqət çəkib. Bu sahədə əldə olunan uğurlardan məmnunluq ifadə edən dövlət başçısı deyib: “Turizmin inkişafı növbəti reallıqdır. Son bir-iki il ərzində bu sahədə sürətli inkişafı görürük”.

Turistlər üçün viza prosedurları sadələşdirilir

Ölkənin turist cəlbediciliyinin artırılması baxımından turistlər üçün sərhədkeçmə və viza prosedurlarının sadələşdirilməsi böyük aktuallıq daşıyır. Qəbul edilən qərarlar sayəsində son illərdə respublikamıza gəlib-getmə qaydaları əhəmiyyətli dərəcədə asanlaşdırılıb. Hazırda bu istiqamətdə işlər dünya praktikası nəzərə alınmaqla davam etdirilir. Sərhədkeçmə prosedurlarının sadələşdirilməsi və turistlər üçün viza verilməsi prosedurlarının asanlaşdırılması üzrə işçi qrupunun növbəti iclasında ölkəyə gəlib-getmə qaydalarının daha da asanlaşdırılması ilə bağlı bir sıra məsələlər müzakirə edilib. İşçi qrupunun iclasında Mədəniyyət və Turizm Nazirliyinin əməkdaşları ilə yanaşı, Azərbaycan Respublikasının Nəqliyyat, Rabitə və Yüksək Texnologiyalar, Xarici İşlər nazirliklərinin, Dövlət Sərhəd Xidmətinin, Dövlət Gömrük Komitəsinin, Dövlət Dəniz Administrasiyasının, “Azəravtoyol” Açıq Səhmdar Cəmiyyətinin və digər qurumların nümayəndələri iştirak ediblər. İclasda “Azərbaycan Respublikasına turist axınının sürətləndirilməsi ilə bağlı əlavə tədbirlər haqqında” Azərbaycan Respublikası Prezidentinin 20 fevral 2017-ci il tarixli Sərəncamından irəli gələn məsələlərin icra vəziyyəti araşdırılıb. Belə ki, viza rejimi tətbiq olunmayan, respublikanın giriş məntəqələrində viza rəsmiləşdirilməsi mümkün olan və ASAN viza sistemi vasitəsi ilə rəsmiləşən ölkələrin siyahısının genişləndirilməsi və viza prosedurlarının asanlaşdırılması siyasətinin davam etdirilməsi ilə bağlı təkliflər, Mədəniyyət və Turizm Nazirliyinin əməkdaşları tərəfindən sərhəd buraxılış məntəqələrində aparılan müşahidələrə dair hazırlanan hesabatda əks edilmiş rəylər və bir sıra mühüm məsələlər işçi qrupun müzakirəsinə təqdim edilib. İclasda dövlət qurumlarının nümayəndələri tərəfindən müvafiq fikirlər səsləndirilib. İclasın yekunu olaraq bu istiqamətdə işlərin davam etdirilməsi üçün işçi qrupun üzvləri arasında mütəmadi olaraq məlumat mübadiləsinin aparılması, Asan viza sistemi vasitəsi ilə viza verilən ölkələrin siyahısının genişləndirilməsi, həmçinin viza prosedurlarının asanlaşdırılması siyasətinin davam etdirilməsi istiqamətində təkliflərin hazırlanması və digər məsələlərə dair qərarlar qəbul edilib.

Regionların turizm potensialından səmərəli istifadə olunur

Azərbaycanın iqtisadi potensialının böyük bir hissəsi regionlarda cəmləşib. Buna görə də ölkənin inkişaf strategiyasında bölgələrin potensialından daha səmərəli istifadə edilməsi qarşıya prioritet vəzifələrdən biri kimi qoyulub. Ölkənin aktiv əhalisinin 40 faizdən çoxunun bölgələrdə yaşadığını nəzərə alsaq, deyə bilərik ki, regionların tarazlı şəkildə inkişaf etdirilməsi iqtisadi əhəmiyyəti ilə yanaşı, həm də böyük sosial mahiyyət daşıyır.

Son 14 ildə respublikanın bölgələrinin sosial-iqtisadi inkişafı dərin konseptual yanaşmalarla hazırlanan və Prezident İlham Əliyevin fərmanları ilə təsdiqlənən müvafiq Dövlət proqramları əsasında reallaşdırılıb. İndiyədək iki Dövlət Proqramının icrası uğurla təmin edilib və hazırda 2014-2018-ci illəri əhatə edən sayca üçüncü Dövlət Proqramı da müvəffəqiyyətlə həyata keçirilir. Regionların sosial-iqtisadi inkişafına dair bəhs olunan Dövlət proqramlarında bir sıra digər sahələr kimi, bölgələrdə turizm sektorunun da potensialının artırılması üçün konkret tədbirlər reallaşdırılıb. Məlumdur ki, Azərbaycanın zəngin turizm potensialı paytaxt Bakı ilə yanaşı, ölkənin müxtəlif bölgələrində cəmləşib. Elə turizm sahəsində dövlət siyasətində də hər bölgənin turizm sahəsində potensialı və ənənələri əsas götürülməklə müvafiq infrastruktur qurulmasına diqqət yetirilir. “Biz Azərbaycanın ən gözəl regionlarında turistləri maraqlandıran və cəlb edən bir çox layihələr həyata keçiririk”. Bu sözləri jurnalistlərə açıqlamasında Milli Turizm Təbliğat Bürosunun mətbuat katibi Kənan Quluzadə deyib.

Əlamətdar haldır ki, son illərdə ölkəmizdə bir sıra iri və yüksək səviyyəli turizm obyektləri məhz bölgələrdə yaradılıb. Bu sırada “Şahdağ” qış-yay turizm kompleksini misal göstərə bilərik. Dəniz səviyyəsindən 1300-2300 metr yüksəklikdə yerləşən turizm kompleksinin ərazisi 2058 hektardır. Azərbaycanda və ümumiyyətlə, dünyada ən mükəmməl layihələrdən olan “Şahdağ” qış-yay turizm kompleksi oxşar istirahət mərkəzlərindən bənzərsizliyi ilə fərqlənir və bütün ilboyu fəaliyyət göstərir.

Başqa bir beynəlxalq səviyyəli turizm mərkəzi - “Tufan” Dağ-Xizək Yay-Qış İstirahət Kompleksi Azərbaycanın dilbər guşələrindən olan Qəbələ rayonunda yaradılır. Kompleksin birinci mərhələsinin açılışı 2014-cü ilin yanvarında dövlət başçısının iştirakı ilə reallaşdırılıb. Bu nəhəng istirahət məkanı ilin bütün fəsillərində turistlərə kanat gəzintisinə, qış mövsümündə xizəklə sürüşməyə, xizəkçilik məktəbindən, hotel və digər xidmətlərdən istifadə etməyə imkanlar verir.

Deyilənlərdən başqa, son 14 ildə Azərbaycanın regionlarında yerləşən bütün müalicə-kurort müəssisələri əsaslı şəkildə yenidən qurulub ki, bunun da sayəsində ölkədə müalicə turizmi durmadan inkişaf edir. Regionlarda yerləşən məşhur müalicəvi kurortlarından biri Naftalandır. Naftalanda “Chinar Hotel & SPA Naftalan” kompleksinin istifadəyə verilməsi son illərdə Azərbaycanda yeni səhiyyə ocaqlarının, sanatoriyaların, mehmanxanaların inşasının, kurort zonalarının inkişaf etdirilməsinin dövlət siyasətinin prioritet istiqamətlərindən biri olduğunun göstəricisidir. 312 yerlik “Chinar Hotel & SPA Naftalan” kompleksi 18,8 hektar ərazidə yerləşir. Burada əsas müalicə vasitəsi Naftalan neftidir. Təkcə Azərbaycanda mövcud olan Naftalan nefti bir çox xəstəliklərin dərmanıdır.

Şabran rayonunda “Qalaaltı Hotel & SPA” müasir müalicə-istirahət kompleksinin yaradılması da ölkəmizin turizm imkanlarının artırılması baxımından mühüm əhəmiyyət daşıyır. Dəniz səviyyəsindən 700 metr yüksəklikdə yerləşən yeni kompleks məşhur “Qalaaltı” kurortunun bazasında inşa edilib. Təxminən 7,1 hektar sahəsi olan kompleksdə 354 nəfəri qəbul edə biləcək otel, villa və kotteclər var.

Müasir səviyyəli turistyerləşdirmə obyektlərinin yaradılması, həmçinin bölgələrdə kommunal xidmətlərlə təchizatın əhəmiyyətli dərəcədə yaxşılaşması öz növbəsində regionlara turist axınının artması ilə nəticələnib. Bunu statistik rəqəmlərdən də görmək mümkündür. 2017-ci ilin yay mövsümündə regionlardakı hotellərdə və mehmanxana tipli obyektlərdə 860 mindən çox yerləşdirmə qeydə alınıb. Cari ilin 8 ayında isə bu göstərici 1 milyon 294 min nəfərdən artıq olub. Ayrı-ayrı regionlara gələn turistlərin də sayında artım müşahidə edilməkdədir. Məsələn, son 5 ildə Şəkiyə gələn turistlərin sayı yeddi dəfədən çox artaraq 150 min nəfərə çatıb. Cari il oktyabrın əvvəlinədək Qəbələ 218 min 118 turist qəbul edib. Bunun 89 min 217 nəfəri yerli, 128 min 901 nəfəri əcnəbi turistlərdir. Havaların soyumasına baxmayaraq, rayona gələn turistlərin sayında azalma müşahidə edilmir. Ümumilikdə, ilin sonunadək Qəbələyə 260 mindən çox turistin gələcəyi gözlənilir.

Hədəflərdən biri də çinli turistləri Azərbaycana cəlb etməkdir

Ötən illə müqayisədə 2017-ci ildə Azərbaycana gələn turistlərin sayında 20 faizdən çox artım müşahidə edilib. Cari ilin 9 ayında Azərbaycana səfər edən xarici turistlərin sayı 2 milyon 71 min 918 nəfər təşkil edib. Bu ilin ilk yeddi ayında xarici turistlərin ölkəmizdə bank əməliyyatları ötən illə müqayisədə 97 faiz artaraq 703 milyon manatdan çox olub. Ümumilikdə isə cari ilin 8 ayında xarici turistlər ölkəmizdə elektron kart vasitəsilə 1 milyard 300 milyon manat vəsait xərcləyiblər.

Milli Turizm Təbliğat Bürosunun mətbuat katibi K.Quluzadə qeyd edib ki, müəyyənləşdirilən hədəfə əsasən, 2020-ci ildə Azərbaycana gələn turistlərin sayının 4.5 milyon nəfər olacağı proqnozlaşdırılır. Lakin ölkəyə gələn turistlərin sayında müşahidə edilən artım dinamikasına əsasən deyə bilərik ki, bu hədəfə daha tez çatılacağı gözlənilir.

K.Quluzadə bildirib ki, Azərbaycana gələn turistlərin coğrafiyasında da genişlənmə var və bütün istiqamətlərdən ölkəyə gələn turistlərin sayında artım müşahidə edilir. “Ərəb turistləri ölkəmizə cəlb edə bildik, bu dəfə çinli turistləri cəlb etməyi qarşımıza məqsəd qoymuşuq. Bu istiqamətdə işlər gedir. Tezliklə Bakı şəhərində turistlər üçün bələdçilər quraşdırılacaq. Bələdçilər 2 dildə - rus və ingilis dillərində olacaq”, - deyə K.Quluzadə söyləyib.

“Majestic Palace” Gəncənin turist cəlbediciliyini daha da artıracaq

Regionlara turist axınının artması ilə paralel surətdə, bölgələrdə yeni turistyerləşdirmə obyektlərinin yaradılması istiqamətdə işlər intensiv şəkildə davam etdirilir. Cari ilin 9 ayı ərzində Gəncə şəhərinə respublikanın ayrı-ayrı şəhər və rayonlarından 22 min 927 turist gəlib. Xarici ölkələrdən gələn qonaq və turistlərin sayı isə 7 min 800 nəfər olub. Nizami yurdunu ziyarət edən yerli turist və qonaqların sayı ötən ilin müvafiq dövrü ilə müqayisədə 3 min 120 nəfər, xaricilərin sayı isə 1050 nəfər artıb.

Mütəxəssislərin qənaətlərinə görə, Gəncədə inşa edilən “Majestic Palace” şəhərin turist cəlbediciliyini daha da artıracaq. Azərbaycan Respublikasının Prezidenti İlham Əliyev noyabrın 10-da Gəncəyə səfəri çərçivəsində bu otelin tikintisi ilə tanış olub. Dövlət başçısına məlumat verilib ki, 104 yerlik otelin inşasına 2015-ci ilin aprelində başlanılıb. Hazırda inşaat işlərinin son mərhələsi həyata keçirilir. Otelin binası 7 mərtəbəlidir. Burada biri kral, 8-i suite, 10-u delüks və 33-ü standart olmaqla, ümumilikdə 52 otaq yaradılacaq. Oteldə 120 nəfərlik restoran, 20 yerlik iclas zalı da olacaq. Tikinti işləri zamanı 50 avtomobil yerlik yeraltı dayanacaq inşa edilib. Otelin dayanıqlı elektrik enerjisi ilə təminatı üçün ərazidə 1000 kV-luq transformatorun və 1500 kV-luq generatorun quraşdırılması nəzərdə tutulub.

“Sən də Azərbaycanı gör” fotosərgisi böyük maraqla izlənilir

Son illərdə Mədəniyyət və Turizm Nazirliyi tərəfindən Azərbaycanın turizm potensialının xarici ölkələrdə təbliği istiqamətində həyata keçirilən davamlı tədbirlər təqdirəlayiqdir. Bu qəbildən olan tədbirlər respublikamıza maraq göstərən potensial turistlərdə Azərbaycan barədə dolğun təsəvvürlər formalaşdırmağa xidmət edir.

Ötən ilin fevral ayından Azərbaycan Mədəniyyət və Turizm Nazirliyinin dəstəyi ilə Türkiyədə fəaliyyətə başlayan ölkəmizin turizm təmsilçiliyi - “Gateway” şirkəti tərəfindən respublikamızın turizm imkanlarının tanıdılması istiqamətində məqsədyönlü addımlar atılır. Mütəmadi olaraq qardaş ölkənin mətbuat səhifələrində Azərbaycanla bağlı yazılar dərc olunur, tanıtım layihələri icra edilir.

Belə tədbirlərdən biri də “Sən də Azərbaycanı gör” devizi altında həyata keçirilən beynəlxalq fotosərgi layihəsidir. Sərginin keçirildiyi növbəti məkan İstanbuldakı “Cəvahir” AVM olub. Burada Azərbaycanın qədim tarixini, zəngin mədəniyyətini, əsrarəngiz təbiətini, görməli yerlərini, ölkəmizdə həyata keçirilən sosial-iqtisadi inkişafın göstəricilərini əks etdirən fotolar nümayiş olunur.

Mədəniyyət və Turizm Nazirliyinin qardaş ölkədəki turizm təmsilçiliyinin rəhbəri Nurlana Çakmak sərgi haqqında geniş məlumat verib. Bildirib ki, sərgidə böyük turizm potensialına malik Azərbaycana həsr olunmuş 30-dək foto nümayiş olunur. “Biz dost və qardaş ölkələrik. Sərgi ilə “sən də Azərbaycanı gör” deyirik və hər kəsi gözəl ölkəmizə dəvət edirik. Bu fotosərgi ilə Azərbaycanın fərqli yönlərini göstərmək istəyirik”, - deyə Nurlana Çakmak vurğulayıb.

Sərgidə nümayiş olunan fotoşəkillər Azərbaycanın hotelçilik xidməti, mədəniyyəti, kurort bölgələri, sağlamlıq turizmi imkanları barədə ziyarətçilərdə aydın təsəvvür yaradır. Təqdim edilən Qız qalası, Şirvanşahlar sarayı, Heydər Əliyev Mərkəzi, İçərişəhər, eləcə də paytaxtımızın qədim və müasir arxitekturalı digər tikililəri, bölgələrin təbiət gözəllikləri və s. ziyarətçilər tərəfindən maraqla qarşılanıb. Sərgilər Türkiyə mətbuatında geniş işıqlandırılıb.

Qeyd edək ki, “Gateway” şirkəti bundan əvvəl İstanbulun Yenikapı metro stansiyası, Topkapı Türk Dünyası Şəhərciyi, Türkiyənin Bilgi Universitetinin Santral İstanbul Kampusu və s. məşhur məkanlarda da eyniadlı sərgilər təşkil edib.

Azərbaycanın turizm imkanları ayrı-ayrı ölkələrin mətbuatının diqqət mərkəzindədir

Azərbaycanın turist cəlbediciliyinin artmasında ölkəmizin beynəlxalq miqyasda turizm reytinqinin yüksəlməsi də mühüm rol oynayır. Son illərdə Azərbaycan turizm sahəsində beynəlxalq təşkilatların tədbirlərində fəal şəkildə iştirak edir. Cari il sentyabrın 11-dən 16-dək Çin Xalq Respublikasının Çenqdu şəhərində keçirilən BMT-nin Dünya Turizm Təşkilatı (DTT) Baş Assambleyasının 22-ci sessiyası çərçivəsində qurumun Avropa Regional Komissiyasının iclasında Avropa regionundan Rumıniya, Rusiya, Yunanıstan və Litva ilə yanaşı, Azərbaycan da 2018-2021-ci illər üçün DTT-nin İcraiyyə Şurasına üzv seçilib. Azərbaycanın növbəti dörd il müddətinə qurumun İcraiyyə Şurasına üzv seçilməsi son illərdə ölkəmizin turizm sahəsində qazandığı uğurların və Şurada səmərəli fəaliyyətinin növbəti təsdiqidir.

Eyni zamanda, ölkəmizin yüksək səviyyəli turizm imkanları ayrı-ayrı ölkələrin mətbuatında da geniş şəkildə işıqlandırılmaqdadır. Məsələn, bu yaxınlarda Fransanın www.madame-oreille.com portalında “Azərbaycan gündəliyi, kontrastlar ölkəsinə səyahət” adlı məqalə dərc olunub. Məqalədə “Nomade aventure” qrupu ilə ölkəmizdə səfərdə olmuş fransalı jurnalist Azərbaycanın görməli yerlərindən, təbiətindən söz açır.

Jurnalist ölkəmizdəki səyahətçilər üçün vacib olan stabilliyi və təhlükəsizliyi xüsusi qeyd edir. Azərbaycanın əyalətlərinə, dağlarına səyahətindən danışır. Dağlıq məkanlarda insanların gündəlik həyat ritmindən yazır.

Məqalədə Bakının simvolu Qız qalası, “Alov qüllələri” kompleksi, Qobustan Milli Tarixi-Bədii Qoruğu haqqında məlumatlar da yer alıb.

Rusiya saytlarının məlumatına əsasən, “TurStat” analitik agentliyi qış səfərləri üzrə ən yaxşı MDB şəhərlərinin reytinqini hazırlayıb. “TOP-10”luqda Bakı, Minsk, Almatı, Yerevan, Daşkənd, Astana, Brest, Bişkek, Kişineu və Gəncə şəhəri yer alıb.

İtaliyanın populyar “Lagenziaviaggi.it” turizm portalında jurnalist-səyahətçi Massimo Tallarigonun müəllifi olduğu “Azərbaycan - Odlar diyarı. Burada hər şey inkişaf edir” adlı məqalə dərc olunub.

AZƏRTAC xəbər verir ki, məqalədə Bakı şəhərinin görməli yerləri, zəngin tarixi abidələri, həmçinin müasir memarlıq nümunələrindən bəhs edilir.

Yazıda dünyada “Odlar diyarı” kimi tanınan Azərbaycanda sürətli inkişafın baş verdiyi bildirilir, bu inkişafın xüsusilə paytaxt Bakı şəhərində daha aydın nəzərə çarpdığı qeyd olunur.

Qobustan Dövlət Tarixi-Bədii Qoruğundan da bəhs edilən məqalədə qoruğun UNESCO-nun Dünya İrs Siyahısına daxil edildiyi bildirilir. Qobustan təsvirlərinin çox qədim tarixi dövrə gedib çıxdığını vurğulayan müəllif burada 40 min il yaşı olan altı mindən çox qaya daşlarına rast gəlindiyini diqqətə çatdırır.

Daşkənddəki review.uz portalı isə Azərbaycanın turizm sənayesi haqqında rus dilində geniş material verib. Məqalədə Azərbaycanda turizmin inkişafına böyük diqqət yetirildiyi vurğulanır.

Materialda Azərbaycanda qış turizminin inkişaf etdirilməsi perspektivləri, dağ, kənd və səhiyyə turizminin daha da cəlbedici olması üçün görülən işlər haqqında da məlumat verilir.

Mübariz ABDULLAYEV

Yeni Azərbaycan.- 2017.- 2 dekabr.- S.7.