Bölgələrdə yol-nəqliyyat infrastrukturunun yenilənməsi istiqamətində davamlı tədbirlər həyata keçirilir.

Regionların sosial-iqtisadi inkişafına dair müvafiq Dövlət proqramları çərçivəsində bölgələrdə yeni yollar çəkilib, çoxlu sayda körpülər, yol qovşaqları tikilib, infrastruktur daha da yaxşılaşdırılıb

Azərbaycanda həyata keçirilən səmərəli iqtisadi siyasət və çoxşaxəli islahatlar dayanıqlı inkişafı təmin etməklə yanaşı, bütün sahələrin davamlı tərəqqisi üçün etibarlı zəmin formalaşdırıb. Ölkəmizdə reallaşdırılan çoxşaxəli islahatlar və bütövlükdə uğurlu milli inkişaf siyasəti regionların sosial-iqtisadi inkişafını da təmin edib.

Ölkəmizdə bölgələrin sosial-iqtisadi inkişafı başlıca prioritetlərdən biri kimi müəyyənləşdirilib və bu istiqamətdə ardıcıl, məqsədyönlü və səmərəli tədbirlər həyata keçirilir. Regionların sosial-iqtisadi inkişafı ilə bağlı qəbul edilən Dövlət proqramları çərçivəsində respublikanın bütün bölgələrində yeni yollar çəkilib və ya yenidən qurulub, çoxlu sayda körpülər, yol qovşaqları tikilib, infrastruktur daha da yaxşılaşdırılıb.

Bu məqamda qeyd etmək yerinə düşər ki, yol-nəqliyyat infrastrukturunun yenilənməsi ilə bağlı layihələr regionların sosial-iqtisadi inkişafına dair 2014-2018-ci illəri əhatə edən üçüncü Dövlət Proqramı çərçivəsində də intensiv şəkildə davam etdirilir. Yeri gəlmişkən, Quba və Xaçmaz rayonlarını birləşdirən avtomobil yolu əsaslı təmir olunur. Avqust ayının ilk günlərindən yolda asfaltlanma işlərinə başlanılacaq. Yeni yol əvvəlkindən həm keyfiyyətinə, həm də ölçülərinə görə seçiləcək. Ötən əsrin 70-ci illərində salınan 28 kilometrlik yol istismar müddətini başa vurduğundan avtomobillərin hərəkəti üçün ciddi çətinlik yaranmışdı. Məhz buna görə də “Azəravtoyol” ASC tərəfindən şimal bölgəsinin iki böyük rayonunu birləşdirən, həm də turizm əhəmiyyətli yolun tamamilə yenidən qurulmasına başlanılıb. İyirmi iki kilometrinə asfalt döşənəcək Quba-Xaçmaz yolunda hazırda yenidənqurma işləri sürətlə davam edir. Köhnə asfalt qatı çıxarılaraq, yol yatağının sıradan çıxan hissələri bərpa edilir. Yeni yolun hərəkət hissəsinin eni 7,5, yol çiyinləri ilə birlikdə isə 12 metr olacaq. Yolun yenidən qurulması işləri ilin sonunadək başa çatacaq.

Bununla yanaşı, Bərdə rayonunda 12 min nəfər əhalinin yaşadığı 17 yaşayış məntəqəsini birləşdirən Yenidaşkənd-Umudalılar avtomobil yolunun tikintisi ilə bağlı görülən işlər yekunlaşmaq üzrədir. Uzunluğu 25 kilometr olan avtomobil yolu IV texniki dərəcəyə uyğun inşa olunub. Tikinti işləri çərçivəsində müxtəlif həcmdə yol yatağının və əsasının genişləndirilməsi işləri aparılıb. Bu çərçivədə qazma-dolma işləri görülüb, zəruri olan yerlərə xüsusi material tökülərək kipləşdirilib, yolun ümumi eni 10 metrə çatdırılıb. İki hərəkət zolaqlı yola 6 metr enində hərəkət hissə və hər bir istiqamət üzrə 2 metr enində çiyinlər daxildir. Həmçinin optimal-qırmadaş və qum-çınqıl qarışığından ibarət yol əsasının tikintisi və yeni asfalt-beton örtüyünün döşənməsi işləri də yüksək keyfiyyətlə aparılaraq yekunlaşdırılıb. Ümumilikdə yola 2 qat olmaqla 10 santimetr qalınlığında 150 min kvadratmetr yeni asfalt-beton örtüyü döşənib. Layihə çərçivəsində əkin sahələrinin suvarılması üçün 2 yerdə uzunluğu 12 metr olan dəmir-beton borular və ümumi uzunluqları 360 metr olan 30 ədəd dəmir suötürücü borular quraşdırılıb. Bütün işlər başa çatdırıldıqdan sonra zəruri olan yerlərdə 132 ədəd yol nişanı və məlumatverici lövhə quraşdırılacaq, yol-cizgi və yolgöstərici xətlərin çəkilişi işləri aparılacaq. Bərdə rayonu Yenidaşkənd-Umudalılar avtomobil yolunun tikintisi ilə vətəndaşların gediş-gəlişi xeyli rahatlaşacaq, yük və sərnişin daşınması asanlaşacaq.

Göyçay rayonunda isə Bığır-Cırqurd-Şəkər-Veysəlli-Alıkənd-Mırtı avtomobil yolunun yenidənqurma işləri uğurla davam etdirilir. “Azəravtoyol” ASC tərəfindən dördüncü texniki dərəcəyə uyğun olaraq yenidən qurulan yolun ümumi uzunluğu 17 kilometrdir. Yolda söküntü və torpaq işləri görülüb, yol yatağı və əsası inşa edilib. Torpaq işləri bitdikdən sonra yola ikiqat asfalt-beton örtüyünün döşənməsinə start verilib. Hazırda Bığır kəndi ərazisində yolun birinci asfalt qatının vurulması işləri davam etdirilir. Ümumi qalınlığı 12 santimetr olmaqla yolun 100 min kvadratmetrdən çox hissəsinin asfaltlanması nəzərdə tutulub. Yeni salınan yol 2 hərəkət zolağından ibarətdir. Yolda hərəkət hissəsinin eni 6 metr, hər bir istiqamət üzrə yolun çiyinlərinin eni isə 2 metr təşkil edir. Bu yol yenidənqurma işləri zamanı 6-7 metrdən 10 metrə qədər genişləndirilib. Layihə çərçivəsində suların ötürülməsi üçün 55 yerdə müxtəlif diametrli suötürücü borular quraşdırılır, mövcud avtomobil körpüsü isə əsaslı şəkildə bərpa edilir. Hazırda yolun başlanğıc yerində, Bakı-Şamaxı-Yevlax avtomobil yolunun kənarında, Bığır kəndinin giriş hissəsində müasir giriş qapısı inşa edilir. Yolda tikinti işləri bitdikdən sonra avtonəqliyyat vasitələrinin hərəkətinin normal təşkili üçün zəruri yerlərdə 37 yol nişanı qoyulacaq, yolun üfüqi nişanlama xətlərinin çəkilişi işləri aparılacaq. Qeyd edək ki, Göyçay rayonu Bığır-Cırqurd-Şəkər-Veysəlli-Alıkənd-Mırtı avtomobil yolunun yenidən qurulması altı yaşayış məntəqəsinin sakinlərinin Bakı-Şamaxı-Yevlax avtomobil yoluna rahat, maneəsiz və təhlükəsiz şəkildə çıxışını təmin etməklə, yük və sərnişin daşınmasını xeyli asanlaşdıracaq.

Eyni zamanda, Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində Mingəçevir-Bəhrəmtəpə avtomobil yolunun 138 kilometrlik hissəsində də “Azəravtoyol” ASC tərəfindən yenidənqurma işləri aparılır. Layihəyə uyğun olaraq avtomobil yolu Aran-Qarağacı (kilometr 0-26) və Qarağacı-Bəhramtəpə hissələri (kilometr 26-138) üzrə yenidən qurulur. Bundan öncə yolun Mingəçevir şəhəri-Mingəçevir stansiyası arasında olan 16,5 kilometrlik hissəsi yüksək səviyyədə qurularaq cari ilin aprel ayında Prezident İlham Əliyevin iştirakı ilə vətəndaşların istifadəsinə verilib. Yolun 16,5-154,5 kilometrlik hissəsində isə hazırda işlər sürətlə davam etdirilir. Bu hissədə yol 2 hərəkət zolaqlı olmaqla 3-cü texniki dərəcəyə uyğun olaraq inşa olunur. Yol yatağının eni isə 12 metrdir. Ümumilikdə asfalt-beton örtük isə 27 santimetr təşkil edəcək. Layihəyə uyğun olaraq, Mingəçevir-Bəhrəmtəpə yolunda yolun altından suların ötürülməsi üçün 268 ədəd suötürücü borunun quraşdırılması və 32 yerdə suötürücü keçidin inşası nəzərdə tutulub və bu istiqamətdə işlər aparılır. Bundan başqa, yolun altından keçidi təmin etmək məqsədilə 22 yerdə alt keçidin inşası aparılır. Yolboyu 5 ədəd yeni körpü də inşa edilir. Hazırda isə layihə çərçivəsində yolboyu torpaq işləri görülür, yeni yol yatağı və yol əsasının inşası aparılır. Hazır hissələrə yeni asfalt-beton örtüyünün döşənməsi işlərinə də start verilib. Bundan başqa, yolboyu kommunikasiya xətlərinin köçürülməsi, suötürücü boruların, su və yeraltı keçidlərin inşası işləri də görülür. Bütün işlər tərtib olunmuş qrafikə uyğun və yüksək keyfiyyətlə aparılır. Bunun üçün əraziyə lazımi sayda qüvvə cəlb olunub. Qeyd olunub ki, Mingəçevir-Bəhrəmtəpə avtomobil yolunun yenidən qurulması ilə yolboyu yaşayan vətəndaşların istər Gəncə-Qazax, istər Qax-Balakən, istərsə də Beyləqan-Füzuli, Saatlı-Şirvan və Bakı istiqamətlərinə rahat, həmçinin maneəsiz şəkildə gediş-gəlişi təmin olunacaq.

Digər tərəfdən, Azərbaycan Respublikası Prezidentinin Sərəncamına əsasən 24 min nəfər əhalinin yaşadığı 20 yaşayış məntəqəsini birləşdirən Tərtər rayonunun Tərtər-Seydimli-Qaradağlı-Sarov avtomobil yolunun tikintisinə başlanılıb. Uzunluğu 29,5 kilometr olan avtomobil yolu III texniki dərəcəyə uyğun yenidən qurulur. Tikinti layihəsinə uyğun olaraq 2 hərəkət zolaqlı olmaqla yolun ümumi eni 12 metr təşkil edir. Layihə çərçivəsində sözügedən yolun 18 kilometrlik hissəsində torpaq işləri yekunlaşdırılıb və asfaltlanma işlərinə başlanılıb. Ümumilikdə yolun 200 min kvadratmetrdən çox sahəsinə 2 qat olmaqla və 12 santimetr qalınlığında yeni asfalt-beton örtüyü döşənəcək. Tərtər-Seydimli-Qaradağlı-Sarov avtomobil yolunun qalan 11,5 kilometrlik hissəsində isə hazırda torpaq işləri görülür, yeni yol yatağı və yol əsası inşa edilir. Yolun yaşayış məntəqələrindən keçən ərazilərində yeni piyada səkiləri qurulub, səkilərin kənarlarına 6 min poqonmetr səki daşı düzülüb. Yenidənqurma işləri çərçivəsində yolun 18-ci kilometrində Hincə çayı üzərində uzunluğu 12 metr olan və istismarı başa çatmış körpünün də əsaslı şəkildə bərpası işləri görülür. Bundan başqa, suların ötürülməsi üçün 42 yerdə müxtəlif diametrli dəmir-beton suötürücü borular da quraşdırılacaq. Tikinti işləri başa çatdırıldıqdan sonra zəruri olan yerlərə 189 ədəd yol nişanı və məlumatverici lövhə quraşdırılacaq, yolun üfüqi nişanlanma xətlərinin çəkilişi işləri aparılacaq.

Bunlarla yanaşı, Prezident İlham Əliyev “İmişli rayonunun İmişli-Otuziki-Qaraqaşlı avtomobil yolunun tikintisi ilə bağlı tədbirlər haqqında” Sərəncam imzalayıb. Qırx min nəfər əhalinin yaşadığı 6 yaşayış məntəqəsini birləşdirən İmişli-Otuziki-Qaraqaşlı avtomobil yolunun tikintisi məqsədi ilə Azərbaycan Respublikasının 2017-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 6 milyon manatı “Azəravtoyol” Açıq Səhmdar Cəmiyyətinə ayrılıb.

Beləliklə, göründüyü kimi, bölgələrdə yol-nəqliyyat infrastrukturunun yenilənməsi istiqamətində ardıcıl işlər həyata keçirilir. Başqa sözlə, regionların inkişafının fonunda yol-nəqliyyat infrastrukturunun yenilənməsi də xüsusi diqqət mərkəzindədir və bu sahədə həyata keçirilən işlər davamlı xarakter daşıyır.

Nurlan QƏLƏNDƏRLİ

Yeni Azərbaycan.- 2017.- 29 iyul.- S.7.