Azərbaycanın regionlarında sosial infrastruktur quruculuğu geniş vüsət alıb

Son 13 ildə ölkə üzrə 3000-dən çox məktəb binasının tikilməsi və yaxud mövcud təhsil ocaqlarının əsaslı təmir edilməsi təxminən 1 milyon şagirdin təhsil şəraitinin yaxşılaşması ilə nəticələnib

Azərbaycanda iki istiqamət paralel şəkildə inkişaf etdirilir. Ölkənin iqtisadi potensialının artırılması üçün konseptual əsaslar hazırlanır, Dövlət proqramları qəbul edilir, genişmiqyaslı maddi dəstək tədbirləri həyata keçirilir. Eyni zamanda, sosial sfera adekvat şəkildə diqqət mərkəzində saxlanılır. Başqa sözlə desək, respublikamızda rasional iqtisadi inkişaf ölkə vətəndaşlarının mənafeyinə yönələn güclü sosial siyasətlə tamamlanır. Qarşıya qoyulan vəzifə ondan ibarətdir ki, ölkəmizdə sosial sferada vəziyyət dünyanın inkişaf etmiş ölkələrindəkindən geri qalmamalıdır. Prezident İlham Əliyev Respublika Günü münasibətilə keçirilən rəsmi qəbulda söylədiyi nitqində nəzərə çatdırıb ki, respublikamızda həyata keçirilən siyasətin mərkəzində Azərbaycan vətəndaşı dayanır: “Daxili siyasət məsələlərinə gəldikdə, əlbəttə ki, biz sosial sahəyə bundan sonra da xüsusi diqqət ayıracağıq. Bu sahə bizim üçün prioritetdir. Mən dəfələrlə demişəm ki, siyasətimizin mərkəzində Azərbaycan vətəndaşı dayanır. Biz bütün işləri ona görə görürük ki, xalqımız daha da yaxşı yaşasın”.

Azərbaycanın dövlət başçısının nümayiş etdirdiyi güclü siyasi iradə sayəsində respublikamızda yoxsulluğun bir fenomen kimi tamamilə aradan qaldırılması istiqamətində davamlı tədbirlər həyata keçirilir. Çox qısa müddətdə yoxsulluğun 50 faizdən 5 faizədək azaldılması böyük nailiyyətdir. Eyni zamanda, işsizliyin aradan qaldırılması diqqət mərkəzində saxlanılır. Prezident İlham Əliyev respublikamızdakı müsbət demoqrafik vəziyyəti nəzərə alaraq yeni iş yerlərinin yaradılmasının daimi prosesə çevrilməsi ilə bağlı qarşıya mühüm vəzifə qoyub. Son 13 ildə respublika üzrə təxminən 1,6 milyon yeni iş yerinin yaradılması insanların sosial vəziyyətinin yaxşılaşmasında mühüm faktor qismində çıxış edir.

Regionlarda sosial infrastruktur quruculuğu diqqət mərkəzində saxlanılır

Ölkəmizdə 2004-cü ildən bəri böyük uğurla reallaşdırılan regionların sosial-iqtisadi inkişafına dair müvafiq Dövlət proqramlarında bölgələrdə sosial infrastruktur quruculuğu ilə bağlı konkret müddəalar öz əksini tapıb. Dövlət sosial sferada bu və ya digər layihələrin həyata keçirilməsinə böyükhəcmli sərmayələr yönəldir. Artıq Dövlət proqramlarında nəzərdə tutulan çoxlu sayda sosial infrastruktur obyektlərinin inşası yüksək səviyyədə tamamlanıb və onlar uğurla fəaliyyət göstərirlər. Bölgələrdə əsasən milli memarlıq üslubunda yaradılan və hər cür rahatlıqlara malik sosial infrastruktur obyektləri bir növ müstəqil Azərbaycanın hərtərəfli inkişafının rəmzinə çevrilib.

Yeni sosial infrastruktur obyektlərinin istifadəyə verilməsi sayəsində bölgələrdə əhalinin kommunal xidmətlərlə təchizatının səviyyəsi əhəmiyyətli dərəcədə yüksəlib. Bunun müsbət nəticəsi həm də ondan ibarətdir ki, artıq insanların, ələlxüsus da gənclərin bölgələrdən iri şəhərlərə axını əhəmiyyətli dərəcədə azalıb. Bir tərəfdən regionlarda aqrar sektorda perspektivli sahələrin inkişaf etdirilməsi, digər tərəfdən isə kommunal xidmətlərə olan tələbatın yüksək səviyyədə ödənilməsi insanları çox möhkəm şəkildə öz doğma yurd-yuvalarına bağlayır. Təsadüfi deyil ki, son dövrlərdə bölgələrdə iqtisadi aktivlik artıb. Regionların sakinləri həm yüksək gəlirli iş yerləri ilə təmin olunmalarından, həm də yaşadıqları yerlərdə asudə vaxt keçirmək üçün hər cür şərait yaradılmasından, elektrik enerjisi, su, qaz təchizatının yaxşılaşmasından, kənd yollarının abadlaşdırılmasından məmnundurlar.

Təkcə son bir ildə bölgələrdə 59 məktəb istifadəyə verilib

Respublika miqyasında təhsilin inkişafı ölkədə həyata keçirilən dövlət siyasətinin prioritet istiqamətlərindən birini təşkil edir. Məlumdur ki, Azərbaycan müasirləşməni strateji hədəf seçib. Bunu isə yüksək səviyyəli təhsil olmadan təsəvvür etmək mümkün deyil. Dövlətin, cəmiyyətin inkişafı uşaqlara, gənclərə keyfiyyətli təhsil verməkdən keçir. Buna görə də ölkəmizdə təhsilin maddi-texniki bazasının möhkəmləndirilməsi davamlı şəkildə diqqət mərkəzində saxlanılır. Dövlət müasir təhsil infrastrukturunun qurulmasına böyük həcmlərdə vəsait xərcləməklə ölkənin gələcəyinə sərmayələr yönəldir. Ölkəmiz o mövqedən çıxış edir ki, güclü infrastrukturun yaradılması təhsil sahəsində uğurların əsasını təşkil edir.

Müvafiq Dövlət proqramlarının icrası nəticəsində son 13 ildə Bakı şəhərində və respublikanın bölgələrində 3000-dən çox yeni məktəb tikilib və yaxud əsaslı təmir edilib. Bunun nəticəsində təxminən 1 milyon şagirdin təhsil şəraiti yaxşılaşıb, birnövbəli tədris sisteminin tətbiq edildiyi məktəblərin sayı əhəmiyyətli dərəcədə artıb. Əlamətdar haldır ki, bütün ölkə boyu yeni təhsil ocaqlarının inşası ildən-ilə daha geniş miqyas alır. Təkcə son bir il ərzində respublikanın regionlarında 59 məktəb, 53 bağça tikilib və ya əsaslı təmir olunub.

Ölkəmizdə təhsil infrastrukturunun yeniləşməsindən söhbət açarkən Ümummilli lider Heydər Əliyevin adını daşıyan Fondun bu sahədəki fəaliyyətini də xüsusi qeyd etmək lazımdır. Fond tərəfindən “Yeniləşən Azərbaycana yeni məktəb”, “Təhsilə dəstək”, “Məktəbəqədər təhsil müəssisələrinin inkişafı” layihələri həyata keçirilir. Fondun təşəbbüsü ilə 2005-ci ildən start verilən “Yeniləşən Azərbaycana yeni məktəb” layihəsi çərçivəsində istifadəyə verlən yüzlərlə məktəbin hər birində müasir laboratoriya, kitabxana, yeməkxana, ən son avadanlıqla təchiz edilmiş kompüter otaqları, emalatxana, idman zalları, geniş meydançalar və ayrıca istilik sistemi var. Son illərdə isə proqramın icrasının növbəti mərhələsinə başlanılıb. Hazırda ölkəmizdə Fondun dəstəyi ilə yeni məktəblərin inşası, habelə mövcud təhsil müəssisələrinin əsaslı təmiri prosesi uğurla davam etdirilir.

Təhsil sahəsində yeni proqram uğurla icra olunur

Təhsil infrastrukturunun yenilənməsi istiqamətində qarşıya qoyulan mühüm vəzifələrdən biri də ölkə ərazisindəki qəzalı məktəblərin müasir təhsil ocaqları ilə əvəz olunmasıdır. Son illərdə Prezident İlham Əliyevin imzaladığı sərəncamlara, həmçinin müvafiq Dövlət proqramlarına əsasən bölgələrdə çoxlu sayda qəzalı məktəb ləğv edilib və minlərlə şagirdin təhsil şəraiti yaxşılaşıb.

2016-cı ildən etibarən ölkəmizdə təhsil infrastrukturunun müasirləşdirilməsi istiqamətində yeni proqramın icrasına başlanılıb. Belə ki, ötən il 44 rayonu əhatə edən azkomplektli və qəzalı vəziyyətdə olan kənd məktəblərinin modul tipli məktəblərlə əvəzlənməsinə start verilib. Nazirlər Kabinetinin qərarı ilə 2016-cı ildə 6 belə məktəbin quraşdırılması üçün Təhsil Nazirliyinə 2 milyon manat vəsait ayrılıb. Növbəti illərdə bu yolla şagird sayı 100-dək olan bütün qəzalı azkomplektli məktəblərin problemini birdəfəlik həll etmək mümkündür. İqtisadiyyat naziri Şahin Mustafayevin məlumatına əsasən, 2017-ci ildə regionlarda qəzalı, istismara yararsız və şagird sayı az olan məktəblər üçün 100-dən çox modul tipli məktəb quraşdırılacaq, gələn il işlər davam etdirilərək, bu problem iki il ərzində tam həllini tapacaq.

Yeni tibb müəssisələrinin istifadəyə verilməsi səhiyyə sahəsində ciddi keyfiyyət dəyişikliyi ilə nəticələnib

Son illərdə səhiyyə sahəsində reallaşdırılan islahatlar da ölkəmizdə həyata keçirilən genişməzmunlu sosial siyasət barədə konkret təsəvvür yaradır. Təkcə belə bir faktı vurğulamaq lazımdır ki, ölkəmizdə səhiyyənin prioritet sahələri üzrə 9 Dövlət Proqramı qəbul edilib.

Eyni zamanda, cari ildən regionlarda - Mingəçevir şəhərinin və Yevlax rayonunun inzibati ərazilərində pilot layihə kimi respublikamızda icbari tibbi sığortanın tətbiqinə başlanılıb. Prezident İlham Əliyev “Mingəçevir şəhərinin və Yevlax rayonunun inzibati ərazilərində icbari tibbi sığortanın tətbiqinə dair pilot layihənin həyata keçirilməsi ilə bağlı tədbirlər haqqında” 29 noyabr 2016-cı il tarixli müvafiq Fərman imzalayıb. Pilot layihənin reallaşdırılması çərçivəsində Yevlax Rayon Mərkəzi Xəstəxanasının və Yevlax Şəhər Uşaq Xəstəxanasının bazalarında mövcud qanunvericiliyin tələblərinə uyğun olaraq Yevlax Rayon Mərkəzi Xəstəxanası publik hüquqi şəxs, Mingəçevir Şəhər Mərkəzi Xəstəxanasının bazasında isə Mingəçevir Şəhər Mərkəzi Xəstəxanası publik hüquqi şəxs yaradılıb. Gələcəkdə icbari tibbi sığortanın bütün ölkə ərazisində tətbiqi nəzərdə tutulur.

Son illərdə ölkəmizdə Prezident İlham Əliyevin siyasi iradəsinə uyğun olaraq səhiyyə sahəsində davamlı şəkildə həyata keçirilən islahatlar bütün ölkə boyu tibb ocaqlarının maddi-texniki bazasının möhkəmləndirilməsi ilə tamamlanır. Son 13 ildə respublikamızda 600-dək səhiyyə müəssisəsi tikilib və yaxud əsaslı şəkildə yenidən qurularaq müasir avadanlıqla təchiz edilib. Respublikamızda 2016-cı ildə məlum çətinliklərə baxmayaraq, səhiyyənin inkişafına, maddi-texniki bazasının gücləndirilməsinə əlavə olaraq 83 milyon manat vəsait ayrılıb. Ölkə miqyasında tibb müəssisələrinin yenidən qurulması layihələrinin icrası cari ilin əvvəlindən intensiv şəkildə davam etdirilir. Belə ki, 2017-ci ilin birinci rübündə 13 tibb müəssisəsi tikilib və ya əsaslı təmir edilib. Hazırda həm paytaxtda, həm də ölkənin müxtəlif bölgələrində 30-dək tibb müəssisəsində təmir-tikinti işləri aparılır.

Respublika miqyasında səhiyyənin maddi-texniki bazasının möhkəmləndirilməsi regionlarda əhalinin keyfiyyətli tibb xidmətinə əlçatanlığını təmin edir. Məlumdur ki, son illərdə Prezident İlham Əliyevin tapşırığı əsasında əhalinin pulsuz tibbi müayinəsi həyata keçirilir. Ölkədə səhiyyənin maddi-texniki bazasının möhkəmləndirilməsi sayəsində təkcə bu il böyük qismi regionlarda olmaqla 5 milyondan çox Azərbaycan vətəndaşı pulsuz müayinədən keçib.

Mübariz ABDULLAYEV

Yeni Azərbaycan.- 2017.- 8 iyun.- S.7.