Regionlarda yeni qazlaşdırma layihələri həyata keçirilir

2017-ci ilin sonunadək ölkə üzrə qazlaşdırmanın səviyyəsini 94 faizə çatdırmaq nəzərdə tutulub

İndiki dövrdə güclü infrastruktur təminatı olmadan ölkələrin müasir inkişafını təsəvvür etmək mümkün deyil. Bu baxımdan, son 13 ildə Azərbaycanda istər iqtisadi, istərsə də sosial infrastruktur quruculuğuna böyük diqqət göstərilməsi təqdirəlayiq haldır. Həyata keçirilən məqsədyönlü layihələr sayəsində bütün ölkə boyu infrastruktur təminatı əhəmiyyətli dərəcədə möhkəmlənib. Beləliklə də, respublikanın şəhər və rayonlarında iqtisadi aktivliyin artması, eləcə də insanların müxtəlif kommunal rahatlıqlarla təminatının yaxşılaşması üçün münbit şərait yaranıb.

Xüsusi olaraq vurğulamaq lazımdır ki, bütün ölkə boyu dövlət vəsaitləri hesabına yeni infrastruktur obyektlərinin yaradılması əsasən regionlarda olmaqla davamlı xarakter daşıyır və bu proses ildən-ilə daha geniş miqyas alır. “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda iqtisadiyyat naziri Şahin Mustafayev bildirib ki, hesabat dövründə regionların inkişafına 4 milyard manat vəsait yönəldilib. Eyni zamanda, Prezident İlham Əliyevin bölgələrə çoxsaylı səfərləri nəticəsində şəhər və rayonların sosial-iqtisadi inkişafının sürətləndirilməsi və bəzi mühüm layihələrin icrası ilə bağlı imzaladığı 67 sərəncamla 261 milyon manat vəsait ayrılıb. Bəhs olunan Dövlət proqramının icrasının üçüncü ili ərzində regionlarda 850 kilometr avtomobil yolu, 27 körpü və yolötürücüləri tikilib və ya təmir olunub. Dövlət başçısının tapşırığına uyğun olaraq, əhalisi 790 min nəfər olan 480 yaşayış məntəqəsini birləşdirən 120 kilometr kənd yolunun inşası işləri başa çatdırılıb. Ötən il respublikamızda bir elektrik stansiyası istifadəyə verilib, 7422 kilometr elektrik xətti çəkilib, 784 transformator və 46 yarımstansiya quraşdırılıb və ya təmir olunub. Həmçinin regionlarda 825 kilometr su, 541 kilometr kanalizasiya xətti çəkilib, 32 artezian quyusu qazılıb, 27 su anbarı inşa olunub. Əhalisi 120 min nəfərdən çox olan 5 şəhərdə su təchizatı layihəsi başa çatıb, 100 min nəfəri əhatə edən 56 yaşayış məntəqəsində modul tipli sutəmizləyicisi quraşdırılıb.

Ümumiyyətlə, bəhs olunan dövrdə nəzərdə tutulan bütün sosial layihələr tam həcmdə icra olunub. Regionlarda 59 məktəb, 53 bağça, 26 səhiyyə, 16 gənclər və idman, 73 mədəniyyət obyekti tikilib və ya əsaslı təmir olunub, 1625 qaçqın və məcburi köçkün ailəsinin yeni mənzillərə köçürülməsi təmin edilib.

Ölkədə əhalinin kommunal xidmətlərlə təchizatının yaxşılaşdırılması bundan sonra da davam etdiriləcək

Məlum olduğu kimi, Prezident İlham Əliyev ötən ilin dekabrında “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” müvafiq Fərman imzalayıb. Fərmana əsasən, Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsinin təsdiqlənməsi dövlətin bütün ölkə boyu insanların gündəlik həyatı ilə bağlı olan kommunal xidmətlərin səviyyəsinin yüksəldilməsini, elektrik və istilik enerjisi, su və qaz təsərrüfatlarının maddi-texniki bazasının möhkəmləndirilməsini, bəhs olunan sahələrdə infrastruktur təminatının daha da yaxşılaşdırılmasını bundan sonra da diqqət mərkəzində saxlamaq əzmi nümayiş etdirdiyini təsdiqləyir. Müvafiq Fərmanla milli iqtisadiyyat və onun 11 əsas sektoru üzrə təsdiqlənən strateji yol xəritələri 2016-2020-ci illər üçün iqtisadi inkişaf strategiyasını və tədbirlər planını, 2025-ci ilədək olan dövr üçün uzunmüddətli baxışı və 2025-ci ildən sonrakı dövrə hədəf baxışı özündə ehtiva edir. Kommunal xidmətlərin inkişafına dair Strateji Yol Xəritəsinə əsasən konkret sahələr üzrə qarşıya müvafiq strateji məqsədlər qoyulub və hədəflər müəyyənləşdirilib. Şübhə yoxdur ki, sənədə əsasən nəzərdə tutulan tədbirlərin mərhələlər üzrə reallaşdırılması ilə paytaxt Bakıda və bölgələrdə əhaliyə kommunal xidmətlər sektorunda, ümumiyyətlə, infrastruktur təminatında əsaslı keyfiyyət dəyişiklikləri baş verəcək. Bunun nəticələri isə perspektivdə həm əhalinin rifah halının yaxşılaşmasında, həm də ölkənin iqtisadi potensialından daha səmərəli istifadə edilməsində öz əksini tapacaq.

İnfrastruktur quruculuğunun diqqət mərkəzində saxlanılması qazlaşdırma sahəsində də qabarıq şəkildə nəzərə çarpır

Ölkəmizdə genişmiqyaslı infrastruktur quruculuğunun diqqət mərkəzində saxlanılması həmçinin əhalinin həyat tərzinin yüksəldilməsi baxımından böyük əhəmiyyət daşıyan qazlaşdırma sahəsində də qabarıq şəkildə nəzərə çarpır. Kommunal xidmətlərin inkişafı ilə bağlı Strateji Yol Xəritəsində ölkə ərazisində qazlaşdırmanın miqyasının daha da genişləndirilməsi, həmçinin “mavi yanacaq” təchizatında keyfiyyətin yaxşılaşdırılması, itkilərin minimuma endirilməsi ilə bağlı konkret müddəalar öz əksini tapıb.

Ölkəmizdə qazlaşdırmanın genişləndirilməsi ilə bağlı yeni hədəflər müəyyənləşdirilərkən, təbii ki, yaradılan möhkəm baza və mövcud imkanlar əsas götürülüb. Məlumdur ki, son illərdə Azərbaycan uğurlu enerji siyasəti sayəsində həm də qaz ixracatçısına çevrilib. Azərbaycanın və tərəfdaş ölkələrin birgə iştirakı ilə işlənməsinə başlanan “Şahdəniz” yatağı qlobal miqyasda yeganə yeni “mavi yanacaq” mənbəyi kimi respublikamızın önəmini əhəmiyyətli dərəcədə artırıb.

Bununla belə, Prezident İlham Əliyevin qətiyyətli siyasi iradəsi ona yönəlib ki, Azərbaycanın zəngin qaz potensialından ilk növbədə ölkə əhalisi bəhrələnməlidir. Dövlət başçısının tapşırıqlarına uyğun olaraq indiyədək respublikanın regionlarında genişmiqyaslı qazlaşdırma layihələri həyata keçirilib ki, bunun da sayəsində ölkənin bütün şəhərlərinin “mavi yanacaq” təchizatına yüz faiz həcmində nail olunub. “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində müəyyənləşdirilən tədbirlərə uyğun olaraq əhali kateqoriyasına aid istehlakçıların mənzillərindəki istismar müddəti bitən mexaniki sayğaclar “Smart-kart” tipli sayğaclarla əvəz olunur, yeni qaz kəmərləri çəkilir, təmir-bərpa işləri aparılır. Əlamətdar haldır ki, ölkə miqyasında qazlaşdırma prosesi ildən-ilə daha geniş miqyas alır. Müvafiq Dövlət Proqramının icrasının üçüncü ili ərzində ölkə ərazisində 8200 kilometr qaz xətti çəkilib və ya əsaslı təmir olunub, 36 rayon üzrə 209 yaşayış məntəqəsi təbii qazla təmin edilib, regionlar üzrə qazlaşdırma səviyyəsi 92 faizə çatıb.

Cari ilin sonunadək 80 kəndin qazlaşdırılması qarşıya vəzifə qoyulub

Ölkəmizdə bütün regionları əhatə edən və abonentlərin keyfiyyətli qaz təchizatına imkan verən optimal paylayıcı şəbəkə qurulub. “Azəriqaz” İB Azərbaycan Respublikası ərazisində təbii qazın nəqli, paylanması və satışını həyata keçirir. İstehsalat Birliyinin elmi-texniki potensialı Azərbaycanın müxtəlif regionlarını əhatə edən 1,312 milyona yaxın istehlakçının təbii qazla təchizatını təmin etməyə imkan verir. Bu funksiyanın icrası üçün 8 magistral qaz kəmərləri sahəsi, 7 kompressor stansiyası, 67 qaz istismar sahəsi, 79 avtomat qaz paylayıcı stansiya, 77 qaz paylayıcı stansiya, 35 qaz paylayıcı məntəqə, ümumi uzunluğu 44 372 kilometr olan boru kəmərləri və digər çoxsaylı texnoloji obyektlərdən ibarət olan texniki şəbəkənin optimal idarəetmə mexanizmi mövcuddur.

Belə güclü maddi-texniki baza bütün ölkə miqyasında qazlaşdırmanın səviyyəsini daha da yüksəltməyə imkan verir. Təsadüfi deyil ki, cari ilin sonunadək ölkədə qazlaşdırmanın səviyyəsini 94 faizə çatdırmaq nəzərdə tutulub. Prezident İlham Əliyev yuxarıda bəhs olunan konfransdakı nitqində ölkədə qazlaşdırmanın miqyasının daha da genişləndirilməsi ilə bağlı qarşıda duran vəzifələrdən bəhs edərək deyib ki, bu il “Azəriqaz” ən azı 80 kəndə qaz verməlidir. Dövlət başçısı vurğulayıb: “Səksən kəndin qazlaşdırılması minimum proqramdır. Nə qədər çox olsa, o qədər yaxşıdır”.

Regionlarda “mavi yanacaq” alan yaşayış məntəqələrinin sayı artır

Prezident İlham Əliyevin respublikada yaşayış məntəqələrinin qazlaşdırılması istiqamətində verdiyi tapşırıqlara uyğun olaraq bölgələrdə intensiv surətdə yeni layihələr həyata keçirilir və bunun da nəticəsində “mavi yanacaq” alan yaşayış məntəqələrinin sayı artır. 2017-ci ilin birinci rübündə Goranboy rayonunun Səmədabad kəndində 218 abonentə təbii qaz verilib. Hazırda isə 4 kəndə - Yolpaq, Qazaxlar, Sarov və Goranlıya metal və polietilen borularla daşıyıcı və paylayıcı qaz xətləri çəkilir. Mütəxəssislərin proqnozlarına əsasən, cari ilin sonuna qədər rayon üzrə qazlaşdırma 94 faiz təşkil edəcək. Qazlaşdırma ilə bağlı icra olunan layihələr tam başa çatdırıldıqdan sonra Goranboyun 79 kəndinin hamısı təbii qazla təmin olunacaq.

Saatlı rayonunun qəsəbə və kəndlərinin qazlaşdırılması istiqamətində də yaxşı nəticələr əldə olunub. İndiyədək rayonun 44 yaşayış məntəqəsindən 33-ü qazlaşdırılıb. Qaz verilmiş kənd və qəsəbələrin sırasına rayonun Sarıcalar və Qara Nuru kəndləri də əlavə olunub. Ümumilikdə 2049 abonenti olan kəndlərin qazlaşdırılması üçün 11 min 912 metr polietilen və 106 min 757 metr müxtəlif diametrli metal borularla daşıyıcı və məhəllədaxili qaz xətləri çəkilib, mənzillərə sayğac və fərdi tənzimləyicilər quraşdırılıb.

Kəndlərə təbii qazın verilməsi münasibətilə Qara Nuru kəndində keçirilən mərasimdə qeyd olunub ki, son iki ildə rayonun 30 yaşayış məntəqəsi qazlaşdırılıb. Hazırda rayonun qalan kəndlərinə də təbii qazın verilməsi istiqamətində iş aparılır. Layihələndirmə işləri başa çatdıqdan sonra qalan 12 yaşayış məntəqəsində də qaz xətlərinin çəkilişinə başlanılacaq.

Mübariz ABDULLAYEV

Yeni Azərbaycan.- 2017.- 20 may.- S.5