Suraxanı rayonunda Beynəlxalq Ahıllar Günü qeyd olunub

Suraxanı Rayon İcra Hakimiyyətinin və Dövlət Sosial Müdafiə Fondunun rayon şöbəsinin birgə təşkilatçılığı ilə Beynəlxalq Ahıllar Günü münasibətilə tədbir keçirilib. Bu barədə AZƏRTAC-a Suraxanı Rayon İcra Hakimiyyətindən məlumat verilib.

Rayon icra hakimiyyəti başçısının birinci müavini Rəşad Hacıyev qeyd edib ki, BMT-nin Baş Assambleyası 1992-ci ildə ahılların müdafiəsi ilə bağlı qətnamə qəbul edib, həmin sənədin prinsiplərinə əsasən hər il oktyabrın 1-i dünyada Beynəlxalq Ahıllar Günü kimi qeyd olunur. Beynəlxalq Ahıllar Günü ölkəmizin hər yerində olduğu kimi hər il Suraxanı rayonunda da yüksək səviyyədə qeyd edilir. Bildirilib ki, ölkəmizdə ahıllarla bağlı dövlət siyasəti Azərbaycan xalqının ümummilli lideri Heydər Əliyevin ahıl insanların sosial müdafiəsinin təmin olunmasına göstərdiyi xüsusi diqqət və qayğı əsasında formalaşıb. Qeyd edilib ki, Azərbaycan Prezidenti İlham Əliyevin müvafiq fərman və sərəncamlarına, ahıl vətəndaşların sosial müdafiəsinin gücləndirilməsi üzrə qəbul edilmiş Dövlət Proqramına əsasən ahılların maddi və mənəvi tələbatlarının ödənilməsi istiqamətində mühüm tədbirlər həyata keçirilir. Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva ahılların ən böyük qayğıkeşidir.

Bildirilib ki, Suraxanı rayonunda hazırda 70 yaşından yuxarı 5670 nəfər yaşayır. Onların hamısı dövlət tərəfindən təqaüdlə təmin olunurlar. Rayonda yaşayan tənha və başqasının köməyinə ehtiyacı olan ahıl insanlara evdə qulluq həyata keçirilir. Hazırda rayonda 187 kimsəsiz ahıl yaşayır. Onlardan 146 nəfəri qadın, 41 nəfəri isə kişidir. Bu insanlar Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Suraxanı rayon şöbəsi tərəfindən qeydiyyata alınıb, onlara xidmət olunur və həyat tərzinə nəzarət edilir.

Daha sonra Dövlət Sosial Müdafiə Fondunun Suraxanı rayon şöbəsinin müdiri Şahalı Cəbiyev, rayonAğsaqqallar Şurasının üzvləri Mirzəağa Quliyev, Müseyib Bağırov, Rayon Əlillər Cəmiyyətinin sədri Tahir Dəmirçiyev, Böyük Vətən müharibəsi iştirakçıları, rayon ictimaiyyətinin nümayəndələri, ahıllar çıxış ediblər.

Çıxış edənlər ahıllara göstərilən diqqət və qayğıya görə Prezident İlham Əliyevə dərin minnətdarlıqlarını bildiriblər.

Yeni Azərbaycan.- 2017.- 4 oktyabr.- S.7.