Azərbaycanın regionlarında aqrar sektor yeni yanaşmalar əsasında inkişaf etdirilir

İndiyədək ölkədə 2 aqropark yaradılıb və 26 rayon üzrə 157,8 min hektar ərazidə daha 37 aqroparkın yaradılması təşviq olunur

Son illərdə Azərbaycanda Prezident İlham Əliyevin siyasi iradəsinə uyğun olaraq müəyyənləşdirilən iqtisadiyyatın şaxələndirilməsi strategiyasında kənd təsərrüfatında yüksək məhsuldarlığa nail olunması əsas hədəflərdən biri kimi nəzərdə tutulub. Bu məqsədlə ölkənin aqrar sektorunda dünya təcrübəsində təsdiqini tapan qabaqcıl təcrübənin, intensiv metodların tətbiqinə yaşıl işıq yandırılır. Hazırda respublikamızda iri fermer təsərrüfatlarının yaradılması uğurla həyata keçirilir. İndiyədək dövlət başçısının tapşırığına uyğun olaraq ölkəmizin 20 rayonunda 44 min hektardan çox sahədə 22 sahibkarlıq subyekti tərəfindən 32 iri fermer təsərrüfatı yaradılıb. Ümumi dəyəri 181 milyon manat olan bu təsərrüfatların yaradılmasına 72,4 milyon manat dövlət güzəştli kreditləri verilib. İri fermer təsərrüfatlarında məhsuldarlıq hər hektardan arpa və buğda üzrə 58-60, qarğıdalı üzrə isə təxminən 120 sentner təşkil edir.

Aqroparkların yaradılması kənd təsərrüfatının yeni yanaşmalar əsasında inkişafına yaxşı nümunədir

Son vaxtlar Prezident İlham Əliyevin qeyri-neft sektorunun inkişafının sürətləndirilməsi, aqrar sahədə intensiv texnologiyaların tətbiqi ilə bağlı tapşırığına uyğun olaraq ölkəmizdə aqroparkların yaradılmasına başlanılıb. Bu məqsədlə aqroparklarda müasir istehsal, emal və infrastruktur müəssisələrinin yaradılmasına 40 milyon manatdan artıq güzəştli kredit verilib.

Respublikanın ayrı-ayrı bölgələrində bitkiçilik və heyvandarlıq istiqamətli aqroparkların yaradılması ölkəmizdə qeyri-neft iqtisadiyyatının mühüm qolu olan aqrar sektorun yeni yanaşmalar əsasında inkişaf etdirilməsinə yaxşı nümunədir. Regionların potensialı, ənənələri, əmək resursları və bu kimi digər mühüm amillər nəzərə alınmaqla yaradılan aqroparklar bir sıra nöqteyi-nəzərdən əhəmiyyətlidir. Yaradılan aqroparklar məhsul istehsalının bütün tsikllərini əhatə edir ki, bu da bölgələrdə torpaq fondundan daha səmərəli istifadə olunmasına və məhsuldarlığın artmasına müsbət təsir göstərir. Azərbaycan hər cəhətdən müasir təsərrüfatlar sayılan aqroparkların yaradılmasını siyasi və maddi cəhətdən dəstəkləməklə daxili ərzaq tələbatını bütünlüklə yerli istehsal hesabına qarşılamaq, eyni zamanda, xarici bazarlara çıxarılacaq məhsullarımızın həcmini artırmaq məqsədi güdür.

Qeyd edək ki, indiyədək ölkənin regionlarında 10 min hektar ərazidə 2 aqropark yaradılıb. Bunlar Xaçmaz rayonunda “Yalama Aqroparkı” və Qərb bölgəsində “Şəmkir Aqroparkı”dır.

“Yalama Aqroparkı” bir il ərzində əkin sahələrini 3 dəfə genişləndirib

Ölkənin regionlarında ilk olaraq fəaliyyətə başlayan “Yalama Aqroparkı”nın kollektivi yeni təsərrüfat subyektinin yaradılmasının birinci ilini yüksək istehsal göstəriciləri ilə qarşılayıb. Məlumat üçün bildirək ki, “Yalama Aqroparkı” 2016-cı il sentyabrın 8-də Prezident İlham Əliyevin xeyir-duası ilə istifadəyə verilib. “Yalama Aqroparkı”nın yaradılmasına layihənin 1-ci mərhələsi üzrə 20 milyon manat investisiya qoyulub. Bu investisiya nəticəsində aqroparkda 1113 baş sağmal olmaqla 3 min başlıq cins iribuynuzlu heyvandarlıq kompleksi, istehsal gücü saatda 5 ton olan yem zavodu, 460 hektar sahədə iri əkinçilik təsərrüfatı, taxıl anbarları, texnika parkı, müasir suvarma sistemi və lazımi infrastruktur işləri icra edilib. Ümumilikdə qoyulmuş investisiya nəticəsində layihənin birinci mərhələsi üzrə 170 daimi iş yerinin yaradılmasına, illik 4 milyon manat dəyərində təbii süd və 1,5 milyon manat dəyərində bitkiçilik məhsulları istehsalına nail olunub. Dövlət investisiyaları hesabına təsərrüfatın fasiləsiz su təminatı, eləcə də ətraf kəndlərin suvarma suyuna olan ehtiyaclarının ödənilməsində mühüm rol oynayan 3,2 kilometr uzunluğunda beton suvarma kanalı və tutumu 50 min kubmetr olan su hovuzu tikilib.

Qarşıya qoyulan tapşırığa uyğun olaraq, son bir ildə “Yalama Aqroparkı”nın əkin sahələri 3 dəfə artırılıb, eyni zamanda, istehsal genişləndirilib. Xaçmaz rayonunun Müqtədir qəsəbəsində Dövlət Ehtiyat Fondu torpaqlarından 956 hektar torpaq sahəsi uzunmüddətli icarəyə götürülərək əkin dövriyyəsinə qatılıb. Bununla da müəssisənin əkin dövriyyəsinə cəlb etdiyi torpaq sahəsi 523 hektardan 1479 hektara çatdırılıb. Bununla yanaşı, idxal əvəzləyici xarakterə malik soya bitkisinin əkini aparılıb, taxıl və qarğıdalı bitkisinin əkininin həcmi genişləndirilib. Həmçinin aqroparkdakı heyvandarlıq kompleksinin genişləndirilməsi sahəsində işlər sürətlə davam etdirilir.

“Yalama Aqroparkı” həm təsərrüfatda saxlanılan heyvan sayı, həmçinin daimi işçi heyətinin sayına görə ölkə üzrə fəaliyyət göstərən ən iri heyvandarlıq təsərrüfatlarından biridir. Təsərrüfatda cəmi heyvan sayı 2 min 100 başa bərabərdir. Hazırda Avstriya və Almaniyadan gətirilmiş inəklərdən ikinci laktasiya üzrə balaların alınması davam etdirilir. Həmçinin 300-ə yaxın dişi damazlıq düyələrdən növbəti il balalar alınacaq ki, onlar da sürü üzrə sağmal inək sayının artmasını təmin edəcək.

Hazırda təsərrüfatın istehsal imkanlarının daha da genişləndirilməsi üzərində işlər davam etdirilir. Kompleksdə saxlanılan heyvan sayını artırmaq üçün ilk öncə yem bazasının da buna adekvat şəkildə artırılması tələb olunur ki, artıq bu istiqamətdə işlər uğurla həyata keçirilib. Növbəti dövr üçün hədəf təsərrüfatda əldə edilmiş cins damazlıq düyələrin, eyni zamanda, intensiv seleksiya işi sayəsində heyvandarlıq kompleksindəki ümumi heyvan sayını artırmaqdır. Həmçinin ət istehsalını artırmaq üçün 1000 başlıq yeni kökəltmə fermasının tikintisinə başlanılması üzrə işlər davam etdirilir.

“Yalama Aqroparkı”nda istehsal sahələri üzrə innovativ yanaşma və müasir texnologiyadan istifadə edildiyindən istehsal sahələri üzrə də yüksək məhsuldarlıq səviyyəsinə nail olunub. Keçən əkin ilində dənlik qarğıdalı əkinində hər hektardan 15,6 ton məhsul yığılıb ki, bu da ölkə üzrə indiyə qədər əldə edilmiş ən yüksək məhsuldarlıq göstəricisidir. Son təsərrüfat ilində müəssisədə 400 hektar sahədə arpa əkini, 128 hektar sahədə yonca, 170 hektar sahədə dən qarğıdalı, 300 hektar sahədə silosluq qarğıdalı əkini və 50 hektar sahədə soya əkini aparılıb. Ümumilikdə son 1 ildə 895 ton dən arpa və 1846 ton arpa senajı, 2 min 600 ton yonca senajı və 900 min ton quru yonca otu, 1560 ton dən qarğıdalı və 4325 ton silosluq qarğıdalı istehsal edilib. Hazırda 200 hektar silosluq qarğıdalı sahəsində məhsul yığımı davam edir. Heyvandarlıq sahəsi üzrə gündəlik istehsal həcmi hazırda 13 tona bərabərdir.

“Yalama Aqroparkı”nda nəzərdə tutulan yeni layihələr böyük perspektiv vəd edir

“Yalama Aqroparkı”nda perspektivdə müəssisənin istehsal imkanlarının artırılmasına hesablanan yeni layihələrin icrası diqqət mərkəzində saxlanılır. Aqroparkın ərazisində yeni meyvə bağlarının salınması buna misaldır. Layihə üzrə müasir suvarma sistemləri olan dairəvi pivotların arasında suvarılmayan sahələrin intensiv bağçılıq üçün istifadəsi nəzərdə tutulub. Hazırda Yalama ərazisində qurulmuş müasir suvarma sistemləri üzrə intensiv meyvə bağlarının salınması üçün planlaşdırılan sahə 60 hektarı əhatə edir. Müqtədir ərazisində isə müasir suvarma sistemlərinin yaradılması üzrə işlər aparıldığından həmin ərazidə salınacaq meyvə bağlarının sahəsi tam müəyyənləşdirilməyib. Bu ərazidə pivot tipli suvarma sistemləri və ya yeraltı damcı suvarma sistemlərinin tətbiqi ilə bağlı məsləhətləşmələr aparılır. Suvarma sistemlərinin qurulması üzrə işlər yekunlaşdıqca meyvə bağlarının salınması işlərinə start veriləcək. İlkin olaraq region üçün xarakterik olan şaftalı, gilas və gavalı tinglərinin əkini planlaşdırılır.

Hazırda ölkə başçısının tapşırığı əsasında “Yalama Aqroparkı”nın istifadəsinə verilən 956 hektar əkin sahəsində müasir suvarma sisteminə malik bitkiçilik təsərrüfatının qurulması işləri icra edilir. Daxili drenaj və kollektor sistemləri təmizlənib, ərazi daxili suvarma kanalları bərpa edilib. Həmçinin əkinlərin daimi suvarma suyu ilə təmini üçün Su və Meliorasiya Təsərrüfatı İdarəsi ilə əraziyə daimi su mənbəyi olan “Xanarx” və digər suvarma kanallarından beton kanalların çəkilişi üzrə layihələndirmə işləri aparılır. Əraziyə 2 müxtəlif suvarma mənbəyindən 10 km-ə yaxın beton suvarma kanalının çəkilməsi və 2 ədəd tutumu 50 min kubmetr olan su hovuzunun tikilməsi nəzərdə tutulub. Müasir suvarma sistemlərinin qurulması üçün Valley, Reinke və Lindsay kimi dünyaca məşhur şirkətlər ilə danışıqlar aparılır.

Eyni zamanda, aqroparkda heyvandarlıq kompleksinin tutumunu 1300 baş sağmal inəyə çatdırmaq və Müqtədir ərazisində 1000 başlıq ətlik heyvandarlıq kompleksinin tikintisi üzrə layihələndirmə işləri icra edilir. Heyvandarlığın artan yem tələbatını təmin etmək üçün tutumu 6 min 500 kubmetr olacaq taxıl anbarı və gücü 25 ton olan yeni qurutma sisteminin qurulması üzrə işlər davam etdirilir.

Aqroparkda yüksəkkeyfiyyətli süd istehsalı ölkəmizin süd məhsullarına olan tələbatının ödənilməsində əhəmiyyətli rol oynayır. Aqropark yaxın gələcəkdə süd emalı zavodunun işə salınması ilə süd emalı məhsulları üzrə, həmçinin kərə yağı üzrə artan tələbatın ödənilməsinə öz töhfəsini verəcək.

“Şəmkir Aqroparkı”nın yaradılmasına 22,7 milyon manat güzəştli kredit ayrılıb

Qərb bölgəsində yaradılan “Şəmkir Aqroparkı”nın da istehsal imkanları kifayət qədər genişdir. Ümumi dəyəri 100 milyon manatdan çox olan “Şəmkir Aqroparkı”nda həyata keçirilən layihələrə İqtisadiyyat Nazirliyinin Sahibkarlığa Kömək Milli Fondu tərəfindən 22,7 milyon manat dövlətin güzəştli krediti verilib. Aqroparkın kommunikasiya təminatı üçün dövlət dəstəyi ilə 25 meqavat gücündə elektrik stansiyası tikilib, saatda buraxılış gücü 18 min kubmetr olan 9 kilometr uzunluğunda qaz xətti, 48 portluq 22 kilometr fibrooptik rabitə xətti çəkilib. Hazırda 11 kilometr uzunluğunda dəmir yolu xəttinin inşası da layihələndirilir.

Aqroparkın “Ceyrançöl” massivi ərazisində yerləşən hissəsində kənd təsərrüfatının inkişafına xidmət edəcək 8 min hektar torpaq sahəsinin əkin dövriyyəsinə daxil edilməsi, Kür çayından əraziyə 2 istiqamətdə 730 millimetr diametrli dəmir borularla 27,5 kilometr və qismən kiçik diametrli borularla 15,6 kilometr təsərrüfatdaxili su xətlərinin çəkilməsi təmin edilib. Ərazidə lazımi infrastrukturun yaradılması üçün Prezident İlham Əliyevin 2017-ci il 13 yanvar tarixli və Azərbaycan Respublikası Nazirlər Kabinetinin 2016-cı il 10 oktyabr tarixli sərəncamlarına əsasən dövlət büdcəsindən 3 milyon 200 min manat vəsait ayrılıb. Aqropark üçün “New Holland” markalı 10 müasir traktor, 45 adda müxtəlif kənd təsərrüfatı maşın və qoşqu avadanlığı lizinq yolu ilə alınıb, ümumi tutumu 15 milyon kubmetr olan 3 sututar inşa edilib, sahəsi 2016 kvadratmetrə çatan anbar yaradılıb. Ərazidə böyük gücə malik elektrik yarımstansiyası və 6 transformator quraşdırılıb, ümumilikdə 35 kilometr uzunluğunda elektrik xətti çəkilib. İki üzən ponton üzərində 3 yeni motor və su nasosu, həmçinin 1000 hektar torpaq sahəsində ABŞ-ın “Lindsay” şirkətindən alınmış müxtəlif radiuslu 14 müasir pivot suvarma aqreqatı və avadanlığı quraşdırılıb. Bütün bunlar məhsuldarlığa müsbət təsir göstərib. Nəticədə pivotaltı sahələrə ötən il şəkər çuğunduru əkilərək 14 min ton məhsul yığılıb və İmişli şəkər zavoduna təhvil verilib. Cari ildə həmin pivotaltı sahəyə qarğıdalı bitkisi əkilib.

“Ceyrançöl”də 35 nəfər daimi, 200 nəfər mövsümi işlə təmin olunub. Burada sahəsi 260 kvadratmetr olan 9 otaqdan ibarət ikimərtəbəli ofis binası tikilib. Ərzaq təhlükəsizliyinin təmin edilməsinə töhfə vermək məqsədilə aqroparkda mövcud 1000 hektar pivotaltı sahənin genişləndirilərək əlavə 2017-ci ildə 2000 hektar, 2018-ci ildə 1600 hektar olmaqla, ümumilikdə 4600 hektara çatdırılması planlaşdırılır. Bu ilin payızında 3 min hektar pivotaltı sahəyə taxıl əkilməsi və 15 min ton məhsul istehsalı, 2018-ci ildə isə 3 min hektarda qarğıdalı əkilməsi və 30 min ton məhsul götürülməsi nəzərdə tutulur. İntensiv bağçılığın yaradılması məqsədilə isə 2400 hektarda damcılı suvarma sistemlərinin quraşdırılması layihələndirilib. Nəticədə gələcəkdə 36 min ton məhsul istehsalı gözlənilir. Pivotaltı sahəyə qarşıdakı illərdə növbəli əkin prinsipinə uyğun olaraq soya, kartof, soğan və digər bitkilər də əkiləcək. Sözügedən məhsulların saxlanılması üçün 30 min tonluq taxıl anbarı kompleksinin qurulması, 10 min tonluq kartof saxlama-soyuducu kameranın yaradılması nəzərdə tutulur. Səkkiz min hektar torpaq sahəsini əhatə edəcək aqrotexniki qulluq prosesini vaxtında yerinə yetirmək məqsədilə aqroservis bazasının genişləndirilməsi üçün ABŞ-ın “John Deere” şirkətinin istehsalı olan 30 adda müasir kənd təsərrüfatı texnika və avadanlığının alınması da planlaşdırılır. Nəticədə 5 min daimi, 1500 mövsümü iş yeri yaradılacaq. “Ceyrançöl”də salınacaq bağçılıq təsərrüfatının məhsulları “Şəmkir Aqroparkı”nın Logistika Mərkəzində emal ediləcək, həmin məhsulların satışı və ixracı məhz buradan təmin olunacaq.

Aqroparkın Könüllü kəndi ərazisində yerləşən hissəsinin ümumi ərazisi 604 hektardır. Bu ərazinin 100 hektarı sənaye sahəsi, 200 hektarı istixanalar, 274 hektarı intensiv bağçılıq, 25 hektarı tingçilik, 5 hektarı şitilçilik üçün nəzərdə tutulub.

Aqroparkın yaradılması ölkənin ixrac həcminin artırılmasında və coğrafiyasının genişləndirilməsində, milli brendlərin yaradılmasında, kiçik və orta fermerlərin innovativ qabiliyyətinin artırılmasında, intensiv metodların geniş tətbiqində, kənd təsərrüfatı sahəsində əlaqələndirilən vahid sistemin, eləcə də istehsalçı, emalçı və istehlakçı arasında inteqrasiya münasibətlərinin formalaşmasında, yüksək məhsuldarlığın əldə olunmasında, aqrar sahədə ixtisaslı kadrların hazırlanmasında və yeni iş yerlərinin yaradılmasında əhəmiyyətli rol oynayacaq.

“Şəmkir Aqroparkı”nın Loqistika Mərkəzində ən müasir avadanlıqlar quraşdırılıb

“Şəmkir Aqroparkı”nın genişləndirilməsi istiqamətində işlər davam etdirilir. Cari ilin avqust ayında aqroparkın mühüm seqmenti olan Loqistika Mərkəzi Prezident İlham Əliyevin iştirakı ilə istifadəyə verilib.

Logistika Mərkəzinin ərazisi 12,3 hektar, uzunluğu 254, eni isə 141 metrdir. İstehsal sahəsi 3,9 hektar ərazini əhatə edir. Burada Fransanın tanınmış şirkətlərindən birinin meyvələri ölçüsünə, rənginə, zədəliyinə görə çeşidləyən və qablaşdıran avadanlıqları quraşdırılıb. İri ölçülü meyvələri çeşidləyən avadanlıqların gücü saatda 50 ton, kiçik ölçülü meyvələri çeşidləyən avadanlıqların gücü isə saatda 2 tondur. İstehsal sahəsində, eyni zamanda, 200 ton məhsul qəbul edə biləcək 2 terminal, 120 ton hazır məhsulu yola sala bilən 1 terminal mövcuddur. “Şəmkir Aqroparkı”nın Logistika Mərkəzində müasir avadanlıqlarla təchiz edilmiş laboratoriya fəaliyyət göstərir. Burada meyvə və tərəvəzlərin keyfiyyəti, toksikliyi, bakterioloji və mikrobioloji göstəriciləri üzrə analizlər aparılır. Logistika Mərkəzində meyvə və tərəvəzlərin çeşidlənməsi, qablaşdırılması və soyuducu kameralarda saxlanılması müasir standartlara uyğun olmaqla mühüm texnoloji proseslərdən keçirilərək aparılır. Bu zaman laboratoriya təhlilləri nəzərə alınır, sonra məhsul xüsusi hidroşoklama qurğusundan keçirilir. Nəticədə məhsulun çeşidlənməsi və qablaşdırılması zamanı, həmçinin soyuducu kamerada temperatur fərqində zədə alması minimuma endirilir.

Mərkəzdə regionda yetişdirilən xurmanın alıcılıq qabiliyyətini aşağı salan xüsusi dadın aradan qaldırılmasını təmin edən və gücü sutkada 1 ton olan “determing room” qurğusu da var. Mərkəzdə, eyni zamanda, İtaliyanın aparıcı şirkətlərindən birinin tutumu 24 min ton olan 71 ULO tipli soyuducu saxlama kamerası quraşdırılıb. Soyuducu depolarda meyvə və tərəvəzin növlərinə görə 25 gündən 270 günə qədər minimum itki və keyfiyyətlə saxlanılması təmin olunur.

Logistika Mərkəzində sahibkarların ixrac əməliyyatları ilə əlaqədar prosedurları sadələşdirmək və sürətləndirmək məqsədilə “bir pəncərə” sistemi qurulub. Burada Dövlət Gömrük Komitəsinin, İqtisadiyyat Nazirliyi İstehlak Mallarının Ekspertizası Mərkəzinin, Kənd Təsərrüfatı Nazirliyi yanında Dövlət Fitosanitar Nəzarət Xidmətinin, “Atabank” kommersiya bankının müvafiq strukturları fəaliyyət göstərəcək.

“Şəmkir Aqroparkı”nın Logistika Mərkəzi tam gücü ilə fəaliyyət göstərəndə burada 274 nəfərin işləməsi nəzərdə tutulur. Hazırda mərkəzdə 179 nəfər çalışır. Orta aylıq əməkhaqqı 600 manatdır. Bu ərazidə 2-ci mərhələdə müasir istixana kompleksi, şitilçiklik, tingçilik və intensiv bağçılıq təsərrüfatları, meyvə və tərəvəz emalı zavodları, tara istehsalı fabriki, aqroservis və satış mərkəzləri, avtopark, elmi araşdırma və innovasiyalar mərkəzi, hotel və müxtəlif infrastruktur müəssisələri inşa olunacaq.

Daha bir müasir aqropark Cəlilabadda yaradılır

Qeyd etdiyimiz kimi, aqrar sektorun yeni yanaşmalar əsasında inkişaf etdirilməsi, o cümlədən də aqroparkların yaradılması bütün ölkə boyu həyata keçirilir. Belə müasir aqroparklardan biri də Cəlilabadda yaradılır. Prezident İlham Əliyev bir qədər bundan əvvəl Cəlilabad rayonuna səfəri çərçivəsində burada “Günəşli-Aqro” Məhdud Məsuliyyətli Cəmiyyətin aqroparkında yaradılan şəraitlə tanış olub.

Cəlilabadın Günəşli kəndində müasir tələblərə cavab verən aqroparkın yaradılması bir neçə vacib məqamı özündə birləşdirir. İlk növbədə, bu cür layihələrin həyata keçirilməsi kənd təsərrüfatının vacib sahələrindən olan heyvandarlığın inkişafına təkan verir, bu sahədə elmi yeniliklərin tətbiqinə şərait yaradır. Bundan başqa, belə aqroparklar ərzaq təhlükəsizliyinin təmin edilməsi, ölkəmizdə mal-qaranın cins tərkibinin yaxşılaşdırılması baxımından da böyük əhəmiyyətə malikdir. Ən əsası isə, bu cür müəssisələrin fəaliyyətə başlaması rayonun iqtisadi imkanlarını artırmaqla yeni iş yerlərinin yaranmasına səbəb olur. Belə müəssisələrin fəaliyyətə başlaması həm də regionların özünü maliyyələşdirməsi, mövcud iqtisadi potensialdan daha səmərəli istifadə, idxalı əvəzləyən və ixracyönümlü istehsal, emal və infrastruktur müəssisələrinin yaradılması istiqamətində Prezident İlham Əliyevin rəhbərliyi ilə görülən işlərin tərkib hissəsi kimi xarakterizə edilir.

Aqroparkın sahəsi 1600 hektardır. Onun 1200 hektarında müasir suvarma - pivot sistemləri quraşdırılıb. Ümumi dəyəri 12,7 milyon manat olan bu sistemin qurulmasına İqtisadiyyat Nazirliyinin Sahibkarlığa Kömək Milli Fondu tərəfindən 4 milyon manat güzəştli kredit verilib. Aqroparkın torpaqlarının 563 hektarında arpa, 530 hektarında şəkər çuğunduru, 219 hektarında buğda, 160 hektarında pambıq, 68 hektarında qarğıdalı, 60 hektarında isə yonca əkilib. Əkilmiş sahələrdən 1745 ton arpa, 610 ton buğda, 1278 ton qarğıdalı, 20 min ədəd yonca və 30 min ədəd saman bağlaması götürülüb. 2018-ci ildə 173 hektarda pambıq, 240 hektarda buğda, 507 hektarda arpa, 80 hektarda qarğıdalı, 530 hektarda şəkər çuğunduru və 70 hektarda yonca əkilməsi nəzərdə tutulur.

Perspektivdə ölkə ərazisində yeni aqroparkların yaradılması güclü şəkildə təşviq edilir

Perspektivdə Azərbaycanın bölgələrində aqroparkların sayı daha da artacaq. Hazırda ölkə ərazisində 26 rayon üzrə 157,8 min hektar ərazidə 37 aqroparkın yaradılması təşviq olunur. Bundan 23-ü iri bitkiçilik təsərrüfatı, 14-ü isə heyvandarlıq kompleksidir. Bu aqroparklarda 10 min yeni iş yerinin açılması nəzərdə tutulur. On aqropark üzrə dəyəri 390 milyon manat olan 13 layihəyə investisiya təşviqi sənədi verilib. Hazırda Hacıqabul, Goranboy, Samux, Ağcabədi, Qax, Salyan, Kürdəmir, Şamaxı, Saatlı, Cəlilabad, Füzuli və İsmayıllı rayonlarında 58 min hektar ərazidə 12 aqroparkın yaradılmasına başlanılıb. Aqroparklar tam fəaliyyətə başladıqdan sonra il ərzində təxminən 500 milyon manat dəyərində kənd təsərrüfatı məhsulları istehsal olunacaq.

Mübariz ABDULLAYEV

Yeni Azərbaycan.- 2017.- 4 oktyabr.- S.7.