Müasir tələblərə cavab verən yol-nəqliyyat infrastrukturunun yaradılması istiqamətində görülən işlər ardıcıl xarakter daşıyır

Yol-nəqliyyat infrastrukturunun yenilənməsi sahəsində həyata keçirilən tədbirlər ölkəmizin regionlarını da əhatə edir

Azərbaycanda həyata keçirilən çoxşaxəli iqtisadi islahatlar davamlı tərəqqini təmin etməklə yanaşı, yeni inkişaf perspektivləri yaradıb. Hazırda ölkəmizdə dinamik inkişafın davamlı xarakter daşımasını təmin edən ən mühüm amillərdən biri müxtəlif sahələri əhatə edən layihələrin, proqramların uğurla həyata keçirilməsidir. Bu, qarşıya qoyulan məqsədlərə çatmağa imkan verməklə yanaşı, yeni inkişaf hədəflərinin müəyyənləşdirilməsinə də etibarlı zəmin yaradıb.

Ölkəmizdə müxtəlif sahələri əhatə edən layihələrin müvəffəqiyyətlə icra olunmasından bəhs edərkən infrastruktur quruculuğu istiqamətində görülən işləri də xüsusi vurğulamaq gərəkdir. Bu sahədə həyata keçirilən davamlı tədbirlər mükəmməl infrastruktur təminatının yaradılmasına imkan verir. Eyni zamanda, bu istiqamətdə görülən işlər yol-nəqliyyat infrastrukturunun yenilənməsi sahəsində də mühüm nəticələrin əldə olunmasını şərtləndirib.

O da qeyd edilməlidir ki, yol-nəqliyyat infrastrukturunun yenilənməsi sahəsində görülən işlər paytaxt Bakı ilə yanaşı, ölkəmizin regionlarını da əhatə edir. Regionların sosial-iqtisadi inkişafı ilə bağlı qəbul edilən Dövlət proqramları çərçivəsində respublikanın bütün bölgələrində yeni yollar çəkilib və ya yenidən qurulub, çoxlu sayda körpülər, yol qovşaqları tikilib, bir sözlə, infrastruktur daha da yaxşılaşdırılıb. Hazırda da bölgələrdə yol-nəqliyyat infrastrukturunun yenilənməsi istiqamətində işlər davam etdirilir.

Eyni zamanda, Prezident İlham Əliyev tərəfindən qarşıya növbəti illər ərzində Azərbaycan Respublikasında bütün kənd yollarının təmirinə nail olmaqla bağlı ciddi vəzifə qoyulub. Məhz bu vəzifədən irəli gələrək yerli əhəmiyyətli və kənd yollarının müasir tələblər səviyyəsində yenidən qurulması istiqamətində görülən işlər daha da intensiv xarakter alıb. Yeri gəlmişkən, oktyabrın 9-da Azərbaycan Respublikasının Prezidenti İlham Əliyevin Sədrliyi ilə keçirilən Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında da bu məsələlər diqqət mərkəzində olub. Həmin iclasdakı nitqində Prezident İlham Əliyev diqqətə çatdırıb ki, ilin əvvəlində nəzərdə tutulmuş layihələrin hamısı, təbii ki, icra ediləcək: “Bundan əlavə, il ərzində mənim bölgələrə səfərlərim çərçivəsində və yerlərdən gələn təkliflər nəticəsində yeni yol layihələri də icra edilməyə başlanılmışdır. Bunlar daha çox kənd yollarıdır və eyni zamanda, şəhərlərarası yollardır”.

Sadalananlarla yanaşı, onu da vurğulamaq yerinə düşər ki, bəhs edilən sahəni daim diqqətdə saxlayan Prezident İlham Əliyev respublika rayonlarını əhatə edən avtomobil yollarının tikintisi, yenidən qurulması ilə bağlı bir sıra yeni sərəncamlar imzalayıb. Məsələn, Azərbaycan Prezidenti İlham Əliyev “Neftçala rayonunun Şorkənd-Beştalı-Bankə-Şirvanlı avtomobil yolunun tikintisi ilə bağlı əlavə tədbirlər haqqında” Sərəncam imzalayıb. Sərəncama əsasən, otuz yeddi min nəfər əhalinin yaşadığı 21 yaşayış məntəqəsini birləşdirən Şorkənd-Beştalı-Bankə-Şirvanlı avtomobil yolunun tikintisinin başa çatdırılması məqsədilə Azərbaycan Respublikasının 2017-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 21,5 milyon manatı “Azəravtoyol” Açıq Səhmdar Cəmiyyətinə ayrılıb.

Prezident İlham Əliyevin imzaladığı “Salyan rayonunun Qaraçala-Düzənlik-Peyk-Birinci Varlı avtomobil yolunun tikintisi ilə bağlı tədbirlər haqqında” Sərəncama əsasən, səkkiz min nəfər əhalinin yaşadığı 4 yaşayış məntəqəsini birləşdirən Qaraçala-Düzənlik-Peyk-Birinci Varlı avtomobil yolunun tikintisi məqsədi ilə Azərbaycan Respublikasının 2017-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 3,5 milyon manatı “Azəravtoyol” Açıq Səhmdar Cəmiyyətinə ayrılıb.

Prezident İlham Əliyevin imzaladığı Şamaxı rayonunun Dəmirçi kəndini İsmayıllı rayonunun Lahıc qəsəbəsi ilə birləşdirən Dəmirçi-Lahıc avtomobil yolunun tikintisi ilə bağlı tədbirlər haqqında Sərəncama əsasən isə, Şamaxı rayonunun Dəmirçi kəndini İsmayıllı rayonunun Lahıc qəsəbəsi ilə birləşdirən, ümumi uzunluğu 22 kilometr olan Dəmirçi-Lahıc avtomobil yolunun tikintisi məqsədilə 2017-ci il dövlət büdcəsində nəzərdə tutulmuş Prezidentin ehtiyat fondundan “Azəravtoyol” Açıq Səhmdar Cəmiyyətinə ilkin olaraq 3 milyon manat ayrılıb.

Bundan başqa, Prezident İlham Əliyev oktyabrın 6-da “Göyçay rayonunun Bığır-Cırqurd-Şəkər-Veysəlli-Alıkənd-Mırtı avtomobil yolunun tikintisi ilə bağlı tədbirlər haqqında” da Sərəncam imzalayıb. Sözügedən Sərəncama əsasən, on bir min nəfər əhalinin yaşadığı 6 yaşayış məntəqəsini birləşdirən Bığır-Cırqurd-Şəkər-Veysəlli-Alıkənd-Mırtı avtomobil yolunun tikintisi məqsədilə 2017-ci il dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 6,4 milyon manatı “Azəravtoyol” Açıq Səhmdar Cəmiyyətinə ayrılıb.

Beləliklə, regionların sosial-iqtisadi inkişafına dair Dövlət Proqramı çərçivəsində avtomobil yollarında yenidənqurma işləri cari ilin ötən müddəti ərzində ardıcıl olaraq həyata keçirilib və hazırda da davam edir. Yeri gəlmişkən, verilən məlumatlara əsasən, Quba rayonu II Nügədi-Rustov avtomobil yolunun əsaslı təmirinə başlanılıb. Belə ki, II Nügədi-Rustov avtomobil yolunun uzunluğu 8 kilometr, hərəkət hissəsinin eni isə 7 metr təşkil edir. Təmir-tikinti işləri çərçivəsində yolboyu zəruri olan yerlərdə yol yatağının yararsız qruntu qazılaraq çıxarılır, əvəzinə yararlı material tökülərək kipləşdirmə işləri aparılır. Yolun hərəkət hissəsi hazır olan yerlərə yeni ikiqat asfalt-beton örtüyünün döşənməsi işləri də görülür. Ümumilikdə isə, yolun 50 min kvadratmetrdən çox sahəsinin asfaltlanması nəzərdə tutulub. Həmçinin Rustov kəndinin girişində, Caqacuq çayı üzərində yerləşən və 110 metr uzunluğa malik avtomobil körpüsünün də əsaslı şəkildə təmiri nəzərdə tutulub. Təmir işləri zamanı körpüyə beton məhəccərlər quraşdırılacaq, körpüdə əlavə bərkitmə işləri görüləcək və üstü asfaltlanacaq. Bütün işlər texnoloji ardıcıllığa riayət edilməklə həyata keçirilir və qısa müddət ərzində yekunlaşdırılması üçün əraziyə lazımi sayda qüvvə cəlb olunub. Təmir-tikinti işləri yekunlaşdıqdan sonra zəruri olan yerlərdə yol nişanları və məlumatverici lövhələr quraşdırılacaq, yolun üfüqi nişanlanması xətləri çəkiləcək. Sözügedən avtomobil yolunun əsaslı şəkildə təmiri ilə 5 yaşayış məntəqəsinin (II Nügədi, Püstəqasım, Dəhnə, Güneyməhlə və Rustov kəndləri) 12 min əhalisinin gediş-gəlişi xeyli rahatlaşacaq, yük və sərnişindaşıması asanlaşacaq.

Şərur rayonunda isə son 8 ayda yolların təmiri istiqamətində, ümumilikdə, 1 milyon 223 min 853 manatlıq iş görülüb. Qarxun-Yuxarı Aralıq-Aşağı Aralıq yolu yenidən qurulub, Aralıq və Siyaqut kəndlərini birləşdirən körpünün əsaslı təmiri başa çatdırılıb, Dərvişlər, Arpaçay, Çəmənli və Babəki kəndlərini birləşdirən 9,7 kilometrlik avtomobil yolu genişləndirilib, asfalt örtük salınıb. Həmin ərazidə kənddaxili yollar yenidən qurulub. Rayonun Ələkli kəndini əhatə edən 3,7 kilometrlik yol genişləndirilib, yol yatağı bərkidilib, qalın asfalt örtük döşənib. Rayonda yolların cari təmiri də diqqət mərkəzində saxlanılır. Belə ki, ilin əvvəlindən indiyədək Şərur şəhərində, Yengicə, Zeyvə, Düdəngə, Sərxanlı, Məmmədsabir, Kosacan, Qarxun kəndlərində bu istiqamətdə xeyli iş görülüb. Payız-qış mövsümünə hazırlıq çərçivəsində qış mövsümündə hərəkətin intensivliyini təmin etmək üçün kompleks tədbirlər həyata keçirilir, texnikalar saz vəziyyətə gətirilir, fəhlə və mexanizatorlar mövsümlə əlaqədar olaraq iş paltarları ilə təmin edilirlər. Qışda ucqar dağ və sərhəd kəndlərinə gedən avtomobil yollarının qardan təmizlənməsində operativliyin təşkili məqsədilə texnikalar lazımi ehtiyat hissələri ilə təchiz olunub. Axura-Havuş yolunda hərəkətin fasiləsizliyini təmin etmək üçün lazımi tədbirlər görülüb, xüsusi texnika ayrılıb. Rayonda yol təsərrüfatının yenidən qurulmasında əsas amil sayılan keyfiyyətli asfalt istehsalı üçün də möhkəm zəmin yaradılıb. Ələkli kəndinin ərazisində quraşdırılmış və gündəlik istehsal gücü 60 ton olan qum-çınqıl və asfalt istehsal edən müasir zavod təmir və bərpa işləri zamanı işi xeyli yüngülləşdirir. Zavod həm də Sədərək və Kəngərli rayonlarının bu istiqamətdə tələbatını ödəyir. Hazırda 10 kilometrlik Vərməziyar-İbadulla-Ərəbyengicə-Qarahəsənli avtomobil yolunda əsaslı təmir işləri davam etdirilir.

Bunlarla yanaşı, Azərbaycan müasir infrastruktur yaratmaqla nəqliyyat xidmətlərini inkişaf etdirir, daşımaların idarə olunması mexanizmini təkmilləşdirir və beynəlxalq nəqliyyat sisteminə inteqrasiyanı genişləndirir. Bəllidir ki, ölkəmiz avtomobil yolları ilə beynəlxalq yükdaşımaların həyata keçirildiyi mühüm coğrafi mövqedə yerləşir. Avropadan Asiyaya Azərbaycan ərazisindən keçən tranzit avtomobil yolları üzrə daşımaların həyata keçirildiyi marşrutlar üzrə yerləşən magistral yolların yenidən qurulması uğurla davam etdirilir. Şimal-Cənub dəhlizi üzrə Gəndob qəsəbəsindən Rusiya Federasiyası ilə dövlət sərhədinədək olan 69 kilometr hissənin, həmçinin uzunluğu 204 kilometr təşkil edən Ələt-Astara-İran İslam Respublikası ilə dövlət sərhədi avtomobil yolunun dörd hərəkət zolaqlı olmaqla tikintisi 2018-ci ildə, Şərq-Qərb istiqamətində İpək Yolunun Gəncə şəhərindən keçməklə Gürcüstan ilə dövlət sərhədinədək qalan 130 kilometrlik hissəsinin dörd hərəkət zolaqlı olmaqla 2020-ci ilədək və Bakı-Şamaxı-Yevlax magistral avtomobil yolunun 101 kilometr hissəsinin iki hərəkət zolağı əlavə edilməklə yenidən qurulması işlərinin isə cari ilin sonunadək başa çatdırılması nəzərdə tutulub.

Nurlan QƏLƏNDƏRLİ.

Yeni Azərbaycan.- 2017.- 13 oktyabr.- S.7.