Regionlarda ixracyönümlü məhsul istehsalının artırılması diqqət mərkəzində saxlanılır

2017-ci ilin səkkiz ayında Azərbaycanın qeyri-neft məhsullarının ixracı üçdəbir həcmdə artaraq 965 milyon ABŞ dollarına çatıb

Azərbaycanın hərtərəfli inkişaf strategiyasında regionların ixrac imkanlarından daha səmərəli şəkildə istifadə edilməsi də qarşıya qoyulan hədəflər sırasında yer alır. Ölkəmizin bölgələrin ixrac imkanlarının genişləndirilməsini strateji hədəflərdən biri kimi müəyyənləşdirməsi isə heç də təsadüfi deyil. Məlumdur ki, Azərbaycanın regionlarında qeyri-neft sektoru, xüsusilə aqrar sektor üzrə yüksək rəqabət qabiliyyətinə malik məhsullar yetişdirmək imkanları kifayət qədər genişdir. Əlverişli coğrafi-iqlim xüsusiyyətləri, münbit torpaqlar, əmək ehtiyatları, tarixdən gələn zəngin ənənələr respublikanın bölgələrində ixracqabiliyyətli məhsul istehsalının artırılması üçün geniş perspektivlər yaradır. Azərbaycana üstünlük qazandıran həm də o amildir ki, ölkəmiz bir sıra geniş istehlak bazarları ilə əhatə olunub. Bu bazarlarda Azərbaycanın bölgələrində yetişdirilən keyfiyyətli məhsulları yaxşı tanıyır və yüksək qiymətləndirirlər.

Səmərəli təşviq mexanizmi ölkədə ixracyönümlü məhsul istehsalına böyük maraq yaradıb

“Milli iqtisadiyyat və iqtisadiyyatın əsas sektorları üzrə strateji yol xəritələri”ndə də qeyd edildiyi kimi, Azərbaycanın adambaşına düşən ixrac həcminin 2025-ci ilə qədər 450 ABŞ dollarına çatdırılması planlaşdırılır. Bu isə o deməkdir ki, bəhs olunan dövrün sonunda Azərbaycanın qeyri-neft ixracı 5 milyard ABŞ dollarına çatdırılacaq. Bu, hazırki qeyri-neft ixracı həcmindən təxminən 4-5 dəfə çox artım deməkdir ki, burada aqrar sektorun da xüsusi payı var.

Rəqəmlərdən də göründüyü kimi, Azərbaycanın ixracın genişləndirilməsi ilə bağlı müəyyənləşdirdiyi hədəf kifayət qədər böyükdür. Qarşıya qoyulan məqsədlərə çatmaq üçün ölkəmizdə ixracın genişləndirilməsinə hər cür dəstək göstərilir. O cümlədən ixracın səmərəli təşviqi mexanizminin işə salınması bütün ölkə boyu ixracyönümlü məhsul istehsalına marağı əhəmiyyətli dərəcədə artırıb.

Məlumdur ki, dünyanın əksər inkişaf etmiş ölkələrində ixrac bir sıra səmərəli vasitələrlə dəstəklənir və təşviq edilir. Müasirləşməni strateji hədəf seçən Azərbaycan da məhz qabaqcıl ölkələrin təcrübəsindən bəhrələnməyə çalışır. Ötən il ölkəmizdə ixracın səmərəli təşviqi mexanizmi işə salınıb. Prezident İlham Əliyevin ixracın təşviqinin stimullaşdırılması ilə bağlı imzaladığı müvafiq sənədlərə uyğun olaraq “İxrac təşviqinin ödənilməsi qaydası”, “İxrac təşviqi şamil olunacaq məhsulların siyahısı” və “İxrac təşviqi üzrə tətbiq olunacaq əmsallar” təsdiq olunub. İxrac təşviqi şamil olunan malların siyahısına bal, xurma, nar, qovrulmuş fındıq kimi kənd təsərrüfatı məhsulları, qurudulmuş meyvələr, konservləşdirilmiş meyvə-tərəvəz, mürəbbə və cemlər, turşular, spirtli içkilər və şərab, mineral sular və şirələr, unlu qənnadı məmulatları, habelə dəri məmulatları, ipək parçalar və xalçalar kimi digər məhsullar daxil edilib. Həmin məhsulların növündən asılı olaraq sahibkarlara ixrac etdikləri qeyri-neft məhsullarının gömrük dəyərinin 3-6 faizi həcmində təşviq vəsaiti ödənilir.

Azərbaycanda indiyədək dünyada özünü doğruldan səmərəli təşviq mexanizminin işə salınması həm ixracatçılara böyük dəstəkdir, həm də bütövlükdə milli maraqlarımıza xidmət edir. Brendlərdən asılı olmayaraq ölkəyə, onun keyfiyyətə nəzarət sistemlərinə inamın yaradılması əldə oluna biləcək ən yaxşı uğurdur. Dövlətin bu məsələyə dəstəyi və qayğısı Azərbaycanda dövlət-özəl, sektor-vətəndaş əməkdaşlığının bariz nümunəsidir. Burada həmçinin sahibkarların məsuliyyəti məsələsi də böyük aktuallıq kəsb edir. Mütəxəssislərin qənaəti belədir ki, “Made in Azerbaijan” brendlərinə yaranacaq etimad istehsal olunan məhsulun keyfiyyətindən, beynəlxalq standartlara cavab verməsindən, müştərilərə göstəriləcək xidmətlərin yüksək səviyyədə olmasından və güclü marketinq fəaliyyətindən çox asılıdır.

Regionlarda yetişdirilən məhsulların ixracı respublikaya böyük həcmdə valyuta gətirir

Son illərdə ölkəmizdə həyata keçirilən məqsədyönlü tədbirlər sayəsində qeyri-neft sektorunda istehsalın genişlənməsi öz növbəsində ölkəmizin ixrac imkanlarının artmasına müsbət təsir göstərib. Ötən 9 ayda Azərbaycanın xarici ticarət dövriyyəsi 7 faiz artıb, ixrac idxalı böyük fərqlə üstələyir. Xarici ticarətin müsbət saldosu 4,4 milyard dollara bərabərdir. İlin sonuna qədər bu rəqəmin daha da artacağı gözlənilir.

Sahibkarlar yuxarıda bəhs olunan ixracın təşviqi mexanizminə böyük maraq göstərərək ondan məmnuniyyətlə faydalanırlar. Bunun nəticəsi olaraq Azərbaycan malları getdikcə daha böyük həcmlərdə xarici bazarlarda təmsil olunur. Ötən 9 ayda respublikamızdan qızıl ixracı 56 faiz, elektrik enerjisi ixracı 4,1 dəfə, alüminium ixracı 28 faiz, kimya sənayesi məhsulları ixracı 25 faiz, plastiklər ixracı 14 faiz, mis-filiz konsentratları ixracı 94 faiz, avadanlıqlar, mexaniki qurğular ixracı 48 faiz, mis və ondan hazırlanan məmulatların ixracı 54 faiz, toxuculuq məmulatlarının ixracı 92 faiz, elektrik avadanlıqları və hissələrinin ixracı 75 faiz, daş, gips, sement ixracı 34 dəfə artıb.

Cari ilin 9 ayında ölkənin xarici ticarət dövriyyəsində müsbət saldonun yaranmasında regionlarda aqrar sektorda yetişdirilən məhsulların ixrac həcmlərinin əhəmiyyətli dərəcədə artması da mühüm rol oynayıb. Bəhs olunan dövrdə respublikamızdan xarici bazarlara tərəvəz ixracı 68 faiz, o cümlədən pomidor ixracı 60 faiz artıb. Ümumiyyətlə, hazırda qeyri-neft sektorunun ən çox gəlir gətirən sahəsi pomidor ixracıdır. Təkcə cari ilin səkkiz ayında pomidor ixracından ölkəyə 128 milyon dollar valyuta daxil olub. Digər məhsulların ixracında da ciddi artımlar müşahidə edilir. O cümlədən kartof ixracı 63 faiz, salat tərəvəzi ixracı 20 faiz, soğan ixracı 15 dəfə artıb, meyvə ixracı 12 faiz, pambıq ixracı 2,4 dəfə, o cümlədən pambıq lifi ixracı 8,4 dəfə, süd məhsullarının ixracı dörd dəfə artıb. Azərbaycanın emal sənayesində buraxılan məhsullara da xarici bazarlarda tələbat artır. Ötən 9 ayda respublikamızdan şərab ixracı 56 faiz, meyvə-tərəvəz emalı məhsullarının ixracı 50 faiz, tütün məmulatlarının ixracı 45 faiz, çay ixracı 63 faiz, bitki və heyvan mənşəli yağların ixracı 19 faiz, şokolad ixracı 65 faiz artıb. Prezident İlham Əliyev Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqində sadalanan rəqəmlərin ən yaxşı göstəricilər olduğunu nəzərə çatdıraraq deyib: “Bu rəqəmlər ən yaxşı göstəricidir. Onlar göstərir ki, qeyri-neft sektorunun inkişafı ilə bağlı bizim bütün vəzifələrimiz uğurla icra edilir. Mən əvvəlki dövrlərdə də qeyd etmişdim ki, bizim əsas prioritetimiz qeyri-neft sektorunun inkişafıdır. Ondan sonrakı dövrlərdə qarşıya daha çox məsələ qoyulur ki, biz qeyri-neft ixracının artımına nail olaq və buna da nail oluruq. Çünki budur bizim inkişaf perspektivlərimiz. Qeyri-neft sektorunun ixracı bizə böyük həcmdə valyuta gətirir”.

Cari ilin əvvəlindən isə ölkəmizdə aqrar sektorda istehsal və ixrac imkanlarının artırılması məqsədilə həyata keçirilən tədbirlər daha geniş miqyas alıb. Dövlət başçısının Sədrliyi ilə regionlarda keçirilən müşavirələrdə pambıqçılıq, baramaçılıq, tütünçülük, fındıqçılıq, çəltikçilik, sitrusçuluq, çayçılıq kimi sahələrin inkişaf perspektivləri hərtərəfli müzakirə edilib. Ayrı-ayrı sahələrin inkişafı ilə bağlı konkret proqramlar qəbul edilib. Bu proqramlar çox konkret xarakter daşıyır. Sənədlərdə nəzərdə tutulan tədbirlərin icra mexanizmləri, maliyyə mənbələri aydın şəkildə göstərilib.

“Made in Azerbaijan” brendinin təşviqi məqsədilə ayrı-ayrı ölkələrə ixrac missiyaları göndərilib

Ölkəmizin ixrac imkanlarının genişləndirilməsi baxımından “Made in Azerbaijan” brendinin yaradılması da böyük əhəmiyyət daşıyır. Prezident İlham Əliyevin imzaladığı müvafiq Fərmanla təsdiqlənən Qayda xarici ölkələrə ixrac missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı xarici ölkələrdə sertifikat və patent almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsinin vəsaiti hesabına ödənilən hissəsini və ödənilmə mexanizmini müəyyən edir. Dövlət başçısının Fərmanı ilə təsdiqlənən Qaydada müəyyən olunmuş dəstək tədbirlərindən istifadə etmək hüququna isə Azərbaycan mənşəli qeyri-neft məhsullarının ixracatçısı olaraq Azərbaycan Respublikasında vergi ödəyicisi kimi uçota alınmış fiziki və hüquqi şəxslər malikdirlər.

Cari ilin əvvəlindən xarici bazarlarda “Made in Azerbaijan” brendinin təşviqi məqsədilə həyata keçirilən tədbirlərin miqyası genişləndirilib. Ümumiyyətlə, kənd təsərrüfatı və ərzaq məhsulları istehsalçılarının ixrac bazarlarına çıxış imkanlarının genişləndirilməsi üçün geniş əhatəli tədbirlərin görülməsi müvafiq Strateji Yol Xəritəsi çərçivəsində müəyyən edilmiş prioritet istiqamətlərdən biridir. Strateji yol xəritələrinin yarımillik monitorinq və qiymətləndirmə hesabatında bildirildiyi kimi, cari ilin ilk altı ayında “Made in Azerbaijan” brendinin təşviqi məqsədilə ümumilikdə 79 şirkətin iştirakı ilə 5 ölkəyə - Almaniyaya, Əfqanıstana, Pakistana, Qazaxıstana, Qətərə ixrac missiyaları həyata keçirilib.

Bundan başqa, cari ilin birinci yarısında Azərbaycanın regionlarında yetişdirilən və yaxud hazırlanan məhsullarının təbliği məqsədilə “Azərbaycan meyvələri” və “Azərbaycan meyvə şirələri” adlı reklam roliklərinin çəkilişlərinə başlanılıb. Birləşmiş Ərəb Əmirliklərinin Dubay şəhərində keçirilmiş “Gulfood 2017” Beynəlxalq Ərzaq Sərgisində və Almaniya Federativ Respublikasının Düsseldorf şəhərində keçirilmiş “Prowein 2017” Beynəlxalq Şərab Sərgisində yerli şirkətlərin vahid ölkə stendi altında iştirakı təmin edilib, Bolqarıstanın “Avropa 2001” jurnalında “Made in Azerbaijan” reklamı yerləşdirilıb. İxrac sənədlərinin əldə edilməsinə dəstək məqsədilə AZPROMO tərəfindən kənd təsərrüfatı, qida, yüngül və digər sahələrdə fəaliyyət göstərən 100-dən artıq yerli şirkətə dəstək göstərilib və zəruri informasiya verilib.

“ANUGA” Beynəlxalq Ərzaq Sərgisində Azərbaycan məhsullarının ixracına dair müqavilələr imzalanıb

Son vaxtlar Azərbaycanın regionlarında yetişdirilən yüksəkkeyfiyyətli məhsullar xarici ölkələrdə keçirilən sərgilərdə böyük uğurla təmsil olunurlar. Bu baxımdan oktyabrın 7-11-də Almaniyanın Köln şəhərində keçirilmiş “ANUGA” Beynəlxalq Ərzaq Sərgisi də istisna təşkil etməyib. İqtisadiyyat Nazirliyinin mətbuat xidmətinin əməkdaşı Vüsalə Quliyevanın “Yeni Azərbaycan”a verdiyi məlumata əsasən, sərginin qida və içkilər pavilyonlarında Azərbaycan “Made in Azerbaijan” vahid ölkə stendləri ilə təmsil olunub. İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə bu pavilyonlarda Azərbaycan şirkətlərinin meyvə şirələri, müxtəlif növ şərabları və təbii mineral suları, meyvə, fındıq, qənnadı məmulatları, çay, quru meyvə və s. məhsulları nümayiş olunub. Azərbaycan stendində sərgi ziyarətçilərinə ixracatçı şirkətlərimizin keyfiyyətli və rəqabətqabiliyyətli məhsulları, ölkəmizin biznes və investisiya imkanları barədə geniş məlumat verilib.

Sərginin keçirildiyi 5 gün ərzində Azərbaycanın “Made in Azerbaijan” vahid ölkə stendi və burada təqdim edilən 20-dən çox yerli şirkətimizin məhsulları sərgi ziyarətçiləri və xarici şirkətlər tərəfindən maraqla qarşılanıb. İndiyədək xarici ölkələrdə keçirilən digər sərgilərdə olduğu kimi, “ANUGA” sərgisində də Azərbaycanın bir sıra məhsulları, xüsusilə nar və nar şirəsi ziyarətçilərin və şirkətlərin diqqət mərkəzində olub. Sərgi çərçivəsində Azərbaycanın “Azqranata” şirkəti İsrailə 20 ton nar şirəsi ixracına dair müqavilə imzalayıb, Qətərə “+more” markası ilə müxtəlif meyvə şirələrinin ixracına dair ilkin razılıqlar əldə edib. “Mars FK” şirkəti İsveçrə və Monqolustanın satış şirkətləri ilə apardığı danışıqların nəticəsində bu ölkələrə ilkin olaraq 100 ton və 18 ton nar ixracına dair sifarişlər alıb, “Aqro-Azerinvest” MMC isə Almaniyaya “Goldenes Baku” markalı nar şərabının ixracına dair razılıq əldə edib. Bundan başqa, “Sirab” şirkəti Səudiyyə Ərəbistanına mineral suların ixracına dair danışıqlara başlayıb. Xüsusi emal üsulu ilə qurudulmuş xurma istehsal edən “Bal Xurma” şirkəti Argentina, Niderland, İtaliya və Yunanıstanda otellərin qida təchizatı ilə məşğul olan bir sıra şirkətlərlə danışıqlar aparıb və ixraca dair ilkin razılıqlar əldə edib. Azərbaycanın qənnadı məmulatları istehsalçısı olan “Konfiron” MMC isə sərgi çərçivəsində Rumıniyaya ixraca dair danışıqlar aparıb.

Azərbaycanın fındıq istehsalçıları da sərgi çərçivəsində bir sıra müqavilələr imzalayıblar. Belə ki, Azərbaycanın fındıq istehsalçısı “Azərstar” Hollandiya və Danimarkanın satışla və qənnadı məmulatlarının istehsalı ilə məşğul olan şirkətləri ilə iki müqavilə imzalayıb. Müqavilələrə əsasən, “Azərstar” şirkəti oktyabr və dekabr aylarında bu ölkələrin hər birinə ilkin mərhələdə 22 ton fındıq ixrac edəcək. “Azərstar” həmçinin İsveçrəyə 22 ton fındıq ixracına dair danışıqlar aparıb.

“Xan EL” şirkəti 40 ton fındığın İtaliyaya ixracına dair bu ölkənin şokolad istehsalçısı ilə müqavilə imzalayıb. “Aqrovest” MMC Azərbaycan fındığının Hollandiya, Belçika və Lüksemburqa ixracına dair Hollandiya şirkəti ilə danışıqlara başlayıb. Azerbaijan Hazelnut Exporters Consortium (AHEC) isə İtaliyaya 48, Çexiya və Yunanıstanın isə hər birinə 22 ton fındıq ixracına dair ilkin razılıqlar əldə edib.

“ANUGA” Sərgisində “Made in Azerbaijan” brendinin təbliği məqsədilə bir sıra promomateriallardan istifadə edilib. Belə ki, sərginin girişlərində “Made in Azerbaijan”a dair reklam bannerləri yerləşdirilib, ziyarətçilər üçün bələdçi və kataloqlarda “Made in Azerbaijan” reklam olunub.

Qeyd edək ki, “ANUGA” Beynəlxalq Ərzaq Sərgisi Azərbaycanın vahid ölkə stendi ilə təmsil olunduğu sayca 4-cü sərgidir. Bundan əvvəl ölkəmiz “Gulfood 2017”, “Worldfood Moscow” beynəlxalq ərzaq və “Prowein 2017” şərab sərgisində “Made in Azerbaijan” vahid ölkə stendləri ilə təmsil olunub.

Bölgələrdə yaradılan istixanalar Azərbaycanın ixrac imkanlarının genişlənməsində mühüm rol oynayır

Son vaxtlar respublikamızın bölgələrində Prezident İlham Əliyevin tövsiyələrinə uyğun olaraq yaradılan istixanalar Azərbaycanın ixrac imkanlarının genişlənməsində mühüm rol oynayır. Hazırda ayrı-ayrı regionlarda 400 hektardan çox sahədə yeni istixana kompleksləri yaradılır. Yeni yaradılan istixanaların böyük hissəsi ixraca hesablanıb.

Belə istixanalardan biri də Ağsu rayonunun Pirhəsənli bələdiyyəsi ərazisində “Sahil” firması tərəfindən qurulur. Ərazisi 5 hektar olacaq istixana kompleksində son tamamlama işləri aparılır.

Yeni sahibkarlıq təsərrüfatı Türkiyədən dəvət olunan mütəxəssis Emin Karırçı tərəfindən yaradılır. Əsas avadanlıqlar Türkiyənin “Metaş” şirkətindən alınıb və paslanmayan materialdandır.

İstixana təsərrüfatı müasir suvarma sistemi ilə təchiz olunub. Burada ümumilikdə 100 tonluq iki su çəni qurulub. Bu, suvarmanın elektrik enerjisi sərf etmədən aparılmasına imkan verəcək.

Əsasən pomidor və xiyar yetişdiriləcək istixananın yaxın vaxtlarda istifadəyə verilməsi nəzərdə tutulub. Təsərrüfatda 50 nəfər üçün daimi iş yeri açılacaq.

Füzuli rayonunda “LBL Qrup” MMC tərəfindən yaradılan istixana kompleksində istehsal edilən pomidor daxili bazara çıxarılmaqla yanaşı, xaricə də ixrac olunacaq. Kompleksin ümumi ərazisi 16, istixana təsərrüfatının sahəsi isə 2 hektardır. Kompleksdə əsasən yerli istehsal olan müasir avadanlıqlar quraşdırılıb. Suvarma, isitmə, havalandırma sistemləri tam avtomatlaşdırılmış şəkildə idarə olunur. Kompleksin fəaliyyətə başlaması ilə ilkin mərhələdə rayondan olan 40 məcburi köçkün daimi işlə təmin edilib.

Fermer Faiq Məmmədov bildirib ki, yazda becərilən xiyarın yığımı iyulun sonunadək başa çatıb və 280 ton məhsul əldə olunub. Avqust ayında isə həmin yerə pomidor bitkisi əkilib. Becərmə aqrotexniki qaydada həyata keçirilib. Bitkilərin tozlanması üçün xüsusi arı növündən istifadə edilir. Bir həftədən sonra məhsul yığımına başlanılacaq. İstixanadan 200 tondan çox pomidor istehsal edilməsi proqnozlaşdırılır. Məhsul ölkə bazarlarına çıxarılmaqla yanaşı, Rusiyaya da ixrac olunacaq.

Faiq Məmmədov qeyd edib ki, təsərrüfatın genişləndirilməsi istiqamətində işlər davam etdirilir. Belə ki, ərazidə 2 su anbarı tikilib, daha 2 hektar ərazidə istixananın qurulması başa çatıb.

Ölkədən ixracın genişlənməsinə “Azexport” portalı da böyük töhfə verir

Yeni şəraitdə respublikanın ixrac imkanlarının genişləndirilməsinə yönəldilən tədbirlər iki mühüm istiqamətdə reallaşdırılır. Belə ki, bir tərəfdən bütün ölkə boyu ixrac qabiliyyəti yüksək olan məhsulların istehsalı artırılır, digər tərəfdən isə həmin məhsulların mərkəzləşdirilmiş qaydada tədarükü və satış bazarlarına daha asan çıxarılması üçün optimal yollar seçilir.

Yuxarıda deyilənlər baxımından Prezident İlham Əliyevin “Azərbaycan Respublikasında istehsal olunan malların vahid məlumat bazasının yaradılması haqqında” 2016-cı il 21 sentyabr tarixli Sərəncamı əsasında İqtisadi İslahatların Təhlili və Kommunikasiya Mərkəzi tərəfindən yaradılan “Azexport” portalının fəaliyyətə başlaması böyük aktuallıq kəsb edir. 2016-cı il dekabrın 20-də təqdimatı keçirilən portal Azərbaycan mənşəli məhsulların daxili və xarici istehlak bazarlarına çıxış imkanlarını artırmaq məqsədilə yaradılıb. İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib ki, portalın missiyası Azərbaycan mənşəli mallar haqqında məlumatların təqdim edilməsi və onların daxili və xarici bazarlarda satışı üçün əlverişli platforma yaradılmasıdır. Portal dünyanın ən populyar elektron satış şəbəkələri ilə inteqrasiya olunaraq Azərbaycan mallarını dünyaya sərgiləyir. Mütəmadi yenilənən, istifadəyə rahat, əlçatan, təhlükəsiz, sürətli, əlverişli olan “Azexport” vasitəsilə “Made in Azerbaijan” brendi alıcılara yaxınlaşdırılır.

Qısa fəaliyyəti dövründə “Azexport” portalı dünyada 150 min biznes nümayəndəsinin Azərbaycan məhsulları ilə maraqlanmasına nail olub. Cari ilin səkkiz ayında portalın xəttilə 60-dan çox ölkədən 310 milyon ABŞ dollarına yaxın ixrac sifarişi qəbul edilib. Bəhs olunan dövrdə Azərbaycan məhsullarına “Azexport” portalı vasitəsilə 450 minə qədər baxış olub ki, bu da “Made in Azerbaijan” brendinin dünyada daha da məşhurlaşmasına şərait yaradır. Portala daxil olan əsas sifarişlər meyvə-tərəvəz, mebel, içkilər, sənaye məhsulları, bütövlükdə Azərbaycanda istehsal olunan məhsul və xidmətlərdir.

Gələcəkdə “Azexport” portalı ixrac sifarişləri ilə yanaşı, digər ixrac təşviq mexanizmlərini də həyata keçirəcək. Bu barədə İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı məlumat verib. O bildirib ki, “Hazırda “Azexport” portalı ilə dünyanın ən məşhur elektron ticarət portalı olan “Amazon” arasında danışıqlar gedir. Bir sıra məhsullar “Amazon” portalı üzərindən Amerika Birləşmiş Ştatlarındakı anbarlarda yerləşdiriləcək. Beləliklə də, Azərbaycan məhsullarının xüsusilə Qərb yarımkürəsində satış imkanı yaranacaq ki, bu da ixracın gələcəkdə davamlı şəkildə artmasına töhfə verəcək.

Cari ilin səkkiz ayında Azərbaycanın qeyri-neft ixracının 965 milyon ABŞ dolları təşkil etdiyini deyən V.Qasımlı bildirib ki, qeyri-neft məhsullarının ixracı üçdəbir həcmdə artıb. Bu artımda sənaye, eləcə də regionlarda yetişdirilən kənd təsərrüfatı və ərzaq məhsullarının ixracı xüsusi yer tutur.

Mübariz ABDULLAYEV

Yeni Azərbaycan.- 2017.- 18 oktyabr.- S.7.