Ölkəmizin regionlarında sosial infrastruktur obyektlərinin tikintisi davam edir

Azərbaycanda yüzlərlə məktəbin tikilməsi, təhsil müəssisələrinin maddi-texniki bazasının gücləndirilməsi nəhəng təhsil infrastrukturunun formalaşmasına geniş imkanlar açıb

Artıq 15 günə yaxındır ki, ölkəmizdə yeni tədris ili başlanıb. Hər il olduğu kimi bu il də respublikamızın bütün təhsil ocaqlarında, o cümlədən ümumtəhsil məktəblərində yeni dərs ilinə hazırlıq işləri uğurla başa çatıb. Bir çox şəhər və kəndlərdə yeni məktəb binalari tikilib, köhnə binalar təmir olunub, avadanlıqlar yeniləri ilə əvəzlənib. Məktəblərin maddi-texniki bazaları təkmilləşdirilib. Təbii ki, həyata keçirilən işlər öz növbəsində təhsil sahəsində nailiyyətlərin əldə edilməsini şərtləndirib.

Ümumiyyətlə, təhsildəki nailiyyətlər hər bir ölkədə, o cümlədən Azərbaycanda inkişaf konsepsiyasının mühüm tərkib hissəsidir. Ölkəmizdə son illərdə təhsilin inkişafı ilə bağlı həyata keçirilən tədbirlər deməyə əsas verir ki, Azərbaycan öz gələcəyini daha etibarlı və inamlı görmək istəyir. Bundan başqa, zəngin təbii sərvətləri ilə dünyanın diqqətində olan Azərbaycan bu sərvətlərdən səmərəli istifadə ilə insan kapitalının daha da inkişaf etdirilməsini başlıca məqsəd seçib. Bununla da neft gəlirləri Azərbaycanda həm də təhsilin və elmin inkişafına yönəlib.

Dövlətin təhsillə bağlı strategiyasının həyata keçirilməsində ölkənin ən böyük qeyri-hökumət təşkilatı olan Heydər Əliyev Fondunun fəaliyyəti isə xüsusilə diqqət çəkir. Təhsil sahəsində Fondun ən böyük və irimiqyaslı işi olan “Yeniləşən Azərbaycana yeni məktəb” layihəsi uğurla davam etdirilir. Onu da deyək ki, 2003-cü ildən indiyə qədər ölkədə 3000-dən çox məktəb tikilib, Azərbaycanda heç vaxt olmayan qədər geniş bazaya malik təhsil infrastrukturu yaradılıb. Bununla da ölkədə təhsilə qayğı, onun maddi-texniki bazasının möhkəmləndirilməsi işi ümummilli səviyyəyə qaldırılıb.

Bir sözlə, təhsil sahəsinin hərtərəfli inkişafı, Azərbaycan dövlətinin, şəxsən Prezident İlham Əliyevin diqqət mərkəzindədir. Məhz bu diqqətin nəticəsidir ki, regionların sosial-iqtisadi inkişafına dair Dövlət proqramlarında nəzərdə tutulan işlərin görülməsi istiqamətidə həyata keçirilən sosial infrastruktur obyektlərinin tikintisi çərçivəsində paytaxt Bakıda və regionlarda çoxlu sayda məktəb binaları tikilib, yaxud əsaslı şəkildə yenidən qurulub. Onu da vurğulamaq yerinə düşər ki, ötən müddət ərzində Prezident İlham Əliyevin təşəbbüsü ilə məktəb tikintisinə dair bir neçə ayrıca Dövlət Proqramı qəbul edilib. Bundan başqa, digər sahələri əhatə edən Dövlət proqramlarında da məktəb tikintisinə böyük diqqət yetirilir.

Azərbaycan Respublikasının Prezidenti İlham Əliyevin Sədrliyi ilə keçirilən Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı nitqində bu məqama toxunan dövlət başçısı “Sosial infrastruktur obyektlərinin tikintisi aparılmışdır və aparılır. Birinci altı ayda 26 tibb müəssisəsi tikilmiş və təmir edilmişdir. İyirmidən çox modul tipli məktəb tikilmişdir. İlin sonuna qədər onların sayı 100-ə çatmalıdır. Yəni, sosial infrastruktur məsələlərinin həlli daim diqqət mərkəzindədir” deyib.

Yeri gəlmişkən, təhsil sahəsini diqqət mərkəzində saxlayan dövlət başçısı paytaxt Bakı ilə yanaşı, bölgələrə səfəri çərçivəsində istifadəyə verilən yeni məktəblərin açılışında da iştirak edir. Məsələn, Prezident İlham Əliyev sentyabrın 24-də 1200 şagird yerlik Salyan şəhər 2 saylı tam orta məktəbin yeni binasının açılışında iştirak edib. Dövlətimizin başçısına Salyan şəhər 2 saylı tam orta məktəbdə yaradılan şəraitlə bağlı məlumat verilib. Bildirilib ki, 1954-cü ildən ümumtəhsil məktəbi kimi fəaliyyət göstərən Salyan şəhər 2 saylı tam orta məktəb 1937-ci ildə tikilmiş ikimərtəbəli uyğunlaşdırılmış binada yerləşirdi. 2003-cü ilədək məktəb binası 26 sinif otağından ibarət idi və tədris iki növbədə aparılırdı. 2003-cü ildə əlavə 14 sinif otağı tikildi və həmin ildən etibarən tədris birnövbəli sistemə keçdi.

2016-2017-ci tədris ilində məktəbin 556 şagirdi müvəqqəti olaraq 3 saylı tam orta məktəbin binasında yerləşdirilmişdi. Dövlətimizin başçısının ötən il imzaladığı Sərəncamla məktəb üçün yeni bina tikildi və bu, bir çox problemləri aradan qaldırdı. İlk növbədə, digər təhsil ocaqlarında yerləşdirilən şagirdlər öz doğma məktəblərinə qayıtdılar. İndi onlar müasir, zəruri avadanlıqla təchiz olunmuş məktəbdə təhsillərini davam etdirirlər. Üç mərtəbədən ibarət yeni məktəb binasında 48 sinif otağı, 6 laboratoriya, əmək təlimi otaqları, tibb məntəqəsi, kitabxana, 380 yerlik akt zalı, idman və atıcılıq zalları fəaliyyət göstərir.

Burada yaradılan şərait bir daha təsdiqləyir ki, son illərdə təhsil sahəsində qazanılan uğurların təməlində Azərbaycanın yeni təhsil modeli dayanır. Artıq ölkədə yeni təhsil konsepsiyası formalaşıb və həyata keçirilməyə başlanıb. Azərbaycanda yüzlərlə məktəbin tikilməsi, təhsil müəssisələrinin maddi-texniki bazasının gücləndirilməsi nəhəng təhsil infrastrukturunun formalaşmasına geniş imkanlar açıb.

Prezident İlham Əliyev məktəbin sinif otaqlarında, laboratoriyalarında, idman və atıcılıq zallarında yaradılan şəraitlə tanış olub. Atıcılıq otağında şagirdlər pnevmatik silahdan hədəfə atəş açmaq məharətlərini nümayiş etdiriblər. Dövlətimizin başçısı məktəbin müəllim və şagird kollektivinə uğurlar arzulayıb.

Məktəb tikintisi istiqamətində işlər Aran iqtisadi rayonuna daxil olan Neftçalada da uğurla davam edir. Belə ki, Təhsil Nazirliyi tərəfindən Neftçalanın altı kəndində bu il orta məktəblər üçün modul tipli məktəb binasının quraşdırılması nəzərdə tutulub. Rayon təhsil şöbəsindən bildiriblər ki, ilin əvvəlində rayonda bu tip məktəb binalarının quraşdırılmasına başlanılıb.

Prezident İlham Əliyevin tapşırığına əsasən ölkəmizin hər yerində, o cümlədən Göyçayda da uzun illər qəzalı vəziyyətdə olan və istismara yararsız binalarda yerləşən məktəblər üçün modul tipli binaların quraşdırılmasına başlanılıb. Ötən müddət ərzində rayonun Hacağabəyli kəndində 24 yerlik sinif komplekti, Ərəbşahverdi kəndində 40 yerlik modul tipli məktəb binası istifadə verilib, şəhər 2 və 6 saylı tam orta məktəblərində, həmçinin Qaraman, Mallı-Şıxlı kənd məktəblərində əsaslı təmir işləri aparılıb. Alıkənd kəndində 40 yerlik modul tipli məktəb binasının tikintisi üçün layihə-smeta sənədləri hazırlanıb.

Məlumat üçün bildirək ki, son illərdə regionların sosial-iqtisadi inkişafı Dövlət proqramı çərçivəsində, həmçinin Heydər Əliyev Fondunun təşəbbüsü ilə Göyçayda 14 yeni məktəb binası tikilib, 10 təhsil ocağı isə əsaslı şəkildə yenidən qurulub.

Yeni tədris ili ərəfəsində Ağcabədi rayonunun Hacılar kəndində də əsaslı təmir olunan 200 şagird yerlik məktəb binası istifadəyə verilib. Bu münasibətlə keçirilən mərasimdə bildirilib ki, məktəb binasının dam örtüyü tamamilə təzələnib, qapı-pəncərələr, döşəmə və tavan dəyişdirilib. Divarlara armatur tor toxunaraq suvanıb, rənglənib. Binada elektrik xətti çəkilib, istilik və müşahidə sistemləri qurulub. Məktəbin həyətində sanitar qovşaq və qazanxana tikilib, yerə tamet döşənib, abadlıq işləri aparılıb, yaşıllıq salınıb. Təhsil ocağı müasir inventar və avadanlıqlarla təmin olunub.

Öz növbəsində Ağdaş rayonunda da yeni məktəb binaları inşa edilir. Yeni dərs ili ərəfəsində rayonda şagird yeri 100-dək olan və qəzalı vəziyyətə düşən Pirəyir, Yenikənd, Aşağı Zeynəddin və Qarasuqumlaq kəndlərində yerləşən azkomplektli təhsil müəssisələrinin yerində müasir modul tipli məktəb binalarının tikintisinə başlanılıb.

Kürdəmir rayonunun Çöl-Ərəb kəndinin məktəbliləri yeni dərs ilini modul tipli yeni binada qarşılayıblar. Rayon İcra Hakimiyyətindən bildirilib ki, Təhsil Nazirliyinin sifarişi ilə kənd məktəbi üçün modul tipli 96 şagird yerlik yeni bina quraşdırılıb. “PDL” MMC tərəfindən quraşdırılan yeni tədris ocağı 9 sinif otağından ibarətdir. Qeyd edək ki, Təhsil Nazirliyinin sifarişi ilə rayonun Yeni Şıxımlı kəndində də ibtidai məktəb üçün 40 şagird yerlik modul tipli yeni bina quraşdırılıb.

Ölkənin cənub bölgəsinə gəlincə, sentyabrın 15-də Masallı rayonunun Mololon və Meşəkənarı kənd ümumi orta məktəbləri üçün inşa edilmiş yeni məktəb binaları istifadəyə verilib. Hər biri 80 şagird yerlik yeni məktəb binalarında məktəblilərin yüksək səviyyədə təhsil almaları, həmçinin təlim-tərbiyələri üçün lazımi şərait yaradılıb. Bu münasibətlə keçirilən açılış mərasimlərində qeyd olunub ki, son illər Masallıda olan 98 məktəbdən 50-yə yaxını yenidən tikilib və əsaslı təmir olunub. Bu məktəblərdən 20-si son dörd ilin payına düşür.

Sentyabrın 16-da isə Masallının Kubin kənd ümumi orta məktəbi üçün tikilmiş yeni məktəb binası şagird və müəllimlərin ixtiyarına verilib. Azərbaycan Hökuməti və Dünya Bankı tərəfindən maliyyələşdirilən, Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin həyata keçirdiyi Azərbaycan Kənd İnvestisiya Layihəsi (AzKİL) çərçivəsində inşa edilmiş 60 şagird yerlik binada məktəblilərin yüksək təhsil almaları üçün lazımi şərait yaradılıb.

Təhsil infrastrukturunun inkişafı və yenidən qurulması istiqamətində işlər Naxçıvan Muxtar Respublikasında da davam etdirilir. 2017-ci ilin ötən dövründə muxtar respublikanın şəhər, kənd və qəsəbələrində yeni avadanlıqlarla təchiz edilən, ən yeni kompüter dəstləri və elektron lövhələrlə təmin olunan 2716 şagird yerlik 5 tam orta məktəb binası istifadəyə verilib. Hazırda muxtar respublikada 3-ü ibtidai, 5-i ümumi orta və 208-i tam orta olmaqla, ümumilikdə, 216 məktəb və Heydər Əliyev adına Hərbi Lisey fəaliyyət göstərir.

Sentyabrın 15-də - Bilik Günündə isə Babək rayonunun Payız kənd tam orta məktəbinin yeni binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov Bilik Gününün - yeni tədris ilinin başlanmasının Babək rayonunun Payız kəndində müasir məktəb binasının istifadəyə verilməsi ilə qeyd olunduğunu bildirib, muxtar respublikanın ümumtəhsil, ali, orta ixtisas və peşə məktəblərinin şagird, tələbə və müdavimlərini, Heydər Əliyev adına Hərbi Liseyin kursantlarını, pedaqoji kollektivləri yeni tədris ilinin başlanması münasibətilə təbrik edərək deyib: “Təhsil qədər cəmiyyəti irəli aparan ikinci bir sahə yoxdur. Əgər təhsil inkişaf edirsə, ölkə də inkişaf edir. Bu gün inkişaf edən ölkələrin təcrübəsini nəzərdən keçirsək, görərik ki, bu ölkələrin inkişafının kökündə təhsilə göstərilən qayğı dayanır. Bu bir həqiqətdir ki, Azərbaycanda təhsilin müasir standartlara cavab verməsi Ümummilli liderimiz Heydər Əliyevin siyasi və dövlətçilik fəaliyyəti nəticəsində mümkün olmuşdur. Ümummilli liderimizin müəllifi olduğu və ölkə Prezidenti cənab İlham Əliyev tərəfindən davam etdirilən təhsil strategiyası Azərbaycanda və onun Naxçıvan Muxtar Respublikasında yeni mərhələyə yüksəlmişdir”.

Məlumat verilib ki, 3 mərtəbəli məktəb binası 240 şagird yerlikdir. Binada 3-ü elektron lövhəli olmaqla 13 sinif otağı, 2 laboratoriya, hərbi kabinə, şahmat sinfi, kompüter otağı, müəllimlər otağı, psixoloq otağı, kitabxana və idman zalı fəaliyyət göstərir. Məktəbin kitabxana fondunda 1362-si dərslik və 2530-u bədii ədəbiyyat olmaqla 3892 kitab vardır. Kitabxanada Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamına uyğun olaraq “Oxunması zəruri olan kitablar”dan ibarət guşə yaradılıb. Kompüter otağında 19 kompüter quraşdırılıb və internetə qoşulub.

Yeni modul tipli məktəb binalarının istifadəsi istiqamətində həyata keçirilən işlərdən Quba-Xaçmaz iqtisadi rayonuna da pay düşüb. Daha dəqiq desək, sentyabrın 19-da Xaçmaz rayonunun Gəncəli kəndində 100 şagird yerlik yeni modul tipli məktəb binası istifadəyə verilib. Xaçmaz rayonunun Aşağı Ləgər və Çılğır kəndlərində quraşdırılan daha iki yeni modul tipli məktəb binası isə ilk dərs günündən şagird və müəllimlərin ixtiyarındadır.

Bu barədə KİV-ə verilən məlumata görə, Gəncəli kəndində məktəbin açılış mərasiminə rayon İcra Hakimiyyətinin, Təhsil Şöbəsinin rəhbər şəxsləri, məktəbin pedaqoji kollektivi, şagirdlər və valideynlər iştirak ediblər. Mərasimdə çıxış edən sözügedən məktəbin direktoru Çimnaz Əmiraslanova Gəncəli kəndində yeni məktəbin istifadəyə verilməsini valideynlərin, xüsusilə də şagirdlərin böyük sevincinə səbəb olduğunu vurğulayaraq, göstərilən diqqət və qayğıya görə dövlət başçısına minnətdarlığını bildirib.

Bundan başqa, Xaçmaz rayonunda şagird sayı 100-dək olan 2 məktəb üçün modul tipli binalar quraşdırılıb. Səkkiz otaqdan ibarət olan binaların üstünlükləri azməsrəfli olması ilə yanaşı, qısa müddət ərzində istənilən relyefdə quraşdırılmasıdır. Məktəblər istilik sistemi, internet, inventar və avadanlıqlarla təmin olunub.

Sentyabrın 22-də isə Quba rayonunun Ərməki kəndində yeni məktəb binası istifadəyə verilib. İkimərtəbəli, 132 şagird yerlik təhsil ocağının açılış mərasimində rayon İcra Hakimiyyətinin, Təhsil Şöbəsinin nümayəndələri, məktəbin müəllim və şagird kollektivi, eləcə də kənd sakinləri iştirak ediblər.

Tədbirdə çıxış edənlər ölkəmizdə elm və təhsilə göstərilən dövlət qayğısı nəticəsində bu sahənin davamlı inkişafı üçün möhkəm zəmin yarandığını vurğulayıblar. Bildirilib ki, son illər Qubada da müasir tipli yeni məktəb binalarının inşası geniş vüsət alıb. Ötən 14 ildə rayonda 70-ə yaxın yeni məktəb binası, 5 bağça tikilib, 10-a yaxın bina isə əsaslı təmir olunub. Hazırda rayonun 4 kəndində yeni məktəb binaları tikilməkdədir.

O da vurğulanıb ki, Ərməki kəndində inşasına 2014-cü ildə başlanılan təhsil ocağı müasir standartlara cavab verən avadanlıqla təmin olunub. Binada istilik sistemi qurulub. Dövlət vəsaiti hesabına inşa olunan təhsil ocağında 11 sinif otağı ilə yanaşı, idman zalı, kitabxana, laboratoriya, kompüter, eləcə də psixoloq və tibb otağı fəaliyyət göstərəcək. Məktəbdə “Gənclərin çağırışaqədərki hazırlığı” fənninin keyfiyyətli tədrisi üçün xüsusi otaq yaradılıb və lazımi əyani vəsaitlərlə təmin edilib. Mərasimdə çıxış edənlər təhsilin inkişafına göstərilən diqqət və qayğıya görə Prezident İlham Əliyevə, Heydər Əliyev Fondunun prezidenti, Birinci vitse-prezident Mehriban xanım Əliyevaya minnətdarlıqlarını bildiriblər.

Ölkəmizin şimal bölgəsinə, daha dəqiq desək, Şəki-Zaqatala iqtisadi rayonuna daxil olan Balakən rayonunun ucqar yaşayış məntəqələrindən olan Sarıbulaq və Salban kəndlərində də ibtidai məktəblər üçün 40 və 20 şagird yerlik modul tipli yeni məktəb binaları quraşdırılıb. Rayon İcra Hakimiyyətindən bildiriblər ki, hər iki məktəb indiyədək qəzalı vəziyyətdə olan köhnə binalarda fəaliyyət göstərib. Modul tipli məktəblər azməsrəfli olması, qısa müddətdə istənilən relyefdə quraşdırılması, asan daşınması, şagirdlərin sayına uyğun olaraq sinif otaqlarının rahatlıqla azaldılıb-artırılması ilə fərqlənir.

Şimal bölgəsindəki Şəki rayonunda da modul tipli məktəb binalarının tikintisi davam etdirilir. Verilən məlumatlara görə, rayonun Aşağı Şabalıd, Babaratma və Fazıl kəndlərində quraşdırılan və hər biri 56 şagird yerlik olan modul tipli məktəb binaları yeni dərs ilinin başlanğıcında öz qapılarını şagirdlərin üzünə açıb. Rayonun Baş Zəyzid kəndində Təhsil Nazirliyinin sifarişi ilə inşa edilən 624 şagird yerlik yeni məktəb binasının isə cari ilin sonunadək istifadəyə verilməsi nəzərdə tutulur. 2012-ci ildə bölgədə baş vermiş zəlzələ zamanı qəzalı vəziyyətə düşən bu məktəb indiyədək uyğunlaşdırılmış binalarda fəaliyyət göstərib. Hazırda məktəb binasında tikinti işləri cədvələ uyğun davam etdirilir. Tezliklə binanın dam örtüyünün quraşdırılmasına başlanılacaq.

Bölgədəki Qəbələ rayonunda da təhsil sahəsinin inkişafı diqqət mərkəzindədi. Bu barədə sentyabrın 20-də Qəbələ rayonunda yeni inşa edilən məktəbə təşkil olunan mediatur zamanı bildirilib. Belə ki, Qəbələnin Seyidqışlaq kənd ümumi orta məktəbinə gələn iyirmi beşdən çox KİV nümayəndəsi və təhsil eksperti görülən işlər barədə məlumatlandırılıb. Bildirilib ki, 80 şagird yerlik məktəb 10 sinif otağı, 1 müəllimlər otağı, kitabxana və digər yardımçı otaqlardan ibarətdir. Rayonda daha bir modul tipli məktəb Cığatelli kəndində istifadəyə verilib. 56 şagird yerlik ümumi orta məktəbdə 7 sinif və 1 müəllimlər otağı var.

Səfər çərçivəsində media nümayəndələri Qəbələ rayonunun Aydınqışlaq kəndində əsaslı təmir olunan yeni məktəb binasının açılış mərasiminə də qatılıblar. Tədbirdə rayon İcra Hakimiyyəti başçısının müavini Ətayə Osmanova, Təhsil Nazirliyinin məktəbəqədər və ümumi təhsil şöbəsinin müdir müavini Firuddin Həmzəyev, rayon ictimaiyyətinin nümayəndələri iştirak ediblər. Bildirilib ki, 1978-ci ildə tikilən və bu il əsaslı təmir olunan məktəbdə 24 sinif otağı, 2 laboratoriya və müəllimlər otağı istifadəyə verilib. Təhsil ocağında 364 şagirdin təlim-tərbiyəsi ilə 52 müəllim məşğul olur.

Sentyabrın 20-də həmçinin Oğuz rayonunun Yemişənli kənd ümumi orta məktəbi üçün inşa edilən 80 şagird yerlik modul tipli yeni bina müəllim və şagirdlərin istifadəsinə verilib. Bu münasibətlə jurnalistlərin və təhsil ekspertlərinin iştirakı ilə Oğuz rayonuna mediatur təşkil olunub. Açılış mərasimində Təhsil Nazirliyinin və rayon təhsil şöbəsinin məsul əməkdaşları, məktəbin pedaqoji kollektivi və şagirdlər iştirak ediblər.

Mərasimdə ölkəmizdə təhsilin inkişafına göstərilən yüksək dövlət qayğısından, təhsil müəssisələrinin maddi-texniki bazasının möhkəmləndirilməsi istiqamətində həyata keçirilən məqsədyönlü tədbirlərdən bəhs edilib. Diqqətə çatdırılıb ki, təkcə son on ildə Oğuz rayonunda 17 yeni məktəb binası tikilib istifadəyə verilib, 3 məktəb binası əsaslı təmir olunub. Bu il Təhsil Nazirliyi tərəfindən 3 kənd məktəbi üçün modul tipli yeni binalar inşa edilib. Hazırda rayonun Padar kənd məktəbində əsaslı təmir işləri davam etdirilir.

Sonra tədbir iştirakçıları məktəbdə yaradılan şəraitlə tanış olublar. 80 şagird yerlik məktəb 10 sinif otağı, müəllimlər otağı və yardımçı otaqlardan ibarətdir. Məktəbdə 73 şagird təhsil alır. Onların təlim-tərbiyəsi ilə 18 müəllim məşğul olur.

Sonda bildirək ki, ölkəmizdə modul tipli məktəblərin inşası davam edir. Təhsil Nazirliyindən bildiriblər ki, indiyədək 30 modul tipli məktəbin inşası başa çatıb, 40 məktəbdə isə bu sahədə iş davam etdirilir. İlin sonunadək 44 rayon əhatə olunmaqla, 100 azkomplektli və qəzalı vəziyyətdəki kənd məktəbinin modul tipli məktəblərlə əvəz edilməsi nəzərdə tutulur. Modul tipli məktəblər Balakən, Sabirabad, Şəki, Quba, Qusar, Neftçala, Kürdəmir, Ağdaş, İsmayıllı, Tovuz, Göygöl, Tərtər, Göyçay və digər rayonlarda inşa olunub.

Modul tipli məktəblərin üstünlüyü onların azməsrəfli olması ilə yanaşı, qısa müddət ərzində istənilən relyefdə quraşdırılması, asan daşınması, sinif otaqlarının sayının şagirdlərin sayına uyğun olaraq rahatlıqla azaldılıb-artırılmasıdır. Həmçinin qəzalı vəziyyətdə olan təhsil müəssisələrində təmir-tikinti işləri aparılarkən tədris prosesinin dayandırılmaması məqsədilə səyyar modul tipli məktəblərin quraşdırılması da nəzərdə tutulur.

Bir sözlə, yuxarıda sadalananlardan da bəlli olur ki, Azərbaycanda həyata keçirilən infrastruktur layihələri çərçivəsində təhsil müəssisələrinin maddi-texniki bazasının möhkəmləndirilməsi, respublikanın hər yerində məktəb tikintisinin geniş vüsət alması istiqamətində məqsədyönlü işlər həyata keçirilib.

Nadir AZƏRİ

Yeni Azərbaycan.- 2017.- 28 sentyabr