Azərbaycanın regionlarında infrastrukturun yenilənməsi istiqamətində işlər uğurla davam etdirilir

Bölgələrdə genişmiqyaslı abadlıq-quruculuq işləri həyata keçirilir

Cənubi Qafqaz regionunun lider dövləti olan Azərbaycan dinamik inkişaf yolunda inamla irəliləyir. Ümummilli lider Heydər Əliyevin əsasını qoyduğu siyasətin Prezident İlham Əliyev tərəfindən uğurla davam etdirilməsi nəticəsində Azərbaycan ötən müddət ərzində möhtəşəm nailiyyətlər qazanıb, ölkəmizin qarşısında yeni perspektivlər açılıb. Son 15 il ərzində ölkəmizdə bütün sahələri əhatə edən sistemli və kompleks islahatlar aparılıb, Azərbaycan iqtisadiyyatının dayanıqlı və dinamik inkişafı təmin edilib. Həyata keçirilən iqtisadi islahatlara paralel olaraq makroiqtisadi sabitlik qorunub saxlanılıb, iqtisadiyyatın diversifikasiyası, qeyri-neft sektorunun və regionların inkişafı sürətlənib, sahibkarlığa dövlət dəstəyi gücləndirilib, özəl bölmənin inkişafı üçün azad rəqabət və münbit investisiya mühiti yaradılıb, əhalinin sosial rifahı daha da yaxşılaşıb. Təsadüfi deyil ki, nüfuzlu beynəlxalq reytinq agentlikləri də ölkəmizin sosial-iqtisadi inkişaf istiqamətində əldə etdiyi uğurları, eləcə də həyata keçirilən kompleks islahatların səmərəli nəticələrini olduqca yüksək qiymətləndirir, müsbət proqnozlar ifadə edirlər.

O da qeyd edilməlidir ki, ölkəmizdə ötən müddət ərzində infrastruktur quruculuğu da geniş vüsət alıb, bu istiqamətdə ardıcıl və məqsədyönlü tədbirlər həyata keçirilib, səmərəli nəicələr əldə olunub. Xüsusilə də, Azərbaycanın bütün bölgələrində infrastrukturun yenilənməsi, o cümlədən abadlıq-quruculuq işləri reallaşdırılıb və bu gün də uğurla davam etdirilir. “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində ölkə miqyasında bəhs olunan istiqamətlərdə qarşıya qoyulan vəzifələr müvəffəqiyyətlə icra edilir. Ümumiyyətlə, ölkəmizdə regionların sosial-iqtisadi inkişafına xidmət edən sistemli və məqsədyönlü addımlar ardıcıl xarakterə malikdir. Ona görə də respublikamızda bölgələrin tərəqqisi dinamik xarakter daşıyır, əldə edilən inkişaf göstəriciləri yüksək qiymətləndirilir. Şübhəsiz ki, regionlarda yeni səhiyyə, təhsil müəssisələrinin istifadəyə verilməsi, genişmiqyaslı quruculuq işlərinin həyata keçirilməsi insanlarda böyük məmnunluq hissi yaradır. Qeyd edək ki, bu günə qədər regionlarda müxtəlif yaşayış binaları tikilib və ya əsaslı yenidənqurmadan sonra istifadəyə verilib.

Vurğulamaq lazımdır ki, Prezident İlham Əliyevin müvafiq sərəncamları və göstərişlərinə əsasən bütün ölkə miqyasında, o cümlədən regionlarda abadlıq-quruculuq işləri uğurla davam etdirilir. Yeri gəlmişkən, Prezident İlham Əliyev oktyabrın 22-də “İmişli şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” Sərəncam imzalayıb. Sərəncama əsasən İmişli şəhərində istismar müddəti başa çatmış çoxmənzilli binaların sakinlərinin mənzil-məişət şəraitini yaxşılaşdırmaq məqsədilə 48 mənzilli yaşayış binasının tikintisi üçün Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan İmişli rayon İcra Hakimiyyətinə 3 milyon manat ayrılıb. Dövlətimizin başçısı oktyabrın 29-da isə “Qax şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” Sərəncam imzalayıb. Qax şəhərində istismar müddəti başa çatmış 3 ikimərtəbəli binanın sakinlərinin mənzil-məişət şəraitinin yaxşılaşdırılması məqsədilə 48 mənzilli yaşayış binasının tikintisi üçün Qax rayon İcra Hakimiyyətinə Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan 3 milyon manat ayrılıb. Bununla yanaşı, Prezident İlham Əliyev oktyabrın 29-da “Şəki şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” Sərəncam imzalayıb. Şəki şəhərində istismar müddəti başa çatmış 5 ikimərtəbəli binanın sakinlərinin mənzil-məişət şəraitinin yaxşılaşdırılması məqsədilə 48 mənzilli yaşayış binasının tikintisi üçün Şəki şəhər İcra Hakimiyyətinə Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan 3 milyon manat ayrılıb.

Qeyd etdiyimiz kimi, ölkəmizdə həyata keçirilən abadlıq-quruculuq işləri bütün bölgələri əhatə edir. Naxçıvan Muxtar Respublikasında da tikinti, təmir-bərpa, yenidənqurma, abadlıq-quruculuq işləri uğurla davam etdirilir. Yeri gəlmişkən, Culfa rayonunun Qazançı kəndi abadlaşan kəndlərimiz sırasına daxil olub. Belə ki, noyabrın 30-da Qazançı kənd tam orta məktəbinin yeni binasının açılışı olub. 216 şagird yerlik 3 mərtəbəli məktəbdə 3-ü elektron lövhəli olmaqla 14 sinif otağı, kimya, biologiya və fizika laboratoriyaları, hərbi kabinə, şahmat sinfi, kompüter otağı, müəllimlər otağı, kitabxana və idman zalı var. Muxtar respublikanın məktəblərində yaradılan kitabxanalar şagirdlər üçün hərtərəfli mütaliə imkanları açır. Qazançı kənd tam orta məktəbinin kitabxana fondunda da 970-i dərslik və 1190-ı bədii ədəbiyyat olmaqla 2160 kitab mövcuddur. Burada “Oxunması zəruri olan kitablar”dan ibarət guşə yaradılıb. Şagirdlərin nəzəri biliklərini möhkəmləndirmək üçün kimya, biologiya və fizika laboratoriyalarında müasir avadanlıqlar quraşdırılıb. Təhsil ocağının idman zalında yeniyetmələrin fiziki sağlamlığının qorunması üçün lazımi şərait yaradılıb. Şagirdlərin hərbi hazırlığının və vətənpərvərlik tərbiyəsinin yüksəldilməsi məqsədilə məktəbdə hərbi kabinə də fəaliyyət göstərir. Bundan başqa, gənclərin kompüter biliklərinin möhkəmləndirilməsi müasir tədris prosesində qarşıda duran əsas vəzifələrdəndir. Məktəbin kompüter otağında internetə çıxışı olan 19 kompüter quraşdırılıb ki, bu da informatika dərslərinin tədris proqramına uyğun keçirilməsinə imkan verəcəkdir. Noyabrın 30-da həmçinin Qazançı kənd mərkəzinin də açılışı olub. Kənd mərkəzində inzibati ərazi dairəsi üzrə nümayəndəlik, bələdiyyə, rabitə evi, polis sahə və baytarlıq məntəqələri, kitabxana, statistika otağı, mədəniyyət evi, Yeni Azərbaycan Partiyası ərazi ilk təşkilatı, arxiv və 44 yerlik zal yerləşir. Kitabxanada 7813 ədəbiyyat oxucuların istifadəsinə verilib. Kənd mərkəzində yaradılan mədəniyyət evi və zal müxtəlif mədəni-kütləvi tədbirlərin keçirilməsinə və kənd sakinlərinin asudə vaxtlarının səmərəli təşkilinə imkan verəcək. Kənd yaşayış məntəqələrində baytar həkimlərin fəaliyyəti üçün hərtərəfli şərait yaradılır, baytarlıq məntəqələri lazımi avadanlıqlarla təmin edilir. Qazançı kəndində də baytarlıq xidmətinin təşkili bu istiqamətdə tədbirlərin vaxtında və mütəşəkkil aparılmasına, keyfiyyətli kənd təsərrüfatı məhsullarının istehsalına imkan yaradacaq. Rabitə evində quraşdırılan 384 yerlik ATS Qazançı kəndində 128 abonentə və 48 internet istifadəçisinə xidmət edir. Həmin gün Qazançı kəndində həkim ambulatoriyası da istifadəyə verilib. Lazımi tibbi avadanlıqlarla təchiz edilmiş ambulatoriya 12 otaqdan - baş həkim, stomatoloq üçün kabinə, fizioterapiya kabinəsi, palata, doğuş, manipulyasiya, peyvənd, qeydiyyat, aptek, mama, tibb bacısı və feldşer otaqlarından ibarətdir. Həkim ambulatoriyasında stomatoloji qurğu, doğuş masası, quruducu şkaf, peyvənd və təcili tibbi yardım çantaları, mikroskop, sentrifuqa, hemometr, qlükometr, tərəzi, boyölçən, soyuducu və digər tibbi avadanlıqlar qoyulub. Fizioterapevtik kabinə isə elektroterapiya və ultrasəslə müalicə aparatı, ultrayüksək tezlikli cərəyanla müalicə aparatı, parafinəritmə qazanı və solyuks lampası ilə təmin edilib. Binada fərdi istilik sistemi quraşdırılıb. Noyabrın 30-da Qazançı kəndində xidmət mərkəzinin də açılışı olub. Mərkəzdə bərbərxana, qadın gözəllik salonu, ət satışı yeri, ərzaq və təsərrüfat malları mağazaları və anbar var. Burada xidmət sahələrinin fəaliyyəti üçün hərtərəfli şərait yaradılıb, 5 sakin işlə təmin olunub. Ərzaq mağazasında əsasən yerli məhsullar satışa çıxarılır. Həmçinin burada kənddəki ailə təsərrüfatlarında istehsal olunan məhsullara da üstünlük verilir. Həmin gün Qazançı körpüsü tarixi-memarlıq abidəsi bərpadan sonra istifadəyə verilib. Körpünün yükdaşıyan dağ hissəsinin aşınmış daşları dəyişdirilib, daşlar arası təmizlənərək əhəng məhlulu ilə bərkidilib. Körpünün şimal tərəfdən yol ilə birləşmə hissəsi orijinallığı saxlanılmaqla bərpa edilib, nəticədə körpünün uzunluğu 50 metrə çatıb. Ətrafda 120 metr sahilbərkitmə işləri görülüb, 50 metr dəmir-betondan istinad divarı salınaraq üzəri dağ daşları ilə üzlənib.

Muxtar respublikanın Kəngərli rayonunda da cari ilin ötən dövründə tikinti-quruculuq, abadlıq işləri davam etdirilib. Hazırda rayon mərkəzi olan Qıvraq qəsəbəsində yeni quruculuq tədbirləri həyata keçirilir. Qəsəbədəki böyük bir ərazidə inşa olunan yeddimərtəbəli 48 mənzilli ictimai yaşayış binası gənc ailələrin mənzil-məişət şəraitinin yaxşılaşdırılmasına töhfə verəcək. Mənzillərin 22-si iki, 26-sı isə üçotaqlıdır. Zirzəmidə fərdi qazanxana, anbar, gözəllik salonu yerləşəcək. Burada rayonun müxtəlif idarə, müəssisə və təşkilatları üçün 8 iş otağı ayrılacaq. Binanın ətrafında abadlıq-təmir işləri aparılır, yaşıllıq zolağı salınması üçün hazırlıq işləri görülür. Digər bir quruculuq tədbiri hərbçi ailələri üçün qəsəbədə inşa olunan yaşayış binasıdır. Biri 4, biri 3, 42-si isə 2 otaqlı olan bina 3 giriş və 5 mərtəbədən ibarətdir. Hər iki obyektin tikintisini Naxçıvan Muxtar Respublikası Dövlət Şəhərsalma və Arxitektura Komitəsinin Kəngərli Rayon İdarəsinin inşaatçıları həyata keçirirlər. İnşaat işlərində keyfiyyət amilinə ciddi önəm verilir, əsasən yerli materiallardan istifadə olunur, texniki təhlükəsizlik diqqət mərkəzində saxlanılır.

Beləliklə, Azərbaycanın regionlarında infrastrukturun yenilənməsi istiqamətində işlər, o cümlədən genişmiqyaslı abadlıq-quruculuq işləri müvəffəqiyyətlə davam etdirilir.

Nurlan QƏLƏNDƏRLİ

Yeni Azərbaycan.- 2018.- 6 dekabr.- S.7.