Regionlarda arıçılığın inkişafı üçün stimullaşdırıcı tədbirlər görülür

Kənd Təsərrüfatı Nazirliyinin müvafiq komissiyasının bu günlərdə keçirilən iclasında 26 rayon komissiyasından daxil olmuş sənədlərə baxılıb, 2189 arıçıya dövlət büdcəsinin vəsaiti hesabına hər arı ailəsinə 10 (on) manat hesabı ilə subsidiyanın verilməsi barədə qərarlar qəbul edilib

Son illərdə qeyri-neft iqtisadiyyatının üstün inkişafının təmin olunmasını hədəfləyən Azərbaycanda aqrar sektorda bir sıra gəlirli sahələrdə istehsal və ixrac imkanlarının artırılmasına xüsusi diqqət göstərilir. Belə gəlirli sahələrdən biri də arıçılıqdır. Məlum olduğu kimi, Prezident İlham Əliyev 2018-ci il 5 mart tarixində “Azərbaycan Respublikasında arıçılığın inkişafının stimullaşdırılması haqqında” müvafiq Sərəncam imzalayıb. Sərəncama əsasən, arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə 2018-ci il də daxil olmaqla, 5 il müddətində ildə 10 manat məbləğində subsidiya müəyyən edilib.

Kənd təsərrüfatı nazirinin müavini İlham Quliyevin bildirdiyinə görə, stimullaşdırıcı tədbirlər hesabına respublikada arı ailələrinin sayının 2 dəfə artacağı proqnozlaşdırılır. Hazırda isə ölkədə 250-300 min arı ailəsi mövcuddur.

Arıçılığın inkişafının stimullaşdırılması haqqında müvafiq Sərəncamın icrası yüksək səviyyədə təmin edilir

Respublikamızda arıçılığın inkişafının stimullaşdırılması haqqında müvafiq Sərəncamın icrası yüksək səviyyədə təmin edilir. Elə bu günlərdə Kənd Təsərrüfatı Nazirliyində arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə subsidiyanın verilməsi üzrə Respublika Komissiyasının növbəti iclası keçirilib. Nazirliyin İctimaiyyətlə əlaqələr və informasiya təminatı şöbəsindən KİV-ə bildiriblər ki, Respublika Komissiyasının sədri, kənd təsərrüfatı nazirinin müavini İlham Quliyevin sədrliyi ilə keçən iclasda 26 rayon komissiyasından daxil olmuş sənədlərə baxılıb, 2189 arıçıya dövlət büdcəsinin vəsaiti hesabına hər arı ailəsinə 10 (on) manat hesabı ilə subsidiyanın verilməsi barədə qərarlar qəbul edilib.

İclasda Azərbaycan Arıçılar Assosiasiyasının nümayəndələri də iştirak ediblər. Rayon (şəhər) komissiyalarından daxil olan sənədlərə baxılması məqsədilə yaradılmış işçi qrupuna Kənd Təsərrüfatı Nazirliyinin nümayəndələri ilə yanaşı, Azərbaycan Arıçılar Assosiasiyasının təmsilçiləri də daxildir.

Regionlarda arı ailələri qeydiyyata alınır

Prezident İlham Əliyevin “Azərbaycan Respublikasında arıçılığın inkişafının stimullaşdırılması haqqında” 2018-ci il 5 mart tarixli Sərəncamının icrası ilə əlaqədar olaraq regionlarda arı ailələri ilk dəfə qeydiyyata alınır. Bu proses Astara rayonunda da uğurla həyata keçirilir. Belə ki, fermerlərə ödəniləcək subsidiyaların məbləğini müəyyənləşdirmək məqsədilə arı ailəsinin saxlandığı pətəyin üzərinə nömrə nişanları vurularaq onların qeydiyyatı aparılır.

Astaralı arıçılar Azərbaycan Prezidentinin Sərəncamına əsasən arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə 2018-ci il də daxil olmaqla 5 il müddətinə 10 manat məbləğində subsidiyanın verilməsini razılıqla qarşılayıblar. Astara Arıçılar Cəmiyyətinin sədri Arif Nəzirov Prezidentin Sərəncamının icrası ilə bağlı rayonda görülən təşkilati işlərdən danışarkən deyib: “Subsidiyanın verilməsinin əsas məqsədi arıçılığın inkişafına dövlət dəstəyi göstərmək, arı ailələrinin genofondunu qorumaqdır. Arıçılarımız qış hazırlığını yekunlaşdırmaq üzrədir. Bu müddət ərzində arı ailələri nəzərdən keçirilib, mövsüm zamanı bol məhsul götürmək üçün müvafiq tədbirlər görülüb”.

Qeydiyyata alınan arı ailələri barədə sənədlərin subsidiyanın verilməsi üzrə komissiyaya təqdim edilməsindən sonra vəsaitin arıçıların hesabına köçürüləcəyini vurğulayan A.Nəzirov ölkəmizdə kənd təsərrüfatının ənənəvi təsərrüfat sahələrindən olan arıçılığın inkişafına göstərilən dövlət dəstəyinə görə astaralı arıçılar adından dövlətimizin başçısına minnətdarlığını bildirib. Qeyd edək ki, hazırda Astara rayonunda 27 min arı ailəsi var. İndiyədək 16 min arı ailəsi identifikasiya kodu ilə qeydiyyata alınıb.

Ağcabədi rayonunda da arı ailələrinin (pətəklərin) identikləşdirilməsi həyata keçirilir. Bu barədə KİV-ə Ağcabədi rayon Dövlət Aqrar İnkişaf Mərkəzinin sektor müdiri Etibar Mamedov məlumat verib. O bildirib ki, Kənd Təsərrüfatı Nazirliyi tərəfindən yaradılan rayon komissiyası məlumatları yerində dəqiqləşdirərək arı ailələrinin mövcudluğunu yoxlayır. Ağcabədi rayonu üzrə 220 arıçının saxladığı 3800 pətək qeydiyyata alınıb. Hazırda arı ailələrinin identikləşdirilməsi davam etdirilir, düzbucaqlı formada plastik materialdan hazırlanan lövhə şrup vasitəsilə pətəyə bərkidilir. Arı ailələrinin yoxlanılması və mövcudluğu haqqında rayon komissiyası tərəfindən icmal siyahı, akt və müvafiq sənədlər tərtib edilərək, respublika komissiyasına göndərilir.

Masallıda ilkin mərhələdə arıçılıqla məşğul olan 90 nəfərə 2244 arı ailəsi üçün 22 min 440 manat məbləğində subsidiya ayrılıb. Rayonun Hişkədərə kəndində 4, Miyankü kəndində 3, Ərkivan qəsəbəsində 18, Çaxırlı kəndində 14, Yeddioymaq kəndində 16, Sərçuvar kəndində 19, Gəyəçöl kəndində 11 və Səmidxan kəndində 5 ailə subsidiyadan yararlanacaq.

Masallıdakı arı ailələrinin və arıçıların uçotunun aparılması üçün 4 işçi qrupu yaradılıb. İşçi qrupları tərəfindən aparılmış monitorinqlər nəticəsində rayonda 9 mindən çox arı ailəsinin olduğu müəyyənləşib.

Sumqayıtda istifadəyə verilən yeni müəssisədə hər il 10 ton arı tortunun istehsalı planlaşdırılır

Türkiyə Respublikasının Azərbaycandakı səfirliyi, Türk Əməkdaşlıq və Koordinasiya Agentliyi (TİKA) və “Dağ arıçıları” İctimai Birliyinin sədri, Qubadlı rayon sakini, arıçılıq üzrə mütəxəssis Yusif Quliyevin birgə köməkliyi ilə Sumqayıtda bal və bal məhsullarının qablaşdırılması və arı yemi istehsalı müəssisəsi yaradılıb.

Noyabrın 29-da Sumqayıt şəhərinin Yaşıldərə yaşayış massivində yerləşən müəssisənin açılış mərasimi keçirilib. Tədbirdə Türkiyənin ölkəmizdəki səfiri Erkan Özoral, Qubadlı rayon İcra Hakimiyyətinin başçısı Malik İsaqov, TİKA-nın nümayəndəsi Teoman Tiryaki, “ABAD” (Ailə Biznesinə Asan Dəstək) publik hüquqi şəxsin direktoru Rüfət Elçiyev, Kənd Təsərrüfatı Nazirliyinin heyvandarlıq şöbəsinin mütəxəssisi Fəxrəddin Səmədov, rayonun idarə, müəssisə rəhbərləri və arıçılıqla məşğul olan şəxslər iştirak ediblər.

Açılış mərasimində Azərbaycanda arıçılığın inkişafına göstərilən dövlət dəstəyindən danışılıb, bu sahənin perspektivlərindən bəhs olunub. Bildirilib ki, arıçılığı inkişaf etdirmək məqsədilə son illərdə “Dağ arıçıları” İctimai Birliyi bir sıra tədbirlər həyata keçirib. Bunun nəticəsi olaraq arı ailələrinin sayı 5200-ə yaxınlaşıb. Arı ailələrinin sayının artırılması ilə yanaşı, məhsuldarlığın yüksəldilməsi, damazlıq-seleksiya işlərinin yaxşılaşdırılması, istehsal olunan arı məhsullarının mərkəzləşdirilmiş qaydada qablaşdırılması və etiketləmə məsələləri də diqqətdə saxlanılıb. Azərbaycan Prezidentinin Sərəncamı ilə arıçılara subsidiyanın ayrılması isə bu sahənin inkişafına əlavə təkan verəcək.

Açılış mərasimindən sonra müəssisə ilə tanışlıq olub. Qeyd edilib ki, arıçılar tərəfindən istehsal edilən ballar müəssisədə “Dağ arıçıları” İctimai Birliyi tərəfindən qablaşdırılır və “Qarabağlı” markası altında satışa çıxarılır. İstehsal həcmi ildə 20 ton olan müəssisədə birinci mərhələdə məcburi köçkün arıçıların məhsulları bir marka ilə buraxılacaq. Həmçinin müəssisədə hər il 10 ton arı tortunun istehsalı da planlaşdırılır və arıçılara münasib qiymətə satılacaq.

Damazlıq-seleksiya işinin aparılması arıçılığın inkişafı üçün vacib şərtlərdən biridir

“İqtisadi cəhətdən gəlirli sahə olan arıçılıq həm də ətraf aləmin, ekoloji mühitin yaxşılaşdırılması baxımından ən səmərəli təsərrüfat sahəsi hesab olunur”. Bu fikri Biləsuvar rayonunda arıçılıqla məşğul olan, Bakıda keçirilən 19-cu arıçılıq məhsullarının sərgi-satış yarmarkasının iştirakçısı Hikmət Əliyev ifadə edib.

Otuz bir ildir arıçılıqla məşğul olan Hikmət Əliyev deyib: “Damazlıq-seleksiya işinin yüksək səviyyədə aparılması arıçılığın inkişafında mühüm rol oynayır. Bu bölgədə tarixən mövcud olan və dünyada ən məhsuldar arı cinslərindən sayılan Boz Qafqaz cinsi artıq cırlaşıb, mələzləşib. Bu gün arıların cins tərkibinin yaxşılaşdırılması biz arıçıların ən ümdə məsələsidir. Arıçılıqda məhsul istehsalına müsbət təsir edən əsas amillərdən biri erkən yaz dövründə arı ailələrinə düzgün qulluq edilməsidir. Yaz mövsümündə arıçıların arı pətəklərində görəcəyi işlər bol məhsulun əldə olunması baxımından əhəmiyyətlidir”.

Hikmət Əliyev arı xəstəliklərindən danışarkən qeyd edib ki, yaz yoxlanışı zamanı pətəklərdə arı xəstəliklərinin olub-olmamasına nəzarət etmək vacibdir: “Arı xəstəliklərinin vaxtında aşkarlanmaması, xəstəliklərə qarşı mübarizə tədbirlərinin görülməməsi arı ailəsinin məhv olmasına gətirib çıxarır. Bundan başqa, xəstəliklər nəticəsində zəifləmiş ailələrdə məhsuldarlıq da aşağı düşür. Təsərrüfatımızda arı xəstəliklərinə qarşı təbii üsullardan - bitki qarışığı və çiləmə metodundan istifadə edirik. Otları dəmləyib pətəklərə çiləyirik. Arıların fəal nektar gətirdiyi vaxtlar, profilaktik tədbirlər zamanı, kimyəvi vasitələrdən istifadə etmək olmaz, o cümlədən antibiotiklərdən istifadə yolverilməzdir. Arıçı yaradıcı olmalı, hər il öz təsərrüfatında yeniliklər tətbiq etməlidir. Arı bizə əməksevərliyi öyrədir”.

H.Əliyev arıçılıqda müşahidə qabiliyyətinin vacib əhəmiyyət kəsb etdiyini vurğulayıb: “Müşahidə etdiyim maraqlı hadisəni danışmaq istərdim. Pətəklərə baxış keçirdiyim zaman gördüm ki, arılar analıqda ana yetişdirirlər. Pətəyi nişanladım. Təkrar yoxlayan zaman iki ananın bir yerdə işlədiyini gördüm. Belə hadisəyə praktikamda rast gəlməmişdim. Amma arılar bir anaya qayğı göstərir, digərinə laqeyd yanaşırdılar. Zəif bəslənilən ana arını məcbur olub götürdüm. Adətən, pətəkdə iki ana arı olduqda biri digərini öldürür”.

Mübariz ABDULLAYEV

Yeni Azərbaycan.- 2018.- 15 dekabr.- S.7.