Regionlarda yeni su layihələrinin icrası intensiv şəkildə davam etdirilir

Yeni şəbəkələrin yaradılması, mövcud şəbəkələrin genişləndirilməsi hesabına abonentlərin sayı 60 faizdən çox artaraq 1 mln. 410 minə yüksəlib, sayğaclaşdırma səviyyəsi isə 77 faizə çatdırılıb

Azərbaycanda 2004-cü ildən etibarən regionların sosial-iqtisadi inkişafına dair müvafiq Dövlət proqramlarının uğurla reallaşdırılması sayəsində yeni müsbət reallıqlar yaranıb. Ölkədə tarazlı inkişaf təmin edilib, paytaxtla bölgələr arasında fərq minimuma endirilib.

Bəhs olunan Dövlət proqramları çərçivəsində həmçinin bölgələrdə çoxlu sayda infrastruktur layihələri reallaşdırılıb. Nəticədə regionların infrastruktur təminatı əhəmiyyətli dərəcədə yaxşılaşıb. Yeni yaradılan generasiya gücləri, yolların yüksək səviyyədə abadlaşdırılması, ucqar yaşayış məntəqələrinin belə qazlaşdırılması bir tərəfdən regionlarda iqtisadi aktivliyin artmasında mühüm rol oynayır, digər tərəfdən isə əhalinin həyat səviyyəsinin yüksəlməsinə müsbət təsir göstərir.

Son 14 ildə ölkə ərazisində 20-dən artıq su mənbəyinin yaradılması böyük nailiyyətdir

Regionların sosial-iqtisadi inkişafına dair müvafiq Dövlət proqramları çərçivəsində ayrı-ayrı şəhər və kənd yaşayış məntəqələrində çoxlu sayda su layihələrinin həyata keçirilməsi ölkə miqyasında müasir infrastruktur quruculuğuna yaxşı nümunədir. Bəhs olunan Dövlət proqramlarına uyğun olaraq respublikanın 50 şəhər və rayon mərkəzində su təchizatı və kanalizasiya sistemlərinin yenidən qurulması layihələrinin icrası həyata keçirilir. Ötən müddətdə bu şəhərlərin 23-də su və kanalizasiya şəbəkələrinin, 10-da su şəbəkələrinin inşası uğurla başa çatıb. Kənd yaşayış məntəqələrini içməli su ilə təmin etmək məqsədilə əhalisinin sayı 630 min nəfər olan 520 kənddə yeni layihələr icra olunub. 2004-2017-ci illərdə 20-dən artıq su mənbəyi yaradılıb, 1390 km-i magistral olmaqla 9230 km su kəmərləri, ümumi həcmi 530 min kubmetr olan 230 su anbarı tikilib, 300-dən artıq subartezian quyusu qazılaraq istismara verilib. Yeni şəbəkələrin yaradılması, mövcud şəbəkələrin genişləndirilməsi hesabına xidmət göstərilən abonentlərin sayı 60 faizdən çox artaraq 1 mln. 410 minə yüksəlib, sayğaclaşdırma səviyyəsi 77 faizə çatdırılıb.

Abşeron yarımadasının içməli su təchizatının yaxşılaşdırılması məqsədilə məhsuldarlığı saniyədə 6,6 kubmetr olan Ceyranbatan Ultrasüzgəcli Sutəmizləyici Qurğular Kompleksi inşa olunub. Aran bölgəsi sakinlərinin içməli suya olan tələbatını ödəmək üçün 107 km uzunluğunda Şirvan-Muğan, 62 km uzunluğunda Sabirabad-Saatlı qrup su kəmərləri tikilib. Həyata keçirilən bu və ya digər layihələr sayəsində ölkə əhalisinin içməli su təminatı əhəmiyyətli dərəcədə yaxşılaşıb. Əgər 2004-cü ildə ölkə üzrə fasiləsiz içməli su ilə təminat 26 faiz səviyyəsində idisə, hazırda bu göstərici 67 faizə yüksəlib.

Ölkə ərazisində yeni su layihələrinin icrası 2017-ci ildə də intensiv şəkildə davam etdirilib. Belə ki, ötən il ölkə miqyasında 1366 km magistral və şəbəkə su xətləri, 382 km kanalizasiya kollektoru və xətləri, 1 içməli və 1 tullantı sutəmizləyici qurğu, 10 su anbarı tikilib, 22 subartezian quyusu qazılıb, 6 nasos stansiyası, 105 min ədəd sayğac quraşdırılıb. Görülmüş işlər nəticəsində ölkə üzrə 116 min nəfər ilk dəfə mərkəzləşdirilmiş qaydada içməli su ilə təchiz edilib, 132 min nəfərin su təchizatı fasiləsiz rejimə keçirilib.

Ötən il regionlarda bir sıra irimiqyaslı su layihələri uğurla tamamlanıb. O cümlədən Saatlı, Gədəbəy, Cəlilabad, Şamaxı, Qobustan şəhərlərində və Pirallahı qəsəbəsində yeni infrastrukturun istismara verilməsi ilə bağlı açılış mərasimləri keçirilib.

Bundan başqa, 2017-ci ildə daha bir şəhərdə - Xırdalanda içməli su və kanalizasiya sistemlərinin yenidən qurulması işlərinə başlanılıb. Layihəyə əsasən, Xırdalan şəhərinin dayanıqlı və keyfiyyətli içməli su ilə təminatı Ceyranbatan Ultrasüzgəcli Sutəmizləyici Qurğular Kompleksi hesabına aparılacaq. Buradan götürülən suyun Xırdalan şəhərinə verilməsi məqsədilə Ceyranbatan-Zirə magistral su xətti üzərində hər birinin tutumu 10 min kubmetr olan “Abşeron” və “Masazır” su anbarlarının, həmçinin anbarlardan şəhərə qədər 1000 mm diametrli borularla 4,5 km magistral su xəttinin tikintisi nəzərdə tutulur.

Xırdalan şəhərində 168 km olan paylayıcı su şəbəkəsinin tikintisi və 21170 ev birləşməsinin verilməsi, abonentlərin sayğaclarla təmin olunması nəzərdə tutulub. Artıq paylayıcı su şəbəkəsinin 48 km-lik hissəsində işlər yekunlaşıb və ev birləşmələrinin verilməsinə başlanılıb. Yanğın təhlükəsizliyi məqsədilə şəbəkə üzərində 570 yanğın hidrantının quraşdırılması da nəzərdə tutulub.

Eyni zamanda, Xırdalan şəhərinin kanalizasiya infrastrukturu da yenidən qurulur. İnşası nəzərdə tutulan 109 km kanalizasiya şəbəkəsinin indiyədək 21 km-lik hissəsi tikilib. Layihə üzrə tikinti-quraşdırma işlərinin 2019-cu ildə başa çatdırılması planlaşdırılır.

2017-ci il həmçinin kənd yaşayış məntəqələrinin içməli su təchizatının yaxşılaşdırılması ilə əlamətdar olub. “Əhalinin içməli su ilə təminatının yaxşılaşdırılmasına dair əlavə tədbirlər haqqında” müvafiq Sərəncama uyğun olaraq ötən il “Azərsu” ASC tərəfindən respublikanın 28 rayonunun 170 yaşayış məntəqəsində 271 min kənd sakininin su təminatının yaxşılaşdırılması məqsədilə içməli su layihələri icra olunub.

Su çərşənbəsi Qazax və Ağstafa rayonlarının 7 kəndinin sakinləri üçün ikiqat bayrama çevrilib

“Əhalinin içməli su ilə təminatının yaxşılaşdırılmasına dair əlavə tədbirlər haqqında” Sərəncama uyğun olaraq Qazax və Ağstafa rayonlarında həyata keçirilən layihələr uğurla yekunlaşıb. Novruzun ilk - su çərşənbəsində layihələrin açılış mərasimləri keçirilib.

Qazax rayonunun Kəmərli kəndində keçirilən açılış mərasimində rayon İcra Hakimiyyətinin başçısı Rəcəb Babaşov kommunal infrastruktur layihələrinin əhəmiyyətindən danışıb. Bildirib ki, şəhər mərkəzi ilə yanaşı, kənd və qəsəbələrdə də həyata keçirilən içməli su layihələri əhalinin sosial-məişət şəraitinin yaxşılaşdırılmasına xidmət edir.

Ağstafa rayonunun Qarayazı kəndində keçirilən açılış mərasimində rayon İcra Hakimiyyətinin başçısı Məhərrəm Quliyev bildirib ki, kəndlərə suyun verilməsinin Novruz bayramının gəlişindən xəbər verən su çərşənbəsi ilə bir günə təsadüf etməsi sakinlərdə yüksək bayram ovqatı yaradıb. İcra başçısı qeyd edib ki, yeni içməli su xəttinin istismara verilməsi kənd sakinlərinə göstərilən yüksək dövlət qayğısının bariz nümunəsidir.

“Azərsu” ASC-nin sədr müavini Köçərli Həsənov sözügedən Sərəncama uyğun olaraq həyata keçirilən layihələr barədə məlumat verib. Bildirib ki, artıq bütün rayonlarda tikinti-quraşdırma işləri yekunlaşıb və 2018-ci ildə də içməli sudan əziyyət çəkən digər kəndlərdə layihələrin icrası davam etdiriləcək.

Ağstafa rayonunda icra olunan layihə rayonun Qarayazı, Soyuqbulaqlar, Soyuqbulaq və Həzi Aslanov kəndlərini əhatə edib. Qarayazı, Soyuqbulaqlar və Soyuqbulaq kəndlərində yaşayan sakinləri keyfiyyətli və dayanıqlı içməli su ilə təmin etmək məqsədilə bir ədəd yeni subartezian quyusu qazılıb, 25 kubmetrlik su çəni və nasosxana quraşdırılıb. Həzi Aslanov kəndinin içməli su təchizatı mövcud artezian quyusu hesabına həyata keçirilir. Bu kəndlərdə əhalinin ümumi istifadəsi məqsədilə 31 ədəd bulaq quraşdırılıb. Ümumilikdə bu layihədən 4 kəndin 2550 nəfər sakini faydalanıb.

Qazax rayonunda icra olunan layihə isə rayonun Kəmərli, Aslanbəyli və Daş Salahlı kəndlərini əhatə edib. Kəmərli və Aslanbəyli kəndlərini içməli su ilə təmin etmək üçün kəndlərin hər birində subartezian quyusu qazılıb. Daş Salahlı kəndinin su təchizatı üçün isə Coğazçay su mənbəyi seçilib. Layihə çərçivəsində Aslanbəyli kəndində əhalinin ümumi istifadəsi üçün 13 ədəd bulaq quraşdırılıb. Kəmərli və Daş Salahlı kəndlərində isə mövcud olmuş və istismara yararsız vəziyyətə düşmüş şəbəkə su xətləri yenilənib. Bu layihənin icrası nəticəsində Qazax rayonunun 3 kəndinin 17500 sakininin içməli su problemi həll edilib.

Müştəri məmnunluğu yüksək səviyyədə təmin edilir

Ölkə üzrə xidmət şəbəkəsinin genişləndirilməsi, abonentlərin sayının artması ilə yanaşı, müştəri məmnunluğunun təmin edilməsi də “Azərsu”nun qarşıya qoyduğu hədəflər sırasında yer alır. Qurumdan bildirilib ki, “Azərsu” Açıq Səhmdar Cəmiyyətinin Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “ASAN xidmət” və “ASAN Kommunal” mərkəzlərində təmsil olunması istehlakçılara göstərilən xidmətlərin keyfiyyətini yüksəldir və bu sahədə şəffaflığın artırılmasını təmin edir.

2017-ci ildə “ASAN xidmət” və “ASAN Kommunal” mərkəzlərində fəaliyyət göstərən “Azərsu” ASC-nin xidmət bölmələrinə abunəçilər tərəfindən müxtəlif məsələlərlə bağlı ümumilikdə 55092 müraciət edilib. Müraciətlərin 26793-ü “ASAN xidmət”, 28299-u isə “ASAN Kommunal” mərkəzlərində qeydə alınıb. İtirilmiş və zədələnmiş smart kartların bərpası, abonent məlumatlarına dəyişikliklərin edilməsi, borclar haqqında məlumatların verilməsi ilə bağlı müraciətlər üstünlük təşkil edib. Ən çox müraciət Sabunçu rayonundakı, Sumqayıt və Gəncə şəhərlərindəki “ASAN xidmət” mərkəzlərində, həmçinin 2 saylı “ASAN Kommunal” mərkəzində qeydə alınıb.

Qeyd edək ki, “ASAN xidmət” mərkəzlərində “Azərsu” ASC-nin müştəri xidmətlərinin göstərilməsinə 2014-cü ilin may ayından başlanılıb. 2017-ci ildən “Azərsu” ASC “ASAN Kommunal” mərkəzlərində də təmsil olunur. Ümumilikdə 2014-2017-ci illərdə bütün xidmət mərkəzlərinə vətəndaşlar tərəfindən müxtəlif məsələlərlə bağlı 108778 müraciət daxil olub. Hazırda “Azərsu” ASC-nin xidmətləri Sabunçu rayonundakı 4 və Nizami rayonundakı 5 saylı, Sumqayıt, Gəncə, Sabirabad, Bərdə, Qəbələ və Masallı şəhərlərindəki “ASAN xidmət”, həmçinin 1 və 2 saylı “ASAN Kommunal” mərkəzlərində təşkil olunub.

Mübariz ABDULLAYEV

Yeni Azərbaycan.- 2018.- 1 mart.- S.6.