Ərzurumda Azərbaycan Xalq Cümhuriyyətinin 100 illiyinə həsr olunan konfrans keçirilib

Türkiyənin Ərzurum şəhərində Azərbaycan Xalq Cümhuriyyətinin yaranmasının və Ərzurum bölgəsinin erməni işğalından azad olunmasının 100-cü ildönümləri münasibətilə konfrans keçirilib. Konfransdan əvvəl Azərbaycan və Türkiyədən olan yürüşçülər Ərzurumun mərkəzi prospekti ilə nümayiş keçiriblər. Yürüşçülərin əllərində Azərbaycan və Türkiyənin dövlət bayraqları, xalqlarımızın və ölkələrimizin dostluq və qardaşlığını tərənnüm edən şüarlar dalğalandırılıb.

AZƏRTAC xəbər verir ki, Azərbaycanın Ankaradakı səfirliyinin, Ərzurum Böyükşəhər Bələdiyyəsinin, Türkiyə Dil və Ədəbiyyat Dərnəyi Ərzurum şöbəsinin (TDƏD) və “Eko Avrasiya” Dərnəyinin birgə təşkilatçılığı ilə “Yüzümüz özümüz bir!” devizi altında keçirilən mərasim Azərbaycan və Türkiyənin dövlət himlərinin səsləndirilməsi ilə başlanıb. Sonra şəhidlərimizin xatirəsi bir dəqiqəlik sükutla yad olunub.

Sonra Ərzurum Böyükşəhər Bələdiyyəsinin sədri Mehmet Səkmən, Ərzurum valisi Seyfeddin Azizoğlu, Azərbaycanın Qarsdakı baş konsulu Nuru Quliyev, Ankaradakı səfirliyimizin müşaviri Ramil Qurbanov, Azərbaycan və Türkiyədən olan deputatlar Qənirə Paşayeva və İbrahim Aydəmir, TDED Ərzurum şöbəsinin sədri Murad Ertaş, “Eko Avrasiya” Dərnəyinin sədri Hikmet Eren və başqalarının çıxışları olub.

Mərasimdə Azərbaycan Xalq Cümhuriyyətinin yaranması, keçdiyi ağır və şərəfli yol, o cümlədən süqutu və onun acı nəticələri, eləcə də 1918-ci ildə erməni işğalından azad edilənə qədər erməni silahlılarının Ərzurum bölgəsində dinc əhaliyə divan tutması barədə müfəssəl məlumat verilib. Çıxışçılar diqqətə çatdırıblar ki, XX əsrin əvvəllərindən başlayaraq Azərbaycan və Türkiyə ərazisində baş verən bütün qanlı hadisələrdə erməni cəlladları fəal iştirak ediblər.

Prezident İlham Əliyevin müvafiq Sərəncamı ilə 2018-ci ilin “Azərbaycan Xalq Cümhuriyyəti İli” elan olunması yüksək qiymətləndirilib. Vurğulanıb ki, bu qərar Azərbaycan xalqının dövlətçilik tarixinin dünyada tanınmasına və təbliğinə böyük stimuldur.

Mərasim martın 10-dək davam edəcək.

Yeni Azərbaycan.- 2018.- 10 mart.- S.6.