Azərbaycanın bölgələrində yaşayış məntəqələrinin qazlaşdırılması ilə bağlı tədbirlər davam etdirilir

Bu il “Azəriqaz” İstehsalat Birliyi tərəfindən 99 yaşayış məntəqəsinə təbii qaz verilib

Öz inkişafına görə regionun lider dövləti olan Azərbaycanda həyata keçirilən siyasət bütün sahələrin tərəqqisinə səbəb olub. Heç şübhəsiz bu baxımdan regionların sosial-iqtisadi inkişafına dair Dövlət proqramları çərçivəsində görülən işlər xüsusi önəm kəsb edir. Məhz bu proqramlar çərçivəsində ötən 15 il ərzində regionlarda genişmiqyaslı abadlıq-quruculuq işləri görülüb, həmçinin, bölgələrdə istər qazlaşdırma, istər elektrik enerjisi ilə təminat, istərsə də digər kommunikasiya və xidmət sahələrinin yüksək səviyyəyə çatması istiqamətində mühüm addımlar atılıb.

Beləliklə, son illərdə Azərbaycanın güclü infrastruktur təminatına malik ölkəyə çevrilməsi istiqamətində görülən işlər qazlaşdırma sahəsində də mühüm uğurların əldə edilməsinə səbəb olub. 2004-cü ildən ötən dövr ərzində Azərbaycanda qazlaşdırma, demək olar ki, iki dəfəyə yaxın artıb. Artıq proses indiyədək qazlaşdırılmayan və yaxud müəyyən səbəblərdən qaz təminatı dayandırılan kəndləri və kiçik yaşayış məntəqələrini də əhatə edir. Cari ildə regionlarda yaşayış məntəqələrinin qazlaşdırılması ilə bağlı qarşıya qoyulan hədəflər isə yüksək səviyyədə icra edilir. Məlum olduğu kimi, Prezident İlham Əliyev 5 mart 2018-ci il tarixində “Yaşayış məntəqələrinin qazlaşdırılması ilə bağlı tədbirlər haqqında” müvafiq Sərəncam imzalayıb. Sərəncamda vurğulanır ki, son illər əhalinin təbii qaza tələbatının təmin edilməsi istiqamətində bir sıra vacib tədbirlər həyata keçirilmiş, qaz təchizatı infrastrukturu yenidən qurulmuş, təbii qazla təchiz olunmayan yaşayış məntəqələrinə qaz kəmərləri çəkilmiş, əhaliyə verilən təbii qazın dəyərinin tam həcmdə ödənilməsini təşkil etmək məqsədilə sayğaclaşma işləri aparılmışdır. Görülən işlərin davamı kimi 2018-ci ilin sonunadək ölkədə qazlaşdırmanın səviyyəsini 95 faizə çatdırmaq nəzərdə tutulur.

Bu məqamda vurğulamaq yerinə düşər ki, bu il “Azəriqaz” İstehsalat Birliyi (İB) tərəfindən 99 yaşayış məntəqəsinə təbii qaz verilib. Bu ilin yanvar-oktyabr ayları ərzində 2848 kilometr yeni qaz kəməri quraşdırılıb, qaz kəmərləri şəbəkəsinin təhlükəsiz və normal rejimdə istismarının təmin olunması üçün isə 208,8 kilometr qaz kəməri əsaslı təmir olunub. Bu il ərzində aparılan tikinti-quraşdırma işləri nəticəsində Ağstafa, Ağcabədi, Ağsu, İsmayıllı, Bərdə, Tərtər, Zərdab, Kürdəmir, Qax, Quba, Şabran, Siyəzən, Şəmkir, Şamaxı, Şəki, Göyçay, Göygöl, Ucar, Xaçmaz, Beyləqan, Yevlax, Lerik, Lənkəran, Sabirabad, Saatlı, Salyan, Neftçala, Cəlilabad və Masallı rayonları üzrə 99 yaşayış məntəqəsi təbii qazla təmin edilib.

Onu da qeyd edək ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası istiqamətində “Azəriqaz” İB tərəfindən respublika ərazisində qaz təchizatı sisteminin yenidən qurulması, kənd və qəsəbələrin qazlaşdırılması, həmçinin uzun müddət təbii qaz almayan yaşayış məntəqələrinin yenidən “mavi yanacaq”la təmin edilməsi istiqamətində görülən məqsədyönlü tədbirlər nəticəsində respublikanın qaz təchizatı şəbəkəsi genişləndirilir və müasirləşdirilir. Bu məqsədlə, noyabrın 8-də Ucar rayonunun Bərgüşad kəndinə təbii qazın verilməsi kənd sakinlərinin böyük sevincinə səbəb olub. Ümumilikdə 1247 fərdi evdən ibarət olan kəndin qazlaşdırılması üçün birpilləli sistem əsasında ümumi uzunluğu 126 min 506 metr olan müxtəlif diametrli polad və polietilen borularla daşıyıcı, paylayıcı, həmçinin məhəllədaxili qaz xətləri çəkilib, hər bir mənzilə sayğac və fərdi tənzimləyici quraşdırılıb. Yeni qazlaşdırılan yaşayış sahələrində qaz şəbəkəsinin qurulmasında “birpilləli” tənzimləmə sistemi tətbiq edilib ki, bu da hər bir abonentin fərdi qaztənzimləyicidən istifadə etməsinə və istehlakçılara ötürülən qazın sabit rejimdə saxlanılmasına zəmin yaradır. Hazırda rayonun Əlikənd və Ramal kəndlərində tikinti, quraşdırma işləri yekunlaşdırılaraq istismara qəbul mərhələsindədir. Tezliklə həmin kəndlərə təbii qazın verilişi təmin ediləcək.

SOCAR-ın “Azəriqaz” İstehsalat Birliyi tərəfindən Qusar rayonunun Piral və Cibir kəndlərinin “mavi yanacaq”la təmin olunması işləri isə yekunlaşmaq üzrədir. Tikinti işləri yekunlaşdıqdan sonra yaşayış məntəqələrində 1020 abonent ilk dəfə “mavi yanacaq”la təmin ediləcək. Artıq işlərin 95 faizi görülüb. Hazırda hər iki kənddə abonentlər üçün sayğac və fərdi tənzimləyicilər quraşdırılır. Qeyd edək ki, Piral kəndində qazlaşdırma işlərinə aprel ayından start verilib. Kəndin qazla təmin olunması üçün 38 min metrə yaxın müxtəlif diametrli polad və polietilen borulardan istifadə edilib. Yeni qazlaşdırılan yaşayış sahələrində qaz şəbəkəsinin qurulmasında birpilləli tənzimləmə sistemi tətbiq olunub. Bu da hər bir abonentin fərdi qaztənzimləyicidən istifadə etməsinə və istehlakçılara ötürülən qazın sabit rejimdə saxlanılmasına zəmin yaradır. Kəndlərin qazlaşdırılması Azərbaycan Prezidentinin “Yaşayış məntəqələrinin qazlaşdırılması ilə bağlı tədbirlər haqqında” 2018-ci il 5 mart tarixli Sərəncamına əsasən icra olunur.

Eləcə də regionların sosial-iqtisadi inkişafına dair Dövlət Proqramında müəyyən edilən tədbirlərə müvafiq olaraq Salyanın Peyk kəndinə ilk dəfə təbii qaz verilib. Məlumat üçün bildirək ki, hazırda rayonun 51 yaşayış məntəqəsindən 45-də təbii yanacaqdan istifadə olunur. Peyk kəndi rayonun “mavi yanacaq”la təmin olunan 46-cı kəndidir. 232 fərdi yaşayış evindən ibarət olan və 2500 nəfər əhalinin yaşadığı kəndin qazlaşdırılması üçün birpilləli sistem əsasında 31013 metr metal və polietilen borularla daşıyıcı və paylayıcı qaz xətləri çəkilib, mənzillərə sayğac və fərdi tənzimləyici quraşdırılıb. Qeyd edək ki, gələn il daha 5 kəndə təbii qazın verilməsi nəzərdə tutulub.

Şəkinin Baş Küngüt kəndinə də təbii qaz verilib. Ümumilikdə 351 fərdi evdən ibarət olan kəndin qazlaşdırılması üçün birpilləli sistem əsasında ümumi uzunluğu 34 min 700 metr olan müxtəlif diametrli metal və polietilen borularla daşıyıcı, həmçinin məhəllədaxili qaz xətləri çəkilib, hər bir mənzilə sayğac və fərdi tənzimləyici quraşdırılıb. Yeni qazlaşdırılan yaşayış sahələrində qaz şəbəkəsinin qurulmasında “birpilləli” tənzimləmə sistemi tətbiq edilib ki, bu da hər bir abonentin fərdi qaztənzimləyicidən istifadə etməsinə və istehlakçılara ötürülən qazın sabit rejimdə saxlanılmasına zəmin yaradır. Hazırda rayonun Çayqaraqoyunlu kəndində tikinti, quraşdırma işləri davam etdirilir. Tezliklə tikinti işləri başa çatdırılaraq təbii qazın verilişi təmin ediləcək.

Respublikamızın hər yerində olduğu kimi, Kürdəmir rayonunda da yaşayış məntəqələrinin qazlaşdırılması istiqamətində tədbirlər davam etdirilir. Rayonun daha iki kəndinə - 3227 nəfər əhalisi olan Mollakənd və 3104 nəfər sakinin yaşadığı Muradxan yaşayış məntəqələrinə təbii qaz verilib. 576 abonenti olan Mollakənd və 521 abonenti olan Muradxan kəndlərinin qazlaşdırılması üçün birpilləli sistem əsasında 13615 metr daşıyıcı, 90257 metr yerüstü məhəllədaxili paylayıcı qaz xətləri çəkilib, mənzillərə 1097 tənzimləyici və qaz sayğacı quraşdırılıb. Hər bir mənzilin mətbəxinə SOCAR-ın “Azəriqaz” İstehsalat Birliyinin hesabına daxili qaz xətti çəkilib.

Vurğulayaq ki, hazırda Kürdəmir şəhəri də daxil olmaqla, rayonun 62 yaşayış məntəqəsinin 58-nə təbii qaz verilib. 19893 abonent “mavi yanacaq”dan istifadə edir ki, bu da rayon əhalisinin 95 faizini təşkil edir. Hazırda rayonun Qarasu kəndində qazlaşdırma işləri aparılır. Qalan üç yaşayış məntəqəsində - Qarabucaq qəsəbə, Qarabucaq kənd və Qurdbayram kəndlərində layihə-smeta işləri görülür.

Ağcabədi rayonunda isə məcburi köçkünlərin məskunlaşdığı Qayğı qəsəbəsinə təbii qaz verilib. 54 fərdi evdən ibarət olan qəsəbənin qazlaşdırılması üçün birpilləli sistem əsasında ümumi uzunluğu 2 min 746 metr müxtəlif diametrli metal borularla daşıyıcı və paylayıcı qaz xətləri çəkilib, hər bir mənzilə sayğac və fərdi tənzimləyici quraşdırılıb.

Regionların 2014-2018-ci illərdə sosial-iqtisadi inkişafı Dövlət Proqramının icrası çərçivəsində SOCAR-ın ‘’Azəriqaz’’ İstehsalat Birliyi tərəfindən Sabirabadın Yastıqobu kəndinə də ilk dəfə təbii qaz verilib. İndiyədək rayonun 74 yaşayış məntəqəsindən 62-si qazlaşdırılıb. Onların sırasına 62 fərdi evi olan Yastıqobu kəndi də əlavə olunub. Kəndin qazlaşdırılması üçün birpilləli sistem əsasında 8 min 620 metr müxtəlif diametrli polietilen borularla daşıyıcı və məhəllədaxili qaz xətləri çəkilib, mənzillərə sayğac və fərdi tənzimləyici qoyulub. Vurğulandığı kimi, Sabirabad şəhəri də daxil olmaqla, rayonun 62 kənd və 2 məcburi köçkün qəsəbəsi təbii qazla təmin olunub. Qalan 12 yaşayış məntəqəsinin də qazlaşdırılması nəzərdə tutulur. Hazırda rayonun Rüstəmli kəndi ərazisində Zəngilandan olan məcburi köçkünlərin məskunlaşdığı qəsəbədə tikinti-quraşdırma işləri başa çatıb. Tezliklə qəsəbə sakinləri təbii qazdan istifadə edə biləcəklər.

Tərtər rayonuna gəlincə, verilən məlumata görə rayonun təbii qazla təmin edilən yaşayış məntəqələrinin sırasına Hacallı, Soyulan, Alışarlı və Aşağı Qapanlı, Rəcəbli, Kövdadıq, Bildirçinli və Umudlu kəndləri də əlavə olunub. Ümumilikdə, 428 fərdi evdən ibarət olan kəndlərin qazlaşdırılması üçün birpilləli sistem əsasında 29 min 578 metr müxtəlif diametrli metal borularla daşıyıcı və paylayıcı qaz xətləri çəkilib, mənzillərə sayğac və fərdi tənzimləyici quraşdırılıb. Yeni qazlaşdırılan yaşayış sahələrində qaz şəbəkəsinin qurulmasında “birpilləli” tənzimləmə sistemi tətbiq edilib ki, bu da hər bir abonentin fərdi qaztənzimləyicidən istifadə etməsinə və istehlakçılara ötürülən qazın sabit rejimdə saxlanılmasına zəmin yaradır.

Pərviz SADAYOĞLU

Yeni Azərbaycan.- 2018.- 16 noyabr.- S.7.