Regionlarda turist cəlbediciliyinin artırılması məqsədilə həyata keçirilən tədbirlər müsbət nəticələr verir

2018-ci ilin yanvar-iyul aylarında Azərbaycana gələn turistlərin sayı ötən ilin müvafiq dövrü ilə müqayisədə 9,3 faiz artıb

Turizmin ayrı-ayrı ölkələrin iqtisadiyyatındakı mövqeyi getdikcə güclənir. Turizm potensialına malik olan dövlətlər müxtəlif təşviq tədbirləri görməklə daha çox sayda turisti cəlb etməyə və beləliklə də öz gəlirlərini artırmağa çalışırlar. Dünya Turizm Təşkilatının yeni hesabatına görə, 2017-ci ildə Dubayda beynəlxalq turizmdən əldə edilən gəlir 77,5 milyard dirhəm (21,1 milyard dollar) olub. Hesabatda bildirilir ki, gəlirlərin həcmi əvvəlki ilin göstəricisi ilə müqayisədə 8 faiz artıb.

Turizm sektoru İspaniyada iş yerlərinin sayına görə əvvəlki lideri - tikinti sektorunu geridə qoyaraq bu göstərici üzrə ölkədə birinci yeri tutur. Hazırda İspaniyada işləyən əhalinin 75,5 faizi xidmətlər sahəsində çalışır. Verilən məlumatlarda göstərilir ki, 2018-ci ilin baharında bu ölkədə turizm sahəsində işləyənlərin sayı 2,65 milyondan çox olub.

Beynəlxalq Turizm Təşkilatının proqnozları da bu sektorun necə gəlirli sahə olduğu barədə konkret təsəvvür yaradır. BTT-nin yaydığı hesabata əsasən, 2020-ci ildə dünyada turistlərin sayı 1,6 milyard nəfərə, turizmdən əldə olunan gəlirlərin miqdarı isə 2000-ci illə müqayisədə 481 milyard ABŞ dollarından 2 trilyon dollara qədər artacaq.

Yeni iqtisadi şəraitdə qeyri-neft sektorunun üstün inkişafını hədəfləyən Azərbaycanda da turizmin inkişafı diqqət mərkəzində saxlanılır. Qeyd edək ki, respublikamızın turizm potensialı kifayət qədər genişdir. Son illərdə bütün ölkə üzrə yaradılan müasir infrastruktur, tarixi abidələr, əhalinin qonaqpərvərliyi, tolerantlıq mühiti, milli mətbəxin zənginliyi ölkəmizin turist cəlbediciliyinin artmasına müsbət təsir göstərən amillərdir. Azərbaycan turizm sektorunu inkişaf etdirməklə bir tərəfdən özünün milli gəlirlərini artırmaq, digər tərəfdən isə xalqımızın dəyərlərinin, o cümlədən də adət-ənənələrimizin, zəngin mədəniyyətimizin dünyada layiqli şəkildə təbliğ edilməsinə nail olmaq istəyir.

2018-ci ilin əvvəlindən ölkəmizə gələn turistlərin sayında artım müşahidə edilib

Cari ilin arxada qalan dövrü ərzində ölkəmizə səfərə gələn əcnəbi turistlərin sayında artım müşahidə edilib. Bu barədə KİV-ə Dövlət Turizm Agentliyinin nümayəndəsi Kənan Quluzadə məlumat verib. Agentlik rəsmisi bildirib ki, cari ilin iyul ayında Azərbaycana səfər edən əcnəbilərin sayı ötən ilin eyni ayı ilə müqayisədə 5,3 faiz artaraq 330 minə çatıb. Əcnəbilərin təqribən üçdəbir hissəsini (119 min nəfər) Rusiya vətəndaşları təşkil edir. Digər 20 faiz və 15 faiz əcnəbilər isə Yaxın Şərq ölkələri və Gürcüstanın payına düşür. Ümumən götürdükdə, qeyd edilən ölkələrdən gələnlər Azərbaycana səfər etmiş əcnəbilərin 70 faizini təşkil edir.

2018-ci ilin ilk yeddi ayında Azərbaycana səfər edən səyahətçilərin sayı 1,65 milyondan çox olaraq ötən ilin analoji dövrü ilə müqayisədə 9,3 faiz artıb. Bu axının böyük hissəsi, 0,5 milyon, yəni 31, 5 faizi Rusiyadan olan səyahətçilərin payına düşür. Gürcüstan (20 faiz), Yaxın Şərq bölgəsi (13 faiz ), Türkiyə (10 faiz) və İran (10 faiz) əcnəbi axınının digər əhəmiyyətli mənbələri sayılırlar.

Xarici ölkələrdən səfər edənlərin, xüsusilə Gürcüstandan (9 faiz) və Yaxın Şərq bölgəsindən (54 faiz) gələnlərin sayında artım mövcuddur. Yaxın Şərq bölgəsindən səfər edənlərin (58 min nəfər) böyük bir hissəsini BƏƏ vətəndaşları təşkil edir. Səudiyyə Ərəbistanından Azərbaycana 42 minə yaxın səyahətçi gəlib və bu rəqəm 2017-ci ilin göstəricisi ilə müqayisədə iki dəfədən çox yüksəkdir.

2018-ci ilin yanvar-iyul aylarında Cənubi və Şərqi Asiya ölkələrindən 112 minə yaxın səyahətçi ölkəmizə səfər edib və bu göstərici ötən ilin analoji dövrü ilə müqayisədə 57 faiz artım deməkdir. Bu bölgələrdən olan axının əsas hissəsini Qazaxıstan (5%), Pakistan (209%), Hindistan (188%) və Türkmənistandan (80%) olan səyahətçilər təşkil ediblər.

Respublikanın bölgələrində yeni layihəyə start verilib

Qeyd etdiyimiz kimi, respublikamızda turist cəlbediciliyini artırmaq məqsədilə müxtəlif tədbirlər həyata keçirilir. 2018-ci ilin avqustunda sağlam və təmiz qida sahəsində dünya üzrə qlobal təşkilat olaraq fəaliyyət göstərən “Slou Fud”un (Slow Food) təşəbbüsü ilə “Azərbaycanda Böyük Qafqaz regionunun kənd ərazilərində dəyər zəncirinin yaradılmasının təkmilləşdirilməsi” adlı üçillik layihəyə start verilib.

Layihə “Paşa Travel” şirkəti ilə əməkdaşlıq çərçivəsində Heyvanların Müdafiəsi İctimai Birliyi və Azərbaycan Kənd Bələdiyyələrinin Milli Assosiasiyasının tərəfdaşlığı, Kənd Təsərrüfatı Nazirliyi, Ekologiya və Təbii Sərvətlər Nazirliyi, Təhsil Nazirliyi və Dövlət Turizm Agentliyinin dəstəyi ilə həyata keçirilir.

Dövlət Turizm Agentliyindən bildirilib ki, ilkin olaraq “Slou Fud” modellərinin tətbiqi üçün Şəki, Qəbələ, Şamaxı, İsmayıllı və Qax rayonları ərazisində həyata keçirilməsi planlaşdırılan layihə çərçivəsində yerli qida məhsullarının istehlakının təşviqi üzrə milli kampaniyanın, Azərbaycanda kənd təsərrüfatının inkişafı üzrə beynəlxalq kampaniyanın, Azərbaycan nümayəndə heyətinin “Slou Fud”un beynəlxalq tədbirlərində iştirakını nəzərdə tutan tədbirlərin həyata keçirilməsi planlaşdırılıb.

Layihə aqro-biomüxtəliflik və mədəni irsin qorunması, yerli qastronomiyanın dəyərinin artırılması, əhalinin gəlirlərinin potensial davamlılığı ilə yanaşı, turistik məhsulların inkişafı kimi müxtəlif məsələləri əhatə edəcək.

Uzunmüddətli məqsədlər sırasına təbii ehtiyatların istifadəsinin optimallaşdırılması, işsizlik səviyyəsinin və kənd təsərrüfatı miqrasiyasının azaldılması, həmçinin ərazinin dayanıqlılığının artırılması daxildir. Layihənin həyata keçirilməsi ilə qida məhsulları istehsalının dinamik inkişafının təkcə kənd ərazilərində deyil, eyni zamanda, kənd təsərrüfatı məhsullarının əsas satış bazarı olan şəhər mərkəzlərində də məşğulluğun artırılması və saxlanılmasıda müsbət rol oynayacağı planlaşdırılır. Həmçinin kənd ərazilərinin inkişafına yeni yanaşmaların tətbiq edilməsi Azərbaycan iqtisadiyyatının diversifikasiyalaşması üçün xüsusi əhəmiyyət daşımaqla sosial sabitliyin təmininə də dəstək vermiş olacaq. Mütəxəssislərin qənaəti belədir ki, bu kimi tədbirlər Azərbaycanın bölgələrində turist cəlbediciliyinin artmasına müsbət təsir göstərəcək.

Veteranlar onlar üçün “Şahdağ”a təşkil olunan istirahət turundan məmnun qalıblar

Dövlət Turizm Agentliyinin dəstəyi ilə Müharibə, Əmək və Silahlı Qüvvələr Veteranları təşkilatının 40 nəfər üzvü üçün “Şahdağ” Turizm Mərkəzinə birgünlük istirahət turu təşkil olunub. Agentlikdən KİV-ə bildirilib ki, tur çərçivəsində veteranların və ailə üzvlərinin istirahəti üçün hər cür şərait yaradılıb.

Qurum tərəfindən Prezident İlham Əliyevin müvafiq Sərəncamı ilə təsdiq edilmiş “Ahıl vətəndaşların sosial müdafiəsinin gücləndirilməsi üzrə Dövlət Proqramı”nın icrası ilə əlaqədar olaraq əhalinin müvafiq təbəqəsinin, o cümlədən sovet ordusunda (donanmasında), daxili işlər və dövlət təhlükəsizliyi orqanlarında hərbi xidmətdə olmuş, Vətənin müdafiəsi uğrunda döyüş əməliyyatlarında iştirak etmiş veteranlara, habelə əmək veteranlarına sosial diqqət və qayğının göstərilməsi, onların asudə vaxtlarının səmərəli keçirilməsi üçün bu cür turların mütəmadi olaraq həyata keçirilməsi planlaşdırılır. Veteranlar onlar üçün “Şahdağa”a təşkil olunan istirahət turundan məmnun qalıblar.

“Quba - Azərbaycanın heyranedici regionu”

İsveçrənin www.travel-blog.ch səyahət portalında “Quba - Azərbaycanın heyranedici regionu” adlı məqalə dərc olunub. Məqalədə Qubada yerləşən və turistlərin marağını cəlb edən məkanlar barədə ətraflı məlumat verilir. Məqalədə bir çox məşhur avropalı səyyahın XIX əsrdə Quba ilə bağlı təəssüratları diqqətə çatdırılır və bu regionun tarixi, mədəni abidələrlə zənginliyindən bəhs edilir. Regionda qədim körpülər, məscidlər, hamamlar, muzeylər mövcuddur və Quba özünün xalçaçılığı ilə də məşhurdur.

Yazıda Qubanın multikultural dəyərləri barədə də məlumat verilərək qeyd olunur ki, bu yer müxtəlif millətlərin tolerantlıq şəraitində yaşadığı məkandır. Məqalədə həmçinin bildirilir ki, Qubaya gələn turistlərin səyahət etdikləri məkanlardan biri də 1918-ci ildə bolşevik-erməni silahlı dəstələrinin Azərbaycan torpaqlarında həyata keçirdikləri kütləvi qırğınlar nəticəsində həlak olan on minlərlə azərbaycanlının xatirəsinə ucaldılan Quba Soyqırımı Memorial Kompleksidir.

Məqalədə Qubanın öz alması ilə məşhur olduğu vurğulanır və son illərdə turizmin inkişaf etdirilməsi istiqamətində görülən işlər barədə məlumat verilir. Belə ki, rayonda 40 mehmanxana fəaliyyət göstərir, eyni zamanda burada turistlərin yüksək səviyyədə dincəlməsi üçün çoxlu sayda restoran və kafelər də mövcuddur.

Naftalanda neftlə əvəzolunmaz müalicə

“Azərbaycan dünyada bənzəri olmayan bir müalicə üsuluna malikdir - Naftalan nefti ilə müalicə. Bakının 320 kilometrliyində yerləşən Naftalandakı bu möcüzəli yağ dəri xəstəlikləri, revmatizm, qan dövranı və s. müalicəsi üçün şəfa mənbəyidir”. Bu barədə “Euronews” telekanalının Naftalan neftindən bəhs edən reportajında deyilir. Məşhur aparıcı Serxio Kantone reportajında Naftalan şəhərinin turizm sahəsində geniş təcrübəsi və dünyada bənzəri olmayan bu neftlə müalicə üsulları barədə məlumat verir.

Müəllif qeyd edir ki, Naftalan nefti nəqliyyat yanacağı üçün istifadə edilən neftdən deyil. Onu fərqləndirən və möcüzəli edən məhz orqanizm üçün xeyirli xüsusiyyətləridir.

Reportajda Naftalan neftinin orqanizmə müsbət təsirlərindən, insanların bu neftə üstünlük vermələrinin səbəblərindən danışan həkim Dilbər Kazımova onun hansı xəstəliklər zamanı faydalı olması barədə ətraflı məlumat verib.

Müəllif onu da diqqətə çatdırıb ki, burada təyin edilən müalicə müddətində xəstələr hər gün 10 dəqiqə neft vannası qəbul edirlər. Bu vannalar bir çox xroniki xəstəliklərin müalicəsində də müsbət təsirə malikdir.

Mübariz ABDULLAYEV

Yeni Azərbaycan.- 2018.-14 sentyabr.- S.7