Regionlarda kənd və qəsəbələrin qazlaşdırılması istiqamətində ardıcıl tədbirlər həyata keçirilir

Respublika ərazisində qaz təchizatı sisteminin yenidən qurulması, həmçinin uzun müddət təbii qaz almayan yaşayış məntəqələrinin yenidən “mavi yanacaq”la təmin edilməsi istiqamətində görülən işlər nəticəsində ölkəmizin qaz təchizatı şəbəkəsi genişləndirilir və müasirləşdirilir

Son illərdə Azərbaycanın bölgələrində müasir infrastruktur quruculuğu geniş vüsət alıb ki, bu da həm iqtisadi, həm də sosial mahiyyət daşıyır. Regionlarda dövlət əsaslı vəsait qoyuluşu hesabına yaradılan yüksək səviyyəli infrastrukturdan bəhrələnən investorlar iqtisadiyyatın müxtəlif sahələrinə məmnuniyyətlə böyükhəcmli sərmayələr yönəldirlər. Bunun nəticəsidir ki, artıq bölgələrdə də yüksək iqtisadi aktivlik müşahidə edilir.

Eyni zamanda, regionlarda rahat yolların salınması, generasiya güclərinin artırılması, su layihələrinin icrası insanların həyat şəraitinin yaxşılaşmasına, kommunal xidmətlərə əlçatanlığın təmin olunmasına müsbət təsir göstərir. Beləliklə, yaşayış yerləri üzrə hər cür rahatlıqlarla təmin olunan sakinlər, ələlxüsus da gənclər doğma yurd yerlərinə daha möhkəm tellərlə bağlanırlar.

Ölkə üzrə müasir infrastruktur quruculuğu qazlaşdırma sahəsində də qabarıq şəkildə nəzərə çarpır. Məlumdur ki, bir vaxtlar bölgələrdə qazlaşdırma sahəsində vəziyyət heç də ürəkaçan deyildi. Regionlarda çoxlu sayda yaşayış məntəqəsi “mavi yanacaq”la təmin edilmədiyinə görə insanlar gündəlik ehtiyaclarını ödəmək, qışda evlərini isitmək üçün adətən odundan istifadə edirdilər ki, bu da öz növbəsində yaşıllıqların, meşələrin qırılmasına səbəb olurdu.

Son 15 ildə regionların “mavi yanacaq”la təminatında vəziyyət əhəmiyyətli dərəcədə dəyişib. Bəhs olunan dövrdə bütün ölkə boyu çoxlu sayda qazlaşdırma layihələri reallaşdırılıb. Nəticədə, regionların “mavi yanacaq” təminatı yaxşılaşıb, hətta əvvəllər heç vaxt qazlaşdırılmamış yaşayış məntəqələrinə də yeni boru kəmərləri çəkilib və hazırda sakinlərin evlərində “mavi yanacaq” alovlanır.

Həyata keçirilən məqsədyönlü tədbirlər sayəsində ölkə üzrə qazlaşdırmanın səviyyəsi 93 faizə çatdırılıb ki, bu da kifayət qədər yaxşı göstəricidir. Növbəti hədəf isə belədir: 2018-ci ilin sonunadək respublika miqyasında qazlaşdırmanın səviyyəsini 95 faizə çatdırmaq. Eyni zamanda, ucqar dağ kəndlərinin qazlaşdırılması da nəzərdə tutulub.

Qarşıya qoyulan məqsədə çatmaq üçün cari ilin əvvəlindən regionlarda yeni qazlaşdırma layihələrinin icrası uğurla davam etdirilir. SOCAR-ın “Azəriqaz” İstehsalat Birliyindən (İB) bildirilib ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası istiqamətində İB tərəfindən respublika ərazisində qaz təchizatı sisteminin yenidən qurulması, kənd və qəsəbələrin qazlaşdırılması, həmçinin uzun müddət təbii qaz almayan yaşayış məntəqələrinin yenidən “mavi yanacaq”la təmin edilməsi istiqamətində görülən məqsədyönlü tədbirlər nəticəsində respublikanın qaz təchizatı şəbəkəsi genişləndirilir və müasirləşdirilir.

Onu da qeyd edək ki, SOCAR-ın “Azəriqaz” İstehsalat Birliyi (İB) tərəfindən Şabran rayonunun Qorğan kəndinin qazlaşdırılması işi başa çatdırılaraq, abonentlərə “mavi yanacağ”ın verilməsinə başlanılıb. Sentyabrın 4-də Qorğan kəndinə təbii qazın verilməsi münasibətilə keçirilən mərasimdə rayon İcra Hakimiyyətinin və “Azəriqaz” İB-nin nümayəndələri, ziyalılar, eləcə də kənd sakinləri iştirak ediblər. Mərasimdə çıxış edənlər yaşayış məntəqəsinə təbii qazın verilməsi münasibətilə kənd sakinlərini təbrik ediblər. Bildirilib ki, Qorğan kəndinin qazlaşdırılması üçün birpilləli sistem əsasında ümumi uzunluğu 12 min 462 metr olan müxtəlif diametrli polad və polietilen borularla daşıyıcı və məhəllədaxili qaz xətləri çəkilib. Bununla yanaşı, kənddəki 101 abonent üçün qaz sayğacı və fərdi tənzimləyici quraşdırılıb.

Çıxışlarda rayonun yaşayış məntəqələrinin, xüsusən də dağ kəndlərinin “mavi yanacaq”la təminatı vətəndaşlarla yanaşı, təbiətə, ətraf mühitə qayğı kimi qiymətləndirilib. Qeyd olunub ki, rayonun Sumağava Qazma kəndinin də qazlaşdırılması işləri yekunlaşdırılıb. Tezliklə bu yaşayış məntəqəsinin sakinləri də “mavi yanacaq”la təmin ediləcəklər.

Mərasimdə çıxış edən kənd ağsaqqalları əhalinin sosial problemlərinin həllinə göstərilən yüksək diqqət və qayğıya görə Prezident İlham Əliyevə minnətdarlıqlarını bildiriblər. Sonra məşəl alovlandırılıb və kəndə təbii qaz verilib.

Regionların sosial-iqtisadi inkişafına dair Dövlət proqramlarına uyğun olaraq respublikanın digər şəhər və rayonları kimi, Quba rayonunun yaşayış məntəqələrinin qazlaşdırılması istiqamətində də ardıcıl tədbirlər həyata keçirilir. SOCAR-ın “Azəriqaz” İstehsalat Birliyi (İB) tərəfindən Quba rayonunun Ərməki və Güneyməhəllə kəndlərinin qazlaşdırılması işi yekunlaşıb və abonentlərə “mavi yanacağ”ın verilməsinə başlanılıb. Sentyabrın 5-də yaşayış məntəqələrinə ilk dəfə təbii qazın verilməsi münasibətilə Ərməki kəndində keçirilən mərasimdə rayon İcra Hakimiyyətinin və “Azəriqaz” İB-nin nümayəndələri, ziyalılar, eləcə də kənd sakinləri iştirak ediblər. Ərməki kəndinin qazlaşdırılması üçün birpilləli sistem əsasında ümumi uzunluğu 1160 metr polietilen boru ilə daşıyıcı xətt çəkilib. Bununla yanaşı, 7 min 482 metr müxtəlif diametrli metal borularla paylayıcı və məhəllədaxili qaz xətləri çəkilib, bütün mənzillərə qaz sayğacları quraşdırılıb. Kənddə 143 abonent ilk dəfə “mavi yanacaq”dan istifadə etməyə başlayıb.

Güneyməhəllə kəndinin qazlaşdırılması üçün isə ümumi uzunluğu 8 min 319 metr qaz xətti çəkilib. Bu yaşayış məntəqəsində 75 abonent ilk dəfə “mavi yanacaq”dan istifadə edəcək.

Sentyabrın 11-də isə Ağsu rayonunun Nuran kəndinə təbii qaz verilib. Bu məqsədlə keçirilən tədbirdə rayon İcra Hakimiyyətinin və “Azəriqaz” İstehsalat Birliyinin təmsilçiləri, ictimaiyyət nümayəndələri iştirak ediblər. Bildirilib ki, 144 abonenti olan kəndin qazlaşdırılması üçün birpilləli sistem əsasında ümumi uzunluğu 5 min 135 metr müxtəlif diametrli polietilen və ümumi uzunluğu 12 min 668 metr müxtəlif diametrli metal borularla daşıyıcı, paylayıcı və məhəllədaxili qaz xətləri çəkilib, mənzillərə sayğac və fərdi tənzimləyici quraşdırılıb.

Hazırda rayonun Hinqar, Nüydü və Gürcüvan kəndlərində tikinti quraşdırma işləri davam etdirilir. Tezliklə tikintisi başa çatmış yaşayış məntəqələrinə də ardıcıllıqla təbii qazın verilişi təmin olunacaq.

Respublika ərazisində qaz təchizatı sisteminin yenidən qurulması, uzun müddət təbii qaz almayan yaşayış məntəqələrinin yenidən “mavi yanacaq”la təmin edilməsi, həmçinin kənd və qəsəbələrin qazlaşdırılması istiqamətində görülən məqsədyönlü tədbirlərin davamı olaraq sentyabrın 13-də Şamaxı rayonunun Ovçulu və Bağırlı kəndlərinə təbii qazın verilməsi sakinlərin böyük sevincinə səbəb olub. 200 abonenti olan Ovçulu kəndinin qazlaşdırılması üçün birpilləli sistem əsasında ümumi uzunluğu 11 min 106 metr müxtəlif diametrli metal borularla daşıyıcı, paylayıcı və məhəllədaxili qaz xətləri çəkilib, mənzillərə sayğac və fərdi tənzimləyici quraşdırılıb. 490 abonenti olan Bağırlı kəndinin qazlaşdırılması üçün isə birpilləli sistem əsasında ümumi uzunluğu 5 min 853 metr müxtəlif diametrli polietilen və ümumi uzunluğu 23 min 831 metr müxtəlif diametrli metal borularla daşıyıcı, paylayıcı və məhəllədaxili qaz xətləri çəkilib, hər bir mənzilə sayğac və fərdi tənzimləyici quraşdırılıb.

Yeni qazlaşdırılan kəndlərdə qaz şəbəkəsinin qurulmasında “bir pilləli” tənzimləmə sistemi tətbiq edilib ki, bu da hər bir abonentin fərdi qaz tənzimləyicidən istifadə etməsinə və istehlakçılara ötürülən qazın sabit rejimdə saxlanılmasına zəmin yaradır.

Hazırda rayonun Osmanbəyli, Qonaqkənd və Hacıqədirli kəndlərində tikinti quraşdırma işləri davam etdirilir. Tezliklə tikintisi başa çatmış yaşayış məntəqələrinə də ardıcıllıqla təbii qazın verilişi təmin olunacaq.

Bu prosses ölkənin cənub bölgəsində də uğurla davam edir. Belə ki, bu günlərdə Lənkəran rayonunun Haftoni qəsəbəsinə təbii qaz verilib. SOCAR-ın “Azəriqaz” İstehsalat Birliyindən (İB) bildirilib ki, İB tərəfindən respublika ərazisində qaz təchizatı sisteminin yenidən qurulması, uzun müddət təbii qaz almayan yaşayış məntəqələrinin yenidən “mavi yanacaq”la təmin edilməsi, həmçinin kənd və qəsəbələrin qazlaşdırılması istiqamətində görülən məqsədyönlü tədbirlərin davamı olaraq Lənkəran rayonunun Haftoni qəsəbəsinə təbii qazın verilməsi sakinlərin böyük sevincinə səbəb olub. 612 abonenti olan qəsəbənin qazlaşdırılması üçün birpilləli sistem əsasında ümumi uzunluğu 6 min 883 metr müxtəlif diametrli polietilen və ümumi uzunluğu 27 min 424 metr müxtəlif diametrli metal borularla daşıyıcı, paylayıcı və məhəllədaxili qaz xətləri çəkilib, mənzillərə sayğac və fərdi tənzimləyici quraşdırılıb.

Hazırda rayonun Mollakənd və Şovu kəndlərində tikinti quraşdırma işləri davam etdirilir. Tezliklə tikintisi başa çatmış yaşayış məntəqələrinə də ardıcıllıqla təbii qazın verilişi təmin ediləcək.

Cəlilabad rayonunun Cəlayir kəndinə də təbii qazın verilməsi kənd sakinlərinin böyük sevincinə səbəb olub. 147 abonenti olan kəndin qazlaşdırılması üçün birpilləli sistem əsasında ümumi uzunluğu 3 min 54 metr müxtəlif diametrli polietilen və ümumi uzunluğu 11 min 383 metr müxtəlif diametrli metal borularla daşıyıcı, paylayıcı və məhəllədaxili qaz xətləri çəkilib, hər bir mənzilə sayğac və fərdi tənzimləyici quraşdırılıb.

Nardar BAYRAMLI

Azad Azərbaycan.- 2018.- 19 sentyabr.- S.7.