Azərbaycanın regionlarında arıçılığın inkişafı diqqət mərkəzində saxlanılır

Hazırda ölkə üzrə təsərrüfatlarda təxminən 300 min arı ailəsi var və respublikada illik bal istehsalı 3 min tona çatdırılıb

Yeni iqtisadi şəraitdə Azərbaycanın bölgələrində regionların sosial-iqtisadi inkişafına dair müvafiq Dövlət proqramlarına uyğun olaraq həm daxili bazarda böyük tələbat duyulan, həm də ölkəmiz üçün yeni ixrac imkanları yaradan məhsulların istehsalının artırılması diqqət mərkəzində saxlanılır. Belə məhsullardan biri də təbii baldır. Təbii bal qiymətli ərzaq məhsuludur və onun həm daxili, həm də xarici bazarlarda satışı ilə bağlı hər hansı bir problem yoxdur. Azərbaycanın regionlarında arıçılıq sahəsində tarixən mövcud olan ənənələri dirçəltməklə, həmçinin ana təbiətin imkanlarından bəhrələnməklə təbii bal istehsalını əhəmiyyətli dərəcədə artırmaq mümkündür.

Son illərdə respublikamızda arıçılığın inkişafı müxtəlif tədbirlər vasitəsilə geniş təşviq edilir. O cümlədən paytaxt Bakıda keçirilən arıçılıq məhsullarının sərgi-satış yarmarkaları regionlarda fermerlərin gəlirli sahə olan arıçılığa marağını artırıb. Kənd Təsərrüfatı Nazirliyindən verilən məlumata əsasən hazırda Bakıda növbəti belə yarmarkanın keçirilməsinə ciddi hazırlıq işləri görülür.

Yeri gəlmişkən, nazirlik arıçıların çoxsaylı müraciətlərini nəzərə alaraq arıçılıq məhsullarının növbəti respublika sərgi-satış yarmarkasının keçirilmə məkanını dəyişib. Belə ki, bu dəfə yarmarka 2018-ci ilin 5-28 oktyabr tarixlərində Bakı şəhəri, Nərimanov rayonu, Fətəli xan Xoyski prospekti, 10 ünvanında (Tofiq Bəhramov adına Respublika Stadionunun ərazisi) keçiriləcək. Sərgi-satış yarmarkasının açılışı oktyabrın 5-də, saat 12.00-da baş tutacaq.

Kənd Təsərrüfatı Nazirliyinin yaydığı məlumatda bildirilir ki, yarmarkada iştirak etmək istəyən arıçılar öz məhsullarını şəxsiyyət vəsiqəsini təqdim etməklə sentyabrın 15-dən 30-dək yuxarıda qeyd edilən ünvandakı mühafizə olunan anbara təhvil verməlidirlər. Qeyd edək ki, yalnız göstərilən müddətdə anbara təhvil verilmiş və müayinə olunmuş məhsullar yarmarkada satışa çıxarılacaq. Arıçılıq məhsullarının anbara qəbulu iqtisadi rayonlar üzrə əvvəlcədən tərtib olunmuş cədvəl əsasında həyata keçirilir. Eyni zamanda şəffaflığın təmin edilməsi məqsədi ilə 2018-ci il oktyabrın 4-də yerlərin iqtisadi rayonlar üzrə və fərdi qaydada püşkatması keçiriləcək.

Respublikada arıçılığın inkişafı üçün fermerlərlə müvafiq qurumların sıx əməkdaşlığı vacib amillərdən biridir

Qeyd edək ki, respublikada arıçılığın inkişafı üçün fermerlərlə müvafiq qurumların sıx əməkdaşlığı vacib amillərdən biridir. Bu fikir kənd təsərrüfatı naziri İnam Kərimovun Azərbaycan Arıçılar Assosiasiyasının üzvləri ilə görüşündə də vurğulanıb. Görüşə assosiasiyanın rəhbər heyəti, fərdi arıçılıq təsərrüfatının təmsilçiləri qatılıblar.

Nazirlikdən verilən məlumata görə, görüşdə kənd təsərrüfatı naziri İnam Kərimov nazirliyin assosiasiyalarla əməkdaşlığı vacib saydığını deyib. Bu məqsədlə nazirlikdə struktur dəyişiklikləri aparıldığını deyən nazir qurumun tərkibində fermerlərlə, assosiasiyalarla və kooperativlərlə iş şöbəsinin yaradıldığını xatırladıb. İnam Kərimov nazirliyin öz fəaliyyətində fermerlərə yaxın olmaq prinsipini əsas götürdüyünü vurğulayıb, indiyə kimi bir çox ixtisaslaşmış assosiasiyaların nümayəndələri ilə görüşdüyünü diqqətə çatdırıb. İnam Kərimov daxili bazarda keyfiyyətli, ekoloji təmiz arıçılıq məhsullarına böyük ehtiyac olduğunu deyib, bal və digər arıçılıq məhsullarının ixrac potensialının artırılmasının vacibliyini vurğulayıb.

Azərbaycan Arıçılar Assosiasiyasının sədri, “Api-Delta” arıçılıq şirkətinin direktoru Bədrəddin Həsrətov qurumun 2015-ci ildə yaradıldığını, hazırda 5 şəhər və 44 rayonda assosiasiyanın yerli bölmələrinin fəaliyyət göstərdiyini vurğulayıb. Arıçılığın spesifik sahə olduğunu bildirən assosiasiya sədri qeyd edib ki, ölkə üzrə təsərrüfatlarda təxminən 300 min arı ailəsi var. Azərbaycanda ildə 3 min ton bal istehsal olunduğunu deyən Bədrəddin Həsrətov bu sahəyə subsidiya verilməsini vacib sayıb. Subsidiyaların verilməsi ilə əlaqədar arı ailələrinin qeydiyyata alınması prosesinə Arıçılar Assosiasiyasının da cəlb olunmasını təklif edən sədr bildirib ki, bu sahədə görüləcək kompleks tədbirlər daxili bazarın tam şəkildə yerli məhsulla təmin olunmasına və xarici ölkələrə məhsul ixracına imkan verəcək.

Görüşdə çıxış edən “Dəlidağ” arıçılıq təsərrüfatının rəhbəri Sabir Mustafayev, “AQS Group” şirkətinin rəhbəri Natiq Mədətov, “Balçı” arıçılıq təsərrüfatının rəhbəri, fərdi təsərrüfatçılar Şahin Cəfərov, Şəhriyar Nurullahi, Qadir Mustafayev arıçılıq sektorunda mövcud vəziyyəti təhlil edib, bu sahənin inkişafına dair çoxsaylı təkliflər səsləndiriblər. İştirakçılar bal yarmarkalarının təşkili, daimi bal satışı mərkəzlərinin, arılar üçün yem bazasının yaradılması, arıçılıq kooperativlərinin təsis olunması, seleksiya işlərinin aparılması, arı xəstəliklərinə qarşı mübarizənin düzgün təşkili, təsərrüfatların mexanikləşdirilməsi, “Aqrolizinq”in xətti ilə ölkəyə arı pavilyonlarının gətirilməsi, nektar bazasını artırmaq üçün xüsusi bitkilərin əkilməsi, arıçılıq təsərrüfatlarının işinin düzgün təşkilinə yardım üçün kredit ittifaqlarının yaradılması, Assosiasiyanın beynəlxalq əlaqələrinin genişləndirilməsi ilə bağlı təkliflər səsləndiriblər.

Nazir İnam Kərimov isə arıçılar arasında maarifləndirmə işinin aparılmasının vacib olduğunu deyib. Rayon və şəhərlərdə Dövlət Aqrar İnkişaf mərkəzlərinin (DAİM) yaradıldığını xatırladan nazir bildirib ki, DAİM-lərdə aqrar sektorun müxtəlif sahələrinə dair qrafik üzrə təlimlər keçiriləcək, bu təlimlərə arıçılar da aktiv cəlb olunacaqlar. İnam Kərimov arıçıların yaxın müddətdə DAİM-lərin fəaliyyətinin effektini açıq şəkildə hiss edəcəyini bildirib, onları bu mərkəzlərlə sıx əlaqə qurmağa çağırıb. Bal ilə bağlı ekoloji təmiz məhsul standartının müəyyənləşməsinə ehtiyac olduğunu vurğulayan nazir arıçılıq məhsulları ilə bağlı brendlərin yaradılmasını vacib sayıb.

Bu ildən arıçılar saxladıqları hər arı ailəsinə görə 10 manat məbləğində subsidiya alacaqlar

Bir sözlə, arıçılığın inkişafı diqqət mərkəzindədir. Məlumat üçün bildirək ki, Azərbaycanda arıçılıqla məşğul olan fiziki və hüquqi şəxslərə bu ildən etibarən subsidiya veriləcək. Arıçılar saxladıqları hər arı ailəsinə (pətəyə) görə 10 manat məbləğində subsidiya alacaqlar. Kənd Təsərrüfatı Nazirliyindən verilən məlumata əsasən, artıq Nazirlər Kabineti “Arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə subsidiya verilməsi Qaydası”nı təsdiq edib. Yeni qayda “Azərbaycan Respublikasında arıçılığın inkişafının stimullaşdırılması haqqında” Azərbaycan Respublikası Prezidentinin 2018-ci il 5 mart tarixli Sərəncamının 2.1-ci bəndinin icrasını təmin etmək məqsədi ilə təsdiqlənib.

Arı ailələrinin (pətəklərin) identikləşdirilməsi və hər arı ailəsinə (pətəyə) görə subsidiyanın verilməsi üçün arıçılıq təsərrüfatları “Arıçılıq təsərrüfatlarının uçotu Qaydası”nın tələblərinə uyğun uçota alınmalıdır. Subsidiya verilməsinin təşkili üçün Azərbaycan Respublikasının Kənd Təsərrüfatı Nazirliyi tərəfindən rayon (şəhər) komissiyaları yaradılacaq.

Arıçılar ərizələrini, fiziki şəxslər üçün şəxsiyyət vəsiqəsinin, hüquqi şəxslər və hüquqi şəxs yaratmadan sahibkarlıq fəaliyyətini həyata keçirən fiziki şəxslər üçün VÖEN-in surətini, subsidiyanın köçürüləcəyi bank hesabına dair məlumatları hər il aprel ayının 30-dək arıçılıq təsərrüfatının yerləşdiyi rayon (şəhər) komissiyalarına təqdim etməlidirlər.

Arıçılara subsidiya verilməsi ilə bağlı qərar 5 il müddətində qüvvədə olacaq

Arıçılıqla məşğul olan fiziki və hüquqi şəxslərə subsidiya verilməsi ilə bağlı Nazirlər Kabinetinin təsdiqlədiyi qaydaları KİV-ə şərh edən “Ərzaq məhsullarının tədarükü və təchizatı” ASC-nin nümayəndəsi, ekspert Nicat Nəsirli bildirib ki, subsidiyanı təyin edəcək komissiyanın iş prinsipləri aşağıdakı kimidir:

1. 15 gün müddətində yerli icra hakimiyyətinin inzibati ərazi dairəsi üzrə nümayəndəsi bələdiyyə nümayəndəsi və arıçının iştirakı ilə məlumatları yerində dəqiqləşdirərək arı ailələrinin mövcudluğunu yoxlayır və düzbucaqlı formada plastik materialdan hazırlanan lövhəni şrup vasitəsilə pətəyin yuxarı sağ küncünə bərkitməklə, arı ailəsinin (pətəyinin) identikləşdirilməsini təmin edir;

2. Arı ailələrinin (pətəklərin) yoxlanılması və mövcudluğu haqqında rayon (şəhər) komissiyaları tərəfindən akt tərtib olunur;

3. Aprel ayının 30-dan sonra əldə olunan arı ailələri növbəti ildə identikləşdirilir və hər arı ailəsinə (pətəyə) görə subsidiya təyin olunur;

4. Arı ailələri satıldıqda, bağışlandıqda, təbii fəlakət, xəstəliklər və digər səbəblər nəticəsində məhv olduqda, o cümlədən identikləşdirmə kodu (lövhə) itirildikdə arıçı 5 gün müddətində komissiyaya məlumat verməli və aparılmış identikləşdirilmə ləğv edilməlidir;

5. Hər il iyunun 15-dək subsidiya veriləcək arıçılar və onların saxladıqları arı ailələri (pətəkləri), subsidiyanın məbləği barədə məlumatlar “Elektron kənd təsərrüfatı” informasiya sisteminə daxil edilməli, hesablanmış subsidiyanın arıçının bank hesabına köçürülməsi üçün onların bank hesabına dair məlumatlar nazirliyə göndərilməlidir;

6. Arıçıya dair sənədlər mərkəzi komissiya tərəfindən baxılmalı və 20 gün ərzində subsidiyanın verilməsi ilə bağlı sifariş Maliyyə Nazirliyinin Dövlət Xəzinədarlıq Agentliyinə təqdim edilməlidir.

“Bank hesablarının açılması və plastik kartların hazırlanması arıçıların öz vəsaiti hesabına həyata keçirilməlidir, subsidiya mexanizmi yaxın 5 il müddətində qüvvədə olacaq”, - deyə ekspert bildirib.

Arıçılara subsidiya ayrılması regionlarda bu sahənin inkişafına güclü stimul verəcək

Arıçılara saxladıqları hər arı ailəsinə görə 10 manat məbləğində subsidiya müəyyən edilməsi arıçılığın inkişafına böyük dəstəkdir. Bu sözləri KİV-ə açıqlamasında 40 ildən çoxdur arıçılıq sahəsində fəaliyyət göstərən Ağdam rayon sakini Solmaz Nəcəfova deyib. Ağdam rayonunun Mollalar kəndindən olan Solmaz xanım hələ uşaq vaxtlarından arıçılığa böyük maraq göstərdiyini bildirib: “Ata-babadan arıçılıqla məşğul olmuşuq. Bu sahəyə maraq da məndə kiçik yaşlarımdan yaranıb. Odur ki, orta məktəbi bitirdikdən sonra texniki peşə məktəbində arıçılıq ixtisası üzrə təhsil aldım. O zaman 70-dən artıq arı ailəsi saxlayırdıq. Bu işdə atamın ən yaxın köməkçisi idim. Gözəl vaxtlar idi. Yaz mövsümündə arıları Kəlbəcər rayonuna aparırdıq. Kəndimiz işğal olunandan sonra çətinliklərə baxmayaraq, ailəmizin arıçılıq ənənələrini davam etdirdim. Uzun müddət yol kənarlarında, çətin şəraitdə yaşadıq. Hazırda Quzanlıda dövlətimiz tərəfindən inşa edilən qəsəbədə evlə təmin edilmişik. Arıları da burada saxlayırıq”.

Solmaz Nəcəfova qeyd edib ki, arıçılıqla məşğul olan şəxslərə saxladıqları hər arı ailəsinə görə 10 manat məbləğində subsidiya müəyyən edilməsi bu sahəyə marağı daha da artıracaq. “Arıçılıqla məşğul olan fiziki və hüquqi şəxslərə subsidiya verilməsi ilə bağlı Nazirlər Kabinetinin təsdiqlədiyi qaydalarla tanış oldum. Biz arıçılar arıçılığın inkişafına göstərilən dövlət qayğısından ruhlanaraq, təsərrüfatımızı daha da genişləndirəcək və arıçılıq məhsulları istehsalında yüksək nəticələrə nail olmağa çalışacağıq”, - deyə arıçı bildirib.

Astarada arıçılıq sahəsində məhsuldarlıq ötən illə müqayisədə 20 faiz artıb

Bu məqamda vurğulamaq yerinə düşər ki, dövlət tərəfindən göstərilən diqqət və qayğı regionlardakı arıçıları daha məhsuldar işləməyə sövq edib. Məsələn, Astara rayonunda arıçılıqla məşğul olan fermerlər və məhsul istehsalçıları bu il yüksək məhsuldarlığa nail olublar. Rayonun arıçıları ilk bal süzümünü may ayının sonu - iyunun əvvəllərində aparıblar. Bundan sonra isə daha da bol məhsul əldə etmək üçün arı ailələri Aran rayonlarına köçürülmüşdü. Avqust ayından etibarən isə tədricən geri gətirilən arı ailələrindən mövsümün sonuncu bal süzümünə başlanılıb.

Orta hesabla hər bir arı ailəsindən 24-25 kiloqram bal əldə edən arıçılar bu il məhsuldarlığın ötən illə müqayisədə 20 faiz artdığını bildiriblər. Arıçılar balın qiymətinin onun keyfiyyətindən asılı olaraq 25-35 manat arasında dəyişdiyini deyirlər.

Qeyd edək ki, Astara rayonunda olan 1300 arıçılıq təsərrüfatında 27 minə yaxın arı ailəsi saxlanılır. Ötən il rayonda 300 ton bal məhsulları istehsal olunub. Bu il bu rəqəmin 400 tona çatdırılması nəzərdə tutulur.

Muxtar respublikada 4070 sahibkar arıçılıqla məşğuldur

Arıçılığın inkişafı Naxçıvan Muxtar Respublikasında da diqqət mərkəzindədir. Bildirmək yerinə düşər ki, hazırda muxtar respublikada 4070 sahibkar arıçılıqla məşğuldur. Onların 549 nəfəri 20-250 arı ailəsi olan sahibkardır. Aqrar sahədə aparılan islahatlardan əvvəl muxtar respublikada cəmi 6045 arı ailəsi var idisə, hazırda bu rəqəm 71 min 66-ya çatdırılıb. Arı ailələrinin bu artımının nəticəsidir ki, ötən il muxtar respublikada 1424 ton bal istehsal olunub.

“2017-2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı”ndan irəli gələn vəzifələrin icrası istiqamətində ötən müddətdə xeyli iş görülüb. Həyata keçirilən tədbirlərdən biri də 2016-2017-ci illərdə “Naxçıvanqala” Tarix-Memarlıq Muzey Kompleksində “Arıçılıq məhsulları-bal festivalı”nın təşkilidir. Festivalda arıçılıq məhsullarının, balın sərgi və satışının təşkili bu sahəyə marağı xeyli artırıb.

Muxtar respublikanın Kənd Təsərrüfatı Nazirliyinin əməkdaşı İntiqam Hüseynbəyli AZƏRTAC-ın Naxçıvan bürosuna bildirib ki, Naxçıvanda arıçılığın yem bazasını aran, dağətəyi və dağlıq ərazilərin bitki örtüyü təşkil edir. Naxçıvanın təbii-coğrafi iqlim şəraitini, eyni zamanda, bitki örtüyünün müxtəlifliyini nəzərə alaraq arı ailələrinin normal inkişafını təmin etmək üçün onların mövsüm ərzində azı beş dəfə köçürülməsi vacibdir.

İlk olaraq qışlamadan çıxmış arı ailələri dağətəyi bölgələrdən aran bölgələrinə köçürülür. Bu dövrdə aran bölgələrində hava şəraitinin başqa bölgələrə nisbətən isti keçməsi arı ailələrinin oyanmasına və ana arıların yuva daxilində daha erkən yumurta qoymasına səbəb olur. Arı ailələri bu zaman yuva daxilində ehtiyat baldan və çiçək tozundan istifadə edərək inkişafa başlayır. Bu zaman şanlarda balın möhürünün arıçı tərəfindən az miqdarda açılması diqqətdə saxlanılmalıdır. Möhürü açılmış balın iyi arıları özünə cəlb edir. Balla qidalanma arı ailələrinin daha tez oyanmasına və inkişafın erkən başlamasına səbəb olur. Arı ailələri mart ayının ikinci ongünlüyünə qədər yuvadaxili qidanın hesabına inkişaf edərək keyfiyyətcə yeni, cavan nəsil ilə əvəz olunur.

Mayın 15-nə kimi aran bölgələrində işləyən arı ailələrini yenidən dağətəyi bölgələrə aparmaqla onların ikinci köçürülməsi təşkil edilir. Arı ailələrini, əsasən, bitkilərin nektar əmələgətirmə dövründə dağətəyi bölgələrə, ilin ən isti aylarında isə (iyulda) dağlıq bölgələrə aparmaqla üçüncü köçürülməsi təşkil edilir. Avqust ayında arı ailələrini aran bölgələrinə yenidən qaytarmaqla onların dördüncü köçürülməsi həyata keçirilir. Arıların son işləmə dövrü avqust və sentyabr aylarıdır. Bu dövrdə arılar nektar və çiçək tozunu yoncadan, üzümdən və payız çiçəklərindən toplayırlar. Oktyabr ayının əvvəlindən arı ailələrinin yuvası qış üçün yığılır və respublikanın dağətəyi bölgələrinə aparmaqla onların sonuncu - beşinci köçürülməsi təşkil edilir. Arıçılar arı ailələrini yerli şəraitdən asılı olaraq əsas nektar əmələgəlmə dövründə bir dəfə əvəzinə, iki və ya üç dəfə köçürə bilərlər. Arı ailələri vaxtında, planlı qaydada köçürülməlidir. Bunun üçün arıçı öz bölgəsinin hər bir hektarında olan bitki örtüyündəki nektarın, təxminən, nə qədər olmasını bilməlidir.

Bal arılarının əlverişli uçuş diametri 3 kilometrdir. Bu, o deməkdir ki, pətəyin olduğu yerdən bütün istiqamətlərə tərəf 3 kilometr uzaqlıqda olan bitkilərdən arılar nektar toplaya bilər.

İsmayıllıda bu il ötən ildəkindən 1,2 ton çox bal istehsal olunub

İsmayıllı rayonunda isə bal istehsalı başa çatıb və arıçılar cari mövsümdə bəslədikləri arı ailələrindən 61 ton bal götürüblər. Rayon icra hakimiyyətindən bildirilib ki, bu il istehsal olunan bal məhsulu ötən ildəkindən 1,2 ton çoxdur.

Qeyd edək ki, arıçılıq İsmayıllıda inkişaf etməkdədir. Peşəkar arıçıların da sayı ildən-ilə artır. Hazırda rayonda 7 min 180 arı ailəsi vardır ki, bu keçənilki göstəricidən 50 ailə artıqdır. Bu gün hər biri 100-200 arı ailəsi bəsləyən İslam Fətullayev, Müşviq Hüseynov, İvan Kazakov, Akif Abdullayev kimi onlarca peşəkar arıçılar ailə büdcələrinə yaxşı gəlir gətirən arıçılıqla məşğuldur.

Arıçılar istehsal etdikləri balı əsasən yerli bazarlarda satırlar. Hər il Bakı şəhərində keçirilən bal yarmarkasına orta hesabla 6-8 ton bal çıxarılır.

Qubadan Yaponiyaya bal ixrac edilir

Bu gün Azərbaycanda istehsal olunan təbii balın sorağı xarici ölkələrdən gəlir. Məsələn, qubalı arıçı Əziz Ələkbərov istehsal etdiyi balı Yaponiyadan olan müştərilərə satır. Təxminən 300 arı ailəsindən ibarət təsərrüfata sahib olan fermer artıq dörd ildir gündoğan ölkəyə müştərilərlə müqavilə əsasında bal göndərir. Yerli sahibkarlarla yaponiyalı iş adamları arasında razılaşmaya əsasən il ərzində 6-7 ton bal ixrac olunur ki, bunun da bir tonunu Əziz Ələkbərov təmin edir. Qubanın Susayqışlaq kəndindən olan arıçı builki məhsuldarlıqdan da razıdır. Hər arı yeşiyindən 15-20 kiloqram bal götürüb.

“Biz yüksək məhsuldarlıq əldə etmək üçün mövsüm boyu arıların yerini 5-6 dəfə dəyişmişik. Bu, böyük zəhmət və xərc tələb edir. Bu işi görməsən yaxşı bal götürə bilməzsən. İndi aran balını süzürük. Artıq yekunlaşmaq üzrədir. Məhsuldarlıq da bizi qane edir. Bal süzümündən sonra çiçək tozlu çərçivələri arılara verəcəyik ki, normal qışlasınlar və öz balalarını qidalandırsınlar. Bizim region üçün səciyyəvi olan Boz Qafqaz arısıdır və məhsuldarlığı ilə seçilir. Digərlərinə nisbətən bu arıların xortumu uzun olur ki, bu da bitkilərdən şirə çəkməyi asanlaşdırır”, - deyə o bildirib.

Arıçı əldə etdiyi balı Yaponiyadan olan müştərilərlə yanaşı, yerli bazarda da satır. Bir kiloqram balın qiyməti isə 35 manatdır. Əziz Ələkbərov deyir ki, müştəri sarıdan çətinliyi yoxdur. Keyfiyyətli balın müştərisi hər zaman çox olur.

Müasir texnologiyanın təkmilləşməsi sənaye avadanlıqlarına da təsirsiz ötüşməyib. Təcrübəli arıçı bildirir ki, bu, müsbət hal olsa da, bəzi saxtakarlar bundan istifadə edirlər. Belə ki, işbazlar arıçılıq məhsullarının tərkibinə müxtəlif qarışıqlar əlavə edirlər və nəticədə təmiz, təbii balı keyfiyyətsizindən ayırmaq çox çətin olur. Əziz Ələkbərov alıcılara məsləhət görür ki, ancaq inandıqları, tanıdıqları arıçılardan bal alsınlar.

Quba rayonunda, ümumilikdə, 10 minə yaxın arı ailəsi saxlanılır. Bu il arıçılıq təsərrüfatlarından 50 tondan çox bal əldə olunub.

Digər bölgələrimizdə də arı ailələrinin sayı ildən-ilə artır

Ermənistanla həmsərhəd bölgələrimizdən olan və kəndləri tez-tez düşmən təxribatı nəticəsində atəşə tutulan Qazax rayonunda müharibə şəraitinin bütün çətinliklərinə baxmayaraq, yerli sakinlər kənd təsərrüfatının müxtəlif sahələri kimi arıçılığa da xüsusi maraq göstərir və arı ailələrinin sayını ildən-ilə artırırlar. Bu il Qazax rayonunda arıçılıqla məşğul olan sahibkarların sayı 535 nəfərə, arı ailələrinin sayı isə 2 min 940-a çatıb.

Bu il rayon üzrə hər arı ailəsindən orta hesabla 9,8 kiloqram olmaqla, ümumilikdə, 38 ton 620 kiloqram məhsul götürülüb. Ötən il isə 2 min 807 arı ailəsindən orta hesabla 9,6 kiloqram olmaqla, ümumilikdə, 26 ton 950 kiloqram məhsul əldə olunmuşdu.

Qeyd edək ki, Qazax rayonunun ən çox Quşçu Ayrım, Məzəm, Aşağı Salahlı, Fərəhli və digər kəndlərinin sakinləri arıçılıqla məşğul olurlar.

Samux rayonunda da ənənəvi sahələrdən olan arıçılığa maraq ildən-ilə artır. Hazırda rayonda 892 arı ailəsi mövcuddur. Bunun 853-ü əhali təsərrüfatlarında saxlanılır. Rayon Statistika İdarəsinin rəisi Gündüz Bayramov KİV-ə açıqlamasında bildirib ki, son 3 ildə rayondakı arı ailələrinin sayı 468 ədəd artıb. Gündüz Bayramov deyib ki, Samux rayonunun münasib iqlim xüsusiyyəti bu sahənin inkişafına əlverişli şərait yaradır.

Mübariz ABDULLAYEV

Yeni Azərbaycan.- 2018.- 28 sentyabr.- S.7