2017-ci ildə ölkəmizdə yol-nəqliyyat infrastrukturunun inkişafı istiqamətində geniş tədbirlər həyata keçirilib

Ötən il regionlarda avtomobil magistrallarının genişləndirilməsi, respublika və yerli əhəmiyyətli yolların yenidən qurulması və tikintisi layihələrinin davam etdirilməsi ilə bağlı mühüm işlər görülüb, bu sahəyə davamlı və irihəcmli investisiyalar yönəldilib

Azərbaycanda iqtisadi inkişaf tempinin qorunması, əhalinin sosial müdafiəsinin gücləndirilməsi, ölkəmizin beynəlxalq mövqelərinin möhkəmləndirilməsi istiqamətində tədbirlər 2017-ci ildə də uğurla həyata keçirilib. Ölkəmizdə qeyri-neft iqtisadiyyatının, özəl sektorun, sənayenin bütün seqmentlərinin inkişafını sürətləndirmək məqsədilə reallaşdırılan əməli tədbirlər nəticəsində inkişaf dinamikasının davamlılığı təmin edilib, bütün sahələrdə çox ciddi nailiyyətlər əldə olunub. 2017-ci ildə də pensiya və əməkhaqlarının artırılması, sosial-infrastrukturun yenilənməsi istiqamətində görülən tədbirlər bir daha sübut edir ki, ölkəmizdə həyata keçirilən siyasətin mərkəzində Azərbaycan vətəndaşı dayanır. Eyni zamanda, böyük iqtisadi, enerji və nəqliyyat layihələri Azərbaycanın beynəlxalq mövqelərinin möhkəmlənməsinə şərait yaratmaqla yanaşı, bu təşəbbüslər regionun inkişafına layiqli töhfələr verib. Azərbaycanda Prezident İlham Əliyevin rəhbərliyi ilə həyata keçirilən praqmatik siyasət sayəsində paytaxt Bakı şəhəri ən mötəbər beynəlxalq tədbirlərə uğurla ev sahibliyi edib, İslam Həmrəyliyi Oyunları, “Formula 1” yarışları, dialoq və sülh naminə beynəlxalq forumlar, mühüm mədəniyyət tədbirləri məhz ölkəmizdə keçirilib. Azərbaycan özünün müstəqil, milli maraqlara və beynəlxalq hüququn norma və prinsiplərinə söykənən siyasəti ilə dünyada böyük etimad, nüfuz qazanıb.

2017-ci ildə Azərbaycan regionları sürətlə inkişaf edib

Heç də təsadüfi deyil ki, Prezident İlham Əliyev Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbrikində də 2017-ci ildə qarşıya qoyulan bütün vəzifələrin icra edildiyini bildirərək deyib ki, ötən il iqtisadiyyatın qeyri-neft sektoru 2 faizdən çox, iqtisadiyyatımızın qeyri-neft sənayesi 3 faizdən çox, kənd təsərrüfatı isə 4 faizdən çox artıb. Dövlətimizin başçısı Azərbaycanın regionlarının da bu il sürətlə inkişaf etdiyini vurğulayıb: “Mən bu il regionlara 30-dan çox səfər etmişəm. Hər yerdə quruculuq-abadlıq işləri göz oxşayır”.

Prezident İlham Əliyevin də vurğuladığı kimi, 2017-ci ildə Azərbaycan regionlarının həyatı inkişaf meyilləri ilə kifayət qədər zəngin olub. Azərbaycan dövlətinin dinamik inkişafını və müasir mənzərəsini əks etdirən məqamlardan biri də regionlarda uğurla reallaşdırılan geniş infrastruktur layihələri, abadlıq, quruculuq işləridir. Müvafiq Dövlət proqramları çərçivəsində həyata keçirilən layihələr sayəsində bölgələrin siması əhəmiyyətli dərəcədə dəyişib, infrastruktur təminatı güclənib. Son 14 ildə respublikanın inkişafından, paytaxtda və bölgələrdə aparılan quruculuq-abadlıq işlərindən söhbət açarkən məktəblərin, səhiyyə ocaqlarının, gənclər mərkəzlərinin və bu qəbildən olan digər sosial təyinatlı obyektlərin inşasını və yaxud yenidən qurulmasını xüsusi vurğulamaq gərəkdir. Dövlət sosial sferada bu və ya digər layihələrin həyata keçirilməsinə böyükhəcmli sərmayələr yönəldir. Bölgələrdə əsasən milli memarlıq üslubunda yaradılan və hər cür rahatlıqlara malik sosial infrastruktur obyektləri bir növ müstəqil Azərbaycanın hərtərəfli inkişafının rəmzinə çevrilib.

Yol-nəqliyyat infrastrukturunun yenilənməsi, müasir standartlara cavab verən yolların istifadəyə verilməsi Azərbaycan hökumətinin sosial sahədə həyata keçirdiyi siyasətin mühüm istiqamətlərindən birini təşkil edir. Müvafiq Dövlət proqramlarına uyğun olaraq Azərbaycanda avtomobil yollarının tikintisi və yenidən qurulması işlərinin həcmi ildən-ilə artmaqdadır. Hazırda respublikanın nəqliyyat-yol infrastrukturunun yenidən qurulması və təkmilləşdirilməsi ilə bağlı istər beynəlxalq maliyyə qurumlarının əsaslı vəsait qoyuluşları, istərsə də dövlət büdcəsi vəsaiti hesabına irimiqyaslı layihələr uğurla icra olunur. Məhz bunun nəticəsində ölkəmizdə şəhər və rayonlarda yol infrastrukturu əsaslı şəkildə yenidən qurulub. Bu məqamda vurğulamaq yerinə düşər ki, Prezident İlham Əliyevin Sərəncam və göstərişlərinə əsasən hazırda əsas diqqət regionlarda kənd və qəsəbələri birləşdirən yolların, həmçinin yaşayış məntəqələrinin daxili yollarının təmirinə və yenidən qurulmasına yönəldilib. Bu tədbirlər, ilk növbədə, Azərbaycan iqtisadiyyatının gücünü göstərməklə yanaşı, vətəndaşların həyatının yaxşılaşdırılmasına yönələn layihələrin davamlı olmasını nümayiş etdirir.

Yol infrastrukturunun yaxşılaşdırılması və beynəlxalq standartlara uyğunlaşdırılması istiqamətində sistemli fəaliyyət həyata keçirilib

Ötən ildə də kəndlərarası yolların, rayon mərkəzləri ilə ucqar kəndləri birləşdirən yol xətlərinin təmiri və yenidən qurulması istiqamətində geniş tədbirlər həyata keçirilib. “Azərbaycan Avtomobil Yolları” Dövlət Agentliyinin idarə heyətinin sədri Saleh Məmmədov bildirib ki, dövlət başçısının tapşırıq və sərəncamlarına əsasən ölkədə yol infrastrukturunun yaxşılaşdırılması və beynəlxalq standartlara uyğunlaşdırılması istiqamətində 2017-ci il ərzində “Azərbaycan Avtomobil Yolları” Dövlət Agentliyi tərəfindən sistemli fəaliyyət həyata keçirilib: “Avtomobil magistrallarının genişləndirilməsi, respublika və yerli əhəmiyyətli yolların yenidən qurulması və tikintisi layihələrinin davam etdirilməsi ilə bağlı mühüm tədbirlər həyata keçirilib, bu sahəyə davamlı və irihəcmli investisiyalar yönəldilib, 2018-ci ildə də bu istiqamətdə addımlar atılacaq, Prezident İlham Əliyevin rəhbərliyi ilə yeni-yeni nailiyyətlər əldə olunacaq”.

Qeyd etmək lazımdır ki, regionların sosial iqtisadi inkişafının sürətləndirilməsi kontekstində yol-nəqliyyat infrastrukturunun yenilənməsi ölkəmizdə davamlı prosesə çevrilib. Cari ildə də yol-nəqliyyat layihələrinin icrası ilə bağlı əsaslı tədbirlərin həyata keçirilməsi nəzərdə tutulur. İlin ilk günlərindən Prezident İlham Əliyev tərəfindən bu sahədə müvafiq sərəncamların imzalanması deyilənləri bir daha təsdiq edir. Belə ki, Xaçmaz rayonunun Çarxı-Qalağan-Hacılar-Xanlıqoba-Sayad-Məmmədxanlı avtomobil yolunun tikintisi ilə bağlı tədbirlər haqqında Azərbaycan Respublikası Prezidentinin Sərəncamı ilə sözügedən yolun tikintisinə 10,1 milyon manat ayrılıb. Yanvarın 5-də isə Prezident İlham Əliyev “Saatlı rayonunun Saatlı-Dədə Qorqud-Əhmədbəyli avtomobil yolunun tikintisi ilə bağlı tədbirlər haqqında” Sərəncam imzalayıb. Dörd min nəfər əhalinin yaşadığı 3 yaşayış məntəqəsini birləşdirən Saatlı-Dədə Qorqud-Əhmədbəyli avtomobil yolunun tikintisi məqsədilə dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 700 min manatı Azərbaycan Avtomobil Yolları Dövlət Agentliyinə ayrılıb. Həmçinin Prezident İlham Əliyev yanvarın 4-də “Ağdam rayonunun Əfətli-Hacıturalı-Həsənxanlı avtomobil yolunun tikintisi ilə bağlı tədbirlər haqqında” Sərəncam imzalayıb. Beş min nəfər əhalinin yaşadığı 7 yaşayış məntəqəsini birləşdirən Əfətli-Hacıturalı-Həsənxanlı avtomobil yolunun tikintisi məqsədi ilə dövlət büdcəsinin dövlət əsaslı vəsait qoyuluşu xərclərinin bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 2 milyon manatı Azərbaycan Avtomobil Yolları Dövlət Agentliyinə ayrılıb.

Muxtar respublika üzrə 70 kilometr uzunluğunda yeni asfalt yol salınıb, 12 körpü istifadəyə verilib

Bir sıra rayonlarımızda da yol-nəqliyyat infrastrukturunun yenidən qurulması ilə bağlı işlər cari ildə də davam etdirilir. O cümlədən Sabirabad rayonu ərazisindəki Dadaşbəyli-Çöl Ağaməmmədli-Xankeçən-Salmanlı avtomobil yolu “Azərbaycan Avtomobil Yolları” Dövlət Agentliyi tərəfindən yenidən qurulur. Agentliyin mətbuat xidmətindən bildirilib ki, Dadaşbəyli-Çöl Ağaməmmədli-Xankeçən-Salmanlı avtomobil yolu 2 hərəkət zolaqlı olmaqla 4-cü texniki dərəcəyə uyğun bərpa olunur. Yolun hərəkət hissəsinin eni 6 metr, çiyinlərin eni 2 metr olmaqla ümumi eni 10 metr təşkil edəcək. Hazırda yol boyu deformasiyaya uğramış hissələr bərpa olunur, yeni yol əsası inşa edilir. Daha sonra yola 2 qat olmaqla yeni asfalt-beton örtüyü salınacaq. Ümumilikdə yola 230 min kvadratmetrdən çox asfalt örtüyü döşənəcək. Texnoloji ardıcıllıqla və yüksək keyfiyyətlə aparılan işlərin bu il ərzində yekunlaşdırılması üçün əraziyə lazımi sayda canlı qüvvə və texnika cəlb edilib.

Xaçmaz rayonunda inşa olunan Çarxı-Qalağan-Hacılar-Xanlıqoba-Sayad-Məmmədxanlı avtomobil yolunun tikintisi aprel ayınadək başa çatdırılacaq. Səkkiz min nəfər əhalinin yaşadığı 8 yaşayış məntəqəsini birləşdirən avtomobil yolunun uzunluğu 29 kilometrdir. Hazırda yol yatağı genişləndirilərək yenidən qurulur. Bunun ardınca asfalt-beton örtüyünün döşənməsi işləri həyata keçiriləcək.

Müasir standartlara cavab verən ikizolaqlı avtomobil yolu dördüncü texniki dərəcəyə uyğun inşa edilir. Yolun hərəkət hissəsinin eni 6, yol çiyinləri ilə birlikdə isə 10 metr olacaq. Tikinti zamanı qrunt sularının axıdılması üçün lazım olan yerlərdə suötürücü qurğular yerləşdiriləcək. Yolun tikintisi başa çatdıqdan sonra müvafiq yerlərdə yol nişanları qoyulacaq.

Muxtar respublikanın blokada şəraitində olmasına baxmayaraq, nəqliyyat sahəsində infrastrukturun yenilənməsi tədbirləri davam etdirilir. AZƏRTAC xəbər verir ki, 2017-ci ildə muxtar respublika üzrə 70 kilometr uzunluğunda yeni asfalt yol salınıb, 12 körpü tikilərək və ya yenidən qurularaq istifadəyə verilib. Naxçıvan şəhərində yerüstü piyada keçidi istifadəyə verilib, Naxçıvan Beynəlxalq Hava Limanında karqo terminalının yenidən qurulması başa çatdırılıb.

Aqşin ŞAHİNOĞLU

Yeni Azərbaycan.- 2018.- 10 yanvar.- S.7.