“Kaspi” Təhsil Mərkəzi aprel döyüşçülərinin xatirəsini yad edib

Dünən “Kaspi” Tədris Mərkəzinin təşkilatçılığı ilə aprel döyüşçülərinin xatirəsi anılıb. SİA-nın məlumatına görə, ədəbi-bədii gecə Azərbaycan Dövlət Musiqili Teatrında keçirilib. Tədbirdə dövlət rəsmiləri, millət vəkilləri, aprel döyüşçülərinin ailə üzvləri iştirak ediblər.

Qeyd edək ki, səhnələşdirilən tamaşalar “Kaspi” Tədris Mərkəzinin şagirdləri tərəfindən məharətlə icra edilib. Dərin vətənpərvərlik ruhuna köklənmiş tədbirdə bir-birindən maraqlı və təsirli tamaşalar göstərilib. Şagirdlərin rol aldıqları səhnələr tamaşaçılar tərəfindən alqışlarla qarşılanıb.

Sonda “Kaspi” Təhsil Mərkəzinin rəhbəri Sona Vəliyeva çıxış edərək aprel döyüşlərinin əhəmiyyətindən danışıb. O, şəhid olmuş əsgərlərin ailə üzvlərinə üz tutaraq şəhid olan qəhrəman əsgərlərimizin heç bir zaman unudulmayacaqlarını bildirib: “Mən topraqlarımızın tezliklə azad olunacağına əminəm. Biz şəhidlərin ruhu qarşısında baş əyirik. Bütün şəhid ailələri bilməlidir ki, biz hər zaman qəhrəman şəhidlərimizi qəlbimizdə, xatirələrimizdə yaşadacağıq”.

Yeni Azərbaycan.- 2019.- 16 aprel.- S.7.