Regionlarda quruculuq-abadlıq işləri uğurla davam etdirilir

2019-cu ilin əvvəlindən ayrı-ayrı bölgələrdə reallaşdırılan layihələr bunu bir daha təsdiqləyir

Məlum olduğu kimi, Ulu öndər Heydər Əliyev tərəfindən əsası qoyulan və Prezident İlham Əliyev tərəfindən uğurla davam etdirilən siyasət nəticəsində ölkəmizdə bütün sahələr inkişaf edib. Eyni zamanda, bu inkişafdan respublikamızın bölgələrinə də pay düşüb. Bölgələrin inkişafından danışarkən heç şübhəsiz 2004-cü ildən etibarən həyata keçirilən regionların sosial-iqtisadi inkişafına dair Dövlət proqramlarını xüsusi olaraq vurğulamaq yerinə düşər. Çünki məhz bu proqramların uğurlu icrası nəticəsində Azərbaycanın bölgələrinin siması əhəmiyyətli dərəcədə dəyişib. Ötən dövrdə bölgələrimizdə minlərlə kilometr yeni yollar çəkilib, körpülər tikilib, sosial obyektlər tikilib istifadəyə verilib, eləcə də sənaye müəssisələri yaradılıb.

Yanvarın 29-da keçirilən “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransdakı çıxışında bu məqama toxunan Prezident İlham Əliyev bildirib ki, son 15 il ərzində Azərbaycan iqtisadiyyatı dünya miqyasında rekord templərlə inkişaf edib: “Son 15 il ərzində Azərbaycan iqtisadiyyatı dünya miqyasında rekord templərlə inkişaf edib, ümumi daxili məhsul 3,3 dəfə artmışdır. Bir daha demək istəyirəm, bu, dünya miqyasında rekord göstəricidir. Sənaye istehsalı 2,6 dəfə artmışdır. İxracımız 4,7 dəfə, valyuta ehtiyatlarımız 24 dəfə artıb və bu gün 45 milyard dollar təşkil edir. Yəni, bu, onu göstərir ki, Azərbaycan regionlarına və eyni zamanda, neft-qaz sektoruna, Bakı şəhərinin inkişafına böyük vəsait qoyulmasına baxmayaraq, biz öz valyuta ehtiyatlarımızı 24 dəfə artıra bilmişik. Bu, bizə imkan verir ki, gələcəyə çox böyük ümidlərlə baxaq. Azərbaycan iqtisadiyyatı bu gün dayanıqlı iqtisadiyyatdır”.

Prezident İlham Əliyevin sözügedən konfransdakı çıxışında qeyd etdiyi kimi, regionların sosial-iqtisadi inkişafına dair müvafiq Dövlət proqramlarının uğurlu icrası deməyə əsas verir ki, onların qəbulu tam məntiqə uyğundur: “Bizim iqtisadi göstəricilərimiz, bölgələrdə gedən quruculuq-abadlıq işləri bunun əyani sübutudur”.

Bu məqamda vurğulamaq yerinə düşər ki, hazırda bölgələrdə bu istiqamətdə işlər yüksək səviyyədə icra olunmaqdadır. Məsələn, Qazax rayonunda quruculuq-abadlıq işləri uğurla davam edir. Belə ki, Prezident İlham Əliyevin Qazaxda çoxmənzilli binaların əsaslı təmir olunması ilə bağlı 2016-cı il 20 oktyabr tarixli Sərəncamına əsasən 2017-ci ildə 78, 2018-ci ildə isə 5 çoxmənzilli yaşayış binasının fasadında, bloklarında, pilləkən qəfəslərində, su-kanalizasiya, elektrik, rabitə və qaz xətlərində əsaslı təmir və rəngləmə, həyətlərində isə abadlıq işləri görülüb. Dörd çoxmənzilli yaşayış binasının həyətində xeyir-şər evləri tikilib və ya əsaslı təmir olunub. Bununla da rayonda olan 163 ədəd çoxmənzilli yaşayış binasından 129-u yüksək səviyyədə təmir olunaraq sakinlərin istifadəsinə verilib. Bu barədə Qazax rayon İcra Hakimiyyətindən məlumat verilib. Həmçinin dövlətimizin başçısının respublikanın şəhər və rayonlarında çoxmənzilli binaların dam örtüklərinin təmiri ilə bağlı 2018-ci il 4 oktyabr tarixli Sərəncamına əsasən, şəhərin Azadlıq küçəsi 92 ünvanında yerləşən beşmərtəbəli, 36 mənzilli və Bakı küçəsi 1 ünvanında yerləşən beşmərtəbəli, 30 mənzilli binaların dam örtükləri dəyişdirilib.

Qazax rayonundan söz düşmüşkən qeyd edək ki, ötən ay Qazax şəhər 6 saylı körpələr evi-uşaq bağçası əsaslı təmirdən sonra istifadəyə verilib. Bununla bağlı keçirilən mərasimdə bildirilib ki, hazırda şəhər bağçalarından 1, 2, 3, 4, 5 saylı, kənd bağçalarından Qazaxbəyli kəndi ərazisində məcburi köçkünlər üçün salınmış yeni qəsəbədə yerləşən Aşağı Əskipara, Daş Salahlı kənd 2 və 3 saylı, Kosalar kənd 2 və 3 saylı, Xanlıqlar, Dəmirçilər, İkinci Şıxlı kənd 2 saylı körpələr evi-uşaq bağçaları, Cəfərli, Canalı, Quşçu Ayrım və Bala Cəfərli kənd uşaq bağçaları müasir səviyyədə əsaslı təmir edilib.

Qeyd edək ki, Prezident İlham Əliyevin regionlarda uşaq bağçalarının tikintisi ilə bağlı imzaladığı 2018-ci il 12 fevral tarixli Sərəncamına əsasən 6 saylı körpələr evi-uşaq bağçasında da işlərə başlanılıb. 90 yerlik körpələr evi-uşaq bağçasında balacaların təlim-tərbiyəsi ilə peşəkar pedaqoji heyət məşğul olacaq. Burada müxtəlif yaş qrupları üçün məşğələ və yataq otaqları, rəsm, idman və musiqi zalları, yeməkxana yaradılıb. Bağçanın həyətində xüsusi istirahət guşələri var, həmçinin müşahidə kameraları quraşdırılıb.

Hazırda Qazax rayonu üzrə 25 uşaq bağçasından 18-də müasir şərait yaradılıb və bu il digər bağçalarda da təmir işləri aparılacaq.

Göyçay rayonunun Alpout kəndində də yeni körpələr evi-uşaq bağçası istifadəyə verilib. Heydər Əliyev Fondu tərəfindən inşa edilən yeni körpələr evi-uşaq bağçası 40 yerlikdir. Müasir memarlıq üslubunda tikilən binada 2 oyun və 1 yataq otağı, mətbəx və digər yardımçı otaqlar vardır. Bütün otaqlar, habelə dəhliz lazımi avadanlıqla təchiz olunub. Həyətdə çardaq qurulub.

Körpələr evi-uşaq bağçasının istifadəyə verilməsi münasibətilə keçirilən mərasimdə çıxış edənlər ölkəmizin inkişafı, ucqar yaşayış məntəqələrində həyata keçirilən sosial layihələrə görə Prezident İlham Əliyevə, Birinci vitse-prezident, Heydər Əliyev Fondunun prezidenti Mehriban Əliyevaya minnətdarlıqlarını bildiriblər.

Rayonun Müskürlü və Qarabaqqal kəndlərində isə yeni körpələr evi-uşaq bağçasının inşasına başlanılıb. Hər iki kənddə də körpələr evi-uşaq bağçası 40 yerlik olacaq. Binalarda 2 oyun və 2 yataq otağı, mətbəx, sanitar qovşağı və digər yardımçı otaqlar tikiləcək.

Xaçmaz şəhərindəki “Çənlibel” parkında isə 35 metr hündürlüyündə yeni Saatlar qülləsi inşa olunur. Tikintisi iki ay ərzində tamamlanacaq qüllədə uşaq əyləncə mərkəzi və müşahidə məntəqəsi fəaliyyət göstərəcək. Səkkizmərtəbəli qüllə şəhərin girişində yerləşən “Çənlibel” parkına əlavə gözəllik verəcək. İş icraçısı Ələddin Qasımov bildirib ki, qüllənin hər birinin sahəsi 100 kvadratmetr olan ilk 4 mərtəbəsi uşaqların ixtiyarında olacaq. Yuxarı mərtəbələr isə şəhəri müşahidə etmək üçün nəzərdə tutulub. Parkda dincələnlər burada quraşdırılan durbinlər vasitəsilə uzaq məsafədə yerləşən mənzərələri də seyr edə biləcəklər. Qüllənin başında isə hər tərəfdən görünən 4 saat quraşdırılıb.

Qeyd edək ki, “Çənlibel” parkı Xaçmaz şəhərin giriş hissəsində yerləşdiyindən buranı yerli sakinlərlə yanaşı, çoxsaylı turistlər də ziyarət edir. Altı hektara yaxın ərazisi olan parkda xalq qəhrəmanı Koroğlunun at üstündə heykəli ucaldılıb. Burada çoxsaylı əyləncə və iaşə obyekti də fəaliyyət göstərir.

Xaçmazı bu gün parklar və muzeylər şəhəri adlandırırlar. Ötən dövrdə rayonda ümumi sahəsi 20 hektara yaxın olan 7 park salınıb.

Quruculuq işləri Tərtərdə də uğurla davam edir. Belə ki, Tərtər şəhərindəki Bayraq Meydanının ərazisində Bayraq Muzeyinin inşasına başlanılıb. Ərazisi 0,12 hektar olan meydanda inşa edilən Bayraq Muzeyinin tikinti sahəsi 720 kvadratmetrdir. İnşaat işlərinin bu ilin sonunadək başa çatdırılması nəzərdə tutulur. Bayraq muzeyinin ərazisində abadlıq işləri aparılacaq, yaşıllıq salınacaq.

Muzeydə tariximizin müxtəlif dövrlərinə aid eksponatlar, Azərbaycan ərazisində mövcud olmuş dövlətlərin, xanlıqların, həmçinin Silahlı Qüvvələrin qoşun növlərinin bayraqları, gerblər, xəritələr, konstitusiyalar, orden və medallar, bir sözlə, müxtəlif dövlət rəmzləri qorunub saxlanılacaq. Bayraq Muzeyi Azərbaycan tarixinin təbliğində mühüm rol oynamaqla yanaşı, gənc nəslin dünyagörüşünün artırılmasına, rayon sakinlərində və qonaqlarda şanlı tariximiz haqqında geniş təsəvvür yaratmağa imkan verəcək.

Biləsuvar şəhərindəki Heydər Əliyev prospektində isə qəzalı vəziyyətdə olan yaşayış evlərinin sakinləri üçün 48 mənzilli yeni bina tikilir. Prezident İlham Əliyevin imzaladığı Sərəncam ilə ayrılan vəsait hesabına inşa olunan dördmərtəbəli binanın tikintisinə ötən ilin sonlarında başlanılıb. Artıq binanın bünövrəsi tökülüb, hörgü işləri aparılır. Mənzillərin 8-i bir, 24-ü iki, 16-sı isə üçotaqlı olacaq. İnşaat işlərinin bu ilin avqust ayında başa çatdırılması nəzərdə tutulub.

Lerik şəhərində də istismar müddəti başa çatmış yaşayış binalarının sakinləri üçün 48 mənzilli yeni yaşayış binasının tikintisinə başlanılıb. Prezident İlham Əliyevin müvafiq Sərəncamına əsasən 900 kvadratmetr ərazidə inşa edilən yaşayış binası iki korpusdan ibarət olacaq. Hazırda binanın tikintisində torpaq işləri başa çatdırılıb, bünövrə işlərinə başlanılıb. Yeni yaşayış binasının bu ilin sonunadək istifadəyə verilməsi nəzərdə tutulur.

Onu da qeyd edək ki, bu il Gəncədəki çoxmərtəbəli binaların dam örtüklərinin yenilənməsi tam başa çatdırılacaq. Bu barədə Gəncə şəhər İcra Hakimiyyətindən məlumat verilib. Bildirilib ki, Prezident İlham Əliyevin müvafiq Sərəncamına əsasən ayrılan vəsait hesabına Gəncədə 268 binanın dam örtüyünün dəyişdirilməsi nəzərdə tutulub. Artıq bu binaların əksəriyyətinin dam örtüyü dəyişdirilib. Hazırda şəhərin Mahrasa Bağı və Yeni Gəncə yaşayış massivlərində davam etdirilən işlərə yekun vurulduqdan sonra çoxmərtəbəli binaların dam örtükləri ilə bağlı mövcud problemlər tamamilə aradan qaldırılmış olacaq.

Gəncə şəhərində həmçinin çoxmərtəbəli binalardan ibarət 2 yeni yaşayış qəsəbəsi salınacaq. Şəhərin qərb istiqamətdən girişində salınacaq bu qəsəbələrdən biri üçün 50 hektar, digəri üçün isə 150 hektar ərazi ayrılıb. Bu barədə Gəncə şəhərinin baş memarı Elxan Məmmədov bildirib ki, yeni yaşayış massivində çoxmənzilli yüksək binalar, 3-4 mərtəbəli evlər, məktəb binası, uşaq bağçası, eləcə də sosial və iaşə obyektlərinin inşası nəzərdə tutulur.

Baş memar qeyd edib ki, bu binaların tikilməsində Mənzil İnşaatı Dövlət Agentliyi yaxından iştirak edəcək. Tikintisi başa çatan binalar satışa çıxarılacaq və vətəndaşlara sərfəli şərtlərlə təklif ediləcək. Belə ki, sosial təminatı çox da yüksək olmayan vətəndaşlar hər ay cüzi məbləğ ödəməklə mənzil sahibi ola biləcəklər.

Həmçinin şəhərdə qəzalı vəziyyətdə olan binalarda yaşayanların və infrastruktur layihələrinin icrası zamanı evlərindən köçürülən ailələrin də yeni qəsəbələrdə yerləşdirilməsi nəzərdə tutulur.

Sonda onu da qeyd edək ki, Prezident İlham Əliyev yanvarın 29-da “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın təsdiq edilməsi haqqında Fərman imzalayıb. Bu isə bir daha onu deməyə əsas verir ki, regionların sosial-iqtisadi inkişafı davamlı xarakter daşıyır.

Nardar BAYRAMLI

Yeni Azərbaycan.- 2019.- 1 fevral.- S.7