Regionlarda tikinti-quruculuq işləri davamlı xarakter daşıyır

Bu ilin üç ayı ərzində də bölgələrdə infrastruktur layihələri uğurla reallaşdırılıb

Məlum olduğu kimi, ölkəmizdə uğurla reallaşdırılan sosial-iqtisadi siyasət respublikamızın hərtərəfli inkişafını təmin edib. Heç şübhəsiz ki, bu inkişafda ölkəmizdə 2004-cü ildən etibarən reallaşdırılan regionların sosial-iqtisadi inkişafına dair Dövlət proqramlarının xüsusi payı var. Çünki məhz bu proqramlar çərçivəsində atılan addımlar, həyata keçirilən genişmiqyaslı layihələr Azərbaycanın regionlarının ümumi inkişaf dinamikasını təmin edib. Eyni zamanda, onu da xüsusi olaraq vurğulamaq yerinə düşər ki, respublikamızda regionların sosial-iqtisadi inkişafına dair əvvəlki iki Dövlət Proqramı kimi, 2014-2018-ci illəri əhatə edən sayca üçüncü proqramın icrası da yüksək səviyyədə təmin olunub. Prezident İlham Əliyevin 29 yanvar 2019-cu il tarixində imzaladığı növbəti Fərmanla isə “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı” təsdiqlənib. Yeri gəlmişkən, dövlət başçısı cari il yanvarın 29-da keçirilən “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransdakı nitqində ölkəmizin inkişafı baxımından üçüncü Dövlət Proqramını yüksək qiymətləndirib: “Regionların sosial-iqtisadi inkişafına dair üçüncü Dövlət Proqramının icrası təmin edildi. Beş il bundan əvvəl qəbul edilmiş proqram artıqlaması ilə yerinə yetirildi. Son beş il ərzində qarşımıza qoyduğumuz bütün vəzifələr icra olundu. Üçüncü proqramın çox böyük əhəmiyyəti var. Bu proqram bizə imkan yaratdı ki, regionlarda əvvəlki illərdə aparılan islahatlara, görülən işlərə yeni təkan verək”.

Beləliklə, görünən odur ki, regionların sosial-iqtisadi inkişafına dair Dövlət proqramlarının reallaşdırılması respublikanın bölgələrinin hərtərəfli inkişafını təmin edib və hər bir rayonda əldə edilən uğurlarla müşayiət olunub. Təsadüfi deyil ki, məhz bu proqramlar çərçivəsində regionlarda genişmiqyaslı tikinti-quruculuq işləri görülüb. Hazırda da bu istiqamətdə işlər davam etdirilir.

Məsələn, respublikamızın ayrı-ayrı bölgələrində olduğu kimi, Gəncə şəhərində də qeyri-neft sektorunun vacib sahələrindən olan turizmin inkişafı məqsədilə müasir infrastrukturun, hotellərin və istirahət-əyləncə mərkəzlərinin yaradılması işləri həyata keçirilir. Belə ki, hazırda Gəncə şəhərində 5, onun inzibati ərazisinə daxil olan Hacıkənd qəsəbəsində isə 1 yeni hotel tikilir. Şəhərin mərkəzində Heydər Əliyev prospekti ilə Cavad xan küçəsinin kəsişməsində inşa edilən və ümumi sahəsi 5 min 586 kvadratmetr olan “Majestic Palace” mehmanxanasının daxilində hazırda son tamamlama işləri görülür.

Şəhərin mərkəzində, Nağı bəy Şeyxzamanlı küçəsində inşa edilən və ümumi sahəsi 2 min 500 kvadratmetr olan 8 mərtəbəli “Otel Univermaq”da, həmçinin Nizami Gəncəvi prospektindəki 8 mərtəbəli və 4 mərtəbəli hotellərin də binasında tikinti işləri yekunlaşıb.

Eyni zamanda, şəhərin Şah İsmayıl Xətai prospektində 4 mərtəbəli, Zərifə Əliyeva prospektində isə 2 mərtəbəli mehmanxanalar da inşa edilir.

Hacıkənd qəsəbəsində tikilən 7 mərtəbəli ARFA mehmanxanasının daxilində son tamamlama işləri görülür. ARFA mehmanxanasının istifadəyə verilməsi Hacıkənd və Göygöldə qış turizminin inkişafına töhfə olacaq.

Son illərdə respublikamızın bütün bölgələrində ümumtəhsil məktəblərinin infrastrukturunun müasirləşdirilməsi və maddi-texniki bazasının zənginləşdirilməsi üçün həyata keçirilən tədbirlərə uyğun olaraq Goranboy rayonunda da 24 məktəb binası və 3 əlavə tədris korpusu tikilib. Həmçinin 11 məktəb əsaslı təmir edilib. Vurğulanmalıdır ki, ötən il Xoylu kənd tam orta məktəbin əlavə korpusu əsaslı təmir edilib, Səfikürd və Balakürd kəndlərində mini-stadionlar quraşdırılıb. Bununla belə, hazırda 15 məktəbin tikintisinə, 4 məktəbin isə əsaslı təmirinə ehtiyac var.

Goranboyda tikilən Ailə və Uşaqlara Dəstək Mərkəzi isə bu il istifadəyə veriləcək. Artıq Mərkəz üçün binanın tikintisi başa çatıb. Hazırda binanın daxilində təmir işləri davam etdirilir. Mərkəzin əsas məqsədi rayonda sağlamlıq imkanları məhdud uşaqların cəmiyyətə inteqrasiyasına, onlarda müstəqil həyat bacarıqlarını inkişaf etdirməyə kömək etməkdir. Bu məqsədlə Mərkəzdə anaların və uşaqların iştirakını nəzərdə tutan məktəbəqədər məşğələlər təşkil ediləcək, xidmətlər göstəriləcək.

Onu da vurğulamaq yerinə düşər ki, son illərdə respublikamızda ənənəvi məktəb binalarının inşası ilə yanaşı, modul tipli məktəblərin quraşdırılması da həyata keçirilir. Xatırladaq ki, modul tipli məktəblərin üstünlüyü onların azməsrəfli olması, qısa müddət ərzində istənilən relyefdə quraşdırılması, asan daşınması, sinif otaqlarının sayının şagirdlərin sayına uyğun olaraq rahatlıqla azaldılıb-artırılmasıdır. Modul tipli məktəblərin tikintisində əsasən yerli istehsal məhsullarından istifadə edilir.

Yeri gəlmişkən, tezliklə Tərtər rayonunun Kovdadıq və Zolgəran kəndlərində quraşdırılan modul tipli məktəb binaları müəllim və şagirdlərin istifadəsinə veriləcək. Məktəb binalarının tikinti-quraşdırma işləri Prezident İlham Əliyevin “Ağdam, Laçın, Füzuli və Tərtər rayonlarında təhsil infrastrukturunun inkişafı ilə əlaqədar tədbirlər haqqında” 2018-ci il 16 fevral tarixli Sərəncamı ilə ayrılan vəsait hesabına həyata keçirilib.

Kovdadıq kənd ibtidai məktəbi üçün quraşdırılan bina 20, Zolgəran kənd ümumi orta məktəbi üçün qurulan bina isə 56 şagird yerlikdir. Artıq tikinti-quraşdırma işləri başa çatıb. Məktəb binaları müasir avadanlıqlar və mərkəzləşdirilmiş istilik sistemi ilə təmin edilib. Hazırda binaların su təminatı üçün işlər davam etdirilir, həyətlərində abadlıq işləri aparılır, yaşıllıqlar salınır. Qeyd edək ki, ötən il Tərtər rayonunun Bayandur və Poladlı kəndlərində də modul tipli məktəb binaları quraşdırılıb.

Xaçmaz şəhərində isə 432 şagird yerlik ikimərtəbəli məktəb binası inşa olunur. Hazırda binanın birinci mərtəbəsinin tikintisi həyata keçirilir. Bəybala Rəsulov adına Xaçmaz şəhər 5 nömrəli tam orta məktəbi üçün inşa olunan yeni bina növbəti tədris ilindən istifadəyə veriləcək. Yeni məktəb binasının həyətində qazanxana və su çənləri də inşa olunacaq. Otuz sinif otağından ibarət olacaq tədris ocağında fənn kabinetləri, kitabxana, kompüter otağı, akt və idman zalları fəaliyyət göstərəcək. Təhsil müəssisəsi müasir istilik və işıqlandırma sistemi ilə təchiz ediləcək.

Ümumiyyətlə, 2018-ci ildən şimal bölgəsinin altı rayonunda 20 yeni modul tipli məktəb binasının tikintisinə başlanılıb. Bu məktəblərdən 18-i artıq istifadəyə verilib. Xaçmaz rayonunun Cığatay, Siyəzənin Qalaaltı kəndlərində quraşdırılan modul tipli məktəblər isə yaxın günlərdə şagirdlərin ixtiyarına veriləcək.

Məktəbəqədər tərbiyə müəssisələrinin müasirləşdirilməsi, maddi-texniki bazasının zənginləşdirilməsi, eləcə də gələcək nəslin təlim və tərbiyəsinin hərtərəfli inkişaf etdirilməsi məqsədilə respublikamızın ayrı-ayrı bölgələrində görülən işlərə uyğun olaraq Şəmkir rayonunda ötən il 755 yerlik 7 körpələr evi-uşaq bağçasında əsaslı təmir işləri aparılıb.

Belə ki, Şəmkir şəhərində 3, 4 və 5 saylı körpələr evi-uşaq bağçalarının, Kür qəsəbə, Keçili, Qaracəmirli və Dəllər Cırdaxan kənd körpələr evi-uşaq bağçalarının binaları əsaslı təmir olunub. Şəmkirin Hərbi şəhərcik ərazisində 8 saylı körpələr evi-uşaq bağçası üçün 100 yerlik binanın tikintisi başa çatdırılıb.

O cümlədən kənd təsərrüfatının inkişafında və ərzaq təhlükəsizliyinin təmin olunmasında baytarlıq sahəsinin oynadığı mühüm rol nəzərə alınaraq Naxçıvan Muxtar Respublikası Dövlət Baytarlıq Xidməti və tabeliyindəki qurumların iş şəraiti də yaxşılaşdırılır. Babək rayon Baytarlıq İdarəsi üçün yeni inzibati binanın inşa olunması da həyata keçirilən tədbirlərin tərkib hissəsidir.

Yeni inzibati bina 3 mərtəbədən ibarət olacaq. Hazırda binanın dam örtüyü vurulur, rabitə və elektrik xətləri çəkilir. Qeyd edək ki, müasir layihə əsasında inşa olunan binanın birinci mərtəbəsində dərman və boya maddələrinin saxlanılması üçün otaqlar və qəbul otaqları, eləcə də arxiv yerləşəcək. İkinci mərtəbədə isə virusoloq-həkim, terapevt-həkim, epizootik-həkim, süni mayalanma və laborant-sanitar otaqları, laboratoriyalar fəaliyyət göstərəcək.

Naxçıvan Muxtar Respublikasının Şahbuz şəhərində isə 40 mənzilli altımərtəbəli yaşayış binası inşa olunur. Mənzillərdən 20-si üçotaqlı, 20-si isə ikiotaqlıdır. Üçotaqlı mənzillərin ümumi sahəsi 83 və 90, ikiotaqlı mənzillərinki isə 63 və 70 kvadratmetr olacaq. Binanın zirzəmisində mülki müdafiə və səfərbərlik ehtiyatı anbarı, xidmət mərkəzi yerləşəcək. Hazırda binanın dördüncü mərtəbəsində beton-qəlib, digər mərtəbələrdə isə hörgü işləri görülür.

Yardımlı rayonunda isə Prezident İlham Əliyevin Sərəncamına əsasən Olimpiya İdman Kompleksinin tikintisi uğurla davam etdirilir. Gənclər və İdman Nazirliyinin sifarişi ilə Yardımlı şəhərindəki Heydər Əliyev prospektində inşa edilən yeni idman obyektinin tikintisinə ötən ilin oktyabrında başlanılıb. Bu, ölkəmizdə inşa edilən sayca 47-ci Olimpiya İdman Kompleksidir.

Üçmərtəbəli əsas korpusda 700 yerlik böyük idman, 160 yerlik güləş zalları, eləcə də boks zalı, voleybol və futbol meydançaları yaradılacaq. Burada həmçinin mehmanxana binası, 150 kubmetrlik su anbarı, qazanxana, elektrik yarımstansiyası və digər yardımçı tikililər də inşa ediləcək. Yardımlı Olimpiya İdman Kompleksinin bu ilin sonunadək istifadəyə verilməsi nəzərdə tutulub.

Qax rayonunda da tikinti-quruculuq işləri uğurla davam etdirilir. Belə ki, Qax şəhərində istismar müddəti başa çatmış 3 ədəd ikimərtəbəli binanın sakinlərinin mənzil-məişət şəraitinin yaxşılaşdırılması məqsədilə 48 mənzilli yeni yaşayış binasının tikintisinə başlanılıb. Bina Prezident İlham Əliyevin ötən il oktyabrın 29-da imzaladığı Sərəncama əsasən inşa edilir.

Şəhərin Hürü Tağıyeva küçəsində inşa edilən 4 blokdan ibarət dördmərtəbəli binanın tikintisində hazırda zirzəmi hissəsinin betonlanması işləri görülür. Yaşayış binasının bu ilin sonunadək istifadəyə verilməsi nəzərdə tutulur.

Nurlan QƏLƏNDƏRLİ

Yeni Azərbaycan.- 2019.- 30 mart.- S.6.