Yeni Azərbaycan Partiyasının İcra Katibliyində toplantı keçirilib

Əli Əhmədov: Qanunsuz aksiyaların məqsədi Azərbaycanda qarşıdurma yaratmaq, ölkədə həyata keçirilən islahatlara əngəl törətmək, ölkədə sabitliyi pozmaqdan ibarətdir

Oktyabrın 21-də Yeni Azərbaycan Partiyasının (YAP) İcra Katibliyində toplantı keçirilib. Toplantıda çıxış edən Azərbaycan Respublikası Baş Nazirinin müavini, YAP Sədrinin müavini-İcra katibi Əli Əhmədov bildirib ki, oktyabrın 19-da bəzi müxalifət partiyaları tərəfindən Bakı şəhərində qeyri-qanuni aksiyanın keçirilməsi cəhdinə geniş münasibət bildirməyə ehtiyac var. YAP-ın bu barədə bəyanat yaydığını deyən Əli Əhmədovun sözlərinə görə, Azərbaycan vətəndaşlarının əksəriyyəti kimi, Yeni Azərbaycan Partiyası da ölkəmizdə sabitliyin, əmin-amanlığın pozulmasına yönəldilmiş kütləvi aksiyaların keçirilməsinə özünün sərt və ədalətli münasibətini bildirməlidir. O qeyd edib ki, ölkəmizdə hər hansı müxalifət partiyası tərəfindən kütləvi aksiyaların keçirilməsi nə Yeni Azərbaycan Partiyası, nə də Azərbaycan iqtidarı üçün narahatlıq mənbəyi deyil və ola da bilməz: “Amma, eyni zamanda, narahatlıq yaradan bəzi məqamlar var ki, onları həm özümüzün etiraf etməsinə, həm də bütövlükdə cəmiyyətə fikirlərin çatdırılmasına ehtiyac var. Birincisi onu qeyd etmək istəyirəm ki, belə bir qanunsuz aksiyanın keçirilməsi Prezident İlham Əliyevin oktyabrın əvvəlində Soçidə keçirilən “Valday” Beynəlxalq Diskussiya Klubunun XVI illik iclasında verdiyi bəyanatdan, onun ardınca Aşqabadda Azərbaycan cəmiyyətinin mövqeyini əks etdirən fikirləri səsləndirməsindən və sonra isə ölkəmizin sosial-iqtisadi inkişafı ilə bağlı 9 ayın yekunlarına həsr olunmuş iqtisadi müşavirədə səsləndirdiyi fikirlərdən bir neçə gün sonraya təsadüf edir. Düşünürəm ki, bütün bunların hamısını bütövlükdə təsadüf hesab etmək olmaz. Görünür ki, ölkə daxilindəki destruktiv qruplar, ən başlıcası isə Azərbaycana xaricdən müxtəlif vasitələrlə təsir göstərmək istəyən dairələr ölkəmizin daxilindəki bəzi qruplardan Azərbaycana qarşı çirkin niyyətlərinin həyata keçirilməsi üçün vasitə kimi istifadə etmək fikrinə düşüblər. Xatırladaq ki, təxminən iki ay əvvəl siyasi partiyaların vasitəsilə Azərbaycana xarici təzyiqlərin mövcud olması ilə bağlı həyəcan təbili çalındı. Siyasi partiyaların, o cümlədən müxalifət partiyalarının, qeyri-hökumət təşkilatlarının qatıldığı toplantıda ədalətli dəyərləndirilən bəyanatın qəbul olunmasını da yada salmaq istərdim. Bu hadisələrin ortaya qoyduğu reallıqlardan biri ondan ibarətdir ki, Azərbaycanda, həqiqətən, bəzi siyasi təşkilatların vasitəsilə ölkədən kənarda olan maraqlı dairələr Azərbaycan dövlətinə, bütövlükdə ölkəmizə çirkin niyyətləri ilə əlaqədar təzyiqlər göstərmək istəyiblər”.

Baş Nazirin müavini söyləyib ki, Azərbaycanda bütün azadlıqlar kimi, sərbəst toplaşmaq azadlığı da yüksək səviyyədə təmin olunub. Onun sözlərinə görə, kütləvi aksiyaların keçirilməsi üçün xüsusi yerlərin ayrılmasına baxmayaraq, radikal müxalifət icazəsiz aksiya keçirmək niyyətinə düşüb və belə cəhdi göstərib. Bunun arxasında dayanan başlıca istək və məqsəd onlara verilən tapşırığa uyğun olaraq Azərbaycanda qarşıdurma yaratmaq, ölkədə həyata keçirilən islahatlara əngəllər törətmək, dövlət və hökumət qüvvələri ilə qarşıdurma yaratmaqla ölkədə sabitliyi pozmaqdan ibarətdir. Əgər hər hansı bir siyasi təşkilat özünün bəyanatlarını səsləndirmək istəyirsə, hətta ölkədə olmadığı təqdirdə də həmin bəyanatları bütün Azərbaycan xalqına çatdırmaq imkanları mövcuddur və bundan geniş istifadə olunur. Buna baxmayaraq, mitinqin keçirilməsi üçün yerin ayrılmasına rəğmən onlar aksiyanı razılaşdırılmamış yerdə keçirməyə cəhd göstəriblər. Niyyət də qeyd olunduğu kimi, qarşıdurma yaratmaqdır.

“Vurğulanmağa ehtiyac olan məqamlardan biri budur ki, onların yenə də kimlərsə tərəfindən idarə olunması aydın şəkildə hiss olunur. Təlimatı verənlər də, onlardan hesabatı tələb edənlər də məlumdur. Bu da bir daha onu təsdiq edir ki, məqsədli şəkildə Azərbaycandan kənar qüvvələr tərəfindən idarə olunan dairələrin tapşırıqlarını yerinə yetirən destruktiv qruplar ölkəmizdə sabitliyi və əmin-amanlığı pozmağa cəhdlər göstərirlər. Mitinqin keçirilməsi ilə bağlı seçilən yerlə əlaqədar da fikirlərimizi açıq şəkildə bəyan etməliyik. İstənilən halda dünyanın hər bir yerində bir yandan insanların rahatlığının pozulmaması, digər bir yandan asayişin pozulmasına imkan verməmək, o cümlədən mitinqləri keçirənlərin təhlükəsizliyini təmin etmək naminə ayrıca yerlər müəyyənləşdirilir. Çünki mintiqləri keçirənlərin təhlükəsizliyinin təmin edilməsi Azərbaycanın müvafiq dövlət qurumlarının, hüquq-mühafizə orqanlarının üzərinə düşən öhdəlikdir. Amma bunlar elə bir yer seçiblər ki, orada mitinqin keçirilməsi sağlam məntiqə sığmır və sığa da bilməz. Əhalinin çox gur, hərəkətin çox sıx olduğu bir yeri seçməklə onlar ilk növbədə ictimai dəstəyin çox geniş olduğunu göstərməyə çalışırlar, baxmayaraq ki, bu, siyasi etika baxımından düzgün dəyərləndirilə biləcək hərəkət deyil. Amma bizi maraqlandıran onların siyasi mədəniyyətində çatışmazlıqları qeyd etmək deyil. Bizi narahat edən əsas məqam onların belə yerləri seçməklə çirkin niyyətlərini həyata keçirmək üçün daha münbit bir şəraiti təmin etməyə çalışmalarıdır. Əlbəttə ki, əhalinin gur olduğu yerdə asayişin pozulması ehtimalı da yüksəkdir. İnsanlar harasa gedir, beləliklə onların hərəkətinə əngəl törətməklə ictimai narazılığı da yaratmaq ehtimalı çox olur. Ona görə də bunun özü də mitinqi təşkil edənlərin niyyətlərinin sağlam olmamasından xəbər verir. Beləliklə, bu qanunsuz mitinqin təşkil olunması cəhdi bir daha onu göstərir ki, Azərbaycanda daxili sabitliyi pozmağa yönələn fəaliyyət göstərən partiyalar mövcuddur. Bu, Azərbaycan Xalq Cəbhəsi Partiyasıdır və bu partiyanın ətrafında toplaşmış destruktiv quruplaşmalardır, “Milli şura” deyilən, amalı çox da aydın olmayan bir təşkilatdır ki, bunlar insanlar arasında sosial dayaqlarının olmadığını dərk etdiklərindən Azərbaycandakı sabitliyi, əmin-amanlığı pozmağa çalışırlar”, - deyən Əli Əhmədov söyləyib ki, Yeni Azərbaycan Partiyası olaraq biz hər hansı bir partiyanın hakimiyyətə gəlmək iddiasına qarşı deyilik. Bu, Azərbaycan dövləti və cəmiyyəti tərəfindən qəbul olunmuş və bütün partiyalara şamil olunan haqdır. Lakin nəyin bahasına olursa-olsun, hakimiyyətə gəlmək istəyi dünyanın heç bir yerində məqbul sayılmır və dünyanın heç bir yerində hakimiyyətə nəyin bahasına olursa-olsun, gəlmək istəyənlərə meydan verilmir.

YAP Sədrinin müavini söyləyib ki, nəyin bahasına olursa-olsun, hakimiyyətə gəlmək istəyi ölkəni xaosa sürükləyir, ölkədəki sabitliyi ciddi şəkildə pozur və bunun da nəticəsi bəzi ölkələrdə baş verən hadisələrə, Azərbaycanın özündə belə təxminən 30 il bundan əvvəl yaşadığımız xaos və anarxiyaya gətirib çıxarır: “Görünür, sifarişçilər də eyniləridir, icraçıları da dəyişməyib. Bu, həmin icraçılardır ki, 1990-cı illərin əvvəllərində ölkədə xaos və anarxiya yaratmışdılar. Azərbaycan vətəndaşları müsibətlər yaşamağa məhkum olunmuşdu. O insanlar hakimiyyətə bu üsulla gəlməyin yolunu görüblər və istəklərinə nail olub hakimiyyətə gəldilər. Amma bundan Azərbaycan dövləti və xalqı böyük əziyyətlər çəkdi. Azərbaycanın torpaqları işğal olundu. Ölkənin müstəqilliyinin əldən getməsi təhlükəsi yarandı. Həmin insanlar yenidən ölkəni xaosa sürükləyirlər. Yenidən ölkədəki sabitliyi pozmağa, qarşıdurma yaratmağa və beləliklə də həm özlərinin hakimiyyətə hansı yolla olursa-olsun, gəlmək kimi çox çürük fəlsəfələrini həyata keçirməyə çalışırlar, həm də onlara sifarişlər verən, onları maliyyələşdirən və istiqamətləndirən xarici qüvvələrin tapşırıqlarını yerinə yetirirlər. Əlbəttə ki, hər bir ölkənin milli maraqları o ölkənin vətəndaşlarının təhlükəsizliyinin qorunması, dövlətin müstəqilliyinin təmin olunması, ölkənin inkişafı üçün strategiyanın müəyyənləşdirilib həyata keçirilməsi ilə əlaqədardır. Xaricdən olan tapşırıqları yerinə yetirən partiyalar isə heç bir halda ölkənin daxili maraq və mənafelərinə xidmət etmirlər, edə bilmirlər”.

Baş Nazirin müavini deyib ki, Azərbaycan bu gün dünyada sürətlə inkişaf edən dövlət kimi nüfuz qazanıb. Onun sözlərinə görə, Azərbaycan regionda və dünyada çox möhtəşəm layihələrin həyata keçirilməsində nəinki iştirak edir, bir çox layihələrin müəllifi qismində özünü təqdim edir: “Azərbaycan dünyanın ən uğurlu gənc dövlətlərindən biri kimi özünü tanıdıb. Ölkəmiz gündən-günə inkişaf eməklə insanların rifahının yaxşılaşdırılması üçün böyük layihələr həyata keçirir. Təkcə bu il ərzində minimum əməkhaqları, minimum pensiyalar iki dəfəyə qədər artırılıb. Bizim hər birimiz dünyada əməkhaqlarının və pensiyaların artırılması ilə əlaqədar informasiyaları alırıq. Bir yerdə 3 faiz, digər yerdə 5 faiz, ən yaxşı halda 10 faiz artırılıb. Bir ilin içərisində 80-90 faiz maaşların və pensiyaların artırılması nümunəsinə dünyanın hansısa ölkəsində rast gəlinəcəyinə inanmaq mümkün deyil. Çünki bu qədər artımı təmin edəcək maddi əsaslar olmalıdır. Amma Azərbaycanda bu, faktdır. Bütün kateqoriyadan olan vətəndaşların əməkhaqları 40-50 faiz artırılıb. Bu qədər mütərəqqi addımlar atan, inkişaf edən, sabitliyə malik olan bir ölkədə qarşıdurma yaratmaq, çaxnaşma yaratmaq, ölkəni xaosa, anarxiyaya sürükləmək cəhdləri Azərbaycan dövlətinə, bütün ölkəyə qarşı törədilən ağır cinayətlərdən biridir. Bu, Azərbaycanın maraqlarının satılması deməkdir. Hesab edirəm ki, hər bir Azərbaycan vətəndaşı, Azərbaycan cəmiyyəti özünün kəskin münasibətini bu destruktiv qruplara bildirməlidir”.

Əli Əhmədov onu da qeyd edib ki, Azərbaycan vətəndaşları, cəmiyyətimiz bu cür destruktiv qruplara kifayət qədər etinasızlıqla yanaşır: “Cəmiyyətimiz onların qarşıdurma yaratmaq cəhdlərinə biganə deməzdim, əksinə, onlara layiq olan münasibəti bildirir. Onların hərəkətlərinə nəinki qoşulmurlar, kifayət qədər kəskin şəkildə pisləyirlər. Yeni Azərbaycan Partiyası, partiyanın çoxsaylı üzvləri Azərbaycan cəmiyyətinin mütləq əksəriyyətinin bu mövqeyini birmənalı şəkildə dəstəkləyir və hesab edirəm ki, toplantının məqsədi də bu dəstəyi ifadə etmək niyyəti daşıyır. Eyni zamanda, Azərbaycanın hüquq-mühafizə orqanlarının, polisin qeyri-qanuni aksiyanın qarşısının alınması ilə əlaqədar davranışını kifayət qədər sivil davranış kimi dəyərləndiririk. Aksiya iştirakçıları hüquq-mühafizə orqanlarını nə qədər qarşıdurmaya təhrik etsələr də bu cəhdlər baş tutmadı. Azərbaycan polisi özünün vəzifəsini layiqincə yerinə yetirdi. Məqsədli şəkildə qarşıdurma yaratmaq istəyənlərin niyyəti də boşa çıxdı. Eyni zamanda, hesab edirəm ki, Azərbaycan hüquq-mühafizə orqanları qanunu pozanlara qarşı kəskin şəkildə münasibətini bildirməli və hüquqi qiymətini verməyə çalışmalıdırlar. Əgər biz qanunlarımızı qorumasaq, qanunu pozanlara yerlərini göstərməsək, onlara layiqli cəzaları verməsək, belə olan halda haqsız şəkildə qanunu pozmağa cəhd edənlər hesab edirəm ki, cəzasız qalarlar, bu isə Azərbaycan cəmiyyəti tərəfindən düzgün başa düşülməz. Bu mənada biz toplantının mahiyyətinə əsaslanaraq bu xahişimizi səsləndirmək istəyirik ki, hüquq-mühafizə orqanları qanunun tələbləri çərçivəsində qanunvericiliyi pozmaq yolunu tutanlara hüquqi qiymətlərini versinlər”.

Milli Məclisin Hüquq siyasəti və dövlət quruculuğu komitəsinin sədri Əli Hüseynli çıxışında bildirib ki, Azərbaycan Prezidenti İlham Əliyevin həyata keçirdiyi siyasət xalqın istəkləri ilə üst-üstə düşür. O deyib ki, ölkəmizdə xalq-iqtidar birliyi möhkəm dayaqlara söykənir: “Məhz belə bir birliyə xələl gətirmək məqsədilə ölkə daxilindəki radikal müxalifət, xaricdə isə bir sıra qüvvələrin fəaliyyətini qanunsuz aksiyanın keçirilməsində müşahidə etdik. Bir müddət əvvəl “Sərbəst toplaşmaq azadlığı haqqında” qanuna dəyişikliklər edilib. Bu qanunda bir sıra vacib məsələləri, o cümlədən sərbəst toplaşmaq hüququnu həyata keçirən insanların hüquq və mənafelərinin qorunması məqsədilə bir sıra məhdudiyyətlər qoyulub. Bu məhdudiyyətlər Avropa İnsan Haqları Konvensiyasında mövcud olan məhdudiyyətlərdir. Biz onları götürərək milli qanunvericiliyə köçürmüşük”.

Komitə sədri söyləyib ki, hüquq-mühafizə orqanları həqiqətən də qanunsuz aksiya zamanı adekvat davranıblar: “Təəssüflər olsun ki, Avropa Birliyi özünün qeyri-adekvat mövqeyini nümayiş etdirib. Avropa Birliyinə üzv olan ölkələr Fransa və İspaniyada son dövrlər qanunsuz toplantılar zamanı polisin davranışı ilə Azərbaycan polisinin davranışını müqayisə etmək mümkün deyil. Azərbaycan polisi iğtişaş cəhdinə, qanunsuz aksiyaya baxmayaraq yenə də çox səbir və təmkinlə, qanunauyğun davranış nümayiş etdirib”.

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov isə bildirib ki, bəzi şər qüvvələr Azərbaycanı xaosa sürükləmək istəyir və biz həmin şər qüvvələrlə mübarizənin içərisindəyik. O qeyd edib ki, Azərbaycan dəfələrlə beynəlxalq təşkilatların ikili standartları ilə üzləşib: “Həmin qüvvələr indi də beynəlxalq təşkilatlar vasitəsilə deyil, daxildən Azərbaycanın sabitliyini pozmaq, ölkəni xaosa sürükləməyə cəhd edirlər. Ən faciəlisi isə odur ki, bunu demokratiya, insan haqları, qanunun aliliyi pərdəsi ilə örtməyə cəhd edirlər”.

Komitə sədri deyib ki, Avropa İttifaqı Azərbaycanda radikal müxalifətin keçirdiyi qanunsuz aksiyanı təhlil etməmiş bəyanat verib. Onun sözlərinə görə, Avropa İttifaqına daxil olan ölkələrdə, onun mərkəzi olan Brüsseldə nümayişçilərə güc tətbiq edilir: “Fransada baş verən hadisələrdə 11 nəfər həlak oldu, gözləri çıxan insanlar var idi. Biz beynəlxalq təşkilatlara öz müraciətimizi göndərməliyik. Biz Avropa Parlamentinə, Avropa Şurasına, ATƏT və digər təşkilatlara müraciət göndərib deməliyik ki, qanunun aliliyi haqqında danışan təşkilatlar qanunun aliliyini pozan insanları müdafiə etməməlidirlər. Avropanın özündə baş verən hadisələr ikili standartların nə qədər yüksək səviyyədə olduğunu göstərir. Mən əminəm ki, Azərbaycan xalqı hər şeyi çox gözəl görür”.

Milli Məclisin deputatı Elman Məmmədov çıxışında 1990-cı illərin əvvəlini xatırladıb. O bildirib ki, həmin illərdə də indiki destruktiv qüvvələr Azərbaycanda xaos yaratmışdılar. Millət vəkilinin sözlərinə görə, onlar hakimiyyətə gəlmək üçün bütün vasitələrdən istifadə edirdilər: “Bunun acı nəticələrindən biri də torpaqlarmızın bir-birinin ardınca Ermənistan tərəfindən işğal olunması idi. Həmin qüvvələr hakimiyyətə gəldikdən sonra respublikada vəziyyət daha da gərginləşdi, bir milyondan çox insan öz torpaqlarından məcburi köçkün vəziyyətinə düşdü. Mən təklif edirəm ki, o dövrün prosesləri televiziyalarda yenidən nümayiş etdirilsin və xalqımız hakimiyyətə gəlmək istəyənlərin əsl simasını bir daha görsün”.

Milli Məclisin deputatı Kamilə Əliyeva da çıxışında radikal müxalifətin ölkədə sabitliyi pozmaq cəhdlərini pisləyib. O deyib ki, millət vəkili kimi təmsil etdiyi bölgənin sakinləri də radikalların qanunsuz hərəkətlərini kəskin şəkildə pisləyirlər: “Çünki bu dairələrin məqsədi ölkəmizdə sabitliyi pozmaqdır. Azərbaycan vətəndaşları, o cümlədən seçicilərim müxalifətin belə fəaliyyətini qətiyyətlə rədd edir”.

Milli Məclisin Əmək və sosial siyasət komitəsinin sədri, YAP Siyasi Şurasının üzvü Hadi Rəcəbli bildirib ki, destruktiv qrupların məqsədi ölkədə hərc-mərclik yaratmaqdır. Onun sözlərinə görə, radikalların sosial sahə ilə bağlı səsləndirdiyi iddialar əsassızdır. Çünki bu sahədə dövlət tərəfindən ardıcıl olaraq tədbirlər həyata keçirilir.

Çıxış edən YAP Sabunçu rayon təşkilatı Gənclər Birliyinin üzvü Misirxan Həsənov isə Azərbaycan gəncliyinin Prezident İlham Əliyevin ətrafında sıx birləşdiyini bildirib. O qeyd edib ki, gənclər radikal müxalifətin qanunsuz hərəkətlərini pisləyir. M.Həsənov deyib ki, gənclər müstəqil dövlətimizə qarşı atılan hər bir addıma layiqincə cavab verməyə hazırdır.

Toplantıya yekun vuran YAP Sədrinin müavini - İcra katibi Əli Əhmədov bir daha vurğulayıb ki, cəmiyyətimizin müxtəlif təbəqələrinin nümayəndələri, o cümlədən gənclər destruktiv qrupların əməllərinə qarşı öz mövqeyini bildirməli, ölkəmizdəki ictimai-siyasi proseslərlə bağlı qərəzli mövqe nümayiş etdirən beynəlxalq təşkilatlara ünvanlamalıdırlar.

Nardar BAYRAMLI.- 22 oktyabr.- S.4